თბილისი. არასამთავრობო ორგანიზაციები განცხადებას ავრცელებენ 14 და 16 ივნისს მომხდარ მოვლენებთან დაკავშირებით. „საზოგადოებამ ნათლად იხილა, რომ 14 ივნისს კანცელარიასთან ლგბტ+ აქტივისტებს არ მიეცათ საკუთარი უფლებების რეალიზების საშუალება. ისინი, ისევე როგორც იქ მყოფი სხვა მშვიდობიანი მოქალაქეები, ჟურნალისტები და სახალხო დამცველის წარმომადგენლები, გახდნენ მუქარისა და ძალადობის ობიექტები, იმ ჯგუფების მხრიდან, რომელთა ლიდერებსაც კავშირი აქვთ რუსეთის ფედერაციასთან. აღნიშნულიდან გამომდინარე მიგვაჩნია, რომ შექმნილ ვითარებაში აუცილებელია: სამართალდამცავმა ორგანოებმა დროულად და ეფექტიანად გამოიძიონ 14 და 16 ივნისის აქციებზე განხორციელებული ძალადობრივი აქტები და მოწოდებები; გატარდეს ყველა საჭირო პრევენციული ღონისძიება იმისთვის, რომ ლგბტ+ აქტივისტების უსაფრთხოება იყოს უზრუნველყოფილი „თბილისი პრაიდის” კვირეულის განმავლობაში;... ხელისუფლება განსაკუთრებული სიფრთხილითა და ყურადღებით დააკვირდეს ქვეყანაში ექსტრემისტული ძალების გააქტიურებას; სრულად...  წყარო: isfed.ge

თბილისი. საქართველოს სახალხო დამცველი 16 ივნისს თბილისში, ვერის ბაღში გამართულ აქციას და მისი მიმდინარეობისას გაჟღერებულ განცხადებებს ეხმიანება.  „სახალხო დამცველს მიაჩნია, რომ 2019 წლის 16 ივნისის აქციაზე შეკრების ორგანიზატორის მხრიდან გაჟღერდა არაერთი განცხადება, რომელიც საფრთხის შემქმნელია ადამიანების უსაფრთხოების, მათი სიცოცხლისა და ჯანმრთელობისთვის“, - აღნიშნულია განცხადებაში, - „გამომდინარე იქიდან, რომ აქციაზე გაჟღერებული მოწოდებები და სამოქმედო გეგმა შეიცავდა სისხლის სამართლის დანაშაულის ნიშნებს, სახალხო დამცველი, როგორც უფლებამოსილი ორგანო გამოძიების და სისხლისსამართლებრივი დევნის დაწყების წინადადებით მიმართოს საგამოძიებო ორგანოებს, მოუწოდებს საგამოძიებო ორგანოებს: ეფექტურად გამოიძიონ საქართველოს სისხლის სამართლის კოდექსის 223-ე მუხლით დაწყებული გამოძიება და მოახდინონ შესაძლო დამნაშავე პირთა პასუხისგებაში მიცემა გაატარონ აქტიური სისხლის სამართლებრივი ან/და ოპერატიულ-სამძებრო ღონისძიებები, რათა თავიდან იქნას აცილებული პირთა უფლებების ხელყოფა“.  სრულად  წყარო: სახალხო დამცველის აპარატის ვებგვერდი

თბილისი. ადამიანის უფლებებზე მომუშავე ორგანიზაციები 14 ივნისსა და 16 ივნისს განვითარებულ მოვლენებს ეხმიანებიან. „სამწუხაროდ, 2013 წლის 17 მაისის მძიმე გამოცდილების მიუხედავად, ჩვენ ვერ დავინახეთ, რომ ხელისუფლება სათანადოდ იაზრებს ჰომოფობიის მძიმე პოლიტიკურ და სოციალურ შედეგებს და მისი დაძლევისთვის  სისტემურ ნაბიჯებს დგამს. ამის საპირისპიროდ, აშკარაა, რომ ხელისუფლება უკვე წლებია ვერ უზრუნველყოფს ლგბტი ადამიანების შეკრების თავისუფლების დაცვას და ღიად ახდენს ლგბტი ადამიანების და მათი უფლებების უგულებელყოფას. ...ხელმომწერი ორგანიზაციები კიდევ ერთხელ მოვუწოდებთ სახელმწიფოს, გააცნობიეროს საკუთარი პასუხისმგებლობა შექმნილ სოციალურ კრიზისში და მიიღოს ქმედითი ზომები თანასწორობასა და ინკლუზიაზე დაფუძნებული პოლიტიკის გატარებისთვის. არსებითია, ამ პროცესში საკუთარი პასუხისმგებლობა გაიაზრონ პოლიტიკურმა პარტიებმა და  საპატრიარქომ“, ნათქვამია ერთობლივ განცხადებაში. სრულად... წყარო: gyla.ge

თბილისი. ლგბტ თემის წარმომადგენლებისა და მათი მხარდამჭერების მიერ 14 ივნისს ორგანიზებული აქციის მიმდინარეობისას განვითარებულ მოვლენებთან დაკავშირებით, საქართველოს სახალხო დამცველი განცხადებას ავრცელებს. „მედიასაშუალებებში გავრცელებული ინფორმაციით, ასევე აქციის მიმდინარეობის ადგილზე დაკვირვებით, გამოიკვეთა კონტრაქციის მონაწილეთა მხრიდან ჩადენილი არაერთი სამართალდარღვევა, რაც საგამოძიებო ორგანოთა მხრიდან დამატებით დროულ და ადეკვატურ რეაგირებას მოითხოვს“, - აღნიშნავს სახალხო დამცველი, - „მიუხედავად პოლიტიკური განსხვავებებისა, მთელი პოლიტიკური სპექტრი უნდა შეთანხმდეს იმაზე, რომ რომელიმე ჯგუფის დამამცირებელი მოპყრობა, მათ მიმართ ძალადობის წახალისება დაუშვებელია. ტოლერანტობა და განსხვავებულის პატივისცემა არის ის ფუნდამენტი, რომელზეც დგას ჩვენი ქვეყნის კონსტიტუციურ სამართლებრივი წესრიგი, რასაც საფრთხეს უქმნის მსგავსი ჯგუფების გაძლიერება”. სრულად  წყარო: სახალხო დამცველის აპარატის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ილია ზოსიმოვის ბლოგპოსტს: სამსახურის ძიებაში. „გასაუბრებებზე სხვა ბევრ შეკითხვასთან ერთად, მეკითხებოდნენ, თუ რას ვსაქმიანობდი იმ პერიოდში, რაზეც ვპასუხობდი, რომ ვიყავი სტატუსშეჩერებული სტუდენტი. საბოლოოდ, ყველა გასაუბრებაზე იძულებული გავხდი, მეთქვა სტატუსის შეჩერების რეალური მიზეზი - ჩემი ფსიქიკური აშლილობის დიაგნოზი. როგორც კი ჩემს დიაგნოზს ვახსენებდი, ვამჩნევდი როგორ ეცვლებოდათ გამომეტყველება გამსაუბრებლებს, თითქოს, მათ ჩემ მიმართ ინტერესი და ნდობა ეკარგებოდათ", ნათქვამია ორგანიზაციის ვებგვერდზე.  სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს კოტე ერისთავის ბლოგ პოსტს: შეზღუდული შესაძლებლობები, ფოჩიანი კანფეტები და მოქალაქეობა. „ახალგაზრდა ქალი იმერეთის იმ სოფლიდანაა, საიდანაც სამშენებლო კომპანიის მდიდარი მფლობელი. მეზობელი, მამაო, ჟურნალისტი, ადგილობრივი კაი ბიჭი თუ ხელისუფალი ამ კაცის სიკარგეს ჰყვება; როგორ უდგას გვერდში ნაცნობსაც და უცნობსაც, ერისკაცსაც და ბერისკაცსაც. მაგრამ მუშის ქვრივი თავისას არ იშლის და სოციალური გარიყვის რისკის ხარჯზე, აგრძელებს ვალდებულებების ენაზე საუბარს; ითხოვს იმას, რაც მის შვილს კანონით სრულწლოვნებამდე ეკუთვნის და დამცირებად იღებს ქველმოქმედებას. ეს ბრძოლა რთულია და მარტოობისთვის განწირული, რადგან მუშის ქვრივი ამ ქვეყნის იდეალურ მოქალაქეს უპირისპირდება", ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. შეზღუდული შესაძლებლობების მქონე პირთა დაცვის დღესთან დაკავშირებით, საზოგადოებრივი ორგანიზაციები განცხადებას აქვეყნებენ. „2003 წლიდან საქართველოში შეზღუდული შესაძლებლობის მქონე პირთა უფლებების დაცვის დღე 14 ივნისს აღინიშნება. ეს დღე არის სახელმწიფოს ვალდებულებების კიდევ ერთი სიმბოლური გამოხატულება, ეფექტიანად დაიცვას შშმ პირთა უფლებები, გააუმჯობესოს ამ თემის წევრთა სოციალური დაცვის სტანდარტები და ეფექტიანად უზრუნველყოს საზოგადოებიდან მათი გარიყვისა და მარგინალიზაციის პრევენცია", - აღნიშნულია განცხადებაში, - „სახელმწიფოს მიერ ფორმალურ დონეზე გაცხადებული ნება, ცალკეული მიმართულებებით გადადგმული ფრაგმენტული ნაბიჯების გარდა, ძირითადად მხოლოდ ფურცელზე რჩება და შშმ პირთა უფლებრივი მდგომარეობა რეალურად არ იცვლება - ისინი კვლავ დგანან დისკრიმინაციისა და მარგინალიზაციის პრობლემის პირისპირ".   სრულად წყარო: https://emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ოლგა კალინას ბლოგპოსტს: სისტემა, რომლისთვისაც არ არსებობ. „ფსიქიატრიულ საავადმყოფოში სულ 2-3 კვირა ვიყავი ჩაკეტილი, მაგრამ ეს საკმარისი იყო იმისთვის, რომ შოკი მიმეღო. უცებ აღმოვაჩინე, რომ 21-ე საუკუნეში თურმე არსებობს ისეთი ადგილი, სადაც ადამიანის პიროვნებას, ნებას, უფლებებს სრულად აიგნორებენ და სადაც შენი მდგომარეობის გაპროტესტება ნიშნავს კიდევ უფრო მეტ შეზღუდვებს და ინექციებს, იმ ლოგიკით, რომ ფსიქიკურად ავადმყოფი ყოველთვის აპროტესტებს, რომ ის ფსიქიკურად ავადმყოფია და ექიმმა ყოველთვის უკეთ იცის რა გჭირდება შენ. როცა უკან დავბრუნდი და გადამიყვანეს ამბულატორიულ მომსახურებაზე, ამბულატორიაშიც ჩემი მკურნალი ექიმი კარგ პროგნოზებს არ აკეთებდა, დედაჩემთან საუბრობდა, რადგან სავარაუდოდ ფიქრობდა, რომ ჩემთან საუბარი არ ღირდა", ამბობს ოლგა. სრულად...  წყარო: emc.org.ge

თბილისი. 12 ივნისს, ომბუდსმენმა, არასრულწლოვანის საცხოვრებელი გარემოს შეფასების და მისი განმეორებითი ძალადობისგან დაცვის მიზნით, გასატარებელი ღონისძიებების შესახებ რეკომენდაცია გასცა. „რეკომენდაციის მომზადებას საფუძვლად დაედო არასამთავრობო ორგანიზაცია „ადამიანის უფლებათა ცენტრის" 2019 წლის 22 მაისის განცხადება, არასრულწლოვანის მიმართ განმეორებითი ძალადობის და სავარაუდო იძულებითი ქორწინების თაობაზე და სახალხო დამცველის აპარატის მიერ განხორციელებული შესწავლის შედეგები, მათ შორის, განხორციელებული მონიტორინგის ვიზიტი. რეკომენდაციით სახალხო დამცველმა მოითხოვა, დაიგეგმოს ძალადობის მსხვერპლი არასრულწლოვანის დაცვისა და მხარდაჭერის ღონისძიებები", ნათქვამია ომბუდსმენის ვებგვერდზე.   სრულად... წყარო: ombudsman.ge

თბილისი. პარტნიორობა ადამიანის უფლებებისთვის (PHR) მიხედვით, ფსიქიატრიულ დაწესებულებაში ადამიანის უკანონო მოთავსების გამო საავადმყოფოს 5000 ლარის გადახდა დაეკისრა. „2017 წლის ოქტომბერში, მარიანა მანველიანი თავის სახლში, საკუთარი ოთახიდან გამოსვლისას მოულოდნელად რამდენიმე პოლიციელისა და სასწრაფო სამედიცინო დახმარების ექიმის წინაშე აღმოჩნდა. მათ, მარიანა დედის გამოძახების საფუძველზე, ფსიქიატრიულ საავადმყოფოში არანებაყოფლობითი სტაციონარული ფსიქიატრიული დახმარების გაწევის მიზნით გადაიყვანეს. მარიანას გადაყვანა ისე განხორციელდა, რომ საპატრულო პოლიციასა და სასწრაფო სამედიცინო დახმარების ექიმს არ მოუსმენიათ მარიანას ახსნა-განმარტება ოჯახში შექმნილ მდგომარეობასთან დაკავშირებით", ნათქვამია ორგანიზაციის ვებგვერდზე.  სრულად... წყარო: phrgeorgia.wordpress.com

თბილისი. „კოალიცია თანასწორობისთვის" წევრი არასამთავრობო ორგანიზაციები ეხმიანებიან საგარეჯოს მუნიციპალიტეტში არასრულწლოვანი გოგონას გაუპატიურებისა და მასზე იძულებითი ქორწინების უმძიმეს საქმეს. „სახელმწიფოსგან მოვითხოვთ, გოგონათა იძულებითი ქორწინებისა და ძალადობის პრევენციის მიზნით სისტემური, ქმედითი და საგანგებო ნაბიჯების გადადგმას. აღსანიშნავია, რომ მიმდინარე პერიოდში ასევე გამოვლინდა ლაგოდეხში არასრულწლოვანი გოგონას გაუპატიურების კიდევ ერთი შემზარავი შემთხვევა", ნათქვამია ერთობლივ განცხადებაში. სრულად... წყარო: gdi.ge

თბილისი. 10 ივნისიდან, ევროკავშირის ფინანსური მხარდაჭერით მიმდინარე პროექტის „წყალი სიღარიბის აღმოსაფხვრელად" ფარგლებში, რომელსაც CENN ახორციელებს, WaSH-თან (წყალი, სანიტარია და ჰიგიენა) დაკავშირებული ტრენინგების ციკლი დაიწყო. „ტრენინგის ფარგლებში მონაწილეები ადამიანის უფლებების ჭრილში WaSH საკითხებსა და საგრანტო განაცხადების მომზადებასა და პროექტების მართვის შესახებ ცოდნასა და უნარებს ეუფლებიან. სწავლების დასრულების შემდეგ, გამოცხადდება საგრანტო კონკურსი, სადაც სამიზნე მუნიციპალიტეტების წარმომადგენლები შეძლებენ მონაწილეობის მიღებას", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს საკონსტიტუციო სასამართლოში, ქვეყნის სამ მოქალაქეს, გასაჩივრებული აქვს სისხლის სამართლის კოდექსის ის მუხლები, რომელთა გამოც, მათი აზრით, კონსტიტუციით დაცული სამართლიანი სასამართლოს უფლებით ვერ სარგებლობენ. ამ სამართლებრივ ნორმებს, სამსონ თამარიანსა და მერაბ მიქელაძესთან ერთად, ქვეყნის პარლამენტს მალხაზ მაჩალიკაშვილიც (პანკისის ხეობაში ჩატარებული სპეცოპერაციისას სასიკვდილოდ დაჭრილი თემირლან მაჩალიკაშვილის მამა) ედავება. „როდესაც ეს გადაწყვეტილებები მხოლოდ პროკურატურის კომპეტენციის ქვეშ ექცევა, თვითნებობის რისკები მაღალია განსაკუთრებით მაშინ, როცა ეს ეხება სამოხელეო დანაშაულს. ამ შემთხვევაში ეს არის უფლებამოსილების გადამეტება, რომელიც სახელმწიფო ორგანოდან არის სავარაუდო დარღვევა. აქ კი თვითნებობის რისკები კიდევ უფრო იზრდება. სწორედ ამიტომ უმნიშვნელოვანესია, რომ ნეიტრალურმა ორგანომ გააკონტროლოს. ანუ სისხლის სამართლებრივი დევნის დაწყებაზე თუ გადაწყვეტილება დღემდე არ არის მიღებული, დაზარალებულს უნდა ჰქონდეს შესაძლებლობა, რომ სასამართლოში გაასაჩივროს", ამბობს ადამიანის უფლებების სწავლებისა და მონიტორინგის ცენტრი იურისტი, თამარ სამხარაძე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციამ (საია) პარლამენტს „პერსონალურ მონაცემთა დაცვის შესახებ" ახალი კანონის თაობაზე მოსაზრებები წარუდგინა. „საია მოუწოდებს საქართველოს პარლამენტს საკანონმდებლო პაკეტის განხილვისას გაითვალისწინოს წარდგენილი შენიშვნები, რათა ხელი შეუწყოს პერსონალური მონაცემების მომწესრიგებელი ნორმების გაუმჯობესება", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს სტრატეგიის და საერთაშორისო ურთიერთობების კვლევის ფონდი აქვეყნებს ინფორმაციას საჯარო მოხელეებისთვის ჩატარებული სემინარის შესახებ. „შვედმა სპეციალისტებმა საჯარო მოხელეებს ჩაუტარეს ორდღიანი სემინარი სამუშაოს შეფასებასა და ადამიანური რესურსების მართვაში. შვედეთის ადამიანური რესურსების ინდიკატორების ინსტიტუტის თანამშრომლებმა ჰანს ნორგრენმა, ანდერს იორენმა და თინა ეკსტრომმა სემინარის პირველ დღეს ქართველ მონაწილეებს გაუზიარეს შვედური გამოცდილება. ასევე, ისაუბრეს იმაზე, თუ როგორ შეიძლება შვედური პრაქტიკა მოერგოს ქართულ რეალობას. მეორე დღე პრაქტიკულ სამუშაოებს დაეთმო", ნათქვამია ფონდის ვებგვერდზე. სრულად... წყარო: www.gfsis.org

თბილისი. ადამიანის უფლებების სწავლებისა და მონიტორინგის (EMC) მიერ ორგანიზებული კრიტიკული პოლიტიკის პლატფორმა დასრულდა. „პლატფორმა მიზნად ისახავდა სოციალური სამართლიანობითა და ქვიარ და ფემინისტური პოლიტიკით დაინტერესებული ახალგაზრდა აქტივისტებისა და მკვლევარებისთვის კრიტიკული ცოდნის გაზიარებას, კოლექტიური მსჯელობისა და საერთო მოქმედების სივრცის შექმნას", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდზე სოციალურ ქსელში

თბილისი. საია-მ საქართველოს პარლამენტს წარუდგინა კრიტიკული შენიშვნები საქართველოს შინაგან საქმეთა სამინისტროს მიერ მომზადებულ და საქართველოს მთავრობის მიერ ინიცირებულ საკანონმდებლო პაკეტთან დაკავშირებით. საია-ს მიაჩნია, რომ „პოლიციის შესახებ" კანონში ინიცირებული ნორმები არ შეესაბამება საქართველოს კონსტიტუციის მეორე თავით გარანტირებულ ძირითად უფლებებს, საქართველოს საერთაშორისო შეთანხმებებით ნაკისრ ვალდებულებებს და, აგრეთვე, პერსონალურ მონაცემთა დაცვის შესახებ საქართველოს მოქმედი კანონმდებლობით განმტკიცებულ ძირითად სამართლებრივ პრინციპებს. სრულად  წყარო: ორგანიზაციის ვებგვერდი

თბილისი. „თბილისის ადამიანის უფლებათა სახლი", IREX ევროპასთან პარტნიორობით, იწვევს საქართველოს რეგიონებში ადამიანის უფლებების სფეროში მომუშავე სამოქალაქო საზოგადოებრივ ორგანიზაციებსა და საინიციატივო ჯგუფებს ღონისძიებაში – „თბილისის ფორუმი ადამიანის უფლებებისთვის" – მონაწილეობის მისაღებად. ღონისძიების მიზანია რეგიონებში ადამიანის უფლებების საკითხებზე მომუშავე ორგანიზაციების და აქტივისტების შეკრება თბილისში, რითაც შეიქმნება ინფორმაციის და კონტაქტების გასაზიარებელი პლატფორმა, ასევე საფუძველი ჩაეყრება მომავალ თანამშრომლობას. წარმოდგენილ ორგანიზაციებთან ერთად, 2019 წლის ფორუმი უმასპინძლებს ძლიერ და აქტიურ ქალებს, რომლებიც იბრძვიან სხვისი უფლებების დასაცავად, სოციალური პრობლემის მოგვარებისთვის. თუმცა, მათი საქმიანობა თუ ის პრობლემები, რის წინააღმდეგაც იბრძვიან, ნაკლებად არის ცნობილი ფართო საზოგადოებისთვის. ფორუმის მონაწილე ორგანიზაციებს შესაძლებლობა ექნებათ წარმოადგინონ მიმდინარე აქტივობების და პროექტების შესახებ ინფორმაცია, ასევე ბეჭდური მასალა სპეციალურად მოწყობილ სტენდებთან. გარდა ამისა, მათ ექნებათ უნიკალურ შესაძლებლობა გააზიარონ ინფორმაცია და დაამყარონ კონტაქტები ღონისძიებაზე დამსწრე სხვადასხვა დაინტერესებულ მხარეებთან. სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) გთავაზობთ, ცნობილი ინდოელი ეკონომისტის და პოლიტიკური კომენტატორის, პრაბჰატ პატნაიკის (Prabhat Patnaik) მოხსენებას, რომელიც მან წაიკითხა ფორუმზე „სოციალური სამართლიანობა კრიზისის დროს". „პროფესორი პატნაიკი საუბრობს გლობალიზებული ფინანსური კაპიტალის და სახელმწიფოს ურთიერთმიმართებაზე და მსოფლიო ეკონომიკური წესრიგის გარდაქმნის პოტენციალზე". სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს მასალას: „კლანი არსად წასულა" - ვის სურს უზენაესი სასამართლოს უვადო მოსამართლეობა. „ის, რომ ლიდერი არ არის სიაში, არ ნიშნავს, რომ კლანი არ არის წარმოდგენილი. პირიქით, ძირითადი ბირთვი ამ ადამიანებისა სიაში არის. და ეს მხოლოდ აღნიშნული 8 მოსამართლე არ არის. არიან სხვებიც, რომლებიც რაღაც ფორმით დაკავშირებული არიან ამ ჯგუფთან", ამბობს იურისტი, სოფო ვერძეული. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციამ (საია) საქართველოს პარლამენტს ალტერნატიული ანგარიში წარუდგინა საქართველოს იუსტიციის სამინისტროს 2018 წლის (1-6104/19/9; 27.03.2019) ანგარიშზე. „ალტერნატიული ანგარიში ეხება ადამიანის უფლებათა ევროპული სასამართლოს მიერ საქართველოს წინააღმდეგ გამოტანილ რამდენიმე იმ გადაწყვეტილებასა და განჩინებას, რომელთა აღსასრულებლად გასატარებელი ზოგადი ღონისძიებები კანონმდებლობაში სისტემურ ცვლილებებს მოითხოვენ და სახელმწიფოს მიერ გადადგმული გარკვეული ნაბიჯების მიუხედავად დამატებით საჭიროებენ შესაბამისი ზომების გატარებას. საია, აგრეთვე, მოუწოდებს ადამიანის უფლებათა დაცვისა და სამოქალაქო ინტეგრაციის კომიტეტს გამართოს ალტერნატიული ანგარიშის მოსმენა კომიტეტის სხდომაზე", ნათქვამია ორგანიზაციის ვებგვერდზე. სრულად... წყარო: gyla.ge

თბილისი. „ქალთა ფონდი საქართველოში" გთავაზობთ ფონდის აღმასრულებელი დირექტორის, ბლოგს „აქტივიზმი ყოველთვის საფრთხეშია". „ აქტივიზმი საქართველოში საფრთხეშია - ალბათ, არა მარტო საქართველოში, მაგრამ ჩემთვის ესაა უპირველესად საგანგაშო და ამიტომ მოგმართავთ - საქართველოში აქტივიზმი საფრთხეშია!", - მიიჩნევს ნანა ფანცულაია, - „არა და ჩვენ იმ ეპოქაში ვცხოვრობთ, როცა ყველაზე ხელშესახები პოზიტიური ცვლილებები ქვეყნის ცხოვრებაში სწორედ აქტივიზმს შეუძლია მოიტანოს, სოციალურ მოძრაობებს შეუძლიათ გამოიწვიონ. ეს არაა თეორიული განაცხადი, ამის არა ერთი მაგალითი ჩვენც გვაქვს, და არა ერთ სფეროში. აქტივისტები და აქტივისტური კამპანიები არის ის ძალა, რომელიც მოქალაქეებს ზრდის, სამოქალაქო საზოგადოებას ავითარებს და სამართლიანობის შეგნებას უყალიბებს. კიდევ ბევრი რამის თქმა შეიძლება, რისთვის გვჭირდება აქტივიზმი, მაგრამ მგონი არაა საჭირო, რადგან ეს, ვფიქრობ, უკვე ვიცით. ახლა უნდა ვთქვათ, რა სჭირდება თვითონ აქტივიზმს". სრულად  წყარო: ორგანიზაციის ვებგვერდი