თბილისი. „ადამიანის უფლებების სწავლებისა და მონიტორინგის ცენტრი" (EMC) აქვეყნებს განცხადებას, მშრომელთა სოლიდარობის საერთაშორისო დღესთან დაკავშირებით. „განვითარების არსებული მოდელისა და დასაქმების პოლიტიკის ხარვეზულობით განპირობებული სიღარიბისა და უმუშევრობის, სუსტი სოციალური დაცვის სისტემის, ქალების მიერ შესრულებული უხილავი და აუნაზღაურებელი შრომისა თუ არაფორმალურ სექტორში თვითდასაქმებული ადამიანებისთვის შეზღუდვების დაწესების ფონზე, დღეს "პრივილეგიაა” იყო დასაქმებული სერვისის სექტორში, ხშირად ანაზღაურებადი შვებულების, ბიულეტენის, ზეგანაკვეთური და ღამის შრომის განსხვავებული წესით ანაზღაურების გარეშე; ანაზღაურებით, რომელიც ხშირად არ იძლევა ინდივიდუალური სამომხმარებლო ხარჯის სრულად დაფარვის შესაძლებლობას და იძულებულს გხდის, შემოსავლის დამატებითი წყარო მოიძიო, თან იმ პირობებში, როცა არსებული სამუშაოზე მომეტებული და მძიმე შრომა გიწევს, რაც განაპირობებს არანორმირებულ, ზეგანაკვეთურ შრომას დამატებითი ანაზღაურების გარეშე; ამასთან, შენს მიმართ ზეწოლის ბერკეტად გამოიყენონ დაჯარიმების უსამართლო და არამართლზომიერი პოლიტიკები", - ნათქვამია EMC-ის განცხადებაში. სრულად... წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია მშრომელთა სოლიდარობის საერთაშორისო დღეს ეხმაურება. „1 მაისი მნიშვნელოვანი დღეა, რომელიც სიმბოლურად დასაქმებულების მიერ გაწეულ შრომის მნიშვნელობას და ღირსეული სამუშაო პირობების აუცილებლობას უსვამს ხაზს. ადამიანის მიერ შრომის თავისუფლების სრულყოფილი რეალიზაცია განაპირობებს კონკრეტული პირის თუ ქვეყნის სოციალურ კეთილდღეობას, თუმცა, საქართველოში ბოლო დროს განხორციელებული დადებითი საკანონმდებლო ცვლილებების მიუხედავად, შრომის თავისუფლების სათანადო დაცვის აუცილებლობა კვლავ არ არის სათანადოდ გააზრებული პოლიტიკის დონეზე", - აღნიშნულია საია-ს მიერ გავრცელებულ განცხადებაში.  სრულად... წყარო: ორგანიზაციის ვებგვერდი

თბილისი. მშრომელთა სოლიდარობის საერთაშორისო დღესთან დაკავშირებით, საქართველოს სახალხო დამცველის აპარატი განცხადებას ავრცელებს.  „1 მაისი მშრომელთა საერთაშორისო დღეა, ამ დღეს სახალხო დამცველი კიდევ ერთხელ მოუწოდებს ხელისუფლებას გაატაროს სათანადო ღონისძიებები შრომითი უფლებების სფეროში არსებული პრობლემების მოსაგვარებლად", - ვკითხულობთ განცხადებაში, - „განსაკუთრებულ შეშფოთებას იწვევს სამუშაო ადგილებზე დაღუპულთა და დაშავებულთა მზარდი სტატისტიკა. 2018 წელს წარმოებაში მომხდარი უბედური შემთხვევების შედეგად, დაიღუპა 59 და დაშავდა 199 ადამიანი... არ ტარდება სათანადო ღონისძიებები დაქირავებულთა ჯანმრთელობაზე, მათი კვალიფიკაციის ამაღლებაზე, პირველადი სამედიცინო დახმარების სწავლებაზე ზრუნვისთვის. არ არის დაცული სანიტარიულ-ჰიგიენური ნორმები... შრომის კანონმდებლობით გათვალისწინებული მოთხოვნების მონიტორინგმა აჩვენა, რომ, ხშირ შემთხვევაში, სამუშაო დროის ხანგრძლივობა შეუსაბამოა ხელშეკრულებით განსაზღვრულ პირობებთან; ირღვევა შვებულების გაცემის წესი, ანაზღაურების გაცემის წესი... თანასწორობის პრინციპების დაცვის მიმართულებით, შრომის უფლებები განსაკუთრებით მოწყვლად ჯგუფების - ქალებისა და შშმ პირების მიმართ ირღვევა... სახალხო დამცველი თავისი მანდატის ფარგლებში აგრძელებს ქვეყანაში შრომითი უფლებების დაცვის მდგომარეობის შესწავლას და გამოიყენებს მის ხელთ არსებულ ყველა საშუალებას არსებული ვითარების გამოსასწორებლად".  სრულად... წყარო: ორგანიზაციის ვებგვერდი

1 მაისს, 17:00 საათზე, მთავრობის ადმინისტრაციასთან, საქართველოს გაერთიანებული პროფკავშირები საპირველმაისო აქციას გამართავენ.  მისამართი: პავლე ინგოროყვას ქუჩა #7

თბილისი. საქართველოს ახალგაზრდა იურისტთა ასოციაციამ, პარტნიორ ორგანიზაცია ,,ადამიანის უფლებათა დაცვის ევროპული ცენტრთან (EHRAC)'' თანამშრომლობით, 2019 წლის 17 აპრილს, ადამიანის უფლებათა ევროპულ სასამართლოში საჩივარი წარადგინა. საჩივარი პოლიციელების მხრიდან ირაკლი ხოფერიას მიმართ განხორციელებულ არასათანადო მოპყრობასა და ამ ფაქტზე დაწყებული გამოძიების არაეფექტურობას შეეხება.  სრულად... წყარო: gyla.ge

თბილისი. „ადამიანის უფლებების სწავლებისა და მონიტორინგის ცენტრი" (EMC) აქვეყნებს სოციალური უფლებების ევროპულმა კომიტეტის (ECSR) 2018 წლის დოკუმენტს საქართველოს შესახებ. დოკუმენტი შეეხება ევროპის სოციალური ქარტიით (ESC) გათვალისწინებულ შრომით უფლებებთან (რატიფიცირებულ ნაწილებთან მიმართებით) საქართველოს კანონმდებლობის შესაბამისობას და მოიცავს ისეთ საკითხებს, როგორიცაა: სამუშაო საათების გონივრულობა, უქმე დღეების ანაზღაურება, ყოველკვირეული დასვენების პერიოდი, ღამის სამუშაო, ქალი და მამაკაცი მუშაკების უფლება თანაბარი ღირებულების სამუშაოსათვის თანაბარი ანაზღაურების მიღებაზე, დასაქმების შეწყვეტის შესახებ გონივრული ვადით ადრე ინფორმირება, ორგანიზების უფლება, ერთობლივი კონსულტაციები, მოლაპარაკების პროცედურები, ინფორმაციისა და კონსულტაციის უფლება კოლექტიური გათავისუფლების პროცედურების შემთხვევებში, კოლექტიური მოქმედება.  სრულად... წყარო: ორგანიზაციის ვებგვერდი

თბილისი. საქართველოს სახალხო დამცველმა გამოაქვეყნა სპეციალური ანგარიში 2018 წელს „დისკრიმინაციის წინააღმდეგ ბრძოლის, მისი თავიდან აცილებისა და თანასწორობის მდგომარეობის შესახებ".  „საქართველოს სახალხო დამცველი, „დისკრიმინაციის ყველა ფორმის აღ-მოფხვრის შესახებ" საქართველოს კანონის შესაბამისად, წელიწადში ერთხელ შეიმუშავებს და აქვეყნებს სპეციალურ ანგარიშს ქვეყანაში დისკრიმინაციის წინააღმდეგ ბრძოლის, მისი თავიდან აცილების და თანასწორობის მდგომარე-ობის შესახებ. წინამდებარე ანგარიში წარმოადგენს რიგით მე-4 დოკუმენტს. დადებით ცვლილებებთან ერთად, სამწუხაროდ, საქართველოში თანასწორობის უფლების დაცვა კვლავ არაერთი გამოწვევის წინაშე დგას. ამ ეტაპზე, არ არის განხორციელებული საკანონმდებლო ცვლილებები, რომელსაც დისკრიმინაცი-ის წინააღმდეგ ბრძოლის შესახებ კანონმდებლობის დახვეწის მიზნით, საქართ-ველოს სახალხო დამცველი 2015 წლიდან ითხოვს. სახელმწიფო ხელისუფლების წარმომადგენლების მხრიდან არ ისმის თანასწორობის მხარდამჭერი განცხა-დებები; ამასთან, როგორც თანასწორობის შესახებ სახალხო დამცველის წინა ანგარიშშიც2 იყო აღნიშნული, სასამართლოები კვლავ არ აწარმოებენ დისკრიმ-ინაციის შესახებ საქმეების შესახებ სტატისტიკას. ყველაზე დაუცველ ჯგუფებად, წინა წლების მსგავსად, რჩებიან ქალები, შეზ-ღუდული შესაძლებლობის მქონე პირები, და ლგბტ+ თემის წარმომადგენლები", - ვკითხულობთ ანგარიშის წინასწიტყვაობაში.  სრულად... წყარო: ორგანიზაციის ვებგვერდი

თბილისი. წამების მსხვერპლთა ფსიქოსოციალური და სამედიცინო რეაბილიტაციის საქართველოს ცენტრისა (GCRT) და უკრაინის ფსიქიატრთა ასოციაციას წარმომადგენლებმა წამების მსხვერპლთა რეაბილიტაციის საერთაშორისო ცენტრთან (IRCT) თანამშრომლობით კიევში სამდღიანი ტრენინგი ჩაატარეს სტამბოლის პროტოკოლის იმპლემენტაციის შესახებ. სრულად... წყარო: ორგანიზაციის გვერდი სოციალურ ქსელში

აჭარა. 23 აპრილს, ქ. ბათუმის მე-9 საჯარო სკოლაში ჩატარდა თანატოლთა ტრენინგი, თემაზე: „ქალთა მიმართ ძალადობა და მასთან ბრძოლის გზები". მომხსენებელი გახლდათ ბათუმის ახალგაზრდული ცენტრის მოხალისე - ლაშა ბერიძე. „დისკუსიის რეჟიმში, ვისაუბრეთ ქალთა მიმართ ძალადობის გააზრებაზე ჩვენს საზოგადოებაში, მის გამომწვევ მიზეზებსა და შედეგებზე, დავასახელეთ ამ პრობლემასთან ბრძოლის ოპტიმალური გზები", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. „ინფორმაციის თავისუფლების განვითარების ინსტიტუტი" (IDFI), არქივების მეტი გამჭვირვალობისა და საარქივო დოკუმენტების ხელმისაწვდომობის უზრუნველსაყოფად, პარლამენტს „ეროვნული საარქივო ფონდისა და ეროვნული არქივის შესახებ" საქართველოს კანონში ცვლილებისა და დამატებების შეტანის ინიციატივით მიმართა. „საქართველოში საარქივო დოკუმენტებზე ხელმისაწვდომობის მხრივ დაწესებულია ერთ-ერთი ყველაზე შემზღუდველი რეგულაციები აღმოსავლეთ ევროპის მასშტაბით. აღნიშნული საკითხი პრობლემურია იქიდან გამომდინარეც, რომ, შედეგად, საზოგადოებას, განსაკუთრებით კი მათ, ვინც დაინტერესებულია ისტორიული თუ საბჭოთა კვლევების საკითხით, ექმნება დაბრკოლება გაეცნოს მასალებს და სწორედ გაიაზროს წარსული. IDFI-ის მიაჩნია, რომ აუცილებელია საქართველოში გაიზარდოს საარქივო დოკუმენტებზე ხელმისაწვდომობა, ამ მიზნით კი, პირველ რიგში, მოქმედ კანონმდებლობაში უნდა განხორციელდეს შესაბამისი ცვლილებები და დამატებები", - აღნიშნულია IDFI-ის მიერ გავრცელებულ ინფორმაციაში. სრულად... წყარო: ორგანიზაციის ვებგვერდი

თბილისი. „კოალიცია ბავშვებისა და ახალგაზრდებისთვის” წარმომადგენელი, ანა აბაშიძე, პირველად აირჩიეს ChildPact-ის სამეთვალყურეო საბჭოს წევრად. „პარტნიორობა ადამიანის უფლებებისთვის" ულოცავს ანას რეგიონული კოალიციების გაერთიანების ამ სტრატეგიულად მნიშვნელოვან პოზიციაზე დანიშვნას და წარმატებებს უსურვებს. სრულად... წყარო: phrgeorgia.wordpress.com

თბილისი. საზოგადოებრივი ორგანიზაციების ნაწილი პანკისის ხეობაში საპოლიციო ძალის გამოყენების ფაქტს ეხმაურება. „1 წელზე მეტია პანკისის ხეობის მოსახლეობა აქტიურად აპროტესტებს პანკისის ხეობაში დაგეგმილი „ხადორი 3" და „სამყურისწყალი 2" ჰესის მშენებლობას, რის თაობაზეც სასამართლოშიც მიმდინარეობს დავა. ჰესების ნებართვების დოკუმენტების ანალიზი აჩვენებს, რომ ისინი აშკარად დაუსაბუთებელია და სათანადოდ არ არის შესწავლილი ჰესების მშენებლობისგან გარემოზე ზემოქმედების რისკები, მათ შორის, სასმელ წყალზე მისი ზეგავლენა. ხეობაში უკვე აშენებული ჰესების გამოცდილებიდან გამოდინარე, ადგილობრივები უთითებენ პატარა ხეობაში ჰესების კასკადის (მთლიანობაში 4 ჰესის) დამაზიანებელ გავლენას მათ უნიკალურ ბუნებრივ და სოციალურ გარემოზე და ხეობის მდგრადი ეკონომიკური განვითარების რესურსზე", ნათქვამია ერთობლივ განცხადებაში. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) ეხმაურება 2019 წლის 15 აპრილს ზვიად მთავრიშვილის გარდაცვალების ფაქტს, რომელიც პოლიციელთა მხრიდან მის მიმართ განხორციელებული სავარაუდო ძალადობის შემდეგ, რამდენიმე დღეში გარდაიცვალა. ორგანიზაცია მოუწოდებს პროკურატურას ჩაატაროს დროული და ეფექტიანი გამოძიება, მათ შორის, დაადგინოს პოლიციელთა შესაძლო პასუხისმგებლობა მომხდარ ფაქტთან დაკავშირებით. სრულად... წყარო: gyla.ge

აჭარა. 2019 წლის 18 აპრილს საკონსტიტუციო სასამართლომ დააკმაყოფილა საია-ს კიდევ ერთი სარჩელი, რომელიც ზემდგომ ინსტანციაში სასამართლოს გადაწყვეტილების გასაჩივრების ვადის ათვლას ეხებოდა. საიამ საკონსტიტუციო სასამართლოში ის ნორმა გაასაჩივრა, რომელითაც ზემდგომ ინსტანციაში სასამართლოს გადაწყვეტილების გასაჩივრების ვადის ათვლა იწყება არა გადაწყვეტილების სამოტივაციო ნაწილის მხარისათვის გადაცემის მომენტიდან, არამედ სარეზოლუციო ნაწილის გამოცხადების მომენტიდან. საკონსტიტუციო სასამართლომ საიას პოზიცია გაიზიარა და გასაჩივრებული ნორმა არაკონსტიტუციურად სცნო. ამასთან საკონსტიტუციო სასამართლომ პარლამენტს ვადა მისცა 2019 წლის 1 ივლისამდე, რათა ცვლილება შეიტანოს ადმინისტრაციულ სამართალდარღვევათა კოდექსში.  სრულად... წყარო: ორგანიზაციის ვებგვერდი

თბილისი. ადამიანის უფლებებზე მომუშავე ორგანიზაციები და პროფესიული კავშირები მოუწოდებენ საქართველოს ხელისუფლებას პასუხისმგებლობა აიღოს ქვეყანაში დასაქმებულთა შრომითი უფლებების სფეროში შექმნილ კრიზისულ და საგანგაშო მდგომარეობაზე. „იმის მიუხედავად, რომ ბოლო პერიოდში ხელისუფლების მხრიდან შრომის უსაფრთხოების უზრუნველყოფის მიზნით გარკვეული ნაბიჯები გადაიდგა, მათ შორის, საქართველოს პარლამენტმა მიიღო „შრომის უსაფრთხოების შესახებ" ორგანული კანონი, უკანასკნელ პერიოდში დასაქმების ადგილზე მუშათა დაღუპვისა და დაშავების უკიდურესად შემაშფოთებელი მაჩვენებლები იმის ინდიკატორია, რომ მხოლოდ ეს საკანონმდებლო ღონისძიებები ვერ ახერხებს არსებულ კრიზისთან გამკლავებას. ჩვენი შეფასებით, არსებითია სახელმწიფომ გადადგას სისტემური და ქმედითი ნაბიჯები კანონმდებლობაში არსებული სტანდარტების გაძლიერებისა და შრომის უფლებების დაცვის სფეროში აღსრულების მექანიზმების გაძლიერების მიზნით", ნათქვამია ერთობლივ განცხადებაში. სრულად... წყარო: emc.org.ge

თბილისი. „ადამიანის უფლებების სწავლებისა და მონიტორინგის ცენტრი" (EMC), დასაქმებულთათვის ღირსეული შრომითი გარემოს შექმნის მიზნით, ხელისუფლების მხრიდან დაუყოვნებლივი ქმედებების გატარებას ითხოვს და სპეციალურ განცხადებს ავრცელებს. „საწარმოო შემთხვევების შედეგად დაშავებულთა და დაღუპულთა რაოდენობამ ბოლო წლებში საგანგაშო მონაცემებს მიაღწია. 2011-2018 წლებში დაშავდა 1081 და დაიღუპა 376 ადამიანი. 2018 წელს, წინა წლებთან შედარებით, დაღუპულთა ყველაზე მაღალი მაჩვენებელი დაფიქსირდა - 59 ადამიანი. საწარმოო შემთხვევათა სიმრავლიდან გამომდინარე, მსგავსი სიახლეები თითქმის ყოველდღიურობად იქცა და საზოგადოებრივი თუ პოლიტიკური რეაგირების მიღმა რჩება. შრომის უსაფრთხოების მიმართულებით არსებული მძიმე მდგომარეობის საპასუხოდ საქართველოს პარლამენტმა მიიღო „შრომის უსაფრთხოების შესახებ" ორგანული კანონი. აღნიშნული კანონის მიღება არსებითად მნიშვნელოვანი წინგადადგმული ნაბიჯი იყო დასაქმებულთა შრომითი უფლებების უზრუნველყოფისკენ. თუმცა, შესაბამისი ზედამხედველობის მექანიზმის შემუშავებისა და კანონმდებლობის გამკაცრების მიუხედავად, აღსრულების მექანიზმების არაეფექტურობა და მნიშვნელოვანი საკანონმდებლო რეგულაციების ამოქმედების ვადის მომავალში გადადება დასაქმებულთა სიცოცხლეს და ჯანმრთელობას ყოველდღიური რისკის ქვეშ აყენებს", - აღნიშნულია EMC-ის მიერ გავრცელებულ განცხადებაში.  სრულად... წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი" აქვეყნებს ცოტნე ცხვედიანის და არზუ ბაირამობას სტატიას, სკოლამდელი განათლების გარეშე დარჩენილი ბავშვებისა და მათი მშობლების შესახებ. „სკოლამდელი აღზრდის პრობლემა დღეს მთელს ქვეყანაში მწვავედ დგას, სახელმწიფო ბაღები აღსაზრდელებს ვერ იტევს, ბევრი მშობელი იძულებულია, შვილი კერძო ბაღში ატაროს. კერძო ბიზნესისთვის, ცხადია, პრიორიტეტულია ბაღები ქალაქის ცენტრში გახსნას, რეგიონებში კი უმარავი ბავშვი სკოლამდელი განათლების გარეშე რჩება. განსაკუთრებით რთული ვითარებაა ქვემო ქართლში, აზერბაიჯანელებით დასახლებულ სოფლებში - აქ სულ 4 ბაღი ფუნქციონირებს", ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს სახალხო დამცველისა და სამხრეთ კავკასიაში გაეროს ადამიანის უფლებათა უმაღლესი კომისრის ოფისის ორგანიზებით, დღეს გაიმართა კონფერენცია, რომელზეც შეზღუდული შესაძლებლობების მქონე პირთა უფლებების სფეროში არსებულ მიღწევებსა და გამოწვევებზე ისაუბრეს. მისასალმებელი სიტყვით გამოსვლისას საქართველოს სახალხო დამცველმა აღნიშნა, რომ, მიუხედავად გარკვეული ღონისძიებებისა, საქართველოში ჯერ კიდევ არ არსებობს გაეროს შეზღუდული შესაძლებლობების მქონე პირთა უფლებების შესახებ კონვენციის განხორციელებაზე პასუხისმგებელი მექანიზმი. შესაბამისად, ქვეყანას არ გააჩნია ამ უმნიშვნელოვანესი საერთაშორისო ხელშეკრულების პრაქტიკაში დანერგვის ერთიანი ხედვა; სხვადასხვა უწყების მიერ ფრაგმენტულად განხორციელებული ღონისძიებები კი ვერ უზრუნველყოფს შშმ პირების უფლებების სრულყოფილად რეალიზებასა და ცხოვრების დონის გაუმჯობესებას.  სრულად... წყარო: ორგანიზაციის ვებგვერდი

თბილისი. მედიის განვითარების ფონდი (MDF) აქვეყნებს „მილაბის" მორიგ თამაშს: გძულს თუ ტოლერანტი ხარ? „წარმოიდგინე, რომ ჟურნალისტი ხარ და მიგრანტებზე მასალას აშუქებ. თამაში გაძლევს შესაძლებლობას, დამოუკიდებლად შექმნა და გამოაქვეყნო ინფორმაცია, მოიძიო სანდო წყაროები, გადაამოწმო ფაქტები, დააბალნსო მოსაზრებები და რაც მთავარია, გამოსცადო, რამდენად ტოლერანტი ან შეუწყნარებელი რეპორტიორი ხარ”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

იმერეთი. საქართველოში ოფიციალური ვიზიტით იმყოფება გაეროს სამუშაო ჯგუფი ბიზნესისა და ადამიანის უფლებების შესახებ. „9 აპრილს საიას ქუთაისის ფილიალის ოფისში სამუშაო ჯგუფმა შეხვედრა გამართა არასამთავრობო ორგანიზაციებისა და და ბიზნეს სექტორის წარმომადგენლებთან, სადაც მათ წარმოადგინეს გაეროს სახელმძღვანელო პრინციპებები და დამწრეებს გაუზიარეს პრაქტიკა პრინციპების იმპლემენტაციის შესახებ რეგიონში”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) ორგანიზებით, დღის ცენტრში „ია" შეზღუდული შესაძლებლობის მქონე გოგონების სექსუალური და რეპროდუქციული ჯანმრთელობის უფლებებთან დაკავშირებით მორიგი შეხვედრა გაიმართა. „PHR-ის იურისტმა თათია მიქელაძემ განმარტა, თუ რა მოიაზრება სექსუალური და რეპროდუქციული ჯანმრთელობის უფლებებში და მიმოიხილა როგორც ეროვნული კანონმდებლობა, ისე საერთაშორისო სტანდარტები. ყურადღება გაამახვილა სექსუალური და რეპროდუქციული ჯანმრთელობის უფლებებთან დაკავშირებით შეზღუდული შესაძლებლობის მქონე მოზარდების ინფორმირებულობის მნიშვნელობაზე, როგორც სექსუალური ძალადობისგან დაცვის პრევენციული მექანიზმზე", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. პარტნიორობა ადამიანის უფლებებისთვის (PHR) აქვეყნებს ბლოგპოსტს თათია სამხარაძის საქმესთან დაკავშირებით. „სააპელაციო სასამართლომ სექსუალური შევიწროების პირველ საქმეზე საბოლოო გადაწყვეტილება მიიღო და 12 დეკემბერს ძალაში დატოვა სასამართლოს პირველი ინსტანციის გადაწყვეტილება საქმეზე – „თათია სამხარაძე შალვა რამიშვილის წინააღმდეგ". აღნიშნული გადაწყვეტილებით, სასამართლომ კიდევ ერთხელ დაადასტურა, რომ შალვა რამიშვილმა, სამსახურებრივი მდგომარეობის გამოყენებით, სამუშაო ადგილზე, სექსუალურად შეავიწროვა თათია სამხარაძე. შესაბამისად, სასამართლომ არ დააკმაყოფილა შალვა რამიშვილის სააპელაციო საჩივარი და განხორციელებული ქმედებისთვის სასამართლომ მას სექსუალური შევიწროების მსხვერპლისთვის მორალური ზიანის ანაზღაურება 2 000 ლარის ოდენობით დააკისრა. თათია სამხარაძის ინტერესებს სასამართლოში ორგანიზაციის „პარტნიორობა ადამიანის უფლებებისთვის" იურისტები იცავდნენ", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com