თბილისი. საქართველოს საზოგადოებრივი ორგანიზაციების და პოლიტიკური პარტიების ნაწილი პარლამენტის თავმჯდომარეს - კახა კუჭავას წერილით მიმართავენ. „ადამიანის უფლებებზე მომუშავე ორგანიზაციები და აქტივისტები მრავალი წელია ვიბრძვით გენდერული თანასწორობისათვის. 2021 წლის 18 ივლისს შალვა პაპუშვილის და ირაკლი ზარქუას მიერ პოლიტიკოსი ქალების მიმართ განხორციელებული ძალადობა აზრს უკარგავს თანასწორობისთვის ბრძოლაში მიღწეულ წარმატებას. მიუღებელია პარლამენტის თავმჯდომარის დუმილი და უმოქმედობა აღნიშნულ პრობლემაზე, უფრო მეტიც, ეს ძალადობას ახალისებს. მოგიწოდებთ, გამოიყენოთ თქვენს ხელთ არსებული ყველა მექანიზმი ადეკვატური რეაგირებისათვის, რათა მოძალადე პარლამენტის წევრებმა - შალვა პაპუაშვილმა და ირაკლი ზარქუამ, სათანადო პასუხი აგონ ქალი დეპუტატების მიმართ გამოვლენილი შეურაცხმყოფელი და ძალადობრივი ქმედებების გამო“, ნათქვამია ერთობლივ განცხადებაში. სრულად... წყარო: transparency.ge

თბილისი. სოციალური სამართლიანობის ცენტრი ეხმიანება მარნეულის მუნიციპალიტეტის სოფელ ზემო სარალში ყოფილი ქმრის მიერ ცოლისა და სიმამრის მკვლელობის ფაქტს და შინაგან საქმეთა სამინისტროს მოუწოდებს, გამოძიების მიმდინარეობასთან ერთად მიიღოს სათანადო ზომები გარდაცვლილებისა და ბრალდებულის ნათესავებს შორის შესაძლო კონფლიქტის პრევენციის მიზნით.  „ბრალდებულის დაკავების მიუხედავად პოლიციამ ვერ შეძლო შემდგომი კონფლიქტის პრევენცია და როგორც მედიაში გავრცელებული ინფორმაციით ირკვევა, მკვლელობის შემდგომ, გარდაცვლილების ორი ნათესავი ბრალდებულის მამას ფიზიკურად გაუსწორდა და დააზიანეს ოჯახის კუთვნილი ავტომობილი“. სრულად... წყარო: socialjustice.org.ge

თბილისი. გაეროს ქალთა ორგანიზაცია და თბილისის სახელმწიფო უნივერსიტეტის ეკონომიკის საერთასორისო სკოლა (ISET) ახალ, ერთობლივ კვლევას აქვეყნებს საქართველოში დასაქმებული დედების შრომითი უფლებების შესახებ. „საქართველოში დასაქმებული ქალების მხოლოდ 3%-ს აქვს კანონით მინიჭებული უფლება, ისარგებლოს დედობის სრულად ანაზღაურებადი შვებულებით. გამონაკლისია შემთხვევები, როდესაც დამსაქმებელი დამატებით ანაზღაურებას მათ საკუთარი სურვილით უხდის. დედობის შვებულების სახელმწიფო კომპენსაცია კი თვეში 167 ლარია, რაც საარსებო მინიმუმზე ნაკლებია. კვლევის შედეგები ცხადყოფს, რომ საქართველოს შრომის კანონმდებლობა დასაქმებულთა სხვადასხვა ჯგუფისთვის განსხვავებულ სტანდარტებს აწესებს. ბავშვის მოვლის ანაზღაურებადი შვებულებაც ქალებისა და კაცებისთვის არათანაბრადაა ხელმისაწვდომი, რის გამოც პროფესიულ საქმიანობას უმეტესად ქალები თმობენ. ოჯახის საქმეებზე პასუხისმგებლობის აღებაც ძირითადად ქალებს უწევთ, ამიტომ რეპროდუქციულ ასაკში ისინი არაპროდუქტიულ თანამშრომლებად და ნაკლებად მიმზიდველ კადრად განიხილებიან. საბოლოოდ, ეს გარემოებები სამუშაო ძალაში ქალთა მონაწილეობაზე ნეგატიურად აისახება“. სრულად... წყარო: georgia.unwomen.org

თბილისი. კონსულტაციისა და ტრენინგის ცენტრის მიერ გამოცხადებული საგრანტო კონკურსის „ინოვაციური სოციალური იდეები კოვიდ-19-ის საპასუხოდ” ფარგლებში დაფინანსებული კიდევ ერთი პროექტი დასრულდა. „2020 წლის სექტემბრიდან 2021 წლის ივნისის ჩათვლით კონსულტაციისა და ტრენინგის ცენტრის დაფინანსებით ორბელიანი საქართველო ახორციელებდა პროექტს „მეტი ქალი - მეტი შესაძლებლობა“. პროექტის მიზანი იყო ახალგაზრდა ქალების კარიერული განვითარებისთვის საჭირო უნარების განვითარება და ეკონომიკური საქმიანობის ხელშეწყობა“.                                            წყარო: ორგანიზაციის გვერდი სოციალურ ქსელში

თბილისი. გაეროს ქალთა ორგანიზაცია, საჯარო სამსახურის ბიუროსთან თანამშრომლობით, სამუშაო შეხვედრას მართავს. „შეხვედრის მიზანია საჯარო სამსახურში სამუშაო ადგილზე სექსუალურ შევიწროებაზე რეაგირების მექანიზმების გაძლიერება და გენდერულად მგძნობიარე სამუშაო გარემოს ხელშეწყობა“.                                                         წყარო: ორგანიზაციის გვერდი სოციალურ ქსელში

თბილისი. საქართველოს პოლიტიკის ინსტიტუტი (GIP) აქვეყნებს „მომავალ ლიდერთა სკოლის“ (#ELS2021) მონაწილე და ბლოგების კონკურსში გამარჯვებულ თამარ ოგანოვას ბლოგპოსტს: „ქალები პოლიტიკაში: მიღწევები და გამოწვევები“. „დღეს ქალთა უფლებების დაცვა და გენდერული თანასწორობისკენ სწრაფვა თანამედროვე მსოფლიოს უდიდესი გამოწვევაა. ნებისმიერი ქვეყნის დემოკრატიის ერთ-ერთი საზომი სწორედ გადაწყვეტილების მიღების პროცესში ქალთა ჩართულობა და მათი უფლებების დაცვის ხარისხია. მიუხედავად ქალთა უფლებადამცველების დაუღალავი შრომისა, კიდევ უამრავი გამოწვევა რჩება ქალთა უფლებების დაცვის კუთხით. ბლოგში მიმოხილულია ქალთა უფლებრივი მდგომარეობა ქართულ პოლიტიკაში, კერძოდ, ამ მიმართულებით არსებული მიღწევები და გამოწვევები“. სრულად... წყარო: gip.ge

თბილისი. გააღვიძე აქტივიზმი • Activate Activism-ის მოძრაობა დღეიდან კონკრეტულად ქალთა შრომითი უფლებების გასაუმჯობესებლად იმუშავებს. „ჩვენი გუნდი წლებია ამ საკითხებთან დაკავშირებით სხვადასხვა პლატფორმის აქტივობებშია ჩართული, ხოლო დღეიდან გააღვიძე აქტივიზმი იქნება მოძრაობა, რომელიც გაგვაერთიანებს საერთო ბრძოლაში - თანასწორობისა და სამართლიანობისთვის. გახსოვდეს, „ყოველი სოციალური წარმატების დასაწყისში იყო ქმედება.“ გააღვიძე აქტივიზმი და შეეწინააღმდეგე კაპიტალისტური ექსპლუატაციის ეკლებს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი „რიონის ხეობის მცველების” მიერ ძალადობრივი აქციის მხარდაჭერას მიუღებლად მიიჩნევს. „ჩვენთვის რიონის ხეობის გადარჩენის მოძრაობა ბოლო წლებში ჩვენი მოქალაქეების დემოკრატიული თვითორგანიზების უნიკალური მცდელობა იყო, რომელიც დამოუკიდებლობის შემდეგ ქვეყნის უთანასწორო და არაადამინური ეკონომიკური და პოლიტიკური განვითარების ლოგიკას და წესრიგს სწორ სახელდებას აძლევდა. თუმცა, მოძრაობის ლიდერების ბოლო დღეების გადაწყვეტილებები, სამწუხაროდ, არ გვიტოვებს შესაძლებლობას, უსამართლო, გაუმჭვირვალე და არადემოკრატიული ენერგოპოლიტიკის წინააღმდეგ ბრძოლაში კვლავ რიონის ხეობის გადარჩენის მოძრაობის მოკავშირეებად დავრჩეთ“. სრულად... წყარო: socialjustice.org

თბილისი. USAID/PROLoG-ის მხარდაჭერით ქალთა და ბავშვთა მიმართ ძალადობისა და ოჯახში ძალადობის სამართლებრივ საკითხებზე სახელმძღვანელო მომზადდა. „სახელმძღვანელოში თავმოყრილია ქალთა და ბავშვთა მიმართ ძალდობისა და ოჯახში ძალადობის სფეროში არსებული კანონმდებლობის განმარტებები. ასევე, ცალკეული ინსიტუტების დახასიათებისას განხილულია შესაბამისი მაგალითები და სასამართლო გადაწყვეტილებები, რაც კიდევ უფრო ნათელსა და გასაგებს ხდის მათ შინაარსს, ხოლო სახელმძღვანელოს მეტ პრაქტიკულ დანიშნულებას მატებს. სახელმძღვანელოს ავტორია სამართლის მაგისტრი და ადამიანის უფლებათა ექსპერტი, გოგა ხატიაშვილი“. სრულად... წყარო: ორგანიზაციის გვერდი სოციალურ ქსელში

თბილისი. გაეროს ქალთა ორგანიზაციასთან თანამშრომლობით, ათეამ ქვეყნის 64-ვე მუნიციპალიტეტისთვის სპეციალური სახელმძღვანელო შექმნა, რომელიც გენდერული თანასწორობის სამოქმედო გეგმების შემუშავების პროცესში ერთიანი მიდგომებისა და სტანდარტების დანერგვას ემსახურება. სრულად... წყარო: georgia.unwomen.org

თბილისი. „კოალიცია თანასწორობისთვის“ წევრი ორგანიზაციები ხელისუფლებას ჰომოფობიური ჯგუფების მხრიდან ძალადობის დაუყოვნებლივი აღკვეთისა და სათანადო გამოძიებისაკენ მოუწოდებენ. „სამწუხაროდ, დღეს კიდევ ერთხელ გავხდით აღმასრულებელი ხელისუფლების მხრიდან ძალადობის მიზანმიმართული წახალისების მოწმე. ხელისუფლებამ კვლავ არ უზრუნველყო “ღირსების მარშის“ შეკრების თავისუფლება და არ მიიღო უსაფრთოების ეფექტიანი და დროული ზომები, რითიც წაახალისა ძალადობრივი ჯგუფები, ემოქმედათ კონსტიტუციისა და კანონის მიღმა. მიმდინარე პროცესებზე სრული პასუხისმგებლობა ქვეყნის ხელისუფლებას ეკისრება“. სრულად... წყარო: www.equalitycoalition.ge

თბილისი. ქალთა საინფორმაციო ცენტრი აქვეყნებს 2021 წლის CEDAW კომიტეტისთვის მომზადებულ ქალთა მიმართ დისკრიმინაციის ყველა ფორმის აღმოფხვრის შესახებ კონვენციის შესრულების ალტერნატიულ ანგარიშს. „ანგარიშის საწყისი პროექტი მომზადდა არასამთავრობო ორგანიზაცია ქალთა საინფორმაციო ცენტრის მიერ, ხოლო ანგარიშის საბოლოო შემუშავების პროცესში ჩართული იყო 29 სამოქალაქო საზოგადოების ორგანიზაცია, რომლებიც მუშაობენ გენდერულ თანასწორობასა და ქალთა უფლებების საკითხებზე საქართველოში. ანგარიში შემუშავდა გაეროს ქალთა ორგანიზაციისა და ნორვეგიის მთავრობის ტექნიკური და ფინანსური მხარდაჭერით“. სრულად... წყარო: ორგანიზაციის გვერდი სოციალურ ქსელში

ივნისის თვეში სახალხო დამცველის აპარატის გენდერის დეპარტამენტისა და აღმოსავლეთ საქართველოს სამმართველოს ორგანიზებით, ქალთა უფლებებსა და გენდერული თანასწორობის საკითხებზე, საინფორმაციო შეხვედრები გაიმართა კახეთის, ქვემო ქართლის, სამცხე ჯავახეთის, მცხეთა-მთიანეთისა და შიდა ქართლის მუნიციპალიტეტებში. სრულად... წყარო: ombudsman.ge

თბილისი. ქალთა მიმართ ძალადობის წინააღმდეგ ცნობიერების ასამაღლებლად, საქართველოს მორაგბეთა ეროვნული ნაკრები 2 და 9 ივლისს მსოფლიოს მოქმედი ჩემპიონის, სამხრეთ აფრიკის წინააღმდეგ გაეროს ქალთა ორგანიზაციის ლოგოიანი კვართებით ითამაშებს. „მატჩების მნიშვნელობას რამდენიმე ფაქტორი ზრდის: სამხრეთ აფრიკისთვის 2019 წლის მსოფლიო ჩემპიონატის მოგების შემდეგ ეს პირველი თამაშები იქნება, 2003 წლის შემდეგ საქართველოს და სამხრეთ აფრიკის გუნდები ერთმანეთს პირველად შეხვდებიან და ბოლოს: მატჩებს რაგბის სამყაროც განსაკუთრებით ელოდება, რადგანაც, პანდემიის გამო, არაერთი მასშტაბური ღონისძიება, მათ შორის - სპორტულიც, ხანგრძლივად იყო შეჩერებული“. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებათა დაცვის საერთაშორისო ორგანიზაციამ - „თანასწორობა ახლა-მ/Equality Now“, რომელიც მუშაობს მთელს მსოფლიოში ქალების და გოგოების უფლებრივი მდგომარეობის გაუმჯობესებისთვის, საქართველოს ახალგაზრდა იურისტთა ასოციაციის წარმოებაში არსებულ საქმეზე საქართველოს უზენაეს სასამართლოში სასამართლო მეგობრის მოსაზრება წარადგინა. საქმე შეეხება სექსუალური შევიწროების მსხვერპლის უფლებას, საჯაროდ ისაუბროს საკუთარ გამოცდილებაზე. ორგანიზაციის ინფორმაციით, მიმდინარე დავის ფარგლებში, თბილისის საქალაქო და სააპელაციო სასამართლოებმა ადამიანის უფლებების დაცვის თვალსაზრისით სახიფათო სტანდარტი დაადგინეს და მსხვერპლის აღნიშნული უფლება შეზღუდეს. სრულად... წყარო: gyla.ge

თბილისი. ქალთა მოძრაობის ინფორმაციით, 21 ივნისს, საქართველოს პარლამენტის იურიდიულმა კომიტეტმა საქართველოს ორგანული კანონის „საქართველოს საარჩევნო კოდექსის“ ცვლილებების შეტანის შესახებ კანონპროექტის მეორე მოსმენით განხილვისას არსებითად შეცვალა ადგილობრივი თვითმმართველობის არჩევნებისთვის პარტიული (პროპორციული) სიების შედგენის წესი.  ცვლილების თანახმად: პოლიტიკური პარტია ვალდებული იქნება 2028 წლამდე ჩასატარებელი ადგილობრივი თვითმმართველობის ყველა არჩევნებისთვის ისე შეადგინოს პარტიული სია, რომ სამი კანდიდატიდან ერთი მაინც იყოს განსხვავებული სქესის წარმომადგენელი. ორგანიზაციის განმარტებით, ეს ინიციატივა არსებითად აუარესებს საარჩევნო კოდექსის არსებულ ნორმას, რომელიც პოლიტიკურ პარტიას ავალდებულებდა, 2028 წლამდე ჩასატარებელ ადგილობრივი თვითმმართველობის ორგანოთა საერთო არჩევნებისთვის წარდგენილ სიაში ყოველი მეორე განსხვავებული სქესის კანდიდატი ჰყოლოდა. საზოგადოებრივი ორგანიზაციების ნაწილი მოუწოდებს პარლამენტს, პლენარულ სხდომაზე მხარი არ დაუჭიროს ინიცირებულ ცვლილებას, რაც შეასუსტებს ადგილობრივ დონეზე ქალთა წარმომადგენლობას, შეაფერხებს არსებითი თანასწორობის მიღწევას და საერთაშორისო ვალდებულებების შესრულებას. სრულად... წყარო: ქალთა მოძრაობის გვერდი სოციალურ ქსელში

თბილისი. საქართველოს სახალხო დამცველი აქვეყნებს სპეციალურ ანგარიშს, რომელიც ფემიციდის მონიტორინგის მექანიზმის ფარგლებში შემუშავდა და გაანალიზებულია 2019 წელს ჩადენილი დანაშაულები. „გენდერული ძალადობის უკიდურესი გამოვლინების, ფემიციდის პრევენციას ხელს უშლის ქალთა მიმართ და ოჯახში ძალადობის პრობლემასთან კომპლექსურად ბრძოლის და სახელმწიფო უწყებებს შორის კოორდინირებული მუშაობის მხრივ არსებული პრობლემები. საგანგებოდ უნდა აღინიშნოს, რომ ქალთა მიმართ და ოჯახში ძალადობასთან ბრძოლის საკითხებზე სოციალური მუშაობის მიმართულებით, კონკრეტული ღონისძიებები ამ დრომდე არ გატარებულა და სოციალური სამსახური კვლავ ფორმალურად ერთვება ძალადობის შემთხვევათა შესწავლის პროცესში. კვლავ პრობლემურია მოძალადისთვის ძალადობრივი დამოკიდებულებისა და ქცევის შეცვლაზე ორიენტირებული სავალდებულო კურსის გავლა“. სრულად... წყარო: ombudsman.ge

სამეგრელო. საქართველოში გაეროს მუდმივმა კოორდინატორმა საბინე მახლმა სამეგრელოს სოფელ ცაიშში, ოჯახში ძალადობის მსხვერპლებისა და ძალადობაგამოვლილი პირების კრიზისული ცენტრი მოინახულა. „ცაიშში კრიზისული ცენტრი 2019 წელს, არასამთავრობო ორგანიზაცია „სახლისა“ და ადგილობრივი მუნიციპალიტეტის თანამშრომლობის შედეგად, გაეროს ერთობლივი პროგრამის „გენდერული თანასწორობისთვის“ ფარგლებში, შვედეთის მთავრობის მხარდაჭერით ამოქმედდა. კრიზისული ცენტრი ძალადობის მსხვერპლებსა და ძალადობაგამოვლილ პირებს ფსიქოლოგიურ, სოციალურ და ეკონომიკურ დახმარებას, სარეაბილიტაციო, სამედიცინო, იურიდიულ და რეფერალურ მომსახურებებს სთავაზობს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

სამეგრელო. გაეროს მუდმივი კოორდინატორი საქართველოში საბინე მახლი ზუგდიდში ადგილობრივ მეწარმე და ფერმერ ქალებს შეხვდა. „მონაწილეები საბინე მახლს რეგიონში არსებულ ეკონომიკურ ვითარებაზე, მცირე და საშუალო ბიზნესზე პანდემიის გავლენაზე, სირთულეებსა და საჭიროებებზე ესაუბრნენ. შეხვედრის მეორე ნაწილი კი მეწარმე ქალების გამოწვევების შესახებ დისკუსიას დაეთმო. დამსწრე ქალები მცირე და საშუალო ბიზნესებს უძღვებიან. საკუთარი საქმიანობები მათ გაეროს ქალთა ორგანიზაციის პროექტის „ერთობლივი ძალისხმევა ქალთა ეკონომიკური გაძლიერებისთვის საქართველოში“ დახმარებით, ნორვეგიის მთავრობის მხარდაჭერით განავითარეს“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

სამეგრელო. გაეროს მუდმივი კოორდინატორი საქართველოში საბინე მახლი ანაკლიაში ადგილობრივი არასამთავრობო ორგანიზაციების წარმომადგენლებსა და დევნილ და კონფლიქტის შედეგად დაზარალებულ ქალებს შეხვდა. „შეხვედრის მონაწილეებმა ქალებზე, მშვიდობასა და უსაფრთხოებაზე გაეროს უშიშროების საბჭოს რეზოლუციების შესახებ 2018-2020 წლების ეროვნული სამოქმედო გეგმის ლოკალიზაციაზე, გადაწყვეტილების მიღების, სამშვიდობო და უსაფრთხოების პროცესებში დევნილი და კონფლიქტის შედეგად დაზარალებული ქალების ჩართულობაზე იმსჯელეს. ქალებმა გაეროს მუდმივ კოორდინატორს საკუთარი პრობლემები და მათ გადასაჭრელად საჭირო ხედვები გაუზიარეს“. სრულად... წყარო: ორგანიზაციის გვერდი სოციალურ ქსელში

თბილისი. 13 მაისს, ქალთა საინფორმაციო ცენტრის ორგანიზებით გაიმართა სამუშაო შეხვედრა, რომლის მიზანი ქალთა მიმართ დისკრიმინაციის ყველა ფორმის აღმოფხვრის შესახებ კონვენციის (CEDAW) შესრულების ალტერნატიული ანგარიშის სამუშაო ვერსიის წარდგენა და რეკომენდაციების ასახვა იყო. „ანგარიში მომზადებულია გენდერული თანასწორობის და ქალთა გაძლიერების სფეროში მომუშავე 18 არასამთავრობო ორგანიზაციისა და 3 ქსელის ჩართულობით და მისი მიზანია ქალთა მიმართ დისკრიმინაციის აღმოფხრვის კომიტეტს მიეწოდოს ალტერნატიული ინფორმაცია საქართველოში კონვენციით გათვალისწინებულ ქალთა უფლებებთან დაკავშირებით, სახელმწიფოს მიერ განხორციელებული ღონისძიებებისა და პროგრესის შესახებ“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. საქართველოში ევროპის საბჭოს ოფისის ინფორმაციით, 11 მაისს სტამბოლის კონვენცია 10 წლის გახდა. ვის იცავს სტამბოლის კონვენცია? „კონვენცია იცავს სიცოცხლეს; მას მოაქვს იმედი და უსაფრთხოების შეგრძნება მილიონობით ქალისთვის და გოგოსთვის; ის საჯაროს ხდის ქალთა მიმართ ძალადობას; ის ეხმარება მსხვერპლებს საუბარში, პროფესიონალებს უჩენს დახმარების შესაძლებლობას და გოგოებს და ქალებს ნდობას; ის იცავს ადამიანებს ოჯახში ძალადობისგან, იმის მიუხედავად თუ იურიდიულად როგორ განმარტავს ქვეყანა ოჯახსა და ქორწინებას; ის აძლიერებს ქალთა მიმართ პატივისცემას და ხელს უწყობს გოგოების და ქალების თანასწორობას“. სრულად... წყარო: ორგანიზაციის გვერდი სოციალურ ქსელში