სამეგრელო. არასამთავრობო ორგანიზაცია ,,საუნჯემ" ზუგდიდის მუნიციპალიტეტის გამგეობას და საკრებულოს მიმართა რეკომენდაციით. კერძოდ ორგანიზაცია ითხოვს, რომ შეიცვალოს ზუგდიდის მუნიციპალიტეტის ტერიტორიაზე რეგისტრირებული მოსახლეობის მიმართ არსებული არათანაბარი დამოკიდებულება, რაც სოციალური პროგრამების ბენეფიციართა განსაზღვრისას არსებობს. კერძოდ ზუგდიდის მუნიციპალიტეტის ბიუჯეტით გათვალისწინებული შემდეგი სამი პროგრამა არ ვრცელდება დევნილ მოსახლეობაზე: ოჯახების და ბავშვების სოციალური დაცვა; შეზღუდული შესაძლებლობის მქონე პირთა სოციალური დაცვა და რეაბილიტაცია; მარჩენალდაკარგულ პირთა სოციალური დაცვა. ორგანიზაციამ აღნიშნულ საკითხზე საინფორმაციო ფილმი გადაიღო.     წყარო: ორგანიზაცია „საუნჯე"

აჭარა. 18 აპრილს, საქართველოს სახალხო დამცველი აჭარაში მოქმედ მესამე სექტორის წარმომადგენლებსა და ადგილობრივ მოსახლეობას შეხვდა. წლების განმავლობაში გამოუძიებელი დანაშაულები, მიწის რეფორმა, ეკომიგრანტები, საჯარო სამსახურში მიღების წესი - ამ და სხვა თემებთან დაკავშირებულ სავარაუდო დარღვევებზე ინფორმაცია სახალხო დამცველს საზოგადოებრივი ორგანიზაციების წარმომადგენლებმა მიაწოდეს. შეხვედრაზე უჩა ნანუაშვილმა განაცხადა, რომ აღნიშნულ საკითხებს შეისწავლის და რეკომენდაციებს შესაბამის სამთავრობო უწყებებს მიაწოდებს. მსგავსი შეხვედრა სახალხო დამცველმა 19 აპრილს აჭარის მაღალმთიანეთშიც გამართა.

თბილისი. არასამთავრობო და მედია ორგანიზაციები ერთობლივ განცხადებას ავრცელებენ „ძალადობრივი ქმედებისკენ საჯაროდ მოწოდების თაობაზე ინიცირებულ კანონპროექტთან დაკავშირებით". უახლოეს მომავალში საქართველოს პარლამენტი გეგმავს პირველი მოსმენით მიიღოს საქართველოს კანონი „საქართველოს სისხლის სამართლის კოდექსში ცვლილებების შეტანის შესახებ”, რომლის ავტორია - საქართველოს შინაგან საქმეთა სამინისტრო, ხოლო ინიციატორი - საქართველოს მთავრობა. „კანონპროექტის ერთ-ერთ მიზანს ძალადობრივი ქმედებისკენ მოწოდების კრიმინალიზება წარმოადგენს. შემოთავაზებული ცვლილებების ...თანახმად, დასჯადად ცხადდება რასობრივი, რელიგიური, ეროვნული, კუთხური, ეთნიკური, სოციალური, პოლიტიკური, ენობრივი ან/და სხვა ნიშნების მქონე პირთა ჯგუფებს შორის განხეთქილების ჩამოგდების მიზნით, ძალადობრივი ქმედებისკენ საჯაროდ მოწოდება, ხოლო სანქციად გათვალისწინებულია - თავისუფლების აღკვეთა ორ წლამდე ვადით. მიუხედავად იმისა, რომ კანონპროექტმა ინიცირების შემდეგ გარკვეული ცვლილებები განიცადა, კერძოდ კანონპროექტში გაკეთდა მითითება აშკარა, პირდაპირ და არსებით საფრთხეზე, იგი კვლავ შეიცავს სერიოზულ საფრთხეებს გამოხატვის თავისუფლების კუთხით და არსებული კონტექსტის გათვალისწინებით, სახელმწიფოს დეკლარირებული მოტივაცია, ამგვარი ქმედების კრიმინალიზაციასთან დაკავშირებით მოკლებულია დამაჯერებლობას”, ნათქვამია განცხადებაში. განცხადების ხელმომწერები მოუწოდებენ საქართველოს პარლამენტს, „არსებული კონტექსტის გათვალისწინებით, სათანადოდ გაიაზრონ დემოკრატიული და პლურალისტური ღირებულებების მნიშვნელობა და არ მიიღონ აღნიშნული ნორმა, მიუხედავად იმისა, თუ რა შინაარსობრივ ცვლილებებს განიცდის იგი. ამასთანავე, აუცილებლად მივიჩნევთ, ნაცვლად ახალი რეგულაციის შემუშავებისა, სახელმწიფომ გაატაროს ეფექტური პოლიტიკა კანონმდებლობაში უკვე არსებული ნორმების სათანადო აღსრულების მიზნით, კერძოდ სიძულვილით მოტივირებული დანაშაულების ეფექტურად გამოძიებისა და მოწყვლადი ჯგუფების უფლებების განუხრელად დაცვის კუთხით". სრულად... წყარო: gyla.ge

თბილისი. საერთაშორისო გამჭვირვალობა – საქართველომ საარჩევნო თემატიკაზე ვიდეორგოლი განათავსა სოციალურ ქსელში – „რა წონა აქვს ამომრჩევლის ხმას?". სრულად... წყარო: ორგანიზაციის ვებგვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრში (EMC) რელიგიური ორგანიზაციების, არასამთავრობო ორგანზაციებისა და სახალხო დამცველის წარმომადგენლების მონაწილეობით გიამართა სამუშაო შეხვედრა. რომელიც რელიგიის თავისუფლების კუთხით არსებული მდგომარეობის განხილვას დაეთმო. ადამიანის უფლებების სწავლებისა და მონიტორინგის ცენტრმა შეხვედრის მონაწილეებს წარუდგინა რელიგიური თემებში ჩატარებული კვლევის პირველადი შედეგები. წყარო: ცენტრის ვებგვერდი სოციალურ ქსელში

თბილისი. გაეროს ბავშვთა ფონდი საქართველოში აქვეყნებს ინფოგრაფიკას შვილად აყვანისა და მინდობით აღზრდის კანონის პროექტის შესახებ, რომელიც განიხილება სამუშაო ჯგუფში პარლამენტში წარსადგენად. სამუშაო ჯგუფის წევრები არიან საქართველოს პარლამენტის, ჯანდაცვის სამინისტროს, არასამთავრობო და საერთაშორისო ორგანიზაციების წარმომადგენლები. ინფოგრაფიკა... წყარო: გაეროს ბავშვთა ფონდის ვებგვერდი სოციალურ ქსელში

თბილისი. სახალხო დამცველმა მარტის თვის საინფორმაციო ბიულეტენი წარუდგინა საზოგადოებას. ბიულეტენში მიმოხილულია ადამიანის უფლებათა და თავისუფლებათა მდგომარეობის შესახებ სახალხო დამცველის წლიური საპარლამენტო ანგარიშის დეტალები. ასევე რეკომენდაციები და წინადადებები ხელისუფლების სხვადასხვა ორგანოებისადმი. სრულად... წყარო: ombudsman.ge

თბილისი. კოალიცია „დამოუკიდებელი და გამჭვირვალე მართლმსაჯულებისთვის" მიესალმება იუსტიციის სამინისტროს მიერ არასრულწლოვანთა მართლმსაჯულების კოდექსის მომზადებას. კოალიციას მიაჩნია, რომ არასრულწლოვანთა მართლმსაჯულების კოდექსი ცალსახად წინ გადადგმული ნაბიჯია ქართული მართლმსაჯულების სისტემისთვის. „კოდექსის მიზანია მართლმსაჯულების სისტემის ლიბერალიზება და აღდგენითი მართლმსაჯულების პრინციპის გაძლიერება არასრულწლოვნებთან მიმართებით. აღნიშნული კოდექსი მართლმსაჯულების ახალ სტანდარტებსა და ნორმებს ამკვიდრებს არამხოლოდ კანონთან კონფლიქტში მყოფი არასრულწლოვნების, არამედ დაზარალებული და მოწმე არასრულწლოვნების მიმართაც. არასრულწლოვანთა მართლმსაჯულების კოდექსი არასრულწლოვანის საუკეთესო ინტერესისთვის პრიორიტეტის მინიჭებას, ნასამართლობის გაქარწყლებას, განრიდების ინსტიტუტს, სპეციალიზებული მოსამართლეებისა და პროკურორების მომზადებასა და სხვა მნიშვნელოვან ცვლილებებს ითვალისწინებს..", ნათქვამია კოალიციის მიერ გავრცელებულ განცხადებაში. სრულად... წყარო: gyla.ge

არჩევნების სადამკვირვებლო ორგანიზაციების ევროპული ქსელი (ENEMO) განცხადებას ავრცელებს, რომლითაც აზერბაიჯანის მთავრობას მიმართავს. ქსელში შემავალი ორგანიზაციები კიდევ ერთხელ მოუწოდებს, „დაუყოვნებლივ გაათავისუფლოს პატიმრობიდან „საარჩევნო მონიტორინგისა და დემოკრატიის სწავლების ცენტრის” (EMDS) თავმჯდომარე ანარ მამამადლი”. სრულად... წყარო: isfed.ge

თბილისი. არასამთავრობო ორგანიზაციებმა ერთობლივი განცხადება გაავრცელებს რამინ მამედოვისა და მისი ოჯახის წევრების მიმართ სავარაუდო ზეწოლის ფაქტებთან დაკავშირებით. სრულად... წყარო: gyla.ge

ქვემო ქართლი. 8 აპრილს გენდერული თანასწორობის ქსელმა (GEN) ქვემო ქართლში, დმანისის მუნიციპალიტეტის საკონფერენციო დარბაზში, ჩაატარა საჯარო დისკუსია, თემაზე: „ქალების გაძლიერება პოლიტიკურ პროცესებში მონაწილეობის მისაღებად". საჯარო დისკუსიას ესწრებოდნენ: ადგილობრივი თვითმართველობის, პოლიტიკური პარტიების, აქტიური ლიდერი ქალები და სხვადასხვა სოციალური ჯგუფების წარმომადგენლები. გენდერული თანასწორობის ქსელმა დმანისში დააფუძნა კლუბი „დემოკრატიისა და თანასწორობისათვის," რომლის საქმიანობა მიმართული იქნება რეგიონში ქალთა პოლიტიკურ გაძლიერებაზე. გენდერული თანასწორობის ქსელი საქმიანობას ახორციელებს, პროექტის „ ქალების მონაწილეობა პოლიტიკური პროცესებში" ფარგლებში, რომელიც მხარდაჭერილია სსიპ „საარჩევნო სისტემების განვითარების, რეფორმებისა და სწავლების ცენტრის მიერ". წყარო: ორგანიზაციის ვებგვერდი სოციალურ ქსელში

თბილისი. 8 აპრილს, კამპანიაში – „ეს შენ გეხება, ისევ გვისმენენ" – მონაწილე არასამთავრობო ორგანიზაციებმა ე.წ. ფარული მოსმენების კანონთან დაკავშირებით კონსტიტუციური სარჩელის პრეზენტაცია გამართეს. „მოქმედი კანონმდებლობა შინაგან საქმეთა სამინისტროს შესაძლებლობას აძლევს რეალურ დროში, ყოველგვარი შეზღუდვის გარეშე, ფარული საგამოძიებო მოქმედებები აწარმოოს და ელექტრონული კომუნიკაციების კომპანიებიდან მონაცემთა ბანკების კოპირება სასამართლო გადაწყვეტილების გარეშე განახორციელოს. კამპანიაში „ეს შენ გეხება" გაერთიანებული ორგანიზაციები მიიჩნევენ, რომ კანონში არსებული ნორმები, რაც ამას შესაძლებელს ხდის, მოქალაქეების კონსტიტუციურ უფლებებს ლახავს და საკონსტიტუციო სასამართლოს ამ რეგულაციების გაუქმების მოთხოვნით მიმართავენ", ნათქვამია ორგანიზაციების მიერ გავრცელებულ განცხადებაში. სრულად... წყარო: transparency.ge

თბილისი. სამოქალაქო კამპანიაში „ეს შენ გეხება" გაერთიანებული არასამთავრობო ორგანიზაციები 8 აპრილს კონსტიტუციური სარჩელის პრეზენტაციას მართავენ. კონსტიტუციური სარჩელი მოქალაქეების პერსონალურ მონაცემებსა და კომუნიკაციაზე შსს-ს პირდაპირი წვდომის შეზღუდვას ეხება. პრეზენტაცია ამ წუთებში სასტუმრო „თბილისი მარიოტში" მიმდინარეობს. წყარო: ფონდი „ღია საზოგადოება – საქართველო"

აჭარა. 7 აპრილს, ბათუმში, გაეროს ადამიანის უფლებათა უმაღლესი კომისრის ოფისის, სამხრეთ კავკასიაში ადამიანის უფლებებში მთავარი მრჩეველი ვლადიმერ შკოლნიკოვი ადამიანის უფლებათა სფეროში მოღვაწე არასამთავრობო ორგანიზაციების წარმომადგენლებს შეხვდა. საუბარი რეგიონში ადამიანის უფლებების დაცვის კუთხით არსებულ პრობლემებსა და გამოწვევების შესახებ გაიმართა. მესამე სექტორის წარმომადგენლებმა პატიმრების კუთხით არსებულ პრობლემებსა და სახელმწიფოს მხრიდან მათ გადაჭრის გზებსა და მოგვარების ოპტიმალურ საშუალებებზე ისაუბრეს. ასევე, საზოგადოებრივი ორგანიზაციების წარმომადგენლებმა ისაუბრეს შშმ პირთა კუთხით უფლებების დარღვევასა და ეკომიგრანტების მდგომარეობის შესახებ. შეხვედრის მიზანი, არასამთავრობო ორგანიზაციების მხრიდან დასახელებული პრობლემების მიხედვით სამომავლოდ სატრენინგო მოდულის შექმნა და უფლებათა დამცველების გადამზადებაა.

თბილისი. „საერთაშორისო გამჭვირვალობა – საქართველო" დიდი ხანია სწავლობს საჯარო სამსახურში თანამშრომელთა აყვანა-გათავისუფლების საკითხებს და იცავს უფლებაშელახულ საჯარო მოხელეებს. როგორც ორგანიზაციის მიერ საკითხის კვლევამ უჩვენა, „საჯარო სამსახურში საკადრო პოლიტიკა ხშირად გამჭვირვალობის პრინციპების დარღვევით წარიმართება. დიდწილად, ამას სამართლებრივი ხვრელები და არასათანადო რეგულირება უწყობს ხელს, რაც, თავის მხრივ, ნეპოტიზმს და პატრონაჟს ახალისებს". ორგანიზაცია გამოდის საჯარო სამსახურში ნეპოტიზმის, ქრონიზმისა და პატრონაჟის კრიმინალიზების წინადადებით. ამ საკითხზე გამჭვირვალობა სოციალურ ქსელში ვიდეორგოლს ათავსებს – „რა გახდა ერთი სამსახური?" ვიდეორგოლი... წყარო: ორგანიზაციის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ, ჯანმრთელობის მსოფლიო დღესთან დაკავშირებით, ქუჩის გამოკითხვა ჩაატარა. მისი მიზანი იყო რამდენად იციან მოქალაქეებმა რას ნიშნავს ჯანმრთელობის უფლება და დაცულია თუ არა ის საქართველოში. ამ დღესთან დაკავშირებით საიამ სამ ქალაქში – თბილისში, ქუთაისსა და ზუგდიდში – საზოგადოებისთვის ჯანდაცვის სფეროში მათი უფლებების ინფორმირების მიზნით აქციები გამართა. წყარო: ორგანიზაციის ვებგვერდი სოციალურ ქსელში

თბილისი. ჟურნალისტური ეთიკის ქარტიის საბჭომ დასაშვებად ცნო რამდენიმე განაცხადი. კერძოდ, „ირაკლი ვაჭარაძე გაზეთ „ალიას" რედაქტორის წინააღმდეგ", „გუგული მაღრაძე გიორგი გაბუნიასა და ნიკა გვარამიას წინააღმდეგ". ასევე ელენე სიჭინავა მაკა ჩიხლაძის წინააღმდეგ", „ჟურნალ „ლიბერალის" მთავარი რედაქტორი შორენა გაბუნიას და ირაკლი ვაჭარაძის წინააღმდეგ". სრულად... წყარო: media.ge

თბილისი. ქალთა ფონდის ფინანსური მხარდაჭერით, ახალგაზრდა მკვლევართა –„სოციალური ცვლილებების მხარდამჭერები" – წარმომადგენლებმა კვლევა გამოაქვეყნეს: „სექსუალური შევიწროება – ქალთა „უჩინარი" დისკრიმინაცია". „სექსუალური შევიწროება გენდერული დისკრიმინაციის ნაკლებად ხილულ და რთულად იდენტიფიცირებად ფორმას წარმოადგენს. მიუხედავად „უჩინარი" ხასიათისა, სექსუალური შევიწროება მეტად გავრცელებული, ქალთა უფლებებისა და ღირსების შემლახველი სოციალური პრაქტიკაა", ნათქვამია ქალთა ფონდის ვებგვერდზე სოციალურ ქსელში. კვლევა... წყარო: ქალთა ფონდის ვებგვერდი სოციალურ ქსელში

კახეთი. თელავში, არასამთავრობო ორგანიზაციის ,,ნადიკვარის" ინიციატივით, გაიმართა მრგვალი მაგიდა თემაზე: ეთნიკური უმცირესობების თემებში ადრეული ქორწინების პრევენცია. შეხვედრაზე ისაუბრეს არასრულწლოვან გოგონათა უფლებების შესახებ, განიხილეს ქორწინების სამართლებრივი რეგულაციები და ყურადღება არასრულწლოვანთა ქორწინებით გამოწვეულ საფრთხეებზეც გაამახვილეს. ორგანიზაცია ,,ნადიკვარის" პროექტების მოძიების მენეჯერის განცხადებით, მრგვალი მაგიდის მონაწილეების მიერ ხელი მოეწერა მემორანდუმს, რომელიც ითვალისწინებს გოგონათა რეპროდუქციული ჯანმრთელობისა და უფლებების შესახებ ცნობიერების ამაღლებას სხვადასხვა რეგლიგიისა და ეთნიკური წარმომავლობის მოსახლეობისათვის კახეთის რეგიონში: ,,მრგვალი მაგიდის მონაწილეები დაეხმარებიან კახეთის რეგიონის სხვადასხვა რელიგიისა და ეთნიკური წარმომავლობის მოსახლეობას გენდერული სტერეოტიპების მიმართ კრიტიკული აზროვნების ჩამოყალიბებასა და დაძლევაში. ასევე, მრგვალი მაგიდის წევრები ხელს შეუწყობენ პროექტით გათვალისწინებულ საინფორმაციო კამპანიის წარმართვას". პროექტის ორგანიზატორია არასამთავრობო ორგანიზაციათა კოალიცია „ვეჟინი", „ნადიკვარი" და „ფიროსმანი". პროექტის ფინანსური მხარდამჭერია ქალთა ფონდი საქართველოში.

თბილისი. სახალხო დამცველის აპარატმა გამოაქვეყნა სპეციალური ანგარიში სკოლამდელი სააღმზრდელო დაწესებულებების შესახებ. იგი ასახავს სკოლამდელ სააღმზრდელო დაწესებულებებში ბავშვთა უფლებრივ მდგომარეობას. სრულად... წყარო: ombudsman.ge

თბილისი. საქართველოს ახალგაზრდა კონსტიტუციონალისტთა ასოციაცია სახელმწიფო საკონსტიტუციო კომისიას რეკომენდაციით მიმართავს. რეკომენდაცია საქართველოს კონსტიტუციის 28-ე მუხლს შეეხება, რომელიც საქართველოს მოქალაქეთა საარჩევნო უფლებას ადგენს. მოცემული მუხლის მე-2 პუნქტის თანახმად, სასამართლოს მიერ ქმედუუნაროდ ცნობილ პირებსა და სასამართლოს განაჩენით სასჯელის აღსრულების დაწესებულებაში მყოფ პირებს, (გარდა იმ პირებისა, რომელთაც ჩაიდინეს ნაკლებად მძიმე დანაშაული), არ აქვთ არჩევნებში მონაწილეობის უფლება. ორგანიზაცია მიიჩნევს, რომ „საქართველოს კონსტიტუციის 28-ე მუხლი უნდა მიჯნავდეს აქტიურ და პასიურ საარჩევნო უფლებას ერთმანეთისგან და არ უნდა აკონკრეტებდეს იმ პირთა წრეს, რომელთაც ეზღუდებათ არჩევნებში მონაწილეობის უფლება. შეზღუდვის საფუძვლები კი დადგენილი უნდა იყოს სისხლის სამართლის კოდექსითა და საარჩევნო კოდექსით. ორგანიზაციას მომზადებული აქვს სისხლის სამართლის კოდექსსა და საარჩევნო კანონმდებლობაში შესატან ცვლილებათა პაკეტიც". სრულად... წყარო: ორგანიზაციის ვებგვერდი სოციალურ ქსელში

თბილისი. არასამთავრობო ორგანიზაცია „ახალგაზრდა ადვოკატები" საქართველოს მთავრ პროკურორს, იუსტიციისა და ეკონომიკის მინისტრებს მიმართავენ და სახელმწიფოს მხრიდან ქმედითი ნაბიჯების გადადგმას მოითხოვენ. საკითხი ეხება „ „საქართველოს საკონსტიტუციო სასამართლოს თავმჯდომარის გიორგი პაპუაშვილის მხრიდან 2015 წლის 17 მარტს მიღებული გადაწყვეტილების შეჩერებას და საამისოდ, შესაბამისი სამართლებრივი მოქმედებების განხორციელებას...", ნათქვამია ორგანიზაციის ვებგვერდზე. სრულად... წყარო: barristers.ge