თბილისი. ადამიანის უფლებების სწავლებისა და მონიტორინგის ცენტრი (EMC) ტყიბულის შახტში დასაქმებულ ერთ-ერთ მეშახტეს შახტებში არსებულ მძიმე სამუშაო პირობებზე ესაუბრა. „დღეს ტყიბულელი მეშახტის მთავარი წუხილი ისაა, რომ სახლიდან გასვლისას უკან ცოცხალი და ჯანმრთელი დაბრუნების გარანტია არ აქვს. უსაფრთხოება მთავარი პრობლემაა. წინა პერიოდებთან შედარებით დიდი განსხვავება არ არის. უამრავი ტრაგიკული შემთხვევის გამომწვევი მიზეზების აღმოსაფხვრელად არანაირი ძირეული ცვლილება არ გაკეთებულა. ერთადერთი, რაც ახალმა კომპანიამ მოიგონა გაზის აპარატურის დაყენებაა და „ლავების“ აფეთქების დროს ხალხი გამოყავთ. ნახშირის მოპოვება იქნება თუ დამუშავება არაფერი არ შეცვლილა. პრობლემა რასაც ამდენ ტრაგიკულ შემთხვევამდე მივყავართ „კამერული“ სისტემით ნახშრის მოპოვებაა“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია (საია) საკონსტიტუციო სასამართლოში ასაჩივრებს „ჯანმრთელობის დაცვის შესახებ“ კანონით და საქართველოს იუსტიციის მინისტრის ბრძანებით დადგენილ აკრძალვას, რომლის მიხედვითაც, ექსტრაკორპორული განაყოფიერებით სარგებლობის შესაძლებლობა აქვს მხოლოდ წყვილებს (ცოლ-ქმარს ან 1 წლის განმავლობაში ერთად მცხოვრებ ქალსა და მამაკაცს). „აღსანიშნავია ის გარემოება, რომ, საქართველოს კანონმდებლობით, სპერმის დონორობის გზით მარტოხელა ქალსაც აქვს დედად გახდომის შესაძლებლობა. რაც შეეხება მარტოხელა მამაკაცს, საქართველოს კანონმდებლობა ამ უკანასკნელს უკრძალავს ხელოვნური განაყოფიერების გზით გახდეს მამა. ამგვარი შეზღუდვა არღვევს საქართველოს კონსტიტუციის მე-15 მუხლის პირველი პუნქტით აღიარებულ პირადი და ოჯახური ცხოვრების უფლებას“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ქალთა და შეზღუდული შესაძლებლობის მქონე ქალთა პლატფორმის წევრებმა, ესმა გუმბერიძემ და ოლღა კალინამ, 2021 წლის 5 მარტს, მონაწილეობა მიიღეს საერთაშორისო დისკუსიაში, რომლიც შეეხებოდა აღმოსავლეთის პარტნიორობის ქვეყნებში შეზღუდული შესაძლებლობის მქონე პირების უფლებების დაცვის საკითხს თანასწორობისა და ინკლუზიის მიმართულებით. „საქართველოს წარმომადგენლებმა ქალთა და შეზღუდული შესაძლებლობის მქონე ქალების პლატფორმიდან დისკუსიის მონაწილეებს გააცნეს საქართველოში არსებული ვითარება შეზღუდული შესაძლებლობის მქონე პირთა სტატუსის მინიჭების მოდელებთან დაკავშირებით“. სრულად... წყარო: phr.ge

თბილისი. ომბუდსმენს საგანგაშოდ მიაჩნია დაავადებათა კონტროლის ეროვნული ცენტრის მონაცემები, რომლის თანახმადაც, პირბადის ტარების მაჩვენებელი ქვეყანაში 75%-დან 43%-მდე შემცირდა.  სახალხო დამცველი მოუწოდებს: სახელმწიფო და ადგილობრივი თვითმმართველობის ორგანოებს მთელი ქვეყნის მასშტაბით უზრუნველყონ ახალი კორონავირუსის გავრცელების პრევენციისათვის დადგენილი შეზღუდვების შესრულებაზე ეფექტური და რეალური კონტროლი; საქართველოს მოსახლეობას: განუხრელად დაიცვან სოციალური დისტანციის, მათ შორის, ღია სივრცეებში პირბადით სწორად სარგებლობის და ჰიგიენური წესები... მედია საშუალებებს: შესაძლებლობის ფარგლებში სისტემატიურად უზრუნველყონ ინფორმაციის გავრცელება და მოსახლეობის ინფორმირებულობა პრევენციული ღონისძიებების - პირბადის სწორად ტარების და სოციალური დისტანციის დაცვის მნიშვნელობის შესახებ. სრულად... წყარო: ombudsman.ge

თბილისი. ადამიანის უფლებების სწავლებისა და მონიტორინგის ცენტრის (EMC) მიერ გამოქვეყნებულ ბროშურაში გაეცნობით ძირითად ინფორმაციას ოპიოიდებით ჩანაცვლების თერაპიის შესახებ.  „შეგიძლიათ გაიგოთ რა არის ოპიოიდებით ჩანაცვლების თერაპია, როგორ მუშაობს, ის, რა ძირითადი მახასიათებლები და გვერდითი მოვლენები აქვს მას;  ასევე, დოკუმენტში გაეცნობით, როგორ შეიძლება პროგრამით სარგებლობა; რა კრიტერიუმების საფუძველზე ხდება პროგრამაში ჩართვა და მკურნალობის შეწყვეტა“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოში ახალი კორონავირუსით გამოწვეული პანდემიის ფონზე, სახალხო დამცველის სპეციალური პრევენციული ჯგუფის წევრებმა თბილისის ფსიქიკური ჯანმრთელობის ცენტრში არსებული ეპიდემიოლოგიური სიტუაცია და პაციენტთა უფლებების დაცვის კუთხით არსებული მდგომარეობა შეისწავლეს. „მონიტორინგის შედეგად დადგინდა, რომ თბილისის ფსიქიკური ჯანმრთელობის ცენტრში პაციენტები არ არიან დაცულნი ძალადობისგან, არაადამიანური ან დამამცირებელი მოპყრობისგან. პაციენტებს არ მიეწოდებათ ფსიქო-სოციალური რეაბილიტაციის სერვისები, ხოლო დაწესებულებაში არსებული ინფრასტრუქტურის მდგომარეობა ვერ უზრუნველყოფს პაციენტთა მკურნალობას მათი ღირსების დაცვის პირობებში“. ომბუდსმენი სახელმწიფოს დროული რეაგირებისკენ მოუწოდებს. სრულად... წყარო: ombudsman.ge

იმერეთი. განათლების განვითარების და დასაქმების ცენტრი და მეტყველების განვითარებისა და კორექციის ცენტრი „ლოგომედი“ ერთობლივი ინიციატივით ქალაქ ქუთაისში, ბავშვებსა და ზრდასრულებს სთავაზობს უფასო გამოკვლევებს მეტყველების დარღვევათა სრული დიაგნოსტირებისთვის. აქცია მეტყველების ნებისმიერი ტიპის დარღვევათა აღმოჩენას, დიაგნოსტიკას, მიზეზის დადგენას, პრობლემის დასაძლევად საჭირო ღონისძიებებისა და მოქმედების გეგმის დასახვას ითვალისწინებს მიზნად. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს დოკუმენტს: ოპიოიდებზე დამოკიდებული პირებისთვის ჩანაცვლებითი მკურნალობის პროგრამები პენიტენციურ სისტემაში - კანონმდებლობის ანალიზი.  წინამდებარე დოკუმენტი არის საკანონმდებლო ანალიზი, რომელიც მიმოიხილავს იმ პრობლემებს, რაც პენიტენციურ სისტემაში, ოპიოიდებზე დამოკიდებული პირებისთვის ჩანაცვლებითი მკურნალობის პროგრამებით სარგებლობის კუთხით არსებობს. სრულად... წყარო: emc.org.ge

თბილისი. კოალიცია დამოუკიდებელი ცხოვრებისთვის ინფორმაციით, 11 იანვრიდან, აჭარის, გურიისა და სამეგრელოს რეგიონებში მუშაობა განაახლა მობილური მხარდაჭერის ჯგუფებმა, რომლებიც შეზღუდული შესაძლებლობის მქონე პირებს ადაპტირებული ავტოსატრანსპორტო საშუალებით, უფასოდ ემსახურება. მობილური ჯგუფების შემადგენლობაში შედიან: მობილობის ასისტენტი, ექთანი, ფიზიკური და ოკუპაციური თერაპევტები. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) აგრძელებს შეზღუდული შესაძლებლობის მქონე ქალთა უფლებების დარღვევის აღმოფხვრის მიზნით ადვოკატირებას, რომელიც პირდაპირ დაკავშირებულია COVID-19-ის პანდემიასთან. ორგანიზაციამ მიმართა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მოთხოვნით, ცვლილება შეიტანოს საქართველოს მთავრობის დადგენილებაში პირბადის ტარების წესის დამტკიცების შესახებ და იგი შესაბამისობაში მოიყვანოს სმენის არმქონე და სმენადაქვეითებული პირების სპეციალურ საჭიროებებთან. კერძოდ, უზრუნველყოს სმენის არმქონე და სმენადაქვეითებულ პირებთან სამედიცინო მომსახურების გაწევისას, სამედიცინო პერსონალის მიერ გამჭვირვალე პირბადის გამოყენება. სრულად... წყარო: phr.ge

თბილისი. საქართველოს სტრატეგიული კვლევებისა და განვითარების ცენტრი და ფონდი „აურესი“ ავრცელებენ განცხადებას პირბადის ტარების წესში ცლილებების შეტანის აუცილებლობაზე. ორგანიზაციები აღწერენ პრობლემას, რომელიც პანდემიის პერიოდში სპეციალური საჭიროებების მქონე პირებს შეექმნათ (შშმ, სმენის შეზღუდვის მქონე ბავშვი/პირი, ხანდაზმული, აუტისტური სპექტრის დარღვევის მქონე პირი და სხვა). მათთვის კრიტიკულად მნიშვნელოვანია სახის გამომეტყველებისა და ბაგეების მოძრაობის დანახვა, გაუმჭვირვალე პირბადის ტარებამ კი ეს შეუძლებელი გახადა. სსო-ები ერთობლივ განცხადებაში ითხოვენ შემდეგი ცვლილებების განხორციელებას: •შევიდეს შესაბამისი ცვლილებები პირბადის ტარების წესში, რათა ყველა ადამიანის ჯანმრთელობა იყოს თანაბრად დაცული; •აღიჭურვონ მომსახურებები, განსაკუთრებით სოციალური მომსახურებები, გამჭვირვალეფარიანი პირბადეებით და მათი გამოყენებისთვის საჭირო ცოდნით და უნარებით, რათა შემცირდეს გაუმჭვირვალე პირბადით გამოწვეული კომუნიკაციის ბარიერების ნეგატიური შედეგები ან/და ბენეფიციარის ზიანი; •სოციალური მომსახურების სტანდარტებში, ინფექციის გავრცელების თავიდან აცილების მიზნით, გათვალისწინებული იქნეს გამჭვირვალეფარიანი პირბადის გამოყენების წესი. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა - საქართველოს ინფორმაციით, მიმდინარე წლის 20 იანვარს ჯანდაცვის სამინისტრომ გააუქმა კორონავირუსის პანდემიასთან ბრძოლის მიზნით შექმნილი მობილური აპლიკაცია Stop Covid. „აპლიკაციის შექმნა, რომელიც 9 თვით ადრე, 16 აპრილს ამოქმედდა, 400,000 ლარზე მეტი (120,000 ევრო) დაჯდა. სამინისტროს დღემდე არ წარმოუდგენია ახსნა-განმარტება იმის შესახებ, თუ რატომ დასრულდა ეს ძვირადღირებული პროექტი წარუმატებლად“. სრულად... წყარო: transparency.ge

თბილისი. ევროკავშირი და ჯანმრთელობის მსოფლიო ორგანიზაცია საქართველოს და დანარჩენ 5 აღმოსავლეთ პარტნიორობის ქვეყანას მხარს უჭერს კოვიდ-19-ის საწინააღმდეგო ვაქცინების მიღებაში და ვაქცინაციის პროცესის ხელშეწყობასა და მონიტორინგში. ინიციატივა დაეხმარება საქართველოს ეფექტურად მოახდინოს ქვეყანაში შემოსული ვაქცინების გამოყენება და ყველაზე მეტი საჭიროების მქონე ადამიანების მოცვა. გაიგეთ მეტი... წყარო: ევროკავშირის გვერდი სოციალურ ქსელში

თბილისი. საქართველოს სტრატეგიული კვლევებისა და განვითარების ცენტრის და ფონდი აურეს-ის ერთობლივი პროექტი „გამჭვირვალეფარიანი პირბადე ადამიანის უფლებებისთვის“ სმენის სირთულეების მქონე პირთა სოციალური ინტეგრაციის ხარისხის გაზრდის ხელშეწყობისკენაა მიმართული. „COVID-19-ის პანდემიის პერიოდში, ვირუსისგან დამცავი პირბადეების გამოყენებამ, მსოფლიოში სმენის სირთულეების მქონე მილიონობით ადამიანს კომუნიკაციის დაბრკოლებები შეუქმნა. პირბადე შეუძლებელს ხდის სახის გამომეტყველებისა და ბაგეების დანახვას, რომელიც სმენის სირთულეების მქონე ადამიანებისთვის მნიშვნელოვანი დასაყრდენია კომუნიკაციისას. საქართველოში კი 200 000-ზე მეტი სმენის სირთულეების მქონე ადამიანია“. სრულად... წყარო: ორგანიზაციის გვერდი სოციალურ ქსელში

თბილისი. 15 თებერვლიდან GABP - საქართველოს სხეულზე ორიენტირებული ფსიქოთერაპიის ასოციაცია გოგონებსა და ქალებს სთავაზობს სხეულზე ორიენტირებული პრაქტიკის დისტანციურ სერვისს. პროექტის „პანდემიით გამოწვეული კრიზისული სიტუაციების დაძლევაში ხელშეწყობა ქალებისთვის” მიზანია კრიზისულ პერიოდში იმ ქალი პაციენტების მხარდაჭერა, რომლებსაც: - კოვიდ 19-ს დიაგნოზი ჰქონიათ; - ლბტ თემს მიეკუთვნებიან; - ძალადობის რისკის ქვეშ იმყოფებიან. სრულად... წყარო: ასოციაციის გვერდი სოციალურ ქსელში

თბილისი. ორგანიზაციამ „პარტნიორობა ადამიანის უფლებებისთვის“ (PHR) განათლების სამინისტროს წინააღმდეგ თბილისის საქალაქო სასამართლოს მიმართა და მოითხოვა სამინისტროს მიერ ეფექტური გეგმის შემუშავება და აღსრულება, რათა შშმ და სსსმ ბავშვების სიცოცხლის, ჯანმრთელობის, უსაფრთხოებისა და განათლების უფლება დაცული იყოს 15 თებერვალს სკოლებში დაბრუნებისას. „შშმ და სსსმ მოსწავლეები დგანან გაზრდილი საფრთხის წინაშე დაირღვეს მათი სიცოცხლის, ჯანმრთელობის, განათლების და უსაფრთხოების უფლება 2021 წლის 15 თებერვალს სკოლებში არაორგანიზებული და საფრთხის შემცველი დაბრუნების გამო. მიგვაჩნია, რომ განათლების სამინისტროს უმოქმედობა შეუძლებელია შეივსოს მხოლოდ ჯანდაცვის სამინისტროს რეკომენდაციებით. ამ ეტაპზე სკოლების არსებული ვითარება კი არ იძლევა მათი მხრიდან პანდემიის ეფექტურად მართვის შესაძლებლობას განსხვავებული ფინანსური და ადამიანური რესურსების გამო“. სრულად... წყარო: phr.ge

იმერეთი. USAID Georgia-ს ინფორმაციით, ქორეთის სკოლის მე-10 კლასის მოსწავლეები ნინო გუდაძე, მარიამ ეზიაშვილი და ნატო ფარქოსაძე სამოქალაქო განათლების პროგრამის „მომავლის თაობა“ წევრები არიან და ცდილობენ, სოფელში პანდემიით შექმნილი რთული ვითარება სხვებზე ზრუნვით შეამსუბუქონ. მოსწავლეებმა გამოითხოვეს სოციალურად დაუცველი ოჯახების შესახებ ინფორმაცია და მათთვის საჭირო პირბადეების მარაგის გამოყოფაზე შეთანხმდნენ. 11 სოციალურად დაუცველ ოჯახს მათ ჯამში 250 პირბადე გადასცეს. გოგონები ახალგაზრდებისთვის ვირუსისგან თავდაცვის ხერხებზე საინფორმაციო შეხვედრებსაც მართავენ. სრულად... წყარო: ორგანიზაციის გვერდი სოციალურ ქსელში

შიდა ქართლი. 2 თებერვალს, გორში საქართველოს კარიტასის ჯანმრთელობის დაცვის პროგრამის მენეჯმენტის და გორის შინმოვლის პროექტის გუნდის სამუშაო შეხვედრა გაიმართა. შეხვედრის მონაწილეებმა ახალი შინმოვლის პროექტის ამოცანები და პროექტის განხორციელებასთან დაკავშირებული საკითხები განიხილეს. სრულად... წყარო: ორგანიზაციის გვერდი სოციალურ ქსელში

თბილისი. „მითების დეტექტორი“ აქვეყნებს მარიამ დანგაძის ბლოგპოსტს: რა არის კორონავირუსი და შესაძლებელია თუ არა ანტიბიოტიკებით მისგან განკურნება. ბლოპოსტი ფბ მომხმარებლის Gocha Bakradze-ს მიერ გამოქვეყნებულ დეზინფორმაციას პასუხობს. მომხმარებლის მიერ გავრცელებული მცდარი ინფორმაციის თანახმად, კორონა ვირუსი არ არის ინფექცია, მისი გამომწვევი მიზეზი კი ბაქტერიაა და კოვიდისგან განკურნება ანთებისსაწინააღმდეგო, ე.წ. სისხლის გამათხელებლების გამოყენებით არის შესაძლებელი. ასევე, ფბ მომხმარებელი აღნიშნავს, რომ თითქოს კოვიდ 19-ით გარდაცვლილთა სხეულის აუტოპსია აკრძალულია. „გოჩა ბაქრაძის პოსტი რამდენიმე დეზინფორმაციას შეიცავს, რეალურად 1) Covid-19-ის ინფექციას იწვევს არა ბაქტერია, არამედ SARS-CoV-2-ის ვირუსი; 2) Covid-19-ით გარდაცვლილთა აუტოპსია აკრძალული არ არის; 3) ვინაიდან Covid-19 ვირუსის მიერაა გამოწვეული, მის წინააღმდეგ ანტიბიოტიკის გამოყენება არაეფექტიანი იქნება. რაც შეეხება ანტიანთებით და სისხლის გამათხელებელ საშუალებებს, ისინი კორონავირუსის მხოლოდ ზოგიერთი სიმპტომის პრევენციისა და მკურნალობის პროცესში გამოიყენება“, ნათქვამია მასალაში. სრულად... წყარო: mythdetector.ge

შიდა ქართლი. გაეროს განვითარების პროგრამის ხელშეწყობით, ნიქოზის ამბულატორიამ ახალი სამედიცინო დანადგარები შეიძინა. ასევე, განახლდა და აღიჭურვა ბიოქიმიური ლაბორატორია და რენტგენის კაბინეტი, ხოლო პორტატიული სამედიცინო აპარატურის მეშვეობით, ხანდაზმული პაციენტები შეძლებენ კვლევის ჩატარებასა და სხვა მომსახურების მიღებას როგორც კლინიკაში, ისე სახლის პირობებში. მეტი ინფორმაცია იხილეთ პრეს-რელიზში... წყარო: ორგანიზაციის გვერდი სოციალურ ქსელში

თბილისი. ეკონომიკური კვლევის ცენტრი აქვეყნებს ლაშა დოლიძის პუბლიკაციას: „COVID-19 საერთაშორისო ეკონომიკური ტენდენციები და მოსაზრებები საქართველოს ეკონომიკის პოსტკრიზისული პერსპექტივების შესახებ“.  „პუბლიკაციაში განხილულია COVID-19-ის კრიზისით გამოწვეული ძირითადი საერთაშორისო ეკონომიკური ტენდენციები, რომლებიც მნიშვნელოვანია საქართველოსთვის და გავლენას ახდენს ან მომავალში მოახდენს მის ეკონომიკურ განვითარებაზე როგორც 2021-ში, ისე უახლოეს წლებში“. სრულად... წყარო: ორგანიზაციის გვერდი სოციალურ ქსელში

თბილისი. საერთაშორისო ასოციაცია „კივიტას გეორგიკამ“ ახალი პროექტი - „სკოლამდელი განათლების ყოვლისმომცველი პრინციპები და რეკომენდაციები“ დაიწყო. „პროექტის მიზანია სკოლამდელი დაწესებულებების გამოწვევების კვლევა COVID 19-ის კრიზისული სიტუაციის მართვის ფარგლებში, შესაბამისი რეკომენდაციების შემუშავება და ადგილობრივ და ცენტრალურ დონეზე ადვოკატირება“. პროექტი ხორციელდება აღმოსავლეთ-დასავლეთის მართვის ინსტიტუტის (EWMI) ACCESS-ის პროექტის მხარდაჭერით, ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. სრულად... წყარო: ორგანიზაციის გვერდი სოციალურ ქსელში