თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევის ანალიზს: ნარკოდანაშაულთან დაკავშირებული სტატისტიკის ანალიზი: პრაქტიკა და გაცხადებული მიზნები ერთმანეთს არ ემთხვევა. „ინფორმაციის თავისუფლების განვითარების ინსტიტუტმა (IDFI) 2015 წელს გამოაქვეყნა ნარკოტიკულ დანაშაულებთან დაკავშირებული სტატისტიკის ანალიზი და ხაზი გაუსვა ნარკომომხმარებელთა რეაბილიტაციის პროგრამების საჭიროებას. ამავე სტატიაში IDFI-მ გამოყო ის ძირეული პრობლემა, რაც ნარკოდანაშაულისთვის სამართლიანი და პროპორციული სასჯელის დაწესებასთან დაკავშირებით არსებობს. ეს პრობლემები 2018 წლისთვისაც გადაუჭრელი რჩება. სწორედ ამიტომ, საინტერესოა, განვიხილოთ 2018 წლამდე არსებული სტატისტიკური მონაცემები, ნარკოტიკული საშუალებების ფლობის, გასაღებისა და მოხმარებისთვის სისხლის ან ადმინისტრაციულ სამართლებრივ პასუხიმგებლობებთან დაკავშირებით", ნათქვამია ორგანიზაციის ვებგვერდზე. სრულად... წყარო: idfi.ge

თბილისი. სოციალურ კაფე „ახალ მზიურში" გაიმართა MH2R-პლატფორმის პირველი სამუშაო შეხვედრა ფსიქიკური ჯანმრთელობისა და ადამიანის უფლებების საკითხებზე მომუშავე ორგანიზაციების მონაწილეობით. „შეხვედრაზე განიხილეს პლატფორმის მისია და სტრატეგია. შეიქმნა სამუშაო ჯგუფები შემდეგი მიმართულებით: ფსიქიკური ჯანმრთელობის სერვისების მომხმარებელთა და მათი ოჯახის წევრების გაძლიერება, გაეროს შშმ პირთა უფლებების კონვენციის განხორციელების ხელშეწყობა, ცნობიერების ამაღლება და ანტისტიგმა კამპანიების წარმოება, ფსიქიკური ჯანმრთელობის სერვისების განვითარება, მათ შორის ბავშვთა და მოზარდთა, კანონმდებლობის და პოლიტიკის ანალიზი და მტკიცებულებაზე დაფუძნებული რეკომენდაციების შემუშავება", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ფონდ „ღია საზოგადოება - საქართველოს", ფერისცვალების დედათა მონასტერთან არსებული სასნეული სახლისა და ბავშვთა ჰოსპის „ციცინათელების ქვეყნის" თანამშრომლებისთვის „პროფესიული გადაწვის საწინააღმდეგო" ტრენინგი ჩატარდა. ჰოსპისში, პალიატიური მზრუნველობის საჭიროების მქონე პაციენტებთან მომუშავე პერსონალის სტრესის დაძლევის ტრენინგებში მონაწილეობა ფართოდ გავრცელებული პრაქტიკაა მსოფლიოში. სამუშაო სპეციფიკიდან გამომდინარე, ჰოსპისების თანამშრომლებს მძიმე ემოციური დატვირთვა აქვთ. გარდა ამისა, უწევთ მძიმე ფიზიკური სამუშაოს შესრულება, რაც შემდგომში ჯანმრთელობის მდგომარეობასა და სამუშაოს შესრულების ხარისხზე უარყოფით გავლენას ახდენს. ტრენინგის მიზანი სწორედ ჰოსპისების პერსონალის პროფესიული გადაწვის თავიდან აცილება და სტრესთან გამკლავება იყო. სრულად  წყარო: www.osgf.ge

თბილისი. საქართველოს სახალხო დამცველმა, ზოგადი საგანმანათლებლო დაწესებულებების მიერ რეფერირების პროცედურის დარღვევის ფაქტებთან დაკავშირებით, საქართველოს განათლებისა და მეცნიერების სამინისტროს რეკომენდაციით მიმართა. „საქართველოს სახალხო დამცველის აპარატის გენდერული თანასწორობის დეპარტამენტმა არაერთი ადრეულ ასაკში ქორწინების/ნიშნობის საქმე შეისწავლა, როდესაც ზოგადი საგანმანათლებლო დაწესებულებები ინფორმირებულნი იყვნენ ქორწინების/ნიშნობის ფაქტის შესახებ, თუმცა პასუხისმგებელი სახელმწიფო უწყებებისთვის არ მიუმართავთ. მიუხედავად იმისა, რომ ადრეულ ასაკში ქორწინება არღვევს ბავშვის ჯანმრთელობის, განათლების, თანასწორობის, ძალადობისა და ექსპლუატაციისგან თავისუფალ გარემოში ცხოვრების უფლებას, ქორწინების ნებაყოფლობითობის, ტრადიციული ფაქტორისა თუ წყვილის თანაცხოვრების მიზეზით, არასრულწლოვანის ინტერესების დასაცავად ხშირ შემთხვევებში არანაირი ღონისძიებები არ ტარდება", - აღნიშნულია რეკომენდაციაში.   სრულად წყარო: ორგანიზაციის ვებგვერდი

თბილისი. საქართველოს სახალხო დამცველმა დღეს შეზღუდული შესაძლებლობის მქონე პირთა დასაქმების ხელშემწყობი სახელმწიფო პროგრამების მონიტორინგის ანგარიში წარმოადგინა. სახალხო დამცველის სპეციალურ ანგარიშში შეფასებული და გაანალიზებულია მოქმედი ნორმატიული ბაზა, მათ შორის მთავრობის დადგენილებით დამტკიცებული სამი სახელმწიფო პროგრამა, ასევე საქართველოს შრომის, ჯანმრთელობისა და სოციალური დაცვის სამინისტროდან და სსიპ სოციალური მომსახურების სააგენტოდან მიღებული ინფორმაცია. დოკუმენტში საქართველოს სხვადასხვა ქალაქებში შშმ პირებთან გამართული შეხვედრების შედეგებიც არის ასახული. სახალხო დამცველის შეზღუდული შესაძლებლობის მქონე პირთა უფლებების დაცვის დეპარტამენტმა მონიტორინგის შედეგად დაადასტურა, რომ მიუხედავად სახელმწიფოს გაცხადებული ნებისა – უზრუნველყოს შეზღუდული შესაძლებლობის მქონე პირთა დასაქმება და რიგი პროგრამების არსებობისა, სათანადო სამართლებრივი გარანტიების, პრაქტიკული ხელშეწყობისა და აღსრულების ეფექტური მექანიზმების ნაკლებობის გამო, შეზღუდული შესაძლებლობის მქონე პირთა შრომის უფლების რეალიზება სათანადოდ არ ხდება. სრულად  წყარო: ორგანიზაციის ვებგვერდი

თბილისი. ფსიქიატრიულ დაწესებულებაში მოთავსებული პირებისთვის სამართლებრივი დახმარების აღმოჩენის მიზნით, ორგანიზაციის წარმომადგენლები ხშირად მართავენ საინფორმაციო შეხვედრებს სხვადასხვა ფსიქიატრიულ დაწესებულებაში. „სწორედ ამ მიზნით, 2018 წლის 27-28 მარტს ორგანიზაციის იურისტები ხონში (ქუტირი) მდებარე ფსიქიკური ჯანმრთელობის ცენტრში იმყოფებოდნენ, რა დროსაც მათ არ მიეცათ ფსიქიატრიულ დაწესებულებაში მოთავსებულ პირებთან პირდაპირი კომუნიკაციის შესაძლებლობა, რაც თავის მხრივ, გვაფიქრებინებს, რომ ამ ადამიანებს, დაწესებულების ადმინისტრაციის მხრიდან, ირიბად შეეზღუდათ სამართლებრივი დახმარების მიღების უფლება. მიუხედავად დაწესებულების ადმინისტრაციის პოზიციისა, ფსიქიატრიულ დაწესებულებაში მოთავსებული პირებისთვის ორგანიზაციის წარმომადგენლებს გაეწიათ სამართლებრივი დახმარება, მათ იურისტებს არ მისცეს შესაძლებლობა თავად შესულიყვნენ განყოფილებაში, შეხვედროდნენ იქ მოთავსებულ პირებს და სურვილის შემთხვევაში, გაეცათ სამართლებრივი კონსულტაციები. ორგანიზაციამ უკვე მიმართა ჯანდაცვის სამინისტროს გაითვალისწინოს აღნიშნული გარემოებები და მიიღოს ყველა საჭირო ზომა იმისათვის, რომ როგორც ქუტირის ფსიქიატრიულ დაწესებულებაში, ასევე ყველა სხვა ფსიქიატრიულ დაწესებულებაში მოთავსებულ პირებს არ შეეზღუდოთ უფლებადამცველებთან შეხვედრისა და სამართლებრივი დახმარების მიღების უფლება", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. ბავშვთა პირველი ჰოსპისი საქართველოში, 2017 წელს გაიხსნა და ის სამი მიმართულებით ფუნქციონირებს: სტაციონარი, დღის ცენტრი და შინ ზრუნვა. „ბავშვთა პალიატიური მზრუნველობა აერთიანებს კლინიკურ, ფსიქოლოგიურ, ეთიკურ და სულიერ ასპექტებს იმ ბავშვებისთვის, რომლებსაც ცოტა ხნის სიცოცხლე აქვთ დარჩენილი. მოზრდილებისგან განსხვავებით, პალიატიური მზრუნველობის საჭიროების მქონე ბავშვებს სხვა ტიპის მიდგომა სჭირდებათ. განვითარებული ქვეყნების ჰოსპისების მაგალითი, გვაჩვენებს, რომ ბავშვის ტკივილის შემსუბუქებაში და მშვიდად ყოფნაში, დიდი როლი ეკისრება მუსიკის თერაპიას. პროექტის მიზანია საზღვარგარეთ კადრის მომზადება მუსიკის თერაპიაში და შემდგომში მისი ანაზღაურების გადახდა ჰოსპისში (1 წლის მანძილზე)", ნათქვამია ჰოსპისის პროექტის აღწერაში. სრულად... წყარო: idea.tbilisi.gov.ge

თბილისი. ინფორმაციის თავისუფლების განვითარების ინსტიტუტმა (IDFI) ჯანდაცვის სამინისტროს 2014-2017 წლებში ოკუპირებული ტერიტორიებიდან საქართველოს სამედიცინო დაწესებულებებში სტაციონალური მომსახურებით მოსარგებლეთა სტატისტიკური მონაცემების მოთხოვნით მიმართა. სამინისტრომ კვლევის ფარგლებში მოთხოვნილი ინფორმაცია IDFI-ის სრულყოფილად მიაწოდა. „2014-2017 წლებში, აფხაზი და ოსი პაციენტების სამედიცინო ხარჯების სახელმწიფო ბიუჯეტიდან დაფარვის პროგრამის ფარგლებში სულ დაიხარჯა 16,935,074.81 ლარი, ხოლო სამედიცინო მომსახურება სულ 6,188-მა პაციენტმა მიიღო", ნათქვამია ორგანიზაციის კვლევაში. სრულად... წყარო: idfi.ge

თბილისი. 2 აპრილს აუტიზმის შესახებ ცნობიერების ამაღლების დღე აღინიშნება. მსოფლიო მხარს უჭერს აუტიზმის მქონე ადამიანების უფლებების დაცვას და ხმას იმაღლებს დისკრიმინაციის წინააღმდეგ. „საქართველოში აუტისტური სპექტრის მქონე პირების უფლებების დაცვის კუთხით ჯერ კიდევ რჩება პრობლემები. კვლავ გამოწვევას წარმოადგენს აუტიზმის მქონე ბავშვების ჯანმრთელობის დაცვის, მათთვის აუცილებელი პროგრამებისა და მომსახურებების ნაკლებობა, აბილიტაცია/რეაბილიტაციის სერვისების შეზღუდული რაოდენობა, ტერიტორიული ხელმისაწვდომობა. გაწეული მომსახურების ხარისხი, პერსონალის სიმწირე და კვალიფიკაცია. სახალხო დამცველი კიდევ ერთხელ მოუწოდებს სახელმწიფოს ხელი შეუწყოს აუტიზმის მქონე ყველა პირს ადამიანის უფლებებისა და ფუნდამენტური თავისუფლებების განხორციელებაში. უზრუნველყოს მათი სათანადო მხარდაჭერა, რათა სხვა პირთა თანაბრად შეძლონ სრული მონაწილეობა საზოგადოებაში", ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. „თეთრი ხმაურის მოძრაობა" პრემიერ-მინისტრს მიმართავს. „2017 წლის 10 ივნისს, თქვენს მიერ გაკეთებულ განცხადებას რეფორმის მხარდამჭერი საზოგადოება, პატიმრები, მათი ოჯახები და სამოქალაქო სექტორი ოპტიმიზმით შეხვდა. პარლამენტმა საშემოდგომო სესია უშედეგოდ დაასრულა და მიმდინარე საგაზაფხულო სესიაზეც უცნობია მოხერხდება თუ არა რეფორმის გატარება. ვითხოვთ პასუხს, სად არის თქვენი დაპირებები რომლებსაც წინასაარჩევნოდ და აქციების პარალელურად გასცემდით? ყველა პასუხი, რომელიც ამბობს, რომ საკითხი კომპლექსიურია, საჭიროებს გააზრებას, დროს და რესურსებს, პოზიციების შეჯერებას, იქნება არალეგიტიმური და გამოიწვევს საზოგადოების შეჯერებას, რომ კომპლექსური იერიში მიიტანოს თქვენს მმართველობაზე", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. 23 მარტს, „მოძრაობამ ხელმისაწვდომი გარემო ყველასათვის" კვლევა გამოაქვეყნა, რომელიც შეზღუდული შესაძლებლობების მქონე პირებისათვის ხელმისაწვდომ სამედიცინო და სარეაბილიტაციო მომსახურებას აღწერს. „კვლევის ფარგლებში განხორციელდა ქვეყნის კანონმდებლობის ანალიზი და მისი შესაბამისობის დადგენა გაეროს „შეზღუდული შესაძლებლობის მქონე პირთა უფლებების" კონვენციის დებულებებთან. შედგა შეხვედრები ჯანდაცვის სფეროს ექსპერტებთან, დაინტერესებულ სამთავრობო და არასამთავრობო სექტორის წარმომადგენლებთან, არსებული გამოწვევების შესახებ დეტალური ინფორმაციის მოსაპოვებლად. ჩატარდა ფოკუს ჯგუფი შშმ პირებთან, რომლებიც ხშირად სარგებლობენ სამედიცინო და სარეაბილიტაციო მომსახურებებით, შემუშავებულ იქნა 3 სახის კითხვარი და განხორციელდა სამედიცინო დაწესებულების მონიტორინგი. შშმ პირთა მიმართ მოქმედი პოლიტიკის და პროგრამების ანალიზის, ასევე სამედიცინო დაწესებულებებში განხორციელებული მონიტორინგის შედეგად გამოკვეთილი ბარიერების და გამოწვევების აღმოფხვრის მიზნით პროექტის გუნდის მიერ შემუშავებული იქნა შესაბამისი რეკომენდაციები", ნათქვამია ორგანიზაციის ვებგვერდზე. სრულად... წყარო: www.osgf.ge

თბილისი. საქართველოს სახალხო დამცველი „შრომის უსაფრთხოების შესახებ" საქართველოს კანონსა და თანდართულ ცვლილებებს წინგადადგმულ ნაბიჯად აფასებს. „ეს კანონი შრომის უსაფრთხოების მხრივ არსებული ვალდებულებების აღსრულების მექანიზმს ქმნის. კერძოდ, ზედამხედველ ორგანოს (შრომის, ჯანმრთელობისა და სოციალური დაცვის სამინისტროს შესაბამის სამსახურს) ენიჭება უფლებამოსილება მომეტებული საფრთხის შემცველ, მძიმე, მავნე და საშიშპირობებიან სამუშაოებთან დაკავშირებით, კანონით გათვალისწინებულ შემთხვევებში, შეამოწმოს შრომის უსაფრთხოების ნორმების დაცვის მდგომარეობა და დარღვევების აღმოჩენის შემთხვევაში, გამოიყენოს სანქციები", - აცხადებს სახალხო დამცველი. სრულად  წყარო: ორგანიზაციის ვებგვერდი

თბილისი. ფონდი „ღია საზოგადოება - საქართველო" აქვეყნებს ინფოგრაფიკებს პოლიტიკის დოკუმენტიდან - „შეზღუდული შესაძლებლობების მქონე ბავშვებისთვის სერვისებზე ხელმისაწვდომობის შეზღუდვა, ანუ სახელმწიფოს უარი სოციალურ ინკლუზიაზე". დოკუმენტი მოამზადა ორგანიზაციამ „პარტნიორობა ადამიანის უფლებებისთვის", ფონდ „ღია საზოგადოება - საქართველოს" ხელშეწყობით, ფონდის შიდა პროექტის - „ევროკავშირ-საქართველოს შორის ასოცირების შესახებ შეთანხმების განხორციელების მონიტორინგი საზოგადოებრვი ორგანიზაციების კოალიციის მიერ" - ფარგლებში. სრულად  წყარო: www.osgf.ge

თბილისი. 21 მარტს მსოფლიო დაუნის სინდრომის საერთაშორისო დღეს აღნიშნავს.  „მისი აღნიშვნა დაუნის სინდრომის მქონე პირების შესახებ საზოგადოების ცნობიერების ამაღლებას ემსახურება. 2018 წელს ამ დღის აღნიშვნის თემა – „რას ვმატებ საზოგადოებას" – ხაზს უსვამს დაუნის სინდრომის მქონე პირთა თანაბარ წვლილს საზოგადოებრივ, საჯარო, პოლიტიკურ, კულტურულ და ცხოვრების სხვა სფეროებში. სახალხო დამცველი მოუწოდებს სახელმწიფოს მეტი ძალისხმევა მიმართოს დაუნის სინდრომის მქონე ადამიანების უფლებების დაცვისკენ, რათა სხვების თანასწორად იქნას უზრუნველყოფილი მათი მონაწილეობა საზოგადოებრივ ცხოვრებაში", ნათქვამია ომბუდსმენის განცხადებაში. სრულად... წყარო: ombudsman.ge

თბილისი. 2018 წლის 20 მარტს საქართველოს სახალხო დამცველის აპარატს ხანდაზმულთა უფლებების დაცვის საკითხებზე გაეროს დამოუკიდებელი ექსპერტი, როსა კორნფელდ-მატტე ეწვია. ექსპერტთან გამართულ შეხვედრაზე საქართველოში ხანდაზმულ პირთა უფლებრივი მდგომარეობა და დაბერების თემასთან დაკავშირებული გამოწვევები განიხილეს. საუბარი შეეხო სახალხო დამცველის მნიშვნელოვან როლსა და განხორციელებულ საქმიანობას ხანდაზმულთა უფლებების დაცვის მიმართულებით. სრულად  წყარო: ორგანიზაციის ვებგვერდი

თბილისი. ფსიქიკური ჯანდაცვის პროფესიული თემი პრემიერ მინისტრსა და ჯანდაცვის მინისტრს მიმართავს. „სურამის ფსიქიატრიულ სტაციონარში არსებული მდგომარეობის ირგვლივ ბოლო დროს განვითარებული მოვლენების გამო ვთვლით, რომ პროფესიულ თემს აქვს მორალური ვალდებულება აქტიურად ჩაერთოს ამ პრობლემის მოგვარების პროცესში", ნათქვამია მიმართვაში. სრულად... წყარო: ალიანსი უკეთესი ფსიქიკური ჯანმრთელობისთვის ვებგვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრის (EMC) მიერ გავრცელებული ინფორმაციის მიხედვით, 2017 წლის განმავლობაში საწარმოო შემთხვევების შედეგად დაშავებულთა რაოდენობა, წინა წლებთან შედარებით, გაიზარდა. ამ ინფორმაციას ცენტრი, შინაგან საქმეთა სამინისტროს მასალებზე დაყრდნობით, გრაფიკული სახით ავრცელებს. სრულად  წყარო: ორგანიზაციის ვებგვერდი

თბილისი. პაციენტმა, რომლის ინტერესებსაც სასამართლოში საია იცავს, სამედიცინო დაწესებულებას სასამართლო დავა მოუგო. დღეს მიღებული გადაწყვეტილებით, თბილისის საქალაქო სასამართლომ სამედიცინო დაწესებულებას პაციენტის სასარგებლოდ 5000 ლარის ოდენობით მორალური ზიანის ანაზღაურება დააკისრა. მოსარჩელე დაობდა, რომ სამედიცინო დაწესებულებამ, კატარაქტის ოპერაციის მსვლელობისას, მასთან და მისი ოჯახის წევრებთან შეუთანხმებლად შეცვალა დაგეგმილი ოპერაციის მეთოდი და გამოიყენა ისეთი ტიპის ლინზა, რომელიც მასთან წინასწარ არ ყოფილა შეთანხმებული. სრულად  წყარო: ორგანიზაციის ვებგვერდი

იმერეთი. საქართველოს სახალხო დამცველმა ქუთაისის ხანდაზმულთა პანსიონატი დაათვალერა, ბენეფიციარებს, დაწესებულების ადმინისტრაციას ესაუბრა. სახალხო დამცველის შეფასებით, პანსიონატის მდგომარეობა დამაკმაყოფილებელია, კომუნიკაციები გამართულად მუშაობს. თუმცა, მოსაწესრიგებელია შიდა ეზო და დასასვენებელი ადგილების ინფრასტრუქტურა. სახალხო დამცველთან საუბარში ბენეფიციარები აღნიშნავდნენ, რომ პანსიონატის სიახლოვეს არ მოძრაობს მუნიციპალური ტრანსპორტი, რაც ხანდაზმულებს გადაადგილების პრობლემას უქმნის, ხოლო ახლობლებს მათ მონახულებას ურთულებს. სრულად  წყარო: ორგანიზაციის ვებგვერდი

თბილისი. პარტნიორობა ადამიანის უფლებებისთვის (PHR) აქვეყნებს ბლოგპოსტს: „სასამართლოს დროებითი განჩინებით ჯანდაცვის სამინისტროს შშმ ბავშვისთვის სერვისით უზრუნველყოფა დაევალა". „თბილისის საქალაქო სასამართლომ მიიღო მნიშვნელოვანი გადაწყვეტილება, დააკმაყოფილა PHR-ის მოსარჩელე არასრულწლოვნის მოთხოვნა და საქართველოს შრომის, ჯანმრთელებისა და სოციალური დაცვის სამინისტროს დაავალა, სასამართლოს საბოლოო გადაწყვეტილების მიღებამდე, ს.ქ.-ასთვის პირადი ასისტენტის მომსახურების უზრუნველყოფა დღის ცენტრში", ნათქვამია პრგანიზაციის ვებგვერდზე. სრულად... წყარო: phrgeorgia.wordpress.com

შიდა ქართლი. საქართველოს სახალხო დამცველმა სურამის ფსიქიატრიული საავადმყოფო მოინახულა. როგორც სახალხო დამცველის აპარატის მიერ გავრცელებულ ინფორმაციაშია აღნიშნული, სახალხო დამცველი უკიდურესად არის შეშფოთებული დაწესებულებაში არსებული ინფრასტრუქტურული და თერაპიული გარემოთი, რაც პაციენტები ფაქტიურად გაუსაძლის, ადამიანის ღირსების შემლახავ პირობებში ამყოფებს. „სახალხო დამცველის შეფასებით სურამის ფსიქიატრიული საავადმყოფოს მთლიანი შენობა, როგორც საცხოვრებელი, ასევე, საერთო სარგებლობის ტერიტორიები ძველი და გაუმართავია, ძველია ინვენტარიც, უკიდურესად მძიმეა სანიტარულ-ჰიგიენური მდგომარეობა. ხაზგასმით უნდა აღინიშნოს, რომ ფაქტიურად არ არსებობს თერაპიული გარემო", - ვკითხულობთ ინფორმაციაში, - „საავადმყოფოში არსებულ გაუსაძლის პირობებზე სახალხო დამცველი არაერთხელ მიუთითებდა თავის წლიურ ანგარიშებსა და სპეციალურ ანგარიშებში. ასევე, რეკომენდაციებით მიმართავდა შრომის, ჯანმრთელობისა და სოციალური დაცვის სამინისტროს და პაციენტების ადამიანის ღირსებასთან თავსებად პირობებსა და თერაპიულ გარემოში მოთავსების დაუყოვნებლივ უზრუნველყოფას ითხოვდა. სამწუხაროდ, დღეს სახალხო დამცველს მდგომარეობა კვლავ უცვლელი დახვდა". სრულად  წყარო: ორგანიზაციის ვებგვერდი

თბილისი. პროექტის - „თემში მცხოვრები შეზღუდული შესაძლებლობის მქონე ბავშვების მშობლების მხარდაჭერი ცენტრი"-ს მონაწილე მშობლებისთვის, MAC -ის ოკუპაციურმა თერაპევტებმა 3-დღიანი ტრენინგ-კურსი ჩაატარეს. ტრენინგის დროს განხილული იქნ შემდეგი თემატიკა: ოკუპაციური თერაპიის მნიშვნელობა, ჯდომა, სწორი პოზა, კვება, ნაწოლების პრევენცია და მართვა, დამოუკიდებელი ცხოვრებისთვის საჭირო უნარები, ადაპტური და დამხმარე საშუალებები. სრულად  წყარო: ორგანიზაციის გვერდი სოციალურ ქსელში