თბილისი. საქართველოში მოქმედი საზოგადოებრივი ორგანიზაციები საქართველოს მთავრობასა და მის რელევანტურ უწყებებს, ასევე საერთაშორისო ორგანიზაციებსა და დიპლომატიურ კორპუსს თხოვნით მიმართავენ და მოუწოდებენ, რომ მათი მანდატის ქვეშ, მიიღონ ყველა სათანადო ზომა ოკუპირებულ აფხაზეთში დაკავებული ირაკლი ბებუას სიცოცხლის, უსაფრთხოებისა და უფლებების დაცვის მიზნით და ხელი შეუწყონ საქართველოს კონტროლირებად ტერიტორიაზე მისი გადმოყვანის პროცესს. სრულად... წყარო: emc.org.ge

იმერეთი. საქართველოს ახალგაზრდა იურისტთა ასოციაციის ქუთაისის ფილიალი იცავდა პირს, რომელსაც აკაკი წერეთლის სახელმწიფო უნივერსიტეტში ჩატარებული კონკურსის შედეგად აკადემიური თანამდებობის დაკავებაზე უარი ეთქვა. „ქუთაისის სააპელაციო სასამართლომ ჩატარებულ კონკურსთან დაკავშირებით დარღვევები დაადგინა და მოსარჩელის ნაწილში ბათილად ცნო სსიპ. აკ. წერეთლის სახელმწიფო უნივერსიტეტის აკადემიური საბჭოს დადგენილება. ასევე, გაუქმდა სააპელაციო კომისიის სხდომის ოქმი. უნივერსიტეტს დაევალა გადაწყვიტოს კონკურსის პირობებთან შესაბამისობის საკითხი და ხელახლა შეაფასოს საკონკურსო მასალები. სააპელაციო სასამართლოს გადაწყვეტილება შესულია კანონიერ ძალაში“. სრულად... წყარო: gyla.ge

თბილისი. საქართველოს საზოგადოებრივი ორგანიზაციები, 7 ოქტომბერს, საქართველოს გენერალური პროკურატურის მიერ დელიმიტაციისა და დემარკაციის სამთავრობო კომისიის ყოფილი წევრების ივერი მელაშვილი და ნატალია ილიჩოვას დაკავების ფაქტს ეხმაურებიან. „მიგვაჩნია, რომ გამოძიების დაწყების დრო, წინასაარჩევნო კონტექსტი, გამოძიების პროცესში შერჩევითი მიდგომის ნიშნები და მმართველი პარტიის ლიდერების უდანაშაულობის პრეზუმფციის დარღვევით გაკეთებული პოპულისტური განცხადებები აჩენს ეჭვს, რომ გამოძიება პოლიტიკურ მოტივაციებს ემსახურება და მიმართულია საქართველოს მოქალაქეებისთვის მცდარი წარმოდგენების შექმნისა და პოლიტიკური ოპონენტების დისკრედიტაციისაკენ“. სრულად... წყარო: transparency.ge

შიდა ქართლი. საქართველოს ახალგაზრდა იურისტთა ასოციაციის გორის ოფისი იცავდა 2017 წელს ადგილობრივი თვითმმართველობის თემისა და ქალაქის გაერთიანების შედეგად ახალციხის მუნიციპალიტეტის საკრებულოდან უკანონოდ განთავისუფლებულ 2 პირს. „ორივე მათგანი თვითმმართველობის რეორგანიზაციამდე წლების განმავლობაში მუშაობდა ახალციხის მუნიციპალიტეტის საკრებულოში. ისინი სამსახურიდან ისე გაათავისუფლეს, რომ მათი შტატები რეორგანიზაციის შედეგად არ იყო შემცირებული. საქართველოს უზენაესი სასამართლოს გადაწყვეტილებით, გაბათილდა სამსახურიდან გათავისუფლების შესახებ მიღებული ბრძანებები, ხოლო მოპასუხეს გათავისუფლებული თანამშრომლების ტოლფას თანამდებობაზე აღდგენა და განაცდური ხელფასის ანაზღაურება დაეკისრა“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია აქვეყნებს ორგანიზაციის საკონსტიტუციო სამართალწარმოების იურისტის ვასილ ჟიჟიაშვილის ბლოგპოსტს: უკვე მეორედ 4>4. მასალა აანალიზებს საქართველოს საკონსტიტუციო სასამართლოს გადაწყვეტილება ნიკანორ მელიას საქმეზე. ასევე, საქართველოს საკონსტიტუციო სასამართლოს 4 მოსამართლის - თეიმურაზ ტუღუშის, ირინე იმერლიშვილის, გიორგი კვერენჩხილაძის და თამაზ ცაბუტაშვილის განსხვავებული აზრი აღნიშნულ გადაწყვეტილებასთან დაკავშირებით. „სამწუხარო რეალობაა, პოლიტიკური მნიშვნელობის საქმეებზე საკონსტიტუციო სასამართლოს მოსამართლეთა აზრის იმგვარად იყოფა, როცა სამართლებრივი დასაბუთებისა და სიმყარის თვალსაზრისით სარჩელის დაკმაყოფილების მოწინააღმდეგე ოთხი მოსამართლის აზრი ნაკლებია სარჩელის დაკმაყოფილებაზე ოთხი მოსამართლის აზრზე, რა დროსაც საბოლოოდ სარჩელის დაკმაყოფილების მოწინააღმდეგე მოსამართლეთა გამარჯვებით სრულდება, რადგან სარჩელის დაკმაყოფილებას ხმათა უმრავლესობა სჭირდება“. სრულად... წყარო: gyla.ge

შიდა ქართლი. საქართველოს ახალგაზრდა იურისტთა ასოციაციის გორის ოფისი სამართლებრივ დახმარებას უწევდა ცხინვალიდან იძულებით გადაადგილებულ ოჯახს, რომელსაც სახელმწიფო საცხოვრებლით დაკმაყოფილებაზე უარს ეუბნებოდა. საიას ინფორმაციით, დევნილმა ოჯახმა დავა სამივე ინსტანციის სასამართლოში მოიგო და საბოლოოდ, საცხოვრებელი სახლი გადაეცა. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრის (EMC) ინფორმაციით, სახელმწიფო ინსპექტორის სამსახურმა „საზოგადოებრივი მაუწყებლის აჭარის ტელევიზიისა და რადიოს“ მხრიდან ადმინისტრაციული სამართალდარღვევის ფაქტი დაადგინა და მაუწყებელი 500 ლარით დააჯარიმა. „საქმე ეხება მაუწყებლის მხრიდან თანამშრომლების პერსონალური მონაცემების გასაჯაროების ფაქტს. ხაზგასასმელია, რომ საზოგადოებრივი მაუწყებლის აჭარის ტელევიზია დაჯარიმდა არა როგორც მაუწყებელი, არამედ როგორც დამსაქმებელი. დასაქმებულების ინტერესებს EMC იცავდა“. სრულად... წყარო: emc.org.ge

თბილისი. ომბუდსმენი და მასთან არსებული არსებული რელიგიათა და ეროვნულ უმცირესობათა საბჭოები განცხადებას ავრცელებენ. „მოვუწოდებთ საქართველოს ყველა მოქალაქეს - ვისთვისაც ძვირფასია ჩვენ ქვეყანაში და რეგიონში მშვიდობა და უსაფრთხოება, მაქსიმალურად შეიკავონ თავი ეთნო-რელიგიური ან სხვა ნიშნით სიძულვილის ენის გამოყენებისგან, მათ შორის სოციალური ქსელების მეშვეობით. თხოვნით მივმართავთ მედიის წარმომადგენლებს, განსაკუთრებული სიფრთხილით მოეკიდონ იმ ტიპის ინფორმაციის გავრცელებას, რამაც შეიძლება ოდნავ მაინც შეუწყოს ხელი ეთნოსებს შორის ურთიერთობაში დაძაბულობის შემოტანასა და გაღრმავებას. მოვუწოდებთ სახელმწიფო უწყებებს, აქტიურად ითანამშრომლონ შესაბამისი ეთნიკური ჯგუფების წარმომადგენლებთან, სათემო და რელიგიურ ლიდერებთან და ორგანიზაციებთან ჩვენ ქვეყანაში და რეგიონში ტოლერანტული გარემოს შენარჩუნებისა და განმტკიცებისთვის“, ნათქვამია განცხადებაში. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, დღეს გამართულ პრესკონფერენციაზე მარიანა ჩოლოიანის ადვოკატმა, გაგი მოსიაშვილმა საქმესთან დაკავშირებით კიდევ ერთხელ გაავრცელა არასწორი ფაქტები, რითაც საზოგადოების განზრახ შეცდომაში შეყვანას შეეცადა. „ადვოკატი ცდილობს საზოგადოება დაარწმუნოს, რომ ლუკა სირაძის თვითმკვლელობა ნარკოტიკული ნივთიერების ზემოქმედებამ გამოიწვია, რაც სიმართლეს არ შეესაბამება. აშკარაა, რომ მცდარი ფაქტების გავრცელებით, ადვოკატი გაგი მოსიაშვილი საზოგადოებაში ლუკა სირაძის და მისი ოჯახის მიმართ ნეგატიური განწყობის ფორმირებას და ამ გზით საკუთარი კლიენტის ინტერესების დაცვას ცდილობს. საია მიიჩნევს, რომ ადვოკატის მოქმედება ეწინააღმდეგება ადვოკატი ეთიკის ნორმებს. კლიენტის ინტერესების დასაცავად ადვოკატის მოქმედებები უნდა შეესაბამებოდეს კანონმდებლობას და ადვოკატთა პროფესიული ეთიკის კოდექსს“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) Covid 19-ის პენდემიის კონტექსტში, ადამიანის უფლებებთან და დემოკრატიასთან დაკავშირებით გამოვლენილ ყველაზე მწვავე პრობლემებს და მათთან მიმართებით ორგანიზაციის მიერ განხორციელებულ საქმიანობებს ანგარიშში მიმოიხილავს. სრულად... წყარო: emc.org.ge

იმერეთი. საქართველოს ახალგაზრდა იურისტთა ასოციაციის ქუთაისის ფილიალის დახმარებით, სამსახურებრივი მოვალეობების შესრულებისას დაზარალებულ პირს მიყენებული ზიანი აუნაზღაურდება. „„საქართველოს რკინიგზაში“ დასაქმებულმა პირმა საწარმოო ტრავმა 2014 წელს მიიღო. მიღებულმა ტრავმამ მარცხენა წვივის მესამედ დონეზე ამპუტაცია გამოიწვია. მიუხედავად ამისა, დამსაქმებელი ნებაყოფლობით არ თანხმდებოდა ზიანის ანაზღაურებას. დაზარალებული იძულებული გახდა საიას დახმარებით სასამართლოსათვის მიემართა“. სრულად... წყარო: gyla.ge

თბილისი. პარტნიორობა ადამიანის უფლებებისთვის აქვეყნებს ორგანიზაციის იურისტის ანა თავხელიძის ბლოგპოსტს: ბავშვების დაცვა ჩარჩოებს მიღმა. „ჩემმა კოლეგებმა იციან, რამდენად ფორმალობაა სისხლის სამართლის საქმეებზე მოწმე ბავშვის ადვოკატად ყოფნა, ფაქტობრივად არაფრის უფლება გაქვს. ამიტომ მინდა ჩემი გამოცდილების შესახებ მოგითხროთ. ერთ დღეს გადავწყვიტე ეს ფორმალობა დამერღვია და მოსამართლეს მივწერე მოსაზრება ბავშვების დაკითხვის პროცედურის შესახებ. შემდეგ არსებითი განხილვის სხდომაზე მივედი. როდესაც გაჟღერდა რომ შემდეგ სხდომაზე ბავშვები უნდა დაეკითხათ, დამსწრეთათვის განკუთვნილი ადგილიდან ავდექი, ტრიბუნასთან მივედი და ვთქვი, რომ მე ვარ ბავშვების ადვოკატი და მინდა პოზიცია დავაფიქსირო. ამას ბრალდებულის ადვოკატების შეძახილები მოჰყვა: „ეს ვინ არის, რა უფლება აქვს რომ ლაპარაკობს, სად წერია რომ მოწმის ადვოკატს შეუძლია ასე მოიქცეს და ა.შ.“  სინამდვილეში, სისხლის სამართლის კანონმდებლობაში არ გვაქვს ჩანაწერი როგორ უნდა მოიქცეს მოწმე/დაზარალებული ბავშვის ადვოკატი, როდესაც პოზიციის დაფიქსირება სურს, მაგალითად ბავშვის დაკითხვის პროცედურის შესახებ“. სრულად... წყარო: phr.ge

თბილისი. ქალთა საინფორმაციო ცენტრი აქვეყნებს იურისტ თამარ დეკანოსიძის ანალიტიკურ სტატიას: „გაუპატიურება, როგორც გენდერული ძალადობის ფორმა და მართლმსაჯულების დაბრკოლებები საქართველოსა და ყოფილი საბჭოთა კავშირის ქვეყნებში“. „ძირეულად მნიშვნელოვნია გაუპატიურების დეფინიციის შეცვლა თანხმობის ელემენტზე დაყრდნობით, ex officio სისხლისსამართლებრივი დევნის უზრუნველყოფა (სადაც რელევანტურია) და არსებული ზედმეტად ხისტი მტკიცებულებითი სტანდარტების შეცვლა. ამასთანავე, გაუპატიურებისთვის პასუხისმგებლობის უზრუნველყოფა მიუხედავად მსხვერპლისა და მოძალადის ურთიერთობის სტატუსისა. სექსუალური ძალადობისგან დაცვის ეფექტიანი მექანიზმების შექმნა მნიშვნელოვანი ნაბიჯია არსებითი და ტრანსფორმაციური თანასწორობის უზრუნველსაყოფად“. სრულად... წყარო: ქალთა საინფორმაციო ცენტრის გვერდი სოციალურ ქსელში

თბილისი. სახალხო დამცველი საოკუპაციო რეჟიმის მიერ საქართველოს მოქალაქის ირაკლი ბებუას ოკუპირებული აფხაზეთის ტერიტორიაზე უკანონო დაკავების ფაქტს ეხმიანება. „გავრცელებული ინფორმაციით, ირაკლი ბებუამ დე ფაქტო რესპუბლიკის დროშა დაწვა, თუმცა, ოკუპირებული აფხაზეთის დე ფაქტო ხელისუფლების სამართალდამცავი ორგანოები მას ასევე სხვისი ქონების განზრახ განადგურებას და საბრძოლო მასალის უკანონოდ ფლობას ედავება. ირაკლი ბებუას მიერ სავარაუდოდ განხორციელებული ქმედების ხასიათიდან გამომდინარე, მაღალია ალბათობა, რომ დე ფაქტო ხელისუფლებამ მის მიმართ ბრალი ხელოვნურად დაამძიმა“. სახალხო დამცველი, ნინო ლომჯარია მოუწოდეს საქართველოს ხელისუფლებას, საერთაშორისო ორგანიზაციების დახმარებით გააძლიეროს ძალისხმევა ირაკლი ბებუას უკანონო პატიმრობიდან გასათავისუფლებლად. სრულად... წყარო: ombudsman.ge

თბილისი. ფონდი Fundacja HumanDoc ის და მეგობრობის ხიდი ქართლოსის ორგანიზებით შინაგან საქმეთა სამინისტროს მოწმისა და დაზარალებულის კოორდინატორებს, პროექტის - „ოჯახში ძალადობის პრევენციის, მსხვერპლთა დაცვისა და ძალადობის თერაპიის პროგრამის გაძლიერება“ - ფარგლებში, ოჯახში ძალადობისა და არაძალადობრივი კომუნიკაციის თემაზე ტრენინგი გაიმართა.  „სწავლების მონაწილეებმა განიხილეს კოორდინატორის საქმიანობასთან დაკავშირებული მნიშვნელოვანი საკითხები: ძალადობის ფორმები და მისი დეფინიცია; გენდერული ძალადობა; ძალადობის წინააღმდეგ არსებული სამართლებრივი მექანიზმები; პერსონალური მონაცემების დამუშავება-დაცვა; კომუნიკაციის სტრატეგია და ტექნიკა; მსხვერპლებისთვის არსებული სერვისები და სხვა“.  სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება რუსეთის ფედერაციაში საქართველოდან ექსპტრადირებული იაროსლავ სუმბაევის მიმართ შესაძლო არასათანადო მოპყრობისა და წამების შესახებ მედიაში გავრცელებულ ინფორმაციას. „წერილში, რომელიც მედიამ გაავრცელა, სუმბაევი დეტალურად აღწერს იმ მძიმე და არაადამიანურ პირობებს, რომელშიც ყოფნა რუსეთის სასჯელაღსრულების დაწესებულებაში უწევს. EMC მიიჩნევს, რომ წერილში მითითებული გარემოებები, მართლაც ქმნის დასაბუთებულ ვარაუდს, რომ მის მიმართ საერთაშორისო სამართლით გარანტირებული არაერთი უფლება ირღვევა. უნდა აღინიშნოს, რომ ბოლო წლების განმავლობაში EMC-მ რუსეთში ექსტრადირებული არაერთი პირის საქმე შეისწავლა. ამ საქმეებში როგორც წესი, ბუნდოვანია ექსტრადირების საფუძვლები, რაც ქმნის ეჭვს, რომ საქართველოს ხელისუფლება, ამ საკითხში, ლოიალურია რუსეთის ფედერაციის მიმართ და არღვევს საერთაშორისო სტანდარტებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „საერთაშორისო გამჭვირვალობა - საქართველო“ მორიგი წარმატებული საქმის შესახებ ინფორმაციას გვიზიარებს. „საქართველოს ფოსტამ“ ქეთევან ჯიქია აპრილში გაათავისუფლა. ორგანიზაციის იურისტებმა თბილისის საქალაქო სასამართლოს სარჩელით მიმართეს, თუმცა საქმის განხილვამდე, „საქართველოს ფოსტამ“ ქეთევან ჯიქია აღადგინა თანამდებობაზე და 1 თვს განაცდური, 600 ლარიც აუნაზღაურა. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) 29 სექტემბერს ქალაქ მარნეულში სამოქალაქო აქტივისტებსა და ჟურნალისტებზე, ასევე ოპოზიციური პარტიის მხარდამჭერებზე თავდასხმის ფაქტების პირველად სამართლებრივ შეფასებას აქვეყნებს. ორგანიზაცია სახელმწიფოს მოუწოდებს უზრუნველყოს გამოვლენილი დანაშაულებრივი შემთხვევების დამოუკიდებელი, დროული და ეფექტიანი გამოძიება და მსგავსი ძალადობის ეფექტიანი პრევენცია. ამასთან, EMC მოუწოდებს პოლიტიკურ პარტიებს განუხრელად დაიცვან მშვიდობისა და დემოკრატიის პრინციპები და არ დაუშვან სოციალური კონფლიქტების შექმნა რეგიონებში. სრულად... წყარო: emc.org.ge

თბილისი. 23 სექტემბერს საქართველოს სახალხო დამცველის აპარატმა ადამიანის უფლებათა ეროვნული ინსტიტუტების ევროპული ქსელთან (ENNHRI) თანამშრომლობით ონლაინ ვებინარი გამართა თემაზე „შშმ პირთა უფლებების დაცვის მონიტორინგი ახალი კორონა ვირუსის პანდემიის პირობებში“. ღონისძიება მიეძღვნა პანდემიისადმი ერთ-ერთი ყველაზე მოწყვლადი ჯგუფის, შშმ პირთა განთავსების ადგილებში მონიტორინგის საუკეთესო პრაქტიკის გამოვლენასა და ამ მიმართულებით გამოცდილების გაზიარებას. სრულად... წყარო: ombudsman.ge

თბილისი. ადამიანის უფლებათა ცენტრმა წარმატებით დაასრულა კიდევ ერთი ადმინისტრაციული საქმის წარმოება, რომელიც პანდემიის გავრცელების პირობებში სახელმწიფოს მხრიდან უსამართლოდ დაჯარიმებულ მოქალაქეს შეეხებოდა. პირმა კომენდანტის საათი გადაუდებელი აუცილებლობის გამო დაარღვია, რაც მისი მცირეწლოვანი შვილის ჯანმრთელობის მდგომარეობას უკავშირდებოდა. ორგანიზაციის იურისტების მიერ გაწეული სამართლებრივი დახმარების შედეგად, მოქალაქე ვ.წ-ს გაუუქმდა 3000 ლარიანი საჯარიმო ქვითარი. სრულად... წყარო: www.humanrights.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) გმობს ჟურნალისტებზე განხორციელებულ ფიზიკურ ძალადობას და მოუწოდებს სამართალდამცავ ორგანოებს უმოკლეს ვადებში გამოიძიონ მარნეულში მომხდარი ძალადობის ფაქტები. სრულად... წყარო: isfed.ge

თბილისი. „მრავალეროვანი საქართველო“ 28 და 29 სექტემბერს, მარნეულსა და სადახლოში მომხდარ ინციდენტებთან და ძალადობის ფაქტებთან დაკავშირებით ღრმა შეშფოთებას გამოხატავს.  ორგანიზაციას დაუშვებლად მიაჩნია ჟურნალისტური საქმიანობისათვის ხელის შეშლა და მოუწოდებს შესაბამის სტრუქტურებს, დროულად, ობიექტურად და სრულყოფილად გამოიძიონ ძალადობრივი ინციდენტები, ასევე, სათანადო რეაგირება იქონიონ მათში მონაწილე, დამნაშავე პირების გამოსავლენად და კანონმდებლობის შესაბამისად პასუხისგებაში მისაცემად. სრულად... წყარო: ორგანიზაციის გვერდი სოციალურ ქსელში