თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სამუშაო ადგილზე საერთაშორისო და ეროვნული სტანდარტების მიმოხილვას. „წინამდებარე დოკუმენტი შეეცდება შეასრულოს ერთგვარი გზამკვლევის ფუნქცია და მიმოიხილოს სამუშაო ადგილზე შევიწროების შინაარსი, საერთაშორისო და რეგიონული (ევროკავშირის) სტანდარტები; ასევე, შევიწროების რეგულირება საქართველოს კანონმდებლობით და საქართველოს სახალხო დამცველის პრაქტიკა შევიწროების საქმეებზე“, ნათქვამია ორგანიზაციის ვებგვერდზე. იხ. დოკუმენტი... წყარო: emc.org.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს თამარ ხუხიას ბლოგპოსტს: მოსამართლეობის კანდიდატთა გასაუბრებები პარლამენტში - კითხვები მათ მიერ განხილული კონკრეტული საქმეების თაობაზე. „ქართული მართლმსაჯულების ისტორიაში პირველად, 2019 წლის შემოდგომაზე, უზენაესი სასამართლოს მოსამართლეობის კანდიდატებთან გასაუბრებები იყო ღია, შესაბამისად, პროცესს იმაზე დიდი დისკუსია მოჰყვა, ვიდრე ოდესმე. ხშირად მსჯელობდნენ დეპუტატების მიერ დასმული კითხვების მიზანშეწონილობაზე. იყო შემთხვევები, და არც ისე იშვიათად, როდესაც პრეტენდენტებს მათ მიერ წარსულში განხილული და გადაწყვეტილი საქმეების გახსენებას სთხოვდნენ. ამ კითხვებში ავტორთა კრიტიკაც იკითხებოდა. პარლამენტის წევრმა მამუკა მდინარაძემ პროცესის ერთ-ერთ მონაწილესაც კი მიმართა: ხომ არ ფიქრობთ, რომ ეს ყველაფერი თქვენთვის ანგარიშის მოთხოვნას ჰგავსო. საინტერესოა, როგორია სამართლებრივი მოცემულობა, მისაღებია თუ არა, მოსამართლეს განხილულ საქმეებთან დაკავშირებით კითხვები დავუსვათ“. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: დომინანტური მზერა - აჭარის მუსლიმური თემი. „აჭარის მიმართ არსებული პოლიტიკა ეფუძნება უსაფრთხოების ხედვას, ამის არგუმენტაცია საბჭოთა ნარატივია, რომლის მიხედვითაც აჭარა თურქეთის მესაზღვრე რეგიონია, აჭარლების დიდი ნაწილი - მუსლიმი, ამიტომ აჭარა შეიძლება დიდი რისკების შემცველი იყოს. სხვადასხვა სივრცეებში გაცხადებულია ის აზრი, რომ „აჭარა უნდა დაუბრუნდეს“ ქრისტიანობას, რადგან საქართველო მარიამის წილხვედრი ქვეყანაა. ხშირია დომინანტური კულტურის და კონფესიის წარმომადგენელთა მხრიდან სოციალურ და კულტურულ სივრცეში, მათ შორის, საგანმანათლებლო დაწესებულებებში პროზელიტიზმის მცდელობები. ბევრ საერო დღესასწაულს მართლმადიდებლური სახე აქვს, რაც აჩენს განცდას, რომ შენ ვერ იქნები საერთო საზოგადოებრივი და პოლიტიკური სისტემის ნაწილი და ხარ მოქალაქეობის მეორე ან უფრო დაბალ საფეხურზე“, ნათქვამია ორგანიზაციის გვერდზე სოციალურ ქსელში. სრულად... წყარო: emc.org.ge

თბილისი. საერთაშორისო გამჭვირვალობა - საქართველოს ინფორმაციით, 20-21 ივნისს დაკავებულების მიმართ, სასამართლომ სათანადო დასაბუთებისა და მტკიცებულებების გარეშე, სამართლიანი სასამართლოს უფლების უგულებელყოფით, ადმინისტრაციული პატიმრობა და სოლიდური ოდენობის ჯარიმები გამოიყენა. იგივე პრაქტიკა გაგრძელდა შემდგომი აქციების დროს დაკავებული პირების მიმართ. „იმ პირობებში, როცა სამართალდარღვევის ფაქტი კონკრეტული მტკიცებულებებით ვერ დასტურდება, სასამართლოს მხრიდან მსგავსი სანქციების განსაზღვრა, შესაძლოა მიუთითებდეს ხელისუფლების სურვილზე, რომ ჯარიმის გამოყენებას მოჰყვეს მსუსხავი ეფექტი, რათა დასუსტდეს საპროტესტო მოძრაობა და მომავალში საზოგადოების კრიტიკულად განწყობილმა ნაწილმა თავი შეიკავოს შეკრებისა და მანიფესტაციის უფლებით სარგებლობისგან“, ნათქვამია ორგანიზაციის გვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. 17 იანვარს, ადამიანის უფლებების სწავლებისა და მონიტორინგის ცენტრმა (EMC) შეწყალების წესისა და ბოლოდროინდელი პრაქტიკის ირგვლივ დისკუსია გამართა. „შეწყალების მექანიზმის გამოყენების ფორმა და მასშტაბები ხშირად ხდება განხილვის საგანი. ბოლო დროს ამ საკითხმა კიდევ უფრო მეტი ვნებათაღელვა გამოიწვია, რაც საქართველოს პრეზიდენტის მიერ გასულ წელს გამოცემული სადავო შეწყალების აქტების, სექტემბერში გამოცხადებული მორატორიუმის და უკვე წლის ბოლოს, შეწყალების ახალი წესის შემუშავების შედეგია. განახლებული კანონმდებლობით ვერ მოგვარდა მანამდე არსებული პრობლემები, რომელიც შეწყალების უფლებამოსილების გამოყენებას უკავშირდებოდა”, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) გიორგი ცინცაძის ბლოგპოსტს: „ანას ბაღის შესახებ“. „ხშირად, ახალი კორპუსების მშენებლობა სამოქალაქო დაპირისპირების ველს ქმნის, რომელშიც ერთმანეთის პირისპირ ადგილობრივი მოსახლეობა და დეველოპერული კომპანიები დგანან. ამ დაპირისპირებაში, როგორც ეს „ანას ბაღის” შემთხვევაში ხდება, ქალაქის მერია მედიატორის როლს ირგებს, რაც მის რეალურ პასუხისმგებლობას ნიღბავს. ქალაქის მერია და მისი სხვადასხვა ორგანოები არა კონფლიქტის წყაროდ, არამედ მის შესაძლო მომგვარებლებად გვევლინებიან - მაშინ, როცა დაპირისპირების კერებს მერიის გადაწყვეტილებებივე ქმნის, რომლებიც არადემოკრატიულად მიიღება და უპირატესობას კერძო ინტერესს ანიჭებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: სახელმწიფოს უსახლკაროთა რაოდენობის შესახებ ინფორმაცია არ აქვს. „საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს, უსახლკარობის პოლიტიკაში, კანონმდებლობით ერთადერთი ფუნქცია აკისრია - ადგილობრივი თვითმმართველობის ორგანოებში რეგისტრირებული უსახლკარო პირების ერთიანი რეესტრის წარმოება, თუმცა ეს ვალდებულება პრაქტიკაში არ სრულდება. ამ ყველაფრის გათვალისწინებით, შეუძლებელია დადგინდეს უსახლკარობის მასშტაბი ქვეყანაში“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, 4 დეკემბერს ადამიანის უფლებათა ევროპულმა სასამართლომ ნიკოლო ღვინიაშვილის გენდერის სამართლებრივი აღიარების საქმის არსებითი განხილვა დაიწყო. „კერძოდ, სასამართლომ საქართველოს მთავრობას, როგორც მოპასუხე სახელმწიფოს, ნიკოლო ღვინიაშვილის საქმესთან დაკავშირებით შესაბამისი კითხვებით მიმართა. მომჩივანი, ნიკოლო ღვინიაშვილი არის ტრანსგენდერი მამაკაცი, რომელიც ადრეული ასაკიდან თავს მამაკაცად აიდენტიფიცირებს. მიუხედავად აღნიშნულისა, სახელმწიფო ორგანოებმა მას უარი უთხრეს საიდენტიფიკაციო დოკუმენტებში სასურველი გენდერის ჩაწერაზე იმ მიზეზით, რომ მას არ ჰქონდა წარდგენილი ანატომიური სქესის შეცვლის დამადასტურებელი საბუთი“, ნათქვამია ორგანიზაციის ვებგვერდზე. სრულად... წყარო: gyla.ge ფოტო: რადიო თავისუფლება

თბილისი. GIZ-ის სამართლის პროგრამა აქვეყნებს სახელმძღვანელოს: შესავალი შედარებით საჯარო მმართველობაში. „გამოცემის ბეჭდური ვერსიები გადაეცემათ აკადემიური დაწესებულების ბიბლიოთეკებს. დაინტერესებულ პირებს შესაძლებლობა ექნებათ ასევე ბეჭდური ვერსიები მიიღონ ჩვენი ოფისიდან. გაცემის თარიღს მოგვიანებით დავწერთ”, ნათქვამია პროგრამის გვერდზე სოციალურ ქსელში. ბმული... წყარო: ორგანიზაციის გვერდი სოციალურ ქსელში

თბილისი. სახალხო დამცველის აპარატმა მოამზადა ბროშურა „რა (არ) უნდა გავაკეთო, როცა პოლიცია მაჩერებს“. ბროშურა გვასწავლის, როგორ მოვიქცეთ და ვის მივმართოთ თუკი ვფიქრობთ, რომ პოლიციელი უსამართლოდ გვაჩერებს. მასში, ასევე, იხილავთ ინფორმაციას იმის შესახებ თუ როგორ უნდა იქცეოდეს თავად პოლიციელი თქვენთან ურთიერთობის დროს და რა უფლებებით სარგებლობთ თქვენ. ბროშურა წყარო: ორგანიზაციის ვებგვერდი

თბილისი. საია-მ საქართველოს პარლამენტს წარუდგინა დასკვნა პარლამენტის წევრის, ირაკლი სესიაშვილის მიერ ინიცირებულ კანონპროექტზე „ინფორმაციული უსაფრთხოების შესახებ“ საქართველოს კანონში ცვლილების შეტანის თაობაზე. „აღნიშნული კანონპროექტით ოპერატიულ-ტექნიკურ სააგენტოს პირდაპირი წვდომა ექნება საჯარო დაწესებულებების ინფორმაციაზე, მათ შორის პირადი სახის ინფორმაციასა და ქსელურ სენსორებზე, ხოლო ინტერნეტ პროვაიდერების მეშვეობით გაცვლილ ინფორმაციაზე, მას არაპირდაპირ ექნება წვდომა, რაც საშუალებას მისცემს სააგენტოს, გააკონტროლოს ინტერნეტში გასული ნებისმიერი ინფორმაცია. საყურადღებოა ისიც, რომ აღნიშნული კანონპროექტის განხილვის პროცესი მიმდინარეობს არსებითი დარღვევებით, რადგან ითვალისწინებს ძირითად უფლებათა შეზღუდვის მნიშვნელოვან საფუძვლებს, ხოლო განხილვაში სავალდებულო კომიტეტის სახით არ მონაწილეობს ადამიანის უფლებათა დაცვისა და სამოქალაქო ინტეგრაციის კომიტეტი. ზემოაღნიშნულიდან გამომდინარე, მოვუწოდებთ საქართველოს პარლამენტს, წარმართოს საკანონმდებლო პროცესი ყველა შესაბამისი კომიტეტის ჩართულობით, არ დაუშვას კანონპროექტის მიღება შემოთავაზებული ფორმით და კანონპროექტის განხილვა მოხდეს მხოლოდ ფართო საზოგადოებრივი ჩართულობისა და დისკუსიის შედეგად“, - წერია დასკვნაში. სრულად...  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) დეკანოზ გიორგი მამალაძის მდგომარეობას აფასებს. „როგორც საზოგადოებისთვის ცნობილია, საქართველოს პრეზიდენტმა შობის დღესასწაულთან დაკავშირებით მსჯავრდებულთა შეწყალების ფარგლებში უარი თქვა დეკანოზის შეწყალებაზე, რითიც პრაქტიკულად შეუძლებელი გახდა სხვა სამართლებრივი პროცედურების გარეშე სასჯელაღსრულების დაწესებულების დატოვება და ადეკვატური მკურნალობის ჩატარება. აღნიშნულის გათვალისწინებით, დეკანოზის ჯანმრთელობის მდგომარეობის გათვალისწინებით, EMC საჭიროდ მიიჩნევს საქართველოს სისხლის სამართლის საპროცესო კოდექსი 283-ე მუხლით გათვალისწინებული სასჯელის მოხდის გადავადების მექანიზმის გამოყენებას, რაც გულისხმობს, რომ გ. მამალაძე უნდა ჰქონდეს შესაძლებლობა სასჯელაღსრულების დაწესებულების გარეთ ჩაიტაროს ადეკვატური მკურნალობა და ჯანმრთელობის მდგომარეობის გაუმჯობესების შემთხვევაში დაბრუნდეს სასჯელის მოხდის ადგილზე“, ნათქვამია ორგანიზაციის განცხადებაში. სრულად... წყარო: emc.org.ge

თბილისი. არასამთავრობო ორგანიზაციები სახელმწიფო ინსპექტორს მოუწოდებენ პროკურატურას წურწუმიას საქმის გადაცემის მოთხოვნით მიმართოს. „ხელმომწერი არასამთავრობო ორგანიზაციები მივიჩნევთ, რომ 2020 წლის 2 იანვარს, 24 წლის ახალგაზრდის, მურად წურწუმიას მიმართ ჩადენილი დანაშაული, რასაც მისი სიცოცხლე შეეწერა, სახელმწიფო ინსპექტორის სამსახურმა უნდა გამოიძიოს. შესაბამისად მოვუწოდებთ სახელმწიფო ინსპექტორს, გამოიყენოს კანონმდებლობით მის ხელთ არსებული ბერკეტები და საქმის გამოსაძიებლად გადასაცემად შესაბამისი მოთხოვნით პროკურატურას მიმართოს“, ნათქვამია ერთობლივ განცხადებაში. სრულად... წყარო: gyla.ge

თბილისი. ქალაქ თბილისის მერიამ სააპელაციო სასამართლოში გაასაჩივრა თბილისის საქალაქო სასამართლოს გადაწყვეტილება, რომლის ძალითაც მას დაევალა გამაფრთხილებელი ბანერებისა და ბარიერების დამონტაჟება თბილისის ზღვის ერთ-ერთ ყველაზე სახიფათო ადგილას, სადაც ბოლო წლებში რამდენიმე არასრულწლოვანი დაიხრჩო.  ე.წ. ჩანჩქერის ტერიტორია არის „სიკვდილის ზონა“ თბილისის ზღვაზე, სადაც ბანაობა განსაკუთრებით საშიშია და აკრძალულია, მაგრამ ამის შესახებ მოქალაქეები არც ინფორმირებული არიან და არც გადაულახავი ბარიერი ეღობებათ. თბილისის მერია უარს აცხადებს სასამართლოს გადაწყვეტილების აღსრულებაზე და მიაჩნია, რომ იგი არ არის ქალაქში მსგავსი უბედური შემთხვევების პრევენციაზე პასუხისმგებელი.  თბილისის მერიის სააპელაციო სარჩელის საპასუხოდ, ადამიანის უფლებათა ცენტრმა სააპელაციო შესაგებელი მოამზადა.  სრულად...  წყარო: http://www.humanrights.ge

თბილისი. „კონსტიტუციის 42-ე მუხლი“ დაცვის სამსახურის თანამშრომლების მიერ იძლებით დაკავებული მოზარდის საქმეს სწავლობს.  როგორც ორგანიზაციის მიერ გავრცელებული ინფორმაციდან ირკვევა, 2019 წლის 19 დეკემბერს 11 წლის ნ.ა. სკეიტბორდით წაიქცა და დაეჯახა მეტრო „ახმეტელის თეატრის'' მიმდებარედ არსებულ სავაჭრო ცენტრის კარის მინას, რომელიც გაიბზარა. ბავშვი შეაჩერეს დაცვის თანამშრომლებმა და, მისი ნების საწინააღმდეგოდ, აიყვანეს შენობის მე-2 სართულზე მდებარე დაცვის უფროსის ოთახში. თხოვნის მიუხედავად, ბავშვს არ დაალევინეს წყალი და მარტო დატოვეს უფანჯრო ოთახში, სადაც მშობლების მოსვლამდე გააჩერეს. დაცვის თანამშრომლებმა მშობლებს მოსთხოვეს ზიანის ანაზღაურება, წინააღმდეგ შემთხვევაში კი, პატრულის გამოძახებით დაემუქრნენ. მამა იძულებული გახდა დაეწერა ხელწერილი, რომ ზიანს აანაზღაურებდა. ბავშვი მხოლოდ ამის შემდეგ გათავისუფლეს.  სრულად...  წყარო: https://article42.ge

24 დეკემბერს EMC-ის წარმომადგენლები, პლატფორმა სალამის აქტივისტებთან ერთად, ბოლნისის მერსა და მერიის თანამშრომლებს შეხვდნენ.  „შეხვედრის მიზანი იყო ბოლნისის მუნიციპალიტეტში ჩვენი მუშაობის შედეგად იდენტიფიცირებული სოციალური და უფლებრივი გამოწვევების გაზიარება და კონკრეტული რეკომენდაციების შეთავაზება ადგილობრივი ხელისუფლებისთვის“, ნათქვამია ორგანიზაციის ვებგვერდზე. სრულად... წყარო: emc.org.ge

აჭარა. საქართველოს საკონსტიტუციო სასამართლომ 2019 წლის 20 დეკემბერს არსებითად განსახილველად მიიღო საქართველოს სახალხო დამცველის კონსტიტუციური სარჩელი, რომელიც შეეხება იუსტიციის უმაღლესი საბჭოს მიერ, საქართველოს უზენაესი სასამართლოს მოსამართლის თანამდებობაზე ასარჩევად საქართველოს პარლამენტისათვის წარსადგენი კანდიდატების შერჩევის წესის კონსტიტუციურობას.  კონსტიტუციურ სარჩელში სადავოდ არის გამხდარი იუსტიციის უმაღლესი საბჭოს მიერ საქართველოს პარლამენტისთვის წარსადგენად უზენაესი სასამართლოს მოსამართლეთა კანდიდატების ფარული კენჭისყრით შერჩევის წესი, რომლის დროსაც, არ ხდება დასაკავებელ თანამდებობასთან კანდიდატის შესაბამისობის დასაბუთება.  სრულად...  წყარო: http://ombudsman.ge

თბილისი. საქართველოს სახალხო დამცველის სპეციალურმა პრევენციულმა ჯგუფმა 2019 წლის ივლისისა და აგვისტოს თვეში N2, N8, N14 და N15 პენიტენციური დაწესებულებების მონიტორინგი ჩაატარა.  ვიზიტები განხორციელდა ყველაზე დიდ ნახევრად ღია ტიპის თავისუფლების აღკვეთისა და დახურული ტიპის პატიმრობის და თავისუფლების აღკვეთის დაწესებულებებში. მოპოვებული ინფორმაციის საფუძველზე მომზადებულ ანგარიშში კომპლექსურად გაანალიზდა, როგორც სისტემური ასევე, თითოეული დაწესებულებისთვის დამახასიათებელი ასპექტები.  სრულად…  წყარო: http://ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს განცხადებას, რომელიც რელიგიური უმცირესობების უფლებების დაცვის კუთხით არსებული გამოწვევებს ეხება.  „მიმდინარე წელს არა ერთხელ დადგა დღის წესრიგში რელიგიის თავისუფლების კუთხით არსებული საკანონმდებლო სტანდარტების და გარანტიების გაუარესებასთან დაკავშირებული ინიციატივები (მათ შორის, რელიგიის შესახებ სპეციალური კანონის მიღებასთან, მუსლიმი ქალების რელიგიური ატრიბუტიკის აკრძალვასთან, სავალდებულო სამხედრო სამსახურისგან არადომინანტური რელიგიების სასულიერო პირების გათავისუფლების წესის გაუქმებასთან დაკავშირებული ინიციატივები). აღნიშნული ინიციატივების შეჩერება მეტწილად რელიგიური ორგანიზაციებისა და ადამიანის უფლებებზე მომუშავე აქტორების ორგანიზებით და ადვოკატირებით მოხერხდა“, - აღნიშნულია განცხადებაში.  სრულად...  წყარო: https://emc.org.ge

თბილისი. ადამიანის უფლებათა ცენტრი ლაგოდეხის პოლიციის უფროსის და სხვა პოლიციელების სავარაუდო დანაშაულის დროულ და ეფექტიან გამოძიებას მოითხოვს.  ადამიანის უფლებათა ცენტრის კახეთის ოფისი იცავს ტარიელ შეითნიშვილს, რომელიც პოლიციამ 1 დეკემბერს დააკავა ადმინისტრაციული წესით, პოლიციისათვის წინააღმდეგობის გაწევის ბრალდებით. დაკავებისას პოლიციელებმა გამოიყენეს ფიზიკური ძალა, რის შედეგადაც ტარიელ შეითნიშვილის ჯანმრთელობას სერიოზული ზიანი მიადგა.  ადამიანის უფლებათა ცენტრი მოითხოვს სახელმწიფო ინსპექტორის სამსახურის საგამოძიებო დეპარტამენტმა დროულად და ეფექტიანად გამოიძიოს პოლიციის მხრიდან განხორციელებული სავარაუდო ძალადობისა და დამამცირებელი მოპყრობის ფაქტი.  სრულად…  წყარო: http://www.humanrights.ge

აჭარა. მსმ-სათვის სისხლის დონორობაზე დადგენილი აკრძალვა საკონსტიტუციო სასამართლომ კიდევ ერთხელ არაკონსტიტუციურად სცნო.  2019 წლის 17 დეკემბერს საკონსტიტუციო სასამართლომ კიდევ ერთხელ არაკონსტიტუციურად სცნო მსმ-ისათვის (მამაკაცი, რომელსაც სექსი აქვს სხვა მამაკაცთან) დაწესებული არაგონივრული აკრძალვა, ყოფილიყო სისხლის დონორი.  აღნიშნულ საქმეში მოსარჩელე მხარეს წარმოადგენდნენ თანასწორობის მოძრაობისა და საიას იურისტები.  სრულად...  წყარო: https://gyla.ge

შიდა ქართლი. დღეს, საქართველოს სახალხო დამცველი შიდა ქართლის სკოლის მოსწავლეებს შეხვდა და ადამიანის უფლებების სწავლების მნიშვნელობაზე და ამ პროცესში სახალხო დამცველის როლზე, მის საქმიანობასა და მანდატზე ესაუბრა. სახალხო დამცველმა ადამიანის უფლებების დაცვის თვალსაზრისით მუდმივად მზარდი საფრთხეები და გამოწვევები მიმოიხილა; აპარატის მიერ ადამიანის უფლებათა დარღვევის შესახებ ინფორმაციის მიღების ფორმები, რეაგირება და რეკომენდაციების შესრულებაზე მეთვალყურეობის საკითხები და აპარატისადმი მომართვიანობის მექანიზმი გააცნო. სრულად...  წყარო: http://ombudsman.ge