თბილისი. საქართველოს სტრატეგიული კვლევებისა და განვითარების ცენტრი და ფონდი „აურესი“ ავრცელებენ განცხადებას პირბადის ტარების წესში ცლილებების შეტანის აუცილებლობაზე. ორგანიზაციები აღწერენ პრობლემას, რომელიც პანდემიის პერიოდში სპეციალური საჭიროებების მქონე პირებს შეექმნათ (შშმ, სმენის შეზღუდვის მქონე ბავშვი/პირი, ხანდაზმული, აუტისტური სპექტრის დარღვევის მქონე პირი და სხვა). მათთვის კრიტიკულად მნიშვნელოვანია სახის გამომეტყველებისა და ბაგეების მოძრაობის დანახვა, გაუმჭვირვალე პირბადის ტარებამ კი ეს შეუძლებელი გახადა. სსო-ები ერთობლივ განცხადებაში ითხოვენ შემდეგი ცვლილებების განხორციელებას: •შევიდეს შესაბამისი ცვლილებები პირბადის ტარების წესში, რათა ყველა ადამიანის ჯანმრთელობა იყოს თანაბრად დაცული; •აღიჭურვონ მომსახურებები, განსაკუთრებით სოციალური მომსახურებები, გამჭვირვალეფარიანი პირბადეებით და მათი გამოყენებისთვის საჭირო ცოდნით და უნარებით, რათა შემცირდეს გაუმჭვირვალე პირბადით გამოწვეული კომუნიკაციის ბარიერების ნეგატიური შედეგები ან/და ბენეფიციარის ზიანი; •სოციალური მომსახურების სტანდარტებში, ინფექციის გავრცელების თავიდან აცილების მიზნით, გათვალისწინებული იქნეს გამჭვირვალეფარიანი პირბადის გამოყენების წესი. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) გიზიარებთ ინფორმაციას თუ როგორ უნდა მოიქცეთ რეგულაციების დარღვევის დროს დაჯარიმებისას. „ჯარიმის გასაჩივრების შემთხვევაში, საჩივრის განხილვის დასრულებამდე უფლება გაქვთ, არ გადაიხადოთ დაკისრებული ჯარიმა“. სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოებრივი ორგანიზაციები მიიჩნევენ, რომ უკიდურესად საგანგაშოა საქართველოს საკონსტიტუციო სასამართლოს პირველი კოლეგიის 2021 წლის 11 თებერვლის გადაწყვეტილება და მისი მოტივაცია, რომელიც მნიშვნელოვნადაა აცდენილი სამართლებრივ ლოგიკას, კონსტიტუციურ სტანდარტებს და ზოგადად ქვეყანაში შექმნილ რეალობას. „მიგვაჩნია, რომ გადაწყვეტილება შეიცავს აღმასრულებელი ხელისუფლების მხრიდან თვითნებური და ერთპიროვნული გადაწვეტილების მიღების მნიშვნელოვან საფრთხეებს. საკონსტიტუციო სასამართლომ 2021 წლის 11 თებერვალს გამოაქვეყნა გადაწყვეტილება, რომლითაც კონსტიტუციურად მიიჩნია პანდემიის დროს ადამიანის ძირითადი უფლებების (შეკრების თავისუფლება, გადაადგილების თავისუფლება, საკუთრების უფლება) შეზღუდვა მთავრობის დადგენილებით და მინისტრის ბრძანებით. ამ გადაწყვეტილებით პარლამენტს შეუძლია ფაქტიურად მოიხსნას უფლებამოსილება ქვეყნისათვის ყველაზე კრიტიკულ სიტუაციაში და უარი თქვას საკანონდებლო ფუნქციის განხორციელებაზე“, ნათქვამია ერთობლივ განცხადებაში. სრულად... წყარო: emc.org.ge

თბილისი. 12 თებერვალს, საქართველოს მთავარი პროკურატურის შენობასთან გამართულ პრესკონფერენციაზე ქალთა მოძრაობამ ასდღიანი კამპანიის „ნინის გამო“ დაწყება დაანონსა. ქალთა მოძრაობა ითხოვს: 1. შეიცვალოს სისხლის სამართლის გაუპატიურების მუხლი და თანხმობის არარსებობა გახდეს ცენტრალური ასპექტი; 2. შეიქმნას პროკურატურაში სპეციალიზირებული დეპარტამენტი, რომელიც გამოიძიებს სექსუალური ძალადობის საქმეებს; 3. ფორმალური განათლების ნაწილი გახდეს ბავშვებისათვის სქესობრივი ძალადობის ამოცნობა და მისგან თავის დაცვა; 4. გაიზარდოს ფსიქოლოგების და სოცმუშაკების რაოდენობა; 5. დადგეს ნინის საქმის პროკურორის პასუხისმგებლობის საკითხი სამსახურეობრივი გულგრილობისთვის. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ალექსანდრ ბანდიუკოვის მიმართვას, მისივე თხოვნით ავრცელებს. ორგანიზაციის ინფორმაციით, ის ამჟამად საავადმყოფოშია და თავის საქმეზე საჯარო პოზიციონირება არ შეუძლია. „ძვირფასო საქართველოს მოქალაქეებო, მე, ალექსანდრე ბანდიუკოვი, რუსეთის ფედერაციის მოქალაქე, პუტინის ბანდიტების დევნას გამოქცეული, 2018 წლის 14 სექტემბერს ოჯახთან ერთად ჩამოვედი საქართველოში საერთაშორისო დაცვის მისაღებად. ამ ხნის განმავლობაში მე შემიყვარდა საქართველო და მისი თბილი, ლამაზი და გულღია ხალხი. მთელი ამ ხნის განმავლობაში უბრალო ადამიანებისგან არც ერთი ცუდი სიტყვა არ მსმენია. გარშემომყოფნი, მეზობლები და მეგობრები, მხოლოდ სითბოს მაგრძნობინებდნენ, თანამიგრძნობდნენ და მეხმარებოდნენ.  მე მივმართე საქართველოს ხელისუფლებას საერთაშორისო დაცვის მისაღებად, თუმცა მხოლოდ ჰუმანიტარული სტატუსი მომენიჭა. ახლა კი მათ ის უკანონოდ, დაუმსახურებლად და ცინიკურად ჩამომართვეს“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოების ორგანიზაციები შეშფოთებას გამოხატავენ ქობულეთის მუნიციპალიტეტში 14 წლის გოგონას თვითმკვლელობის უმძიმეს საქმეზე და სახელმწიფო უწყებებს მოუწოდებენ დროულად გამოიძიონ მომხდარი. „გამოძიების ფარგლებში შესწავლილი უნდა იყოს ყველა შესაძლო ორგანოს/თანამდებობის პირის პასუხისმგებლობა, ვისაც მსხვერპლის მიმართ მხარდაჭერისა და მის მიმართ ჩადენილ დანაშაულზე გამოძიების წარმოების ვალდებულება ჰქონდა. აღნიშნულ საქმეში ჩანს ქალთა მიმართ ძალადობის უმძიმესი სოციალური პრაქტიკები და საპოლიციო და სოციალური ინსტიტუტების დანაშაულებრივი გულგრილობისა და არაეფექტიანობის ნიშნები.  არასრულწლოვანთა თვითმკვლელობის არაერთი ტრაგიკული შემთხვევის მიუხედავად, სახელმწიფოს არსებული პოლიტიკის რადიკალური ცვლილებების ნება არ გამოუვლენია, სახელმწიფოს მხრიდან არასაკმარისი ყურადღება ეთმობა ზოგადად სუიციდის პრევენციის სტრატეგიის შემუშავებასა და იმპლემენტაციას. სისტემა უკიდურესად გულგრილი რჩება მოზარდებზე ზრუნვის პოლიტიკის, სოციალური და ფსიქოლოგიური მხარდაჭერის მექანიზმების შემუშავების კუთხით“, ნათქვამია ერთობლივ განცხადებაში. სრულად... წყარო: gyla.ge

თბილისი. ევროპის საბჭოსა და მთავრობის ადმინისტრაციის მიერ „მე ვირჩევ თანასწორობას” კამპანიის ფარგლებში ჩატარდა თანასწორობის რეპორტიორის კონკურსი. ლალე სოფიევა კონკურსის ერთერთი გამარჯვებულია და ის, ესეში, თავისი დიდი ბებიის ფარი-ხანუმ სოფიევას შესახებ გვიყვება. „მინდა, გაგაცნოთ ფარი-ხანუმ სოფიევა, დემოკრატიული გზით არჩეული პირველი მუსლიმი ქალი მსოფლიოში, რომელმაც თავისი სამაგალითო და დღემდე საიდუმლოებით მოცული ისტორიებით მსოფლიო გააოცა და ასი წლის შემდეგაც მისი საქმიანობა მისაბაძია. ფარი-ხანუმ სოფიევა არის ჩემი დიდი ბებია. დაიბადა 1884 წელს, გარდაბნის მუნიციპალიტეტის სოფელ ყარაჯალაში“... სრულად... წყარო: www.coe.int

თბილისი. ტყიბულში, ძიძიგურის ნახშირმომპოვებელ უბანზე დასაქმებული 10-ზე მეტი მეშახტე 10 თებერვლიდან შახტიდან ამოსვლაზე უარს ამბობს და აცხადებს, რომ „საქნახშირმა” მათ იანვრის თვის ანაზღაურება გაუნახევრა. „ადამიანის უფლებების სწავლებისა და მონიტორინგის ცენტრი (EMC) თვლის, რომ „საქნახშირში” მოქმედი ანაზღაურების სისტემა რომელიც გამომუშავებასა და თვიური გეგმის შესრულებაზეა მიბმული, უსამართლოა და დამატებით აჩენს დასაქმებულთა შრომის უსაფრთხოების მნიშვნელოვან რისკებს.  მივიჩნევთ რომ “საქნახშირმა” დაუყოვნებლივ უნდა განიხილოს პროტესტის მონაწილე მეშახტეების მიერ გაჟღერებული მნიშვნელოვანი მოთხოვნები და მეშახტეთა ჩართულობით უზრუნველყოს ანაზღაურების ღირსეული სისტემის დანერგვა“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს სტრატეგიული კვლევებისა და განვითარების ცენტრის და ფონდი აურეს-ის ერთობლივი პროექტი „გამჭვირვალეფარიანი პირბადე ადამიანის უფლებებისთვის“ სმენის სირთულეების მქონე პირთა სოციალური ინტეგრაციის ხარისხის გაზრდის ხელშეწყობისკენაა მიმართული. „COVID-19-ის პანდემიის პერიოდში, ვირუსისგან დამცავი პირბადეების გამოყენებამ, მსოფლიოში სმენის სირთულეების მქონე მილიონობით ადამიანს კომუნიკაციის დაბრკოლებები შეუქმნა. პირბადე შეუძლებელს ხდის სახის გამომეტყველებისა და ბაგეების დანახვას, რომელიც სმენის სირთულეების მქონე ადამიანებისთვის მნიშვნელოვანი დასაყრდენია კომუნიკაციისას. საქართველოში კი 200 000-ზე მეტი სმენის სირთულეების მქონე ადამიანია“. სრულად... წყარო: ორგანიზაციის გვერდი სოციალურ ქსელში

თბილისი. ომბუდსმენი მწუხარებას გამოხატავს 10 თებერვალს ქობულეთში 14 წლის გოგოს მიერ თვითმკვლელობის ტრაგიკულ ფაქტთან დაკავშირებით. „სახალხო დამცველის აპარატი შეისწავლის თითოეული სახელმწიფო უწყების პასუხისმგებლობის საკითხს, შესაძლო დაგვიანებული და არაეფექტური რეაგირების მიმართულებით. მნიშვნელოვანია აღინიშნოს, რომ ეს ტრაგიკული ფაქტი არ არის განყენებული შემთხვევა და წარმოადგენს იმ სისტემური უმოქმედობის, კვალიფიკაციის ნაკლებობისა და ძალადობის მსხვერპლ ბავშვთა სათანადო სარეაბილიტაციო სერვისების არარსებობის შედეგს, რომელზეც სახალხო დამცველის აპარატი წლებია მიუთითებს. მომხდარმა კიდევ ერთხელ წარმოაჩინა, რომ პასუხისმგებელი უწყებები ვერ ახდენენ ბავშვის მიმართ სექსუალური ძალადობის შემთხვევებზე დროულ, ეფექტიან და კოორდინირებულ რეაგირებას, რაც სახელმწიფოს მხრიდან სასწრაფო რეაგირებას და სისტემური ცვლილებების გატარებას საჭიროებს“, ნათქვამია განცხადებაში. სრულად... წყარო: ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება შპს „ენკა რინიუებლზის“ განცხადებას, რიონის ხეობაში, ქვემო ნამახვანის ჰიდროელექტროსადგურზე მიმდინარე მოსამზადებელი ტიპისა და მიწის სამუშაოების თაობაზე. „კომპანია ადასტურებს, რომ რიონის ხეობაში მის მიერ ხორციელდება მოსამზადებელი სამუშაოები თუმცა, საკუთარი ქმედებების კანონიერების დასაბუთებისთვის ის უთითებს და აქვეყნებს არა ტექნიკური და სამშენებლო ზედამხედველობის სააგენტოს მიერ გაცემულ სამშენებლო ნებართვას და მის პირობებს, რაც ნებისმიერი მშენებლობის კანონიერების ფარგლების განსაზღვრისთვის ერთადერთი დოკუმენტია, არამედ ის ეყრდნობა სააგენტოსთან ოფიციალურ წერილობით მიმოწერას რაც არ წარმოდგენს სანებართვო დოკუმენტს“. მივიჩნევთ რომ შპს „ენკა რინიუებლზი“ 2020 წლის 21 სექტემბრიდან ქვემო ნამახვანის მშენებლობის მოსამზადებელი ტიპისა და მიწის სამუშაოების განხორციელებით ყოველდღიურად არღვევს სამშენებლო ნებართვის პირობებს. ეს კი სააგენტოს დაუყოვნებლივი რეაგირების საფუძველი უნდა გახდეს, რაც მოსამზადებელი ტიპისა და მიწის სამუშაოების შეჩერებას და მშენებლობის ნებართვის პირობების დარღვევის გამო კომპანიის მიმართ პასუხისმგებლობის დაკისრებას გულისხმობს“, ნათქვამია ორგანიზაციის განცხადებაში. სრულად... წყარო: emc.org.ge

თბილისი. ქალთა ფონდის ინფორმაციით, ფემინსტრიმი-ს ახალი სეზონი მალე განახლებული ფორმატით დაბრუნდება. „ვეძებთ ახალ ავტორებს, რომლებიც იმუშავებენ ვიდეობლოგების შექმნაზე. ვიდეობლოგების თემატიკა მნიშვნელოვნად უნდა იყოს დაკავშირებული ქალების შრომით უფლებებთან. შერჩეული 4 ავტორი 7 თვის განმავლობაში იმუშავებს 4 ვიდეობლოგის შექმნაზე. ანაზღაურება თითო ვიდეობლოგისთვის - 600 ლარი. დაინტერესებულმა კანდიდატებმა უნდა წარმოადგინონ ოთხივე ვიდეობლოგის კონცეფცია“. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) შეშფოთებას გამოხატავს საქართველოდან რუსეთში ადამიანების ექსტრადიციის მანკიერი და ადამიანის უფლებების საწინააღმდეგო პრაქტიკის გამო. „მოვუწოდებთ საქართველოს ხელისუფლებას, ექსტრადიციისა და ამდენად, არაადამიანური და სასტიკი მოპყრობის კიდევ ერთი მოსალოდნელი მსხვერპლის, ალექსანდრ ბანდიუკოვის საქმეზე ადამიანის ფუნდამენტური უფლებების დაცვისკენ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. კოალიცია „მედიის ადვოკატირებისთვის“ საქართველოს პარლამენტის თავმჯდომარეს ოფიციალური განმარტებისათვის მიმართავს. „9 თებერვალს ჩვენთვის ცნობილი გახდა რომ „მთავარი არხის“ წარმომადგენელს, მარიამ გეგუჩაძეს, უარი ეთქვა პარლამენტში შესვლაზე და შეეზღუდა ჟურნალისტური საქმიანობის უფლება. ჩვენი ინფორმაციით, პარლამენტის წარმომადგენელთა მხრიდან ზეპირი ფორმით უარის მიზეზად მარიამ გეგუჩაძის სამოქალაქო აქტივიზმი დასახელდა. მოვუწოდებთ საქართველოს პარლამენტის თავმჯდომარეს გააკეთოს საჯარო განმარტება შესაძლო დისკრიმინაციულ მოპყრობასთან დაკავშირებით და დაუყოვნებლივ შეუქმნას ჟურნალისტებს შესაბამისი სამუშაო გარემო პროფესიული მოვალეობის შესრულებისათვის“. სრულად... წყარო: gdi.ge

თბილისი. 15 თებერვლიდან GABP - საქართველოს სხეულზე ორიენტირებული ფსიქოთერაპიის ასოციაცია გოგონებსა და ქალებს სთავაზობს სხეულზე ორიენტირებული პრაქტიკის დისტანციურ სერვისს. პროექტის „პანდემიით გამოწვეული კრიზისული სიტუაციების დაძლევაში ხელშეწყობა ქალებისთვის” მიზანია კრიზისულ პერიოდში იმ ქალი პაციენტების მხარდაჭერა, რომლებსაც: - კოვიდ 19-ს დიაგნოზი ჰქონიათ; - ლბტ თემს მიეკუთვნებიან; - ძალადობის რისკის ქვეშ იმყოფებიან. სრულად... წყარო: ასოციაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) მიიჩნევს რომ რიონის ხეობაში ქვემო ნამახვანის ჰიდროელექტროსადგურზე მიმდინარე მოსამზადებელი სამუშაოები უკანონოა და არღვევს სანებართვო პირობებს. ორგანიზაცია მიმართავს ტექნიკური და სამშენებლო ზედამხედველობის სააგენტოს დაუყოვნებლივ შეაჩეროს ნებართვის გარეშე მიმდინარე მოსამზადებელი ტიპისა და მიწის სამუშაოები და შპს „ენკა რინიუებლზს“-ის მიმართ გამოიყენოს პასუხისმგებლობის შესაბამისი ზომა. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სტატიას: რელიგიური განათლების ფორმები და პრაქტიკები. „წინამდებარე სტატიის მიზანია რელიგიური განათლების პრაქტიკებისა და მოწესრიგების საუკეთესო გამოცდილებების შესწავლა სხვადასხვა ქვეყანაში, რადგან საქართველოში დღეს ამ თემაზე მომუშავე აქტორების წინაშე კრიტიკულად დგას საკითხი თუ როგორ უნდა მოწესრიგდეს ეს სფერო ისე, რომ სხვადასხვა ინტერესს შორის, მათ შორის, ბავშვთა უფლებების დაცვის, რელიგიური თვითმყოფადობის შენარჩუნებისა და დემოკრატიული კონტროლის ინტერესებს შორის ბალანსი სამართლიანად და გონივრულად მიიღწეს“. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის ინფორმაციით, თბილისის საქალაქო სასამართლომ ქ. თბილისის მუნიციპალიტეტის მერიასა და საჯარო რეესტრის ეროვნულ სააგენტოს მოქალაქისთვის 14 000 აშშ დოლარის ოდენობით მატერიალური ზიანის ანაზღაურება დაავალა. „სასამართლომ დაადგინა, რომ ზემოთხსენებული ადმინისტრაციული ორგანოების არამართლზომიერმა მოქმედებებმა დაარღვია მოქალაქის საკუთრების უფლება. კერძოდ, აღნიშნულმა პირმა 2005 წელს მიწის ნაკვეთზე საკუთრების უფლება დაირეგისტრირა. ამის მიუხედავად, სსიპ ქონების მართვის სააგენტომ 2011 წელს მიმართა საჯარო რეესტრის ეროვნულ სააგენტოს ამავე მიწის ნაკვეთის თვითმმართველი ერთეულის საკუთრებაში აღრიცხვის მოთხოვნით, რაც სააგენტომ საკითხის გამოკვლევისა და შესწავლის გარეშე დააკმაყოფილა“. მოქალაქემ სასაამრთლოში დავა 2011 წელს დაიწყო. დღემდე პირის ინტერესებს საია იცავდა. სრულად... წყარო: gyla.ge

თბილისი. ომბუდსმენის აპარატმა მოკვლევა დაიწყო სოციალურ ქსელში გავრცელებულ შესაძლო დანაშაულებრივ ფაქტთან დაკავშირებით. „კერძოდ, 2021 წლის 8 თებერვალს სოციალურ ქსელში გავრცელდა ვიდეო მასალა, სადაც ასახულია არასრულწლოვანი გოგოს ნიშნობა. საქმესთან დაკავშირებით სახალხო დამცველის რწმუნებულებმა მოიპოვეს დამატებითი ინფორმაცია, რის შესახებაც დაუყოვნებლივ მოხდა სამართლდამცავი უწყების ინფორმირება. სამწუხაროდ, საქართველოში კვლავ ხშირია ადრეულ ასაკში და ბავშვთა ქორწინება, ასევე, ნიშნობის მანკიერი პრაქტიკა. საქართველოს სახალხო დამცველის შესწავლილი საქმეები მიუთითებს, რომ აღნიშნულ შემთხვევებს უმეტესად იძულებითი ქორწინების ფორმა აქვს და თავისუფლების უკანანო აღკვეთის ან მშობელთა შორის გარიგების შედეგია. სახელწიფოს მიერ ამ მიმართულებით, მათ შორის, პრევენციის მიზნით გადადგმული ნაბიჯები, სათანადოდ არ პასუხობს ქვეყანაში არსებულ გამოწვევებს“, ნათქვამია განცხადებაში. სრულად... წყარო: ombudsman.ge

კონსულტაციისა და ტრენინგის ცენტრის (CTC) ინიციატივით შექმნილი სოციალური ინოვაციების პლატფორმა გთავაზობთ შესაძლებლობებს, საგანმანათლებლო რესურსებს თქვენი იდეა ფიჩინგისთვის მოამზადოთ.  რა არის და როგორ გავაკეთოთ ფიჩინგი? ვიდეო რესურსი... ვიდეო ინტერვიუ ფიჩინგის თემაზე ნინო ბიგვავასთან... წყარო: სოციალური ინივაციების პლატფორმის გვერდი სოციალურ ქსელში

თბილისი. IDFI–ის ცნობით, ადამიანის უფლებათა ევროპულმა სასამართლომ 2021 წლის 21 იანვრის მნიშვნელოვანი გადაწყვეტილებით კიდევ ერთხელ დაადასტურა, რომ ჟურნალისტური საქმიანობის განხორციელებისას საჯარო ინტერესის შემცველ ინფორმაციაზე ხელმისაწვდომობის შეზღუდვა გამოხატვის თავისუფლებას არღვევს. „საქმე შეეხებოდა უკრაინის ყოფილი პრეზიდენტის - ვიქტორ იანუკოვიჩის მიერ სახელმწიფო ქონების შეძენასთან დაკავშირებული ინფორმაციის უკრაინელი ჟურნალისტისათვის გაცემას. დავის საგანს ასევე წარმოადგენდა საკონსტიტუციო სასამართლოს უარი, განმცხადებლისათვის მიეწოდებინა პარლამენტის წევრთა საკონსტიტუციო სარჩელის ასლი, რომლითაც 2012 წელს უკრაინაში მიღებული ენის პოლიტიკის შესახებ კანონი გასაჩივრდა. სასამართლოს უნდა ემსჯელა განმცხადებლისთვის ინფორმაციის მიწოდებაზე საჯარო ორგანოების უარი წარმოადგენდა თუ არა გამოხატვის თავისუფლებაში არამართლზომიერ ჩარევას. სასამართლომ ერთხმად დაადგინა გამოხატვის თავისუფლების დარღვევა. საქმეზე ორი ურთიერთსაწინააღმდეგო ინტერესის - პერსონალური ინფორმაციის დაცვასა და საჯარო ინფორმაციის ხელმისაწვდომობას შორის სამართლიანი ბალანსი ამ უკანასკნელის სასარგებლოდ დადგინდა“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. EMC-ის ცნობით, 7 თებერვალს სოფელ ნამოხვანში ნამახვანი ჰესის მშენებლობის წინააღმდეგ ადგილობრივი მოსახლეობის საპროტესტო აქცია გაიმართა. ადგილობრივები ქვემო ნამახვანის კაშხლის მშენებლობის უკანონო პროცესის შეჩერებას და საკითხის საჯარო და დემოკრატიულ განხილვას ითხოვდნენ. ადამიანის უფლებების სწავლებისა და მონიტორინგის ცენტრი (EMC) მხარს უჭერს რიონის ხეობის მოსახლეობის სამართლიან და მშვიდობიან პროტესტს და მოუწოდებს ხელისუფლებას უზრუნველყოს პროტესტის მონაწილეების შეკრების თავისუფლების დაცვა. სრულად... წყარო: emc.org.ge