თბილისი. საქართველოს ახალგაზრდა იურისტთა ასოციაციის (საია) ინფორმაციით, თბილისის სააპელაციო სასამართლოს გადაწყვეტილებით სსიპ აღსრულების ეროვნულ ბიუროს სააღსრულებო წარმოების გაჭიანურების გამო მოქალაქისთვის მიუღებელი შემოსავლის სახით ზიანის ანაზღაურება დაევალა. „საქმე შეეხებოდა თბილისის საქალაქო სასამართლოს 2012 წლის გადაწყვეტილების აღსრულებას, რომლის ფარგლებშიც სატრანსპორტო კომპანიას დაკისრებული ჰქონდა მოსარჩელის სასარგებლოდ მკურნალობის (პროთეზირების) ხარჯების ანაზღაურება. სასამართლომ მიიჩნია, რომ უკანონო იყო ბიუროს უმოქმედობა, რაც გამოიხატებოდა მოვალის საკუთრებაში არსებული უძრავი ქონების, მიწის ნაკვეთის აუქციონზე დაახლოებით 3 წლის დაგვიანებით რეალიზაციაში. თბილისის სააპელაციო სასამართლოს გადაწყვეტილება შესულია კანონიერ ძალაში. მოსარჩელის ინტერესებს ორივე დავის ფარგლებში საია იცავდა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ორგანიზაციამ „პარტნიორობა ადამიანის უფლებებისთვის“ (PHR) 2021 წლის 8 თებერვალს, თბილისის საქალაქო სასამართლოს შუამდგომლობით მიმართა. ორგანიზაციამ მოითხოვა, სასამართლოს განათლების სამინისტროსთვის ერთიანი გეგმის შემუშავება დაევალებინა. „გეგმის მიზანი იყო პანდემიის პირობებში ყველა ბავშვის და, განსაკუთრებით, შეზღუდული შესაძლებლობის მქონე ბავშვების (სპეციალური საგანმანათლებლო საჭიროების მქონე ბავშვების) სკოლებში უსაფრთხო დაბრუნების უზრუნველყოფა. სასამართლომ უარი გვითხრა უზრუნველყოფის დაკმაყოფილებაზე. ორგანიზაცია ბავშვების დაცვის სამართლებრივ ბრძოლას აგრძელებს სასამართლოს უარის განჩინების გასაჩივრებით ზემდგომ (სააპელაციო) ინსტანციაში და ძირითადი სარჩელის შეტანით საქალაქო სასამართლოში. ვინაიდან ბავშვთა უფლებების დაცვა არის მთელი საზოგადოების და არა მხოლოდ ერთი არასამთავრობოს მოვალეობა, საზოგადოებას ვთავაზობთ სასამართლოს განჩინებას სრულად და ორგანიზაციის საჩივრის ადაპტირებულ ვარიანტს“, ნათქვამია ორგანიზაციის ვებგვერდზე. სრულად... წყარო: phr.ge

თბილისი. საქართველოს ახალგაზრდა იურისტთა ასოციაციის შეფასებით, სამწუხაროდ, საქართველოს მთავრობამ ვერ უზრუნველყო შექმნილი პოლიტიკური კრიზისის განმუხტვა და მშვიდობიანი მოლაპარაკების გზით მიმდინარე პროცესების დეესკალაცია. „ხელისუფლებამ არ გაითვალისწინა მრავალმხრივი მოწოდებები. საპოლიციო ძალების მეშვეობით ოპოზიციური პარტიის თავმჯდომარის დაპატიმრებამ, კიდევ უფრო დაამძიმა არსებული ვითარება. მნიშვნელოვანია, რომ საქართველოს მთავრობამ გადადგას კონსტრუქციული ნაბიჯები ქვეყნის პოლიტიკური კრიზიდან გამოსაყვანად, ამასთანავე, არ დაუშვას შეკრება/მანიფესტაციის უფლებაში ჩარევა და მისცეს დემონსტრანტებს კონსტიტუციით გარანტირებული უფლებით სარგებლობის საშუალება“, ნათქვამია განცხადებაში.  სრულად... წყარო: gyla.ge

თბილისი. განვითარებისა და დემოკრატიის ცენტრი (CDD) ეხმაურება „ერთიანი ნაციონალური მოძრაობის“ (ენმ) ოფისში განხორციელებულ სპეცოპერაციასა და ენმ-ის თავმჯდომარის, ნიკანორ მელიას დაკავების ფაქტს. „მიგვაჩნია, რომ დემოკრატიულ სახელმწიფოში, რომლის ჩამოყალიბებისკენ საქართველო მიისწრაფის, კრიზისების გადალახვა მოითხოვს არაძალადობრივ პოლიტიკურ გარემოს და პოლიტიკურ აქტორებს შორის კონსენსუსის მიღწევას. ამ მხრივ, შემაშფოთებელია, რომ საქართველოს ხელისუფლების გადაწყვეტილებამ, დაეკავებინა ოპოზიციის ლიდერი, კიდევ უფრო გაამწვავა პოლიტიკურ აქტორებს შორის არსებული უთანხმოება და საფრთხე შეუქმნა მათ შორის შეთანხმების მიღწევის პროცესს. ვფიქრობთ, ამ ვითარებაში საქართველოს ხელისუფლებას შეეძლო და ვალდებული იყო გაეთვალისწინებინა, რომ ასეთი ნაბიჯი არსებული პოლიტიკური კრიზისის კიდევ უფრო გაღრმავებას გამოიწვევდა. პოლიტიკური სტაბილურობისა და ქვეყნის მშვიდობიანი განვითარების უზრუნველსაყოფად, მნიშვნელოვანია, მოიძებნოს სწრაფი, ეფექტიანი გამოსავალი და ფასილიტატორების მეშვეობით პროცესები დაუბრუნდეს დიალოგის ფორმატს, რათა არ მოხდეს საზოგადოების კიდევ უფრო მეტი პოლარიზაცია და საფრთხე არ შეექმნას ქვეყნის ევროპული და ევროატლანტიკური ინტეგრაციის პროცესს“, ნათქვამია ორგანიზაციის განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ნაციონალური მოძრაობის ოფისში დღეს განვითარებულ მოვლენებს ეხმიანება. „დღეს მომხდარი მოვლენები პოლიტიკური პროცესების და სახელმწიფო ინსტიტუტების საქმიანობის კრიზისში შეყვანის უმძიმესი გამოცდილებაა. სამწუხაროდ, ხელისუფლებამ დღეს სრულად თქვა უარი არსებული პოლიტიკური კრიზისის პოლიტიკური გზებით განმუხტვის სტრატეგიაზე და ერთადერთი ინსტრუმენტი, რომელსაც ის იყენებს რეპრესიული აპარატი და მექანიზმებია. სამწუხაროდ, არც ადგილობრივი და არც საერთაშორისო აქტორების არაერთი მოწოდება, ხელისუფლებას მიეღო ყველა ზომა პოლიტიკური პროცესების დეესკალაციისთვის და დიალოგისთვის, მმართველმა პოლიტიკურმა გუნდმა არ გაიზიარა“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. სახალხო დამცველი ნინო ლომჯარია შემაშფოთებლად მიიჩნევს ძალის გამოყენებით ოპოზიციური პარტიის ოფისში ერთიანი ნაციონალური მოძრაობის ლიდერის ნიკა მელიას დაპატიმრებას. „ომბუდსმენმა შეაფასა სასამართლოს განჩინება დაკავების შესახებ და განცხადებაში აღნიშნა, რომ ნიკა მელიას პატიმრობის შესახებ გადაწყვეტილება არ იყო დასაბუთებული და არ წარმოადგენდა აუცილებლობას“. სრულად... წყარო: ombudsman.ge

თბილისი. საქართველოს სამოქალაქო საზოგადოების ორგანიზაციები ერთობლივ განცხადებას ავრცელებენ ნიკა მელიას დაკავების შესახებ. „ვგმობთ საქართველოს მთავრობის ამ გადაწყვეტილებას, რომელიც კიდევ უფრო გაამწვავებს ქვეყანაში არსებულ პოლიტიკურ კრიზისს. საქართველოს მთავრობის ამ გადაწყვეტილებამ, საერთაშორისო პარტნიორების მხრიდან გასული დღეების განმავლობაში გამოთქმული გაფრთხილებებისა და მოწოდებების გათვალისწინებით, მნიშვნელოვნად დააზიანა ქვეყნის საერთაშორისო რეპუტაცია. შექმნილ სიტუაციაში მნიშვნელოვანია შევაჩეროთ საზოგადოების კიდევ უფრო მეტი პოლარიზაცია და არ დავუშვათ სამოქალაქო დაპირისპირება. მოვუწოდებთ ჩვენი ქვეყნის მეგობარი სახელმწიფოების წარმომადგენლებს და საერთაშორისო ორგანიზაციებს შესაბამისი რეაგირებისკენ. დღეს როგორც არასოდეს, საქართველოს სჭირდება ჩვენი დასავლელი პარტნიორების მხარდაჭერა, ვინაიდან, სიტუაციის უფრო მეტად ესკალაციის შემთხვევაში, ქვეყანამ შესაძლოა დამოუკიდებლობის პერიოდში მოპოვებული ყველა მიღწევა დაკარგოს“, ნათქვამია ერთობლივ განცხადებაში.  სრულად... წყარო: საერთაშორისო გამჭვირვალობა – საქართველო

თბილისი. ადამიანის უფლებათა ცენტრის ინფორმაციით, კორონავირუსის პანდემიით დაზარალებულ ადამიანებს, რომლებსაც სახელმწიფომ 2021 წლის იანვარში 200-ლარიანი კომპენსაცია ჩაურიცხა, კომერციულმა ბანკებმა დახმარების თანხა ვალში გაუქვითეს. საჩივრით ადამიანის უფლებათა ცენტრს თერთმეტმა ადამიანმა მიმართა.  ორგანიზაციამ საგანგებო მიმართვა გაავრცელა, სადაც აღნიშნული იყო, რომ ანტიკრიზისული გეგმის მთავარი მიზანი, დახმარებოდა კორონავირუსით დაზარალებულ მოქალაქეებს, ვერ შესრულდა და კომერციულ ბანკებს უმუშევრად დარჩენილი ადამიანებისთვის ჩამოჭრილი თანხის უკან დაბრუნებისკენ მოუწოდა. ადამიანის უფლებათა ცენტრის მიმართვის გავრცელებისთანავე საქმეში საქართველოს საბანკო ასოციაცია ჩაერთო, რის შემდეგაც თერთმეტივე ადამიანს ბანკებმა ჩამოჭრილი თანხა უკან დაუბრუნეს. სრულად... წყარო: humanrights.ge

თბილისი. პარტნიორობა ადამიანის უფლებებისთვის (PHR) აგრძელებს შეზღუდული შესაძლებლობის მქონე ქალთა უფლებების დარღვევის აღმოფხვრის მიზნით ადვოკატირებას, რომელიც პირდაპირ დაკავშირებულია COVID-19-ის პანდემიასთან. ორგანიზაციამ მიმართა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მოთხოვნით, ცვლილება შეიტანოს საქართველოს მთავრობის დადგენილებაში პირბადის ტარების წესის დამტკიცების შესახებ და იგი შესაბამისობაში მოიყვანოს სმენის არმქონე და სმენადაქვეითებული პირების სპეციალურ საჭიროებებთან. კერძოდ, უზრუნველყოს სმენის არმქონე და სმენადაქვეითებულ პირებთან სამედიცინო მომსახურების გაწევისას, სამედიცინო პერსონალის მიერ გამჭვირვალე პირბადის გამოყენება. სრულად... წყარო: phr.ge

თბილისი. 8 მარტს, 17:00 საათზე, ქალთა მოძრაობის და სამოქალაქო აქტივისტების მიერ დაანონსებულ საპროტესტო მსვლელობას „1000 მშობლის მარში“ რეგიონებიც უერთდებიან. საპროტესტო მარში გაიმართება შემდეგ მისამართებზე: გორი - თეატრის მიმდებარე სკვერი. ზუგდიდი - ცენტრალური ბულვარის ტერიტორია. ბათუმი - ვარდების სკვერი. თელავი - ცენტრალური მოედანი, თეატრის წინ. მარნეული - იუსტიციის სახლთან. ქობულეთი - 9 აპირილის სკვერი ქუთაისი - ცენტრალური მოედანი კოლონადებთან. რუსთავი - ზვიად გამსახურდიას სახელობის სკვერი, თეატრის წინ. ახალციხე - ცენტრალური პარკი. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია 2019 წლის 20-21 ივნისის მოვლენების შედეგად 30-მდე დაზარალებულის ინტერესებს იცავს როგორც საგამოძიებო უწყებაში, ისე - სასამართლოში. „დაზარალებულთა შორის არიან ჟურნალისტები და ოპერატორები, ასევე უშუალოდ აქციის მონაწილეები და აქციის მიმდებარე ტერიტორიაზე შემთხვევითი გამვლელები. ამ დროისთვის საიას დახმარებით 2 პირია ცნობილი დაზარალებულად გენერალური პროკურატურის მიერ და 6 ადამიანის სახელით თბილისის საქალაქო სასამართლოში წარდგენილია სარჩელები შინაგან საქმეთა სამინისტროს წინააღმდეგ. სასამართლოში დაზარალებულები სამინისტროსაგან ჯანმრთელობისათვის მიყენებული ზიანის გამო მატერიალური ან/და მორალური ზიანის ანაზღაურებას ითხოვენ“, ნათქვამია ორგანიზაციის ვებგვერდზე სოციალურ ქსელში. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) მოუწოდებს შინაგან საქმეთა სამინისტროს, შეწყვიტოს პარლამენტის მიმდებარე ტერიტორიაზე შეკრებილი აქტივისტების და პოლიტიკოსების მიმართ დაუსაბუთებელი იძულების ღონისძიებების გამოყენება და უზრუნველყოს შეკრებისა და მანიფესტაციის უფლებით სარგებლობა. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველოს“ იურისტის, რუსუდან მჭედლიშვილის დახმარებით, ფარმაცევტული კომპანიიდან უკანონოდ გათავისუფლებული თანამშრომელი 10 600 ლარის ოდენობის ფულად კომპენსაცია მიიღებს. სრულად... წყარო: rights.ge ადამიანის უფლებები

აჭარა. 8 მარტს, 17:00 საათზე, ქალთა მოძრაობისა და სამოქალაქო აქტივისტების მიერ დაანონსებულ საპროტესტო მსვლელობას - „1000 მშობლის მარში“ აჭარაში მოქმედი საზოგადოებრივი ორგანიზაციები და სამოქალაქო აქტივისტებიც შეუერთდებიან. „#მომისმინე #პროტესტის100დღე არის კამპანია, რომელიც უპირისპირდება სქესობრივ ძალადობას გოგოების და ქალების მიმართ. ჩვენ ვითხოვთ რეფორმებს სისტემური პრობლემების აღმოსაფხვრელად.  შეცვალეთ: სისხლის სამართლის კოდექსში გაუპატიურების მუხლი, რითიც თანხმობის არარსებობა გახდება ცენტრალური ამოსავალი; შექმენით: პროკურატურაში სპეციალიზირებული დეპარტამენტი, რომელიც სექსუალური ძალადობის საქმეებს ეფექტიანად გამოიძიებს; გახადეთ: ფორმალური განათლების ნაწილი, რითიც ბავშები შეძლებენ სქესობრივი ძალადობის ამოცნობასა და მისგან თავის დაცვას; გაზარდეთ: ფსიქოლოგების და სოცმუშაკების რაოდენობა; დადგეს: ნინის საქმის პროკურორის პასუხისმგებლობის საკითხი სამსახურეობრივი გულგრილობის გამო“, ნათქვამია კამპანიის აღწერაში. სრულად... წყარო: ორგანიზაციის გვერდი სოციალურ ქსელში

თბილისი. ქართული არასამთავრობო ორგანიზაციები ბელარუსში განახლებულ დაკავებებთან დაკავშირებით ერთობლივ განცხადებას ავრცელებენ. „ბელარუსის ხელისუფლებამ დაუყოვნებლივ უნდა შეწყვიტოს ადამიანის უფლებების დამცველების, ჟურნალისტებისა და არასამთავრობო ორგანიზაციების წინააღმდეგ კოორდინირებული შეტევა“, - ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველო“ „კვირას“ გადამღებ ჯგუფზე თავდასხმის ფაქტს ეხმიანება და მზადყოფნას გამოთქვამს სამართლებრივი დახმარება გაუწიოს დაზარალებულ პირებს. „საჯაროდ გავრცელებული ინფორმაციის თანახმად, მედიაჰოლდინგ „კვირას“ გადამღები ჯგუფის წევრებს რამდენიმე პირი თავს დაესხა და უკანონოდ ხელი შეუშალა პროფესიული საქმიანობის განხორციელებაში. (დეტალები...) „უფლებები საქართველო“ მოუწოდებს შინაგან საქმეთა სამინისტროს დროულად და ეფექტიანად გამოიძიოს მომხდარი ფაქტი“, ნათქვამია ორგანიზაციის ვებგვერდზე. სრულად... წყარო: rights.ge

თბილისი. 8 მარტს, 17:00 საათზე ქალთა მოძრაობისა და სამოქალაქო აქტივისტების ორგანიზებით გაიმართება „1000 მშობლის მარში“.  „#მომისმინე #პროტესტის100დღე არის კამპანია, რომელიც უპირისპირდება სქესობრივ ძალადობას გოგოების და ქალების მიმართ. ჩვენ ვითხოვთ რეფორმებს სისტემური პრობლემების აღმოსაფხვრელად. მოდი თბილისში, ვარდების მოედანზე, რათა კანცელარიის წინ სახელმწიფოს საჯაროდ გავაგებინოთ ჩვენი მოთხოვნები: შეცვალეთ: სისხლის სამართლის კოდექსში გაუპატიურების მუხლი, რითიც თანხმობის არარსებობა გახდება ცენტრალური ამოსავალი; შექმენით: პროკურატურაში სპეციალიზირებული დეპარტამენტი, რომელიც სექსუალური ძალადობის საქმეებს ეფექტიანად გამოიძიებს; გახადეთ: ფორმალური განათლების ნაწილი, რითიც ბავშები შეძლებენ სქესობრივი ძალადობის ამოცნობასა და მისგან თავის დაცვას; გაზარდეთ: ფსიქოლოგების და სოცმუშაკების რაოდენობა; დადგეს: ნინის საქმის პროკურორის პასუხისმგებლობის საკითხი სამსახურეობრივი გულგრილობის გამო“, ნათქვამია კამპანიის აღწერაში. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველოს ინფორმაციით, ევროკომისიამ 2021 წლის 8 თებერვლიდან ევროკავშირის წევრი ქვეყნების მიერ ქალთა მიმართ გენდერული ძალადობისა და ოჯახში ძალადობის აღმოსაფხვრელად გატარებული ზომების შესახებ ინფორმაციის მიღების მიზნით კონსულტაციები დაიწყო. „ევროკომისია მიზნად ისახავს კონსულტაციების პროცესში მაქსიმალურად ჩართოს გენდერული ძალადობისა და ოჯახში ძალადობის საკითხებით დაინტერესებული ყველა მხარე. შეხვედრების მიზანია, კომისიამ მიიღოს სათანადო ინფორმაცია, რათა შეძლოს გააუმჯობესოს ძალადობის წინააღმდეგ კოორდინირებული პრევენციისა და დაცვის საკითხებზე მუშაობა. კონსულტაციაში მონაწილეობა შეგიძლიათ მიიღოთ რეგისტრაციის გავლის შემდეგ ონლაინ კითხვარის შევსების გზით“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველო“ სახალხო დამცველთან პარტნიორობით მნიშვნელოვანი პროექტის განხორციელებას იწყებს. „უფლებები საქართველო“ ექსპერტ გოგა ხატიაშვილთან ერთად დახურულ სასამართლო სხდომებზე ძალადობის მსხვერპლი ქალების დაკითხვის პროცესის მონიტორინგს განახორციელებს. სრულად... წყარო: ორგანიზაციის გვერდი სოციალურ ქსელში

თბილისი. ჰაინრიხ ბიოლის ფონდის სამხრეთ კავკასიის რეგიონალური ბიურო აქვეყნებს ინა ჩარკვიანის სტატიას: „სახლში, საფრთხის პირისპირ“, რომელიც ძალადობის მსხვერპლი ქალების რეალურ ისტორიებს ეფუძნება. „ფემიციდს ვაკვირდებოდი, როგორც საზოგადოებრივ მოვლენას და კვლევაც ამ ინტერესით წამოვიწყე. გამოკითხული რესპონდენტები სახელმწიფო ზრუნვის, ტრეფიკინგის მსხვერპლთა, დაზარალებულთა დახმარების სააგენტოს ბენეფიციარები არიან. ვეცადე, მათი მძიმე გამოცდილების ტრაექტორიას გავყოლოდი. შედეგად, სამი მნიშვნელოვანი საჯარო ინსტიტუტის კართან მივედი – სასამართლო, ჯანდაცვა და ეკლესია. ისინი აღმოჩნდნენ ქალების ძალადობის გამოცდილებასთან ყველაზე ახლოს მდგომი ინსტიტუტები და, ზოგიერთ შემთხვევაში, განსაზღვრეს მათი გადარჩენა“. სრულად... წყარო: feminism-boell.org

თბილისი. საქართველოს სახალხო დამცველი მოუწოდებს საქართველოს პარლამენტს, არ გასცეს თანხმობა ნიკანორ მელიას მიმართ პატიმრობის გამოყენებასთან დაკავშირებით. ასევე, მოუწოდებს საქართველოს გენერალურ პროკურატურას გამოიყენოს მის ხელთ არსებული შესაძლებლობები და აღკვეთის ღონისძიებების გამოყენების გადაწყვეტილებას გადახედოს. „იმ ფონზე, როდესაც 20 ივნისის მოვლენების დროს, მრავალი ათეული მოქალაქისა და ჟურნალისტის მიმართ ძალის გადამეტების გამო მხოლოდ 3 რიგითი პოლიციელი მიეცა პასუხისგებაში (არასაპატიმრო აღკვეთის ღონისძიების გამოყენებით) - ოპოზიციური პოლიტიკური პარტიის თავმჯდომარის დაპატიმრება, საპროცესო საჭიროების სათანადოდ დასაბუთების გარეშე, ქართულ მართლმსაჯულებას დიდ დარტყმას მიაყენებს და მას არადემოკრატიულ ქვეყნებში არსებულ პრაქტიკას მიამსგავსებს“, ნათქვამია განცხადებაში. სრულად... წყარო: ombudsman.ge

თბილისი. საერთაშორისო გამჭვირვალობა - საქართველო ეხმაურება ნიკა მელიას წინააღმდეგ მიმდინარე სისხლის სამართლის საქმეს და ბოლო პერიოდში განვითარებულ მოვლენებს. „როგორც ცნობილია დღეს, 16 თებერვალს პარლამენტი მსჯელობს მელიასთვის სადეპუტატო იმუნიტეტის მოხსნაზე, რაც გაუხსნის გზას მისთვის აღკვეთის ღონისძიების სახით პატიმრობის გამოყენებას.  მიგვაჩნია, რომ ნიკა მელიას საქმის შეფასება არ უნდა მოხდეს გამოძიების მიმდინარეობისას მხოლოდ ერთი, კონკრეტული საპროცესო ღონისძიების ჭრილში და აუცილებელია, ეს საქმე განხილულ იქნას 20 ივნისის ანტისაოკუპაციო საპროტესტო აქციის პოლიციის მიერ დაშლის გარშემო მიმდინარე გამოძიების კონტექსტში. ყველაზე დიდი ოპოზიციური პარტიის თავმჯდომარის მიმართ ამგვარი შერჩევითი დევნა დიდ ზიანს მიაყენებს ქვეყნის დემოკრატიის ხარისხს და იწვევს პოლიტიკური გარემოს კიდევ უფრო მეტ პოლარიზებას. აქედან გამომდინარე, მოვუწოდებთ საქართველოს პარლამენტს, არ გასცეს თანხმობა ნიკა მელიას მიმართ პატიმრობის გამოყენების თაობაზე“, ნათქვამია ორგანიზაციის ვებგვერდზე. სრულად... წყარო: transparency.ge