თბილისი. საგზაო უსაფრთხოების სფეროში მოღვაწე არასამთავრობო ორგანიზაციები მიესალმებიან განათლებისა და მეცნიერების სამინისტროს მიერ მომზადებულ „მე და საზოგადოება" სასწავლო პროგრამაში საგზაო უსაფრთხოების საკითხის შეტანას. ქუჩაში მოძრაობის წესების ცოდნა აუცილებელია ჩვენი ბავშვებისთვის, რათა მათ შეძლონ სახლიდან სკოლაში და პირიქით უსაფრთხოდ გადაადგილება. საზოგადოებას, კიდევ ერთხელ გვსურს შევახსენოთ, რომ 2015 წელს წინა წელთან შედარებით ბავშვთა სიკვდილიანობა 25%-ით გაიზარდა და 912 ბავშვმა მიიღო ტრავმა საქართველოს გზებზე. ჩვენ მივმართავთ საზოგადოებას, პოლიტიკოსებს, მხარი დაუჭირონ აღნიშნული სასწავლო პროგრამის დამტკიცებას და ვიმედოვნებთ, რომ განათლების სამინისტროს ამ ნაბიჯს მომავალში მოჰყვება სხვა ნაბიჯები, რაც სკოლებში საგზაო უსაფრთხოების სწავლებას გახდის კიდევ უფრო პრიორიტეტულს. თავის მხრივ, ჩვენ მზად ვართ, დავეხმაროთ სამინისტროს შესაბამისი საგანმანათლებლო და სხვა სახის აუდიო, ვიდეო და ბეჭდური მასალებით. წყარო: ფონდი პარტნიორობა საგზაო უსაფრთხოებისთვის საქართველოს ალიანსი უსაფრთხო გზებისთვის

შიდა ქართლი. 13 თებერვალს, გორში, პროექტ „უცნობი საბჭოთა წარსულის" ფარგლებში პირველი შეხვედრა გაიმართა, რომელსაც „ჰაინრიჰ ბიოლის ფონდის სამხრეთ კავკასიის რეგიონულ ბიუროს" წარმომადგენელი წარუძღვა. პროექტი ხორციელდება ჰაინრიჰ ბიოლის ფონდის სამხრეთ კავკასიის რეგიონული ბიუროსა და გორის სახელმწიფო სასწავლო უნივერსიტეტის მხარდაჭერით. სრულად... წყარო: ორგანიზაციის ვებ-გვერდი სოციალურ ქსელში

აჭარა. 11 თებერვალს, NIMD-ის ბათუმის ფილიალის ოფისში, დემოკრატიის სკოლის კურსდამთავრებულთათვის და მიმდინარე მსმენელთათვის ზურაბ ჭიაბერაშვილთან შეხვედრა გაიმართა. შეხვედრა დემოსკოლელებისა და პოლიტიკური პარტიების თანამშრომლობის ფარგლებში იმ პარტიებთან ერთად დაიგეგმა, რომლებთანაც NIMD-ს ორმხრივი თანამშრომლობა აკავშირებს. აღნიშნული შეხვედრა შეხვედრათა ციკლის ნაწილია, რომელიც მომდევნო კვირებშიც გაგრძელდება. ნაციონალური მოძრაობის პარტიის წარმომადგენელმა იმ ხედვებსა და სტრატეგიებზე ისაუბრა, რომელსაც პარტია 2016 წლის არჩევნების მოგების შემთხვევაში განახორციელებს. მომხსენებლის თქმით, ნიმდის მოსწავლეებთან შეხვედრა პარტიებისთვის ძალიან მნიშვნელოვანია, რადგან დემოკრატიის სკოლა აერთიანებს იმ ადამიანებს, ვინც ლოკალურ დონეზე პოლიტიკური ამინდის შექმნაში მნიშვნელოვან როლს თამაშობს.

ქვემო ქართლი. 10 თებერვალს, საქართველოს ახალგაზრდა იურისტთა ასოციაციის იურიდიული განათლების ხელშეწყობის ფონდის წარმომადგენელი ქ.რუსთავის ივ.ჯავახიშვილის სახელობის #24-ე ქართული გიმნაზიის მე-9 მე-10 კლასის მოსწავლეებს შეხვდა. „ლექციის თემა იყო „სამართალი სახელმწიფო და ადამიანის ძირითადი უფლებები". სკოლის მოსწავლეებმა განიხილეს ადამიანის უფლებათა ევროპული სასამართლოს რამდენიმე გადაწყვეტილება. შეხვედრა ინტერაქტიული ხასიათის იყო და ფონდის წარმომადგენელმა მოსწავლეების კითხვებს უპასუხა", ნათქვამია ორგანიზაციის ვებ-გვერდზე. სრულად... წყარო: www.legaleducation.ge

თბილისი. 5, 6 და 7 თებერვალს „პირველი ნაბიჯი საქართველოს" ადრეული განვითარების პროგრამის ფარგლებში ჩატარდა ბავშვებში კვების ხელშეწყობის ტრენინგი, რომელიც მოიცავდა კვების დარღვევასთან დაკავშირებულ მუშაობის ტექნიკებს. ტრენინგი ჩაუტარდათ პროგრამის სპეციალისტებს. უკვე იგეგმება რეგიონებში ადრეული განვითარების გუნდების ტრენინგიც. ტრენინგი ჩატარდა ევროპის ფონდის მხარდაჭერით. უახლოეს მომავალში ტრენინგს შეუძლია დაესწროს ნებისმიერი მსურველი. ის საინტერესოა როგორც ბავშვებთან მომუშავე სპეციალისტებისთვის ასევე მშობლებისთვისაც", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

იმერეთი. რეგიონული განვითარების რესურსცენტრი მსოფლიო ბანკის დაფინანსებით წყალტუბოს მუნიციპალიტეტში ახალგაზრდულ პროექტს ახორციელებს. პროექტის მიზანია: 1. წყალტუბოს თემში მცხოვრე სოციალურად დაუცველი ახალგაზრდების მოქალაქეობრივი პასუხისმგებლობების ამაღლება მათი და მათი აქტიურ მოქალაქებაად ჩამოყალიბება. 2. წყალტუბოს თემში მცხოვრები სოციალურად დაუცველი ახალგაზრდობის ცნობიერების ამაღლება და არაფორმალური განათლების დახმარებით თანამედროვე სტანდარტების შესაბამისი უნარ-ჩვევების ჩამოყალიბება. წყარო: რეგიონული განვითარების რესურსცენტრი

აჭარა. 8 თებერვალს ბათუმის უნივერსიტეტში სტუდენტთა განვითარების ხელშეწყობის მიზნით მორიგი მემორანდუმი გაფორმდა. მემორანდუმის საფუძველზე შოთა რუსთაველის სახელმწიფო უნივერსიტეტი გაეროს ახალგაზრდულ ასამბლეას უმასპინძლებს. დაგეგმილია ერთობლივი კულტურულ-საგანმანათლებლო პროექტებისა და პროგრამების განხორციელება. ახალგაზრდული ასამბლეის სხდომა მაისში გაიმართება და მასში 16-დან 22 წლამდე ახალგაზრდები ჩაერთვებიან. აღნიშნულს უმაღლესი სასწავლებლის თვითმმართველობასა და არასამთვარობო ორგანიზაცია „მრავალეროვანი საქართველოს" შორის დადებული ურთიერთთანამშრომლობის მემორანდუმი ითვალისწინებს. აღნიშნულ შეხვედრაზე უნივერსიტეტის რექტორმა ის 50-მდე სტუდენტი დააჯილდოვა, რომლებმაც 23-დან 25 იანვრის ჩათვლით უკვე მიიღეს მონაწილეობა თბილისში გამართულ გაეროს ასამბლეის სხდომაზე.

თბილისი. ადამიანის უფლებათა ევროპული სასამართლოს გადაწყვეტილებით დაკმაყოფილდა საქართველოს ახალგაზრდა იურისტთა ასოციაციის საჩივარი "ნ.წ და სხვები საქართველოს წინააღმდეგ”. „ევროპული სასამართლო გადაწყვეტილებაში ცალსახად მიუთითებს, რომ საქართველოში მოქმედი კანონმდებლობა ბავშვის უფლებასთან მიმართებით- ჰყავდეს კანონიერი წარმომადგენელი, რომელიც არსებითად დაიცავს მის ინტერესებს- ხარვეზიანია და არ შეესაბამება არსებულ საერთაშორისო სტანდარტებს", ნათქვამია ორგანიზაციის განცხადებაში. სრულად... წყარო: gyla.ge

სამეგრელო. 2 თებერვალს, ასოციაცია „ათინათს" ამერიკის საგანგებო და სრულუფლებიანი ელჩი საქართველოში იან კელი და USAID-ის დირექტორი დუგლას ბოლი ეწვივნენ. „რადიო „ათინათში" სტუმრობისა შემდეგ საპატიო სტუმრები „ათინათისა" და საქართველოს გაეროს ასოციაციის ერთობლივი პროექტის „ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის (PITA) ფარგლებში შექმნილი ახალგაზრდული ცენტრის მოზარდებს შეხვდნენ. შეხვედრა საინტერესოდ წარიმართა. ახალგაზრდებმა ბატონ კელისა და ბატონ ბოლს გააცნეს ცენტრის მუშაობა, განხორციელებული აქტივობები, შედეგები და ისაუბრეს მომავალ გეგმებზე", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. 29 იანვრიდან, ბავშვთა ჰოსპისის ვებ გვერდი ამუშავდა. გვერდი ყველა მსურველს მისცემს შესაძლებლობას გაიღოს დონაცია ნებისმიერი თანხის ფარგლებში და ხელი შეუწყოს პირველი ბავშვთა ჰოსპისის მშენებლობას. გარდა დონაციის ფუნქციისა, ვებგვერდი დატვირთულია საინფორმაციო მასალით პალიატიური მზრუნველობის შესახებ საქართველოში. „ბავშვთა ჰოსპისი სამი ძირითადი მიმართულებით იმუშავებს: 24 საათიანი მომსახურება ერთდროულად 10 ბავშვისთვის, დღის ცენტრი, სადაც ბავშვები და მათი მშობლები დღის განმავლობაში მიიღებენ საჭირო მომსახურებას და შინ ზრუნვის სამსახური, რომელიც ბინაზე მოემსახურება ბავშვებს", ნათქვამია ორგანზაციის ვებ-გვერდზე. სრულად... წყარო: www.osgf.ge

თბილისი. ახალგაზრდების გენდერული საკითხებისადმი დამოკიდებულების დასადგენად მკვლევრებმა შეისწავლეს აბიტურიენტების მიერ გენდერის თემაზე დაწერილი ნაშრომები. კვლევაში მოხვდა მხოლოდ ის ესეები, რომლებიც გამომცდელებმა საშუალო ან მაღალი ქულით შეაფასეს. კვლევა, 2013 წელს ქართულ ენასა და ლიტერატურის ტესტების I და II ვარიანტებში დაწერილი არგუმენტირებული ესეების ანალიზის საფუძველზე მომზადდა. ნაშრომების ავტორების შესახებ მხოლოდ ოთხი დემოგრაფიული კრიტერიუმი იყო ცნობილი - რეგიონი, სქესი, მიღებული ქულა, ტესტის ვარიანტი. ნაშრომები შეირჩა საქართველოს ათი რეგიონიდან და თბილისიდან. 1700 ნაშრომიდან 50.6% მდედრობითი სქესის, ხოლო 49.4% მამრობითი სქესის აბიტურიენტის ნაშრომი იყო’, ნათქვამია ქალთა საინფორმაციო ცენტრის ვებ-გვერდზე. სრულად... წყარო: ginsc.net

სამცხე-ჯავახეთი. ინფორმაციის თავისუფლების განვითარების ინსტიტუტის (IDFI) ორგანიზებით, საქართველოს სამცხე-ჯავახეთის სახელმწიფო უნივერსიტეტში გაიმართა სალექციო კურსი „საქართველო 2020 - კონკურენციის რეგულირება სატელეკომუნიკაციო სფეროში”, რომელსაც გაუძღვნენ IDFI-ის და ტელეკომუნიკაციის მიმართულების ხელმძღვანელი - უჩა სეთური და IDFI-ის პროექტის კოორდინატორი – საბა ბუაძე. ღონისძიება ჩატარდა პროექტ „სტრატეგიული გეგმა საქართველო 2020 - სამოქალაქო საზოგადოების ჩართულობის გაძლიერება”-ს ფარგლებში. პროექტი ხორციელდება IDFI-ს მიერ ბრემენის უნივერსიტეტთან პარტნიორობით და გერმანიის საგარეო საქმეთა სამინისტროს დაფინანსებით. სრულად... წყარო: idfi.ge

სამეგრელო. 27 იანვარს, მარტვილში, ზოგადსაგანმანათლებლო სკოლა „სხივში" გაიმართა სამოქალაქო განათლების პროგრამა „მომავლის თაობის" შემაჯამებელი ღონისძიება. „ღონისძიების ფარგლებში, პროგრამაში ჩართულმა სხვადასხვა სკოლებმა წარმოადგინეს პროგრამის ფარგლებში განხორციელებული ინიციატივების, პროექტებისა და ღონისძიებების პრეზენტაციები. ღონისძიება ორგანიზებულია სამოქალაქო განათლების პროგრამა „მომავლის თაობის" ფარგლებში, რომელსაც ახორციელებს ამერიკული ორგანიზაცია PH International, ამერიკის შეერთებული შტატების საერთაშორისო განვითარების სააგენტოს (USAID) დაფინანსებით და საქართველოს განათლებისა და მეცნიერების სამინისტროს მხარდაჭერით. პროგრამა სამეგრელოს რეგიონში ხორციელდება ასოციაცია „ათინათის" მიერ", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 23-24 იანვარს, ასოციაცია „ათინათში" ჩატარდა ტრენინგი თემაზე „გუდი და ლიდერობა", პროგრამაში „ტოლერანტობის სამოქალაქო ცნობიერების და ინტეგრაციის მხარდაჭერა" ჩართული ახალგაზრდებისთვის. „ტრენინგი ჩატარდა ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის (PITA) ფარგლებში. პროგრამა საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) ფინანსური მხარდაჭერით ხორციელდება. პროგრამის პარტნიორი ორგანიზაციაა ასოციაცია „ათინათი", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს ჟურნალისტური ეთიკის ქარტია „ლიბცენტრის" ახალი ჯგუფის დაკომპლექტებას იწყებს. „შერჩეული აპლიკანტები ექვსი თვის განმავლობაში მოისმენენ საჯარო ლექციებს ადამიანის უფლებებზე, სამოქალაქო საზოგადოებაზე, ლიბერალიზმსა და დემოკრატიასთან დაკავშირებულ საკითხებზე. გარდა ამისა, მოამზადებენ გამოკითხვებს, შექმნიან ჟურნალისტურ მასალებს, დაწერენ პოსტებს სხვადასხვა თემაზე, რაც განთავსდება ცენტრის ვებგვერდზე www.libcenter.ge. კანდიდატი უნდა იყოს ბაკალავრიატის ნებისმიერი ფაკულტეტის სტუდენტი ან დამამთავრებელი კლასის მოსწავლე", ნათქვამია ორგანიზაციის ვებ-გვერდზე. სრულად... წყარო: libcenter.ge

აჭარა. 22 იანვარს, „ეკონომიკისა და ბიზნესის" ფაკულტეტის სტუდენტებმა, ორგანიზაციის ცვლილებები თანაბარი უფლებებისათვის - მხარდაჭერით, საუნივერსიტეტო კურსის „დემოკრატია და მოქალაქეობის" ფარგლებში, საინფორმაციო შეხვედრა „გავიგოთ მეტი შეზღუდული შესაძლებლობის შესახებ" ჩაატარეს. სტუდენტების მოხსენება შეეხებოდა შემდეგ საკითხებს: ტერმინებს, რომლებიც უკავშირდება შშმ პირებს, მიდგომებს, ინკლუზიური განათლების არსს, სტერეოტიპებს და მედიის როლს, გარემოს ხელმისაწვდომობას, წარმატებულ შშმ პირებს და სხვა. შეხვედრის დასასრულს, მსმენელებს გადაეცათ საინფორმაციო „ფლაერები", რაზეც დატანილი იყო მართებული/არამართებული ტერმინები შშმ პირთა შესახებ. „ფლაერების" გავრცელება გაგრძელდა ქალაქის მასშტაბით.

თბილისი. ფონდ „ღია საზოგადოება საქართველოს" ოფისში მიმდინარეობს სკოლებში ბულინგის წინააღმდეგ პროგრამის პრეზენტაცია. „არაძალადობრივი კომუნიკაციის ინსტიტუტის" და ფონდი „ღია საზოგადოება-საქართველოს" პროექტის მიზანია კონკრეტულ სკოლებში ბულინგის პრევენცია და ასევე ეფექტური მექანიზმის შემუშავება. შემუშავებული მეთოდოლოგია მიმართული იქნება თანატოლებს შორის ჩაგვრის სხვადასხვა ფორმის შემცირებასა და სასწავლო გარემოს გაუმჯობესებისკენ. პროექტის პირველ ეტაპზე სამუშაო ჯგუფი შეისწავლის სკოლის შიდა კულტურას, ურთიერთობებს მოსწავლეებს, მოსწავლეებსა და მასწავლებლებს, მასწავლებლებსა და მშობლებს შორის, რისი გათვალისწინებითაც შემუშავდება ბულინგის დაძლევის მექანიზმი: შემუშავდება სატრენინგო მასალა და მეთოდოლოგია, ბოლო ეტაპზე კი განხორციელდება ტრენინგები სკოლის თემის წარმომადგენლებისათვის", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

შიდა ქართლი. 22 იანვარს, შავშვების საჯარო სკოლაში გაიმართა პროექტის დახურვის ღონისძიება. პროექტის ფარგლებში გორის მუნიციპალიტეტის 8 საჯარო სკოლას - შინდისი, ზერტი, მეჯვრისხევი, ტყვიავი, ტირძნისი, ახალდაბა, ხიდისთავი - 70,000 ლარის ღირებულების სხვადასხვა თანამედროვე სასკოლო ინვენტარი გადასცეს. „კერძოდ, თითოეულმა საჯარო სკოლამ პროექტის ფარგლებში მიიღო „ჭკვიანი დაფები", კომპიუტერული ტექნიკა, სპორტული ინვენტარი, ბიოლოგიის ატლასები და სხვა დამხმარე ლაბორატორიული აღჭურვილობა. პროექტს „ახალგაზრდების ჩართულობა და განვითარება" საქველმოქმედო ჰუმანიტარული ცენტრი „აფხაზეთი" (CHCA) გაეროს ბავშვთა ფონდთან (UNICEF) პარტნიორობითა და აშშ-ს საერთაშორისო განვითარების სააგენტოს (USAID) ფინანსური ხელშეწყობით 2013-2015 წლებში ახორციელებდა", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: სოციალური ქსელი

სამცხე-ჯავახეთი. პროექტ „მრავალფეროვნების პლურალიზმის და რელიგიური ტოლერანტობის სალექციო კურსი სამცხე–ჯავახეთში და აჭარაში მცხოვრები ახალგაზრდებისთვის" ფარგლებში, ჩატარდა გია ნოდიას და გიორგი მშვენიერაძის სემინარი თემაზე: ფუნდამენტალიზმი, გამოხატვის თავისუფლება VS რელიგიის თავისუფლება. პროექტს ახორციელებს მშვიდობის, დემოკრატიის და განვითარების კავკასიური ინსტიტუტი CIPDD, US Embassy Tbilisi, Georgia-ს ფინანსური მხარდაჭერით. სრულად... წყარო: ორგანიზაციის ვებ-გვერდი სოციალურ ქსელში

თბილისი. ათასწლეულის გამოწვევის ფონდი - საქართველო აცხადებს კონკურსს ბლოგერების სამი გუნდის შესარჩევად. „პროექტი ხორციელდება მასობრივი კომუნიკაციების, ჟურნალისტიკისა და სოციალური მეცნიერებების წამყვან ინსტიტუტებთან და სკოლებთან თანამშრომლობით. თითოეულ გუნდში გაერთიანდება 3 ბლოგერი (სულ 9 ბლოგერი), რომლებიც იმუშავებენ აშშ-ის მთავრობის ათასწლეულის გამოწვევის კომპაქტით გათვალისწინებული პროექტების შესახებ ბლოგების შექმნისა და ონლაინ პოსტების მომზადებისთვის. პროგრამის მონაწილეებს ექნებათ შესაძლებლობა, მიიღონ ახალი ცოდნა აშშ-ის მთავრობის დაფინანსებული მეორე კომპაქტის შესახებ, გაეცნონ საქართველოს და აშშ-ის განათლების სექტორში მიმდინარე სიახლეებს და დაამყარონ ახალი კავშირები, როგორც საქართველოში, ასევე აშშ-ში", ნათქვამია ორგანიზაციის ვებ-გვერდზე. სრულად... წყარო: mcageorgia.ge

თბილისი. 20 იანვარს, ომბუდსმენის პირველმა მოადგილემ, საქართველოს განათლებისა და მეცნიერების მინისტრის მოადგილემ და ევროკავშირის ელჩმა კონკურსის „მე-ომბუდსმენი 2015" გამარჯვებული მოსწავლეები დააჯილდოეს. „მე - ომბუდსმენი" მნიშვნელოვნად ამაღლებს მოზარდთა ცოდნას ადამიანის უფლებათა დაცვის თვალსაზრისით და კონკურსში მონაწილეთა რაოდენობის ზრდა იმის მაჩვენებელია, რომ ახალგაზრდა თაობა სულ უფრო მეტ ინტერესს იჩენს დემოკრატიული ღირებულებებისადმი", ნათქვამია ორგანიზაციის ვებ-გვერდზე. სრულად... წყარო: www.ombudsman.ge

თბილისი. ფონდმა „ღია საზოგადოება საქართველომ" პანკისის ხეობაში ეროვნული უმცირესობის სამოქალაქო ინტეგრაციის ხელშეწყობის მიზნით, მხარი დაუჭირა პროექტს, რომლის ფარგლებშიც პანკისის ხეობაში სათემო რადიო შეიქმნება. „WAY - სათემო რადიოსთვის ამ სახელის დარქმევა პანკისის ხეობაში მცხოვრები ახალგაზრდების ინიციატივაა. WAY ინგლისურად გზას ნიშნავს, ჩეჩნურად - ჩვენი. პროექტი ითვალისწინებს რადიოს ამუშავებას (ინტერნეტმაუწყებლობა), სათემო აქტივისტების მოზიდვას, ღია დიალოგისა და დემოკრატიული პროცესების ხელშეწყობას, საინფორმაციო გადაცემების მომზადებას ქართულ და ჩეჩნურ ენებზე. რადიოს მიერ განსაკუთრებული ყურადღება დაეთმობა იმ პრობლემების გაშუქებას, რომელიც პანკისის ხეობის მოსახლეობას აწუხებს, რაც თემისთვის პრიორიტეტულია", ნათქვამია ორგანიზაციის ვებ-გვერდზე. სრულად... წყარო: www.osgf.ge