თბილისი. IRCT-ის 2020 წლის საერთაშორისო სამეცნიერო სიმპოზიუმში მონაწილეობის მსურველთათვის რეგისტრაცია გრძელდება. „ღონისძიებაზე დასასწრებად და აბსტრაქტის წარსადგენად გადადით ბმულზე და გაეცანით დეტალებს. შეგახსენებთ, რომ სიმპოზიუმი IRCT-ისა და GCRT-ის ორგანიზებით თბილისში მიმდინარე წლის 5-7 ოქტომბერს ჩატარდება. 8-9 ოქტომბერს კი გენერალური ასამბლეა გაიმართება. სიმპოზიუმის თემაა „უკიდურესობის გადალახვა - ცხოვრება წამების შემდეგ“. სიმპოზიუმი მონაწილეებს სთავაზობს უნიკალურ შესაძლებლობას, გაეცნონ უახლეს სამეცნიერო კვლევებს და მხარი დაუჭირონ გლობალურ, რეგიონალურ და ლოკალურ სტრატეგიულ პრიორიტეტებს ფსიქიკური ჯანმრთელობისა და ადამიანის უფლებების მიმართულებით“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აგრძელებს სტატიების სერიების გამოქვეყნებას სხვადასხვა არადომინანტური ეთნიკური და რელიგიური თემის წარმომადგენლების ხედვებზე მათ მიმართ გაბატონებულ მზერასთან, პოლიტიკასთან და მის სოციალურ და კულტურულ შედეგებთან მიმართებით. ამჯერად, რესპონდენტი რიმა მარანგოზიანი საუბრობს როგორია სომეხი თემის მიმართ გაბატონებული წარმოდგენები. „საქართველოში მცხოვრები სომხები და ქართველები სინამდვილეში არ იცნობენ ერთმანეთს. ერთმანეთის შესახებ მხოლოდ ზოგადი წარმოდგენები აქვთ მაშინ, როცა საქართველოს მოსახლეობის 6%-ზე მეტი სომეხია. რადგან სომხების და ქართველების ერთმანეთთან ურთიერთობა იშვიათია, ერთი ადამიანის მაგალითი განზოგადდება სხვებზე, მაგრამ მთლიან ეთნიკურ ჯგუფზე ერთი ადამიანის მაგალითით შეხედულებების ჩამოყალიბება არასწორია. ვფიქრობ, ქართველების და სომხების ერთმანეთთან პირადი ურთიერთობა ძალიან მნიშვნელოვანია იმისთვის, რომ ერთმანეთს დავანახოთ, როგორები ვართ სინამდვილეში“, ამბობს რესპონდენტი რიმა მარანგოზიანი. სრულად... წყარო: emc.org.ge

თბილისი. 5 თებერვალს, საქართველოს ახალგაზრდა იურისტთა ასოციაციამ „გააღვიძე ოლიგარქის“ აქციის მონაწილეების, ბონდო თევდორაძის, ანზორ გუბაევისა და ხათუნა ბერიძის სახელით საკონსტიტუციო სასამართლოში ახალი სარჩელი წარადგინა. „მოსარჩელეები არიან ქალაქ ქობულეთსა და ბათუმში მცხოვრები პირები, რომელთა მიმართაც ოზურგეთის მერიის სამართლებრივი უზრუნველყოფისა და ზედამხედველობის სამსახურმა 2019 წლის 14 აგვისტოს, აქციის „გააღვიძე ოლიგარქის“ მიმდინარეობის დროს შეადგინა ადმინისტრაციული სამართალდარღვევის ოქმები. ოქმების შედგენის საფუძველი გახდა მოსარჩელეთა მიერ შპს „რეზიდენსის“ ტერიტორიასთან შეკრების მიმდინარეობისას აკუსტიკური ხმაურის ნორმების გადამეტება. ხმაურის ნორმების გადამეტება დასჯადია ადმინისტრაციულ სამართალდარღვევათა კოდექსის 77-ე პრიმა მუხლით. თუმცა, ამავე მუხლის შენიშვნის მიხედვით, სამართალდარღვევას არ წარმოადგენს აკუსტიკური ხმაურის დასაშვები ნორმის გადამეტება შეკრებისა და მანიფესტაციასთან დაკავშირებულ ღონისძიებებზე“, ნათქვამია საიას ვებგვერდზე. სრულად...  წყარო: gyla.ge სამართალი

თბილისი. ბაღდათში მომხდარ ტრაგედიასთან დაკავშირებით, საქართველოს სახალხო დამცველი განცხადებას ავრცელებს.  „სამწუხაროდ, წლების განმავლობაში, გადაუჭრელ პრობლემად რჩება ბავშვთა სიღარიბე და ცხოვრების არასათანადო დონე, რაც რიგ შემთხვევაში არასრულწლოვნების ჯანმრთელობას თუ სიცოცხლეს განსაკუთრებული რისკის ქვეშ აყენებს. ბავშვთა დაცვისა და სოციალური სისტემა ვერ უზრუნველყოფს არასრულწლოვნების დაცვას უკიდურესი სიღარიბისგან. ის პროგრამები, რომელსაც სახელმწიფო სთავაზობს სიღარიბეში მცხოვრებ ოჯახებს, არ არის ორიენტირებული შედეგზე, მათ ინდივიდუალურ საჭიროებებზე და დროულ პრევენციაზე, შესაბამისად, ოჯახების სოციალურ-ეკონომიკური მდგომარეობა ხშირ შემთხვევაში, წლების განმავლობაში არ იცვლება. ამჟამინდელი სოციალური პოლიტიკის პირობებში, სიღარიბეში მცხოვრებ ბავშვიან ოჯახებში პრობლემურია არასრულწლოვნების თუნდაც ელემენტარული საბაზისო საჭიროებების დაკმაყოფილებაც კი“, - აღნიშნულია განცხადებაში.  სრულად...  წყარო: http://ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC), ბათუმის მეჩეთთან დაკავშირებით, ვიდეომასალას აქვეყნებს.  ვიდეოში ქართველი მუსლიმები ბათუმში ახალი მეჩეთის მშენებლობის საჭიროებასა და მნიშვნელობაზე მსჯელობენ და მათი ინტერესების და უფლებების იგნორირების გამო სახელმწიფო პოლიტიკაზე წუხილს გამოხატავენ. სრულად...  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: ადამიანის უფლებებზე დაფუძნებული საცხოვრისის სტრატეგია - საცხოვრებლის უფლების რეალიზაციის მთავარი წინაპირობა. „ნათელია, რომ უსახლკარობა და საცხოვრებლის უფლების სხვა ტიპის დარღვევები მხოლოდ შესაბამისი პოლიტიკის არასათანადო განხორციელებას არ წარმოადგენს, არამედ ადამიანის მთელი რიგი უფლებებისა და თავისუფლებების, მათ შორის, ღირსების უგულებელყოფის ტოლფასია. შესაბამისად, საცხოვრისის სტრატეგიები სწორედ ამგვარი მოწყვლადი მდგომარეობის პრევენციისა და აღმოფხვრისკენ უნდა იყოს მიმართული. მეორე მხრივ, ადამიანის უფლებებზე დაფუძნებული საცხოვრისის სტრატეგიის შემუშავება და განხორციელება გულისხმობს სახელმწიფოს ანგარიშვალდებულების, ასევე, თანასწორობის უზრუნველყოფასა და მარგინალიზებული და მოწყვლადი ჯგუფის წარმომადგენლების საჭიროებების გათვალისწინებას“, ნათქვამია ორგანიზაციის გვერდზე სოციალურ ქსელში. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ბაღდათის მუნიციპალიტეტში მომხდარ ტრაგედიას ეხმიანება და მომხდარის გამო მწუხარებას გამოთქვამს. „დღემდე სიღარიბე და სოციალური უთანასწორობა ქვეყანაში ერთ-ერთ ყველაზე დიდ და სისტემურ გამოწვევას წარმოადგენს, რასაც ადასტურებს NDI-ს და CRRC-ის საზოგადოებრივი განწყობის კვლევის შედეგები[7]. სახელმწიფოს ნეოლიბერალური ეკონომიკური პოლიტიკა, რომელიც დღის წესრიგიდან მუდმივად განდევნის საზოგადოებრივ ინტერესს და ჩვენს ყოველდღიურობას კერძო ინტერესსა და მათი მოგების ზრდის მიზანს უქვემდებარებს, წარმოქმნის ეკონომიკური უთანასწორობის იმ მასშტაბებს, რაც ქვეყნის მოსახლეობის უმრავლესობას სიღარიბისთვისა და დაუცველობისთვის სწირავს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებათა სახლების ქსელი, თამარა მეარაყიშვილის საქმესთან დაკავშირებით, განცხადებას ავრცელებს.  „ჩვენ, ადამიანის უფლებათა სახლების ქსელის 60 წევრი, ღრმა შეშფოთებას გამოვთქვამთ სამხრეთ ოსეთის დე ფაქტო ხელისუფლების მიერ ცნობილი უფლებადამცველის, თამარა მეარაყიშვილის მიმართ განხორციელებულ სამართლებრივ დევნასთან დაკავშირებით. დე ფაქტო მთავრობის მიერ ბრალის წაყენება და შემდგომი სამართლებრივი დევნა თამარა მეარაყიშვილის მიერ დე ფაქტო სამხრეთ ოსეთში კორუფციის გამოვლენის მცდელობებს მოჰყვა. თამარა მეარაყიშვილი საკუთარი პროფესიული საქმიანობის შესრულებისას თავისი ძირითადი და კანონიერი უფლებებით სარგებლობდა და ის, როგორც უფლებადამცველი, აუცილებელია სარგებლობდეს შესაბამისი გარანტიებით“, - ნათქვამია განცხადებაში.  სრულად...  წყარო: https://hrht.ge

ქვემო ქართლი. 2 თებერვალს, ადამიანის უფლებების სწავლებისა და მონიტორინგის ცენტრმა (EMC) სოფელ ხიხანში (მარნეულის მუნიციპალიტეტი) საჯარო შეხვედრები გამართა და სამართლებრივ და სოციალურ საკითხებზე ადგილობრივ თემს საკონსულტაციო და საინფორმაციო დახმარება აღმოუჩინა. „საკონსულტაციო შეხვედრების დროს ადგილობრივი თემისთვის განსაკუთრებით საინტერესო სასოფლო-სამეურნეო მიწების საკუთრებაში რეგისტრაციისა და სოფელში სამედიცინო სერვისის მიღებს საკითხები იყო. ჩვენ ადგილობრივებს კონსულტაციების გავუწიეთ ჯანმრთელობის, საკუთრების უფლების, სასოფლო-სამეურნეო მიწების რეგისტრაციისა და გარემოს დაცვის საკითხებზე“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებათა ცენტრი აქვეყნებს ანგარიშს „ადამიანის უფლებათა მდგომარეობა აფხაზეთისა და სამხრეთ ოსეთის გამყოფ ხაზებზე, 2019“.  დოკუმენტი მოიცავს მნიშვნელოვან საკითხებს, რომელიც, აფხაზეთისა და სამხრეთ ოსეთის გამყოფ ხაზებზე, ადამიანის უფლებათა მდგომაროებას შეეხება.  ანგარიში...  წყარო: http://www.humanrights.ge

თბილისი. საზოგადოებრივი ორგანიზაციები საერთაშორისო ორგანიზაციებს ახალგორში არსებული ჰუმანიტარული კრიზისის შესახებ მიმართვას უგზავნიან. „ბოლო რამდენიმე წლის განმავლობაში გალისა და ახალგორის მოსახლეობის უფლებები თანდათანობით შეიზღუდა, მათ შორის, მშობლიურ ენაზე განათლების მიღების უფლება, გადაადგილების თავისუფლება და სხვა ფუნდამენტური უფლებები. ისინი კი, ვინც შეზღუდვების წინააღმდეგ აიმაღლეს ხმა, დე ფაქტო მთავრობების დევნის მსხვერპლი აღმოჩნდნენ. არცთუ ისე იშვიათია ადამიანის უფლებების დარღვევის მძიმე შემთხვევებიც, მათ შორის, უკანონო პატიმრობა და სიცოცხლის ხელყოფა. ამას ადასტურებს დავით ბაშარულის (2014 წ.), გიგა ოთხოზორიას (2016 წ.), არჩილ ტატუნაშვილის (2018 წ.) და ირაკლი კვარაცხელიას (2019 წ.) გარდაცვალების საქმეები. შესაბამისად, მოგიწოდებთ გაზარდოთ ზეწოლა რუსეთის ფედერაციაზე, როგორც ამ ტერიტორიებზე ეფექტური კონტროლის მქონე ძალაზე, რათა დაუყოვნებლივ გაიხსნას ოძისი-მოსაბრუნის გადასასვლელი, შეწყდეს სამოქალაქო პირების უკანონო დაკავება საოკუპაციო ხაზთან და საერთაშორისო მონიტორინგის მისიებს მიეცეთ ოკუპირებულ ტერიტორიებზე დაუბრკოლებლად შესვლის შესაძლებლობა“, ნათქვამია ერთობლივ განცხადებაში. სრულად... წყარო: www.transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ტყიბულის შახტების შესახებ აუდიტის დასკვნის შეფასებას. „შახტში ვიზიტის დროს ექსპერტთა ჯგუფმა დააფიქსირა უსაფრთხოების ნორმების მძიმე დარღვევები, როგორიცაა შახტში ჩასასვლელი გზების დაზიანებული ჭერი და კედლები, მრავალ ადგილას დაზიანებული ვაგონის ლიანდაგები, უსაფრთხოების წესების დარღვევით მოწყობილი სამუშაო პლატფორმები და სხვა. დასკვნის მიხედვით, ეს დარღვევები აშკარა საფრთხეს უქმნის შახტში მყოფი და მომუშავე ადამიანების ჯანმრთელობასა და უსაფრთხოებას და დამსაქმებლის მხრიდან საკითხებისადმი გულგრილ დამოკიდებულებას ავლენს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. 31 იანვარს საქართველოს დემოკრატიულმა ინიციატივამ (GDI) ანგარიშის „გამოხატვის თავისუფლება საქართველოში“ პრეზენტაცია გამართა. ანგარიში მომზადდა „საქართველოს ღია საზოგადოების ფონდის“ ფინანსური მხარდაჭერით, პროექტის „სამართალწარმოება გამოხატვის თავისუფლებისთვის” ფარგლებში. „ანგარიში მიზნად ისახავს ქვეყანაში გამოხატვის თავისუფლების კუთხით ბოლო პერიოდში არსებული მდგომარეობის სისტემატიზირებულ ანალიზს. ფაქტია, გამოხატვის თავისუფლების შეზღუდვის კუთხით ყველა მიმართულებით მნიშვნელოვან პრობლემებს ვაწყდებით ქვეყანაში. ტენდეცია აჩვენებს, რომ ხელისუფლების ყველა შტო ერთობლივად ცდილობს მაქსიმალურად შეამციროს გამოხატვის თავისუფლების ფარგლები და მოთოკოს მისდამი კრიტიკული აზრის არსებობა საკანონმდებლო ჩარჩოს გამკაცრებით, ადმინისტრაციული პრაქტიკისა თუ, სასამართლოს გადაწყვეტილებების გზით, რაც პირდაპირ კავშირშია ქვეყანაში დემოკრატიის ხარისხის გაუარესებასთან“, ნათქვამია ორგანიზაციის ვებგვერდზე. სრულად... წყარო: gdi.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, ბათუმის შოთა რუსთაველის სახელმწიფო უნივერსიტეტს და აკაკი წერეთლის სახელობის ქალაქ ბათუმის საჯარო ბიბლიოთეკას დისკრიმინაციის აკრძალვის და პრევენციის შიდა დოკუმენტის შემუშავება დაევალათ. „27 იანვარს, საქართველოს სახალხო დამცველმა დაადგინა, რომ ,,იდენტობას“ მიმართ ბათუმის შოთა რუსთაველის სახელმწიფო უნივერსიტეტმა და აკაკი წერეთლის სახელობის ქალაქ ბათუმის საჯარო ბიბლიოთეკამ განახორციელეს სექსუალური ორიენტაციისა და საქმიანობის სფეროს ნიშნით პირდაპირი დისკრიმინაცია“, ნათქვამია საიას ვებგვერდზე. სრულად... წყარო: www.gyla.ge

თბილისი. საქართველოს საზოგადოებრივი ორგანიზაციების ნაწილი თვლის, რომ სოციალური მუშაკების გათავისუფლების პროცესი დარღვევებით მიმდინარეობს. „ხელმომწერი ორგანიზაციებისთვის მიუღებელია, რეორგანიზაციის საბაბით და ბუნდოვანი დასაბუთებით, კვალიფიციური სოციალური მუშაკების თანამდებობიდან გათავისუფლების ფაქტი, განსაკუთრებით იმ პირობებში, როცა ბევრი გამოწვევის წინაშე მდგარ სოციალური მომსახურების სისტემას გამართული მუშაობისთვის სასიცოცხლოდ სჭირდება მეტი კვალიფიციური კადრი. აქვე უნდა აღინიშნოს, რომ გათავისუფლებული სოციალური მუშაკები მონაწილეობას იღებდნენ სოციალური მუშაკების ზემოთნახსენებ კოლექტიურ დავაში და ნაწილი მათგანი აქტიურ მონაწილეობას იღებდა გაფიცვის ორგანიზებასა და საჯარო პროტესტის გამოხატვაში, რაც აჩენს ეჭვს, რომ გათავისუფლებული თანამშრომლები სწორედ პროტესტის გამო დაისაჯნენ“, ნათქვამია ორგანიზაციის ვებგვერდზე. სრულად... წყარო: www.gyla.ge

თბილისი. 30 იანვარს, ადამიანის უფლებათა ცენტრმა, თბილისის ადამიანის უფლებათა სახლის საკონფერენციო დარბაზში, წლიური ანგარიშის პრეზენტაცია გამართა. „ანგარიშის მიზანია, შეაფასოს სახელმწიფოს სხვადასხვა უწყების ქმედება ადამიანის უფლებათა დაცვის ჭრილში, მათი რეაგირების ხარისხი უფლებების დარღვევებზე, მართლმსაჯულების ეფექტიანობა და განხორციელებული საკანონმდებლო თუ სისტემური ცვლილებები, რომლებიც მიმართული უნდა იყოს საქართველოში ადამიანის უფლებების დაცვის საერთაშორისო სტანდარტების დამკვიდრებისკენ“, ნათქვამია ორგანიზაციის გვერდზე სოციალურ ქსელში. სრულად... წყარო: hridc.org

თბილისი. საქართველოს ახალგაზრდა იურისტთა ასოციაციის, თბილისის სააპელაციო სასამართლომ დააკმაყოფილა 2015 წლის 13 ივნისის სტიქიის დროს გარდაცვლილი პირის ოჯახის სარჩელი მატერიალური და მორალური ზიანის ანაზღაურებასთან დაკავშირებით. „საქმის განხილვა სასამართლოში 5 წლის განმავლობაში მიმდინარეობდა. სასამართლომ დაადგინა, რომ საქართველოს შინაგან საქმეთა სამინისტრომ, საპატრულო პოლიციის დეპარტამენტმა, საგანგებო სიტუაციების მართვის სააგენტომ და გარემოს ეროვნულმა სააგენტომ ვერ შეასრულეს კანონით მათთვის დაკისრებული ვალდებულება დაეცვათ მოქალაქეთა სიცოცხლე და ჯანმრთელობა სტიქიური უბედურების დროს, რასაც მოჰყვა პირის გარდაცვალება“, ნათქვამია საიას ვებგვერდზე.  სრულად... წყარო: gyla.ge

თბილისი. საერთაშორისო გამჭვირვალობა - საქართველო აქვეყნებს ბლოგპოსტს: სასამართლოს მეგობრის მოსაზრება გიორგი რურუას ბრალდების საქმესთან დაკავშირებით. „„საერთაშორისო გამჭვირვალობა - საქართველომ“ თბილისის საქალაქო სასამართლოს გიორგი რურუას საქმესთან დაკავშირებით სასამართლოს მეგობრის (Amicus Curiae) მოსაზრებით მიმართა. საქმის მასალების შესწავლის შედეგად გამოიკვეთა, რომ გიორგი რურუას, პირადი ჩხრეკისა და სხვადასხვა საპროცესო მოქმედებების ჩატარებისას, არამართლზომიერად შეეზღუდა საქართველოს კონსტიტუციითა და საერთაშორისო აქტებით გარანტირებული უფლებები და თავისუფლებები“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. მითების დეტექტორი აქვეყნებს ბლოგპოსტს: ბანანის კონსპირაციების დროის ხაზი: ებოლადან კორონავირუსამდე. „კორონავირუსის აღმოჩენას და მისი გავრცელებით გამოწვეულ ადამიანურ მსხვერპლს მსოფლიოს სხვადასხვა ქვეყანაში დეზინფორმაციისა და კონსპირაციების ახალი ტალღა მოჰყვა. საქართველოში ფეისბუკის მესენჯერით გავრცელებული ერთ-ერთი კონსპირაცია ბანანს უკავშირდებოდა. სქრინი, რომელიც ფეისბუქ გვერდმა “საქართველო უპირველეს ყოვლისა” გამოაქვეყნა, იუწყებოდა, რომ კორონავირუსს სხვადასხვა ქვეყნებში ბანანის მეშვეობით ავრცელებდნენ. გვერდის მტკიცებით, მათ მესენჯერით მსგავსი შეტყობინება 50-ზე მეტჯერ მიიღეს. კორონავირუსი ცოცხალი ორგანიზმებიდან - ცხოველებიდან - გავრცელდა და რაიმე მტკიცებულება, რომ ის ბანანით ან სხვა საკვებით გადადის, ჯერ არ გამოვლენილა. ამასთანავე ბანანი წლებია სხვადასხვა კონსპირაციების წყაროა და მას ხან ებოლას, ხან შიდსის და ღორის გრიპის გავრცელებას წყაროდ ყოველგვარი მეცნიერული დასაბუთების გარეშე აუსაფუძვლოდ ასახელებენ“, ნათქვამია პოსტში. სრულად... წყარო: www.mythdetector.ge

გურია. 29 იანვარს, ლიტერატურულ კაფე „რვას+1“-ში „ახალგაზრდა პედაგოგთა კავშირთან“ არსებული ახალგაზრდული ცენტრის წევრებისთვის ფილმის „ცხოვრება მშვენიერია” ჩვენება და განხილვა მოეწყო. „შეხვედრის დასაწყისში ორგანიზაციის გერმანელმა მოხალისემ გააკეთა პრეზენტაცია ჰოლოკოსტის ისტორიულ ასპექტებზე, როდის დაიწყო, რამ გამოიწვია, იყო თუ არა ეს მიზანმიმართული გენოციდი ებრაელი ერის მიმართ და რას ფიქრობს გერმანელი ხალხი. შეხვედრის მეორე ეტაპზე ახალგაზრდული ცენტრის წევრებმა ნახეს ჰოლოკოსტის თემატიკაზე გადაღებული ფილმი, რომლის შემდეგაც მოეწყო განხილვა და მცირე დისკუსია“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს მორიგ სტატიას: დომინანტური მზერა - აზერბაიჯანელი თემი. „რამდენიმე სახის მზერა არსებობს. საზოგადოების ერთი ნაწილი ფიქრობს, რომ სხვადასხვა ეთნოსის წარმომადგენლები საქართველოს ჩვეულებრივი მოქალაქეები არიან. ამ ჯგუფს მიაჩნია, რომ თანასწორი ხარ, უბრალოდ ისიც იციან, რომ მათთან შედარებით დაბრკოლებები შეიძლება გქონდეს, მაგალითად, ქართული ენა არ იცოდე და ეს პრობლემებს შეიძლება გიქმნიდეს, მაგრამ მათი აზრით, ეს განსხვავებები მხოლოდ გადალახვადი ბარიერია. არის მეორე, უფრო დიდი ჯგუფი, რომელიც სხვანაირად ფიქრობს. მათი აზრით, შენ არათანაბარი და არასრულფასოვანი მოქალაქე ხარ, სტუმარი ხარ და აზერბაიჯანის სახელმწიფოსთან ასოცირდები. ამიტომ მუდმივად გეკითხებიან, „არ ფიქრობ დაბრუნებაზე?“ მაშინ, როცა აზერბაიჯანული თემის დიდი ნაწილის წინაპრები აქ ძალიან დიდი ხნის მანძილზე ცხოვრობდნენ და ჩვენი სამშობლო საქართველოა“.  სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ნარკოპოლიტიკის 2019 წლის ტენდენციებს. „2019 წელს, ნარკოპოლიტიკის სფეროში, საკანონმდებლო ცვლილებები არ განხორციელებულა. ამდენად, EMC-ის ანგარიშში გაანალიზებულია გასულ წელს ნარკოტიკულ დანაშაულებზე მართლმსაჯულების სფეროში არსებული მდგომარეობა, საერთო სასამართლოს პრაქტიკა და საკონსტიტუციო სასამართლოს 2019 წლის გადაწყვეტილების აღსრულების პრობლემები“, ნათქვამია ორგანიზაციის ვებგვერდზე. სრულად... წყარო: emc.org.ge