თბილისი. საქართველოს საზოგადოებრივ ორგანიზაციათა და ექსპერტთა ნაწილი აქვეყნებს დეკლარაციას  საშიში ქიმიური ნივთიერებების მართვისა და რეგულირების საკითხებზე. ხელმომწერი ორგანიზაციები შეშფოთებას გამოთქვამენ საშიში და საერთაშორისო კონვენციებით აკრძალული ქიმიური ნივთიერებების საქართველოში ოფიციალური გზებით იმპორტირების ფაქტების გამო და ასევე საეჭვო წარმომავლობის, საშიში ქიმიური ნივთიერებებით (პესტიციდებით) საქართველოს ბაზრის გაჯერების გამო; დეკლარაციაში ასევე აღნიშნულია, რომ არ არსებობს სხვადასხვა ტიპის მასალებში გამოყენებული საშიში ქიმიური ნივთიერებების რეგულირებისა და მონიტორინგის საკანონმდებლო ნორმები, ინსტიტუციონალური და კადრების მომზადების სისტემები. „მოვუწოდებთ საქართველოს მთავრობას და პარლამენტს, კატეგორიულად აკრძალონ სხვადასხვა კონვენციის მიხედვით აკრძალულად მიჩნეული ქიმიური ნივთიერებებისა და ნარჩენების იმპორტი, რეექსპორტი და დააწესონ მკაცრი რეგლამენტი პოტენციურად ამ საფრთხის შემცველი სხვა ნივთიერებების იმპორტირებასა და მოხმარებაზე" – ნათქვამია დეკლარაციაში.  დეკლარაციას ხელს აწერს 9 საზოგადოებრივი ორგანიზაცია, მათ შორის: საქართველოს მწვანეთა მოძრაობა/დედამიწის მეგობრები-საქართველო, სოფლად თემთა განვითარების სააგენტო, საქართველოს ეკოლოგიურ მიწათმოქმედთა ასოციაცია „სემა", მწვანე გზა, გარემოს დაცვის ლიგა, ფონდი "კავკასიის ეკოლოგია", ახალციხის საზოგადოებრივი განვითარების ცენტრი, საქართველოს საერთაშორისო განვითარების სააგენტო, ინტელექტი - ქვეყნის სამსახურში. ხელმოწერის ბოლო ვადაა 20 ივლისი, რის შემდეგაც დეკლარაციის ტექსტი გადაეგზავნება შესაბამის სამსახურს.  დეკლარაცია  წყარო: CENN

სამცხე–ჯავახეთი. ივლისის თვეში,  მესხეთის (ახალციხის) სახელმწიფო დრამატული თეატრში  ჩატარებულ ყველა სპექტაკლს რეპატრირებული მესხები დაესწრებიან. სამცხე-ჯავახეთის რეგიონულმა ასოციაცია ,,ტოლერანტმა" მათ  ერთ თვეზე გათვლილი აბონიმენტები დაურიგა. ,,გვინდოდა რაღაც სიახლე შეგეთავაზებინა რეპატრირებულებისთვის, ამიტომაც გადავწყვიტეთ აბონიმენტები მიგვეცა. ისინი არ არიან ამით განებივრებულები, შარშანაც ჩვენ წავიყვანეთ და როგორც აღმოჩნდა პირველად იყვნენ თეატრში.  აბონიმენტით  სამ სპექტაკლს  ნახავენ", - გვითხრა სასწავლო პროგრამის ოფიცერმა ნინო ზუმბაძემ.

სამცხე–ჯავახეთი.მედია-ორგანიზაცია ,,გოუჯგუფი" ორდღიანი ვიზიტით ახალციხეს სტუმრობდა. ორგანიზაციის წარმომადგენლებმა 12 ივლისს, ახალციხის დემოკრატიული ჩართულობის ცენტრში დოკუმენტური ფილმი ,,გოგონას აქვს სათქმელი" აჩვენეს. ფილმის პერსონაჟები საქართველოს ოთხ რეგიონში - შიდა და ქვემო ქართლში, სამცხე-ჯავახეთსა და სამეგრელოში მცხოვრები თინეიჯერი გოგონები არიან, რომელთა მაგალითზეც გამოიკვეთა მშობლებისა და მოზარდების დამოკიდებულებაში არსებული მტკივნეული პრობლემები: შეზღუდული არჩევანი და თავისუფლება. ფილმის მაყურებლები საჯარო სკოლების უფროსკლასელები, სტუდენტები და ჟურნალისტები იყვნენ, რომლებმაც ფილმის დასასრულს დისკუსიაში მიიღეს მონაწილეობა. 14 ივლისს კი „გოუჯგუფის" წევრებმა ახალგაზრდებს დოკუმენტური ფილმის გადაღების პრაქტიკული უნარ-ჩვევების განმავითარებელი მასტერკლასი ჩაუტარეს.

აჭარა. 14 ივლისს, ბათუმის დემოკრატიული ჩართულობის ცენტრში, „სამოქალაქო განვითარების ინსტიტუტი" საზოგადოებრივი ორგანიზაციების წარმომადგენლებს შეხვდა და მათ პროექტის  „მოქალაქე ჟურნალისტები თავისუფალი და სამართლიანი არჩევნებისთვის" დეტალები გააცნო.  პროექტში ჩართულია საქართველოს 11 ქალაქი, რომელთა მაცხოვრებლები – აქტიური მოქალაქე და პროფესიონალი ჟურნალისტები – შეეცდებიან, მოიპოვონ და გაავრცელონ ინფორმაცია არჩევნების წინა პერიოდში, არჩევნების დღეს და შემდგომ დღეებში საქართველოში განვითარებული მოვლენების შესახებ. პროექტი მიზანი არჩევნები კოორდინირებულად გაშუქდეს. პროექტის ფარგლებში დაიწერება და გამოქვეყნდება 110 სტატია, მომზადდება 3 სიღრმისეული რეპორტაჟი, 2 მოკლემეტრაჟიანი ფილმი. შეიქმნება 5 ტრენინგ-მოდული და ჩატარდება ტრენინგები პროექტში მონაწილე 22 პროფესიონალი ჟურნალისტისთვის. პროექტი დაფინანსებულია გაერთიანებული ერების დემოკრატიული ფონდის მიერ.

თბილისი. 13 ივლისს, საქართველოს პარლამენტის ეროვნულ ბიბლიოთეკაში გამაირთა საზოგადოებრივი პოლიტიკის ინსტიტუტის მიერ ჩატარებული კვლევის – „თაობები და ღირებულებების" – პრეზენტაცია. კვლევა, რომელიც ფონდ „ღია საზოგადოება – საქართველოს" მხარდაჭერით განხორციელდა, ეხება ღირებულებებთან მიმართებაში თაობებს შორის განსხვავებების დადგენას და ქვეყნის დემოკრატიული განვითარების გამოწვევების იდენტიფიკაციას. კვლევის ინსტრუმენტებად შერჩეულ იქნა ორი ღირებულებითი ორიენტაცია – ინდივიდუალიზმი, კოლექტივიზმი და მატერიალისტური, პოსტმატერიალისტური და მათთან დაკავშირებული ღირებულებლები. ასევე შესწავლილ იქნა მათთან დაკავშირებული ისეთი ფაქტორები, როგორიცა ნდობა, ოპტიმიზმი, თვითშეფასება და სხვა. კვლევა ჩატარდა 2011 21 ნომრიდან 19 დეკემბრამდე თბილისში და საქართველოს ყველა რეგიონში. მასში მონაწილეობდა სამი თაობის 1058 ინდივიდი.

კახეთი.საზოგადოებრივი ორგანიზაციის „სისხლის ბანკის" ინიციატივით  გურჯაანის მუნიციპალიტეტში, 13 ივლისს ჯავრიშვილის კლინიკის ოფთალმიჯის შენობაში გაიმართა აქცია სახელწოდებით „გაიღეთ სისხლი და გადაარჩინეთ ბავშვების სიცოცხლე". აქციაზე მისულმა საზოგადოების წევრებმა უანგაროდ გაიღეს სისხლი ბავშვების სიცოცხლის გადასარჩენად.

თბილისი. ორგანიზაცია ,,კონსტიტუციის 42-ე მუხლმა” ბიზნეს სფეროს მარეგულირებელი კანონმდებლობისა და პრაქტიკის კვლევის პრეზენტაცია გამართა. პრეზენტაციის პირველი ნაწილი დაეთმო ბიზნეს სფეროს მარეგულირებელი საკანონმდებლო აქტების ანალიზის მიმოხილვას, შემდეგ კი კვლევის ავტორებმა განიხილეს ამ სფეროში გამოვლენილი პრობლემები და შეიმუშავეს რეკომენდაცები. კვლევა ასევე მოიცავს საგადასახადო და სამეწარმეო დავების განხილვის პრაქტიკას. წყარო: www.article42.ge სრულად

აჭარა.14 ივლისს, ბათუმის დემოკრატიული ჩართულობის ცენტრში, „სამოქალაქო მრჩეველთა კომიტეტის", თვითმმართველ ქალაქ ბათუმის მერიისა და საკრებულოს  ერთობლივი ორგანიზებით  გაიმართა საჯარო შეხვედრა თემაზე: „კომუნალური გადასახადების ერთიანი ადმინისტრირება".  შეხვედრაზე მოწვეულნი იყვნენ როგორც სამოქალაქო საზოგადოების,  ასევე საბინაო ამხანაგობების წარმომადგენლები. განიხილეს ადგილობრივი კომუნალური მოსაკრებლების ახალი სისტემა, რომელიც მიმდინარე წლის ივნისიდან ამოქმედდა. თვითმმართველ ქალაქ ბათუმის საკრებულოს, 2012 წლის 21 მაისს  განკარგულების საფუძლველზე, დამტკიცებული იქნა  პროგრამა  „კომუნალური გადასახადების ერთიანი ადმინისტრირება", რომლის მიზანია  ქალაქ ბათუმის მასშტაბით  დასახლებული  ტერიტორიის დასუფთავების ადგილობრივი მოსაკრებლის გადამხდელთა  ერთიანი ინტეგრირებული და კოორდინირებული სისტემის მეშვეობით დასუფთავების მოსაკრებლის გადახდევინების უზრუნველყოფის მომსახურების შესყიდვა. მოქნილი და ეფექტური კომუნალური გადახდების პრინციპის დანერგვა. საინფორმაციო ბაზების დახვეწა, სრულყოფა და რეგულარული განახლება. შეხვედრა ცოცხალ, დისკუსიის რეჟიმში წარიმართა. დამსწრე საზოგადოებამ კომპეტენტური პირებისგან მოისმინა პასუხები მათთვის საინტერესო ყველა კითხვაზე.

თბილისი.„სამართლიანი არჩევნებისა და დემოკრატიის საერთაშორისო საზოგადოება" (ISFED) აქვეყნებს საქართველოში წინასაარჩევნო მონიტორინგის რიგით მესამე ანგარიშს. ანგარიში მოიცავს 4 ივნისიდან 2 ივლისამდე პერიოდს.   სამართლიანი არჩევნები" წინასაარჩევნო გარემოს მონიტორინგს საქართველოს ყველა ოლქში 73  გრძელვადიანი დამკვირვებლის მეშვეობით ახორციელებს.  დამკვირვებლები აკვირდებიან წინასაარჩევნო პერიოდში გამოვლენილ დარღვევებს, მონიტორინგი ეროვნულ–დემოკრატიული ინსტიტუტის (NDI) ფინანსური მხარდაჭერით ხორციელდება. წყარო: www.isfed.ge 2012 წლის საპარლამენტო არჩევნების წინასაარჩევნო პერიოდის მონიტორინგის მესამე შუალედური ანგარიში

კახეთი. 13 ივლისს თელავის დემოკრატიული ჩართულობის ცენტრში საზოგადოებრივი ორგანიზაციის „თანადგომის" მიერ ორგანიზებული 5 დღიანი „თანასწორთა განათლების ტრენინგი"  დასრულდა. ტრენინგის მიზანი იყო ახალგაზრდებში ჯანმრთელი ცხოვრების წესის დამკვიდრებისა და სქესობრივი გზით გადამდები დაავადებების თავიდან აცილებისთვის დამსწრეთა ინფორმირება. ტრენინგში  50-მდე  მოსწავლე მონაწილეობდა. ტრენინგის კოორდინატორის თქმით, ტრენინგის მთავარი მიზანია, ახალგაზრდებმა თანატოლებში გაავრცელონ მიწოდებული ინფორმაცია, რათა თავიდან იქნეს აცილებული სხვადასხვა სახის დაავადებების გავრცელება. მაია ჯიბუტი, პროექტის კოორდინატორი, ფსიქოლოგი: „თანასწორთა განათლების ტრენინგის მიზანი იყო ტრენერთა მომზადება, რომელშიც აქტიური და ლიდერის თვისებებით გამორჩეული ახალგაზრდები მონაწილეობდნენ. გარდა ამისა, იყო საუბარი გენდერული თანასწორობის შესახებ და ეს ყველაფერი ჩაჯდა რეპროდუქციული ჯანმრთელობისა და უფლებების შესახებ საკითხებში".

14 ივლისს, 12:00 საათზე, ბათუმის დემოკრატიული ჩართულობის ცენტრში , „სამოქალაქო მრჩეველთა კომიტეტი", თვითმმართველი ქალაქი ბათუმის მერიასა და თვითმმართველი ქალაქი ბათუმის საკრებულოსთან ერთად, გამართავს შეხვედრას თემაზე: „კომუნალური გადასახადების ერთიანი ადმინისტრირება". მისამართი: ბათუმი, ფარნავაზ მეფის 62–64

13 ივლისს, 12:00 საათზე „სამართლიანი არჩვენებისა და დემოკრატიის საერთაშორისო საზოგადოება"  წინასაარჩევნო მონიტორნგის მესამე შუალედურ ანგარიშს გამოაქვეყნებს. მისამართი: თბილისი, ონიაშვილის ქუჩა 37

14 ივლისს. 14:00 საათზე. ბათუმის დემოკრატიული ჩართულობის ცენტრში, სამოქალაქო განვითარების ინსტიტუტი გამართავს შეხვედრას თემაზე: „მოქალაქე ჟურნალისტები სამართლიანი და გამჭვირვალე არჩევნებისთვის საქართველოში". მისამართი: ფარნავაზ მეფის 62–64

თბილისი. საზოგადოებრივმა ორგანიზაციამ „მედიის განვითარების ფონდმა" წარმოადგინა ქართული მედიის მონიტორინგის ანგარიში თემაზე: „გარემოსდაცვითი საკითხების გაშუქება ქართულ მედიაში". კვლევა მოიცავს 2012 წლის 12 მარტიდან 12 აპრილამდე პერიოდში გამოქვეყნებული სტატიებისა და ტელესიუჟეტების ანალიზს ეკოლოოგიის თემაზე. ანგარიში მომზადებულია პროექტის „მედია–მონიტორინგი – პროფესიონალური მედიის განვითარებისთვის" ფარგლებში.  კვლევა  „გარემოსდაცვითი საკითხების გაშუქება ქართულ მედიაში"   წყარო: www.mdfgeorgia.ge  

იმერეთი. ქუთაისის სახალხო დამცველის ოფისში ადამიანის უფლებებისა და მათი დაცვის შიდა სახელმწიფოებრივი მექანიზმების შესახებ ტრენინგი ტარდება. ტრენინგს სახალხო დამცველის აპარატი, ევროკავშირის დაფინანსებით ატარებს. ტრენერები არიან გიორგი მშვენიერაძე და ბესარიონ ბოხაშვილი. ძირითადი აუდიტორია აკაკი წერეთლის სახელმწიფო უნივერსიტეტის სამართალმცოდნეობის სტუდენტები არიან. დღის მეორე ნახევრიდან ტრენინგს სახალხო დამცველი გიორგი ტუღუშიც შეუერთდება.

იმერეთი. 12 ივლისს,  ქუთაისში, სასტუმრო „აიეტი პალასში" NDI-ის საქართველოს ოფისის დირექტორმა ლუის ნავარომ პრეს-ბრიფინგი გამართა. NDI-ის კვლევის შედეგების მიხედვით, არჩევნების მოახლოებასთან ერთად, მოსახლეობისათვის პრიორიტეტად კვლავ დასაქმება რჩება. გამოკითხულთა 52 % მნიშვნელოვან საკითხად სამუშაო ადგილების შექმნას, 34%- ტერიტორიულ მთლიანობის აღდგენას, ხოლო 37% ხელმისაწვდომ ჯანდაცვას ასახელებს. კვლევა პირისპირ ინტერვიუს წარმომაგდენლობითი შერჩევის საფუძველზე ჩატარდა და სულ 6299 ადამიანი გამოიკითხა. NDI-ის კვლევებს საქართველოში კავკასიის კვლევითი რესურსების ცენტრი ატარებს და საერთაშორისო თანამშრომლობის განვითარების სააგენტო აფინანსებს. 

თბილისი. „ეს შენ გეხებას" მონაწილე ორგანიზაციები ტელეკომპანია „მაესტროს" კუთვნილი ანტენების დაყადაღების შესახებ განცხადებას ავრცელებენ.  მასში ნათქვამია, რომ ამ ფაქტით ხელი ეშლება დამოუკიდებელი ტელეკომპანიის განვითარებას და ფერხდება პლურალისტური მედია სივრცის შექმნა.  განცხადების სრული ტექსტი წყარო: esshengexeba.ge

იმერეთი. 12 ივლისს ქუთაისში საარჩევნო სისტემების საერთაშორისო ფონდისა და ცესკო–ს ორგანიზებით კონფერენცია გაიმართა. მასში ცენტრალური კომისიის თავმჯდომარესთან, ზურაბ ხარატიშვილთან ერთად მონაწილეობა იმერეთის საოლქო საარჩევნო კომისიების თავმჯდომარეებმა, მედიასაშუალებების რედაქტორებმა, პროდიუსერებმა და გამომცემლებმა მიიღეს. ცესკო-მ ჟურნალისტებს 2012 წლის პარლამენტის არჩევნებისთვის მოსამზადებელ პროცესში უკვე განხორციელებულ და უახლოეს მომავალში დაგეგმილი ღონისძიებების შესახებ ინფორმაცია გააცნო. დამსწრე საზოგადოება ასევე ცესკოს გრძელვადიან - 2012-2014 წლებზე გაწერილ სამოქმედო გეგმას გაეცნო. მსგავსი შეხვედრები ცენტრალურ საარჩევნო კომისიას უახლოეს მომავალში დაგეგმილი აქვს აჭარის, გურიისა და სამეგრელოს მედიაწარმომადგენლებთან. 

მცხეთა–მთიანეთი. 30 ივნისს ბაზალეთში, თავისუფალი უნივერსიტეტის ტრენინგ ცენტრში „სამოქალაქო განათლების საზაფხულო ბანაკი - 2012" გაიხსნა. ბანაკი  „სამოქალაქო განათლებისა და პედაგოგთა გადამზადების პროგრამის" ფარგლებში მოეწყო, რომელსაც აფინანსებს USAID - აშშ საერთაშორისო განვითარების სააგენტო, ხოლო პროგრამას საქართველოში ახორციელებს PH-International. ბანაკის ორგანიზატორია   სიქა - საგანმანათლებლო ინიციატივების ქართული ასოციაცია, რომელიც ამავდროულად პროგრამის პარტნიორი ორგანიზაციაა ქვემო ქართლის რეგიონში. 30 ივნისიდან 5 ივლისამდე ბანაკის პირველი ნაკადი მოეწყო, რომელშიც მონაწილეობა მიიღო მოსწავლეებმა და პედაგოგებმა საქართველოს 11 რეგიონიდან.  ივლისსა და აგვისტოში დაგეგმილია ბანაკის კიდევ ორი ნაკადი. სამივე ნაკადის განმავლობაში ბანაკში მონაწილეობას მიიღებს 270 მონაწილე საქართველოს ყველა კუთხიდან. ბანაკში მონაწილე მოსწავლეების სასკოლო სამოქალაქო კლუბების აქტიური წევრები არიან, რომლებიც წლის განმავლობაში ინიცირებას უკეთებენ და ახორციელებენ სხვადასხვა სახის სამოქალაქო აქტივობებს. სიქა მეორე წელია ორგანიზებას უწევს „სამოქალაქო განათლების ბანაკს". გასულ წელს საზაფხულო სამოქალაქო ბანაკში მონაწილეობა მიიღო 170-მა მონაწილემ საქართველოს 9 რეგიონიდან. ბანაკში  ქართველ ლიდერებთან ერთად ევროპელი ახალგაზრდული ლიდერები მუშაობენ, რომლებსაც სიქა მასპინძლობს ევროკომისიის პროგრამა „ახალგაზრდები მოქმედებაში" ფარგლებში.

15 ივლისს, 11 საათზე ტრენერთა საკვალიფიკაციო ცენტრის ორგანიზებით  გაიმართება სემინარი/ტრენინგი თემაზე: ერთობლივი (ინკლუზიური) სწავლების შესაძლებლობები შეზღუდული შესაძლებლობის მქონე პირებისთვის.  მსურველებმა დაადასტურეთ მონაწილეობა, ტელ: 598 95 74 95 მისამართი:  თბილისი, ვაჟა-ფშაველას II კვ. 9ა. 

14 ივლისს, 15:00 საათზე ორგანიზაცია „ტფილისის ჰამქარი" აწყობს საგანმანათლებლო ტურს „ფეხით შემოვლილი თბილისი – კალა–კლდისუბანი–აბანოთუბანი–ხარფუხი".  მისამართი: თბილისი, თავისუფლების მოედანი, საკრებულოს შენობის წინ

13 ივლისს 18:30 საათზე სამოქალაქო განვითარების ინსტიტუტი  ბათუმში გამართავს ფილმის „დევნა-პოლიტიკური ნიშნით" ჩვენებას და უსაფრთხო სკოლის შესახებ ჩატარებული კვლევის პრეზენტაციას. მისამართი: ბათუმი, „პრეს–კაფე"