თბილისი. სოციალური სამართლიანობის ცენტრი (ყოფილი EMC) ეხმიანება მიტროპოლიტი სტეფანეს მიერ მონაზონი სოსანას მიმართ გაკეთებულ განცხადებებს და გადაწყვეტილებებს. ორგანიზაცია მიიჩნევს, რომ „მიტროპოლიტი სტეფანეს მიერ მიღებული მკაცრი გადაწყვეტილებები გარდა იმისა, რომ საპატრიარქოს გადაწყვეტილების მიმართ კრიტიკულად განწყობილი ეპარქიის წევრების დევნის და დასჯის ნიშნებს ატარებს, ის მონაზვნების მიმართ ეკლესიაში უსამართლო, დამამცირებელ და ქალთმოძულე დამოკიდებულებას ავლენს. ის სხვა მონაზვნებშიც დაუცველობის განცდას ქმნის და ხელს უწყობს ქალების უხეში დაქვემდებარების და იერარქიზების ნორმალიზებას. უფრო მეტიც, მაღალი სასულიერო იერარქის მხრიდან გამოვლენილი ქალთმოძულეობა საზოგადოებაში ამგვარი განწყობების წახალისებას მოახდენს“. სრულად... წყარო: socialjustice.org.ge

გურია. გურიაში ქალთა ისტორიის თვე #WomensHistoryMonth აღინიშნა. „ღონისძიებების ფარგლებში, შეხვედრა გაიმართა გურიაში სახელმწიფო რწმუნებულს, გიორგი სახოკიასა და გაეროს მოსახლეობის ფონდის UNFPA საქართველოს ოფისის ხელმძღვანელს, ლელა ბაქრაძეს შორის. ოზურგეთის #1 საჯარო სკოლაში გაიხსნა ფოტოგრაფ დინა ოგანოვას გამოფენა „გოგონები მომავლიდან“. ამავე პროექტის ჩვენება შედგა ჩოხატაურის #1 და ლანჩხუთის მუნიციპალიტეტის სოფელ ჩოჩხათის საჯარო სკოლებში. ამავე სკოლების ბიბლიოთეკებში, Palitra L Publishing • გამომცემლობა პალიტრა L -თან და Silknet - სილქნეტი -თან პარტნიორობით, „თანასწორობის კუთხეები“ გაიხსნა. „თანასწორობის კუთხეები“ მწერალმა, საქართველოს პარლამენტის ეროვნული ბიბლიოთეკის დირექტორმა და UNFPA-ს მეგობარმა, გიორგი კეკელიძე • Giorgi Kekelidze-მ გახსნა. მან მოსწავლეებთან გენდერული თანასწორობის იდეისა და მნიშვნელობის შესახებ ისაუბრა“. სრულად... წყარო: georgia.unfpa.org

თბილისი. 17, 19 და 26 მარტს საქართველოს სახალხო დამცველის აპარატმა, ევროპის საბჭოს საქართველოს ოფისთან თანამშრომლობით, საქართველოს შინაგან საქმეთა სამინისტროს, საქართველოს პროკურატურისა და ადვოკატთა ასოციაციის წარმომადგენლებთან, ქალთა მიმართ სექსუალური ძალადობის დანაშაულებზე მართლმსაჯულების განხორციელების საკითხებზე სამუშაო შეხვედრები გამართა. „შეხვედრებზე პროკურორებს, გამომძიებლებსა და ადვოკატებს ომბუდსმენის მიერ (ევროსაბჭოს მხარდაჭერით) მომზადებული კვლევის „ქალთა მიმართ სექსუალური ძალადობის მართლმსაჯულება საქართველოში“ ძირითადი მიგნებები და რეკომენდაციები გააცნეს. მონაწილეებმა სექსუალური ძალადობის გამოძიების, სისხლისსამართლებრივი დევნისა და საქმის სასამართლო განხილვისას არსებულ გამოწვევებსა და აღნიშნულ საქმეებზე მუშაობის თავიანთ გამოცდილებაზე ისაუბრეს“. სრულად... წყარო: www.ombudsman.ge

თბილისი. „შესაძლებლობები ქალთა ეკონომიკური გაძლიერებისთვის“ - POWER • Promoting Opportunities for Women's Economic Resilience - ეკონომიკური პოლიტიკის კვლევის ცენტრის (EPRC) პროექტია, რომლის მიზანია გამოვიკვლიოთ თუ რა საჭიროებები აქვთ დღეს ქალებს ბიზნესში. პროექტის ფარგლებში, ორგანიზაცია გთავაზობთ ღონისძიებებს, რომლებიც ემსახურება ცოდნის და გამოცდილების გაზიარებას. კვლევაში „ქალები ბიზნესში: შესაძლებლობები და პანდემიის გამოწვევები“ განხილულია ქალი მეწარმეების ზოგადი მდგომარეობა, ბიზნესის დაწყება და ოპერირების შესაძლებლობები და გამოწვევები, კოვიდ 19-ის პანდემიის შედეგად შექმნილი პრობლემები, საქართველოში ქალი მეწარმეების საქმიანობის ზოგადი ხელშეწყობისა და კოვიდ19-ით გამოწვეული უარყოფითი ეკონომიკური შედეგების დაძლევისთვის გასატარებელი ღონისძიებების რეკომენდაციები. პროექტი მხარდაჭერილია ბრიტანეთის საელჩოს კარგი მმართველობის ფონდის მიერ.  სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) გთავაზობთ თარგმანს კრებულიდან - „სოციალური კვლავწარმოება, ქალთა შრომა და შინშრომა“. „XXI საუკუნეში, ცვლილებებთან ერთად, რომელთა მეშვეობითაც ქალები უდავოდ გაძლიერდებიან, მათ ასევე მოუწევთ მძიმე ტვირთის ტარება. ეს ტვირთი, სხვა დანარჩენთან ერთად, მოიცავს ორმაგი დატვირთვის სამუშაო დღეს, ქმრების არყოფნას, სანათესაოსგან იზოლაციას, მარტოხელა დედობას ადეკვატური სოციალური შემწეობის გარეშე. მოკლედ რომ ვთქვათ, ქალთა გამოცდილება ჯერჯერობით კვლავაც მიუთითებს საშინაო შრომისა და კაპიტალისტურ სოციალურ კვლავწარმოებაში მისი როლის თეორიული გააზრების საჭიროებაზე“. სრულად... წყარო: socialjustice.org.ge

თბილისი. 2021 წლის თებერვლიდან ადამიანის უფლებების სწავლებისა და მონიტორინგის ცენტრი (EMC), გაეროს ქალა ორგანიზაციის (UN Women) მხარდაჭერით, ახორციელებს პროექტს: „ბარიერების მოხსნა, რომელიც ხელს უშლის ქალთა თანაბარ მონაწილეობას შრომის ბაზარზე“. პროექტი შეეხება ქვეყნის მასშტაბით შრომის ბაზრის ტენდენციებს, რომლებიც ეხება ქალთა უმუშევრობას და მათ არაპროპორციულ კონცენტრაციას არაფორმალურ სექტორში. სრულად... წყარო: emc.org.ge

თბილისი. ომბუდსმენი ეხმაურება 2021 წლის 21 მარტს ტელეკომპანია „მთავარის“ ეთერით გავრცელებულ სიუჟეტს, სადაც საუბარი იყო პირადი ცხოვრების ამსახველი სავარაუდო ფარული ჩანაწერების არსებობაზე, მათ შორის, პოლიტიკოს ანა დოლიძის მიმართ. „საქართველოში პირადი ცხოვრების ამსახველი უკანონო ფარული ჩანაწერების გამოქვეყნების, თუ გამოქვეყნების მუქარის შემთხვევებს ძირითადად, ქალი პოლიტიკოსების მიმართ აქვს ადგილი და საზოგადოებრივ და პოლიტიკურ პროცესებში ჩართული ქალების წინააღმდეგ პოლიტიკური ბრძოლის, მათი გაჩუმების, ჩაგვრის და ძალადობის სისტემურ იარაღად გამოიყენება. სახალხო დამცველი გმობს სახელმწიფოს მხრიდან პირადი ცხოვრების უკანონო ხელყოფის პრაქტიკას, სოლიდარობას უცხადებს ყველა მსხვერპლს და სახელმწიფოს დამაჯერებელი ნაბიჯების გადადგმისკენ მოუწოდებს“, ნათქვამია განცხადებაში. სრულად... წყარო: ombudsman.ge

თბილისი. საქართველოს ეხმიანება ტელეკომპანია „მთავარზე“ გადაცემა „პოსტ ფაქტუმში“ გასულ სიუჟეტს. „რესპონდენტი ივანე გულაშვილი აღნიშნავს, რომ იგი იყო სახელმწიფო უსაფრთოხების თანამშრომელი და მაღალი თანამდებობის პირების დავალებით ფარული მიყურადებისთვის ამონტაჟებდა სათვალთვალო მოწყობილობებს საჯარო პირების საცხოვრებელ სახლებსა თუ სხვადასხვა ტექნიკურ მოწყობილობებზე. საია გმობს პირადი ცხოვრების უკანონო ხელყოფას. მხარდამჭერას უცხადებს ანა დოლიძეს და უკანონოდ ფარული მიყურადების ყველა მსხვერპლს. ამსათანავე აღვნიშნავთ, რომ საქართველოში, უახლოეს წარსულში არსებობს ფარული მიყურადების შედეგად მოპოვებული პირადი ცხოვრების ამსახველი კადრების გამოქვეყნების მძიმე გამოცდილება და შედეგები, აღნიშნული კი მოითხოვს შესაბამისი სახელმწიფო უწყებების მხრიდან დროულ, მიუკერძოებელ და ეფექტიან გამოძიებას“. სრულად... წყარო: gyla.ge

თბილისი. ქალთა მოძრაობა ეხმიანება 21 მარტს ტელეკომპანია მთავარის ეთერში სახელმწიფო უსაფრთხოების სამსახურის ყოფილი თანამშრომლის, ამჟამად პატიმრობაში მყოფი, ივანე გულაშვილის მიერ გავრცელებულ ინფორმაციას. „ივანე გულაშვილმა ჟურნალისტისთვის მიცემულ ინტერვიუში მოგვითხრო ქალი პოლიტიკოსის, ანა დოლიძის, შესაძლო ფარული თვალთვალის შესახებ. სამწუხაროდ, გვახსოვს არაერთი პოლიტიკურად აქტიური ქალის წინააღმდეგ განხორციელებული მორალური ტერორი და საჯარო ცხოვრებიდან განდევნის მცდელობა. აღვნიშნავთ, რომ მსგავსი უკანონო პრაქტიკები ქვეყანაში სისტემურ ძალადობად ჩამოყალიბდა. ქალის პირადი, მათ შორის, სექსუალური ცხოვრებით მანიპულირება, ან მისი გასაჯაროება ქალების პოლიტიკიდან განდევნის, დისკრედიტაციისა და მარგინზალიზაციის ყველაზე სასტიკი მეთოდია. ჩვენ მოვუწოდებთ საგამოძიებო ორგანოს დაიწყოს გამოძიება, გამოკითხოს ყველა პირი, რომელიც შესაძლოა შემხებლობაში იყოს ანა დოლიძის მიმართ უკანონო თვალთვალში და გამოიყენოს მის ხელთ არსებული ყველა რესურსი, რათა აღკვეთოს პირადი ცხოვრების კადრების გავრცელება. ჩვენ სრულ სოლიდარობას ვუცხადებთ ანა დოლიძეს და მოვუწოდებთ საერთაშორისო თანამეგობრობას შესაბამისი რეაგირებისაკენ“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) გთავაზობთ თარგმანს კრებულიდან: სოციალური კვლავწარმოება, ქალთა შრომა და შინშრომა. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ვიდეო სიუჟეტს: ქალების შრომა შინ და გარეთ. „საქართველოში ქალები კაცებთან შედარებით სამჯერ მეტ დროს უთმობენ საოჯახო საქმეებს. ნადის ტრადიცია ზემო აჭარაში დღემდეა შემორჩენილი. შრომითი ურთიერთდახმარება თავდაპირველად დახმარების ნებაყოფლობით პრინციპს ემყარებოდა, ყოველგვარი ვალდებულებებისა და შრომა-მიგების გარეშე. ქალები ერთმანეთის შრომას უსასყიდლოდ იზიარებენ“. სრულად... წყარო: emc.org.ge

თბილისი. ქალთა ფონდი თავისი პროგრამებით მხარს უჭერს ქალი უფლებადამცველების გაძლიერებას, აღიარებას და უსაფრთხოებას. ორგანიზაცია სოლიდარობას უცხადებს „პარტნიორობა ადამიანის უფლებებისთვის“ თანამშრომლებს და მიმართავს საქართველოს პარლამენტსა და ადამიანის უფლებათა საკითხებში პრემიერ მინისტრის მრჩეველს, რათა შეახსენოს - ქალი უფლებადამცველების უსაფრთხოებაზე ზრუნვა, მათი შრომის დაფასება, იმ სახელმწიფო ინსტიტუტების გაძლიერება, რომლებიც ადამიანის უფლებათა დაცვაზეა პასუხიმგებელი, სახელმწიფოს მოვალეობაა. სრულად... წყარო: womenfundgeorgia.org

თბილისი. EWMI-PROLoG შეშფოთებულია ქალთა უფლებადამცველების მიმართ გაჟღერებული მუქარით, სიძულვილის ენით და მხარდაჭერას უცხადებს PHR-ის, საფარის და სხვა ორგანიზაციების იურისტ ქალებს. „ქალი აქტივისტები განსაკუთრებით დაჟინებულები და თავდადებულები არიან. მათ ხშირად კაც კოლეგებზე უფრო რთულ პირობებში უწევთ მუშაობა. ჩვენ წლებია მხარს ვუჭერთ ადამიანის უფლებების, მათ შორის, ქალებისა და ბავშვების უფლებების დამცველებს და ვამაყობთ ჩვენი პარტნიორების მუშაობითა და მიღწევებით ამ წლების განმავლობაში. ჩვენ გვწამს, რომ ამ მძიმე, დაუღალავ და ხშირად - დაუფასებელ შრომასა და ერთგულებას მოაქვს პროგრესი, მსხვერპლთა უფლებებისა და ღირსების აღდგენის გზით“. სრულად... წყარო: ორგანიზაციის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) სოლიდარობას უცხადებს ქალ უფლებადამცველებს. „გვსურს, სოლიდარობა გამოვხატოთ ქალი უფლებადამცველების მიმართ, რომლებიც განსაკუთრებული აგრესიისა და თავდასხმის სამიზნე გახდნენ ქართველი ჩოგბურთელის, ნიკოლოზ ბასილაშვილის მიერ ერთ-ერთ ტურნირში მოპოვებული გამარჯვების შემდეგ. ფაქტს სოციალურ მედიაში ორგანიზებული აგრესიის კამპანიის მოჰყვა, როგორც არასამათავრობო ორგანიზაციების, ასევე უფლებადამცველების მიმართ. აღნიშნული განაპირობა მათმა საჯარო პოზიციონირებამ ჩოგბურთელის წინააღმდეგ მიმდინარე ოჯახში ძალადობის საქმესთან დაკავშირებით. ქალი უფლებამდაცველების მიზანმიმართული, გენდერული ნიშნით განხორციელებული თავდასხმა მიანიშნებს საზოგადოებაში მყარად ფესვგადგმულ მიზოგენიურ განწყობებზე და აფერხებს ძალადობის ფაქტების საჯარო მხილების პროცესს“, ნათქვამია განცხადებაში.  სრულად... წყარო: isfed.ge

თბილისი. საქართველოს სახალხო დამცველის, თბილისის სახელმწიფო სამედიცინო უნივერსიტეტისა და გაეროს მოსახლეობის ფონდის (UNFPA) საქართველოს ოფისის თანამშრომლობით, შემუშავდა ონლაინ სასწავლო კურსი ფსიქოსოციალური საჭიროების მქონე ქალთა სექსუალური და რეპროდუქციული ჯანმრთელობის და უფლებების შესახებ. „ეს სიახლე მეანობა-გინეკოლოგიაში და ფსიქიატრიაში სერტიფიცირებულ ექიმებს დაეხმარება, გაიღრმავონ ცოდნა ფსიქო-სოციალური საჭიროების მქონე ქალთა ჯანმრთელობის მართვის, მათი უფლებების და სახელმწიფოს მიერ აღებული ვალდებულებების შესახებ“. სრულად... წყარო: www.ombudsman.ge

თბილისი. ადამიანის უფლებები სწავლებისა და მონიტორინგის ცენტრი (EMC) აქვეყნებს კვლევას: ლგბტქ ჯგუფის სოციალური ექსკლუზიის კვლევა საქართველოში. სახელმწიფოს მიერ მიღებული ინსტიტუციური ზომების მიუხედავად, ლგბტ ჯგუფების მიმართ ძალადობის მასშტაბი კვლავ მაღალია. ორგანიზაციის კვლევის თანახმად, გამოკითხულთა 52% ცხოვრებაში ერთხელ მაინც გამხდარა ძალადობის მსხვერპლი საკუთარი სექსუალური ორიენტაციისა თუ გენდერული იდენტობის გამო. გამოკითხულთა 56 პროცენტს ჰქონია ბოლო ორი წლის განმავლობაში ძალადობის გამოცდილება, მათგან 19%-ს ერთხელ, 37%-ს კი ორჯერ ან მეტჯერ. სრულად... წყარო: emc.org.ge

თბილისი. ჰაინრიჰ ბიოლის ფონდის სამხრეთ კავკასიის რეგიონული ბიუროს თბილისის ოფისი წაროგიდგენთ ლიკა ჯალაღანიას სტატიას ქალების ხმებზე და მსენელის ძალაუფლებაზე. „ქობულეთში ნინისადმი ჩადენილი კოლექტიური ძალადობა უთუოდ უნდა მიგვითითებდეს გადარჩენის დისკურსის პრობლემაზე. კაცს თუ გადავურჩით, ყოველთვის გამოჩნდება ვიღაც და რაღაც, რომელიც მსხვერპლობას არ გვაპატიებს, რადგან გადარჩენას მოგვთხოვს. მაგრამ გადარჩენასაც დაგვიწუნებენ, თუ ეს შემოთავაზებული თამაშის წესებით არ გავაკეთეთ. ნინის ოჯახისთვის გადარჩენა, „დანაშაულის გამოსყიდვით“ მოხდა, რადგანაც, ჩვენ გვთხოვენ სუსტის, როგორც სუსტის ტრიუმფს – პასიურ მსხვერპლობას, რომელიც „დაკარგულ ღირსებას“ საკუთარივე თავის აღწერას წმინდა მსხვერპლობის უტყუარ მტკიცებულებებზე დააყრდნობს“. სრულად... წყარო: feminism-boell.org

საკუთარი საქმის დაწყება ყოველთვის არ არის მარტივი. განსაკუთრებით მაშინ, თუ შენი მოვალეობაა სახლი, ზრუნვა ბავშვებსა და მშობლებზე, თუ ხელს არავინ გიწყობს და ხშირად გაუგებარია, საიდან დაიწყო საქმის კეთება. არსებობს საკმაოდ ბევრი საერთაშორისო პროგრამა, რომლებიც ეხმარება ქალებს დაიწყონ საკუთარი ბიზნესი, მიიღონ განათლება და დაიცვან საკუთარი ეკონომიკური უფლებები.  როგორ გავერკვეთ ამ ყველაფერში?  ხშირად საჭირო ინფორმაციის პოვნა რთულია. პროგრამამ „ევროკავშირის აღმოსავლეთ სამეზობლო“ ღია ბარათები აერთიანებს ევროკავშირის ყველა მიმდინარე პროექტს, რომელიც ქალებს ეხმარება საკუთარი ბიზნესის განვითარებაში.

თბილისი. 10 მარტს საქართველოს სახალხო დამცველის აპარატმა გაეროს ქალთა ორგანიზაციასთან თანამშრომლობით და ნორვეგიის საგარეო საქმეთა სამინისტროს მხარდაჭერით ონლაინ პრეზენტაცია გამართა, რომელზეც საქართველოს მიერ გენდერული მეინსტრიმინგის კუთხით აღებული საერთაშორისო ვალდებულებები შეაფასეს და ომბუდსმენის აპარატის მიერ შემუშავებული კვლევა წარმოადგინეს. „კვლევამ გამოავლინა, რომ მიუხედავად გენდერული თანასწორობის მიმართულებით ბოლო წლებში განხორციელებული პროგრესისა, ქვეყანაში არსებული გენდერული პოლიტიკა ვერ უზრუნველყოფს ვერც ქალთა პოლიტიკური მონაწილეობის ზრდას, ვერც ქალთა მიმართ და ოჯახში ძალადობის შემთხვევებზე უწყებების კოორდინირებულ მუშაობას და ფემიციდის პრევენციას“, ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. USAID Georgia ერთი თვის განმავლობაში გაგიზიარებთ იმ ქალთა ისტორიებს, რომლებიც საზოგადოებაში არსებულ ბარიერებს არღვევენ.  „თუ თბილისში ცხოვრობთ, ეწვიეთ ჩვენს ფოტო ინსტალაციას ვაკის პარკის შესასვლელთან. გაეცანით იმ ქალთა პორტრეტებს, რომლებიც ამსხვრევენ არსებულ სტერეოტიპებს და საკუთარ აზრს აფიქსირებენ ქალთა გაძლიერების შესახებ. განათავსეთ მათი ფოტო თქვენს გვერდზე, მონიშნეთ ის ქალები ვინც თქვენთვის ინსპირაციის წყაროა და არ დაგავიწყდეთ #დაამსხვრიესტერეოტიპები ჰეშთეგის გამოყენება. თბილისის გარდა ფოტოინსტალაციის ნახვა შეგიძლიათი ბათუმში, ქუთაისსა და თელავში". სრულად... წყარო: ორგანიზაციის გვერდი სოციალურ ქსელში

თბილისი. ჰაინრიხ ბიოლის ფონდის სამხრეთ კავკასიის რეგიონალური ბიურო აქვეყნებს ანა ილურიძის სტატიას: პოსტსამშობიარო ჩანაწერები, ანუ რეფლექსია იმ გამოცდილებაზე, რომელსაც აუცილებლად დავივიწყებ.  „ანა ილურიძე იურისტი, გენდერის და სექსუალობის მკვლევარი სტატიაში საკუთარ გამოცდილებებს გვიზიარებს ქალის სხეულის განცდილ ტკივილსა და ბედნიერებაზე. ასევე, მისი სტატია ეხმიანება ამერიკელი მეორე ტალღის ფემინისტის, ედრიენ რიჩის მიერ წამოწყებულ მსჯელობას იმ ნაპრალზე, რომელიც ქალის მიერ დედობის სუბიექტურ გამოცდილებასა და საზოგადოების მოლოდინებსა და მოთხოვნებს შორის არსებობს. ორსულობა და მშობიარობა სუბიექტური პროცესია და მთლიანად ემყარება ადამიანის თვითაღქმასა და გამოცდილებას. ამასთან, ამ პროცესში აუცილებელია სახელმწიფო ჯანდაცვის და სოციალური სერვისების მონაწილეობა, რაც მას საზოგადო ზრუნვის საგნად აქცევს“. სრულად... წყარო: feminism-boell.org

თბილისი. ადამიანის უფლებების სწავლებისა და მონიტორინგის ცენტრი (EMC) გთავაზობთ გიგა კარაპეტიანის და ანი გოგბერაშვილის სტატიას: „გარემოვაჭრე ქალები და პანდემია: ბრძოლა ყოველდღიური საჭიროებებისთვის“. „აღნიშნული კონტექსტიდან გამომდინარე, წინამდებარე კვლევითი სტატიით, ვცდილობთ გავაანალიზოთ გარემოვაჭრეობის სოციალური და ეკონომიკური განზომილებები უშუალოდ გარემოვაჭრე ქალების პერსპექტივიდან. სტატიისთვის გორსა და თბილისში დასაქმებულ გარემოვაჭრე ქალებთან ათი ინტერვიუ ჩავწერეთ. მათი უმეტესობა პენსიონერია და ოჯახში ძირითად შემომტანად ითვლება“, ნათქვამია სტატიაში. სრულად... წყარო: emc.org.ge