თბილისი. საქართველოს ჟურნალისტური ეთიკის ქარტია აქვეყნებს გადაწყვეტილებას საქმეზე: გიორგი ყიფიანი მაია ასათიანის წინააღმდეგ. „განცხადების თანახმად, ქარტიის პრინციპები დაირღვა 2016 წლის 28 იანვარს, ტელეკომპანია „რუსთავი 2 – ის" ეთერში გასულ გადაცემაში „პროფილი", რომლის წამყვანიც მაია ასათიანი იყო და ეხებოდა არასრუწლოვანთა სუიციდს. საბჭომ მიიჩნია: მაია ასათიანმა დაარღვია ქარტიის პირველი და მე-10 პრინციპი, მაია ასათიანს არ დაურღვევია ქარტიის მე-8 პრინციპი," ნათქვამია ორგანიზაციის ვებ-გვერდზე. სრულად... წყარო: qartia.org.ge

სამეგრელო. 30 მაისს, რუხის საჯარო სკოლაში ჩატარდა პროგრამის პრეზენტაცია და ტრენინგი თემაზე „ტოლერანტობა". „ასევე მოეწყო მოკლემეტრაჟიანი ანიმაციის ჩვენება და განხილვა. ახალგაზრდებს მიეცათ შესაძლებლობა ენახათ და განეხილათ 2011 წლის მულტიმედიური ფილმი „Zero”, რომელიც თვალსაჩინოდ წარმოაჩენს ადამიანებში განსხვავებულობის აღიარებისკენ მზაობისა და შემწყნარებლობის დაბალ დონეს. დისკუსიის პროცესში ახალგაზრდებმა აქტიურად გამოხატეს საკუთარი აზრი ფილმთან და შეხვედრის თემასთან დაკავშირებით," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

სამცხე-ჯავახეთი. 20 მაისიდან 23 მაისამდე ბორჯომში, კერძოდ ლიკანში, პროექტ „PITA”-ში ჩართული ახალგაზრდებისათვის გაიმართა 3 დღიანი ტრენინგი ეთნიკური ტოლერანტობის თემაზე. „სამუშაო შეხვედრას ესწრებოდა 20 ახალგაზრდა მონაწილე გორისა და ახალციხის მუნიციპალიტეტებიდან, რომლებიც ორ სხვადასხვა ეთნიკურ კულტურას (ქართულ და სომხურ) წარმოადგენენ. შეხვედრის მიზანი იყო ტოლერანტობის მნიშვნელობის არსის გაგება მრავალ ეთნიკურ საქართველოში და ორ ეთნიკურად განსხვავებული კულტურის ახალგაზრდების დამეგობრების ხელშეწყობა," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

აჭარა. 18 მაისს, მახინჯაურის საჯარო სკოლაში გაიმართა დისკუსია თემაზე: ბავშვთა მიმართ ფსიქოლოგიური ძალადობა. დისკუსიას უძღვებოდა ბათუმის სახელმწიფო უნივერსიტეტის სტუდენტი მარიამ ათაბაგი. შეხვედრა გაიმართა პროექტის „ახალგაზრდებში დემოკრატიული იდეების პოპულარიზაცია" ფარგლებში, რომელიც ხორციელდება დემოკრატიის მხარდამჭერი ნაციონალური ფონდის (NED) დაფინანსებით", ნათქვამია ორგანიზაცის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. „კავკასიური სახლი" და ჰაინრიჰ ბიოლის ფონდის სამხრეთ კავკასიის რეგიონული ბიურო იწვევს ბაკალავრიატის დამამთავრებელი კურსებისა და მაგისტრატურის სტუდენტებს კონფერენციაში მონაწილეობის მისაღებად. კონფერენციის ძირითად თემას წარმოადგენს მწვანე პოლიტიკა და ეკონომიკა, როგორც პროგრესული და მდგრადი განვითარების წინაპირობა. „სამწუხაროდ საქართველოში, ნეოლიბერალური პოლიტიკის გაბატონებასთან ერთად, სულ უფრო უგულვებელყოფილი ხდება მდგრადი განვითარების საკითხები. ბოლო 20 წლის განმავლობაში საქართველოში მოხდა ეკონომიკური ზრდის ფეტიშიზაცია, რის შედეგადაც ქვეყანაში გაიზარდა უთანასწორობის მაჩვენებელი. ჯინის კოეფიციენტის მიხედვით, საქართველო უთანასწორობის მხრივ ლიდერობს რეგიონში. სამწუხაროდ პოლიტიკური ელიტები, სწორედ ეკონომიკური ზრდის პერსპექტივას იყენებენ ისეთი პროექტების განსახორციელებლად, რომელსაც დიდი ზიანი მოაქვს გარემოსთვის. ამ პრობლემებიდან გამომდინარე კონფერენციის მიზანია წაახალისოს დისკუსია ახალგაზრდებში რიგ საკითხებზე...," ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

2016 წლის ევროპის დღეებს საქართველოს რეგიონები მრავალფეროვანი ღონისძიებებით შეუერთდა. „მოეწყო სხვადასხვა საგანმანათლებლო, შემეცნებითი, კულტურული თუ გასართობი აქტივობა, დებატები, კონფერენციები, საჯარო ლექციები, ინტელექტუალური თამაშები, ჯანსაღი ცხოვრების მხარდამჭერი აქტივობები. დაგეგმილია რიგი საინფორმაციო შეხვედრები საჯარო და კერძო სკოლებში, უნივერსიტეტებში, მათ შორის საქართველოს საპატრიარქოს დაქვემდებარებაში მყოფ საგანმანათლებლო დაწესებულებებში," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდის სოციალურ ქსელში

  სამეგრელო. ასოციაცია „ათინათის" ახალგაზრდული კლუბის წევრები გაცვლითი პროგრამის ფარგლებში იმყოფებოდნენ გორის ახალგაზრდულ ცენტრში, პროექტი „ნდობის მშენებლობა სამხრეთ კავკასიაში" ფარგლებში. „3 დღის მანძილზე განხორციელდა ზუგდიდისა და გორის ახალგაზრდების ერთობლივი აქტივობები, ტრენინგები, სემინარები და სასწავლო ვიზიტები," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში  

აჭარა. 15 მაისს, ბათუმის სახელმწიფო უნივერსიტეტის სააქტო დარბაზში, საჯარო ლექცია-მოხსენება გააკეთეს ილიას სახელმწიფო უნივერსიტეტის პროფესორებმა ლევან ბერძენიშვილმა და ლევან გიგინეიშვილმა. მომხსენებლებმა ისაუბრეს უმაღლესი განათლების განსაკუთრებულ მნიშვნელობასა და როლზე. ასევე, უმაღლესი განათლების დღევანდელ მდგომარეობასა და ბოლონიის პროცესის შესახებ. ღონისძიება ჩატარდა თანამშრომლობის და განვითარების რეგიონული ქსელი - „R N C D-ს" პროექტის - „უმაღლესი განათლების წახალისება და პოპულარიზაცია აჭარის რეგიონული განვითარებისათვის" ფარგლებში, რომლის მიზანიცაა აჭარის მაღალმთიანი სკოლის მოსწავლეებისთვის უმაღლესი განათლების წახალისება და პროფესიული არჩევანის უკეთესი პრაქტიკის დანერგვა.

თბილისი. 13 მაისს, ახალგაზრდა პედაგოგთა კავშირის ოფისში გაიმართა თანატოლგანმანათლებელთა სამუშაო შეხვედრა და სემინარი. „შეხვედრაზე ახალგაზრდებს შესაძლებლობა მიეცათ მიეღოთ ინფორმაცია ტრენინგის ჩატარების ტექნიკების შესახებ, ასევე შეემუშავებინათ სილაბუსი, რომლის მიხედვითაც თანატოლგანმანათლებლები ჩაატარებენ ტრენინგებს. შეხვედრა ორგანიზებული იქნა „ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის" (PITA) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) ფინანსური მხარდაჭერით. პროგრამის პარტნიორი ორგანიზაციაა - „ახალგაზრდა პედაგოგთა კავშირი", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. 13 მაისს, ომბუდსმენმა რეკომენდაციით მიმართა საქართველოს მთავრობას, შეიმუშავოს „უმაღლესი განათლების შესახებ" საქართველოს კანონში შესატანი ცვლილებების პროექტი. „სახალხო დამცველი მიიჩნევს, რომ სტუდენტის უფლება, არჩეულ იქნას ფაკულტეტის წარმომადგენლობით ორგანოში და მონაწილეობა მიიღოს უნივერსიტეტის მართვის პროცესში, გაუმართლებლად არის დაკავშირებული მის გაერთიანებისადმი წევრობასთან, რამდენადაც, აღნიშნული წარმოადგენს ბარიერს სტუდენტისთვის მისი უფლებებით სარგებლობისას და არანაირი პრაქტიკული დანიშნულება არ გააჩნია. მსგავსი მიდგომა კი გონივრული გამართლების გარეშე არათანაბარ მდგომარეობაში აყენებს იმ სტუდენტებს, რომლებიც არ არიან თვითმმართველობის წევრები, რაც წარმოადგენს პირდაპირ დისკრიმინაციას გაერთიანების წევრობის ნიშნით", ნათქვამია ომბუდსმენის ვებ-გვერდზე. სრულად... წყარო: ombudsman.ge

თბილისი. გარემოსდაცვითი ინფორმაციისა და განთლების ცენტრის „ეკოლიდერებმა" ვაკის პარკის ტერიტორიაზე დასუფთავების აქცია მოაწყვეს. „ეკოლიდერები საკუთარი ინიციატივით ირჩევენ ლიდერს, რომელთან ერთადაც ყოველკვირეულად გარემოსდაცვით თემაზე სხვადასხვა ღონისძიებების ჩატარებას გეგმავენ. შეგახსენებთ, რომ გარემოსდაცვითი ინფორმაციისა და განათლების ცენტრში 46 მოსწავლე გახდა ეკოლიდერი, ისინი ორი თვის განმავლობაში მწვანე ეკონომიკის, ნარჩენების მართვის, ბიომრავალფეროვნების, წყლის რესურსების დაცვის, გარემოსდაცვითი პრინციპების, პროექტების წერისა და პიარ კამპანიის დაგეგმვის შესახებ სწავლობდნენ", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია უმაღლესი განათლების კანონის იმ ნორმას, რაც სტუდენტურ თვითმმართველობას პრივილეგიებს ანიჭებს საკონსტიტუციო სასამართლოში ასაჩივრებს. „კონსტიტუციური სარჩელით სადავოდ არის გამხდარი ,,უმაღლესი განათლების შესახებ" კანონის ის ნორმები, რაც, სტუდენტური თვითმმართველობის წევრების გარდა, სხვა სტუდენტებს ართმევს უფლებას, აირჩიონ აკადემიური საბჭოს წევრები. ასევე, გასაჩივრებული ნორმებით, მხოლოდ სტუდენტური თვითმმართველობის წევრები ღებულობენ მონაწილეობას ფაკულტეტის საბჭოს დაკომპლექტების პროცესში. ფაკულტეტის საბჭოს წევრი შეიძლება იყოს მხოლოდ და მხოლოდ სტუდენტური თვითმმართველობის წევრი. თვითმმართველობის არაწევრ სტუდენტს არა აქვს, აკადემიური საბჭოს წევრის არჩევის შესაძლებლობა. დამოუკიდებელი სტუდენტი ვერც ფაკულტეტის საბჭოს წევრს აირჩევს და ვერც ამ ორგანოში იქნება არჩეული", ნათქვამია ორგანიზაციის ვებ-გვერდზე. სრულად... წყარო: gyla.ge

სამეგრელო. ასოციაცია „ათინათის" წარმომადგენლები მოხალისეობრივად ატარებენ ბიზნესის უნარ-ჩვევების გაკვეთილებს აფხაზეთის #1, #11 და ზუგდიდის #11 საჯარო სკოლების მოსწავლეებისათვის. „პროექტის (რომელსაც ახორციელებს საქართველოს განათლებისა და მეცნიერების სამინისტრო აშშ საერთაშორისო განვითარების სააგენტოს (USAID) მხარდაჭერით) მთავარი პარტნიორია ჯუნიორ ეჩივმენტი, რომელიც დაწყებითი კლასების მოსწავლეებს სთავაზობს ბიზნესისათვის საჭირო უნარების, სააზროვნო და პრაქტიკული ჩვევების განვითარების შესაძლებლობას, რაც ხელს შეუწყობს მათ მომზადებას საქართველოს ეკონომიკაში მნიშვნელოვანი როლის შესასრულებლად", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

შიდა ქართლი. გორის სახელმწიფო სასწავლო უნივერსიტეტში პროექტ „უცნობი" საბჭოთა წარსულის ფარგლებში მეოთხე ლექცია „საბჭოთა ქალი" გაიმართა. „თემაზე თბილისის ივ. ჯავახიშვილის სახელობის სახელმწიფო უნივერსიტეტის პროფესორმა, ფილოსოფოსმა ლელა გაფრინდაშვილმა ისაუბრა. ლექციის შემდეგ ქალის როლის შესახებ დისკუსია და თემის შეჯამება მოეწყო. პროექტი ხორციელდება ჰაინრიჰ ბიოლის ფონდის სამხრეთ კავკასიის რეგიონული ბიუროსა და გორის სახელმწიფო სასწავლო უნივერსიტეტის მხარდაჭერით", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. გარემოსდაცვითი ინფორმაციისა და განათლების ცენტრში დაიწყო ტრენინგ კურსი ეკოპროექტების მენეჯმენტი. ტრენინგის 11 მონაწილე ოთხი დღის განმავლობაში შეისწავლის: ეკოპროექტის წერის ტექნიკას, ფონდების მოძიების მექანიზმებს, ეკოპროექტების პიარსა და ლობირებას. სრულად... წყარო: ორგანიზაციის ვებ-გვერდი სოციალურ ქსელში

თბილისი. 27 აპრილს, ევროპის სახლში, კონკურსის „სტუდენტები სოციალური მეწარმეობის მხარდასაჭერად 2016” ნახევარფინალი გაიმართა. ფინალში მოსახვედრად ერთმანეთს 24 გუნდი ეჯიბრებოდა, რომელთა შერჩევაც 90-მდე აპლიკანტიდან მოხდა. კონკურსი მიმდინარეობს ორ ნომინაციაში. I ნომინაცია: არსებული სოციალური საწარმოს განვითარების საუკეთესო ბიზნეს-გეგმა; II ნომინაცია: ახალი სოციალური საწარმოს შექმნის საუკეთესო ბიზნეს-გეგმა. ჟიურიმ, რომელიც დაკომპლექტებულია საქართველოში მოღვაწე წარმატებული ბიზნეს-კომპანიების წარმომადგენლებისგან, გამოავლინა 4-4 გამარჯვებული გუნდი. წინ ფინალისკენ მიმავალი რთული, მაგრამ საინტერესო გზაა: ერთი თვის განმავლობაში გუნდები გააგრძელებენ ბიზნესგეგმებზე მუშაობას. პირველი ნომინაციის გამარჯვებული ჯილდოს სახით მიიღებს დაფინანსებას სოციალური მეწარმეობის საერთაშორისო კონფერენციაში მონაწილეობის მისაღებად. ხოლო მეორე ნომინაციაში გამარჯვებულ გუნდს გადაეცემა 20 000 ლარი სოციალური საწარმოს შესაქმნელად. ყოველწლიური სტუდენტური კონკურსი „სტუდენტები სოციალური მეწარმეობის მხარდასაჭერად 2016” უკვე მეოთხე წელია იმართება საქართველოს სტრატეგიული კვლევებისა და განვითარების ცენტრისა და ევროპის ფონდის ორგანიზებით. კონკურსის მიზანია ახალგაზრდებში სოციალური მეწარმეობის კონცეფციის პოპულარიზაცია და სტუდენტების აქტიური ჩართვა სოციალური მეწარმეობის განვითარების პროცესში. სრულად... წყარო: საქართველოს სტრატეგიული კვლევებისა და განვითარების ცენტრი

თბილისი. ომბუდსმენის 2015 წლის საპარლამენტო ანგარიშის ერთ-ერთ რელევანტურ საკითხს ბავშვთა მინდობით აღზრდისა და რეინტეგრაციის სახელმწიფო ქვეპროგრამების მონიტორინგი წარმოადგენს. „მონიტორინგის დროს შემოწმდა მინდობით აღზრდისა და რეინტეგრაციის პროცედურების განმახორციელებელი ორგანოების მიერ აღნიშნული სერვისების შესრულება გაეროს ბავშვის უფლებათა კონვეციის (CRC), ევროპის მინისტრთა საბჭოს შესაბამისი რეზოლუციებისა და ვენეციის კომისიის რეკომენდაციების საფუძველზე, შემდეგი მიმართულებებით: ძალადობის, ექსპლუატაციისა და სხვა სახის არასათანადო მოპყრობა, სიღარიბისა და ცხოვრების არასათანადო პირობებისაგან დაცვა, კონფიდენციალურობა და ინდივიდუალური მიდგომა, ხარისხიანი და დროული ჯანმრთელობის უფლება, განათლების უფლების თანაბარი ხელმისაწვდომობა, დისკრიმინაცია და არათანასწორი მოპყრობა", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

თბილისი. გაეროს ბავშვთა ფონდის კამპანია - ბავშვზე ზრუნვა გრძელდება. ყოველ ორშაბათსა და ხუთშაბათს დაელოდეთ საინტერესო რჩევებს უნისეფისგან ბავშვის აღზრდის შესახებ. სრულად... წყარო: ორგანიზაციის ვებ-გვერდი სოციალურ ქსელში

არასამთავრობო ორგანიზაცია „ადამიანი გაჭირვებაში" მხარდაჭერით „რეგიონული განვითარების რესურსცენტრის" ორგანიზებით წყალტუბოს თემში მცხოვრები ახალგაზრდებისთვის ახორციელებს პროექტს „აქტიური მოქალაქეობა ჩვენი მომავლისთვის". პროექტის ფარგლებში 22 აპრილიდან 27 აპრილის ჩათვლით გაიმართება ბანაკი ბაკურიანში. ტრენინგები ჩატარდება FLEX პროგრამის კურსდამთავრებულებისა და „მშვიდობის კორპუსის" მოხალისეების მიერ, როგორც ქართულ ასევე ინგლისურ ენაზე. სრულად... წყარო: www.rdrc.ge

შიდა ქართლი. 13 აპრილს, გორის სახელმწიფო სასწავლო უნივერსიტეტში გაიმართა სპექტაკლი „ბოსტანი კონფლიქტის ზონაში". სპექტაკლში მონაწილეობდნენ საზოგადოება „ბილიკის" დღის ცენტრის აღსაზრდელები და სოფელ წითელუბანში მცხოვრები მესხი მოზარდები. აღნიშნული ღონისძიება გაიმართა საზოგადოება „ბილიკის" და კავშირი „ბერილუსის" პროექტის „ჩემს შესახებ" და საქართველოს განათლების და მეცნიერების სამინისტროს სოციალური ინკლუზიის ხელშეწყობის ქვეპროგრამის თანამშრომლობით გამოცხადებული სასკოლო თეატრალური ფესტივალის ფარგლებში. წყარო: საზოგადოება „ბილიკის" ვებგვერდი სოციალურ ქსელში

აჭარა. 15 აპრილს სამოქალაქო საზოგადოების ინსტიტუტის ბათუმის ფილიალმა შეხვედრა გამართა ახალგაზრდებთან. შეხვედრის დროს შეჯამდა ტრენინგ კურსის „ადგილობრივი თვითმმართველობა და მოქალაქეთა მონაწილეობა" შედეგები, განხილული იქნა ახალგაზრდების მიერ შემუშავებული ინიციატივები, რომელიც წარედგინება ბათუმის თვითმმართველობას განსახილველად. ასევე დაისახა სამომავლო თანამშრომლობის გზები. შეხვედრის ბოლოს დამსწრეებს გადაეცათ სიესაის სერტიფიკატები. შეხვედრის მასპინძელი იყო ბათუმის ამერიკული კუთხე. სამოქალაქო საზოგადოების ინსტიტუტი განაგრძობს ახალგაზრდების როლის გაზრდას თვითმმართველობის საქმიანობაში, სულ მალე გამოცხადდება ახალგაზრდების მიღება ახალი ტრენინგ ციკლისთვის.

სამეგრელო. 14 აპრილს, ასოციაცია „ათინათის" ახალგაზრდული ცენტრის წევრებთან გაიმართა შეხვედრა საქართველოს სახალხო დამცველთან არსებული ტოლერანტობის ცენტრის მიერ ორგანიზებულ ვიქტორინასთან „რელიგიები და ეთნოსები საქართველოში" დაკავშრებით. „ვიქტორინა მიზნად ისახავს ტოლერანტობის კულტურის ხელშეწყობას და ახალგაზრდებს შორის საქართველოს რელიგიური და ეთნიკური მრავალფეროვნების შესახებ ცოდნის ამაღლებას. აქტივობა ჩატარდა ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის (PITA) ფარგლებში", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში