ბათუმი. 5 ივლისს, ბათუმის დემოკრატიული ჩართულობის ცენტრში, გაიმართა საჯარო დისკუსია თემაზე: სამთო – სათხილამურო კურორტის მოწყობა გოდერძის უღელტეხილზე, რომელიც ბათუმის დემოკრატიული ჩართულობის ცენტრის მიერ იქნა ორგანიზებული. აჭარის ა.რ. ფინანსთა და ეკონომიკის სამინისტრომ და კომპანია „გოდერძი რეზორტის" დირექტორმა, გამჭვირვალობის უზრუნველყოფისა და ინფორმაციის გავრცელების მიზნით, გამართა პროექტის პრეზენტაცია. შეხვედრის მონაწილეებმა იმსჯელეს კურორტის მშენებლობასა და ეკონომიკურ ეფექტებზე, ასევე განიხილეს სამთო კურორტის მშენებლობის არეალში მოქცეული მიწების საკითხიც. როგორც ფინანსთა და ეკონომიკის მინისტრის მოადგილემ განაცხადა, აღნიშნულ არეალში მოქცეული ოჯახების საკითხი ინდივიდუალურად გადაწყდება. დისკუსიას ესწრებოდნენ სამოქალაქო საზოგადოების, ხელისუფლების და მედიის წარმომადგენლები.

თბილისი. ეთნოგრაფიული მუზეუმის რამდენიმე პავილიონი ამერიკის დროშებითა და ამერიკული პროდუქტების ამსახველი ბანერებით მოირთო 4 ივლისს, რადგან ,,ამერიკის მეგობართა კლუბი" აშშ–ს  საელჩოს მხარდაჭერით ამერიკის დამოუკიდებლობის დღეს და ქართულ–ამერიკული დიპლომატიური ურთიერთობების 20 წლის იუბილეს აღნიშნავს. ღია ცის ქვეშ  ორგანიზაცია თავის პარტნიორებთან ერთად უმასპინძლებს საქართველოში აკრედიტებული  დიპლომატიური კორპუსის წარმომადგენლებს და მათ ოჯახის წევრებს, მთავრობის წარმომადგენელბს, ბიზნეს და სამოქალაქო სექტორს. „ეს ზეიმი ჩვენ მივუძღვენით იმ ამერიკელებს, რომლებიც საქართველოში ცხოვრობენ (...) ვეცდებით, რომ გამოგვივიდეს ამერიკული ზეიმი და გვინდა რომ ეს იყოს საჩუქარი ქართველი ხალხის მხრიდან" – აღნიშნა ილია ზუკაკიშვილმა, „ამერიკის მეგობართა კლუბის" პრეზიდენტმა. ამერიკის შეერთებული შტატები, 4 ივლისს, დამოუკიდებლობის 236-ე წლისთავს აღნიშნავს.

კახეთი. ,,იყავი აქტიური მოქალაქე" - ამ სახელწოდების პროექტის პრეზენტაციას 4 ივლისს  თელავის დემოკრატიული ჩართულობის ცენტრმა უმასპინძლა. ნიდერლანდების ინსტიტუტის დაფინანსებით, აღნიშნული პროექტის ფარგლებში 2 თვის განმავლობაში სხვადასხვა სახის ღონისძიებები განხორციელდა. პროექტის მონაწილეებმა თელავის სახელმწიფო უნივერსიტეტის ეზოში მწვანე კუთხეც მოაწყვეს. 4 ივლისს, თელავის საჯარო სკოლების დამამთავრებელი კლასების მოსწავლეებმა დემოკრატიის თემაზე პრეზენტაციები წარმოადგინეს. პროექტის ორგანიზატორებისგან 17-მა მოსწავლემ  საჩუქრად სიგელები და წიგნები მიიღეს.

5 ივლისს, 11:00 საათზე ბათუმის დემოკრატიული ჩართულობის ცენტრის ორგანიზებით გაიმართება საჯარო დისკუსია თემაზე: სამთო–სათხილამურო კურორტის მოწყობა გოდერძის უღელტეხილზე. მისამართი: ბათუმი, ფარნავაზ მეფის ქუჩა 62–64, დემოკრატიული ჩართულობის ცენტრი  

6 ივლისს, ინფორმაციის თავისუფლების განვითარების ინსტიტუტი მასმედიის წარმომადგენლებისთვის მართავს სემინარს თემაზე: ინფორმაციის თავისუფლება და საჯარო დოკუმენტების ხელმისაწვდომობა. მისამართი: თბილისი, მაყაშვილის 32–34, სასტუმრო „ბეთსი"

6 ივლისს, 16:00 საათზე, ასოციაცია და რადიო „მწვანე ტალღა" მართავს საჯარო დისკუსიას თემაზე  – გაუმჯობესებული დაზღვევის რეფორმის უზრუნველსაყოფად სოციალურად დაუცველი ფენების ადვოკატირება. შეხვედრა გაიმართება ჯანმრთელობის დაცვის სამინისტროში. მონაწილეობის სურვილის შემთხვევაში აცნობეთ ინფორმაცია შემდეგ ელფოსტაზე: pd@grn.ge, bd@grn.ge.    მისამართი: თბილისი, წერეთლის ქუჩა 144, საქართველოს შრომის, ჯანმრთელობისა და სოციალური დაცვის სამინისტრო

6 ივლისს, 13:00 საათზე, გაიმართება ევრაზიის თანამშრომლობის ფონდის და კოალიციის დამოუკიდებელი და გამჭვირვალე მართლმსაჯულებისათვის ფორუმი. მისამართი: თბილისი, სასტუმრო „შერატონ მეტეხი პალასი", დარბაზი „სალხინო"

6 ივლისს, 19:00 საათზე, ლეიკემიით დაავადებული ბავშვებისა და მათი ოჯახების მხარდასაჭერად NHFC - New Hampshire Friendship Chorus მონაწილეობით გაიმართება საქველმოქმედო აქცია–კონცერტი. NHFC არის ამერიკული არაკომერციული ორგანიზაცია და ყოველწლიურად მსოფლიოს სხვადასხვა ქვეყანაში ატარებს საქველმოქმედო კონცერტებს. მისამართი:  თბილისი, ლუბლიანას ქუჩა 2–6, მ.იაშვილის სახელობის ბავშვთა ცენტრალური საავადმყოფო

მცხეთა–მთიანეთი. 2 ივლისს, „სამოქალაქო სოლიდარობის კამპანიამ" ქსნის საპყრობილესთან აქცია გამართა. აქციის მონაწილეებმა სოლიდარობა გამოუცხადეს იმ 700 პატიმარს, რომლებმაც განცხადებით სახალხო დამცველს მიმართეს და მათზე განხორციელებული ფიზიკური თუ სიტყვიერი შეურაცხყოფის ფაქტებზე გაამახვილეს ყურადღება. სამოქალაქო სოლიდარობის კამპანია უერთდება საქართველოს ახალგაზრდა იურისტთა ასოციაციის მოთხოვნებს.  ვრცლად იხილეთ ამ ბმულზე წყარო – www.gyla.ge

იმერეთი. 3 ივლისს,  საქართველოს სახალხო დამცველის ქუთაისის ოფისში, შეზღუდული შესაძლებლობების მქონე პირთა საკითხებზე ორიენტირებული, დასავლეთ საქართველოში მოქმედი ორგანიზაციების ქსელის პირველი შეხვედრა გაიმართა. ქსელი შეიქმნა ქუთაისის განათლების, განვითარების და დასაქმების ფილიალის მიერ ინიცირებული პროექტის „თანაბარი შესაძლებლობები შეზღუდული შესაძლებლობების მქონდე პირებისათვის" ფარგლებში. შეხვედრა მონაწილე ორგანიზაციების წარდგენით დაიწყო, რის შემდეგაც გაიმართა მათ მიერ განხორციელებული საქმიანობების ანგარიში, გამოვლენილი საადვოკატო ქეისების განხილვა და ასევე ქსელის შექმნის მიზნის მიმოხილვა.პროექტის მიზანია შეზღუდული შესაძლებლობების მქონე პირების უზრუნველყოფა, უფლებების დაცვა, პროპაგანდა და მონიტორინგი.

თბილისი. 28 ივნისს  „‎ევროპული ინიციატივა - ლიბერალური აკადემია თბილისმა" კვლევითი პროექტის შუალედური ანგარიშის პრეზენტაცია გამართა. ანგარიშში „საქართველოს ეკონომიკური ტრანსფორმაცია: დამოუკიდებლობის 20 წელი" მომიხილულია ქვეყნის ტრანსფორმაციის ეკონომიკური მახასიათებლები და საკვლევი პერიოდი პირობითადნ ორ ნაწილად არის დაყოფილი: ვარდების რევოლუციამდე და ვარდების რევულუციის შემდეგ.  ანგარიშში ასევე მითითებულია, რომ „2003 წლის შემდგომი პროცესები უფრო სიღრმისეულადაა განხილული, მითუმეტეს რომ  „ვარდების რევოლუციის” შემდეგ რვა წელი გავიდა, რაც შეჯამებისთვის გარკვეულ საფუძველს ქმნის". შუალედური ანგარიში მომზადდა ფონდ „ლიბერალური აკადემია – თბილისის" პროექტის „ტრანსფორმაცია საქართველოში – მნიშნველოვანი შედეგები" ფარგლებში, რომელიც დაფინანსებულია „აღმოსავლეთ–დასავლეთის მართვის ინსტიტუტის მიერ (EWMI)” მიერ, აშშ–ს საერთაშორისო განვითარების სააგენტოს სახსრებით.  ვრცლად იხილეთ ბმული

თბილისი. ,,ადგილობრივი თვითმმართველობის მონიტორინგის  სახელმღვანელო" შემუშავდა კავკასიის ეკონომიკური და სოციალური კვლევითი ინსტიტუტის მიერ, პროექტის „ადგილობრივი თვითმმართველობის მონიტორინგის სახელმძღვანელო რეგიონული არასამთავრობო ორგანიზაციებისა და მედიისათვის" ფარგლებში. აღნიშნული პროექტი განხორციელდა ევრაზიის თანამშრომლობის ფონდის" მხარდაჭერით და შვედეთის საერთაშორისო განვითარების სააგენტოს (Sida) დაფინანსებით. სახელნძღვანელოს რელევანტურობის შესაფასებლად და სარეკომენდაციო წინადადებების დასაფიქსირებლად, ინსტიტუტი გთხოვთ, შეავსოთ ქვემოთ მოცემული  კითხვარი. თქვენი შეფასებები და მოსაზრებები  მნიშვნელოვანია გამოცემის ავტორებისთვის. ადგილობრივი თვითმმართველობის მონიტორინგის  სახელმღვანელო კითხვარი გთხოვთ შევსებული კითხავრი  მიმდინარე წლის 6  ივლისამდე გამოაგზავნეთ შემდეგ  ელექტრონულ მისამართზე:  info@ciesr.org

კახეთი. 28 ივნისიდან 6 ივლისის ჩათვლით საგარეჯოს რაიონში ადგილობრივი მოსახლეობისათვის ჩატარდება ტრენინგი თემაზე: „ტრენერთა სწავლება მზის კოლექტორების მშენებლობის საკითხებზე" ტრენერთა სწავლებას ჩაატარებენ პროექტის სამუშაო ჯგუფის წარმომადგენლები, ასევე მოწვეული ექსპერტები ჰოლანდიიდან და გერმანიიდან. ტრენინგის მონაწილეები მიიღებენ დეტალურ ინფორმაციას, თუ როგორ ასწავლონ დაინტერესებულ პირებს საყოფაცოვრებო პირობებში მზის კოლექტორების აწყობა, დამონტაჟება და შემდგომი ექსპლოატაცია პროექტი ხორციელდება "საქართველოს მწვანეთა მოძრაობა/ დედამიწის მეგობრები–საქართველოს" მიერ პროექტის „საოჯახო პირობებში მზის ენერგიით გათბობის, ცხელი წყლისა და თბოსაიზოლაციო სისტემების დანერგვა და ადგილობრივი შესაძლებლობების გაძლიერება სოფლად აღმოსავლეთ ევროპისა და კავკასიის რეგიონში" ფარგლებში.   ვრცლად იხილეთ ბმულზე წყარო: www.greens.ge 

იმერეთი. ორგანიზაციამ „ახალი თაობა - ახალი ინიციატივამ" საქართველოს ყველა რეგიონში პროექტის –  „საქართველო ევროპაში" – ფარგლებში ავტოტური დაიწყო. ავტოტურის დროს, ორგანიზატორებთან ერთად , საინფორმაციო კამპანიებში ევროკავშირის, ევროპის სამეზობლო პოლიტიკისა და საქართველო ევრო-ინტეგრაციის საკითხებზე მომუშავე ექსპერტები და ოფიციალური პირები  ჩაერთვებიან. ამასთან დაკავშირებით დღეს, 2 ივლისს ქუთაისში, დემოკრატიული ჩართულობის ცენტრში, სემინარი გაიმართა. ტურის ფარგლებში შეხვედრები, გაიმართება როგორც სოფლების, ისე ქალაქების მაცხოვრებლებთან. შეხვედრებში მოწვეულნი იქნებიან საზოგადოების ყველა ფენისა და ასაკის წარმომადგენლები. ავტოტური ხვალ, ცაგერსა და ქვემო სვანეთში გაგრძელდება და 10 ივლისს სამცხე-ჯავახეთში დასრულდება.

კახეთი.თელავის დემოკრატიული ჩართულობის ცენტრი მოქალაქეებს კიდევ ერთი სახის სიახლეს სთავაზობს. ბიბლიოთეკის, ინტერნეტისა და ღონისძიებების ჩასატარებელი ოთახების მოხმარების გარდა, სულ მალე იქ მისულ მოქალაქეს ჟურნალებისა და გაზეთების გაცნობის საშუალება ექნება. თელავის დემოკრატიული ჩართულობის ცენტრის კოორდინატორის, მაია ფურცხვანიძის თქმით, აღნიშნულ საკითხზე ამჟამად რედაქციებთან მოლაპარაკება მიმდინარეობს: ,,სულ მალე ჩვენთან მოსულ ადამიანს შეეძლება ჟურნალ-გაზეთების გაცნობა. უკვე მიმდინარეობს მოლაპარაკება რედაქციებთან. ვფიქრობთ, ახალი სერვისი საინტერესო და საჭიროა ჩვენი მომხმარებლისთვის".

4 ივლისს, 19:00 საათზე, ჰაინრიჰ ბიოლის ფონდში იმართება საჯარო დისკუსია თემაზე: „ქართული პოლიტიკის პოლუსები: სად არის ზომიერების რესურსი?". მისამართი: თბილისი, ზოვრეთის ქუჩა  #38

2 ივლისს, 17:00 საათზე, სამოქალაქო სოლიდარობის კამპანია ქსნის ციხესთან აქციას გამართავს. მისამართი: თბილისი, ქსნის ციხე,  #15 განყოფილება

თბილისი. საქართველოს მცირე და საშუალო საწარმოთა ასოციაციის მიერ ჩატარებულ კვლევაზე გაიმართა დღეს რიგით მეოთხე სამუშაო შეხვედრა სასტუმრო „ამბასადორში". კვლევა „გადასახადისგან თავის არიდება და სისხლის სამართლებრივი პასუხისმგებლობა, შედარებითი ანალიზი" ქვეყნის ბიზნეს გარემოს გაუმჯობესებისა და ინვესტორების მოზიდვისათვის საჭირო საკანონმდებლო რეკომენდაციების  შემუშავებას ისახავს მიზნად; ორგანიზაციის მიერ მომზადებულ კვლევაში ასევე მიმოხილულია საერთაშორისო გამოცდილებაც. სამუშაო შეხვედრას საზოგადოებრივი ორგანიზაციის წარმომადგენლები ესწრებოდნენ და კვლევის ფარგლებში შემუშავებულ რეკომენდაციებზე მსჯელობდნენ. პროექტი ხორციელდება ევრაზიის თანამშრომლობის ფონდის  პროექტის ფარგლებში – „სასამართლო ინიციატივა დამოუკიდებელი მართლმსაჯულებისთვის", რომელიც დაფინანსებულია USAID-ის მიერ, აღმოსავლეთ–დასავლეთის მართვის ინსტიტუტის მეშვეობით.

თბილისი.სასოფლო–სამეურნეო კულტურათა ეკოლოგიურად უსაფრთხო მეთოდოლოგიით დაინტერესებულ პირებს საშუალება აქვთ გაეცნონ სამოქალაქო საზოგადოების ინსტიტუტის მიერ გამოცემულ ნაშრომს – „სოფლად სიღარიბის დაძლევის მოდელები". ნაშრომი ეფუძნება ინსტიტუტის მიერ განხორციელებულ პროექტებში გამოყენებულ სქემებს და მოდელებს, რომელთა მეშვეობითაც უკიდურეს გაჭირვებაში მყოფი ფერმერების ეკონომიკური მდგომარეობა მნიშვნელოვნად გაუმჯობესდა. ასევე ნაშრომი მოიცავს ეკონომიკურ განვითარებაზე ორიენტირებული სხვადასხვა მოდელის ფართო მასშტაბით დანერგვის კონკრეტულ წინადადებებს. როგორც უკვე აღვნიშნეთ, ინსტიტუტი აღნიშნული მიმართულებით მრავალწლიანი გამოცდილება აქვს. ჯერ კიდევ 2005 წლიდან დაიწყო სიღარიბის დაძლევისა და დასაქმების ხელშეწყობის (როგორც ქალაქად, ისე სოფლად) პროექტებზე მუშაობა. OXFAM GB-ის მიერ დაფინანსებულ ხუთწლიან ინტენსიურ პროგრამაზე, რომლის მთავარი პრიორიტეტი სოფლის მეურნეობით დაკავებული უკიდურეს სიღარიბეში მაცხოვრებელი მოსახლეობის საარსებო პირობების გაუმჯობესება და დასაქმებულთა უფლებების დაცვის ხელშეწყობა იყო. პროგრამა განხორციელდა მაღალმთიანი აჭარისა და სამეგრელოს რეგიონებში. მოგვიანებით, ევრაზიის თანამშრომლობის ფონდის დაფინანსებით განხორციელდა პროექტი, რომელიც მიზნად ისახავდა სასოფლო–სამეურნეო კულტურათა ეკოლოგიურად უსაფრთხო მეთოდოლოგიით წარმოების სწავლა–დემონსტრირებას მაღალმთიან აჭარაში. მიღწეულ შედეგებზე დაყრდნობით ჩამოყალიბდა ერთიანი ტექნოლოგიურ–ადმინისტრაციული მოდელი. რომელიც ორიენტირებულია სოფლის მეურნეობის წარმოებისას გარემოზე უარყოფითი ზეგავლენის შემცირებისა და სასოფლო–სამეურნეო კულტურათა მოსავლიანობის გაზრდაზე. ნაშრომი სწორედ ამ გამოცდილებას ასახავს. სოფლად სიღარიბის დაძლევის მოდელები

თბილისი. 29 ივნისს, ეროვნულ–დემოკრატიულმა ინსტიტუტმა (NDI) პრესკონფერენცია გამართა, სადაც წინასარჩევნოდ ჩამოსულმა დელეგეციამ ვიზიტის შედეგები წარმოადგინა. ვიზიტის ფარგლებში დელეგაციის წევრები შეხვდნენ მმართველი გუნდის და ოპოზიციური პარტიების ლიდერებს, ცენტრალური საარჩევნო კომისიის თავმჯდომარეს, აღმასრულებელი და საკანონმდებლო ხელისუფლების წარმომადგენლებს, საზოგადოებრივ ორგანიზაციებს, მედიის წარმომადგენლებს და ა.შ. ვიზიტის მიზანი იყო საპარლამენტო არჩევნებისთვის მზადების პროცესის შეფასება და იმ ფაქტორების შესწავლა, რომელმაც საარჩევნო პროცესზე შეიძლება გავლენა მოახდინოს. ანგარიშში დადებითად არის შეფასებული ცენტრალური საარჩევნო კომისიის საქმიანობა,  ასევე ის ფაქტი, რომ ოპოზიციური პარტიების მიერ ორგანიზებულმა ფართო მასშტაბიანმა აქციებმა ინციდენტების გარეშე  ჩაიარა, Must Carry-ს პრინციპების გატარება,  თუმცა დელეგაცია შეშფოთებას  გამოთქვამს პოლიტიკურ ლიდერებს შორის დიალოგის არარსებობის, ასევე სიძულვილის ენის გამოყენების შემთხვევების გამო წინასაარჩევნოდ ა.შ.  ანგარიშს თან ახლავს ასევე რეკომენდაციები. რომელიც მიმართულია პარლამენტისა და მთავრობის, პოლიტიკური პარტიების, ცენტრალური საარჩევნო კომისიის, მედიის, სამოქალაქო საზოგადოების მიმართ. NDI-ს სადამკვირვებლო ჯგუფი რეკომენდაციით მიმართავს საქართველოს პარლამენტს, Must Carry-ის პრინციპების მოქმედების ვადის გახანგრძლივების შესაძლებლობაც განიხილონ. დელეგაცია საქართველოს 2012 წლის 25 ივნისიდან 29 ივნისამდე სტუმრობდა.

იმერეთი. 28 ივნისს,  სასტუმრო „ქუთაისი პალასში" სამოქალაქო განათლებისა და გადამზადების ცენტრის საქმიანობის შემაჯამებელი პრეზენტაცია გაიმართა. ღონისძიებაზე სამოქალაქო კლუბებმა პროგრამის ფარგლებში მიღებული გადაწყვეტილებების ანგარიში წარმოადგინეს. ასევე დამსწრე საზოგადოებას მცირე საგრანტო კონკურსში გამარჯვებულმა სკოლის მოსწავლეებმა თავიანთი პროგრამა წარუდგინეს. შეხვედრაში მონაწილეობა იმერეთის რეგიონის საჯარო სკოლებისა და საინიციატივო ჯგუფის წევრებმა, სამოქალაქო განათლების პედაგოგებმა და პარტნოირი ორგანიზაციის წევრებმა მიიღეს. ღონისძიება ორგანიზებული იყო სამოქალაქო განათლებისა და პედაგოგთა გადამზადების პროგრამის ფარგლებში, რომელსაც ამერიკული ორგანიზაცია PH International ახორციელებს. პრეზენტაცია ამერიკის შეერთებული შტატების საერთაშორისო განვითარებიას სააგენტოს (USAID) დაფინანსებით გაიმართა. აღნიშნული პროგრამა იმერეთის რეგიონში 125 პარტნიორ სკოლასთან თანამშრომლობს. შეხვედრის ბოლოს ბლოგებისა და საკლუბო კონკურსებში გამარჯვებული მოსწავლეები დაჯილდოვდნენ.

აჭარა. 28 ივნისს, ბათუმის პრეს კაფეში გაიმართა დისკუსია თემაზე  – „ საქართველოს საგარეო პოლიტიკური არჩევანი და პრიორიტეტები". მოხსენებელი  საქართველოს სტრატეგიისა და საერთაშორისო ურთიერთობების კვლევის ფონდის მთავარი მკვლევარი,  არჩილ გეგეშიძე იყო.  დისკუსიაზე განხილეს კავკასიის რეგიონში არსებული გეოპოლიტიკური ვითარება, რომელმაც განაპირობა საქართველოს საგარეო–პოლიტიკური არჩევანი. ასევე საუბარი იყო იმ გამოწვევებსა და პრიორიტეტებზე, რომელიც ქვეყნის ევროინტეგრაცვიასა და ნატოში გაწევრიანებასთან არის დაკავშირებული. დისკუსიაში მონაწილეობდნენ სტუდენტები, სამოქალაქო საზოგადოებისა და პოლიტიკური პარტიების წარმომადგენლები. დისკუსიების ციკლი იმართება NED-ის მიერ დაფინანსებული პროექტის – „დემოკრატიული იდეების განვითარება"  ფარგლებში. დისკუსიის სრული ჩანაწერი: http://presscafe.ge/index.php?newsid=177