თბილისი. გაეროს ბავშვთა ფონდის თანამშრომლები იმუნიზაციის სახელმწიფო პროგრამის ფარგლებში COVID-19-ის საწინააღმდეგო ვაქცინით იცრებიან. „აცრა ერთადერთი გზაა, დავამარცხოთ პანდემია და დავუბრუნდეთ ნორმალურ ცხოვრებას“. სრულად... წყარო: ორგანიზაციის გვერდი სოციალურ ქსელში

თბილისი. მაკ-ი კარგად აცნობიერებს მშობლების ამ საჭიროებას და იწყებს ცერებრული დამბლის მქონე მშობელთა თვითდახმარების ჯგუფის შექმნას. „შეზღუდული შესაძლებლობის მქონე ბავშვების მშობლები ყოველდღიურად აწყდებიან უამრავ გამოწვევას, რაც ხშირად განპირობებულია ბავშვის კონკრეტული სამედიცინო დიაგნოზით. იმისთვის, რომ მშობლებმა წარმატებით გაართვან თავი ამ გამოწვევებს, სპეციალისტებისა და შესაბამისი სერვისების პარალელურად მნიშვნელოვანია მსგავსი გამოცდილების მქონე მშობლებთან საკუთარი აზრების გაზიარება და საუბარი.  თუ თქვენ ხართ 18 წლამდე ასაკის ცერებრული დამბლის მქონე ბავშვის მშობელი, გაქვთ წვდომა ინტერნეტზე და შესაძლებლობა ჩაერთოთ თვითდახმარების ჯგუფში ონლაინ პლატფორმის (ზუმის - zoom) გამოყენებით მინიმუმ 2 (ორ) კვირაში ერთხელ, მაშინ მიჰყევით ბმულს და შეავსეთ განაცხადი 18 მაისის ჩათვლით“. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს წითელი ჯვრის საზოგადოება გიზიარებთ რეკომენდაციებს ექიმთან ვიზიტის დროს. სახლიდან გასვლის წინ გაიკეთეთ ნიღაბი, თან იქონიეთ სადეზინფექციო ხსნარი და თუ მოწყვლად ჯგუფს მიეკუთვნებით, ატარეთ სამედიცინო ნიღაბი; გადაუდებელი აუცილებლობის გარდა, შეეცადეთ ექიმთან კონსულტაცია სატელეფონო ზარით ან ინტერნეტით გაიაროთ. ექიმთან ვიზიტის შემთხვევაში, კონსულტაცია წინასწარ დაჯავშნეთ და დაიცავით ფიზიკური დისტანცია. სრულად... წყარო: ორგანიზაციის გვერდი სოციალურ ქსელში

თბილისი. მითების დეტექტორი გთავაზობთ სტატიას, რომელიც Facebook-ის ფაქტების გადამოწმების პროგრამის ფარგლებში მომზადდა. მასალაში საუბარია კოვიდ 19-ის სხვადასხვა შტამის წინააღმდეგ ვაქცინების ეფექტიანობაზე. „23 აპრილს ორგანიზაცია „აკრედიტაცია საზღვრების გარეშე“ ხელმძღვანელმა გიორგი ფხაკაძემ ფეისბუქ-ლაივში ვაქცინების შესახებ ისაუბრა. მან აღნიშნა, რომ დღესდღეობით საქართველოში უმეტესად კორონავირუსის ბრიტანული შტამია გავრცელებული და არსებული ვაქცინები ბრიტანული შტამის წინააღმდეგ მეტ-ნაკლებად ეფექტურად მუშაობენ, ჩინური ვაქცინა კი “ნაგავია და ბრიტანულ შტამზე არ მუშაობს”. კორონავირუსის ბრიტანული შტამის წინააღმდეგ არსებული ვაქცინები (ფაიზერი, მოდერნა, ასტრაზენეკა) ეფექტიანია, რაც შეეხება სინოფარმს, ჯანმოს სტრატეგიული საკონსულტაციო ექსპერტთა ჯგუფის დოკუმენტის მიხედვით, 18-59 ასაკობრივ ჯგუფში სინოფარმის ეფექტიანობა 78.1%-ია, ხოლო ინფორმაცია, თითქოს სინოფარმი ბრიტანული შტამის წინააღმდეგ არ მუშაობს, მტკიცებულების გარეშეა, რადგან ამ მიმართულებით საკმარისი კვლევა და მონაცემები ჯერჯერობით ხელმისაწვდომი არ არის“. სრულად... წყარო: mythdetector.ge

თბილისი. სახალხო დამცველმა გამოაქვეყნა სპეციალური ანგარიში „თვითმმართველი ორგანოების სოციალური და ჯანმრთელობის დაცვის პროგრამების შესაბამისობა თანასწორობის პრინციპთან“, რომელშიც მუნიციპალური პროგრამების ანტიდისკრიმინაციულ კანონმდებლობასთან შესაბამისობაა გაანალიზებული. „კვლევამ ცხადყო, რომ ადგილობრივი თვითმმართველობის პროგრამების ნაწილი მოსარგებლეთა წრის განსაზღვრისას სქესის, შეზღუდული შესაძლებლობის, ასაკის, ქორწინების სტატუსის და სხვა ნიშნით დისკრიმინაციულ კრიტერიუმებს იყენებს, რის შედეგადაც, რიგი ჯგუფები პროგრამით სარგებლობის მიღმა რჩებიან. ასევე, გვხვდება სხვადასხვა ჯგუფების მიმართ დისკრიმინაციის წამახალისებელი ტერმინები და რეგულაციები, რომელიც არსებულ სტიგმებს აძლიერებს. არის შემთხვევები, როდესაც თანაბარი საჭიროებების მქონე პირთაგან პროგრამაში მოსახვედრად შერჩევა ყოველგვარი დასაბუთების გარეშე ხდება“. სრულად... წყარო: ombudsman.ge

ელექტრონულ ბარათებში განხილულია სხვადასხვა მნიშვნელოვანი საკითხები, როგორიცაა ვაქცინაციის აუცილებლობა და მისი სარგებელი, ევროკავშირის და ჯანმოს მხარდაჭერა საქართველოსთვის კოვიდ-პანდემიის პერიოდში, სხვადასხვა სახის მხარდაჭერის მექანიზმები, რომლებიც ხელმისაწვდომია პანდემიის პერიოდში. ბარათები ხელმისაწვდომია ქართულ და ინგლისურ ენაზე. ბარათები შეიქმნა ევროკავშირის სამეზობლო პოლიტიკის ფარგლებში, ჯანმრთელობისმსოფლიო ორგანიზაციასთან და EUvsDisinfo-სთან თანამშრომლობით ყველაფერი, რაც COVID-19-ის პანდემიის პერიოდში ვაქცინაციის შესახებ უნდა იცოდეთ

თბილისი. მითების დეტექტორის ლაბორატორიის სტუდენტმა თამთა კაპანაძემ გადაამოწმა თუ ვინ წაუკიდა ცეცხლი პირბადეს, რისგან შედგება ის და როგორ გვიცავს ბაქტერიებისგან. „გავრცელებული ვიდეო, სადაც ჩანს, რომ სამედიცინო პირბადე აალების დროს დნება, შეცდომაში შემყვანია. რეალურად, სამედიცინო პირბადეების დნობაში უცნაური არაფერია, რადგან ის უქსოვადი მატერია-სპანბონდისგან (spunbond) მზადდება, რომელიც მაღალ ტემპერატურაზე გამძლეობით და ბაქტერიების წინააღმდეგ კარგი ფილტრაციით გამოირჩევა. მსგავსი სამედიცინო პირბადე საფრთხისშემცველი არ არის და ის კოვიდ19-ის გავრცელებას აფერხებს“.  სრულად... წყარო: mythdetector.ge

თბილისი. სოციალური სამართლიანობის ცენტრმა (ყოფილი EMC) ნარკოპოლიტიკის 2020 წლის ტენდენციების შესახებ ანგარიში მოამზადა. „ანგარიშში მიმოხილულია ნარკოტიკულ დანაშაულებზე მართლმსაჯულების სფეროში არსებული მდგომარეობა, 2020 წლის სტატისტიკური მონაცემები ნარკოტიკულ დანაშაულებზე სისხლისსამართლებრივი დევნის და გამამტყუნებელი განაჩენების, ნარკოტესტირების, პირობით მსჯავრდებულთა რაოდენობისა და სხვა რელევანტური საკითხების თაობაზე“, ნათქვამია ორგანიზაციის ვებგვერდზე. სრულად... წყარო: socialjustice.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ინტერვიუს გარემოს დამცველთან, „საქართველოს მწვანეთა მოძრაობა - დედამიწის მეგობრების“ თანათავმჯდომარე ნინო ჩხობაძესთან. „ჩერნობილის კატასტროფა ეწინააღმდეგებოდა საბჭოთა ძლიერებისა თუ სამეცნიერო სფეროში უპირატესობის ნარატივს, საფრთხეს უქმნიდა საბჭოთა კავშირის პოლიტიკას. ამის გამო დიდი ხნის განმავლობაში სსრკ-ში ცდილობდნენ ჩერნობილის შესახებ ინფორმაცია არ გაევრცელებინათ“.  „დღესაც [სისხლში] ტყვიის მაღალი შემცველობის გამოვლინება დასავლეთ საქართველოში, ჩვენი აზრით, შესაძლებელია, იყოს ჩერნობილის კატასტროფის შედეგი“, ამბობს ნინო ჩხობაძე. სრულად... წყარო: idfi.ge

თბილისი. სოციალური სამართლიანობის ცენტრი პროექტის „ოპოიდებით ჩანაცვლებითი მკურნალობის ხელმისაწვდომობის ადვოკატირება პენიტენციურ დაწესებულებაში“ ფარგლებში აქვეყნებს თემო ხატიაშვილის ვიდეოპოსტს: ჩანაცვლებითი მკურნალობის პრობლემები ციხეებში“. ციხეებში დღემდე არ მოქმედებს ხანგრძლივი ჩანაცვლებითი მკურნალობა. არსებული კანონმდებლობა ვერ უზრუნველყოფს მსჯავრდებული და ბრალდებული პირებისთვის მკურნალობის უწყვეტობას, აიძულებს პროგრამაში ჩართულ პირებს უარი თქვან მკურნალობაზე პენიტენციურ სისტემაში მოხვედრის შემთხვევაში. არსებული რეგულაციები არ შეესაბამება ადამიანის უფლებათა დაცვის სტანდარტებს და აფერხებს ჯანდაცვის სერვისებზე თანაბარი ხელმისაწვდომობას ციხეებში“, ამბობს თემო ხატიაშვილი. სრულად... წყარო: socialjustice.org.ge

თბილისი. ევროკავშირი საქართველოში კოვიდ 19-ის პანდემიის პერიოდში ვაქცინაციის შესახებ ინფორმაციას აქვეყნებს. „ყველას გვყავს ნაცნობი ან მეგობარი, რომელიც ვაქცინაციას კატეგორიულად ეწინააღმდეგება და ამ შიშს საფუძვლად ვაქცინაციის საწინააღმდეგო კონსპირაციული თეორიებისადმი რწმენა უდევს. COVID პანდემიის გავრცელებამ ნაყოფიერი ნიადაგი შექმნა დეზინფორმაციის გასავრცელებლად როგორც აღმოსავლეთ პარტნიორობის ქვეყნებში, ისე მთელ მსოფლიოში.  გსურთ გადაარწმუნოთ თქვენი მეგობრები და შეუცვალოთ წარმოდგენა ვაქცინაციის შესახებ? წაიკითხეთ საინფორმაციო ბარათები და გაიგეთ ყველაფერი, რაც COVID-19-ის პანდემიის პერიოდში ვაქცინაციის შესახებ უნდა იცოდეთ”.  სრულად... წყარო: www.euneighbours.eu

თბილისი. FactCheck-ის ინფორმაციით, Covid-19-ის ვაქცინების გვერდით მოვლენებთან დაკავშირებით მორიგი დეზინფორმაცია ვრცელდება.  2021 წლის 11 მარტს, Facebook-მომხმარებელმა შ.შ.-მ Covid-19-ის ვაქცინებთან დაკავშირებული პოსტი გამოაქვეყნა. პოსტში მოცემულია ცხრილი, რომელიც შ.შ.-ს მტკიცებით, ვაქცინების ლეტალობასა და მძიმე შედეგებს ასახავს. ცხრილის მიხედვით, Pfizer/BioNTech-ის ვაქცინით გამოწვეული მძიმე შედეგები 30%-ია, Moderna-ს შემთხვევაში 49%, ხოლო AstraZeneca-სი - 72%. FactCheck აცხადებს, რომ პოსტში გავრცელებული ინფორმაცია სიმართლეს არ შეესაბამება.  სრულად...  წყარო: ორგანიზაციის ვებგვერდი

თბილისი. 2 აპრილს მსოფლიოში აუტიზმის შესახებ ცნობიერების ამაღლების დღე აღინიშნება. ომბუდსმენის ინფორმაციის თანახმად, მიმდინარე წელს ამ დღის აღნიშვნის ფარგლებში, გაერთიანებული ერების ორგანიზაციის მიერ ყურადღება გამახვილებულია პანდემიის პირობებში, მსოფლიოში მკაფიოდ გამოკვეთილ უთანასწორობაზე, რაც ნეგატიურად აისახა აუტიზმის მქონე პირებზეც.  „კორონა ვირუსით გამოწვეული ვითარების ფონზე საქართველოში მცხოვრები აუტიზმის მქონე პირები არაერთი გამოწვევის წინაშე აღმოჩნდნენ. კიდევ უფრო მეტად გართულდა მათი უფლებების სათანადოდ განხორციელება. სახელმწიფოს მიერ კვლავ არ ხდება ამ პირთა ინდივიდუალურ საჭიროებებზე მორგებული პროგრამებით უზრუნველყოფა. პრობლემურია ჯანმრთელობის დაცვის დაწესებულებებისა და სერვისების მისაწვდომობა, არაადაპტირებული სამედიცინო მომსახურებები. გამოწვევაა სამედიცინო პერსონალთან კომუნიკაციის სირთულე. არ ტარდება აუტიზმის მქონე პირთა და მათი ოჯახების სოციალური და ფსიქოლოგიური ხასიათის მხარდამჭერი ღონისძიებები“.  სრულად... წყარო: ორგანიზაციის გვერდი სოციალურ ქსელში

თბილისი. ეკონომიკური პოლიტიკის კვლევის ცენტრი (EPRC) მესამე ლოქდაუნის თავიდან ასაცილებლად პეტიციას ავრცელებს. „მიმართვის ხელმომწერები ვიზიარებთ „ეკონომიკური პოლიტიკის კვლევის ცენტრთან“ არსებულ ჯანდაცვის პლატფორმაზე გაერთიანებული პროფესიონალების რეკომენდაციებს, რომლებიც მთავრობას რეგულარულად ეგზავნებოდა. იმავდროულად, ამ ეტაპზე გადაუდებლად მიგვაჩნია, რომ მთავრობამ: დაიწყოს ფართომასშტაბიანი და განსხვავებული სამიზნე ჯგუფებზე გათვლილი, სისტემური და ინტენსიური საინფორმაციო კამპანია COVID-19 ინფექციის საშიშროებასა და საპასუხო ქმედებების აუცილებლობაზე (პირბადის ტარება, სოციალური დისტანცირება) ხაზგასმით.  მტკიცებულებებზე დაყრდნობით დაასაბუთოს მოქმედი რეგულაციების გავლენა ინფექციის გავრცელების კონტროლზე და უზრუნველყოს იმ მოქმედი რეგულაციების თანმიმდევრული აღსრულება, რომელთაც არსებითი მნიშვნელობა აქვს ინფექციის გავრცელების შეკავებისთვის. პეტიცია ღიაა და მასზე ხელმოწერა ყველა მსურველს შეუძლია“. სრულად... წყარო: ორგანიზაციის გვერდი სოციალურ ქსელში

თბილისი. FactCheck ავცელებს ინფორმაცის სოციალურ ქსელში „ფაიზერის“ ვაქცინასთან დაკავშირებით დადებული პოსტის შესახებ. „2021 წლის 26 თებერვალს, Facebook-მომხმარებელმა გამოაქვეყნა პოსტი, რომელშიც აუდიოჩანაწერია მოცემული. აუდიოჩანაწერს თან ახლავს რუსული წარწერა - Cрочно!! Всем Услышать!!! (სასწრაფოდ!! ყველამ მოუსმინოს!!!). ჩანაწერში საუბრობს ქალი, რომელიც საკუთარ თავს იულია გაპონიუკად წარადგენს და ამბობს, რომ ის ზოგადი პრაქტიკის ექიმია. ექიმი ჩანაწერში Pfizer-ის ვაქცინასა და ისრაელში ვაქცინაციის შემდეგ ადამიანთა დაინფიცირებაზე საუბრობს. ინტერნეტში აუდიო ჩანაწერის სახით გავრცელებული ინფორმაცია სიმართლეს არ შეესაბამება და ყალბი ამბავია“, - აცხადებს FactCheck. სრულად...  წყარო: ორგანიზაციის ვებგვერდი

კახეთი. ცოდნის კაფე სოციალურად შეჭირვებული ხანდაზმულების დასახმარებლად გთავაზობთ, 5 ლარად შეიძინოთ კოსმოს მრავალჯერადი გამოყენების პირბადე და კოსმოს გუნდი მას თქვენი სახელით გადასცემს ხანდაზმულს. „Პანდემიამ განსაკუთრებით შეცვალა ხანდაზმული ადამიანების ყოველდღიურობა, პროდუქტებისა თუ საყოფაცხოვრებო ნივთების სიას შეემატა პირბადე. Პირბადეს უსაფრთხოდ რომ ატარებდნენ, თვეში 10 ლარამდე უნდა გადადონ მათი ისედაც მცირე პენსიიდან მათივე უსაფრთხოებაში. P.S. გუნდში „კოსმო“ ერთიანდებიან ახალგაზრდები ყვარლიდან ცოდნის კაფეს ასაშენებელი კამპანიის ფარგლებში". სრულად... წყარო: ორგანიზაციის გვერდი სოციალურ ქსელში

თბილისი. 29 მარტს საქართველოს სახალხო დამცველმა ნინო ლომჯარიამ აკადემიკოს ნიკოლოზ ყიფშიძის სახელობის საუნივერსიტეტო კლინიკაში (რესპუბლიკურ საავადმყოფოში) ასტრა-ზენეკას ვაქცინით აიცრა. სახალხო დამცველმა ისაუბრა ვაქცინაციის მნიშვნელობაზე პანდემიის აღმოსაფხვრელად, განსაკუთრებით ხაზი გაუსვა თანამდებობის პირთა ვალდებულებას მაგალითის მიმცემი იყვნენ ქვეყნის მოსახლეობისთვის და აღნიშნა, რომ მიუხედავად გავრცელებული შეხედულებებისა, ასტრა-ზენეკას ვაქცინის ეფექტიანობა დადასტურებულია შესაბამისი ორგანიზაციების მიერ.  სრულად... წყარო: ombudsman.ge

თბილისი. ადამიანის უფლებათა ცენტრი 2021 წლის 20 იანვრიდან ახორციელებს პროექტს „პანდემიის შედეგების შემსუბუქება მარტოხელა ხანდაზმულებისთვის შიდა ქართლში“. პროექტის ფარგლებში მოხალისეებმა ოთხივე მუნიციპალიტეტში (გორი, ხაშური, ქარელი, კასპი), პირდაპირი ვიზიტის ფარგლებში, გამოკითხეს 100-ზე მეტი მარტოხელა/მარტო მცხოვრები ხანდაზმული. მათი აბსოლიტური უმრავლესობის განცხადებით ისინი ქრონიკული დაავადებების სამკურნალო მედიკამენტებით უზრუნველყოფის სახელმწიფო პროგრამით ვერ სარგებლობენ, მიუხედავად იმისა, რომ პროგრამა ითვალისწინებს გულ-სისხლძარღვთა ქრონიკული დაავადებების, ფილტვის ქრონიკული დაავადებების, დიაბეტის (ტიპი II), ფარისებრი ჯირკვლის დაავადებების, ეპილეფსიის და პარკინსონის დაავადების სამკურნალო მედიკამენტებით უზრუნველყოფას.  სრულად...   წყარო: ორგაზანიზაციის ვებგვერდი

თბილისი. საქართველოს სახალხო დამცველის აპარატმა, კორონავირუსის პანდემიის პირობებში საგანმანათლებლო დაწესებულებებში სასწავლო პროცესის მზაობისა და უსაფრთხოების კუთხით არსებული საჭიროებების გამოსავლენად, თბილისის 21-ე საჯარო სკოლის მონიტორინგი განახორციელა. „მონიტორინგმა რიგი გამოწვევები გამოავლინა, რომელთა პრევენცია და აღმოფხვრაც მნიშვნელოვანია სასწავლო პროცესის უსაფრთხოების უზრუნველსაყოფად. აღსანიშნავია, რომ შემოწმებული სკოლები მეტწილად პასუხობს ვირუსის პრევენციისთვის აუცილებელ პირობებს, თუმცა გამოიკვეთა სანიტარულ-ჰიგიენური, ინფრასტრუქტურული მოწესრიგების, სასმელი წყლის ხელმისაწვდომობის, საპირფარეშოების მოწყობისა და დისტანციის დაცვის პრობლემები“, ნათქვამია ომბუდსმენის ვებგვერდზე. სრულად... წყარო: ombudsman.ge

სამეგრელო. 17 მარტს, საქართველოს წითელი ჯვრის საზოგადოების ზუგდიდის ფილიალში ჩატარდა შეხვედრა პარტნიორებთან. „შეხვედრის მიზანი იყო პროექტის „ევროკავშირი ახალგაზრდებისათვის“ ფარგლებში, მიმდინარე საქმიანობებისა და მიღწეული შედეგების გაზიარება, ასევე სამომავლო გეგმებისა და მიზნების დასახვა“. სრულად... წყარო: ორგანიზაციის გვერდი სოციალურ ქსელში

თბილისი. „მშობლის სკივრი“ გიზიარებთ რჩევებს თუ როგორ უნდა აიყვანოთ და დაიჭიროთ ხელში ცერებრული დამბლის მქონე ბავშვი. ხელში აყვანა: დაბალი ტონუსის მქონე ბავშვის შემთხვევაში, თავის უკან გადავარდნის ასაცილებლად, თქვენი ხელებით ერთდროულად დაუფიქსირეთ მხრები და თავი, წამოაჯინეთ და აიყვანეთ. მაღალი ტონუსის მქონე ბავშვის შემთხვევაში, ტონუსის შესამცირებლად, გადააბრუნეთ ბავშვი გვერდზე, რა დროსაც მოახრევინეთ ფეხები; ერთი ხელი შემოხვიეთ მხრებზე, მეორე ხელით შეინარჩუნეთ ფეხების მოხრილი მდგომარეობა და აიყვანეთ.  ხელში ჭერა: მაღალი ტონუსის მქონე ბავშვის ხელში ჭერის დროს, წაახალისეთ სხეულის მოხრა - ბავშვი დაიჭირეთ ისე, რომ მისი მენჯ-ბარძაყის სახსარი იყოს მოხრილი 90 გრადუსზე მეტად, ხოლო ზედა ტანი მცირედად გადახრილი წინ. დაბალი ტონუსის შემთხვევაში, ხელში ჭერის დროს წაახალისეთ თავის და ტანის ამართული პოზიცია. საყრდენად გამოიყენეთ თქვენი სხეული ან მკლავი, მუხლები შეინარჩუნეთ მოხრილ მდგომარეობაში. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის ინფორმაციით, ორგანიზაციამ საბოლოოდ მოიგო საქმე, რომლითაც ფსიქიატრიულ დაწესებულებაში ქალის უკანონო განთავსების გამო საავადმყოფოს მორალური ზიანის ანაზღაურება დაეკისრა. სრულად... წყარო: ორგანიზაციის გვერდი სოციალურ ქსელში