თბილისი. განათლებისა და მართვის გუნდში EMT ღია კარის დღეები დაიწყო. 4 სექტემბრიდან 10 სექტემბრის ჩათვლით EMT მომავალი ლიდერების, დებატების, მოგზაურობის მართვის, საერთაშორისო პროგრამების, მომავალი მენეჯერების კლუბებში გაწევრიანების მსურველებს უმასპინძლებს. სრულად წყარო: ltdemt.blogspot.com

თბილისი. ადამიანის უფლებების სწავლებისა და მონიტორინგის ცენტრმა თამთა მიქელაძის ბლოგ–პოსტი – „რატომ არ უნდა გადაწყდეს საკულტო ნაგებობის მშენებლობის საკითხი რეფერენდუმის გზით?" – გამოაქვეყნა. „სახელმწიფომ რელიგიური ნაგებობების მშენებლობის საკითხის გადაწყვეტის დროს მკაცრად უნდა დაიცვას სეკულარიზმის პრინციპი და მისი მიდგომები ადამიანის უფლებების დაცვის ხედვას დააფუძნოს. გარდა ამისა აღსანიშნავია, რომ სახელმწიფოს მიერ ჭელას მინარეთის აღმართვის დაუშვებლობა, მას შემდეგ რაც მისი მშენებლობა დღეს არსებული საკანონმდებლო რეგულაციების მოთხოვნებთან  შესაბამისობაში მოვა,  უკანონო იქნება. ამასთან იმ პირობებში, როდესაც დღეს არსებული საკანონმდებლო ჩარჩოს ფარგლებში შენდება და მოქმედებს არა ერთი ახლად აშენებული ქრისტიანული ეკლესია, ასეთი მიდგომის ჩვენება სახელმწიფოს მხრიდან  იქნება დისკრიმინაციული და არათანაბარ მდგომარეობაში ჩააყენებს მუსლიმ მოქალაქეებს", ნათქვამია ბლოგ–პოსტში.  სრულად წყარო: emcrights.wordpress.com

სამცხე–ჯავახეთი. დემოკრატ მესხთა კავშირის ოფისში, თანატოლთა განათლების ფარგლებში ახალციხის ახალგაზრდული ცენტრის წევრმა ვიქტორია ეგიანმა წარადგინა პრეზენტაცია თემაზე:განათლების სისტემა აშშ-ში. ღონისძიება ჩატარდა პროექტ ეროვნული ინტეგრაციის გაძლიერება საქართველოში ფარგლებში, რომელსაც ახორციელებს საქართველოს გაეროს ასოციაცია, ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით.  წყარო:ორგანიზაციის გვერდი სოციალურ ქსელში

აჭარა. სამეცნიერო – ინტელექტუალური კლუბი „თაობათა დიალოგი" ქობულეთში ატარებს ტრენინგ კურსს –Multiplayer effect. ტრენინგში, რომლის მიზანია ევროპის მოხალისეთა სერვისის თოაბაზე ინფორმაციისა და გამოცდილების გაზიარება, 14 ქვეყნის 41 წარმომადგენელი იღებს მონაწილეობას. კურსი 31 აგვისტოს დაიწყო და 9 სექტემბერს დასრულდება. ღონისძიება ხორციელდება პროგრამის – „ახალგაზრდობა მოქმედებაში" ფარგლებში, რომელიც დაფინანსებულია ევროკომისიის მიერ.  წყარო:ორგანიზაციის გვერდი სოციალურ ქსელში

4 სექტემბერს, 13:30 საათზე, „ახალგაზრდა უფლებადამცველთა ასოციაციის" წარმომადგენლები „მეცხრე არხში" განვითარებულ მოვლენებთან დაკავშირებით პრესკონფერენციას გამართავენ. მისამართი:თბილისი, პრაიმტაიმის პრესკლუბი

4 სექტემბერს, 13:00 საათზე, „საქართველოს ჟურნალისტური ეთიკის ქარტია" პრესკონფერენციას გამართავს. თემა: „საქართველოს ჟურნალისტური ეთიკის ქარტია" იწყებს ახალ მედია პროექტს 2013 წლის 27 ოქტომბერს დაგეგმილი არჩევნებისთვის". მისამართი:თბილისი, სასტუმრო ქორთიარდ მარიოტი

4 სექტემბერს, 12:00 საათზე, ბათუმში გაიხსნება ანა ფრანკის სახლის (ამსტერდამი) ორი გამოფენა - „იკითხე და წერე ანა ფრანკთან ერთად" და „ანა ფრანკი - აქტუალური ისტორია". გამოფენას ოფიციალურად გახსნის „თავისუფალ ჟურნალისტთა სახლი" და საქართველოს გაეროს ასოციაცია. გამოფენა განკუთვნილია 10-16 წლის მოზარდებისათვის. იგი ღიაა ყოველ დღე და მუშაობს 10:00 საათიდან 19:00 საათის ჩათვლით. გამოფენა ბათუმში დარჩება 9 სექტემბრამდე. მისამართი:ბათუმი, აკაკი წერეთლის სახელობის საჯარო ბიბლიოთეკა

თბილისი. „შინაგან საქმეთა სამინისტროს არქივში არსებული მოქალაქეების პირადი ცხოვრების ამსახველი ვიდეოკადრები, რომლებიც უკანონოდ იყო ჩაწერილი და მოპოვებული, საჯაროდ, მედიის თანდასწრებით ხუთშაბათს, 5 აგვისტოს 3 საათზე ე.წ. მოდულის შენობაში განადგურდება". ამის შესახებ საერთაშორისო გაჭვირვალობა საქართველომ ინფორმაცია სოციალურ ქსელში გაავრცელა. ორგანიზაციის განცხადებით შსს-ში შექმნილმა სპეციალურმა კომისიამ გადაწყვეტილება 2 სექტემბერს გამართულ გაფართოებულ სხდომაზე მიიღო, რომელსაც შინაგან საქმეთა და იუსტიციის მინისტრები ესწრებოდნენ. წყარო:ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტუმა შუახევისა და თიანეთის მუნიციპალიტეტების გამგეობებიდან მიღებული ინფორმაცია გამოაქვეყნა. ვებ–გვერდზე განთავსდა ინფორმაცია ორგანიზაციის ბალანსის, პრემიების, სახელმწიფო შესყიდვების, ავტოპარკის, საკუთარი განცხადების საფუძველზე განთავისუფლებული თანამშრომლების, ხელმძღვანელობის მიერ განთავისუფლებული თანამშრომლების შესახებ. ინფორმაცია შუახევის მუნიციპალიტეტის გამგეობიდან ინფორმაცია თიანეთის მუნიციპალიტეტის გამგეობიდან წყარო: opendata.ge

აჭარა.  3 სექტემბერს, არასამთვრობო ორგანიზაცია „ახალგაზრდა ადვოკატებმა" ქობულეთის მუნიციპალიტეტის თვითმმართველობის 2012 წლის საქმიანობის საჯაროობისა და გამჭვირვალობის შესახებ კვლევის შედეგები წარმოაგინა.  დოკუმენტში ვრცლადაა განხილული 2012 წლის ბიუჯეტის ხარჯვითი წარმომადგენლობითი ორგანოების ხარჯვითი ნაწილი , სატენდერო გარემო, მივლინებები, მიღებული პრემიები, გაღებული საოფისე ხარჯები და სხვა. ორგანიზაცია წარმოდგენილი ფაქტობრივი და სამართლებრივი მასალების საფუძველზე აქვეყნებს დასკვნას და სარეკომენდაციო წერილს, რომლითაც მოუწოდებს საქართველოს აღმასრულებელ და საკანონმდებლო ხელისუფლებას განახორციელოს ეფექტური კონტროლი.

თბილისი. საერთაშორისო გაჭვირვალობა საქართველომ ბლოგპოსტი – „პერსონალურ მონაცემთა დაცვის ინსპექტორის უფლებები და მოვალეობები" – გამოაქვეყნა. „საქართველოში ახალი სამთავრობო უწყება ამუშავდა, რომლის მოვალეობაც მოქალაქეთა პირადი მონაცემების ხელშეუხებლობის დაცვაა. თუმცა, პერსონალურ მონაცემთა დაცვის ინსპექტორის ძალაუფლება შესაძლოა არ იყოს საკმარისი შინაგან საქმეთა სამინისტროს მიერ ელექტრონულ კომუნიკაციებზე სისტემატური უკანონო თვალთვალის შესაჩერებლად", ნათქვამია ბლოგპოსტში.  სრულად წყარო: transparency.ge

თბილისი. ენერგოეფექტურობის ფონდის, ფონდი - „კავკასიის ეკოლოგია", კავშირი „ეკოტეკის" და რადიო „მწვანე ტალღის" მიერ არასამთავრობო ორგანიზაციათა კოალიციის - საქართველოს მწვანეთა მოძრაობა/დედამიწის მეგობრები-საქართველოს საერთო მენეჯმენტით,  მომზადდა ელექტრონული ბროშურა. ელექრონული ბროშურაში მოცემულია ინფორმაცია პროექტის ფარგლებში (ივლისის ჩათვლით) განხორციელებული საზოგადოებრივი მონიტორინგისა და ჩატარებული კვლევევის შესახებ, რომელიც ეხება ონის რაიონში დაგეგმილი ჰიდროელექტროსადგურების კასკადის მშენებლობას. აღწერილია ყველა ის კონკრეტული საქმიანობა, რომელიც პროექტის მიმდინარეობისას განხორციელდა. წარმოდგენილია ექსპერტების მოსაზრებები დაგეგმილი ჰიდროელექტროსადგურების კასკადის მშენებლობისას მოსალოდნელი საფრთხეებისა და საზოგადოებრივი პოზიციის შესახებ.  ბროშურა მომზადდა ევრაზიის თანამშრომლობის ფონდის მიერ დაფინანსებული პროექტის –„სამოქალაქო მონიტორინგის ხელშეწყობა ჰიდროელექტროსადგურების მშენებლობისას" – ფარგლებში.  ბროშურა  წყარო:CENN

3 სექტემბერს, 13:45 საათზე კავშირი „ენერგოეფექტურობის ცენტრი საქართველოს" ოფისში ტარდება პრეზენტაცია-სემინარი  „JEV–ის სისტემის ენერგო მონაცემების მონიტორინგი და ფუნქციები". მისამართი: თბილისი, დ. გამრეკელის  ქუჩა #19; მე-6 სართული; ოფისი #611

თბილისი. ინფორმაციის თავისუფლების განვითარების ინსტიტუტმა ონის, სამტრედიისა და საჩხერის მუნიციპალიტეტების გამგეობებიდან მიღებული ინფორმაცია გამოაქვეყნა. ვებ–გვერდზე განთავსდა ინფომაცია ორგანიზაციის ბალანსის, თანამდებობის პირების პრემიების, თანამშრომლების, სახელმწიფო შესყიდვების, ავტოპარკის, განთავისუფლებული თანამშრომლების შესახებ. ინფორმაცია ონის მუნიციპალიტეტის გამგეობიდან ინფორმაცია სამტრედიის მუნიციპალიტეტის გამგეობიდან ინფორმაცია საჩხერის მუნიციპალიტეტის გამგეობიდან  წყარო: opendata.ge

თბილისი. 2 სექტემბერს საქართველოს ახალგაზრდული პარლამენტის 2013 წლის მოწვევის 10-მა კომიტეტმა მუშაობა განაახლა. კომიტეტები განაგრძობენ საკანონმდებლო წინადადებებისა და რეკომენდაციების შემუშავებას, რომელსაც აწვდიან და განიხილავენ საქართველოს პარლამენტსა და მთავრობასთან ერთად. მიმდინარე ეტაპზე საქართველოს პარლამენტში განიხილება ახალგაზრდული პარლამენტის იურიდიულ საკითხთა კომიტეტის ინიციატივა ლუდომანიის შესახებ, რომელიც საქართველოს პარლამენტის ჯანმრთელობის დაცვისა და ადამიანის უფლებათა დაცვის კომიტეტებმა სრული მხარდაჭერით საკანონმდებლო ინიციატივად დაამტკიცეს, ხოლო საშემოდგომო სესიის ფარგლებში იურიდიულ საკითხთა კომიტეტი განიხილავს და მიიღებს გადაწყვეტილებას მისი ინიციატივად დამტკიცების თაობაზე. წყარო:ორგანიზაციის გვერდი სოციალურ ქსელში

თბილისი. ადამიანის უფლებათა ცენტრის ვიდეო პორტალმა – www.hridc.tv – ფილმი – „ანია, ლენონი და ვიზა" – გაავრცელა. ფილმში ფოტოგრაფი ანია გოგუაძე საკუთარი ცხოვრების, გატაცებებისა და ოცნების შესახებ საუბრობს.  ფილმი   წყარო: hridc.tv

იმერეთი. „საერთაშორისო გამჭვირვალობა – საქართველოს" სასარჩელო მოთხოვნა ქუთაისის საქალაქო სასამართლომ სრულად დააკმაყოფილა და ბათილად ცნო ქუთაისის მერის დიმიტრი კოპალიანის ბრძანება მერის მოადგილის კოტე რატიანის თანამდებობიდან გათავისუფლების შესახებ. „დღეის მდგომარეობით, „საერთაშორისო გამჭვირვალობა – საქართველომ" ქუთაისის მერიის წინააღმდეგ უკვე 8 პროცესი მოიგო, რომელიც ქუთაისის მერიაში რეორგანიზაციის შედეგად გათავისუფლებული თანამშრომლების სამსახურში აღდგენას უკავშირდება". სრულად წყარო:ორგანიზაციის გვერდი სოციალურ ქსელში

თბილისი. 30 აგვისტოს ცენტრი „აფხაზეთის" თბილისის ოფისში ჩატარდა თანამშრომელთა საინფორმაციო შეხვედრა, სადაც განიხილეს პროექტის განვლილი ეტაპები და მიღწეული შედეგები. შეხვედრა შედგა NEO-USAID-ის პროექტის – „ბინათმესაკუთრეთა/მობინადრეთა ამხანაგობის შექმნა და განვითარება" – ფარგლებში. პროექტის ახალ საფეხურზე გადასვლასთან დაკავშირებით დაიგეგმა პროექტის მოსარგებლეებისათვის ჩასატარებელი ბიზნეს ტრენინგების განრიგი და პროექტის ფარგლებში შექმნილი ამხანაგობების მონიტორინგის გრაფიკი. შეხვედრაზე განიხილეს ახალი ინიციატივა - ამხანაგობებისთვის მოსაკრებელის რეგისტრაციის ჟურნალის შემუშავება, რაც ხელს შეუწყობს მომავალში მათი ხარჯების კონტროლს და საერთო ფონდში ფულადი წვლილის შეტანის კულტურის დანერგვას. წყარო:ორგანიზაციის გვერდი სოციალურ ქსელში

სამეგრელო. საქართველო  27-30  აგვისტოს  USAID-ის პროგრამამ  „INRMW" წყალშემკრები აუზების  მართვის გეგმის პრეზენტაცია-განხილვა  ხობისა და სენაკის მუნიციპალიტეტების  დაინტერესებული მხარეებისთვის მოაწყო. პრეზენტაცია მოეწყო GLOWS-ის კონსორციუმის წევრების,  ფლორიდის საერთაშორისო უნივერსიტეტის წარმომადგენლობის (ROFIU-GE), CARE საერთაშორისოს, ვინროკ საერთაშორისოსა და CENN მიერ. წყარო:CENN

ქვემო ქართლი. 31 აგვისტოს, არასამთავრობო ორგანიზაცია „საქართველოს აზერბაიჯანელ ქალთა კავშირის" ორგანიზებით  ბოლნისის რაიონის სოფლების მოსახლეობა გაეცნო ცენტრალური საარჩევნო კომისიის ეროვნული უმცირესობების ამომრჩევლებისათვის თანაბარი საარჩევნო გარემოს უზრუნველყოფის მიზნით, პრეზიდენტის არჩევნებისთვის მზადების პროცესში უკვე განხორციელებულ აქტივობებს, ასევე სამომავლოდ დაგეგმილ ღონისძიებებს.  შეხვედრა განხორციელდა, პროექტის - „საარჩევნო პროცესებში ეთნიკური უმცირესობების სამოქალაქო პასუხისმგებლობის გაზრდა და ამომრჩევლის როლის გააქტიურება" – ფარგლებში.  წყარო:ეთნოსთაშორისო თანამშრომლობისა და კონსულტაციების ანალიტიკური ცენტრის გვერდი სოციალურ ქსელში

3 სექტემბერს, 12:30 საათზე," უფლებადამცველთა ასოციაცია" სასჯელაღსრულების სამინისტროს და პატიმრების პრობლემებთან დაკავშირებით ბრიფინგს გამართავს.  მისამართი:თბილისი, პეკინის 4ა, V სართ.

3 სექტემბრს, 12:00 საათზე, ორგანიზაცია „ახალგაზრდა ადვოკატები" კვლევის „ქობულეთის მუნიციპალიტეტის საკრებულოს გამჭვირვალობა და საჯაროობა 2012 წელს" პრეზენტაციას გამართავს.  მისამართი: ბათუმი, ფარნავაზ მეფის ქ. #62–64, დემოკრატიული ჩართულობის ცენტრი