თბილისი. „სამართლიანი არჩევნები“ შეშფოთებას გამოთქვამს დღეს, 5 ივლისს, რუსთაველის გამზირსა და ქალაქის სხვადასხვა ლოკაციაზე მიმდინარე ძალადობრივი აქციების გამო, რომელთა მონაწილეებიც ფიზიკურად უსწორდებიან ჟურნალისტებს და გამოირჩევიან აგრესიით. „ნათელია, რომ სახელმწიფო ინსტიტუტები ვერ უზრუნველყოფენ კონსტიტუციით გარანტირებული უფლებების დაცვას, რის გამოც პრაიდის კვირეულის ორგანიზატორებს დაანონსებული მშვიდობიანი შეკრების გადადება მოუხდათ. მოვუწოდებთ შინაგან საქმეთა სამინისტროს, დაუყოვნებლივ აღკვეთოს ქალაქის ქუჩებში მიმდინარე ძალადობის აქტები და დროულად გამოიძიოს ჟურნალისტებსა და სამოქალაქო საზოგადოების ორგანიზაციების ოფისებზე თავდასხმის ფაქტები“, ნათქვამია ორგანიზაციის განცხადებაში. სრულად... წყარო: isfed.ge 

თბილისი. ინფორმაციის თავისუფლების განვითარების ინსტიტუტი გამოხატვის თავისუფლების წინააღმდეგ გააქტიურებულ ძალადობრივ ქმედებებს ეხმიანება. „სახელმწიფოს უუნარობა თუ მოუმზადებლობა შეასრულოს საკუთარი პოზიტიური ვალდებულებები ახალისებს არამარტო გამოხატვის თავისუფლების წინააღმდეგ მიმართულ ძალადობას, არამედ სიძულვილსა და შეუწყნარებლობას. შემაშფოთებელი და სახელმწიფოსთვის ზიანის მომტანია პრემიერ-მინისტრის განცხადება, რომელიც კიდევ უფრო ახალისებს ძალადობს“, ნათქვამია ორგანიზაციის გვერდზე სოციალურ ქსელში. ორგანიზაცია მოუწოდებს აღმასრულებელ ხელისუფლებას მიიღოს „ყველა ზომა ღირსების მარშში მონაწილეთა უსაფრთხოების, ისევე ჟურნალისტების გამოხატვის თავისუფლებისა და მოქალაქეთა უსაფრთხოების დასაცავად." სრულად... წყარო: ინფორმაციის თავისუფლების განვითარების ინსტიტუტის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია 5 ივლისს განვითარებულ ძალადობრივ ქმედებებზე განცხადებას ავრცელებს. საია გმობს „ჰომოფობიური ჯგუფების ძალადობრივ ქმედებებს, საქართველოს პრემიერ-მინისტრის მთავრობის სხდომამდე გაკეთებულ განცხადებას, რამაც წაახალისა სიტუაციის დამატებით გამწვავება, აგრეთვე, შინაგან საქმეთა სამინისტროს არასათანადო რეაგირებას, რამდენადაც ვერ უზრუნველყო პრევენციულად მუშაობა და პროცესების ეფექტიანი მართვა“. შესაბამისად, საია მოუწოდებს სახელმწიფო უწყებებს, შინაგან საქმეთა სამინისტროს, უზრუნველყოს პროცესების მშვიდობიანად წარმართვა, ძალადობრივი ჯგუფების ქმედებების დროულად და ეფექტიანად აღკვეთა, სამართალდარღვევებზე შესაბამისი რეაგირება, ამასთანავე, სათანადოდ შეასრულოს კონსტიტუციით დაკისრებული პოზიტიური ვალდებულებები და დაიცვას აქციის მონაწილეთა შეკრებისა და გამოხატვის თავისუფლება, აგრეთვე მედიის წარმომადგენლების უსაფრთხოება. სრულად... წყარო: საქართველოს ახალგაზრდა იურისტთა ასოციაცია

თბილისი. „ხელისუფლების უმოქმედობა ახალისებს აგრესიული ჯგუფების ძალადობას მედიის წინააღმდეგ“, ნათქვამია საერთაშორისო გამჭვირვალობა – საქართველოს განცხადებაში, რომელიც 5 ივლისს თბილისში განვითარებულ მოვლენებს ეხმიანება. ორაგნიზაცია მოუწოდებს ხელისუფლებას „დროულად უზრუნველყონ მედიის წარმომადგენელთა უსაფრთხოება, დაიცვან ისინი ფიზიკური ძალადობისაგან და პროფესიული საქმიანობის უსაფრთხოდ განხორციელების პირობები შეუქმნან. მნიშვნელოვანია, რომ ხელისუფლებამ თითოეული ინციდენტი ეფექტურად გამოიძიოს და ყველა დამნაშავე კანონის სრული სიმკაცრით დაისაჯოს“, ნათქვამია ორგანიზაციის განცხადებაში. სრულად... წყარო: საერთაშორისო გამჭვირვალობა საქართველო

თბილისი. სოციალური სამართლიანობის ცენტრი (ყოფილი EMC) ეხმიანება ღირსების მარშის ჩატარების გარშემო მიმდინარე პოლიტიკურ პროცესებს და განცხადებებს და მთავრობას უსაფრთხოების და სოციალური მშვიდობის დაცვისკენ და კონსტიტუციური პრინციპების პატივისცემისკენ მოუწოდებს. „ხელისუფლებას არ აქვს ძალადობრივი რადიკალიზაციის გამკლავებისკენ მიმართული პოლიტიკა და ძალადობრივი ჯგუფების მიერ ჩადენილ დანაშაულებზე მუდმივად იწყნარებს და ზოგჯერ პოლიტიკურად იყენებს კიდეც. აღნიშნული ჯგუფების მხრიდან არაერთხელ განხორციელდა საჯარო მუქარა და ძალადობისკენ საჯაროდ მოწოდება, თუმცა არცერთ შემთხვევაში მას სამართლებრივი რეაგირება არ მოჰყოლია. უფრო მეტიც, ხელისუფლებამ დაუშვა ამ ჯგუფების ფორმალურ პოლიტიკურ და მედია ველში შემოსვლა“. სრულად... წყარო: socialjustice.org.ge

თბილისი. ომბუდსმენი უკიდურესად შემაშფოთებლად მიიჩნევს ამ წუთებში რუსთაველის გამზირზე და მოძრაობა „სირცხვილიას“ ოფისთან მიმდინარე ძალადობრივ მოვლენებს. „პასუხისმგებლობის მშვიდობიან დემონსტრანტებზე გადატანით, ისედაც დაძაბული ფონი გაამძაფრა, ასევე, საქართველოს პრემიერ-მინისტრის ირაკლი ღარიბაშვილის განცხადებამ, რომელმაც ღირსების მარში სამოქალაქო დაპირისპირების გამომწვევ მიზეზად შეაფასა და აღნიშნა, რომ პრაიდის უკან „რევანშისტული და რადიკალური“ პოლიტიკური ძალები დგანან.  სახალხო დამცველი კიდევ ერთხელ შეახსენებს მაღალი თანამდებობის პირებს, რომ მშვიდობიანი გამოხატვისა და შეკრების თავისუფლების დაცვა, მათ შორის, კონტრდემონსტრანტების ძალადობრივ ქმედებებზე სამართლებრივი რეაგირების გზით, სახელმწიფოს კონსტიტუციური ვალდებულებაა და მოუწოდებს სამართალდამცავ ორგანოებს, სამართლებრივი მექანიზმების გამოყენებით, სავარაუდო სამართალდამრღვევი პირები საჯარო სივრცეებს დროულად განარიდონ“. სრულად... წყარო: ombudsman.ge

თბილისი. კოალიცია „მედიის ადვოკატირებისთვის“ კიდევ ერთხელ მოუწოდებს საქართველოს შინაგან საქმეთა სამინისტროს მიიღოს ეფექტური ზომები ჟურნალისტების დასაცავად. „დღეს გავრცელებული ინფორმაციით, რუსთაველის გამზირზე ძალადობრივი ჯგუფები ჟურნალისტებს ფიზიკურ და სიტყვიერ შეურაცხყოფას აყენებენ. ძალადობრივი ჯგუფის წევრები ჟურნალისტებს თავს ესხმიან, აგინებენ და ტერიტორიის დატოვებას აიძულებენ. ამ დრომდე უცნობია დააკავეს თუ არა ვინმე ჟურნალისტებზე თავდასხმის გამო. ხელისუფლების წარმომადგენლებს არ გაუკეთებიათ ღია განცხადებები აგრესიის დაგმობისა და შეჩერების მიზნით. მოვუწოდებთ საქართველოს შინაგან საქმეთა სამინისტროს, გამოიყენოს ეფექტური ზომების მედიის უსაფრთხოების და გამოხატვის თავისუფლების საუკეთესო მიზნების გათვალისწინებით“. სრულად... წყარო: ორგანიზაციის გვერდი სოციალურ ქსელში

თბილისი. გავრცელებული ინფორმაციით, რუსთაველის გამზირზე ძალადობრივი ჯგუფები ჟურნალისტებს ფიზიკურ და სიტყვიერ შეურაცხყოფას აყენებენ. „ჟურნალისტური ეთიკის ქარტია მოუწოდებს ხელისუფლებას, დაიცვას ჟურნალისტთა უსაფრთხოება და პროფესიული საქმიანობის შესრულებისას მედიას შეუქმნას შესაბამისი სამუშაო პირობები, რათა მოქალაქეებს ჰქონდეთ შესაძლებლობა, მიიღონ ინფორმაცია მიმდინარე პროცესებთან დაკავშირებით“.  სრულად... წყარო: www.qartia.ge

თბილისი. კოალიცია „მედიის ადვოკატირებისთვის” მოუწოდებს საქართველოს შინაგან საქმეთა სამინისტროს „ღირსების მარშის“ გაშუქებისას უზრუნველყოს მედიის წარმომადგენლების და მონაწილე პირთა უსაფრთხოება. „კოალიციის წევრი ორგანიზაციები მივიჩნევთ, რომ უმცირესობების უფლებების დაცვა და აღიარება საერთო პასუხისმგებლობაა. დისკრიმინაციის და ძალადობის შეჩერება კი სახელმწიფოს განსაკუთრებული პასუხისმგებლობაა“. სრულად... წყარო: idfi.ge © ფოტო: რადიო თავისუფლება

თბილისი. სოციალური სამართლიანობის ცენტრის (ყოფილი EMC) მიერ მომზადებულ ვიდეოში ორგანიზაციის იურისტი, მარიამ გობრონიძე მიმოიხილავს საქართველოში მართლმსაჯულების სისტემაზე თანაბარი მისაწვდომობის საკითხს, სისტემაში არსებულ ბარიერებს და ა.შ. წყარო: socialjustice.org.ge

თბილისი. 1 ივლისს სახალხო დამცველმა ნინო ლომჯარიამ მონაწილეობა მიიღო და სიტყვით გამოვიდა თანასწორობის თაობის გლობალური მოძრაობის ფორუმზე „გენდერული თანასწორობის ცენტრალური როლი დემოკრატიული სისტემების გაძლიერებაში“. „სიტყვით გამოსვლისას სახალხო დამცველმა ისაუბრა სექსუალური ძალადობის დანაშაულებზე მართლმსაჯულების განხორციელების მნიშვნელობაზე და ასევე, ხაზი გაუსვა გენდერულად მგრძნობიარე სისხლის სამართლის მართლმსაჯულების სისტემის არსებობას, სადაც ქალთა მიმართ ჩადენილ დანაშაულებს ბრალდების და სასამართლო ორგანოების მხრიდან სათანადო აღიარება, კვალიფიკაცია და დასჯა მოჰყვება“. სრულად... წყარო: ombudsman.ge

თბილისი. სამოქალაქო პლატფორმა „არა ფობიას“ მოუწოდებს შინაგან საქმეთა სამინისტროს, დაიცვას „ღირსების მარშის“ მონაწილეთა შეკრებისა და გამოხატვის თავისუფლება და უზრუნველყოს მათი უსაფრთხოება. „5 ივლისს, „თბილისი პრაიდის“ ორგანიზებით „ღირსების მარში“ იგეგმება. ღონისძიების გამართვას საფრთხეს უქმნიან ძალადობრივი, ჰომოფობიური ჯგუფები, რომლებიც ბოლო დღეების განმავლობაში, სოციალური მედიის გამოყენებით, ღიად და საჯაროდ მოუწოდებენ საზოგადოებას ძალადობისკენ და აანონსებენ კონტრაქციას მარშის მონაწილეთა წინააღმდეგ“. სრულად... წყარო: transparency.ge

თბილისი. სოციალური სამართლიანობის ცენტრი გთავაზობთ თეონა ფირანიშვილის სტატიას „ადამიანის უფლებები მშვიდობის მშენებლობისთვის“. „სტატიის მიზანია გაანალიზოს კონფლიქტების მშვიდობიანი ტრანსფორმაციის პროცესში ადამიანის უფლებების როლი, მისი მრავალშრიანი მნიშვნელობა და პრაქტიკაში გამოყენების სხვადასხვა სივრცე“. სრულად... წყარო: socialjustice.org.ge

თბილისი. 5 ივლისს დაგეგმილ ღირსების მარშთან დაკავშირებით საქართველოს სახალხო დამცველი მნიშვნელოვნად მიიჩნევს სახელმწიფოს მხრიდან მოქალაქეთა შეკრების და გამოხატვის თავისუფლების უზრუნველყოფას, არსებული რისკების პრევენციის და დაცვის შესაბამისი ღონისძიებების გატარების გზით. ომბუდსმენი აღნიშნავს, რომ განსაკუთრებულ ყურადღებას და შესაბამის სამართლებრივ რეაგირებას საჭიროებს ულტრამემარჯვენე და ძალადობრივი ჯგუფების მიერ ლგბტ+ თემის წარმომადგენლებისა და მათი მხარდამჭერების მიმართ გავრცელებული მუქარის შემცველი განცხადებები. სრულად... წყარო: ombudsman.ge

თბილისი. სოციალური სამართლიანობის ცენტრის მიერ მომზადებულ საინფორმაციო ვიდეოში ორგანიზაცია პასუხობს ნამახვანჰესის პროექტთან დაკავშირებით, პროექტის მხარდამჭერების მიერ გავრცელებულ არაზუსტ, მცდარ და მანიპულაციურ არგუმენტებს. წყარო: socialjustice.org.ge

თბილისი. ორგანიზაციამ „უფლებები საქართველო“ პლატფორმა Zoom-ის მეშვეობით, გაიმართა ონლაინ ტრენინგი თემაზე: „უფლებადამცველებისა და სამოქალაქო აქტივისტების დაცვის ადგილობრივი და საერთაშორისო მექანიზმები“. ტრენინგს სხვადასხვა რეგიონში მომუშავე უფლებადამცველები, აქტივისტები და თემის ლიდერები დაესწრნენ. სრულად... წყარო: rights.ge

თბილისი. ქუთაისსა და ბათუმში პარტნიორობა ადამიანის უფლებებისთვის (PHR) ინიციატივით, იურისტებთან, ექიმებთან და ფსიქოლოგებთან ჩატარდა ტრენინგი შეზღუდული შესაძლებლობის მქონე ქალების სექსუალური და რეპროდუქციული ჯანმრთელობის უფლებების შესახებ. „ტრენერებმა განიხილეს რას მოიცავს სექსუალური და რეპროდუქციული ჯანმრთელობის უფლება, რა დამატებით სირთულეებს აწყდებიან შეზღუდული შესაძლებლობის მქონე ქალები აღნიშნული უფლებებით სარგებლობისას, რა ვალდებულებები აქვს სახელმწიფოს ნაკისრი, როგორც საერთაშორისო ხელშეკრულებებით, ასევე საქართველოს კანონით „შეზღუდული შესაძლებლობის მქონე პირთა უფლებების“ შესახებ.“ სრულად... წყარო: phr.ge

თბილისი. საქართველოს ეს-ო-ეს ბავშვთა სოფელი (SOS Children’s Village Georgia) ოფიციალური განცხადებით ეხმაურება მასმედიის საშუალებით გაჟღერებულ ინფორმაციას ორგანიზაციის მცირე საოჯახო სახლის მომსახურებაში წარსულში მომხდარ ორ სავარუდო ძალადობის ფაქტს. „ორგანიზაცია დიდ წუხილს გამოთქვამს იმის გამო, რომ ჩვენი ყოფილი ორი ბენეფიციარისთვის ტრავმული აღმოჩნდა მცირე საოჯახო სახლში ცხოვრება და ჩვენთვის, ძალიან მძიმე იყო მათი ისტორიების მოსმენა. ასოციაცია გამოხატავს მაქსიმალურ მზაობასა და ღიაობას, კანონის ფარგლებში ხელი შეუწყოს ნებისმიერი სახის გამოძიების პროცესს; მეტიც, ორგანიზაციის დადგენილი პრაქტიკით უზრუნველყოს, როგორც ძალადობის სავარაუდო მსხვერპლი, ისე ყოფილი აღსაზრდელების ფსიქო-ემოციური და სამართლებრივი მხარდაჭერა. ყველა გამოვლენილი ფაქტი, მიუხედავად შემთხვევის ხანდაზმულობისა, ყოველთვის ქმნის იმის წინაპირობას, რომ გადაისინჯოს ორგანიზაციაში არსებული მონიტორინგის მოქმედი სისტემები, რათა უზრუნველყოფილ იქნას თითოეული აღსაზრდელის უსაფრთხო და დაცულ გარემოში აღზრდა-განვითარება“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. სოციალური სამართლიანობის ცენტრი აქვეყნებს ვიდეო ინტერვიუს, რომელშიც მოისმენთ ახალციხეში მცხოვრები მესხების იმ წუხილებსა და შეკითხვებს, რასაც ისინი წლებია მთავრობის მისამართით აჟღერებენ.  წყარო: socialjustice.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, ორგანიზაციამ ადამიანის უფლებათა ევროპულ სასამართლოში სამართალდამცავების მხრიდან ნარკოტიკების ჩადებასთან დაკავშირებით მეოთხე საქმე მოიგო. „საქმეში „შუბითიძე საქართველოს წინააღმდეგ“ მომჩივანი კაკო შუბითიძე ამტკიცებდა, რომ მას 2011 წელს ნარკოტიკული საშუალება (მარიხუანა) პოლიციელებმა ჩაუდეს შუბითიძის საქმეზე მიღებული გადაწყვეტილებით, მსგავსად, კალანდიას, მეგრელიშვილისა და ტლაშაძე კაკაშვილის საქმეებისა ცხადია, რომ არსებული მართლმსაჯულების სისტემა არ შეიცავს საკმარის პროცედურულ გარანტიებს, რომლებიც პირებს სამართალდამცავების მხრიდან შესაძლო თვითნებობისგან დაიცავდა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებათა დაცვის საერთაშორისო ორგანიზაციამ - „თანასწორობა ახლა-მ/Equality Now“, რომელიც მუშაობს მთელს მსოფლიოში ქალების და გოგოების უფლებრივი მდგომარეობის გაუმჯობესებისთვის, საქართველოს ახალგაზრდა იურისტთა ასოციაციის წარმოებაში არსებულ საქმეზე საქართველოს უზენაეს სასამართლოში სასამართლო მეგობრის მოსაზრება წარადგინა. საქმე შეეხება სექსუალური შევიწროების მსხვერპლის უფლებას, საჯაროდ ისაუბროს საკუთარ გამოცდილებაზე. ორგანიზაციის ინფორმაციით, მიმდინარე დავის ფარგლებში, თბილისის საქალაქო და სააპელაციო სასამართლოებმა ადამიანის უფლებების დაცვის თვალსაზრისით სახიფათო სტანდარტი დაადგინეს და მსხვერპლის აღნიშნული უფლება შეზღუდეს. სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 23 ივნისი მამხილებელთა დაცვის საერთაშორისო დღეა. „მხილების ინსტიტუტს უდიდესი როლი აქვს კორუფციასთან, განსაკუთრებით კი მაღალი დონის კორუფციასთან ბრძოლაში. სამწუხაროდ, საქართველოში მხილების მექანიზმის შესახებ ცნობიერების დონე ძალიან დაბალია და მისი გამოყენება ფაქტობრივად არ ხდება. ვრცლად მხილების მექანიზმთან დაკავშირებულ #IDFI-ს მიერ იდენტიფიცირებულ გამოწვევებსა და რეკომენდაციებს გაეცანით აქ..." წყარო: idfi.ge