თბილისი. ქალთა მოძრაობის ინფორმაციით, 21 ივნისს, საქართველოს პარლამენტის იურიდიულმა კომიტეტმა საქართველოს ორგანული კანონის „საქართველოს საარჩევნო კოდექსის“ ცვლილებების შეტანის შესახებ კანონპროექტის მეორე მოსმენით განხილვისას არსებითად შეცვალა ადგილობრივი თვითმმართველობის არჩევნებისთვის პარტიული (პროპორციული) სიების შედგენის წესი.  ცვლილების თანახმად: პოლიტიკური პარტია ვალდებული იქნება 2028 წლამდე ჩასატარებელი ადგილობრივი თვითმმართველობის ყველა არჩევნებისთვის ისე შეადგინოს პარტიული სია, რომ სამი კანდიდატიდან ერთი მაინც იყოს განსხვავებული სქესის წარმომადგენელი. ორგანიზაციის განმარტებით, ეს ინიციატივა არსებითად აუარესებს საარჩევნო კოდექსის არსებულ ნორმას, რომელიც პოლიტიკურ პარტიას ავალდებულებდა, 2028 წლამდე ჩასატარებელ ადგილობრივი თვითმმართველობის ორგანოთა საერთო არჩევნებისთვის წარდგენილ სიაში ყოველი მეორე განსხვავებული სქესის კანდიდატი ჰყოლოდა. საზოგადოებრივი ორგანიზაციების ნაწილი მოუწოდებს პარლამენტს, პლენარულ სხდომაზე მხარი არ დაუჭიროს ინიცირებულ ცვლილებას, რაც შეასუსტებს ადგილობრივ დონეზე ქალთა წარმომადგენლობას, შეაფერხებს არსებითი თანასწორობის მიღწევას და საერთაშორისო ვალდებულებების შესრულებას. სრულად... წყარო: ქალთა მოძრაობის გვერდი სოციალურ ქსელში

თბილისი. საქართველოს სახალხო დამცველი აქვეყნებს სპეციალურ ანგარიშს, რომელიც ფემიციდის მონიტორინგის მექანიზმის ფარგლებში შემუშავდა და გაანალიზებულია 2019 წელს ჩადენილი დანაშაულები. „გენდერული ძალადობის უკიდურესი გამოვლინების, ფემიციდის პრევენციას ხელს უშლის ქალთა მიმართ და ოჯახში ძალადობის პრობლემასთან კომპლექსურად ბრძოლის და სახელმწიფო უწყებებს შორის კოორდინირებული მუშაობის მხრივ არსებული პრობლემები. საგანგებოდ უნდა აღინიშნოს, რომ ქალთა მიმართ და ოჯახში ძალადობასთან ბრძოლის საკითხებზე სოციალური მუშაობის მიმართულებით, კონკრეტული ღონისძიებები ამ დრომდე არ გატარებულა და სოციალური სამსახური კვლავ ფორმალურად ერთვება ძალადობის შემთხვევათა შესწავლის პროცესში. კვლავ პრობლემურია მოძალადისთვის ძალადობრივი დამოკიდებულებისა და ქცევის შეცვლაზე ორიენტირებული სავალდებულო კურსის გავლა“. სრულად... წყარო: ombudsman.ge

სამეგრელო. საქართველოში გაეროს მუდმივმა კოორდინატორმა საბინე მახლმა სამეგრელოს სოფელ ცაიშში, ოჯახში ძალადობის მსხვერპლებისა და ძალადობაგამოვლილი პირების კრიზისული ცენტრი მოინახულა. „ცაიშში კრიზისული ცენტრი 2019 წელს, არასამთავრობო ორგანიზაცია „სახლისა“ და ადგილობრივი მუნიციპალიტეტის თანამშრომლობის შედეგად, გაეროს ერთობლივი პროგრამის „გენდერული თანასწორობისთვის“ ფარგლებში, შვედეთის მთავრობის მხარდაჭერით ამოქმედდა. კრიზისული ცენტრი ძალადობის მსხვერპლებსა და ძალადობაგამოვლილ პირებს ფსიქოლოგიურ, სოციალურ და ეკონომიკურ დახმარებას, სარეაბილიტაციო, სამედიცინო, იურიდიულ და რეფერალურ მომსახურებებს სთავაზობს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

სამეგრელო. გაეროს მუდმივი კოორდინატორი საქართველოში საბინე მახლი ზუგდიდში ადგილობრივ მეწარმე და ფერმერ ქალებს შეხვდა. „მონაწილეები საბინე მახლს რეგიონში არსებულ ეკონომიკურ ვითარებაზე, მცირე და საშუალო ბიზნესზე პანდემიის გავლენაზე, სირთულეებსა და საჭიროებებზე ესაუბრნენ. შეხვედრის მეორე ნაწილი კი მეწარმე ქალების გამოწვევების შესახებ დისკუსიას დაეთმო. დამსწრე ქალები მცირე და საშუალო ბიზნესებს უძღვებიან. საკუთარი საქმიანობები მათ გაეროს ქალთა ორგანიზაციის პროექტის „ერთობლივი ძალისხმევა ქალთა ეკონომიკური გაძლიერებისთვის საქართველოში“ დახმარებით, ნორვეგიის მთავრობის მხარდაჭერით განავითარეს“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

სამეგრელო. გაეროს მუდმივი კოორდინატორი საქართველოში საბინე მახლი ანაკლიაში ადგილობრივი არასამთავრობო ორგანიზაციების წარმომადგენლებსა და დევნილ და კონფლიქტის შედეგად დაზარალებულ ქალებს შეხვდა. „შეხვედრის მონაწილეებმა ქალებზე, მშვიდობასა და უსაფრთხოებაზე გაეროს უშიშროების საბჭოს რეზოლუციების შესახებ 2018-2020 წლების ეროვნული სამოქმედო გეგმის ლოკალიზაციაზე, გადაწყვეტილების მიღების, სამშვიდობო და უსაფრთხოების პროცესებში დევნილი და კონფლიქტის შედეგად დაზარალებული ქალების ჩართულობაზე იმსჯელეს. ქალებმა გაეროს მუდმივ კოორდინატორს საკუთარი პრობლემები და მათ გადასაჭრელად საჭირო ხედვები გაუზიარეს“. სრულად... წყარო: ორგანიზაციის გვერდი სოციალურ ქსელში

თბილისი. 13 მაისს, ქალთა საინფორმაციო ცენტრის ორგანიზებით გაიმართა სამუშაო შეხვედრა, რომლის მიზანი ქალთა მიმართ დისკრიმინაციის ყველა ფორმის აღმოფხვრის შესახებ კონვენციის (CEDAW) შესრულების ალტერნატიული ანგარიშის სამუშაო ვერსიის წარდგენა და რეკომენდაციების ასახვა იყო. „ანგარიში მომზადებულია გენდერული თანასწორობის და ქალთა გაძლიერების სფეროში მომუშავე 18 არასამთავრობო ორგანიზაციისა და 3 ქსელის ჩართულობით და მისი მიზანია ქალთა მიმართ დისკრიმინაციის აღმოფხრვის კომიტეტს მიეწოდოს ალტერნატიული ინფორმაცია საქართველოში კონვენციით გათვალისწინებულ ქალთა უფლებებთან დაკავშირებით, სახელმწიფოს მიერ განხორციელებული ღონისძიებებისა და პროგრესის შესახებ“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. საქართველოში ევროპის საბჭოს ოფისის ინფორმაციით, 11 მაისს სტამბოლის კონვენცია 10 წლის გახდა. ვის იცავს სტამბოლის კონვენცია? „კონვენცია იცავს სიცოცხლეს; მას მოაქვს იმედი და უსაფრთხოების შეგრძნება მილიონობით ქალისთვის და გოგოსთვის; ის საჯაროს ხდის ქალთა მიმართ ძალადობას; ის ეხმარება მსხვერპლებს საუბარში, პროფესიონალებს უჩენს დახმარების შესაძლებლობას და გოგოებს და ქალებს ნდობას; ის იცავს ადამიანებს ოჯახში ძალადობისგან, იმის მიუხედავად თუ იურიდიულად როგორ განმარტავს ქვეყანა ოჯახსა და ქორწინებას; ის აძლიერებს ქალთა მიმართ პატივისცემას და ხელს უწყობს გოგოების და ქალების თანასწორობას“. სრულად... წყარო: ორგანიზაციის გვერდი სოციალურ ქსელში

თბილისი. გენდერული საინფორმაციო პორტალის თანახმად, გენდერული თანასწორობის მუდმივმოქმედმა საპარლამენტო საბჭომ, სხდომაზე გამოთქმული დათქმებისა და შენიშვნების გათვალისწინებით, 2021 წლის სამოქმედო გეგმა დაამტკიცა, სადაც გაწერილია საბჭოს საქმიანობის ექვსი მიმართულება. კერძოდ, სახელმწიფოს გენდერული პოლიტიკის ძირითადი მიმართულებების ჩამოყალიბება; გენდერული თანასწორობის სფეროში საკანონმდებლო ბაზის შექმნა და გაუმჯობესება; გენდერული თანასწორობის სახელმწიფო მექანიზმების დახვეწა; პარლამენტის გენდერული თანასწორობის საბჭოს ინსტიტუციური გაძლიერება; ცნობიერების ამაღლება გენდერულ თანასწორობაზე; სახელმწიფო გენდერული პოლიტიკის განხორციელების მონიტორინგი. სრულად... წყარო: ginsc.net

თბილისი. გაეროს ქალთა ორგანიზაციამ საქართველოში გენდერისა და შეზღუდული შესაძლებლობების შესახებ არსებული მონაცემები გააანალიზა და მათ გასაუმჯობესებლად რეკომენდაციები შეიმუშავა. „დოკუმენტში წარმოდგენილია გენდერისა და შეზღუდული შესაძლებლობების ინდიკატორთა ის რეკომენდებული მინიმალური ნაკრები, რომლის გამოყენებაც, ერთი მხრივ, გენდერული თანასწორობისა და შშმ პირთა ინკლუზიის სფეროში საერთაშორისო და ეროვნული ვალდებულებების შესრულებაზე მონიტორინგისთვის, მეორე მხრივ კი, სამთავრობო და არასამთავრობო სააგენტოების მიერ პოლიტიკისა და პროგრამის დაგეგმვისთვის, მონიტორინგისა და შეფასებისთვის შეიძლება. ინდიკატორების გარდა, დოკუმენტში მოცემულია ქმედებები საქართველოში გენდერისა და შშმ პირთა საჭიროებების გათვალისწინებით პოლიტიკის დაგეგმვის შესახებ ხარისხიან მონაცემებზე წვდომის გასაუმჯობესებლად“, ნათქვამია ორგანიზაციის ვებგვერდზე. იხ. სრულად... წყარო: georgia.unwomen.org

ზუგდიდი. გაეროს ქალთა ორგანიზაციამ და გაეროს სურსათისა და სოფლის მეურნეობის ორგანიზაციამ ფერმერ ქალთა ეკონომიკური გაძლიერებისთვის სამეგრელო-ზემო სვანეთში აქტივობები დაიწყეს. „პროექტის „ფერმერ ქალთა ეკონომიკური გაძლიერების ხელშეწყობა რძის პროდუქტების წარმოების ხელშეწყობის მხარდაჭერით ფერმერთა საველეს სკოლების (FFS) მიდგომების გზით“ ფარგლებში, გაეროს ორი სააგენტოს წარმომადგენლებმა სამიზნე რეგიონში არსებულ თუ პოტენციურ პარტნიორებთან შეხვედრები გამართეს და თანამშრომლობის პერსპექტივებზეც იმსჯელეს. კერძოდ, პროექტის შინაარსსა და მიზნებს გაეცნენ ზუგდიდის მუნიციპალიტეტში ქალთა გაძლიერების საკითხებზე მომუშავე ორგანიზაციები, საკონსულტაციო შეხვედრა შედგა ამავე მუნიციპალიტეტის გენდერული თანასწორობის საბჭოსა და სოციალური დაცვისა და გენდერული თანასწორობის განყოფილების უფროსთან, გოგი რევიასთანაც. შედეგად, პროექტით გათვალისწინებული ერთ-ერთი კომპონენტის - ქალთა უფლებებისა და ოჯახში ძალადობის შესახებ ცნობიერების ამაღლებასთან დაკავშირებით გაეროს ქალთა ორგანიზაციასა და მუნიციპალიტეტს შორის სამომავლო თანამშრომლობის გეგმები გამოიკვეთა“, ნათქვამია ორგანიზაციის ვებგვერდზე. სრულად... წყარო: georgia.unwomen.org

კავშირი „საფარი“ აქვეყნებს ანა ფაცაციას ბლოგპოსტს: შვილის ყოლა როგორც თვითმიზანი – რატომ „სჭირდებათ“ საქართველოში ქალებს შვილები. „საქართველოში ქალებს შვილები სჭირდებათ რამდენიმე მიზეზის გამო. პირველი და ძალიან მნიშვნელოვანი მიზეზია უქმნადობის, უუნარობის, უმოქმედობის შენიღბვა. შვილის ყოლა, როგორც საქმე, შვილი უკვე ქალს ანიჭებს „დაკავებული“ ქალის სტატუსს. შემდეგი მიზეზი, რატომაც არის შვილის ყოლა თვითმიზანი, ძალიან მარტივია – ქალებს არ სურთ ოჯახის დანგრევა ან გაცილებული ქალის სტატუსი. ამ სტატუსის მქონე ქალებს ალმაცერად უყურებენ. საქართველოში ქალებს სჭირდებათ დედობა, ეს აუცილებელი სტატუსია ყველგან. სჭირდებათ შვილები, რადგან ეს ნიშნავს, რომ მათ აქვთ ნაყოფიერება, მათ ჰყავთ მოვლის ობიექტი, ისინი არიან დაკავებულები, მათ შეასრულეს ღვთისგან ბოძებული მოვალეობა. ასევე, არიან ქალები, რომელთაც სჭირდებათ შვილები, როგორც პარტნიორები, მეგობრები. ქალები, რომლებსაც მარტო დარჩენისა ეშინიათ და ამ მიზნით აჩენენ შვილებს. ესენი არიან ქალები, რომლებიც თავიანთ თავს უჩენენ მეგობრებს“. სრულად... წყარო: sapari.ge

თბილისი. ქალთა მოძრაობა და ადამიანის უფლებებზე მომუშავე ორგანიზაციები ეხმიანებიან სოციალურ ქსელში გავრცელებულ ინფორმაციას ქართველი მოდელების გაუსაძლისი შრომითი პირობების შესახებ და სოლიდარობას უცხადებენ ამ სფეროში დასაქმებულ ყველა ადამიანს. „სამწუხაროდ, ქვეყანაში კვლავ უდიდეს გამოწვევად რჩება შრომითი უფლებების სისტემური დარღვევა და უგულებელყოფა, გამონაკლისი არც მოდის ინდუსტრიაა. მიუხედავად იმისა, რომ სამოდელო სფეროში საქმიანობა სტანდარტული შრომითი საქმიანობაა, რაც გულისხმობს დასაქმებულთა აღნიშნულ კატეგორიაზე შრომის კანონმდებლობის სრულად გავრცელებას, ფაქტია, რომ საქართველოში მოდელები ვერ სარგებლობენ ბაზისური შრომითი უფლებებითაც კი: მათ ძირითად ნაწილს არ აქვს შრომითი ხელშეკრულებები და მუშაობენ არანორმირებული სამუშაო გრაფიკით არაადეკვატური ანაზღაურების სანაცვლოდ, რიგ შემთხვევებში კი - ყოველგვარი ანაზღაურების გარეშე. ...მიგვაჩნია, რომ მოდის ინდუსტრიაში დასაქმებულთა შრომითი უფლებების დაცვის უზრუნველყოფა საჭიროებს სახელმწიფოს მხრიდან სისტემურ მიდგომას. აუცილებელია, აღნიშნული საკითხის სიღრმისეულად შესწავლა და სფეროში შრომის კანონმდებლობის აღსრულებაზე მკაცრი ზედამხედველობა“, ნათქვამია ორგანიზაციის ვებგვერდზე. სრულად... წყარო: ქალთა მოძრაობის გვერდი სოციალურ ქსელში

თბილისი. 25 მაისს ბიზნესისა და ტექნოლოგიების უნივერსიტეტი დასაქმების დისტანციურ ფორუმს, Femtech-ს გამართავს. „ფორუმი მიზნად ისახავს იმ ქალებისა და გოგოების დასაქმებას, რომლებიც კოდინგის სკოლის ფარგლებში გადამზადდნენ. ახლა კი უნივერსიტეტი მათ ტექნოლოგიების სფეროში დასაქმებაშიც დაეხმარება. ბიზნესისა და ტექნოლოგიების უნივერსიტეტი ქალთა გაძლიერების პრინციპების მხარდამჭერი და ამ მიმართულებით არაერთი საინტერესო ინიციატივის განმახორციელებელია“. სრულად... ფორუმზე რეგისტრაციისთვის ეწვიეთ ბმულს... წყარო: გაეროს ქალთა ფონდის გვერდი სოციალურ ქსელში

თბილისი. მითების დეტექტორის ლაბორატორიის სტუდენტის სალომე გიუნაშვილის მასალიდან გაიგებთ თუ საიდან იღებს სათავეს მიშელ ობამას გენდერთან დაკავშირებული სპეკულაციები და როგორ გავრცელდა ეს ე.წ. თეორიები ქართულენოვან სოციალურ ქსელებში. მიშელ ობამას გენდერთან დაკავშირებული კონსპირაციების მთავარი არგუმენტი ყოფილი პირველი ლედის სხეულის პროპორციებია. კონსპირაცია, ერთ-ერთმა პირველმა, 2014 წელს, ამერიკელმა ულტრა-მემარჯვენე რადიო წამყვანმა და სხვა უამრავი კონსპირაციული თეორიის ავტორმა, ალექს ჯონსმა გააჟღერა საკუთარ გადაცემაში. დეზინფორმაციული მტკიცება დრო და დრო კვლავ აქტუალური ხდება. „გავრცელებული ინფორმაცია, რომ ბარაკ ობამას ცოლი კაცია, მტკიცებულებებს მოკლებულია. მიშელ ობამას გენდერთან დაკავშირებული სპეკულაციები კონსპირაციად შეაფასა ფაქტების გადამოწმების არაერთმა პლატფორმამ, მათ შორის PolitiFact-მაც. მათი დასკვნით, მტკიცება, რომ მიშელ ობამა ტრანსგენდერი ქალია, დეზინფორმაციაა“. სრულად... წყარო: mythdetector.ge

თბილისი. სოციალური სამართლიანობის ცენტრი გთავაზობთ მარიამ დევიძის სტატიას -„ხილული თუ უხილავი: კლიმატის ცვლილება და სოფლად მცხოვრები ქალების შრომა“. „კლიმატის ცვლილება გლობალური პრობლემაა, რომელიც მრავალი გამოწვევის წინაშე აყენებს მსოფლიოს ყველა ქვეყანას. კლიმატის ცვლილების მთავრობათაშორისი პანელის (IPCC-ის) მიხედვით, კლიმატის ცვლილებით გამოწვეული შედეგები აფერხებს სასოფლო-სამეურნეო საქმიანობების წარმოებასა და წყლის მიწოდებას, რაც აისახება საკვების უვნებლობის, ხელმისაწვდომობისა და ფასის შენარჩუნების საკითხებზე.  აღსანიშნავია, რომ კლიმატის შეცვლაში მთავარი წვლილი მდიდარ ქვეყნებსა და მოსახლეობას მიუძღვით, მაშინ როცა მისი მავნე შედეგები ღარიბ ქვეყნებსა (მათ შორის, საქართველოსაც) და მოსახლეობის მარგინალურ და მოწყვლად ჯგუფებს უფრო აზარალებს, და მათ შორის ქალებიც არიან. ამის შედეგად კი სოციალური და გლობალური უთანასწორობა კიდევ უფრო მწვავდება“, ნათქვამია სტატიაში. სრულად... წყარო: socialjustice.org.ge

თბილისი. ხელმომწერი საზოგადოებრივი ორგანიზაციები ბოლო დღეებში ჰომოფობიური ძალადობის გაძლიერების ტენდენციას ეხმიანებიან და სახელმწიფოს ამ მიმართულებით პოლიტიკის არსებითი ცვლილებისკენ მოუწოდებენ. „სამწუხაროდ, სახელმწიფოს პოლიტიკა ჰომოფობიას და ტრანსფობიას, ისევე, როგორც გენდერულ უთანასწორობას, დღემდე არ იაზრებს სისტემურ და სტრუქტურულ პრობლემად, რის გამოც ჰომოფობიის წარმოჩენა ხდება მხოლოდ ინდივიდუალურ საკითხად, და შესაბამისად, სახელმწიფოს მიერ ჰომოფობიასთან ბრძოლის წინააღმდეგ დასახულ მთავარ სტრატეგიად კვლავ მის ინდივიდუალურ გამოვლინებებზე შერჩევითი სადამსჯელო პასუხი რჩება. შესაბამისად, უმნიშვნელოვანესია ჰომოფობიისა და ტრანსფობიის შემცირებაზე მიმართული პროაქტიული ინიციატივები, ფართო საგანმანათლებლო და ცნობიერების ამაღლების მიმართულებით, რომელიც სხვა ეფექტურ ნაბიჯებთან ერთად გრძელვადიანი შედეგის მომტანი იქნება და ადამიანებს ღირსეული ცხოვრების შესაძლებლობებს მისცემს“, ნათქვამია ერთობლივ განცხადებაში. სრულად... წყარო: socialjustice.org.ge

თბილისი. გაეროს ქალთა ორგანიზაციის მხარდაჭერით, თემაზე „ჟენევის საერთაშორისო მოლაპარაკებები - ქალები, მშვიდობა და უსაფრთხოება“ საქართველოს საგარეო საქმეთა სამინისტრომ სამოქალაქო სექტორის წარმომადგენლებთან საინფორმაციო შეხვედრა გამართა. „შეხვედრაზე ქალთა სამოქალაქო სექტორის წარმომადგენლებმა დევნილი და კონფლიქტის შედეგად დაზარალებული ქალების გამოწვევებზე ისაუბრეს და ჟენევის საერთაშორისო მოლაპარაკებების ქართველ მონაწილეებს კონკრეტული წინადადებები შესთავაზეს ინკლუზიური სამშვიდობო პროცესის ხელშეწყობასთან დაკავშირებით“, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გთავაზობთ მარიამ შალვაშვილის სტატიას: პირადი პრობლემები - საყოველთაო პასუხისმგებლობა?. „ქალებსა და კაცებს შორის იერარქიის და განსხვავებულობის საჩვენებლად, ლიტერატურაში ხშირად გამოიყენება სივრცის და საქმიანობების დაყოფა პირად (private) და საჯარო (public) ნაწილებად. ამ დაყოფის მიხედვით, ქალები პირად სფეროში საქმიანობენ, რაშიც ოჯახი იგულისხმება, ხოლო კაცები, ძირითადად, საჯარო სფეროს - სახელმწიფოს მართვას და ეკონომიკურ საქმიანობას უძღვებიან. მაღალმთიან აჭარაში ჩატარებული მცირე კვლევის საშუალებით, მსურს ეჭვქვეშ დავაყენო და გავაკრიტიკო ამგვარი დაყოფა და ვაჩვენო, რომ, ხშირ შემთხვევაში, რთულია ამ ორი სფეროს ნათლად გამიჯვნა“, ნათქვამია სტატიის აღწერაში. სრულად... წყარო: socialjustice.org.ge

სამეგრელო. საქართველოს ახალგაზრდა იურისტთა ასოციაცია (საია) იცავდა არასრულწლოვანს, რომელის მიმართ საჯარო სივრცეში სექსუალური შევიწროება განხორციელდა. „ზუგდიდის რაიონულმა სასამართლომ დაადგინა არასრულწლოვანზე განხორციელებული სექსუალური შევიწროების ფაქტი და პასუხისმგებელი პირი 600 ლარით დააჯარიმა. სასამართლოს გადაწყვეტილება ადმინისტრაციულ პასუხისგებაში მიცემულმა პირმა ქუთაისის სააპელაციო სასამართლოში გაასაჩივრა, თუმცა, სააპელაციო სასამართლომაც გაიზიარა პირველი ინსტანციის სასამართლოს დადგენილებაში მოყვანილი ფაქტობრივი და სამართლებრივი დასაბუთება და გადაწყვეტილება უცვლელად დატოვა. ამ საქმეს საია USAID/PROLoG-ის მხარდაჭერით აწარმოებდა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საფარისა და ვებპლატფორმა „ნაამბობი-ს” ახალი კამპანია, „მეც შვილი ვარ“, ადამიანებს მემკვიდრეობის გადანაწილებისას გენდერული წინასწარგანწყობების დაძლევისკენ მოუწოდებს. ფეისბუქ კამპანია „მეც შვილი ვარ” ძირითადად აგებულია რესპონდენტების ცოცხალ ისტორიებზე მემკვიდრეობის გადანაწილებასთან დაკავშირებით და სააშკარაოზე გამოაქვს ჩვენს ჩვეულებით სამართალსა თუ კულტურაში გამჯდარი ბევრი უსამართლო ტრადიცია. სრულად... წყარო: sapari.ge

თბილისი. სოციალური სამართლიანობის ცენტრი გთავაზობთ თამთა მელაშვილის სტატიას: „ემანსიპაციისა და ექსპლოატაციის მიღმა: ქალები საბჭოთა საქართველოს კოლექტიურ მეურნეობებში“.  „სტატიის საშუალებით შევეცდები, დაახლოებითი წარმოდგენა შევქმნა იმის შესახებ, თუ როგორი იყო საქართველოში ქალების კოლმეურნეობაში შრომის, და იშვიათ შემთხვევაში, კარიერული წინსვლის გამოცდილება, როგორ ნავიგირებდნენ ქალები კაცებისგან დომინირებულ ძალაუფლებრივ ველებში დაწინაურების შემთხვევაში და როგორი იყო მათი აგენტობა (agency).  შევეცდები იზოლდას გამოცდილება კომუნისტურ რეჟიმში ემანსიპირებული ქალის ან იმავე რეჟიმის მიერ ექსპლუატირებული ქალის დიქოტომიური რეპრეზენტაციის (Fidelis, 2010) მიღმა მოვათავსო”. სრულად... წყარო: socialjustice.org.ge

თბილისი. ქალთა მოძრაობა სოლიდარობას უცხადებს ნინუცა მაყაშვილს და იმედოვნებს, რომ სახელმწიფო და საზოგადოება ერთიანი იქნება ძალადობის წინააღმდეგ ბრძოლაში. „რამდენიმე დღის წინ, რუსთავი 2-ის ეთერში, მსახიობმა ნინუცა მაყაშვილმა ისაუბრა მის მტკივნეულ პირად გამოცდილებაზე, როდესაც წლების წინ, მაშინდელი მეუღლის, მსახიობ ბესო ზანგურის მხრიდან ოჯახში სისტემატური ძალადობის მსხვერპლი გახდა.  ჩვენს ქვეყანაში, სადაც ოჯახში ძალადობა სამწუხაროდ ხშირი მოვლენაა, საზოგადოება კი ჯერ კიდევ არ არის საკმარისად შეუწყნარებელი ამ ტიპის დანაშაულის მიმართ, მსხვერპლებს დიდი ძალის და გამბედაობის მოკრება სჭირდებათ საკუთარ გამოცდილებაზე ღიად და საჯაროდ სასაუბროდ. ამ რეალობაში, კიდევ უფრო დასაფასებელი და მაგალითის მიმცემია ნინუცა მაყაშვილის გადაწყვეტილება ხმამაღლა ესაუბრა ყოფილი მეუღლის, რუსთაველის ეროვნული თეატრის მსახიობის, ბესო ზანგურის მხრიდან განხორციელებულ ძალადობაზე.  გვჯერა, რომ მისი გამბედაობა გადამდები იქნება და ბევრი ქალისთვის გახდება სტიმული. ჩვენთვის მიუღებელია ოჯახში ძალადობის საშიშ დანაშაულში მხილებული პირი, ბესო ზანგური, რომელსაც არც პასუხი უგია და არც რაიმე სინანული გამოუთქვამს, იდგეს რუსთაველის ეროვნული თეატრის სცენაზე და ისევე აგრძელებდეს კარიერას, თითქოს არაფერი მომხდარა. აქედან გამომდინარე, მოვითხოვთ ბესო ზანგური ჩამოშორდეს მის პროფესიულ საქმიანობას თეატრში, სანამ საქმეზე არ დასრულდება გამოძიება...“ სრულად... წყარო: მოძრაობის გვერდი სოციალურ ქსელში