თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს დოკუმენტს, რომელშიც წარმოდგენილია პოლიტიკური პარტიების პროგრამებისა და ხედვების პოლიტიკის ანალიზი თანასწორობის მიმართულებით. „უფრო ზუსტად, დოკუმენტი დეტალურად მიმოიხილავს და აანალიზებს პარტიების მიერ საარჩევნო პროგრამებში წარმოდგენილ დისკურსებს, ხედვებსა და სტრატეგიებს არადომინანტური რელიგიური და ეთნიკური ჯგუფების უფლებებისა და საჭიროებების, ასევე ქალთა და ლგბტქ ადამიანების უფლებების და კონფლიქტურ რეგიონებში ადამიანის უფლებების დაცვასთან დაკავშირებით. მთლიანობაში რჩება განცდა, რომ თანასწორობის პოლიტიკა პოლიტიკური პარტიების დიდი ნაწილისთვის პრიორიტეტულ მიმართულებას არ წარმოადგენს და მათი უმეტესობა ზედაპირულ და მეინსტრიმულ პარადიგმებსა და ხედვებს იყენებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. 23 ოქტომბერს, სამართლიანი არჩევნებისა და დემოკრატიის საერთაშორისო საზოგადოებამ (ISFED), საქართველოს დემოკრატიული ინიციატივამ (GDI) და ადამიანის უფლებათა ცენტრმა (HRC) გამართა კვლევის, „დემოკრატია და ადამიანის უფლებები პანდემიისა და საგანგებო მდგომარეობის პირობებში“ პრეზენტაცია. „GDI-სა და ISFED-ის მიერ მოწვეული მკვლევართა ჯგუფი ოთხი თვის განმავლობაში იკვლევდა, როგორც სამართლებრივ ბაზას და საერთაშორისო სტანდარტებს, ასევე საქართველოს მთავრობის მიერ ახალ კორონავირუსთან (COVID-19) დაკავშირებით გატარებულ ღონისძიებებს. HRC სამართლებრივი დახმარებას უწევს საქართველოს მთავრობის მიერ მიღებული ღონისძიებებით დაზარალებულ პირებს. პროექტი ხორციელდება ფონდი ღია საზოგადოება- საქართველოს ფინანსური მხარდაჭერით. კვლევის მიზანი იყო, ერთი მხრივ საკანონმდებლო ბაზის კრიტიკული გაანალიზება და შესაბამისი რეკომენდაციების შემუშავება არსებულ ხარვეზებთან დაკავშირებით, ხოლო მეორე მხრივ საქართველოს მთავრობის მიერ 2020 წლის განმავლობაში მიღებული რეგულაციების კონსტიტუციურობის შეფასება“, ნათქვამია განცხადებაში. სრულად... წყარო: gdi.ge

თბილისი. პარტნიორობა ადამიანის უფლებების ინფორმაციით, სასამართლომ ბავშვების მიერ შეტანილი სარჩელი არ მიიღო. „საუბარია იმაზე, რომ 7, 11 და 17 წლის მოზარდებმა, 2020 წლის 6 ოქტომბერს, დამოუკიდებლად მიმართეს სასამართლოს საკუთარი უფლებების დაცვის მოთხოვნით. სარჩელი ერთ-ერთი სახელმწიფო უწყების მხრიდან ბავშვების უფლებების დარღვევას ეხებოდა. თუმცა, თბილისის საქალაქო სასამართლომ ბავშვებს მიუთითა, რომ მათი სასარჩელო მოთხოვნა ბუნდოვანია და საჭიროა მიმართონ სასამართლოს სხვა კოლეგიას. „პარტნიორობა ადამიანის უფლებებისთვის“ მიიჩნევს, რომ სასამართლოს მხრიდან მსგავსი პრაქტიკის დანერგვა, შეიცავს შემდეგ საფრთხეებს: ბავშვებს შეეზღუდოთ სასამართლოზე ხელმისაწვდომობა და დაეკარგოთ სასამართლოს მიმართ ნდობა“, ნათქვამია ორგანიზაციის ვებგვერდზე. სრულად... წყარო: phr.ge

თბილისი. ადამიანის უფლებების სწავლებისა და მონიტორინგის ცენტრი (EMC) ზუგდიდში მომხდარ ყაჩაღობას ეხმიანება. ორგანიზაციისთვის მისასალმებელია ის ფაქტი, რომ სახელმწიფომ ამ ინციდენტში არჩევანი გააკეთა მძევლად აყვანილი მოქალაქეების სიცოცხლის სასარგებლოდ და არ გაზარდა მათი უსაფრთხოების ხელყოფის რისკები, დამნაშავის დაკავების ინტერესით. EMC მოუწოდებს სახელმწიფოს თავდასხმის ფაქტზე გამოძიება აწარმოოს მაქსიმალურად ეფექტურად, გამჭვირვალედ და უზრუნველყოს საზოგადოების სათანადოდ ინფორმირება. სრულად... წყარო: emc.org.ge

ევროკავშირმა და გაეროს განვითარების პროგრამამ გამოაქვეყნეს დავების მოგვარების ალტერნატიული გზების მიმართ საზოგადოებრივი დამოკიდებულების კვლევა. იხილეთ კვლევის შედეგები ქვემოთ ან გადადით ბმულზე... წყარო: ევროკავშირის გვერდი სოციალურ ქსელში

თბილისი. პარტნიორობა ადამიანის უფლებებისთვის ინფორმაციით, სახელმწიფო ინსპექტორმა, 2020 წლის 15 სექტემბერს სახელმწიფო უწყებაში დასაქმებული სოციალური მუშაკის მხრიდან პერსონალური მონაცემების გასაჯაროება დაადგინა და მას 1000 ლარიანი ჯარიმა შეუფარდა. „საქმე ეხებოდა სოციალური მუშაკის მიერ 12 აგვისტოს სახელმწიფო ზრუნვაში მყოფი ბავშვის შესახებ სენსიტიური, პერსონალური ხასიათის ინფორმაციის გამოქვეყნებას, რაზეც, ორგანიზაციამ „პარტნიორობა ადამიანის უფლებებისთვის“ რეაგირებისათვის სახელმწიფო ინსპექტორს მიმართა“, ნათქვამა ორგანიზაციის ვებგვერდზე. სრულად... წყარო: phr.ge

თბილისი. საერთაშორისო გამჭვირვალობა - საქართველო ეხმაურება 21 ოქტომბერს, TV Pirveli • ტელეკომპანია პირველის დამფუძნებლის მამის, ავთანდილ წერეთლის მიმართ ფიზიკური ანგარიშსწორების მუქარის ფაქტს, რომელიც, წერეთელის განცხადებით, სწორედ ტვ პირველის კრიტიკული სარედაქციო პოლიტიკით იყო განპირობებული. „სოციალურ მედიაში და საინფორმაციო საშუალებებში გავრცელებული ინფორმაციის მიხედვით და თავად ავთანდილ წერეთლის განცხადებით, მას სპორტული აღნაგობის ორი პირი დახვდა ღია საჯარო სივრცეში და სიცოცხლის მოსპობით დაემუქრა, თუ მისი შვილის კუთვნილი ტელეარხი სარედაქციო პოლიტიკას არ შეცვლდა. მოვუწოდებთ სამართალდამცავ ორგანოებს სასწრაფოდ მოახდინონ რეაგირება ამ ფაქტზე, უზრუნველყონ საქმის დროული და ეფექტური გამოძიება და საზოგადოებისათვის შედეგების გაცნობა“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ (საია) 19 და 20 ოქტომბერს ევროპის საბჭოს მინისტრთა კომიტეტს წერილობითი მოსაზრებები წარუდგინა, რომელშიც ადამიანის უფლებათა ევროპული სასამართლოს მიერ საქართველოს წინააღმდეგ მიღებული რამდენიმე გადაწყვეტილების და განჩინების აღსრულების მდგომარეობაა შეფასებული. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თეონა ფირანიშვილის სტატიას: პოზიტიური მექანიზმები უმცირესობების პოლიტიკური მონაწილეობის მხარდასაჭერად – საერთაშორისო გამოცდილების მიმოხილვა. „ამ დოკუმენტის მიზანი არ არის, მიმოიხილოს ადამიანის უფლებათა საერთაშორისო დოკუმენტებში განსაზღვრული უნივერსალური პრინციპები და უფლებები. წარმოდგენილი კვლევა შეეცდება, წარმოაჩინოს, თუ რა პრაქტიკა და პოზიტიური მექანიზმებია დანერგილი სხვადასხვა ქვეყანაში უმცირესობების პოლიტიკური მონაწილეობის წასახალისებლად. აღნიშნული პოზიტიური მექანიზმები მიმოხილულია იმ დათქმით, რომ თითოეულ ქვეყანას თავისი პოლიტიკური და ისტორიული კონტექსტი აქვს და, შესაბამისად, სხვადასხვა მექანიზმის გამოყენების საჭიროება უდგას. ეს მიმოხილვა მიზნად ისახავს, იყოს დამხმარე სახელმძღვანელო პოლიტიკური გადაწყვეტილების მიმღები პირებისათვის, პოლიტიკური პარტიებისა და სხვა სამოქალაქო აქტორებისათვის მონაწილეობის მექანიზმებზე მსჯელობის პროცესში, რასაც, ცხადია, თან უნდა ახლდეს საქართველოში არსებული კონტექსტის გაანალიზება და რეალობის შეფასება“., ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საზოგადოებრივი ორგანიზაციები ქვეყანაში უკიდურესად გართულებულ ეპიდემიოლოგიურ ვითარებას ეხმაურებიან. ორგანიზაციები მომცემულ სიტუაციას აფასებენ და სახელმწიფოს მოუწოდებენ მაქსიმალურად გამჭვირვალედ მიიღოს კოვიდ 19-ის დაძლევასთან დაკავშირებული გადაწყვეტილებები. სსო-ები თვლიან, რომ აუცილებელია მოსახლეობას მიეწოდოს ინფორმაცია სიტუაციის სხვადასხვა სცენარით განვითარების შემთხვევაში, რა გეგმები აქვს სახელმწიფოს. „გვსურს, გამოვხატოთ ჩვენი გულისტკივილი საქართველოში „კოვიდ-19”-ით ინფიცირებულებისა და გარდაცვლილების რაოდენობის მნიშვნელოვან ზრდასთან დაკავშირებით. ინფიცირებულების რიცხვის ზრდასთან ერთად, როგორც ჩანს, სახელმწიფოს სულ უფრო მეტად უჭირს კრიზისთან გამკლავება“. სრულად... წყარო: transparency.ge

თბილისი. 17-18 ოქტომბერს, სოლიდარობის პლატფორმის მორიგი შეხვედრა გაიმართა. „ღონისძიების ფარგლებში მიმდინარე დისკუსიები ეხებოდა საქართველოს საპარლამენტო არჩევნებსა და რეგიონში მშვიდობის მნიშვნელობას. შეხვედრების პირველ დღეს პოლიტიკოსებმა: ელენე ხოშტარიამ, დიმიტრი ცქიტიშვილმა და გრიგოლ გეგელიამ პლატფორმის წევრებს გაუზიარეს საკუთარი შეხედულებები საქართველოში პოლიტიკური პარტიების იდეოლოგიების, სტრატეგიებისა და დღის წესრიგის ორმირების შესახებ. ასევე, ისაუბრეს პოლიტიკური პარტიების განვითარების და ნდობის დინამიკაზე. შემდეგ პანელზე, მოხსენებები წაიკითხეს ზაურ ხალილოვმა და ბელა ოსიპოვამ. ორივე მომხსენებელმა ისაუბრა საკუთარ დაკვირვებებზე, რა შეიცვალა ბოლო 30 წლის განმავლობაში არჩევნების და ეთნიკური უმცირესობების პოლიტიკური მონაწილეობის პროცესებში“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. 20 ოქტომბერის, ინფორმაციის თავისუფლების განვითარების ინსტიტუტმა (IDFI), ევროკავშირის მხარდაჭერით, პროექტის - „კოვიდ-19-თან დაკავშირებული სახელმწიფო ხარჯების და ადამიანის უფლებების მდგომარეობის მონიტორინგი“ პრეზენტაცია გამართა. „ღონისძიების მიზანი მონაწილეებისთვის პროექტის მთავარი აქტივობების, მიზნების და ახალი ინიციატივის მონიტორინგის მეთოდოლოგიის გაცნობა იყო. ღონისძიების მონაწილეებს მისასალმებელი სიტყვით მიმართეს ინფორმაციის თავისუფლების განვითარების ინსტიტუტის (IDFI) პროექტების მენეჯერმა - ლევან ავალიშვილმა და საქართველოში ევროკავშირის დელეგაციის წარმომადგენელმა და სამოქალაქო საზოგადოების პროგრამის ოფიცერმა - დომინიკა სკუბიდამ“. სრულად... წყარო: idfi.ge

თბილისი. „უფლებები საქართველოს“ იურისტებმა დღეს, 16 ოქტომბერს, შესაბამისი განცხადებით მიმართეს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს და მოითხოვეს პროფესორი ტომას კრუსმანის საკარანტინო სივრციდან დაუყოვნებლივ გათავისუფლება. „მიუხედავად იმისა, რომ თბილისის საერთაშორისო აეროპორტში კრუსმანმა წარადგინა ბოლო 72 საათის განმავლობაში ჩატარებული PCR ტესტირების შედეგი, რომლითაც დასტურდებოდა, რომ პროფესორი კრუსმანი იყო სრულად ჯანმრთელი, სასაზღვრო პოლიციამ ტესტირების შედეგი ვადის დარღვევით წარმოდგენილად მიიჩნია. გარდა ამისა, მას არ მიეცა საშუალება, აეროპორტში, საკუთარი ხარჯებით ჩაეტარებინა განმეორებითი ტესტირება. პროფესორი კრუსმანისათვის არავის განუმარტებია მისთვის გასაგებ ენაზე რატომ არ იქნა მის მიერ წარმოდგენილი PCR ტესტირების შედეგი მიჩნეული რელევანტურად, მოაწერინეს ხელი დოკუმენტზე, რომელიც ასევე არ იყო მისთვის გასაგებ ენაზე ნათარგმნი და ისე გადაიყვანეს საკარანტინო სივრცეში, ოფიციალური განმარტება მას არ მიუღია“. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ორგანიზებით, გაიმართა სამუშაო შეხვედრა ჟურნალისტებთან თემაზე: „ფსიქოსოციალური და ინტელექტუალური ნიშნით შშმ პირების უფლებრივი მდგომარეობა საქართველოში“. „ღონისძიების ფარგლებში, მონაწილეებმა განიხილეს ის საკითხები, რომელთა გადაწყვეტაც ქვეყანაში პრიორიტეტულად უნდა მიიჩნეოდეს. დისკუსია შედგა თემებზე: შშმ პირთა ინსტიტუციონალიზაციის პრაქტიკა, ქმედუნარიანობის რეფორმის განხორციელების ბარიერები, ასევე, ის ზოგადი გამოწვევები, რომელთა წინაშეც შშმ პირები ყოველდღიურად დგანან“. სრულად... წყარო: emc.org.ge

თბილისი. რა გამოწვევების წინაშე აღმოჩნდნენ უცხო ქვეყნის მოქალაქეები კორონავირუსის გავრცელების შემდეგ ევროპასა და საქართველოში, და რამდენად ეფექტიანად უმკლავდებიან ქვეყნები პანდემიით გამოწვეულ პრობლემებს - ამის შესახებ, დღეს, სამოქალაქო საზოგადოების წარმომადგენელებმა ონლაინ შეხვედრაზე იმსჯელეს, რომელიც „უფლებები საქართველოს“ და მიგრაციის საერთაშორისო ორგანიზაციის IOM Georgia ორგანიზებით გაიმართა. სრულად... წყარო: ორგანიზაციის გვერდი სოციალურ ქსელში ჯანდაცვა

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) აქვეყნებს დოკუმენტს: ადგილობრივი თვითმმართველობის ორგანოებისა და საჯარო მოხელეების უფლება-მოვალეობები წინასაარჩევნო კამპანიის პერიოდში - 2020. სრულად... წყარო: isfed.ge

თბილისი. საიას განცხადებით, 6 ივლისს, თორნიკე მერებაშვილი გორის მუნიციპალიტეტის სოფელ ხელთუბანში გამავალ საავტომობილო გზაზე მრავლობითი დაზიანებებით იპოვნეს. მიღებული დაზიანებების შედეგად იგი საავადმყოფოში მიყვანამდე გარდაიცვალა. „მომხდარ ფაქტზე გამოძიება იმავე დღეს დაიწყო, თუმცა საქმე ამ დრომდე გაუხსნელია. პროკურატურის ვერსიით, გზაზე მიმავალ თორნიკე მერებაშვილს ავტომანქანამ შემთხვევით გადაურა. შესაბამისად, მძღოლს ტრანსპორტის მოძრაობის უსაფრთხოების ან ექსპლუატაციის წესის დარღვევის საფუძვლით წარედგინა ბრალი. საია მიიჩნევს, რომ პროკურატურის მიერ ამ დრომდე განხორციელებული ქმედებები არ არის საკმარისი სრულყოფილი და ობიექტური გამოძიების სტანდარტების დასაკმაყოფილებლად. საია მოუწოდებს პროკურატურას, ჩაატაროს ეფექტიანი, ობიექტური და მიუკერძოებელი გამოძიება და სრულყოფილად დაადგინოს თორნიკე მერებაშვილის გარდაცვალების გამომწვევი მიზეზები“. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება მედიაში გასულ ინფორმაციას, დეკანოზ გიორგი მამალაძის ჯანმრთელობის მდგომარეობისა და დაგეგმილი სამედიცინო კვლევების შესახებ. „EMC - მ, როგორც მამალაძის ინტერესების დამცველმა ორგანიზაციამ მაისი-სექტემბრის პერიოდში არაერთხელ მიმართა სასჯელაღსრულებას დაწესებულებას და ითხოვა გიორგი მამალაძისთვის, მისი მძიმე ჯანმრთელობის მდგომარეობიდან გამომდინარე, საჭირო კვლევების ჩატარებას და შემდგომი მკურნალობის დაგეგმვას. თუმცა დაწესებულება მხოლოდ სექტემბერში დაეთანხმა ჩვენს მოთხოვნას. შესაბამისად, გიორგი მამალაძის ჯანმრთელობის მდგომარეობის სრული გამოკვლევა სამოქალაქო პროფილის კლინიკაში 15 ოქტომბერს იგეგმება და განისაზღვრება დეკანოზის მკურნალობის ტაქტიკაც“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „უფლებები საქართველო“კარტოგრაფების საქმეში ჩაერთო და ექსპერტ-კარტოგრაფის ნატალია ილიჩოვას ინტერესებს დაიცავს, რომელსაც საქართველო-აზერბაიჯანის საზღვრის დელიმიტაცია-დემარკაციის კომისიის საექსპერტო ჯგუფის ხელმძღვანელთან, ივერი მელაშვილთან ერთად, ბრალი 2005-2007 წლებში მეზობელი ქვეყნისათვის საქართველოს ტერიტორიის ნაწილის გადაცემისკენ მიმართული ქმედების ჩადენაში ედება. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი გთავაზობთ ნაწყვეტს გამოცემიდან - „რელიგია, პოლიტიკა და სოციალური კონტექსტები - კვლევების, ანგარიშებისა და სტატიების კრებული“. „ანგარიშის ამ თავის მიზანია შეაჯამოს რელიგიის თავისუფლების დაცვის კუთხით არსებული მდგომარეობა 2017-2019 წლებში, როგორი იყო სახელმწიფოს პოლიტიკა და პრაქტიკა რელიგიური ნიშნით თანასწორობის და რელიგიის თავისუფლების დაცვის, ასევე, სეკულარული სახელმწიფოს პრინციპის შენარჩუნების თვალსაზრისით“. სრულად... წყარო: emc.org.ge

თბილისი. ომბუდსმენის აპარატის ორგანიზებით გაიმართა ონლაინ შეხვედრა თემაზე: „უფლებადამცველები და მათ წინაშე არსებული გამოწვევები“. „ღონისძიებაში მონაწილეობა მიიღეს სახალხო დამცველმა ნინო ლომჯარიამ, გენერალური პროკურორის მოადგილემ ნათია მერებაშვილმა, შინაგან საქმეთა მინისტრის მოადგილემ ნინო ცაციაშვილმა, „თბილისის ადამიანის უფლებათა სახლის“ გამგეობის თავმჯდომარემ ბაია პატარაიამ, ასევე, სახელმწიფო სტრუქტურებისა და არასამთავრობო ორგანიზაციების წარმომადგენლებმა. არასამთავრობო ორგანიზაციების წარმომადგენლებმა ადამიანის უფლებების თვალსაზრისით საზოგადოების ცნობიერების ამაღლების საჭიროებას და ბოლო წლებში უფლებადამცველთა წინააღმდეგ დანაშაულებრივი ქმედებებისა თუ მადისკრედიტირებელი კამპანიების სამწუხარო ტენდენციას გაუსვეს ხაზი და ამ მიმართულებით სახელმწიფოს ვალდებულებები განიხილეს“. სრულად... წყარო: ombudsman.ge

თბილისი. სახალხო დამცველი მიესალმება შრომის კანონმდებლობაში შეტანილ ცვლილებებს და იმედოვნებს, რომ მათი ამოქმედება მნიშვნელოვნად შეუწყობს ხელს დასაქმებულთა შრომითი უფლებების დარღვევის პრევენციას. „2020 წლის 29 სექტემბერს მიღებულ იქნა რამდენიმე კანონი, რომელიც ახლებურად აწესრიგებს შრომის კანონმდებლობის მნიშვნელოვან საკითხებს. განსაკუთრებით უნდა აღინიშნოს სრული მანდატის მქონე შრომის ინსპექციის შექმნის საკითხი, რომელიც 2021 წლის 1 იანვრიდან უფლებამოსილი იქნება შრომის კანონმდებლობის დაცვას გაუწიოს ზედამხედველობა... სამწუხაროდ, გაუთვალისწინებელი დარჩა სახალხო დამცველის შეთავაზება, შრომის ინსპექციის სამსახურის მანდატი შემოფარგლულიყო დასაქმების ადგილზე თანასწორობის მხრივ ზოგადი პოლიტიკის შეფასებით, სავარაუდო დისკრიმინაციის ინდივიდუალური შემთხვევის აღმოჩენის შემთხვევებისთვის კი ფაქტის სახალხო დამცველთან რეფერირების მექანიზმი დანერგილიყო“, ნათქვამია ომბუდსმენის ვებგვერდზე. სრულად... წყარო: ombudsman.ge