აჭარა. 3 აგვისტოს, ასოციაცია „ჰერა XXI-ის" ახალგაზრდული ჯგუფის წევრებმა ხელვაჩაურის ახალგაზრდობის ცენტრში ჩაატარეს საინფორმაციო-საგანმანათლებლო სესია. შეხვედრაზე ცენტრის წევრებს გავაცანით ორგანიზაციის საქმიანობა და მოხალისეობის შესაძლებლობები. ასევე, აუდიტორიის ინტერესების შესაბამისად, ვისაუბრეთ მოზარდობასა და გარდატეხის ასაკში მიმდინარე ცვლილებებზე, სქესობრივი განათლების მნიშვნელობასა და ხელმისაწვდომობაზე, ჯანსაღი ცხოვრების წესსა და ზოგადად, რეპროდუქციულ ჯანმრთელობაზე. გოგონების განსაკუთრებული ინტერესი გამოიწვია „ჰერა XXI"-ის მიერ შემუშავებულმა ელექტრონულმა სასწავლო-კურსმა თანასწორ განმანათლებლებისთვის (რომელიც განთავსებულია სპეციალურად შექმნილ პლატფორმაზე Ehera.ge) და ჩვენმა ერთ-ერთმა სერვისმა - რეპროდუქტოლოგთან ონლაინ-კონსულტაციის შესაძლებლობამ. სრულად... წყარო: ორგანიზაციის ვებგვერდი სოციალურ ქსელში

იმერეთი. ქუთაისის ახალგაზრდული ცენტრის წევრებისთვის ჩატარდა სემინარი თემაზე „ქალთა უფლებები და რეპროდუქციული ჯანმრთელობა". მისი მიზანი იყო ახალგაზრდების ცნობიერების ამაღლება ქალთა უფლებების, რეპროდუქციული ჯანმრთელობის, ცხოვრების ჯანსაღი წესის თემაზე, ადრეული ქორწინებასა და მასთან დაკავშირებულ რისკებზე. სემინარს ასოციაცია HERA –XXI თანასწორგანმანათლებელი, მარიამ ჩაკვეტაძე უძღვებოდა. სრულად... წყარო: ორგანიზაციის ვებგვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) განცხადების საფუძველზე სახალხო დამცველმა ჯანდაცვის სამინისტროს მიმართა, რათა საქართველოს მთავრობის N145 დადგენილებაში განეხორციელებინა ტერმინთა მოდიფიცირება. „25 ივლისს, სახალხო დამცველმა ორგანიზაციას წერილობით აცნობა, რომ მოპასუხე მხარემ აღნიშნულ დადგენილებაში ცვლილებები შეიტანა და ტერმინები „ჯანმრთელი ბავშვი" და „შეზღუდული შესაძლებლობის მქონე ბავშვი" ჩანაცვლდა ტერმინებით „ბავშვი" და „განსხვავებული საჭიროების მქონე ბავშვი", რითაც აღმოიფხვრა სავარაუდო დისკრიმინაციის შედეგები”, ნათქვამია ვებგვერდზე. სრულად... წყარო: phrgeorgia.wordpress.com

ქვემო ქართლი. ორგანიზაცის „პარტნიორობა ადამიანის უფლებებისთვის" (PHR) წარმომადგენლები ფსიქიატრიულ დაწესებულებებში მცხოვრები პირებისთვის სამართლებრივი დახმარების აღმოჩენის სამუშაოებს განაგრძობენ. ამ კუთხით დისკრიმინაციასთან დაკავშირებით ცნობიერების ამაღლებისა და ანტიდისკრიმინაციული მექანიზმების შესახებ ინფორმაციის მიწოდების მიზნით, ისინი რუსთავის ფსიქიკური ჯანმრთელობის ცენტრშიც იმყოფებოდნენ. PHR-ის იურისტები დაწესებულების პერსონალსა და იქ მცხოვრებ პირებს შეხვდნენ. საუბრისას, განსაკუთრებული ყურადღება გამახვილდა ქმედუნარიანობის რეფორმასა და დაწესებულებაში ამ მიმართულებით არსებულ გამოწვევებზე. სრულად  წყარო: ორგანიზაციის ვებგვერდი

იმერეთი. ქუთაისის ახალგაზრდული ცენტრის წევრებისთვის ჩატარდა სემინარი თემაზე „C ჰეპატიტი და მისი პრევენცია". „მისი მიზანი იყო ახალგაზრდების ინფორმირებულობის ამაღლება C ჰეპატიტთან დაკავშირებით და გამყარებული სტერეოტიპების რღვევის ხელშეწყობა, რომელიც აფერხებს C ჰეპატიტთან დაკავშირებული საფრთხეებისა და რისკ-ფაქტორების ადეკვატურ აღქმას და პრევენციული ღონისძიებების დროულად გატარებას". სრულად... წყარო: ორგანიზაციის ვებგვერდი სოციალურ ქსელში

თბილისი. ტყიბულში, მინდელის სახელობის შახტაში მომხდარ ტრაგედიასთან დაკავშირებით, საზოგადოებრივი ორგანიზაციების ნაწილი განცხადებას ავრცელებს. „მეშახტეების დაღუპვისა და დასახიჩრების შემთხვევები და მისი განმეორებადობა აჩვენებს, რომ ჩვენ საქმე გვაქვს არა ერთეულ და საგამონაკლისო საწარმოო შემთხვევებთან, არამედ დასაქმებულებთა წინააღმდეგ ჩადენილ განგრძობად და სისტემურ პრაქტიკასთან, რომლის მიმართაც სახელმწიფოს აბსოლუტური გულგრილობა მას დანაშაულის თანამონაწილედ აქცევს", - ვკითხულობთ განცხადებაში, - „ არსებული კრიზისული მოცემულობის გათვალისწინებით, დღის წესრიგში ვტოვებთ მოთხოვნებს, რაც გულისხმობს სახელმწიფოს პასუხისმგებლობას დაუყოვნებლივ, უმოკლეს ვადებში უზრუნველყოს გამართული და ეფექტიანი შრომის საზედამხედველო სისტემის ამუშვება, ხოლო საქართველოს შინაგან საქმეთა სამინისტრომ დროულად და ეფექტიანად წარმართოს გამოძიება მომხდარ შემთხვევაზე და საზოგადოებას პროაქტიულად გააცნოს ინფორმაცია გამოძიების მიმდინარეობის შესახებ". სრულად  წყარო: www.osgf.ge

თბილისი. ფონდ „ღია საზოგადოება - საქართველოს" ოფისში, საქართველოში ტკივილის მართვის კანონმდებლობასა და პოლიტიკასთან დაკავშირებით, ქართველო ხელოვანების ფოტო ნამუშევრების გამოფენა მოეწყო და დისკუსია გაიმართა. ღონისძიების მიზანი იყო მოქალაქეების ინფორმირება და ისეთი საკანონმდებლო ცვლილებების მიღწევა, რომელიც ქრონიკული და უკურნებელი დაავადების მქონე პაციენტებს დაეხმარება, სიცოცხლე ღირსეულად და ტკივილის გარეშე გაატაროს. სრულად  წყარო: ორგანიზაციის ვებგვერდი

თბილისი. ივლისში ამოქმედდა ფონდ „ღია საზოგადოება - საქართველოსა" და საქართველოს ადვოკატთა ასოციაციის ერთობლივი პროექტი, რომელიც შეზღუდული შესაძლებლობების მქონე და პალიატიური მზრუნველობის პაციენტებისთვის უფასო იურიდიულ დახმარების გაწევას გულისხმობს. პროექტისთვის თბილისში, აჭარაში, კახეთში, შიდა ქართლსა და სამეგრელო-ზემო სვანეთში შეირჩა ცხრა კვალიფიციური ადვოკატი, რომელმაც, პროექტის ამოქმედებამდე, სამდღიანი ტრენინგი გაიარა. ადვოკატები უფასო იურიდიულ დახმარებას გაუწევენ და დაიცავენ დაზარალებულების ინტერესებს როგორც სასამართლოში, ისე სხვა ინსტაციებში, ყველა იმ საქმეზე, რომელიც ეხება ჯანმრთელობის უფლების დარღვევითა და ბენეფიციარის ჯანმრთელობის მდგომარეობით გამოწვეულ ქონებრივ თუ არაქონებრივ უფლებებს. სრულად  წყარო: ორგანიზაციის ვებგვერდი

თბილისი. „ქალთა მზერა" აქვეყნებს ვლოგს ქალთა სქესობრივი და რეპროდუქციული ჯანმრთელობის შესახებ. „ქალები, მოწყვლადი ჯგუფები უნდა ფლობდნენ სისტემურ და ხელმისაწვდომ ინფორმაციებს, რომელთა მიწოდებაც სახელწიფო ჯანდაცვის პოლიტიკის უმნიშვნელოვანეს მიზანს უნდა წარმოადგენდეს". სრულად...  წყარო: ორგანიზაციის ვებგვერდი სოციალურ ქსელში

თბილისი. „ინფორმაციის თავისუფლების განვითარების ინსტიტუტი" (IDFI) აქვეყნებს 2015-2017 წლებში საზღვარგარეთ სამკურნალოდ დაფინანსებული პაციენტების შესახებ ინფორმაციას. 2015-2017 წლებში, სახელმწიფო ბიუჯეტიდან საზღვარგარეთ სამკურნალოდ ჯამში 1191 პაციენტი დაფინანსდა, რაზეც 14,4 მილიონი ლარი დაიხარჯა. დაფინანსებული პაციენტების უმეტესობაში ჭარბობს ონკოლოგიურად დაავადებული მოქალაქეები. სრულად...  წყარო: www.datalab.ge

თბილისი. მუჟალისა და ბეჩოს საჯარო სკოლებში წყლის მისაწვდომობისა და სანიტარიულ–ინფრასტრუქტურული გარემოს მოწყობის თაობაზე, საქართველოს სახალხო დამცველმა მესტიის მუნიციპალიტეტს მიმართა. სახალხო დამცველის რეკომენდაციით, აუცილებელია გატარდეს გადაუდებელი ღონისძიებები წყლის, სანიტარიისა და ჰიგიენური პირობების კეთილმოწყობისათვის, საპირფარეშოების რეაბილიტაციასა და სანიტარული კვანძების გაუმჯობესებისთვის. გონივრულ ვადებში უნდა მოხდეს სოფელ ბეჩოს საჯარო სკოლის რეაბილიტაციისთვის საჭირო ღონისძიებების განხორციელება, ხოლო სოფელ მუჟალის საჯარო სკოლაში წყლის ხელმისაწვდომობის უზრუნველყოფად. სრულად  წყარო: სახალხო დამცველის ვებგვერდი

თბილისი. 21 ივნისს, 18:00 საათზე, „ღია გალერეა" უმასპინძლებს ქართველი მხატვრის, თამარ შიუკაშვილის ნახატების გამოფენას, რომელიც ბავშვთა ჰოსპისს „ციცინათელების ქვეყანას" ეძღვნება. ნახატების გაყიდვით შეგროვილი თანხა ბავშვთა ჰოსპისს „ციცინათელების ქვეყანას" გადაერიცხება. „თამარის ნახატები დადებით ემოციას იწვევს და კარგ განწყობას ქმნის. პერსონაჟების და თემების მრავალფეროვნების წყალობით, თამარის ნამუშევრების ადგილი ყველგან მოიძებნება", - ნათქვამია გამოფენასტან დაკავშირებით გავრცელებულ ინფორმაციაში. სრულად  წყარო: http://www.osgf.ge

თბილისი. სახალხო დამცველის აპარატში სახალხო დამცველთან არსებული შეზღუდული შესაძლებლობის მქონე პირთა უფლებების კონვენციის პოპულარიზაციის, დაცვისა და იმპლემენტაციის მონიტორინგის საკონსულტაციო საბჭოს მე-15 შეხვედრა გაიმართა. შეხვედრაზე შშმ პირთა უფლებების დაცვისა და მონიტორინგის მიზნით განხორციელებული და დაგეგმილი ღონისძიებები განიხილეს და აქტუალური საკითხების შესახებ ისაუბრეს. განსაკუთრებული ყურადღება დაეთმო ფსიქიკური ჯანმრთელობის თემას, ინკლუზიური განათლების სფეროს გამოწვევებს, ადგილობრივ დონეზე შშმ პირთა საჭიროებების გათვალისწინების მნიშვნელობას. სრულად  წყარო: სახალხო დამცველის ვებგვერდი

თბილისი. შეზღუდული შესაძლებლობის მქონე პირთა უფლებების დაცვის დღესთან დაკავშირებით, საქართველოს სახალხო დამცველი განცხადებას ავრცელებს. „სახალხო დამცველი ყოველწლიურად საუბრობს ამ პირთა უფლებრივ მდგომარეობასთან დაკავშირებულ საკითხებზე, რომლებიც წლების მანძილზე გამოწვევად რჩება საქართველოში", - ვკითხულობთ განცხადებაში, - „პრობლემებს შორის არის შშმ პირთა ჯანმრთელობისა და სოციალური დაცვის უფლება, ბავშვთა და ზრდასრულ პირთათვის რეაბილიტაცია/აბილიტაციის მომსახურების სათანადო უზრუნველყოფა, შშმ ქალების/გოგონების რეპროდუქციული და სექსუალური ჯანმრთელობის უფლებების რეალიზება. მნიშვნელოვანი გამოწვევაა ფიზიკური გარემოს მისაწვდომობა. ქვეყნის მასშტაბით შშმ პირთა მიერ საზოგადოებრივი დანიშნულების ობიექტებით, სასწავლო დაწესებულებებით, მუნიციპალური ტრანსპორტით თუ საგზაო ინფრასტრუქტურით სარგებლობა". სრულად  წყარო: სახალხო დამცველის ვებგვერდი

თბილისი. პარტნიორობა ადამიანის უფლებებისთვის (PHR) აქვეყნებს ბლოგპოსტს: შეზღუდული შესაძლებლობების მქონე პირთა თემი ზრდასრულთა სარეაბილიტაციო სერვისების შექმნას ითხოვს.  „მიუხედავად სახელმწიფოს არაერთგზის განცხადებისა, რომ ის გრძნობს პასუხისმგებლობას შეზღუდული შესაძლებლობის მქონე პირთა უფლებრივი მდგომარეობის სიმძიმეზე, დღემდე გადაუდგმელია აუცილებელი და სასიცოცხლოდ მნიშვნელოვანი ნაბიჯები კონვენციის აღსრულების მიზნით. მათ შორის, სახელმწიფოს დღემდე არ შეუმუშავებია შეზღუდული შესაძლებლობის მქონე პირთა საჭიროებების შეფასების სოციალური მოდელი, არ შეუქმნია  გაეროს კონვენციის აღსრულებაზე  პასუხისმგებელი ჩარჩო მექანიზმი, არ უწარმოებია შეზღუდული შესაძლებლობის მქონე პირთა სრულფასოვანი სტატისტიკა და სხვა", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

ქვემო ქართლი. PHR-ის იურისტებმა რუსთავის მუნიციპალიტეტის მერიაში, ქმედუნარიანობის რეფორმასთან დაკავშირებით, საინფორმაციო შეხვედრა გამართეს. შეხვედრას შეზღუდული შესაძლებლობის მქონე პირების მშობლები, ადგილობრივი თვითმმართველობის ორგანოების, სოციალური მომსახურების სააგენტოსა და საზოგადოებრივი ორგანიზაციების წარმომადგენლები ესწრებოდნენ. შეხვედრის მიზანს გადაწყვეტილების მხარდაჭერის მოდელის შესახებ ცნობიერების ამაღლება წარმოადგენდა. იურისტებმა შეხვედრაზე ქმედუნარიანობის რეფორმის ძირითადი არსი მიმოიხილეს, ყურადღება გაამახვილეს მხარდამჭერის უფლება-მოვალეობებზე, ისაუბრეს მიმდინარე რეფორმის განხორციელების პროცესში არსებულ ხარვეზებსა და მათი აღმოფხვრის გზებზე. ამ საკითხების ირგვლივ გაიმართა დისკუსიაც. სრულად  წყარო: ორგანიზაციის ვებგვერდი

თბილისი. მოძრაობამ „ხელმისაწვდომი გარემო ყველასთვის" ღია საზოგადოების მხარდაჭერით, ჩაატარა კვლევა ჯანდაცვის სერვისებზე შშმ პირთა ხელმისაწვდომობაზე და მათ საჭიროებებზე სოციალური ვიდეო რგოლი მოამზადა. წყარო: ორგანიზაციის ვებგვერდი სოციალურ ქსელში

თბილისი. საქართველოს სახალხო დამცველმა, სპეციალური პრევენციული ჯგუფის წევრებთან ერთად, თბილისის N202 საჯარო სკოლის (უსინათლო ბავშვთა სკოლა-პანსიონი) მონიტორინგი განახორციელა. სახალხო დამცველი შეხვდა და გაესაუბრა სკოლის მოსწავლეებს, მასწავლებლებსა და სხვა პერსონალს, დაათვალიერა სკოლის ფიზიკური გარემო. როგორც სახალხო დამცველის აპარატის მიერ გავრცელებულ ინფორმაციაში ვკითხულობთ, ვიზიტის შედეგად, გამოიკვეთა მრავალი დარღვევა, რომელიც აბრკოლებს შეზღუდული შესაძლებლობის მქონე მოსწავლეთა განათლების უფლების ეფექტიანად რეალიზებას. სრულად  წყარო: სახალხო დამცველის ვებგვერდი

თბილისი. ასოციაცია ჰერა XXI-მ შექმნა ინოვაციური მობილური აპლიკაცია მშობლებისთვის, რომელიც მიზნად ისახავს მათ ინფორმირებასა და ცნობიერების ამაღლებას რეპროდუქციული ჯანმრთელობის საკითხებზე, რათა მიაწოდონ შვილებს სწორი და ასაკზე მორგებული ინფორმაცია. მობილური აპლიკაციის გადმოწერა შესაძლებელია Android-ის და iOS-ის მომხმარებლისთვის. Android-ის აპლიკაცია... iSO-ის აპლიკაცია…  წყარო: ორგანიზაციის ვებგვერდი სოციალურ ქსელში

თბილისი. ფონდ „ღია საზოგადოება - საქართველოს" ხელშეწყობით, პალიატიური მზრუნველობის, მასთან დაკავშირებული კანონმდებლობისა და ტკივილგამაყუჩებლების ხელმისაწვდომობის შესახებ მრგვალი მაგიდა გაიმართა. შეხვედრას პალიატიური მზრუნველობის სფეროს ექსპერტები, ექიმები, ჰოსპისების წარმომადგენლები, იურისტები, საქართველოს პარლამენტის ჯანდაცვის კომიტეტის წევრები და საქართველოს შრომის, ჯანმრთელობისა და სოციალური დაცვის სამინისტროს თანამშრომლები ესწრებოდნენ. შეხვედრის მონაწილეებმა განიხილეს სამუშაო ჯგუფის მიერ მომზადებული გაიდლაინები და საკანონმდებლო ცვლილელებების პაკეტი, რომელიც საქართველოს პარლამენტის წევრებს და შრომის, ჯანმრთელობისა და სოციალური დაცვის სამინისტროს წარმომადგენლებს უნდა წარედგინოს. სრულად წყარო: ორგანიზაციის ვებგვერდი

თბილისი. პარტნიორობა ადამიანის უფლებებისთვის (PHR) აქვეყნებს განცხადებას სურამის ფსიქიატრიული საავადმყოფოში პაციენტებისათვის იურიდიული დახმარების მიღების შეზღუდვასთან დაკავშირებით. „შეგახსენებთ, რომ 2018 წლის 11 მარტს ტელეკომპანია იმედის ეთერში, გადაცემა „იმედის კვირაში" გავიდა სიუჟეტი, სადაც ვახტანგ ამირანაშვილი მიუთითებდა, რომ მას არაერთხელ მიუღია მონაწილეობა ფსიქიატრიულ დაწესებულებაში მოთავსებული ქალი ბენეფიციარების ბანაობისა და გაპარსვის პროცესში. სიუჟეტში ასევე ნაჩვენები იყო თუ რა დამამცირებელ და ღირსების შემლახავ პირობებში უწევთ ცხოვრება დაწესებულებაში მოთავსებულ ადამიანებს. სწორედ, სიუჟეტში ნაჩვენებმა დარღვევებმა წარმოშვა საკითხზე ოპერატიულად რეაგირებისა და დირექტორის დაწესებულებიდან სწრაფი წესით ჩამოშორების საჭიროება, რათა თავიდან ყოფილიყო აცილებული არასათანადო და ღირსების შემლახავი მოპყრობის,  გენდერული დისკრიმინაციისა და შესაძლო ძალადობის შემთხვევების რისკები", ნათქვამია ორგანიზაციის ვებგვერდზე. ორგანიზაციის განცხადებით, სამინისტრომ საზოგადოებრივი მღელვარების ჩახშობის მიზნით მხოლოდ ფორმალურად დანიშნა დროებითი მმართველი, რაც გაუმართლებელი და მიუღებელია. PHR მოუწოდებს ჯანდაცვის სამინისტროს უზრუნველყოს ბენეფიციარების უფლებადამცველებთან შეხვედრა. სრულად... წყარო: phrgeorgia.wordpress.com

თბილისი. გაეროს ბავშვთა ფონდმა ორდღიანი სამუშაო შეხვედრები გამართა თბილისის სამშობიარო სახლებისა და ბავშვთა საავადმყოფოების ნეონატალოგებთან, პედიატრებთან და ნევროლოგებთან. „შეხვედრებისას განიხილებოდა ექიმის როლი ბავშვებში განვითარების დარღვევების დროული იდენტიფიცირების, მათი განვითარების ხელშეწყობის და ძალადობისგან დაცვის საკითხებში. აგრეთვე, როგორ უნდა მოხდეს მშობლების სწორად ინფორმირება განვითარების დარღვევის და დიაგნოზის შესახებ, რათა თავიდან იქნას აცილებული ბავშვთა ინსტიტუციონალზიაცია და მოხდეს ბავშვების დროული რეფერირება არსებულ მომსახურებებში”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში