თბილისი. „ღირსეული შრომის პლატფორმა“ ეხმაურება ჯანდაცვის სამინისტროს ინიციატივას, შრომის ინსპექციის სამსახურის დახმარებით მოიკვლიოს ჰოსპიტალურ სექტორში დასაქმებული მედმუშაკების შრომისა და სახელფასო უფლებრივი მდგომარეობა.  „მიუხედავად უწყებებისგან დაგვიანებული რეაგირებისა, მივესალმებით ამ ნაბიჯს და იმედს გამოვთქვამთ, რომ მას შედეგად სამედიცინო პერსონალის შრომითი პირობების გაუმჯობესებისკენ მიმართული ქმედითი ნაბიჯები მოჰყვება“, - აცხადებს პლათფორმა, - „COVID-19-ის პანდემიამ საგრძნობლად გააუარესა მედმუშაკების (განსაკუთრებით ექთნებისა და სანიტრების) ისედაც მძიმე შრომითი პირობები. პანდემიურ მოცემულობაში ისინი დაუცველები აღმოჩდნენ. „პროფკავშირების ახალი გაერთაინების“ მონაცმებით სამუშაო მოვალეობის შესრულებისას კოვიდ-ინფექციით გარდაიცვალა 23 ექთანი, დასახელებული რიცხვი, მხოლოდ მათ ბაზაზე არსებულ მონაცემებს ასახავს. სახელმწიფოც და კერძო ჰოსპიტალური სექტორიც, რომლებიც წლების მანძილზე ორიენტირებული იყვნენ ჯანდაცვის მომსახურების საჯარო სიკეთიდან ბიზნესის მოგების ლოგიკაზე გადაყვანაზე, სრულიად მოუმზადებელი დახვდნენ კორონავირუსის პანდემიას. ეს განსაკუთრებით გამოვლინდა საკადრო და შრომის პოლიტიკაში“.  სრულად...   წყარო: gyla.ge

თბილისი. საქართველოს სტრატეგიისა და საერთაშორისო ურთიერთობების კვლევის ცენტრი აქვეყნებს რონდელის ფონდის უფროსი მკვლევარის, ლადო პაპავას ბლოგს - „ვაქცინაცია: ყოფნა?... არყოფნა?...“ „მიუხედავად იმისა, რომ შექმნილია სხვადასხვა სახეობის ვაქცინა, რაც მათი ხელმისაწვდომობის შემთხვევაში ადამიანებს უადვილებს არჩევანის გაკეთების საშუალებას, ამ ვაქცინების მიმართ დაბალი ნდობის საკითხი ძალიან მნიშვნელოვან პრობლემად რჩება. ხოლო თუ მოსახლეობის მნიშვნელოვან ნაწილს არ ექნება ნდობა ვაქცინების მიმართ, მაშინ COVID-19-ის პანდემიის დაძლევა მათი საშუალებით შეუძლებელი იქნება. სხვა სიტყვებით - როგორც აღმოჩნდა, ვაქცინის არსებობა თავისთავად სულაც არ არის პანაცეა“, - წერს ავტორი. სრულად...  წყარო: ორგანიზაციის ვებგვერდი

თბილისი. 27 აგვისტოს, ინფექციონისტმა, გიორგი კანდელაკმა გამოაქვეყნა პოსტი, სადაც ის ვაქცინასთან ასოცირებული დაავადების გაძლიერებაზე -VADE-ზე საუბრობდა. VADE ე.წ. ქოლგა ტერმინია და ანტისხეულით გაძლიერებულ დაავადებას -ADE და გაძლიერებულ რესპირატორულ დაავადებას -ERD, გულისხმობს. კანდელაკის თანახმად, სწორედ VADE-მ განაპირობა ზოგიერთი ვაქცინის წარუმატებლობა, ამის მაგალითად მას სინციტიური ვირუსის საწინააღმდეგო ვაქცინის და SARS-ის და MERS-ის ვაქცინების შემთხვევები მოჰყავს. ფაქტების შესწავლის შემდეგ, „ფაქტ ჩეკი“ აცხადებს, რომ გიორგი კანდელაკის ჰიპოთეზური მოსაზრება, თითქოს ADE (ანტისხეულით გაძლიერებული დაავადება) COVID-19-ის საწინააღმდეგო ვაქცინების შედეგად შეიძლება განვითარდეს, არის დაუსაბუთებელი. არ არსებობს სამეცნიერო მტკიცებულება, რომ კოვიდვაქცინები ADE-ს რეაქციას იწვევენ, ვაქცინის პრეკლინიკური და კლინიკური კვლევის ეტაპზე მსგავსი ფაქტი არ დაფიქსირებულა. ამასთან იმუნიზაციის პროცესში აცრილ ადამიანებში ADE-ს არცერთი შემთხვევა არაა აღწერილი. სრულად...  წყარო: factcheck.ge

თბილისი. „ფაქტ ჩეკი“ აცხადებს, რომ სიყალბეა, თითქოს, მოქალაქე პეტრე დვალიშვილი ვაქცინის მეორე დოზის მიღების შედეგად დამძიმდა და მალევე გარდაიცვალა.  „20 აგვისტოს Facebook-ანგარიშმა „ბოლო ჟამის ქრისტიანები“ სოციალურ ქსელში პოსტი გამოაქვეყნა. პოსტს თან ერთვის Guriatoday-ის სტატია. პოსტის აღწერის თანახმად, გურიაში, ლანჩხუთის პოლიციის ყოფილი თანამშრომელი პეტრე დვალიშვილი სინოფარმის ვაქცინის მეორე დოზის მიღების შედეგად დამძიმდა და მალევე გარდაიცვალა. აღნიშნული სიმართლეს არ შეესაბამება“, - ვკითხულობთ „ფაქტ ჩეკის“ ვებგვერდზე.  სრულად...  წყარო: factcheck.ge

თბილისი. სპეციალური პენიტენციური სამსახურის ინფორმაციით, პენიტენციურ დაწესებულებებში კორონავირუსი ასზე მეტ პატიმარს დაუდასტურდა.  პენიტენციურ დაწესებულებებში კორონავირუსის გავრცელებასთან დაკავშირებით, სახალხო დამცველის აპარატმა ინფორმაცია მოიპოვა პატიმრებისგან და კონკრეტული პენიტენციური დაწესებულებების ადმინისტრაციისგან. მოპოვებული ინფორმაცია ამ ეტაპზე შეესაბამება პენიტენციური სამსახურის მიერ გავრცელებულ ინფორმაციას. დღეისათვის N2, N8, N14 დაწესებულებებიდან ინფიცირებული პატიმრები გადაყვანილი არიან სპეციალურად მოწყობილ საკარანტინე სივრცეში. სპეციალური პენიტენციური სამსახურისგან გამოთხოვილია დამატებითი დეტალური ინფორმაცია პატიმართა იზოლაციისა და მკურნალობის შესახებ.  სრულად...   წყარო: ombudsman.ge

თბილისი. ფსიქიკურ ჯანმრთელობის დაცვის სფეროში მომუშავე ორგანიზაციები ეხმაურებიან ივანე ბოკერიას სახელობის თბილისის რეფერალურ ჰოსპიტალში ფსიქიკური ჯანმრთელობის განყოფილების გაუქმებას და ამ ფაქტს ფსიქიატრიული დაწესებულებების დეინსტიტუციონალიზაციის პროცესში უკან გადადგმულ ნაბიჯად მიიჩნევენ. „ფსიქიკური ჯანმრთელობის განყოფილების დახურვით, საფრთხე ექმნება ფსიქოსოციალური საჭიროების მქონე პირების უფლებას, ხელი მიუწვდებოდეთ ჯანდაცვის სერვისებზე. ჩნდება რისკები, რომ ადამიანები დარჩნენ შესაბამისი სერვისის გარეშე და/ან დაუბრუნდნენ ისედაც გადატვირთულ დიდ ფსიქიატრიულ დაწესებულებებს, სადაც უფრო მაღალია რისკი იმისა, რომ დაირღვეს პაციენტთა უფლებები. სწორედ ამ მიზნითაა დეინსტიტუციონალიზაციისა და მათი რეორგანიზაციის პროცესიც დაწყებული“. სრულად... წყარო: socialjustice.org.ge

თბილისი. მითების დეტექტორი აქვეყნებს სანდრო გიგაურის ბლოგპოსტს: ახლადშექმნილი „ფარღალიტი” იტალიელი ანტივაქსერი ექიმის კოვიდ-დეზინფორმაციებს ავრცელებს. „9 აგვისტოს, ფეისბუქ გვერდმა „ფარღალიტი” გამოაქვეყნა ვიდეო, სადაც იტალიელი ექიმი რობერტო პეტრელა ამბობს, რომ ტერმინი COVID-19 არა დაავადებას, არამედ ხელოვნური ინტელექტის მიერ ვაქცინაციის იდენტიფიკაციის მექანიზმს აღნიშნავს და ის მსოფლიო მოსახლეობის განადგურების მიზნითაა შექმნილი. გავრცელებული ვიდეო რამდენიმე დეზინფორმაციას შეიცავს.  COVID-19 ხელოვნური ინტელექტის მიერ ვაქცინაციის იდენტიფიკაციის მექანიზმს არ აღნიშნავს, რომელიც მოსახლეობის მასობრივ ექსტერმინაციას ისახავს მიზად. აგრეთვე, მცდარია ინფორმაცია იმის შესახებ, თითქოს ტესტებს SARS-CoV-2-ის დადგენა არ შეუძლიათ და უმეტესწილად დადებით პასუხს აჩვენებენ. მცდარია ის მტკიცებაც, რომ კორონავირუსის საწინააღმდეგო ვაქცინები ადამიანის იმუნიტეტს აქვეითებს, ასუსტებს ორგანიზმს და ლეტალურ შედეგებს იწვევს. 1) COVID-19 აბრევიატურაა და კორონავირუსის დასახელებას აღნიშნავს: “CO” - Corona (კორონა), “VI” - Virus (ვირუსი) და “D” - disease (დაავადება), ხოლო მოსახლეობის მასობრივი განადგურება კონსპირაციის თეორიაა; 2) ტესტებს SARS-CoV-2-ის იდენტიფიცირება შეუძლიათ და უმეტესწილად ზუსტ პასუხს აჩვენებენ“. სრულად... წყარო: mythdetector.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს საქართველოში ვაქცინაციის პროცესის მიმდინარეობის ანალიზს. „15 მარტიდან დღემდე ვაქცინაციის ეროვნული გეგმით გათვალისწინებული მიზნობრივი 46,520 სამედიცინო მუშაკის მხოლოდ 36%-ია აცრილი. 4 აგვისტოს მონაცემებით, სრულად აცრილი იყო სრული მოსახლეობის მხოლოდ 4.8%, მინიმუმ ერთი დოზით კი 10.4%. 18 წელს ზევით მოსახლეობის 13.5% ერთი დოზით მაინცაა აცრილი, 6.2% კი - სრულად. აცრებისა და ჯავშნების 58% თბილისზე მოდის. ხელმისაწვდომი არ არის ინფორმაცია, თუ რა სახის საინფორმაციო კამპანიას აწარმოებს მთავრობა მოსახლეობის ვაქცინაციის პროცესით დაინტერესებისა და ინფორმირებისათვის“. სრულად... წყარო: idfi.ge

თბილისი. საქართველოში შექმნილი მძიმე ეპიდემიოლოგიური ვითარებისა და აცრის სასიცოცხლო მნიშვნელობის გათვალისწინებით, მოქალაქეების დასახმარებლად და ვაქცინაციის პროცესის ხელშესაწყობად, საქართველოს სახალხო დამცველის აპარატი მზად არის დაინტერესებულ პირებს რეგისტრაციის პროცესში დაეხმაროს. სრულად... წყარო: ombudsman.ge

სამცხე-ჯავახეთი. გაეროს ბავშვთა ფონდი აგრძელებს COVID-19 ვაქცინაციის შესახებ საინფორმაციო შეხვედრებს. „ამჯერად ახალციხის სკოლების 60-მდე მასწავლებელსა და ადმინისტრაციის წარმომადგენელს ჯანდაცვის ცნობილი ექსპერტები შეხვდნენ და COVID-19-ის, ვაქცინაციის მნიშვნელობის და ამ მიმართულებით საქართველოში არსებული მდგომარეობის შესახებ მიაწოდეს ინფორმაცია. შეხვედრის შემდეგ დამსწრეთა უმრავლესობამ ჩაიტარა COVID-19-ის საწინააღმდეგო ვაქცინაცია“. სრულად... წყარო: www.unicef.org

თბილისი. ევროკავშირმა 35 მილიონი ევროთი გაზარდა აღმოსავლეთ პარტნიორობის ქვეყნებისათვის ჯანდაცვის სფეროში გამოყოფილი დახმარების პაკეტი, რათა უზრუნველყოფილი იქნას COVID-19 ვაქცინების სწრაფი, უსაფრთხო და ეფექტური მიწოდება მოსახლეობისათვის სომხეთში, აზერბაიჯანში, ბელარუსში, საქართველოში, მოლდოვასა და უკრაინაში. გაიგე მეტი... წყარო: eeas.europa.eu

თბილისი. „უფლებები საქართველო“ ვაქცინაციაზე რეგისტრაციაში დახმარებას გთავაზობთ. თუ თქვენ ვერ ახერხებთ ვაქცინაციაზე რეგისტრირებას; თუ ხანდაზმულობის, ჯანმრთელობის ან რაიმე სხვა ტიპის შეზღუდვის გამო თქვენ გჭირდებათ ბინაზე ვაქცინაცია; თუ არ გაქვთ საკმარისი ინფორმაცია ვაქცინაციის პროცესის შესახებ: 24/7-ზე დაურეკეთ ორგანიზაციას, მისწერეთ მესიჯი, ან გაუშვით ზარი „უფლებები საქართველოს“ ცხელ ხაზზე: 577 139906; 511 139909 სრულად... წყარო: ორგანიზაციის გვერდი სოციალურ ქსელში

თბილისი. ტოლერანტობისა და მრავალფეროვნების ინსტიტუტის (TDI) ინფორმაციით, ჯანდაცვის მინისტრის ბრძანებით, 22 ივლისიდან ამოქმედდა რეგულაცია, რომელიც საშუალებას აძლევს საქართველოში მყოფ უცხოელებს, ისარგებლონ იმუნიზაციის სახელმწიფო პროგრამით და ჩაიტარონ COVID-19-ის საწინააღმდეგო ვაქცინაცია. თუმცა, ბრძანება ითვალისწინებს კონკრეტულ პირობებს და ის ვრცელდება მხოლოდ უცხოელ ბენეფიციართა გარკვეულ ჯგუფზე. რეგულაციის მიხედვით, ვაქცინაციას ვერ შეძლებენ უსაბუთოდ მყოფი უცხოელები, ასევე, უცხოელი პირები, რომლებიც საქართველოში კანონიერად იმყოფებიან, თუმცა ბოლო სამი თვის განმავლობაში, საქართველოში კანონიერად ყოფნის უზრუნველყოფის მიზნით, მოუხდათ საქართველოს საზღვრის გადაკვეთა და კვლავ შემოსვლა. ამასთან ერთად, კვლავ უცვლელი რჩება ინდოელი სტუდენტების მიმართ შეზღუდვა, რომელიც საქართველოში შემოსვლას შესაძლებელს ხდის მხოლოდ ჩარტერული რეისით. მეორეს მხრივ, კი ჩარტერული რეისები არ ან შეზღუდული რაოდენობით ორგანიზდება და სტუდენტები ვერ ახერხებენ სასწავლებლად საქართველოში დაბრუნებას. ორგანიზაციები მოუწოდებენ საქართველოს მთავრობას და პანდემიის საკითხებზე შექმნილ უწყებათაშორის საკოორდინაციო საბჭოს, მოიხსნას ზემოთხსენებული შეზღუდვები, რომელიც ზღუდავს ადამიანის უფლებებს, საფრთხეს უქმნის მათ სიცოცხლეს და ქმნის ვირუსის გავრცელების რისკს. განცხადებას უერთდება „უფლებები საქართველო“. სრულად... წყარო: tdi.ge

სამცხე-ჯავახეთი. სამცხე-ჯავახეთსა და ქვემო ქართლში მომუშავე საზოგადოებრივი ორგანიზაციები ვაქცინაციის პროცესთან დაკავშირებით საქართველოს მთავრობას მიმართავენ. ორგანიზაციების ცნობით, ეთნიკური უმცირესობებით დასახლებული რეგიონების მოსახლეობა (სამცხე-ჯავახეთი, ქვემო ქართლი) განსაკუთრებულად სკეპტიკურადაა განწყობილი ვაქცინაციის მიმართ და რუსული პროპაგანდის ქვეშაა მოქცეული. ისინი არ აპირებენ კოვიდ 19-ის საწინააღმდეგო ვაქცინის გაკეთებას.  ინფორმირების და დარწმუნების შემთხვევაშიც კი, მოსახლეობას სხვა უამრავი ბარიერი აქვს: ისინი არ ფლობენ სახელმწიფო ენას, რაც ართულებს ქართულენოვან პორტალზე რეგისტრაციას, ცხელი ხაზის ოპერატორებიც კი მათ მხოლოდ ქართულ ენაზე ესაუბრებიან... „ჩვენ, როგორც წლების განმავლობაში ეთნიკური უმცირესობებით მჭიდროდ დასახლებულ რეგიონში მომუშავე საზოგადოებრივ ორგანიზაციებს მიგვაჩნია, რომ საქართველოში მაცხოვრებელ ეთნიკურ უმცირესობებს, უნდა ჰქონდეთ შესაძლებლობა ვაქცინაციის პორტალზე გაიარონ რეგისტაცია და მიიღონ ინფორმაცია ცხელი ხაზის ოპერატორებისგან მათთვის გასაგებ ენაზე. ვიმედოვნებთ სახელმწიფო ჯეროვნად შესარულებს თავის მოვალეობებს მოქალაქეების წინაშე და უახლოეს დღეებში უზრუნველყოფს ეთნიკური უმცირესობებისათვის ხელმისაწვდომობის გაზრდას ვაქცინაციის პროცესზე“, ნათქვამია ერთობლივ განცხადებაში.                         წყარო: დემოკრატ მესხთა კავშირის გვერდი სოციალურ ქსელში

თბილისი. ფაქტ-მეტრის ინფორმაციით, სოციალურ ქსელში გავრცელდა დეზინფორმაცია, რომლის თანახმადაც წნორში, კლინიკა „არქიმედეს“ მთავარი ექთანი, კორონავირუსის საწინააღმდეგო აცრით გარდაიცვალა. ჯანდაცვის სამინისტროსთან გადამოწმებული ინფორმაციის თანახმად, „კლინიკა „არქიმედეს“ მთავარი ექთანი ნანა ქაჩლიშვილი ნამდვილად გარდაიცვალა, თუმცა გარდაცვალებას აცრასთან კავშირი არ აქვს. ექთანი კორონავირუსის საწინააღმდეგო ვაქცინის, სინოფარმის ერთი დოზით 21 ივლისს აიცრა. მოგვიანებით, 24 ივლისს მას კორონავირუსი დაუდასტურდა. სამინისტროს თქმით, ექთანი მძიმე ქრონიკული პაციენტი იყო და 3 აგვისტოს გარდაიცვალა, თუმცა მისი გარდაცვალება ვაქცინაციასთან დაკავშირებული არ ყოფილა“. სრულად... წყარო: factcheck.ge

თბილისი. ადამიანის უფლებათა ცენტრი შეშფოთებას გამოხატავს საქართველოში ახალი კორონავირუსის - COVID-19-ის პანდემიის სწრაფ გავრცელებასთან დაკავშირებით. „ახლანდელი მონაცემებით კი სრულად ვაქცინირებულია მოსახლეობის მხოლოდ 5% და ეს იმ დროს, როცა ვირუსის გავრცელების დადებითობის მაჩვენებელი დღეში 6-დან 8 პროცენტამდე აღწევს. თუკი სახელმწიფო უზრუნველყოფს ჯანდაცვის მსოფლიო ორგანიზაციის მიერ აღიარებული ევროპული და ამერიკული ხარისხის ვაქცინების არჩევნის მრავალფეროვნებას, გაითვალისწინებს აცრების მიმართ დამოკიდებულებას (მაგალითად, არის ვაქცინები, რომლებიც ერთჯერადად აცრას საჭიროებს), ეს გარკვეულწილად დააჩქარებს ვაქცინაციის პროცესს. მნიშვნელოვანია ასევე, ინფორმაციის სწორად გავრცელება საზოგადოებაში, რადგან ახალი სახის ვაქცინების მიმართ ნდობა დაბალია, ვინაიდან არ არის გამოცდილი წლების მანძილზე და ადამიანებში იწვევს მომავლის შიშს. ამასთან გასათვალისწინებელია, რომ სწორედ საქართველოში გვქონდა გარდაცვალების შედეგი, რამაც შეაფერხა ვაქცინაციის პროცესი და გააჩინა უნდობლობა მედპერსონალის მიმართ. მნიშვნელოვანი საკითხია ტექნიკურად ვაქცინაზე რეგისტრაციის ხელმისაწვდომობა“. სრულად... წყარო: www.hrc.ge

თბილისი. მითების დეტექტორი სოციალურ ქსელში გავრცელებულ ინფორმაციას ეხმიანება, რომლის თანახმადაც, კორონავირუსის საწინააღმდეგო აცრის გაკეთებამდე, საჭიროა, სისხლის შედედების ნორმაში ყოფნის დამადასტურებელი ანალიზების, ასევე, ანტისხეულების და ანტიგენის ტესტების გაკეთება. „ვაქცინამდე დედიმერისა და კოაგულოგრამის ჩატარებას არც საქართველოს ვაქცინაციის პროტოკოლი და არც საერთაშორისო პრაქტიკა ითვალისწინებს. მცდარია, რომ კოვიდით უსიმპტომო ინფიცირებისას ვაქცინაცია სახიფათოა და სიმპტომების არქონის შემთხვევაში, ანტიგენის ან სხვა ტესტის ჩატარება აუცილებელია. ვაქცინაცია სახიფათო არ არის არც ანტისხეულების „მაღალი ტიტრის“ არსებობისას“, ნათქვამია მითების დეტექტორის ბლოგპოსტში. სრულად... წყარო: mythdetector.ge

თბილისი. პარტნიორობა ადამიანის უფლებებისთვის (PHR) მიმართვის საფუძველზე, ომბუდსმენმა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს (შემდეგში - ჯანდაცვის სამინისტროს) მხრიდან ირიბი დისკრიმინაციის ფაქტი დაადგინა. „ეტლით მოსარგებლე ორსულმა ქალმა ერთ-ერთ კერძო კლინიკას მიმართა, რათა სახელმწიფოს მიერ „დედათა და ბავშვთა ჯანმრთელობის“ სახელმწიფო პროგრამით გათვალისწინებული უფასო მომსახურება მიეღო. კლინიკა სრულად მიუწვდომელი იყო, კერძოდ, შენობას არ ჰქონდა პანდუსი, ასევე, ექიმის კაბინეტამდე მისასვლელი გზა კიბით იყო დაკავშირებული, საპირფარეშოთი სარგებლობა ეტლით მოსარგებლისთვის სრულიად შეუძლებელი იყო”. სრულად... წყარო: phr.ge

თბილისი. მითების დეტექტორის ინფორმაციით, ალტ-ინფოს მხარდამჭერმა ბლოგერმა ბექა ვარდოსანიძემ ფეისბუკში გამოაქვენა პოსტი, სადაც წერს, რომ სოციალულ ქსელ Telegram-ზე გამოქვეყნებული დოკუმენტის მიხედვითაც, დიდ ბრიტანეთში Covid-19-ით ინფიცირებულთა შორის ვაქცინირებულთა სიკვდილის მაჩვენებელი უფრო მაღალია, ვიდრე არავაქცინირებულების. „ბექა ვარდოსანიძის პოსტი შეცდომაში შემყვანია და დიდ ბრიტანეთში კორონავირუსით ინფიცირებისა და ვაქცინაციის სტატისტიკის სრულ სურათს არ აჩვენებს. რეალურად, ბოლო 6 თვეში კოვიდ19-ით ინფიცირებულთაგან ნახევარზე მეტი არავაქცინირებული იყო, ხოლო ვაქცირებულთა გარდაცვალების შემთხვევებმა არავაქცინირებულების სიკვდილიანობის მაჩვენებელს მხოლოდ 50+ ასაკობრივ კატეგორიაში გადააჭარბა, სადაც სიკვდილის რისკი ვირუსისთვის დამახასიათებელი თვისებებიდან გამომდინარე გაზრდილია“. სრულად... წყარო: mythdetector.ge

თბილისი. მითების დეტექტორმა გადაამოწმა ინფორმაცია კასპის მეორე საჯარო სკოლის დირექტორის გარდაცვალების ფაქტთან დაკავშირებით. „24 ივლისს სოციალურ ქსელში ფართოდ გავრცელდა ინფორმაცია იმის შესახებ, რომ კასპის მე-2 საჯარო სკოლის დირექტორი ოლია მახარაძე კოვიდსაწინააღმდეგო ვაქცინის მეორე დოზის მიღებიდან მალევე შეუძლოდ გახდა და 5 საათში გარდაიცვალა. მტკიცება იმის შესახებ, რომ ოლია მახარაძე კოვიდსაწინააღმდეგო ვაქცინის მეორე დოზის გაკეთების შედეგად გარდაიცვალა, მცდარია. გარდაცვლილის შვილიშვილმა „ბათუმელებთან” საუბარში აღნიშნა, რომ ქალი გულის შეტევით 24 ივლისს გარდაიცვალა. ვაქცინის მეორე დოზა კი გაკეთებული არ ჰქონდა და მის მისაღებად დარეგისტრიებული 27 ივლისს იყო“. სრულად... წყარო: www.mythdetector.ge

აჭარა. გაეროს ბავშვთა ფონდი აგრძელებს COVID-19 ვაქცინაციის შესახებ საინფორმაციო შეხვედრებს. „ამჯერად მაღალმთიანი აჭარის, კერძოდ კი ხულოს, ქედასა და შუახევის, მასწავლებლებს ჯანდაცვის ცნობილი ექსპერტები შეხვდნენ და COVID-19-ის, ვაქცინაციის მნიშვნელობის და ამ მიმართულებით საქართველოში არსებული მდგომარეობის შესახებ მიაწოდეს ინფორმაცია. შეხვედრის შემდეგ ბევრმა მასწავლებელმა ჩაიტარა COVID-19-ის საწინააღმდეგო ვაქცინაცია“.                                წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციას (საია) დახმარების თხოვნით მომართა მოქალაქემ, რომელიც სისხლის დონორთა ერთიან ელექტრონულ ბაზაში აივ ინფიცირებულად იყო რეგისტრირებული. მოქალაქეს ამის გამო სისხლის დონორად ყოფნის უფლება შეეზღუდა. განმცხადებელმა წარმოადგინა 2015, 2016, 2017 და 2020 წლებში ჩატარებული კვლევის შედეგები, რომლის მიხედვითაც მას აივ ინფიცირების ფაქტი არ დაუდასტურდა. ამის მიუხედავად, ცენტრმა განმცხადებელს აივ ინფიცირებულთა ბაზიდან ამოღებაზე უარი განუცხადა.  „განმცხადებელმა საიას დახმარებით მიმართა სახელმწიფო ინსპექტორის აპარატს. ინსპექტორის განმარტებით, მოცემულ შემთხვევაში პირის უფლება, იყოს დონორი, არის სამედიცინო კატეგორიის საკითხი და იგი უნდა გადაწყდეს შესაბამისი სპეციალისტების მიერ, თუმცა ამ კონკრეტულ შემთხვევაში განმცხადებლისთვის შექმნილი ხელოვნური ბარიერი არღვევდა ამ პირის კონსტიტუციით გარანტირებულ უფლებებს. საია მიესალმება სახელმწიფო ინსპექტორის ამ გადაწყვეტილებას და დააკვირდება გადაწყვეტილების აღსრულების პროცესს“.  სრულად... წყარო: gyla.ge