თბილისი. სამოქალაქო განვითარების სააგენტოს (CIDA) ორგანიზებით, სასტუმრო „ქორთიარდ მარიოტში" გაიმართა კონფერენცია – „სახელმწიფო იურიდიული დახმარება: რეალობა და გამოწვევები". კონფერენციის ფარგლებში იურიდიული დახმარების სამსახურსა და საზოგადოებრივ ორგანიზაციებს შორის თანამშრომლობის მემორანდუმს მოეწერა ხელი. მემორანდუმზე ხელმოწერით მხარეები შეთანმხდნენ თანამშრომლობაზე იურიდიული დახმარების საკითხებში.   სსიპ „იურიდიული დახმარების სამსახური" უზრუნველყოფს საჯარო და იურიდიული დახმარების ამსახველი ინფორმაციის მიწოდებას საზოგადოებრივი ორგანიზაციებისთვის. იგი ასევე გაითვალისწინებს საზოგადოებრივი ორგანიზაციების მიერ მიწოდებულ რეკომენდაციებს. საზოგადოებრივი ორგანიზაციები თავის მხრივ, ხელს შეუწყობენ საზოგადოების ინფორმირებას, მიაწვდიან სამსახურს რეკომენდაციებს და ა.შ.მემორანდუმი ასევე ითვალისწინებს იმას, რომ არასამთავრობო ორგანიზაციები "ხელს შეუწყობენ სსიპ "იურიდიული დახმარების სამსახურს" სოციალურად დაუცველი მოსახლეობის იმ ნაწილისთვის იურიდიული დახმარების მიწოდებაში, რომელსაც ესაჭიროება წარმომადგენლობა სამოქალაქო და ადმინასტრაციული სამართლის საკითხებზე".   კონფერენციაზე, ასევე, გამოყენებითი კვლევების კომპანიის (ARC) მიერ ჩატარებული კვლევის პრეზენტაცია შედგა, რომელმაც გამოიკვლია იურიდიული დახმარების სამსახურის შესაძლებლობები და საჭიროებები. კვლევის მიხედვით, გამოკითხულთა 73,6 % სრულიად კმაყოფილია მათი მომსახურებით. მიუხედავად ნდობის („სრულიად ვენდობი" – 73,7 %) და კმაყოფილების მაღალი ხარისხისა, ბენეფიციარების თითქმის მესამედი თვლის, რომ მოსახლეობას მეტი ინფორმაცია უნდა ჰქონდეს სამსახურის საქმიანობის შესახებ. მომსახურების სარგებლობამდე ბენეფიციართა 43,1 %–მა არ იცოდა ამ ორგანიზაციის არსებობის შესახებ. მათ შორის ვისაც ჰქონდა ინფორმაცია, უმეტესობა აღნიშნავს, რომ ინფორმაციის წყაროს ის ნაცნობები წარმოადგენენ, რომელთაც უკვე მიიღეს მომსახურება იურიდიული დახმარების სამსახურისგან. მხოლოდ 15 %–ს აქვს მიღებული ინფორმაცია სატელევიზო გადაცემიდან ან რეკლამიდან.   პრეზენტაციის შემდგომ გაიმართა დისკუსია, სადაც კონფერენციის მონაწილეებმა სახელმწიფო იურიდიული დახმარების საქმიანობის, მონიტორინგის და ევალუაციის ეფექტურობის გაზრდის შესახებ იმსჯელეს.

შიდა ქართლი. გორის დემოკრატიული ჩართულობის ცენტრში ორგანიზაციებმა – უსაფრთხო მსოფლიო და კავკასიის კვლევითი რესურსების ცენტრმა გამართეს კვლევის შედეგების პრეზენტაცია. კვლევა ჩატარდა ცხინვალის რეგიონის გამყოფი ხაზის მოსაზღვრე ოთხ არეალში: ატოც-დირბში, ნიქოზი-მერეთში, ფლავისმან-ბერშუეთსა და წითელუბან-ლამისყანაში. პრეზენტაციას ესწრებოდნენ: ევროკავშირის მონიტორინგის მისიის, საერთაშორისო და ადგილობრივი საზოგადოებრივი ორგანიზაციების, საკრებულოს და სამხარეო ადმინისტრაციის წარმომადგენლები. შეხვედრის დროს ორგანიზატორმა ორგანიზაციებმა ისაუბრეს კვლევის მეთოდებსა და შედეგების შესახებ. ასევე, შედარდა წინა კვლევისა და ამჟამინდელი კვლევის შედეგები, რამაც გამოკვეთა ცვლილებები აღნიშნულ ზონაში მცხოვრები მოსახლეობის უსაფრთხოების კუთხით.

23 მაისს 11:00 საათზე, ბათუმის დემოკრატიული ჩართულობის ცენტრიში,  ორგანიზაცია „ციხის საერთაშორისო რეფორმა" (PRI) გამართავს შეხვედრას თემაზე – „სისხლის სამართლის სისტემის ჰუმანიზაციის ხელშეწყობა სამოქალაქო საზოგადოების ჩართულობით".

23 მაისს, 11:00 საათზე, სასტუმრო „ქორთიარდ მარიოტში" სამოქალაქო განვითარების სააგენტოს (СiDA) ორგანიზებით გაიმართება კონფერენცია –  „სახელმწიფო იურიდიული დახმარები: რეალობა და გამოწვევები".

თბილისი. რა როლს ასრულებს დღევანდელი ქართული საბანკო სისტემა ქვეყნის ეკონომკურ განვითარებაში - ეს  იყო „ახალგაზრდა ფინანსისტთა და ბიზნესმენთა ასოციაციის" კვლევის ძირითადი ფოკუსი. კვლევის შედეგების საზოგადოებრივი ორგანიზაციის წარმომადგენლებმა  სასტუმრო „ძველ მეტეხში" წარუდგინეს საზოგადოებას. სამუშაო ჯგუფმა მსოფლიო ბანკისა და საქართველოში არსებული სტატისტიკური მონაცემები გაანალიზა და შედეგად ორი დასკვნა გამოიტანა: საქართველოში ერთ–ერთი ყველაზე ძვირი კრედიტებია და ქართული საბანკო სექტორი ეკონომიკის ხარჯზე იზრდება. „ჩვენი რეკომენდაცია ამ შემთხვევაში არის ის, რომ ერონვულმა ბანკმა ყურადღება მიაქციოს ამ საკითხს, ვინაიდან მხოლოდ მასზეა დამოკიდებული ნებისმიერი პროცესი, რომელიც საბანკო სისტემაში ვითარდება და განვითარდება მომავალში" - ამბობს ორგანიზაციის პრეზიდენტი ნოდარ ჭიჭინაძე.

თბილისი. 18 მაისს, სასტუმრო „თბილისი მარიოტში" გაიმართა საზოგადოებრივი ორგანიზაციების ვებპორტალის www.csogeorgia.org პრეზენტაცია. მრავალმხრივი ინფორმაცია, მარტივი ნავიგაცია და თანამედროვე დიზაინი – ეს ის ასპექტებია, რომლებიც ნებისმიერ დაინტერესებულ პირს საშუალებას აძლევს გაეცნოს ინფორმაციას საქართველოში მოქმედ საზოგადოებრივი ორგანიზაციებისა და მათი საქმიანობების შესახებ, სფეროს სიახლეებს, საერთაშორისო ორგანიზაციების წარმომადგენლობებისა და პროგრამების შესახებ, სურვილი შემთხვევაში მიიღოს იურიდიული კონსულტაცია არასამეწარმეო სამართალში და ა.შ. საზოგადოებრივი ორგანიზაციების პორტალი შეიქმნა სამოქალაქო საზოგადოების ინსტიტუტისა და ფონდ „ღია საზოგადოება – საქართველოს" პარტნიორობით, ასევე ფონდ EED–ის და ევროკავშირის (EU) მხარდაჭერით.

თბილისი.  ინტერნიუს–საქართველომ გამოაქვეყნა ქართულ პრესაში სიძულვილის ენის მონიტორინგის მესამე კვარტალური ანგარიში. მონიტორინგი განხორციელდა 2011 წლის 1 დეკემბრიდან 2012 წლის 29 თებერვლამდე. სრულად...  წყარო: media.ge

აჭარა. ხელვაჩაურის მუნიციპალიტეტის საკრებულოს სხდომათა დარბაზში, სამოქალაქო საზოგადოების ინსტიტუტის ორგანიზებით პროექტის – „საზოგადოებრივი ორგანიზაციების საარსებო გარემოს გაუმჯობესება და მათი ეფექტურობის გაზრდის ხელშეწყობა" (დონორი ფონდი EED) – ფარგლებში შერჩეული  ლიდერები შეხვდნენ ხელვაჩაურის მუნიციპალიტეტის გამგეობის წარმომადგენლებს. შეხვედრის მიზანი იყო ხელვაჩაურის მუნიციპალიტეტის 2012 წლის ბიუჯეტის საჯაროობა, ასევე სოფლებში არსებული პრობლემების იდენტიფიცირება და მათი გადაჭრის გზების განხილვა.

21 მაისს, 16:00 საათზე, სასტუმრო „ძველ მეტეხში" ახალგაზრდა ფინანსისტთა და ეკონომისტთა ასოციაცია გამართავს ბრიფინგს.

21 მაისს, გორის საინფორმაციო ცენტრის ოფისში, საერთაშორისო ორგანიზაცია უსაფრთხო მსოფლიო და მშვიდობის, დემოკრატიის და განვითარების კავკასიური ინსტიტუტი აწყობენ შიდა ქართლის თემების უსაფრთხოების კვლევის - ყოველდღიური პრობლემების პრეზენტაციას. კვლევა მიზნად ისახავდა საკვლევ არეალში მცხოვრები თემების უსაფრთხოების და დაუცველობის აღქმის ტენდენციების შეფასებას.

საზოგადოებრივი ორგანიზაცია  კავშირი „ღრელი" ახალციხის დემოკრატიული ჩართულობის ცენტრში, მაისის ბოლოს, თექისგან შექმნილი ნაწარმის გამოფენას გამართავს.

თბილისი. ფონდ „ღია საზოგადოება - საქართველოს" ინიციატივითა და მხარდაჭერით არასამთავრობო ორგანიზაციებმა კოალიცია შექმნეს, რომელიც ოთხ არასამთავრობო ორგანიზაციას აერთიანებს (ასოციაცია მწვანე ალტერნატივა, ახალგაზრდა იურისტთა ასოციაცია, ეკონომიკური პოლიტიკის კვლევის ცენტრი, საერთაშორისო გამჭვირვალობა - საქართველო). კოალიცია „თავისუფალი ბიზნესისათვის" შეისწავლის იმ ფაქტორებს, რაც ხელს უშლის სამართლიანი და თავისუფალი ბიზნესგარემოს ჩამოყალიბებას საქართველოში.   წყარო: www.osgf.ge

აჭარა. საქართველოს ახალგაზრდა იურისტთა ასოციაციის ინიციატივით გაიმართა შეხვედრა თემაზე  – „რეგიონი და ადამიანის უფლებები". შეხვედრაზე რეგიონში ადამიანის უფლებების მიმართულებით მომუშავე საზოგადოებრივმა ორგანიზაციებმა, დამსწრე საზოგადოებას ბავშვთა უფლებების, საკუთრების უფლების, გამოხატვის თავისუფლების, სამოქალაქო ჩართულობის და დევნილთა მდგომარეობის მიმართულებით არსებული ვითარება გააცნეს. პრეზენტაციის შემდეგ გაიმართა დისკუსია, სადაც ყველა მნიშვნელოვანი და პრობლემატური საკითხი განიხილეს და გაანალიზეს. შეხვედრას ესწრებოდნენ ადგილობრივი საზოგადოებრივი ორგანიზაციების წარმომადგენლები, სტუდენტები და უფროსკლასელები.

თბილისი. საქართველოში თურქეთის საელჩოსთან საზოგადოებრივმა  ორგანიზაციამ „ლგბტ საქართველომ" საპროტესტო აქცია გამართა.  ისინი ამ აქციით თურქეთში ბოლო პერიოდში მოკლული ტრანსგენდერი ადამიანების ფაქტებს გამოეხმაურნენ და გამოძიების დაწყებას მოითხოვეს. აქცია ჰომოფობიის წინააღმდეგ ბრძოლის საერთაშორისო დღესთან დაკავშირებით გაიმართა. ორგანიზაციამ ოფიციალური წერილიც მოამზადა თურქეთის საელჩოში გადასაცემად. სრულად დოკუმენტი

გურია. 12–13 მაისს, ახალგაზრდა პედაგოგთა კავშირის ოფისში ლიდერთა სკოლის მოსწავლეებისთვის, ცნობილმა ფოტოხელოვანმა ირინა აბჟანდაძემ ფოტოგრაფიის მასტერკლასი გამართა. მასტერკლასის პირველი დღე ფოტოგრაფიის, როგორც ვიზუალური ხელოვნების შესახებ ლექციას დაეთმო. ყურადღება გამახვილდა ფოტოგადაღების თავისებურებებზე. დეტალურად განიხილეს რეპორტაჟული და რაკურსით გადაღებული ფოტოს თავისებურებებიც, ფოტოს კითხვად ააღქმა, ფოტოგრაფიასა და სახვით ხელოვნებაში კადრის კომპოზიცია. ასევე, მოზარდები გაეცნენ ცნობილი ფოტოხელოვნების ნიმუშებს და ქორეოგრაფიულ პროექტებს. მეორე დღე პრაქტიკულ მეცადინეობას დაეთმო — მოზარდებმა გადაიღეს სიუჟეტური ფოტოები და პორტრეტები. მასტერკლასის დასასრულს გაიმართა გადაღებული მასალების გარჩევა. მასტერკლასზე მიღებული ინფორმაციებისა და ცოდნის საფუძველზე ლიდერთა სკოლაში მზადდება ფოტოგამოფენა, რომელიც ბავშვთა უფლებებს მიეძღვნება.

იმერეთი. კამპანიის – ,,ეს შენ გეხება" – ფარგლებში, „სამართლიანი არჩევნებისა და დემოკრატიის საერთაშორისო საზოგადოება" (ISFED) ქუთაისის პოლიტიკური პარტიების, საზოგადოებრივი ორგანიზაციების, ასევე ადგილობრივი მედიის წარმომადგენლებს შეხვდა. ორგანიზატორებმა დამსწრე საზოგადოებას, კამპანიის ფარგლებში, მომზადებული ინიციატივები და წინასაარჩევნო მონიტორინგის შედეგები გააცნეს. შეხვედრაზე პოლიტიკურ პარტიებსა და საზოგადოებრივ ორგანიზაციებს შორის მსჯელობა გაიმართა შემდეგ საკითხებზე – წინასაარჩევნო გარემო, სახელმწიფოს მიერ დახარჯული თანხები 2012 წელს, კონტროლის პალატის უფლებამოსილება, საკონსტიტუციო ცვლილებები. რაც შეეხება მონიტორინგს, იგი მოიცავს  2012 წლის 1 იანვრიდან 20 მარტამდე პერიოდს და სამი მიმართულებით ჩატარდა: საბიუჯეტო პროცესები, საქართველოს ბიუჯეტი და კონკრეტული ქალაქების ბიუჯეტი, პოლიტიკური ნიშნით ზეწოლის ფაქტები. მონიტორინგი ჩატარდა 4 ქალაქში: თბილისში, ქუთაისში, ბათუმსა და გორში.

გურია. საზოგადოებრივმა ორგანიზაციამ „დემოკრატიული განვითარების კავშირმა" განახორციელა სამონიტორინგო გასვლა ჩოხატაურის მუნიციპალიტეტის კოხნარის თემში.  შეხვედრა გაიმართა  ახალგარზდული ცენტრის „კოხნარას'' ოფისში და საუბარი შეეხო თემში არსებულ პრობლემებს. ორგანიზაცია პროექტს ახორციელებს საქართველოს სტრატეგიული კვლევებისა და განვითარების ცენტრის ერთობილივი ქსელური პროგრამის ფარგლებში.

გურია. საქართველოს ახალგაზრდა იურისტთა ასოციაციისა და სამართლიანი არჩევნების მიერ მოეწყო მრგვალი მაგიდა. შეხვედრის მიზანი იყო საარჩევნო კოდექსში შესული ცვლილებების და საქართველოს კონსტიტუციაში მოსალოდნელი ცვლილებების განხილვა და საზოგადოების მოსაზრებების მოსმენა. დემოკრატიული ჩართულობის ცენტრში გამართულ შეხვედრას ესწრებოდნენ პოლიტიკური პარტიების, მედიის და საზოგადოებრივი ორგანიზაციების წარმომადგენლები.

სამცხე–ჯავახეთი. 12 და 13 მაისს ახალციხის ახალგაზრდულ ცენტრში, სამოქალაქო განათლებისა და პედაგოგთა გადამზადების პროექტის ფარგლებში, სოციალური მედიის ტრენინგები ჩატარდა. ორდღიან ტრენინგს სამცხე-ჯავახეთის სხვადასხვა მუნიციპალიტეტის სკოლების მოსწავლეები ესწრებოდნენ. ტრენინგებზე მონაწილეებს განემარტათ თუ რა არის სოციალური მედია, ისწავლეს ბლოგების შექმნის და ინტერნეტში მუშაობის სპეციფიკა, ასევე ის, თუ როგორ გამოიყენონ ეს ცოდნა ინფორმაციის გასავრცელებლად და როგორ გაუზიარონ თანატოლებს სკოლებში დაბრუნების შემდგომ.

სამცხე–ჯავახეთი. ახალქალაქის მეოთხე საჯარო სკოლის სამოქალაქო განათლების კლუბის წევრებმა მცირე გრანტების პროგრამით დაფინანსებული პროექტის ფარგლებში გამოცემული ორენოვანი გაზეთის პრეზენტაცია გამართეს. პრეზენტაციაზე სამოქალაქო განათლების კლუბის წევრებმა ისაუბრეს საზოგადოების წინაშე მდგარ აქტუალურ საკითხებზე, რომლებიც ორენოვანი გაზეთის ყურადღების ცენტრში მოექცა. ასევე დასძინეს, რომ მსგავსი პროექტები და ღონისძიებები დაეხმარება ახალგაზრდებს ენობრივი ბარიერის დაძლევაში.

18 მაისს, 15:00 საათზე, სასტუმრო „თბილისი მარიოტში" გაიმართება საზოგადოებრივი ორგანიზაციების ვებპორტალის – www.csogeorgia.org – პრეზენტაცია. იგი შეიქმნა საზოგადოებრივ ორგანიზაციებს შორის ინფორმაციის გაცვლის, კომუნიკაციის გაუმჯობესების, რესურსების გაზიარების მიზნით. ასევე, საერთაშორისო ორგანიზაციების წარმომადგენლებს, საზოგადოებას, ნებისმიერ დაინტერესებულ პირს ეს ვირტუალური სივრცე საშუალებას მისცემს, დროის და ენერგიის მინიმალური დანახარჯით მიიღოს ინფორმაცია მესამე სექტორის შესახებ. ვებპორტალი – www.csogeorgia.org შეიქმნა სამოქალაქო საზოგადოების ინსტიტუტის და ფონდ „ღია საზოგადოება – საქართველოს" პარტნიორობით, ასევე ფონდ EED–ისა და ევროკავშირის  (EU) მხარდაჭერით.

თბილისი. კავშირმა „ადამიანებისთვის, განსაკუთრებულ ზრუნვას რომ საჭიროებენ"  სხვადასხვა ნივთების გამოფენა–გაყიდვა მოაწყო. ნივთებს საზოგადოებრივი ორგანიზაციის ბენეფიციარები, შეზღუდული შესაძლებლობის მქონე მოზრდილები ამზადებენ. ისინი ასევე მასპინძლობდნენ ექსკლუზიური ნივთების დასათვალიერებლად და შესაძენად მისულ სტუმრებს. გამოფენაზე წარმოდგენილი იყო სურნელოვანი სანთლები, სხვადასხვა სახი რვეულები, გობელენები, თექისგან დამზადებული სხვადასხვა პროდუქცია, ხის ნივთებიდა ა.შ. იგი 11–დან  7 საათამდე გრძელდებოდა. ორგანიზაცია წელიწადში ორჯერ მართავს გამოფენას – საშობაოდ და სააღდგომოდ. წელს ტრადიციას გადაუხვიეს და წინასააღდგომო გამოფენა გაზაფხულზე გადმოიტანეს.