თბილისი. საქართველოს ახალგაზრდა იურისტთა ასოციაცია (საია) მიიჩნევს, რომ თავდაცვის სამინისტროს ინიციატივა წინასაარჩევნოდ მოქალაქეთა მძიმე სოციალური პირობებით მანიპულაცია და ადმინისტრაციული რესურსის გამოყენებაა. „საქართველოს თავდაცვის სამინისტროს 2020 წლის 31 აგვისტოს განცხადებით, მოქალაქეებს „გიორგი აბრამიშვილის სახელობის საქართველოს თავდაცვის სამინისტროს სამხედრო ჰოსპიტლის“ მიმართ 2009 წლიდან სხვადასხვა მომსახურებისთვის დარიცხული დავალიანება ჩამოეწერებათ. ამ სარგებლით დაახლოებით ათასამდე მოქალაქე ისარგებლებს. ხელისუფლების ინიციატივა შეუმსუბუქოს მოქალაქებს ფინანსური წნეხი მისასალმებელია, თუმცა არჩევნების წინ ამ ნაბიჯის გადადგმა ამომრჩეველთა გულის მოგებაზე გათვლილი მანიპულაციის შთაბეჭდილებას ტოვებს." სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ია ერაძის პუბლიკაციას: სამთო-მოპოვებითი საქმიანობა პანდემიის დროს: ნეოლიბერალური წესრიგი და ჰიბრიდული სახელმწიფო. „შახტში არაფერი იცვლება“ - ასე სრულდება ტყიბულელი მეშახტეების 2020 წლის 13 მარტის მიმართვის ტექსტი, რომლითაც ისინი ჯანმრთელობისთვის საშიშ სამუშაო პირობებს აპროტესტებდნენ (პერტაია, 2020a). იმავე დღეს, საქართველოს პრემიერ-მინისტრმა ანტიკრიზისული ეკონომიკური სტიმულირების გეგმა წარუდგინა საქართველოს მოსახლეობას (საქართველოს მთავრობა, 2020). ქვეყანამ ხმალამოღებული ბრძოლა დაიწყო ვირუსის წინააღმდეგ, თუმცა ტყიბული არავის გახსენებია. 20 მარტს მეშახტეებმა გამოუვალი ფინანსური მდგომარეობის გამო სიცოცხლისთვის საშიშ პირობებში განაგრძეს მუშაობა - „შახტში ვბრუნდებით იმიტომ, რომ წინააღმდეგ შემთხვევაში დავკარგავთ იმ მცირე შემოსავალსაც კი, რომელსაც ჩვენი მძიმე შრომის ფასად მოვიპოვებთ. ჩვენი ოჯახები დარჩება მშიერი“. სრულად... წყარო: emc.org.ge

თბილისი. ადამიანის უფლებათა ცენტრმა სავარაუდოდ პოლიტიკურად მოტივირებული საქმეების სასამართლო პროცესებისა და საპროტესტო აქციების მონიტორინგის შუალედური ანგარიშები მოამზადა. „ამ დროისათვის ცენტრის დაკვირვების ქვეშ 20 სავარაუდოდ პოლიტიკურად მოტივირებული სასამართლო პროცესი და 19 საპროტესტო აქცია მოექცა. სასამართლო მონიტორინგის შედეგად გამოვლინდა, რომ ადამიანის უფლებათა ცენტრის დაკვირვების ქვეშ არსებულ საქმეებში რიგ შემთხვევებში არ იყო უზრუნველყოფილი სამართლიანი სასამართლოს უფლება. რაც შეეხება საპროტესტო აქციებსა, მათი უმეტესობა ატარებდა მშვიდობიან ხასიათს. თუმცა, რიგ შემთხვევებში, ადამიანის უფლებათა ცენტრის მონიტორთა მიერ იდენტიფიცირებულ შემთხვევათა შორის დაფიქსირდა არაპროპორციული ძალის მობილიზების, ასევე დაკავებისა და დაჯარიმების მუქარით დაშლის მოთხოვნებიც“. სრულად... წყარო: www.humanrights.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ჭიათურაში, შუქრუთში მდებარე მაღაროში მომხდარ უბედურ შემთხვევას, რომლის შედეგადაც 46 წლის მაღაროელი გარდაიცვალა და სახელმწიფოს უსაფრთხო შრომის უზრუნველყოფისკენ მოუწოდებს. „შემთხვევა მიმდინარე წლის 24 აგვისტოს ვაკე ტყე ოთხის მაღაროში მოხდა. გავრცელებული ინფორმაციით, სამუშაო პროცესის დროს მაღაროელს ტრაქტორმა გადაუარა. ჭიათურის მაღაროებში დასაქმებული ადამიანების შრომის პირობები წლების განმავლობაში მძიმე რჩება. დაბალი ანაზღაურების პარალელურად, დასაქმებულთა შრომითი უფლებები სისტემატიურად ირღვევა. შრომის უსაფრთხოების წესების დაუცველობის გამო, დასაქმებულები ყოველდღიურად საკუთარ სიცოცხლესა და ჯანმრთელობას რისკის ქვეშ აყენებენ“. სრულად... წყარო: emc.org.ge

თბილისი. საერთაშორისო გამჭვირვალობა - საქარველოს ინფორმაციით, ოთარ ჯაიანს, 20 წელზე მეტხანს არ აძლევდნენ მიწისა და სახლის დაკანონების უფლებას, თუმცა ორგანიზაციის იურისტის დახმარებით მისი პრობლემა მოგვარდა. სრულად... წყარო: ორგანიზაციის გვერდი სოციალურ ქსელში

თბილისი. სახალხო დამცველი ნინო ლომჯარია გარდაცვლილი პროგრამისტის თამარ ბაჩალიაშვილის ოჯახს და ადვოკატს შეხვდა. ომბუდსმენის განცხადებით, ის მზადაა ჩაერთოს საქმის შესწავლის პროცესში და ოჯახის ადვოკატთან ერთად გაეცნოს სისხლის სამართლის მასალებს, სახალხო დამცველი ასევე გეგმავს შეხვდეს გენერალურ პროკურორს ირაკლი შოთაძეს და პირადად მისგან მოისმინოს საქმესთან არსებულ კითხვებზე პასუხები. სრულად... წყარო: ombudsman.ge

თბილისი. საერთაშორისო გამჭვირვალობა - საქართველოს მოსაზრებით, ანტიკორუფციულ რეფორმაზე ახალი საკანონმდებლო ინიციატივის მხარდაჭერა მნიშვნელოვნად გაზრდის კორუფციასთან ბრძოლის ეფექტურობას. „საერთაშორისო პრაქტიკით დასტურდება, რომ დამოუკიდებელი ანტიკორუფციული სამსახური არის სისტემურ კორუფციასთან ბრძოლის ეფექტური მექანიზმი. აღნიშნული მოდელი წარმატებით არის დანერგილი არაერთ ევროპულ ქვეყანაში. შემოთავაზებული რეფორმა გულისხმობს ქვეყნის ანტიკორუფციული პოლიტიკის თვისებრივ გაუმჯობესებას; განსაკუთრებით მნიშვნელოვანია, რომ ის შესაძლებელს გახდის ე.წ. „ელიტური კორუფციის“ შემთხვევების რეალურ გამოძიებას და მათ პრევენციას“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. საქართველოს სახალხო დამცველმა აჭარის ტელევიზიაში მიმდინარე მოვლენებთან დაკავშირებით აზრისა და გამოხატვის თავისუფლების შესახებ გაეროს ახლად არჩეულ სპეციალურ მომხსენებელს ირენ ხანს და მედიის საკითხებზე ეუთოს წარმომადგენელს ჰარლემ დეზირს მიმართა. გაგზავნილ წერილებში, საქართველოს სახალხო დამცველი ინფორმაციას აწვდის აღნიშნული მანდატის მქონე პირებს ტელეკომპანიაში მიმდინარე მოვლენების შესწავლის შედეგად გამოვლენილ დარღვევებზე, რაც საფრთხეს უქმნის ქვეყანაში არსებულ მედია პლურალიზმსა და უარყოფითად აისახება გამოხატვის თავისუფლებაზე. სრულად... წყარო: ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება 2020 წლის ომბუდსმენის რეკომენდაციას, რომელშიც სახალხო დამცველი ადგენს, რომ საზოგადოებრივი მაუწყებლის აჭარის ტელევიზიისა და რადიოს თანამშრომლების - თეონა თურმანიძის, მალხაზ რეხვიაშვილის, სოფიო ჟღენტის და თეონა ხარაბაძის საქმეებზე დაირღვა მოქმედი საკანონმდებლო მოთხოვნები, ხოლო თეონა თურმანიძისა და თეონა ხარაბაძის მიმართ ადგილი ჰქონდა პირდაპირ დისკრიმინაციას განსხვავებული მოსაზრებისა და პროფესიული კავშირის წევრობის გამო. ორგანიზაცია რეკომენდაციის ტექსტს სასამართლოს მალევე გაუზიარებს და იმედოვნებს, რომ სახალხო დამცველის შეფასებები კიდევ უფრო მეტად გააძლიერებს მალხაზ რეხვიაშვილის, სოფიო ჟღენტისა და თეონა ხარაბაძის სამართლებრივი ინტერესებისა და უფლებების დაცვის პროცესს. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია (საია) იცავს თემურ ბერიძის ინტერესებს, რომელიც მაღალი თანამდებობის პირებს მის მიმართ განხორციელებულ უკანონო ქმედებებში ამხელს. „თემურ ბერიძის განმარტებით, მასზე მუქარა მას შემდეგ განხორციელდა, რაც მასთან დაკავშირებულმა კომპანიამ ტენდერი მოიგო (ხულოს მუნიციპალიტეტში გარე განათების ბოძების დამონტაჟება). აღნიშნულ ფაქტზე გამოძიება მოხელის ან მასთან გათანაბრებული პირის მიერ ძალადობით ან იარაღის გამოყენებით სამსახურეობრივი უფლებამოსილების გადამეტების მუხლით 2019 წლის აგვისტოში დაიწყო და დღემდე მიმდინარეობს. საქმეს აჭარის ავტონომიური რესპუბლიკის პროკურატურა იძიებს. საია მიიჩნევს, რომ სამსახურეობრივი უფლებამოსილების გადამეტების ფაქტზე მიმდინარე გამოძიება უსაფუძვლოდ ჭიანურდება, რაც აჩენს ეჭვებს, რომ აღნიშნული მიზნად ისახავს თანამდებობის პირებისათვის პასუხისმგებლობის თავიდან არიდებას. საია მოუწოდებს აჭარის ავტონომიური რესპუბლიკის პროკურატურას, დროულად ჩაატაროს ეფექტიანი, ობიექტური და მიუკერძოებელი გამოძიება თანამდებობის პირების ქმედებებში სავარაუდო დანაშაულის ნიშნების გამოკვეთისა და მათთვის პასუხისმგებლობის სათანადო ზომების დაკისრების მიზნით“. სრულად... წყარო: gyla.ge

ფსიქოლოგმა ჯანა ჯავახიშვილმა მოამზადა სახელმძღვანელო მედია პროფესიონალებისთვის - „მედია, ფსიქიკური ჯანმრთელობა და ადამიანის უფლებები“... სახელმძღვანელო მომზადებულია პროექტის - „ფსიქიკური აშლილობებისა და ფსიქო-სოციალური ნიშნით შეზღუდული შესაძლებლობების მქონე პირთა უფლებების მხარდაჭერა საქართველოში“ - ფარგლებში, რომელსაც ფონდი „გლობალური ინიციატივა ფსიიატრიაში - თბილისი“, პარტნიორებთან ერთად, ევროკავშირის ფინანსური მხარდაჭერით ახორციელებს.  იხილეთ სახელმძღვანელო... 

თბილისი. 2020 წლის 3 აგვისტოს საქართველოს სახალხო დამცველმა საქართველოს გენერალურ პროკურორს წინადადებით მიმართა, რათა არ მოხდეს უკრაინის რესპუბლიკის მოქალაქე ვადიმ ალტმანის რუსეთის ფედერაციაში ექსტრადიცია. „საქმის გარემოებების შესწავლის შედეგად გაირკვა, რომ ვადიმ ალტმანი რუსეთ-უკრაინის შეირაღებული კონფლიქტის დროს მონაწილეობას იღებდა რუსეთის ფედერაციის წინააღმდეგ განხორციელებულ სხვადასხვა აქტივობებში. წარმოდგენილი დოკუმენტაციის თანახმად, იგი არის „ომის, შეიარაღებული ძალების ინვალიდთა და საომარი მოქმედებების მონაწილეთა სრულიად უკრაინის ორგანიზაციის ოდესის საოლქო ორგანიზაციის“ წევრი. ასევე, მონაწილეობდა უკრაინულ მოხალისეთა ჯგუფების შემადგენლობაში და აქტიურ როლს ასრულებდა უკრაინის არმიის აღჭურვა-მომარაგებაში“, - მიიჩნევს სახალხო დამცველი. სრულად...  წყარო: ორგანიზაციის ვებგვერდი

თბილისის ადამიანის უფლებათა სახლი აქვეყნებს ადამიანის უფლებათა სახლის ფონდის განცხადებას, ბელარუსში მიმდინარე მოვლენებთან დაკავშირებით... „ადამიანის უფლებათა სახლის ფონდი მკაცრად გმობს ბელარუსის ხელისუფლების მიერ 9 აგვისტოს გამართული საპრეზიდენტო არჩევნებისას და მის შემდგომ პერიოდში ფართომასშტაბიანი და არაპროპორციული ძალის გამოყენებას. აუცილებელია დაუყოვნებლივ შეწყდეს მშვიდობიანი მომიტინგეების მიმართ ძალის გამოყენება და უზრუნველყოფილი იყოს ბელარუსელი ხალხის ფუნდამენტური უფლებების დაცვა. ”არჩევნების წინმდევი მოვლენები, გუშინდელი არჩევნები და ამ არჩევნების შემდგომ მშვიდობიანი მომიტინგეების მიმართ განხორციელებული ძალადობრივი ქმედებები იმის მაჩვენებელია, რომ ხელისუფლებას არ სურს უზრუნველყოს ბელარუსის მიერ ნაკისრი ადამიანის უფლებათა დაცვის საერთაშორისო ვალდებულებების შესრულება. ხელისუფლების მიერ განხორციელებული დევნა და ძალადობის შემთხვევები უფრო მეტად ცხადყოფს, რომ ბელარუსელი ხალხის ნება და მათი უფალებები სრულად უგულველყოფილია”,- აღნიშნულია განცხადებაში  სრულად...   წყარო: ორგანიზაციის ვებგვერდი

თბილისი. სახალხო დამცველმა ერთიანი ეროვნული გამოცდების ორგანიზების პროცესში რელიგიური საჭიროებების გათვალისწინებასთან დაკავშირებით საქართველოს განათლების, მეცნიერების, კულტურისა და სპორტის სამინისტროს წინადადებით მიმართა. სახალხო დამცველის აპარატმა საკითხი რელიგიის თავისუფლებისა და თანასწორობის უფლების ჭრილში შეისწავლა და დაადგინა რომ ერთიანი ეროვნული გამოცდების მარეგულირებელი კანონმდებლობა რეგისტრაციის პროცესში აბიტურიენტებს არ აძლევს შესაძლებლობას საკუთარი რელიგიური საჭიროებების შესახებ განაცხადონ. ასევე, არ არსებობს გამოცდების ორგანიზების პროცესში აღნიშნული მხედველობაში მიღების მექანიზმიც. სახალხო დამცველის შეფასებით, აბიტურიენტები, რომლებიც საკუთარი რელიგიური მრწამსიდან გამომდინარე იძულებულები იყვნენ უარი ეთქვათ კონკრეტულ დღეს გამოცდაში მონაწილეობაზე, არათანაბარ მდგომარეობაში იყვნენ იმ აბიტურიენტებთან მიმართებით, რომელთა რელიგიაც განსხვავებული შეხედულების არის მსგავს საკითხებზე. სრულად...  წყარო: ორგანიზაციის ვებგვერდი

თბილისი. სახალხო დამცველმა საქართველოს პარლამენტს მიმართა ზოგადი წინადადებით, მოამზადოს საკანონმდებლო ცვლილებები საჯარო დაწესებულებებში ანაზღაურებადი სტაჟირების დანერგვის და სტაჟიორებისთვის უფრო ფართო დასაქმების შესაძლებლობის მიცემის მიზნით. სახალხო დამცველი ხაზს უსვამს სტაჟირების მნიშვნელობას ახალგაზრდების პროფესიული უნარების განვითარებისთვის და მიუთითებს რომ საქართველოში არსებული სისტემა ხელს უწყობს იმ პირთა სოციალურ გარიყვას, რომელთაც, ფინანსური თვალსაზრისით არ აქვთ აუნაზღაურებელი სტაჟირების და შესაბამისად, პროფესიული განვითარების ადრეული ეტაპიდან დაწყების საშუალება. სრულად...  წყარო: ორგანიზაციის ვებგვერდი

თბილისი. სახალხო დამცველის აპარატის სვანეთის ოფისი დაბა მესტიაში, ლენჯერსა და უშგულში შექმნილი ეპიდემიოლოგიური სიტუაციის გამო მუშაობის საგანგებო რეჟიმში გადადის. ამის შესახებ საქართველოს სახალხო დამცველის აპარატი იტყობინება. საკარანტინო შეზღუდვების გათვალისწინებით, სახალხო დამცველის აპარატი დახმარებას გაუწევს ყველას, ვინც მიიჩნევს, რომ მისი უფლებები დაირღვა. საჭიროების შემთხვევაში, შეგიძლიათ დარეკოთ შემდეგ ტელეფონის ნომრებზე: ცხელ ხაზზე - 1481; დასავლეთ საქართველოს რეგიონული სამმართველოს უფროსი, მადონა ბასილაძე - +995 577 553 381; სახალხო დამცველის სვანეთის ოფისის წარმომადგენელი, ირინა გურჩიანი - +995 591 508 262. სრულად...  წყარო: ორგანიზაციის ვებგვერდი

თბილისი. მედიაში თამარ ბაჩალიაშვილის საქმის გაშუქებასთან დაკავშირებით, სამოქალაქო საზოგადოების ორგანიზაციები განცხადებას ავრცელებენ.  „საზოგადოებრივი ორგანიზაციები ვეხმიანებით თამარ ბაჩალიაშვილის საქმის მედიაში პრობლემური გაშუქების პროცესს, განსაკუთრებით კი 2020 წლის 9 აგვისტოს, 23:00 საათზე „მთავარ არხზე" გადაცემა „მთავარ აქცენტებში“ გასულ ინტერვიუს და მივიჩნევთ, რომ არსებითია მედიამ გაიაზროს პირადი ცხოვრების ხელშეუხებლობის მნიშვნელობა და საკუთარი პასუხისმგებლობა სამართლებრივი და დემოკატიული საზოგადოების მშენებლობის პროცესში, რომელიც ადამიანის უფლებებისა და ღირსების პატივისცემის იდეალებზე დგას.  „მთავარ არხზე" წამყვანის მიერ დასმული კითხვები, ისევე როგორც ზოგიერთი სხვა მედიასაშუალების მიერ მომზადებული მასალა, შეეხებოდა გარდაცვლილი თამარ ბაჩალიაშვილის პირადი ინტიმური ურთიერთობების დეტალებს, რაც, ერთის მხრივ, თავად გარდაცვლილის ხოლო, მეორეს მხრივ, მისი მეგობრების პირადი ცხოვრების უფლებაში უხეშ ჩარევას წარმოადგენს. მიუხედავად იმისა, რომ ჩვენ ძალიან კარგად გვესმის საქმის მიმართ არსებული მაღალი საზოგადოებრივი ინტერესი და მედიის განსაკუთრებული როლი, აკონტროლოს საჯარო ხელისუფლება, ასევე მიუხედავად იმისა, რომ ჩვენ ვხედავთ მიმდინარე გამოძიების ხარვეზულობასა და მისი ღიაობისა და გამჭირვალობის პრობლემას, არსებითი გვგონია საქმეზე საჯარო განხილვა ადამიანის უფლებების განუხრელი დაცვითა და პატივისცემით წარიმართოს. ამგვარ მიდგომას გადამწყვეტი მნიშვნელობა აქვს ბაჩალიაშვილის ოჯახის წევრების, ასევე მისი მეგობრების ღირსების, პირადი ცხოვრებისა და მორალური უსაფრთხოების დაცვის მიზნით“, - ვკითხულობთ განცხადებაში.  სრულად...   წყარო: emc.org.ge

თბილისი. 2020 წლის 10 აგვისტოს საქართველოს ახალგაზრდა იურისტთა ასოციაციამ ადამიანის უფლებათა დაცვის ევროპულ ცენტრთან (EHRAC) თანამშრომლობით, საქმეზე ზურაშვილი საქართველოს წინააღმდეგ, ევროპულ სასამართლოს, საჩივრის აღდგენის მოთხოვნით, განმეორებით მიმართა.  შაქრია ზურაშვილის სახელით, საიამ ევროპულ სასამართლოს თავდაპირველად 2012 წლის 12 აგვისტოს მიმართა. საჩივარი ეხებოდა 2011 წლის 26 მაისის მოვლენების დროს, შაქრია ზურაშვილის დაკავებისას და შემდგომ, სამართალდამცავების მხრიდან მის მიმართ არასათანადო მოპყრობის განხორციელებას. აღნიშნულის გამო საჩივრით მომჩივანი ადამიანის უფლებათა ევროპული კონვენციის მე-3 მუხლის (წამების აკრძალვა) დარღვევის დადგენას ითხოვდა.  სრულად...   წყარო: ორგანიზაციის ვებგვერდი

თბილისი. აგვსიტოს ომის მე-12 წლისთავთან დაკავშირებით, საქართველოს სახალხო დამცველმა განცხადება გაავრცელა.  „2008 წლის აგვისტოს ომის მე-12 წლისთავზე კონფლიქტის ზონაში მცხოვრები, როგორც ქართველი, ისე ოსი და აფხაზი მოსახლეობა დღემდე მწვავედ განიცდის ომის დამანგრეველ შედეგებს.  განსაკუთრებით საგანგაშოა სიცოცხლის უფლების უკანონო ხელყოფის ფაქტები. აღნიშნულს ცხადყოფს 2014 წელს დავით ბაშარულის, 2016 წელს გიგა ოთხოზორიას, 2018 წელს არჩილ ტატუნაშვილის და 2019 წელს ოკუპირებული აფხაზეთის, გალის რაიონის სოფელ ნაბაკევის რუსულ სამხედრო ბაზაზე, საქართველოს მოქალაქის ირაკლი კვარაცხელიას სიცოცხლის უფლების დარღვევა. ხაზგასასმელია ის ფაქტი, რომ ყველა მკვლელობაში უშუალო მონაწილე საოკუპაციო რეჟიმების წარმომადგენლები არიან.  გადაადგილების თავისუფლება უმწვავეს პრობლემას წარმოადგენს. ოკუპირებული ახალგორის რაიონის ტერიტორიაზე არსებული სავალალო უფლებრივი მდგომარეობა და ჰუმანიტარული კრიზისი ნათლად წარმოაჩინა ე.წ. გამშვები პუნქტის თვითნებური ჩაკეტვის შედეგად, არასათანადო სამედიცინო დახმარების გამო ოკუპირებულ ტერიტორიაზე მცხოვრებ პირთა გარდაცვალების ფაქტებმა.  წლების განმავლობაში, ოკუპირებულ ტერიტორიებზე, ერთ–ერთ ყველაზე პრობლემურ საკითხად რჩება საოკუპაციო ხაზზე მოქალაქეთა დაკავებისა და თავისუფლების უკანონო შეზღუდვის ფაქტები, პატიმართა ცემა, არასათანადო მოპყრობა და წამება დროებით იზოლატორებსა თუ საპყრობილეებში.  2008 წლის ომიდან 12 წელი გავიდა. მიუხედავად ამისა, საოკუპაციო რეჟიმი კვლავ აგრძელებს უკანონო ბორდერიზაციას“, - ვკითხულობთ განცხადებაში.  სრულად...   წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს გიორგი ცინცაძის სტატიას - „ბუნებრივი რესურსები და შრომის ბაზარი“.  „ბუნებრივი რესურსების ათვისების პოლიტიკა, ანუ ბუნებრივი გარემო და რესურსებთან დაკავშირებული სახელმწიფო კანონმდებლობა, გადაწყვეტილებებისა და ინსტიტუციების ერთობლიობა, ხელშესახებ გავლენას ახდენს შრომის ბაზრის სტრუქტურაზე, როგორც ეროვნულ დონეზე, ისე უშუალოდ იმ რეგიონებში, სადაც წიაღისეულის მოპოვება, ჰიდროენერგეტიკული პროექტები და ბუნებრივ რესურსებთან დაკავშირებული სხვა სექტორები წამყვან როლს თამაშობენ. ბუნებრივი რესურსების პოლიტიკა განსაზღვრავს, რამდენი და რა ტიპის სამუშაო ადგილი იქმნება მოპოვების ინდუსტრიაში, როგორ ნაწილდება მოპოვების შედეგად დაგროვებული დოვლათი და რამდენად უწყობს ხელს ბუნებრივი რესურსების ათვისება ქვეყნისა თუ მისი ცალკეული რეგიონების მდგრად სოციალურ-ეკონომიკურ განვითარებას“, - ვკითხულობთ სტატიაში.  სრულად...  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს მარიამ შალვაშვილის სტატიას - „აჭარელი ეკომიგრანტების თვითაღქმა: უცხოდ ყოფნა და არასტაბილურობა”.  „წალკის მუნიციპალიტეტი ეთნიკურად და რელიგიურად საკმაოდ მრავალფეროვანი რეგიონია. აქ ცხოვრობენ ეთნიკურად ქართველები (ძირითადად აჭარლები, სვანები და იმერლები), ასევე ეთნიკურად სომხები, აზერბაიჯანელები და ბერძნები, მუსლიმები და ქრისტიანები. წალკის დაახლოებით 30%-ს აჭარელი ეკომიგრანტები წარმოადგენენ, მათი საცხოვრებელი სახლები და სოფლები ზემო აჭარაში საკმაოდ არამდგრადი და სიცოცხლისთვის საშიში იყო და ამის გამო წალკის მუნიციპალიტეტში 90-იანი წლების ბოლოდან 2007 წლამდე ეტაპობრივად ჩამოვიდნენ. თუმცა მათ გადმოსახლებას წინ უძღვოდა დაპირებები, რომ მათ წალკაში მაინც ექნებოდათ საცხოვრებელი პირობები და მდგრადი სახლები, თუმცა აშკარაა, რომ წალკაში აჭარელი ეკომიგრანტების ცხოვრების თითქმის ყველა ასპექტი განსაკუთრებული არამდგრადობით და არასტაბილურობით ხასიათდება. ეს სტატია ეფუძნება წალკაში და წალკის მუნიციპალიტეტის 6 სოფელში ვიზიტს და ადგილობრივებთან საუბარს ეკომიგრანტების ძირითადი პრობლემებისა და მათი თვითაღქმის შესახებ“, - ვკითხულობთ სტატიაში.  სრულად...   წყარო: ორგანიზაციის ვებგვერდი

თბილისი. „თბილისის ადამიანის უფლებათა სახლმა“ 1 აგვისტოდან დაიწყო ახალი პროექტი – „ადამიანის უფლებათა დამცველების და აქტივისტების გაძლიერება და მხარდაჭერა საქართველოს რეგიონებში (აჭარა და ქვემო ქართლი)“. პროექტის მთავარი მიზანია ამ რეგიონებში უმცირესობების (ეთნიკური, რელიგიური, სექსუალური) უფლებების უკეთესი დაცვის უზრუნველყოფა, რისთვისაც დაგეგმილია ქვემო ქართლსა და აჭარაში მოქმედი უფლებადამცველების აღმოჩენა, გაძლიერება და მხარდაჭერა. სრულად...  წყარო: ორგანიზაციის ვებგვერდი