აჭარა. 3-4 ივნისს, პარტნიორობა ადამიანის უფლებებისთვის (PHR) ქალაქ ბათუმის მე-14 სკოლაში მოსწავლეებს, მათ მშობლებს, მასწავლებლებსა და სკოლის ადმინისტრაციის წარმომადგენლებს შეხვდა. ტრენინგზე განიხილეს ბულინგის პრევენციის და მისი აღმოფხვრისთვის საჭირო სამართლებრივი მექანიზმები. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) ინფორმაციით, კერძო ბაღი ბავშვს გარიცხვის გამო მორალური ზიანის ასანაზღაურებლად ფულად კომპენსაციას გადაუხდის. „ნ.კ. თბილისის ერთ-ერთ კერძო ბაღში 2 წლის ასაკის აღსაზრდელთა ჯგუფში ირიცხებოდა. 2018 წლის იანვრის თვეში ბაღის ადმინისტრაციამ ბავშვი დაწესებულებიდან გარიცხა. მათი განმარტებით, ბავშვი იყო აგრესიული, ზედმეტად აქტიური და არ შეეძლო ჯგუფში მუშაობა. PHR-მა დისკრიმინაციული მოპყრობის ფაქტის დადგენისა და მორალური ზიანის ანაზღაურების მოთხოვნით თბილისის საქალაქო სასამართლოს მიმართა. ამასთან, საკითხის შესწავლის შემდეგ, საქართველოს სახალხო დამცველმა შეიმუშავა რეკომენდაცია, სადაც აღნიშნულია, რომ ბავშვი ბაღის მხრიდან ქცევის ნიშნით აღქმითი პირდაპირი დისკრიმინაციის მსხვერპლი გახდა", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

აჭარა. 4 ივნისს, ბათუმის №4 საჯარო სკოლის მოსწავლეებისთვის ჩატარდა თანატოლგანმანათლებელთა ტრენინგი თემაზე - შრომითი უფლებები, რომელსაც „ევროკლუბის" წევრები, მარიამ ირემაძე და ქრისტინა ლორთქიფანიძე უძღვებოდნენ. „მომხსენებლებმა ისაუბრეს დამსაქმებლისა და დასაქმებულის უფლება-მოვალეობებზე, შრომითი ურთიერთობების მხარეებსა და ხელშეკრულების სახეებზე. დისკუსიაზე, მოსწავლეები გადანაწილდნენ ჯგუფებად და ისაუბრეს სხვადასხვა კაზუსის ამოხსნის მათეულ ვერსიებზე", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველი საქართველოს შინაგან საქმეთა სამინისტროს მიერ „თბილისი პრაიდის" ორგანიზატორებთან შეხვედრის თაობაზე, 2019 წლის 31 მაისს გავრცელებულ განცხადებას ეხმიანება. სამინისტროს განმარტებით, დაგეგმილ ადგილებზე და დაგეგმილი ფორმატით ღონისძიებების ჩატარება, ჩართული პირების უსაფრთხოებასთან დაკავშირებული რისკების გათვალისწინებით, შეუძლებელია. ორგანიზატორთა ცნობით, საქართველოს შინაგან საქმეთა სამინისტრომ მათ „თბილისი პრაიდის" ფარგლებში დაგეგმილი „ღირსების მარშის" დახურულ სივრცეში გადატანა შესთავაზა. საქართველოს სახალხო დამცველი ხაზგასმით აღნიშნავს, რომ კანონმდებლობის მოთხოვნათა დაცვით მშვიდობიანი შეკრებისა და მანიფესტაციის ჩატარება კონსტიტუციით გარანტირებული უფლებაა. სახელმწიფო ვალდებულია, უზრუნველყოს მშვიდობიანი დემონსტრანტების მიერ ამ უფლების სრულფასოვანი რეალიზება და შესაბამისი რესურსის მობილიზებით, მოახდინოს კერძო პირებისგან მათი სათანადო დაცვა. სრულად  წყარო: სახალხო დამცველის აპარატის ვებგვერდი

თბილისი. ორგანიზაციამ „ინიციატივა სოციალური ცვლილებებისთვის" (ISC) უმასპინძლა INSPIRE ფორუმს: შვიდი სტრატეგია ბავშვთა მიმართ ძალადობის დასაძლევად. „ღონისძიების ფარგლებში, მონაწილეებს მიეცათ შესაძლებლობა გაცნობოდნენ მსოფლიო ჯანდაცვის ორგანიზაციისა და საერთაშორისო დონეზე ბავშვთა დაცვისა საკითხებზე მომუშავე ძირითადი სააგენტოების მიერ მომზადებულ INSPIRE ტექნიკურ პაკეტს, რომელშიც თავმოყრილია საუკეთესო ხელმისაწვდომ მტკიცებულებებზე დაფუძნებული სტრატეგიები. მათი დანერგვა ბავშვთა და მოზარდთა მიმართ ძალადობის პრევენციისა და მასზე რეაგირების უკეთეს შესაძლებლობებს იძლევა.", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

შიდა ქართლი. 3 ივნისს, „კეთილდღეობისა და განვითარების ცენტრთან" არსებულმა გორის სამოქალაქო აქტივიზმის ცენტრის მოხალისეებმა ჩაატარეს კარლ პოპერის სტილის დებატები თემაზე „ტოლერანტობა". სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. განათლების განვითარების და დასაქმების ცენტრმა (EDEC) 28 მაისს ბორჯომში, შეზღუდული შესაძლებლობის მქონე პირთა მხარდამჭერი სერვისების შესახებ მრგვალი მაგიდა გამართა. „მრგვალი მაგიდის ფორმატში მომხსენებლებმა საჭიროებებზე დაფუძნებული შეზღუდული შესაძლებლობის მქონე პირთა მხარდამჭერი სერვისების, ამ მიმართულებით არსებული გამოწვევების და მათი გადაჭრის გზების შესახებ იმსჯელეს", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებებზე მომუშავე ორგანიზაციები მთავრობას მოუწოდებენ დროულად და ქმედითად გადაჭრას ჭიათურაში შექმნილი კრიზისი. „10 დღეზე მეტია, ქალაქ ჭიათურაში გაფიცული მაღაროელები მათი დასაქმების ადგილას შექმნილ მძიმე და უსამართლო შრომით, სოციალურ და გარემოსდაცვით პირობებს აპროტესტებენ. დასაქმებულთა ნაწილი პროტესტს შიმშილობითა და სხვა მძიმე ფორმებით გამოხატავს. დასაქმებულების მიმართ გამოკვეთილად მაღალია ქალაქის მოსახლეობის, ბაზრებში დასაქმებული ადამიანების, სკოლის მოსწავლეების და მძღოლების სოლიდარობა. ჭიათურელი მაღაროელების გაფიცვას მხარს უჭერენ საქართველოს სხვადასხვა ინდუსტრიულ ზონებში დასაქმებული ადამიანებიც. პროტესტის მასშტაბებმა და რადიკალურმა ფორმებმა, კიდევ ერთხელ, მწვავედ დააყენა ჭიათურაში წლების განმავლობაში გადაუჭრელი ეკონომიკური და სოციალური პრობლემების მძიმე შედეგების გააზრებისა და გადაჭრის საჭიროება", ნათქვამია ორგანიზაციის ვებგვერდზე. სრულად... წყარო: gyla.ge

იმერეთი. საქართველოს სახალხო დამცველი ჭიათურაში, შპს „ჯორჯიან მანგანეზში" დასაქმებულ გაფიცულ მაღაროელებს შეხვდა, ასევე, გამართა შეხვედრა კომპანიის წარმომადგენლებთან. „გაფიცულთა მიერ მოწოდებული ინფორმაცია საწარმოში შრომის პირობებისა და მუნიციპალიტეტში ეკოლოგიის კუთხით არსებულ მძიმე ვითარებაზე მიუთითებს. სახალხო დამცველი მხარდაჭერას უცხადებს გაფიცულ თანამშრომლებს და აუცილებლად მიაჩნია, სახელმწიფო უწყებების აქტიური ჩართულობით, კომპანიამ მაქსიმალურად გაითვალისწინოს და დააკმაყოფილოს დასაქმებულების სამართლიანი მოთხოვნები. თავისი პოზიცია საქართველოს სახალხო დამცველმა კომპანიის წარმომადგენლებთან შეხვედრის ფარგლებშიც დააფიქსირა”, - აღნიშნულია სახალხო დამცველის აპარატის მიერ გავრცელებულ ინფორმაციაში", – „საქართველოს სახალხო დამცველი ხაზგასმით აღნიშნავს, რომ შრომითი უფლებების დაცვა, უსაფრთხო და ჯანსაღი სამუშაო გარემოს უზრუნველყოფა არსებითია როგორც ღირსეული სამუშაოს, ასევე მდგრადი ეკონომიკური ზრდისა და პროდუქტიული დასაქმების ხელშეწყობისთვის".  სრულად... წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი" (EMC) აქვეყნებს თამუნა ქებურიას მოსაზრებას - „Break the wheel" - ანუ რატომ ვერ ჩერდება უსამართლობის ბორბალი ჭიათურაში?" ავტორი მიმოიხილავს წლების განმავლობაში ჭიათურის მაღაროებთან დაკავშირებით განვითარებულ მოვლენებს და ასკვნის: „დღეს მთავარი ამოცანაა, ისეთი საზოგადოებისა და განვითარების ხედვების შესახებ მსჯელობის დაწყება, რომელიც დაგვაშორებს "სოციალური გადარჩენა vs ეკონომიკური საქმიანობის” დაპირისპირებას; რომლის ლოგიკაც კლანურ პრინციპებზე თუ არაფორმალურ გარიგებებზე არ იქნება დაფუძვნებული. ისეთი მონო-წარმოების რეგიონებში, როგორიცაა ჭიათურა, ტყიბული, კაზრეთი მნიშვნელოვანია, რომ ადგილობრივი მოსახლეობა აქტიურად იყოს ჩართული საწარმოს მართვისა და მნიშვნელოვანი გადაწყვეტილებების მიღების პროცესში. ასეთ რეგიონებში მნიშვნელოვანია რესურსების მართვის გამჭვირვალობა, განვითარების ხედვაზე საჯარო მსჯელობა, ალტერნატივების გაჩენა და მონოპოლიების დამარცხება. დღეს სასიცოცხლოდ მნიშვნელოვანია, რომ ეკონომიკურ პროგრესზე მსჯელობის ხედვებმა შეითვისონ სამართლიანობისა და ინკლუზიურობის პრინციპები, სადაც დემოკრატიული, სოციალური და ეკოლოგიური კეთილდღეობები თანაარსებობენ და ისეთივე პრიორიტეტულია, როგორც ეკონომიკური ზრდა ან განვითარება".  სრულად... წყარო: ორგანიზაციის ვებგვერდი

თბილისი. ჭიათურელი მაღაროელების გაფიცვასთან დაკავშირებით, „ადამიანის უფლებების სწავლებისა და მონიტორინგის ცენტრი" (EMC) და „საქართველოს ახალგაზრდა იურისტთა ასოციაცია" განცხადებას ავრცელებენ.  „მოვუწოდებთ შპს "ჯორჯიან მანგანეზს”, გაითვალისწინოს გაფიცულთა სამართლიანი მოთხოვნები და პატივი სცეს დასაქმებულების შრომით უფლებებს და შრომის კანონმდებლობას. გარდა ამისა, მოვუწოდებთ კომპანიას, თავი შეიკავოს დასაქმებულებზე ზეწოლისგან, სასამართლოსა და სამართალდამცავების ჩართულობაზე აპელირებით. მოვუწოდებთ სახელმწიფოს, უზრუნველყოს საწარმოში შრომის უსაფრთხოების წესებისა და შრომითი უფლებების დაცვა და ამავე დროს, იყოს გარანტი დასაქმებულების უფლებისა, იბრძოლონ საკუთარი უფლებებისა და სამართლიანი და ღირსეული სამუშაო გარემოსთვის. მიმდინარე გაფიცვა ასევე აჩვენებს შრომის კანონმდებლობის ხარვეზებსაც. ამ მიმართულებით აუცილებელია, რომ სახელმწიფომ გაზარდოს შრომის ინსპექციის მანდატი და დაავალოს შრომითი უფლებების დაცვის ზედამხედველობა, რაც შრომითი უფლებების გარანტირებისთვის ეფექტიან მექანიზმს შექმნის", - ვკითხულობთ გავრცელებულ განცხადებაში.  სრულად... წყარო: emc.org.ge

თბილისი. საია-ს ზუგდიდის ოფისი 2017 წლიდან იცავს პირის ინტერესებს, რომელსაც პროკურატურა ყალბი დოკუმენტის დამზადებას და თაღლითობას ედავება. ბრალის წარედგინა იმ მიზეზით, თითქოს მეზობლებს სანოტარო აქტზე ხელი მოტყუებით მოაწერინა. ეს მოხდა მას შემდეგ, ზუგდიდის მუნიციპალიტეტის საკრებულოს სპეციალურ კომისიას საკუთრების უფლების დამადასტურებელი დოკუმენტის გაცემა. როგორც საია-ს მიერ გავრცელებული ინფორმაციიდან ირკვევა, ქუთაისის სააპელაციო სასამართლოს სისხლის სამართლის საქმეთა პალატამ არ გაიზიარა ზუგდიდის რაიონული პროკურატურის მოთხოვნა, გამამტყუნებელი განაჩენის გამოტანასთან დაკავშირებით და ძალაში დატოვა ზუგდიდის რაიონული სასამართლოს განაჩენი, რომლითაც საია-ს დაცვის ქვეშ მყოფი პირი გამართლდა.  სრულად... წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია (საია) შშმ პირების ბინაზე მოვლის მომსახურების არსებულ მოდელს ასაჩივრებს. „საქართველოს მთავრობის 2018 წლის 31 დეკემბრის №684 დადგენილება ადგენს განვითარების მძიმე და ღრმა შეფერხების მქონე ბავშვთა ბინაზე მოვლის ქვეპროგრამას. ეს მომსახურება მოიცავს სახელმწიფო ხარჯებით ბინაზე მომვლელის დანიშვნას შესაბამისი შეზღუდული შესაძლებლობის მქონე ბავშვისათვის. ამ მომსახურებით სარგებლობის შესაძლებლობა აქვთ მხოლოდ განსაზღვრული სამედიცინო დიაგნოზის მქონე ბავშვებს. სპინალური ატროფია არ ჯდება ამ დაავადებების ჩამონათვალში, რის გამოც პირებს, რომლებსაც ამგვარი დიაგნოზი დაუსვეს, ვერ მოითხოვენ ბინაზე დამხმარის მომსახურებას. საია მიიჩნევს, რომ №684 დადგენილებით ხდება დისკრიმინაციული მოპყრობა შეზღუდული შესაძლებლობის მქონე პირთა ჯგუფის შიგნით", ნათქვამია ორგანიზაციის გვერდზე. სრულად... წყარო: ორგანიზაციის გვერდი სოციალურ ქსელში

თბილისი. რუსთავის მეტალურგიულ ქარხანაში მიმდინარე გაფიცვასთან დაკავშირებით, „საქართველოს ახალგაზრდა იურისტთა ასოციაცია" და „ადამიანის უფლებების სწავლებისა და მონიტორინგის ცენტრი" განცხადებას ავრცელებენ. „საქართველოს ახალგაზრდა იურისტთა ასოციაცია" და „ადამიანის უფლებების სწავლებისა და მონიტორინგის ცენტრი" (EMC) ეხმიანებიან რუსთავის მეტალურგიული ქარხნის მილსაგლინავი საამქროს მუშების გაფიცვას, რომელიც საბაზისო შრომითი უფლებების რეალიზაციისა და მინიმალური სოციალური უზრუნველყოფის გარანტიების მიღებისკენ არის მიმართული. ორგანიზაციები მოითხოვენ დამსაქმებლისა და სახელმწიფოსგან, უზრუნველყონ შრომის კანონმდებლობის აღსრულება და დასაქმებულებთა შრომითი უფლებების დაცვა", - აღნიშნულია განცხადებაში..  სრულად...  წყარო: gyla.ge

თბილისი. სახალხო დამცველის აპარატი იწყებს განცხადებების/საჩივრების მიღებას ადამიანის უფლებათა შესახებ სწავლებაზე ხელმისაწვდომობის თაობაზე.  „საქართველოს სახალხო დამცველის შესახებ" საქართველოს ორგანული კანონის მიხედვით, „საქართველოს სახალხო დამცველი ეწევა საგანმანათლებლო საქმიანობას ადამიანის უფლებათა და თავისუფლებათა სფეროში", - აღნიშნულია სახალხო დამცველის აპარატის მიერ გავრცელებულ ინფორმაციაში, - „საგანმანათლებლო მანდატის განხორციელების მიზნით, აპარატში ფუნქციონირებს ადამიანის უფლებათა სწავლების დეპარტამენტი, რომლის ძირითად საქმიანობას ფორმალური და არაფორმალური განათლების სფეროში ადამიანის უფლებათა საკითხების ინტეგრირება და სწავლების ხელშეწყობა წარმოადგენს. დეპარტამენტი ასევე, განიხილავს საჩივრებსა და განცხადებებს ადამიანის უფლებათა განათლების შინაარსისა და პროცესის შესახებ - სკოლამდელი განათლების, ზოგადსაგანმანათლებლო საფეხურის, უმაღლესი განათლებისა და პროფესიული სწავლების სფეროებში".  სრულად... წყარო: ორგანიზაციის ვებგვერდი

თბილისი. ომბუდსმენი, ნინო ლომჯარია ავრცელებს განცხადებას ჰომოფობიასა და ტრანსფობიასთან ბრძოლის საერთაშორისო დღესთან დაკავშირებით. „2019 წელს ლგბტ+ თემის, ლგბტ უფლებადამცველებისა და თემის მხარდამჭერების მიერ ჰომოფობიასა და ტრანსფობიასთან ბრძოლის საერთაშორისო დღე ღიად არ აღინიშნება, უსაფრთხოების გარანტიების არ არსებობის გამო, რაც უკან გადადგმული ნაბიჯია თემის უფლებრივი მდგომარეობის გაუმჯობესებისა და გამოხატვისა და შეკრების თავისუფლების რეალიზების გზაზე. ხაზი უნდა გაესვას, რომ ამ დღის აღნიშვნის მიზანს ძალადობის დაგმობა და ლგბტ+ ადამიანების მიმართ სოლიდარობის გამოხატვა წარმოადგენს. თუმცა, სამწუხაროდ, ბოლო წლების განმავლობაში ჰომოფობიასა და ტრანსფობიასთან ბრძოლის საერთაშორისო დღის აღნიშვნა საქართველოში ძირითადად ძალადობრივ ქმედებებს უკავშირდება და საფრთხის ქვეშ აყენებს ადამიანების უსაფრთხოებას”, ნათქვამია სახალხო დამცველის განცხადებაში. სრულად... წყარო: ombudsman.ge

თბილისი. პლატფორმა „არა-ფობიას!" „ჰომოფობიასთან, ტრანსფობიასა და ბიფობიასთან ბრძოლის საერთაშორისო დღეს" ეხმაურება განცხადებას ავრცელებს.  „დღეს 17 მაისია, ჰომოფობიასთან, ტრანსფობიასა და ბიფობიასთან ბრძოლის საერთაშორისო დღე (IDAHOT). სწორედ ამ დღეს ლგბტქი პირთა უფლებრივი მდგომარეობის საკითხი განსაკუთრებით აქტუალური ხდება ხოლმე. მნიშვნელოვნად მივიჩნევთ, ხელისუფლებასა და საზოგადოებას შევახსენოთ ის გამოწვევები, რაც ამ მიმართულებით არსებობს ქვეყანაში", - ნათქვამია განცხადებაში.  სრულად... წყარო: isfed.ge

თბილისი. საქართველოს სახალხო დამცველი ზუგდიდის მუნიციპალიტეტის საკრებულოს თავმჯდომარის მოადგილის გამონათქვამს დისკრიმინაციულად აფასებს.  „საქართველოს სახალხო დამცველი გმობს ზუგდიდის მუნიციპალიტეტის საკრებულოს თავმჯდომარის მოადგილის თამაზ ფაცაციას მიერ სოციალურ ქსელში გამოქვეყნებულ დისკრიმინაციულ განცხადებებს ოპოზიციური პარტიის წარმომადგენელი პოლიტიკოსი ქალების - თინა ბოკუჩავასა და ანა წითლიძის მისამართით. სახალხო დამცველი მიიჩნევს, რომ თამაზ ფაცაციას გამონათქვამები არის სექსისტური შინაარსის, ვინაიდან აქვს სექსუალური კონოტაცია, მიზნად ისახავს პოლიტიკოსი ქალების შეურაცხყოფას, დამცირებას და მათ უქმნის არაჯანსაღ, უთანასწორო პოლიტიკურ გარემოს", - აცხადებს სახალხო დამცველი.  სრულად... წყარო: ორგანიზაციის ვებგვერდი

თბილისი. „კოალიცია თანასწორობისთვის" ჰომოფობიისა და ტრანსფობიის წინააღმდეგ ბრძოლის საერთაშორისო დღეს სპეციალური განცხადებით ეხმიანება. „17 მაისი ჰომოფობიისა და ტრანსფობიის წინააღმდეგ ბრძოლის საერთაშორისო დღეა (აიდაჰო). ეს დღე ადამიანის უფლებების ფართო შინაარსის იდეაზე დგას და ლგბტქი ადამიანების სტრუქტურული ჩაგვრისა და ცხოვრების ყველა სფეროდან სოციალური გარიყულობის აღიარებას მოითხოვს. თუმცა, აიდაჰო დღე ჩვენს რეალობაში შეკრებისა და გამოხატვის თავისუფლებისთვის ბრძოლის დღედ მოინიშნა, რადგან ლგბტქი ადამიანებსა და აქტივისტებს, ფაქტობრივად, ჩამორთმეული აქვთ ეს უფლებები", - ვკითხულობთ განცხადებაში.  სრულად... წყარო: emc.org.ge

აჭარა. 13 მაისს, თავისუფალ ჟურნალისტთა სახლის ორგანიზებით, შუახევის მუნიციპალიტეტის სოფელ წყაროთის საჯარო სკოლაში სტუდენტური დისკუსია გაიმართა. შეხვედრის თემა იყო შრომის უფლებები, სადაც მონაწილეებმა ისაუბრეს შრომით ურთიერთობაზე დასაქმებულსა და დამსაქმებელს შორის, შრომით პირობებზე, უსაფრთხოების და საქართველოს შრომის კოდექსის შესახებ. სრულად... წყარო: ორგანიზაცის გვერდი სოციალურ ქსელში

თბილისი. „კოალიცია თანასწორობისთვის" საქმიანობის ანგარიშებში ეთნიკური ნიშნით დისკრიმინაციის ბევრი შემთხვევა ფიქსირდება. მათ შორის ერთ-ერთია, საქმე „პარტნიორობა ადამიანის უფლებებისთვის" (PHR) - შინაგან საქმეთა სამინისტროს საპატრულო პოლიციის დეპარტამენტის წინააღმდეგ. „2017 წელს, ტელეეთერში „სტუდია მონიტორის" ფილმის, „ბავშვები ჩვენი რეალობიდან", გასვლის სემდეგ, PHR-მა საჩივრით მიმართა სახალხო დამცველს. ორგანიზაციამ მიიჩნია, რომ პოლიციის თანამშრომელს ჰქონდა დისკრიმინაციული და ქსენოფობიური დამოკიდებულება ქუჩაში მცხოვრები და მომუშავე ბავშვის მიმართ და მათ ეთნიკური ნიშნით ყოფდა, ამიტომ საჩივრით მიმართა სახალხო დამცველს”, - ვკითხულობთ „კოალიცია თანასწორობისთვის" მიერ გავრცელებულ ინფორმაციაში, - „სახალხო დამცველმა, PHR-ის განცხადების საფუძველზე, საპატრულო პოლიციის თანამშრომლების მხრიდან სამსახურებრივი გადაცდომის სავარაუდო შემთხვევასთან დაკავშირებით, შინაგან საქმეთა სამინისტროს გენერალურ ინსპექციას მიმართა. ფაქტის შესწავლის შემდეგ, სახალხო დამცველს ეცნობა, რომ შსს-ს გენერალურ ინსპექციაში ჩატარდა სამსახურებრივი შემოწმება, რომლის შედეგად, პოლიციის ერთ-ერთ თანამშრომელს დისციპლინური სახდელის სახით შეეფარდა შენიშვნა, ხოლო მეორე თანამშრომლის მიმართ გამოყენებული იყო სარეკომენდაციო ბარათი".  სრულად... წყარო: კოალიციის ვებგვერდი

თბილისი. „სამართლიანი არჩევნებისა და დემოკრატიის საერთაშორისო საზოგადოება" (ISFED), შუალედური არჩევნების მოახლოების ფონზე, ზუგდიდში 14 მაისს მომხდარ ძალადობრივ ინციდენტსა და სავარაუდო საარჩევნო დანაშაულების შესახებ, მედიით გავრცელებულ ინფორმაციას ეხმაურება.  „სამართლიანი არჩევნები" მიიჩნევს, რომ საარჩევნო კამპანიის პროცესში გამოვლენილი ნებისმიერი დანაშაულის ნიშნების შემცველი ქმედება, რომელიც მიმართულია ძალადობის, კამპანიის ჩაშლის, მედიის საქმიანობისათვის ხელის შეშლის, ამომრჩევლის მოსყიდვის ან მუქარისკენ, საფრთხეს უქმნის დემოკრატიული არჩევნების პროცესს, ხელყოფს ამომრჩეველთა ნების თავისუფალი გამოვლენის პრინციპს და შესაძლოა ხელი შეუშალოს საქართველოს კონსტიტუციით გარანტირებული საარჩევნო უფლების რეალიზებას. ამდენად, აღნიშნული ქმედებები საჭიროებს სამართალდამცავი ორგანოების მიერ მყისიერ, ეფექტურ და დროულ რეაგირებას", - აღნიშნულია ISFED-ის მიერ გავრცელებულ განცხადებაში.  სრულად... წყარო: ორგანიზაციის ვებგვერდი