სამეგრელო. კლიმატის ცვლილებისადმი  მიძღვნილი კვირეულის ფარგლებში 22 ოქტომბერს, დემოკრატიული ჩართულობის ცენტრში, ორგანიზაცია „მწვანეთა მოძრაობის" ინიციატივით, დისკუსია გაიმართა. მომხსენებლებმა ისაუბრეს ქალაქის დასუფთავებასა და კლიმატის ცვლილებებზე.  კვირეულის ფარგლებში გაიმართება სხვადასხვა ღონისძიება:  ღია გაკვეთილი კლიმატის ცვლილების შესახებ,  გასვლითი თეატრალიზებული ღონისძიება ზუგდიდის ბოტანიკურ ბაღში. პროექტის კოორდინატორის, ვახტანგ ბასილაიას თქმით „ღონისძიებების მიზანია საზოგადოების ცნობიერების ამაღლება და მისი ჩართვა მყარი საყოფაცხოვრებო ნარჩენების მართვის გაუმჯობესების პროცესში".  კვირეული, რომელსაც რამდენიმე არასამთავრობო ორგანიზაცია  21–დან 28  ოქტომბრის ჩათვლით მთელ საქართველოში ახორციელებს, დაფინანსებულია შვედეთის საერთაშორისო განვითარების სააგენტოს მიერ.

თბილისი. საზოგადოებრივმა ორგანიზაციამ „ინტერნიუს-საქართველო" 2012 წლის 18 სექტემბერი - 15 ოქტომბრის პერიოდში 12 რადიო სადგურის საღამოს საინფორმაციო გამოშვებების მონიტორინგი განახორციელა. ეს რადიოებია: რადიო „ფორტუნა", რადიო „ცხელი შოკოლადი", რადიო „თავისუფლება", რადიო „იმედი",რადიო „უცნობი", რადიო „ჰერეთი", რადიო „პალიტრა", რადიო „მწვანე ტალღა", რადიო „ათინათი", „რადიო 1", რადიო „ძველი ქალაქი", რადიო „აფხაზეთის ხმა".  მედია მონიტორინგი ხორციელდება ევროკავშირისა და გაეროს განვითარების პროგრამის მიერ დაფინანსებული პროექტის "პროფესიონალური მედია არჩევნებისთვის" ფარგლებში. პროგრამის მთავარი მიზანია საპარლამენტო და საპრეზიდენტო არჩევნების პერიოდში, პროფესიული, მიუკერძოებელი და დაბალანსებული მედია გაშუქების ხელშეწყობა მონიტორინგის გზით. ხორციელდება ქართული ტელე, რადიო, ბეჭდური და ონლაინ მედია საშუალებების რაოდენობრივი და თვისებრივი წინასაარჩევნო მონიტორინგი. მონიტორინგს ახორციელებენ სლოვაკური კომპანია "მემო 98"-ის მიერ გაწვრთნილი ქართული სამოქალაქო ორგანიზაციები. მონიტორინგის შედეგები განიხილება, მოწვეულ მედია ექსპერტებთან ერთად, ყოველკვირეულ გადაცემაში - "მედია მონიტორი" საზოგადოებრივი მაუწყებლის ეთერში.  რადიოების  მედია მონიტორინგის შედეგები წყარო: mediamonitor.ge

  აჭარა. შიდა ქართლი. 19-21 ოქტომბერს სურამის მე-3 საჯარო სკოლის სამოქალაქო კლუბი ,,ჩვენ" შიდა ქართლის რეგიონალური პარტნიორი ორგანიზაციისა და აჭარის პარტნიორი ორგანიზაციის ხელშეწყობით იმყოფებოდა ბათუმის 25-ე საჯარო სკოლაში, სადაც მოეწყო ბათუმის და შიდა ქართლის სამოქალაქო კლუბების საქმიანობების პრეზენტაცია. ამავე დროს კლუბის ლიდერებმა ხელი მოაწერეს თანამშრომლობის მემორანდუმს, რომელიც გულისხმობს ერთობლივ ინიციატივებს, ერთობლივ პროექტებსა და გაცვლით ღონისძიებებს. წამოსვლისას კლუბის წევრებმა დაათვალიერეს ბათუმის მხარეთმცოდნეობის და ხელოვნების მუზეუმები.  

ქვემო ქართლი. საგანმანათლებლო ინიციატივების ქართული ასოციაცია (სიქა) იწვევს 10-15 წლის მოზარდებს, რომლებიც დაინტერესებულნი არიან ორიგამის ხელოვნებით ან სურვილი აქვთ შეისწავლონ უძველესი იაპონური კულტურა.  „ორიგამი-დო"-ს შეხვედრებზე მონაწილეები განივითარებენ უნარებს, რომელიც დაეხმარება მათ ქაღალდის ფურცლისგან შექმნან ოთახის გასალამაზებელი დეკორატიული მოდელები და ის დეკორაციები, რომლებიც გამოიყენება პრაქტიკულ ცხოვრებაში.  შეხვედრები გაიმართება კვირაში ერთხელ, ორშაბათობით. კლუბის ხელმძღვანელია „ევროპული მოხალისეთა სერვისის" მოხალისე პოლონეთიდან ლუკაშ სამულნიკი.  სრულად წყარო: ორგანიზაციის გვერდი სოციალურ ქსელში 

გურია. 17 ოქტომბერს სამოქალაქო განათლებისა და პედაგოგთა გადამზადების პროგრამის ფარგლებში გურიის ცხრამეტი სამოქალაქო კლუბის წარმომადგენლებმა  სტუმრად   ოზურგეთის №60 ოლქის  საარჩევნო კომისიის თავმჯდომარე ზვიად თენიეშვილი და იურისტი გიორგი ხუროშვილი მოიწვიეს. შეხვედრა გურიის ახალგაზრდულ რესურსცენტრში შედგა და ძირითადი სასაუბრო თემა კენჭისყრის პროცედურები და ზოგადად არჩევნების წარმართვასთან დაკავშირებული საკითხები იყო.  პროგრამა ხორციელდება PH International ამერიკის საერთაშორისო განვითარების სააგანეტოს დაფინანსებით. გურიაში პროგრამის პარტნიორია გურიის ახალგაზრდული რესურსცენტრი. 

23 ოქტომბერს, 13:00 საათზე, ბათუმის დემოკრატიული ჩართულობის ცენტრის ორგანიზებით გაიმართება საჯარო დისკუსია თემაზე - „აჭარის მთავრობის თავმჯდომარე: დანიშვნითი თუ არჩევითი თანამდებობა”?! მისამართი: ბათუმი, ფარნავაზ მეფის 62/64, დემოკრატიული ჩართულობის ცენტრი.

მცხეთა–მთიანეთი. 19 ოქტომბერს საქართველოს ადგილობრივ თვითმმართველობათა ეროვნულმა ასოციაციამ დუშეთის მუნიციპალიტეტში პირველი ფოკუს-ჯგუფის შეხვედრა გამართა. საბაზისო კვლევის ”კლიმატის ცვლილების ზეგავლენის შერბილება და ადაპტაცია ადგილობრივ დონეზე” ფარგლებში ჩატარებულ პირველ საჯარო შეხვედრას  ესწრებოდნენ მუნიციპალიტეტის ადგილობრივი თვითმმართველობის, ადგილობრივი არასამთავრობო ორგანიზაციების წარმომადგენლები  და ექსპერტები.  შეხვედრაზე განხილულ იქნა დუშეთის მუნიციპალიტეტში სპეციალური კითხვარის საშუალებით მოპოვებული ინფორმაცია და გაიმართა დისკუსია. საბაზისო კვლევა ”კლიმატის ცვლილების ზეგავლენის შერბილება და ადაპტაცია ადგილობრივ დონეზე”  საქართველოს ყველა მუნიციპალიტეტში განხორციელდება და მიზნად ისახავს კლიმატის ცვლილებასთან დაკავშირებული პრობლემებისა და გამოწვევების დეტალურ შეფასებას. აღნიშნული საბაზისო კვლევა, ასევე ადაპტაციისა და კლიმატის დაცვის  საერთაშორისო გამოცდილებისა და ადგილობრივი ხელისუფლების შესაძლებლობების ანალიზი  საფუძვლად დაედება საქართველოს მუნიციპალიტეტების ”კლიმატის გზამკვლევის” შემუშავებას. პირველი სამუშაო შეხვედრა პროგრამის ,,საქართველოს რეგიონებში კლიმატის ცვლილებისადმი ადაპტაციისა და ზეგავლენის შერბილების ზომების ინსტიტუციონალიზაცია” ფარგლებში  ჩატარდა, რომელიც ხორციელდება საქართველოს ადგილობრივ თვითმმართველობათა ეროვნული ასოციაციის მიერ და ამერიკის შეერთებული შტატების საერთაშორისო განვითარების სააგენტოს (USAID) ძალისხმევის საფუძველზე. წყარო: CENN

თბილისი. ცენტრ „აფხაზეთის" თბილისის ოფისში სესხის კომიტეტის სხდომა გაიმართა, რომელზეც პოტენციური მსესხებლების მიერ წარმოდგენილი ბიზნეს გეგმები განიხილეს.  სესხის კომიტეტის გადაწყვეტილებით ყველაზე სიცოცხლისუნარიანი და ეფექტური ბიზნეს გეგმების ავტორებს უპროცენტო სესხები გადაეცემათ მათი ბიზნეს საქმიანობის მხარდასაჭერად. სესხების გაცემა მიმდინარე კვირას დაიწყება.  შეხვედრა პროექტის - „შემოსავლების გენერირებისა და ბიზნესის მხარდაჭერის ინიციატივა" - ფარგლებში გაიმართა. სრულად წყარო: ორგანიზაციის ოფიციალური გვერდი სოციალურ ქსელში

თბილისი. საზოგადოებრივი ორგანიზაციები ეხმაურებიან საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრობის კანდიდატად დავით დარახველიძის დასახელებას. ისინი გამოთქვამენ შეშფოთებას, რომ მინისტრობის კანდიდატის მიერ ამბროლაურის რაიონში ჩატარებული საარჩევნო კამპანიის დროს გამოყენებულ იქნა სიძულვილის ენა და რასისტული გამონათქვამები, ასევე, აგრესიული ტონი მასმედიასთან ურთიერთობისას.  საზოგადოებრივი ორგანიზაციები სთხოვენ პრემიერ–მინისტრის კანდიდატს უფრო მეტი სიფრთხილე გამოიჩინოს კანდიდატების შერჩევაში,  ხოლო საჯარო მოხელეები მეტი პასუხისმგებლობით მოეკიდონ საჯარო გამონათქვამებს და თავი შეიკავონ სიძულვილის ენისა და რასისტული გამონათქვამებისგან. სრულად წყარო: osgf.ge

24 ოქტომბერს, 19:00 საათზე, ჰაინრიჰ ბიოლის ფონდის სამხრეთ კავკასიის რეგიონალურ ბიუროში ჩატარდება საჯარო დისკუსია თემაზე: „ადამიანის უფლებების პრიორიტეტი: სახალხო დამცველის როლი და მისია - საზოგადოებრივი მოლოდინები და შესაძლებლობები ცვლილებისათვის". მომხსენებლები: თამარ გურჩიანი - იურისტი;  დიმიტრი ლორთქიფანიძე - იურისტი, საქართველოს მეშვიდე მოწვევის პარლამენტის წევრი; ლია მუხაშავრია - ადვოკატი, „ადამიანის უფლებათა პრიორიტეტის" აღმასრულებელი დირექტორი; გელა ნიკოლაიშვილი - უფლებადამცველი, ადვოკატი. მოდერატორი: გოგი გვახარია (რადიო თავისულება) მისამართი: თბილისი, ზოვრეთის ქუჩა #38

23 ოქტომბერს, 18:00 საათზე, ფონდი "სმირნოვი და საროკინი" წარმოადგენს პროექტს – "სატურნალია".  მისამართი: ბათუმი, მ.აბაშიძისა და ზ.გამსახურდიას ქუჩების გადაკვეთა, "სახელოვნებო სივრცე"

იმერეთი. 21 ოქტომბერს საქართველოს პარლამენტის ახალ შენობასთან კლიმატის ცვლილებების კვირეული გაიხსნა. მასში მონაწილეობა მიიღეს საქართველოში მოქმედი გარემოსდაცვითი და სამოქალაქო სექტორის წარმომადგენლებმა. კვირეულში მონაწილე არასამთავრობო ორგანიზაციების მიერ დაგეგმილია მე-8 მოწვევის საქართველოს პარლამენტის წევრებსა და პარლამენტის გარემოს დაცვისა და ბუნებრივი რესურსების კომიტეტის თავმჯდომარეობის კანდიდატის, გია ცაგარეიშვილისთვის  გარემოსდაცვით საკითხებთან დაკავშირებით შემუშავებული მიმართვის ტექსტის გადაცემა. კლიმატის კვირეულის ორგანიზატორია საქართველოს მწვანეთა მოძრაობა/დედამიწის მეგობრები-საქართველო. კვირეულის მიზანია, საზოგადოების მობილიზება და მისი აქტიური ჩართვა კლიმატის ცვლილებით გამოწვეული პრობლემების შერბილების პროცესებში. კვირეული ისევე როგორც წინა წლებში ტარდება მთელი ქვეყნის მასშტაბით და მის ფარგლებში მთელი კვირის განმავლობაში სხვადასხვა ღონისძიებაა დაგეგმილი.

თბილისი. თბილისის 77-ე საჯარო სკოლის სააქტო დარბაზში გაიმართა სამოქალაქო კლუბის "Dream club”-ის  წევრების ინიციატივით დაბეჭდილი ჟურნალის "Dream”-ის პრეზენტაცია. ჟურნალის მიზანია სამოქალაქო განათლების და კლუბის საქმიანობის პოპულარიზაცია.  კლუბის ლიდერებმა შეხვედრაზე მოწვეულ სტუმრებს გააცნეს კლუბის მიერ ჩატარებული სამოქალაქო აქტივობები და  ინიციატივები, როგორიცაა  „უსაფრთხო ქუჩა" და „არა ვანდალიზმს". კლუბმა ასევე წარადგინა  პროგრამის ფარგლებში შექმნილი ბლოგისა და ფეისბუქის გვერდები.  შეხვედრას ესწრებოდნენ საქართველოს იუსტიციის სამინისტროს დანაშაულის პრევენციისა და ინოვაციური პროგრამების ცენტრის დირექტორი, ფონდი თბილისის მოზარდთა სახლის წარმომადგენელი, 77-ე სკოლის ადმინისტრაცია, პედაგოგები, მოსწავლეები და სამოქალაქო კლუბის წევრები სხვადასხვა სკოლიდან.  ჟურნალის ელექტრონული ვერსია გამოიცემა ყოველთვიურად და მასში გაშუქდება კლუბის  საქმიანობა, მიღწევები და სხვადასხვა საინტერესო საკითხი. სრულად წყარო: civics.ge

თბილისი. 19 ოქტომბერს კოალიციამ  „მედიის ადვოკატირებისათვის"  მედიაგარემოს გაუმჯობესებისათვის შემუშავებული წინადადებებით საქართველოს პარლამენტსა და მთავრობას მიმართა.  კოალიციის წევრებმა აქცენტი იმ თემებზე გააკეთეს, რომელთა რეფორმირება, მათი აზრით, სასიცოცხლოდ მნიშვნელოვანია მედიაგარემოს გაუმჯობესებისათვის. კოალიციის „მედიის ადვოკატირებისათვის" წინადადებები მომავალ მთავრობას და პარლამენტს წყარო: .osgf.ge

იმერეთი. საქველმოქმედო ჰუმანიტარული ცენტრი „აფხაზეთის" გორის ოფისმა EVS აკრედიტაცია მოიპოვა. ამიერიდან ცენტრ „აფხაზეთს" საშუალება ეძლევა ევროპელ მოხალისეებს უკვე ორგანიზაციის გორის ოფისშიც უმასპინძლოს. წყარო: chca.org.ge

თბილისი. საქართველოში კლიმატის ცვლილების კვირეული დაიწყო. ღონისძიების მიზანია, საზოგადოების მობილიზება და მისი აქტიური ჩართვა კლიმატის ცვლილებით გამოწვეული პრობლემების შერბილების პროცესებში. ამ ყოველწლიურ კვირეულს საქართველოში უკვე მეოთხედ უწევს ორგანიზებას მწვანეთა მოძრაობა საქართველო / დედამიწის მეგობრები - საქართველო.  კვირეულის ფარგლებში პროგრამა „ადგილობრივი შესაძლებლობების გაზრდა და რეგიონული თანამშრომლობის გაღრმავება კლიმატის ცვლილებასთან ადაპტაციისა და ბიომრავალფეროვნების დაცვის მიზნით საქართველოსა და სამხრეთ კავკასიაში",  გეგმავს ბავშვთა ნახატების გამოფენის „ბუნება და ბავშვები" მოწყობას შვიდ მიზნობრივ მუნიციპალიტეტში: დედოფლისწყარო, სიღნაღი,საგარეჯო, მარნეული, ბოლნისი, დმანისი და ნინოწმინდა. გამოფენის დღეს, ნახატების ავტორი ბავშვები დაჯილდოვდებიან მადლობის სიგელებით და საჩუქრებით, რომელსაც მათ პროგრამის განმახორციელებელი ორგანიზაციები გადასცემენ. კლიმატის ცვლილების კვირეული საქართველოში ევროკომისიის დელეგაციის ფინანსური მხარდაჭერით ტარდება.  ღონისძიების სლოგანია: დავიწყოთ მცირედით - ერთად და ნელ-ნელა! წყარო: CENN

სამეგრელო. ასოციაცია „დეასთან" არსებულმა იურიდიულ-საკონსულტაციო ცენტრმა შეზღუდული შესაძლებლობების მქონე (შშმ) პირთა უფლებრივი მდგომარეობის გაუმჯობესების მიზნით შეხვედრა გამართა. შეხვედრას ესწრებდონენ შეზღუდული შესაძლებლობების მქონე პირები, მათი ოჯახის წევრები, იურისტები, არასამთავრობო სექტორი და მედიის წარმომადგენლები. შეხვედრა დემოკრატიული ჩართულობის ცენტრში 19 ოქტომბერს გაიმართა.   ასოციაცია „დეას" იურისტმა ბაკურ გოგოხიამ შეხვედრის მონაწილეებს შეზღუდული შესაძლებლობებების მქონე პირების უფლებების დარღვევის კონკრეტული მაგალითები გააცნო. საუბარი იყო იმ ადამიანებზე, რომლებიც მოუწესრიგებელი ინფრასტრუქტურის გამო სახლიდან გასვლას ვერ ახერხებენ. თავის მხრივ,  „დეასთან" არსებული, იურიდიულ-საკონსულტაციო ცენტრის იურისტმა გურამ ყუფუნიამ განაცხადა, რომ „ამ ადამიანებს ერიდებათ და საკუთარი უფლებების დარღვევის შესახებ საქმე სასამართლოში არ შეაქვთ". შეხვედრას ესწრებოდნენ ზუგდიდის შოთა მესხიას სახელობის უნივერსიტეტის სტუდენტები, რომლებიც ჩართულები არიან იურიდიულ-საკონსულტაციო ცენტრის მუშაობაში და მზად არიან, შეზღუდული შესაძლებლობების მქონე პირებს უფლებების დაცვაში დაეხმარონ.

აჭარა. ასოციაციაში  „ღირსეული სიბერე"  პროექტის „ხანდაზმულთა სოციალური ცენტრი" ფარგლებში შექმნილია  ადვოკატირების ჯგუფი, რომელიც უმწეო ხანდაზმულთა  აქტუალური საკითხების ადვოკატირებას ახორციელებს და მათ  პრობლემებს ადგილზე მისვლით ეცნობა. ხანდაზმულთა პრობლემების გადაწყვეტას ემსახურება ასევე შეხვედრები გადაწყვეტილების მიმღებ პირებთან ,,მრგვალი მაგიდის"  ფორმატში.   სრულად წყარო: awa.org.ge

იმერეთი. ქუთაისის ოცხელის სახელობის მე-2 საჯარო სკოლაში სამოქალაქო განათლების მოსწავლეთა ფორუმი გაიმართა. ფორუმში მონაწილეობას ქუთაისის საჯარო სკოლების სამოქალაქო კლუბის წევრები და სამოქალაქო განათლების პედაგოგები იღებდნენ. ფორუმის ძირითადი მიზანია თემში, სკოლაში არსებული პრობლემის გამოვლენა და მათი ადვოკატირება, თემის ბიზნესის სექტორის და ხელისუფლების მონაწილეობა. ქუთაისის განათლების განვითარების და დასაქმების ცენტრის დირექტორი ლია კილაძე იმედს გამოთქვამს, რომ ფორუმის მუშაობის შედეგად მიიღება მოსწავლეების მიერ დაგეგმილ 10 ინიციატივა,  რომელიც შემდეგ განხორციელდება და მიზანმიმართული იქნება კონკრეტული გადაწყვეტილებების მიღებისკენ თვითმმართველობის, თემის და ბიზნესის წარმომადგენლების მონაწილეობით. პროგრამის მიზანია გააუმჯობესოს სამოქალაქო განათლების სასკოლო პროგრამის ხარისხი და გააქტიუროს ახალგაზრდების მონაწილეობა დემოკრატიული საზოგადოების მშენებლობის პროცესში. პროგრამა ხორცილედება განათლების და მეცნიერების სამინისტროს მხარდაჭერით. იმერეთის მასშტაბით აღნიშნულ პროგრამაში 125 საჯარო სკოლაა ჩართული. იმერეთში 44 სამოქალაქო კლუბია დაფუძნებული. ფორუმზე მონაწილეები სამუშაო ჯგუფებად დაიყვნენ და მოახდინეს თემის, სკოლის პროგრამის იდენტიფიცირება.

შიდა ქართლი. საზოგადოება "ბილიკი" ახორციელებს "სამოქალაქო განათლებისა და პედაგოგთა გადამზადების პროგრამას", (USAID/PH international) რომლის ფარგლებშიც თანამშრომლობს შიდა ქართლის 55 საჯარო სკოლასთან. მათ შორის 32 სკოლაში შექმნილია სასკოლო სამოქალაქო კლუბები, რომლებიც სხვადასხვა საინტერესო ინიციატივებს და პროექტებს ახორციელებენ სკოლის, თემის საკეთილდღეოდ. 17 ოქტომბერს სიღარიბის დაძლევის საერთაშორისო დღის აღსანიშნავად სურამის მე-3 საჯარო სკოლის სამოქალაქო კლუბმა „ჩვენ"  საქველმოქმედო აქციის ჩატარება გადაწყვიტა. კლუბის ლიდერებმა  წერილით მიმართეს სკოლის სამეურვეო საბჭოს და ნებართვა თხოვეს, რათა სკოლაში მოეწყოთ მოსწავლეთა მიერ დამზადებული კულინარიული ნაწარმის გამოფენა-გაყიდვა.  სკოლის ადმინისტრაციის მხარდაჭერით გამოფენა-გაყიდვა გაიმართა,  რომლის პარალელურად სკოლის სააქტო დარბაზში ფილმის ჩვენებაც მოეწყო, სადაც დასწრების მსურველებმა სიმბოლური ფასით ბილეთებიც შეიძინეს. ღონისძიებიდან შემოსული თანხით  კლუბის წევრებმა საჩუქრები იყიდეს:  ბურთები და ბადმინტონები დევნილი ბავშვებისათვის, ხოლო  საკანცელარიო ნივთები  საოჯახო ტიპის ბავშვთა სახლის აღსაზრდელებისათვის.

თბილისი. 19  სექტემბერს,  მასწავლებელთა პროფესიული განვითარების ცენტრში სამოქალაქო განვითარების ინსტიტუტმა გამართა შეხვედრა პედაგოგებთან. შეხვედრის მთავრი თემა იყო  უსაფრთხო სკოლის არსებული პოლიტიკის ალტერნატივა. შეხვედრა ინსიტუტის ხელმძღვანელმა ია ანთაძემ გახსნა და მოკლედ მიმოიხილა სამოქალაქო განვითარების ინსტიტუტის  საქმიანობა  განათლების კომპონენტის ფარგლებში.  უსაფრთხო სკოლის პოლიტიკის ალტერნატიული დოკუმენტი მიმოიხილეს  - სოფიო გორგოძემ და სიმონ ჯანაშიამ. მათი თქმით, პოლიტიკის ამ დოკუმენტის მიზანია, გადაწყვეტილების მიმღებ პირებს უსაფრთხო სკოლის კონცეფციის გაუმჯობესების გზები შესთავაზოს. დოკუმენტი ეფუძნება საქართველოს ზოგადსაგანმანათლებლო სისტემაში არსებული ვითარების, პოლიტიკის, სამართლებრივი დოკუმენტების შესწავლას. შეხვედრაზე ასევე წარადგინეს კვლევა „უსაფრთხო სკოლის პოლიტიკა  საქართველოში: წინაპირობა, შედეგები და დამოკიდებულებები" და იმსჯელეს საქართველოს საჯარო სკოლებში შიდა კონტროლის მექანიზმებსა და მართვის სტილზე. შეხვედრის მონაწილეებმა ორგანიზაციისგან ასევე საჩუქრად მიიღეს ამ საკითხებზე შექმნილი წიგნი „ბავშვზე ორიენტირებული სკოლის გზამკვლევი". შეხვედრა ჩატარდა პროექტის „ბავშვზე ორიენტირებული სკოლის ადვოკატირების" ფარგლებში, რომელიც მხარდაჭერილია აღმოსავლეთ-დასავლეთის მართვის ინსტიტუტისა და ამერიკის შეერთებული შტატების საერთაშორისო განვითარების სააგენტოს მიერ. სფერო: განათლება

გურია. ლანჩხუთის საინფორმაციო ცენტრმა შეიმუშავა ბიბლიოთეკის მართვის ელექტრონული პროგრამა "GeoLib". პროგრამა ქართულია და დაფუძნებულია asp.net ტექნოლოგიაზე. მისი საშუალებით შესაძლებელია როგორც წიგნების ბაზის შევსება და რედაქტირება, ასევე წიგნების ძიება, წიგნების გატანისა და დაბრუნების აღრიცხვა, მკითხველის ბაზის შევსება–რედაქტირება და სხვადასხვა სახის სტატისტიკური აღრიცხვის  წარმოების შესაძლებლობა.