იმერეთი. ადამიანის უფლებათა ცენტრის ინფორმაციით, 36 წლის კ დ, რომელიც ქუთაისში, „კლინიკა - ლჯ-ის” ქირურგიულ განყოფილებაში მედდად მუშაობდა, 2020 წლის 25 დეკემბერს სამსახურიდან გაათავისუფლეს. ამის შემდეგ, კლინიკაში დაიბარეს და შესთავაზეს, ხელი მოეწერა განცხადებაზე, სადაც ეწერა, რომ სამსახურს საკუთარი სურვილით ტოვებდა. კლინიკაში განუმარტეს, რომ თუკი კლინიკის მიმართ პრეტენზია არ ექნებოდა და განცხადებას ხელს მოაწერდა, ანტიკრიზისული დახმარების პროგრამის ფარგლებში სახელმწიფოსგან 6 თვის განმავლობაში ყოველთვიურად 200-ლარიან დახმარებას მიიღებდა. კ.დ-მ განცხადებას ხელი არ მოაწერა და სამართლებრივი დახმარების თხოვნით ადამიანის უფლებათა ცენტრს მიმართა.  ადამიანის უფლებათა ცენტრის იურისტი, ანა ჩაფიძე აცხადებს, რომ კლინიკამ კ.დ.-ს შრომითი უფლებები დაარღვია. ადამიანის უფლებატა ცენტრი „კლინიკა ლჯ“-ის ხელმძღვანელობას დაუკავშირდა. კლინიკის იურისტმა განაცხადა, რომ თანამშრომლების შემცირების მიზეზი კორონავირუსის პანდემიით შექმნილი მძიმე ეკონომიკური მდგომარეობა გახდა. ადამიანის უფლებათა ცენტრის იურისტი კლინიკა-ლჯ-ის” იურისტის მოსაზრებას არ ეთანხმება და მიიჩნევს, რომ კლინიკამ კ.დ.-ს შრომითი უფლება დაარღვია. ორგანიზაცია ამ საქმეს თვალს ყურადღებით მიადევნებს და საჭიროების შემთხვევაში დავას სასამართლოში გააგრძელებს.  ადამიანის უფლებათა ცენტრი პროექტს - „უფასო იურიდიული ადვოკატირება და ადამიანის უფლებების მონიტორინგი კორონავირუსის პანდემიის შემდეგ“, საქართველოში ნიდერლანდების საელჩოს დახმარებით ახორცილებს. პროექტის მიზანია კორონავირუსის გავრცელების პრევენციის მიზნით გამოცხადებული საგანგებო მდგომარეობის და პანდემიის შემდგომ პერიოდში სავარაუდო ადამიანის უფლებების დარღვევის ფაქტების იდენტიფიცირება და ცნობიერების ამაღლება მათზე თბილისსა და საქართველოს ხუთ რეგიონში - შიდა ქართლში, კახეთში, ქვემო ქართლში, იმერეთსა და სამეგრელოში.  სრულად...   წყარო: ორგანიზაციის ვებგვერდი

თბილისი. 2008 წლის აგვისტოს მოვლენებთან დაკავშირებით, ადამიანის უფლებათა ევროპული სასამართლოს მიერ მიღებული გადაწყვეტილების შესახებ, სახალხო დამცველი განცხადებას ავრცელებს.  „აღნიშნული გადაწყვეტილება საქართველოსთვის სამართლებრივი და ისტორიული კუთხით უდიდესი მნიშვნელობისაა. ამ გადაწყვეტილებით სასამართლომ დაადასტურა, რომ რუსეთის ფედერაცია ახორციელებდა ეფექტიან კონტროლს აფხაზეთის, სამხრეთ ოსეთის და ბუფერულ ტერიტორიებზე 2008 წლის 12 აგვისტოდან 10 ოქტომბრამდე პერიოდში. აღნიშნული პერიოდის შემდგომ, რუსეთის ძლიერი წარმომადგენლობა სამხრეთ ოსეთის და აფხაზეთის ტერიტორიაზე და სამხრეთ ოსეთისა და აფხაზეთის ხელისუფლებების რუსეთის ფედერაციაზე დამოკიდებულება/დაქვემდებარება ადასტურებს, რომ რუსეთის ფედერაცია აგრძელებს „ეფექტიან კონტროლს“ აღნიშნულ ტერიტორიებზე. ამავდროულად, სასამართლოს გადაწყვეტილების საფუძველზე, რუსეთის ფედერაციას სამართლებრივი ვალდებულება აქვს უზრუნველყოს იძულებით გადაადგილებულ პირთა უსაფრთხო დაბრუნება საკუთარ სახლებში“, - აღნიშნულია განცხადებაში.  სრულად...   წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციამ მომაზადა დოკუმენტი - ,,სტრატეგიული სამართალწარმოება მსხვილი ჰიდროპროექტების მშენებლობის წინააღმდეგ“.  „მსხვილი ჰიდროპროექტები განსაკუთრებულად აისახება ადგილობრივ მოსახლეობაზე, ცვლის მათ საცხოვრებელ პირობებს, მკვეთრ და გარდაუვალ გავლენას ახდენს გარემოზე. სამშენებლო პროექტების ანალიზი აჩვენებს, რომ სახელმწიფოს მიერ ნებართვების გაცემის პროცესი ადგილობრივ მაცხოვრებელთა არასათანადო ჩართულობით, პროცედურული და შინაარსობრივი ხარვეზებით მიმდინარეობს, რაც მოსახლეობის სამართლიან პროტესტს იწვევს“, - აღნიშნულია დოკუმენტში.  სრულად...   წყარო: გვერდი სოციალურ ქსელში

თბილისი. „უფლებები საქართველო“ საქართველოს ხელისუფლებას მიმართავს და საქართველოს მოქალაქის იტალიიდან რუსეთში ექსტრადირების შეჩერებას მოითხოვს. „უფლებები საქართველო“ მიმართავს საქართველოს შესაბამის უწყებებს, გადადგან ქმედითი ნაბიჯები იტალიაში დაკავებული საქართველოს მოქალაქის, ბორის წიკლაურის, რუსეთის ფედერაციაში ექსტრადირების შესაჩერებლად და სამშობლოში მის დასაბრუნებლად“, - ვკითხულობთ განცხადებაში, - „უფლებები საქართველო“ მოუწოდებს საქართველოს საგარეო საქმეთა სამინისტროს, გადადგას ქმედითი და დროული ნაბიჯები წიკლაურის ექსტრადირების შესაჩერებლად; საქართველოს საელჩოს იტალიაში - უზრუნველყოს წიკლაურის ოჯახის მხარდაჭერა ხელმისაწვდომი სამართლებრივი დახმარების მოძიების პროცესში. „უფლებები საქართველო“ მზადყოფნას გამოთქვამს, იტალიაში შიდა სამართლებრივი მექანიზმების ამოწურვის შემდგომ, წარმოადგინოს წიკლაურის ინტერესები ადამიანის უფლებათა ევროპული სასამართლოს წინაშე“. სრულად...  წყარო: ორგანზიაციის ვებგვერდი

ადამიანის უფლებათა ევროპული სასამართლოს მიერ 2008 წლის აგვისტოს მოვლენებთან დაკავშირებით მიღებული გადაწყვეტილების თაობაზე, ევროკავშირის საგარეო ქმედებათა სამსახურის პრეს-სპიკერი განცხადებას ავრცელებს... „გადაწყვეტილებაში მოცემულია მკაფიო დასკვნა, რომ 2008 წლის 12 აგვისტოს შემდეგ, რუსეთის ფედერაციამ სამხრეთ ოსეთსა და აფხაზეთზე ეფექტიანი კონტროლის განხორციელებისას, ადამიანის უფლებათა კონვემციის სხვადასხვა მუხლი დაარღვია“, - აღნიშნულია განცხადებაში, - „სამართლიანობის მიღწევა და პასუხისმგებლობა კონფლიქტის მოგვარების მნიშვნელოვანი ნაწილია და ევროკავშირი რუსეთის ფედერაციას ამ გადაწყვეტილების სატანადო შესრულების უზრუნველყოფისკენ მოუწოდებს. ევროკავშირი სრულ მზაობას გამოხატავს, რომ ხელის შეუწყოს საქართველოში არსებული კონფლიქტების მოგვარებას, რისთვისაც, ასევე, საჭიროა ზალისხმევა წარსული კონფლიქტების მემკვიდრეობის აღმოსაფხვრელად“.  სრულად...   წყარო: eeas.europa.eu

თბილისი. ამერიკის შეერთებული შტატების საელჩო საქართველოში, ადამიანის უფლებათა ევროპული სასამართლოს გადაწყვეტილებასთან დაკავშირებით, განცხადებას ავრცელებს.  „საქართველო რუსეთის წინააღმდეგ" სახელმწიფოთაშორის სარჩელში 2008 წლის რუსეთ-საქართველოს ომის შესახებ სასამართლომ გადაწყვეტილება მკაფიოდ საქართველოს სასარგებლოდ მიიღო და რუსეთი ადამიანის უფლებათა ევროპული კონვენციის მრავალი მუხლის დარღვევაში პასუხისმგებლად ცნო, მათ შორის ცალკეული პიროვნებების დაკავებასა და წამებაში და საქართველოს მოქალაქეებისთვის სახლებში დაბრუნების უფლების ჩამორთმევაში“, - აღნიშნულია განცხადებაში, - „სასამართლოს გადაწყვეტილება კიდევ უფრო მეტ მნიშვნელობას ანიჭებს საერთაშორისო საზოგადოების მოთხოვნას, რომ რუსეთმა შეწყვიტოს საქართველოს სუვერენიტეტისა და ტერიტორიული მთლიანობის აშკარა დარღვევები. განსაკუთრებით საგანგაშო და მიუღებელია რუსეთის მცდელობები, გააკონტროლოს და გამოიყენოს საქართველოს აფხაზეთისა და სამხრეთ ოსეთის რეგიონები ბორდერიზაციის გზით, თვითნებური დაკავებებით, ადმინისტრაციული გამყოფი ზოლის გადაკვეთის შეზღუდვითა და სოციალურ-ეკონომიკური და სამხედრო „ხელშეკრულებების" დადებით საქართველოს ორ რეგიონთან.“.  სრულად...   წყარო: გვერდი სოციალურ ქსელში

აჭარა. საქართველოს ეკონომიკისა და მდგრადი განვითარების სამინისტრომ არ დააკმაყოფილა „ბათუმი რივიერას“ საქმეზე წარდგენილი ადმინისტრაციული საჩივარი, რომელიც ადგილობრივმა მოსახლეობამ და ორგანიზაცია ,,ბათომმა“ საიას დახმარებით შეიტანეს.  დღეიდან დავა თბილისის საქალაქო სასამართლოში გადაინაცვლებს. სასამართლოში მშენებლობის ნებართვის ბათილად ცნობასთან ერთად, მოთხოვნილია გასაჩივრებული აქტის მოქმედების შეჩერება.  სრულად...   წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი, ადამიანის უფლებათა ევროპული სასამართლოს მიერ, 21 იანვარს, 2008 წლის აგვისტოს ომთან დაკავშირებით მიღებული გადაწყვეტილების მიმოხილვას აქვეყნებს.  „21 იანვარს ადამიანის უფლებათა ევროპულმა სასამართლომ გამოაქვეყნა ისტორიული გადაწყვეტილება საქართველო რუსეთის ფედერაციის წინააღმდეგ საქმეზე, რომელიც 2008 წლის აგვისტოს ომის დროს და მის შემდგომ პერიოდში ადამიანის უფლებათა დარღვევების პრაქტიკებზე რუსეთის ფედერაციის პასუხისმგებლობის საკითხებს აფასებს. აღნიშნულ საქმეზე ადამიანის უფლებათა ევროპულა სასამართლომ პირველად იმსჯელა ოკუპირებულ ტერიტორიებზე რუსეთის ფედერაციის სამართლებრივი პასუხისმგებლობის საკითხზე და მიიჩნია, რომ ამ ტერიტორიებზე რუსეთის სამხედრო ძალების განლაგების, de facto ხელისუფლებების პოლიტიკური, სამხედრო, ჰუმანიტარული მხარდაჭერის და მათ შორის გაფორმებული შეთანხმებების და სხვა მხარდამჭერი პრაქტიკების გამო, რუსეთს ფაქტობრივი კონტროლი აქვს, რის გამოც ამ რეგიონებში უფლების დარღვევის ფაქტებზე პასუხისმგებლობა რუსეთის ფედერაციის იურისდიქციის სფეროში ექცევა. ამ საქმეში ევროპულმა სასამართლომ დაადგინა რუსეთის ფედერაციის მიერ არაერთი უფლების, მათ შორის წამების და არაადამიანური მოპყრობის აკრძალვის, სიცოცხლის უფლების, უკანონო დაკავების აკრძალვის, პირადი ცხოვრების, გადაადგილების და საკუთრების უფლებების დარღვევა“, - ნათქვამია მიმოხილვაში.  სრულად...  წყარო: ორგანიზაციის ვებგვერდი

საქართველოს ახალგაზრდა იურისტთა ასოციაცია, ადამიანის უფლებათა ევროპული სასამართლოს დიდი პალატის მიერ, 2008 წლის აგვისტოს ომის დროს, რუსეთის ფედერაციის მხრიდან განხორციელებულ დარღვევებთან დაკავშირებით, 2021 წლის 21 იანვარს მიღებულ გადაწყვეტილებას განმარტავს.  განმარტება მოიცავს ყველა მყხლს, რომელზეც საქართველო რუსეთს ედავებოდა და შედეგებს, რომელიც სტრასბურგის გადაწყვეტილებით დადგა. წარდგენილ საჩივარში საქართველო ამტკიცებდა, რომ რუსეთმა ადმინისტრაციული პრაქტიკის სახით, რუსულ შეიარაღებულ ძალებს და მათ კონტროლქვეშ მოქმედ სეპარატისტულ ძალებს ხელი შეუწყო/ნება დართო, განეხორციელებინათ განურჩეველი და არაპროპორციული თავდასხმები მშვიდობიანი მოსახლეობის და მათი ქონების წინააღმდეგ. მთლიანობაში, საჩივარი ევროპული კონვენციის 8 მუხლის დარღვევას შეეხებოდა.  სრულად...  წყარო: ორგანიზაციის ვებგვერდი

თბილისი. პენიტენციურ დაწესებულებებში შექმნილ მდგომარეობასთან დაკავშირებით, საქართველოს სახალხო დამცველი საგანგებო განცხადებას ავრცელებს.  „2020 წელს, საქართველოს სახალხო დამცველმა სპეციალური ანგარიში გამოაქვეყნა, სადაც ვსაუბრობდით იმაზე, რომ ნახევრად ღია ტიპის დაწესებულებების მართვის მოდელი დაფუძნებულია პატიმართა არაფორმალურ იერარქიაზე, სადაც ე.წ. „ციხის მაყურებლები“ ციხეებში უზრუნველყოფენ მოჩვენებით წესრიგს, რაც მიზნად ისახავს პატიმართა გაჩუმებასა და მათთვის პრობლემებზე საუბრის აკრძალვას“, აღნიშნულია განცხადებაში, - „აღნიშნული ანგარიშის გამოქვეყნებას მოჰყვა სახალხო დამცველზე საჯარო თავდასხმები და უკანონო ქმედებები იუსტიციის მინისტრისა და პენიტენციური სამსახურის მხრიდან, რაც დასრულდა იმით, რომ სახალხო დამცველის აპარატის წარმომადგენლებისთვის პენიტენციურ დაწესებულებებში ვიზიტებისა და მონიტორინგის განხორციელება არამარტო გართულდა, არამედ საფრთხის შემცველი გახდა“.  სრულად...  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია აქვეყნებს სტატიას „კანონიერიც და სამართლიანიც“.  რა ხდება მაშინ, როდესაც სასამართლოს წინაშე გამოსაყენებელ კანონად ერთი მხრივ გვევლინება კონსტიტუცია და მეორე მხრივ კანონი, მათ შორის კი არსებობს კოლიზია? როგორ უნდა გადაწყვიტოს საქმე მოსამართლემ, როდესაც სახეზეა კონსტიტუციისა და კანონის კოლიზია? - ეს არის შეკითხვები, რომელზეც სტატიის ავტორი პასუხებს ეძებს.  სრულად...  წყარო: ორგანიზაციის ვებგვერდი

თბილისი. ადამიანის უფლებათა ცენტრი პროკურატურის ახალი დეპარტამენტის საქმიანობას აფასებს. ორგანიზაციამ გამოაქვეყნა ანალიტიკური დოკუმენტი: "სამართლიანობის აღდგენის ბუნდოვანი პერსპექტივები - საქართველოს პროკურატურის სამართალწარმოების პროცესში ჩადენილი დანაშაულის გამოძიების დეპარტამენტის საქმიანობის შეფასება". ადამიანის უფლებათა ცენტრის დოკუმენტში მიმოხილულია ორგანიზაციის წარმოებაში არსებული ყოფილი პოლიტპატიმრების და სხვა დაზარალებულთა საქმეები, რომელზეც, თავის მხრივ, პროკურატურის ახალი დეპარტამენტი წლებია მუშაობს: ე. წ. ყინწვისის საქმე, ვახტანგ მაისაიას საქმე, დავით ადეიშვილის საქმე და სხვა. სრულად...  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) დადებითად აფასებს პარლამენტის მიერ მიმდინარე წლის 11 იანვარს „ამნისტიის შესახებ“ კანონის მიღებას და იზიარებს ჰუმანურობის აქტის მნიშვნელობასა და საჭიროებას შექმნილ ვითარებაში. ამავდროულად, ორგანიზაცია პრობლემურად აფასებს კანონპროექტის განხილვების პროცესში სამოქალაქო ორგანიზაციებისა და დაინტერესებული მხარეების ჩართულობისთვის არასაკმარის პირობებს და მოუწოდებს როგორც საკანონმდებლო, ისე აღმასრულებელ ხელისუფლებას, რომ ამნისტირებულ პირებს შესთავაზოს ადეკვატური დასაქმების და სოციო-ეკონომიკური მხარდაჭერის პროგრამები მათი სრულყოფილი რესოციალიზაციის მიზნით. სრულად... წყარო: emc.org.ge

თბილისი. საერთაშორისო გამჭვირვალობა - საქართველო ვრცელ განმარტებას აკეთებს საქართველოს პარლამენტის მიერ მიღებული ამნისტიის შესახებ კანონის შესახებ. ორგანიზაცია ჩამოთვლის იმ მუხლებს, რომელსაც ახლადმიღებული კანონი ეხება.  „პარლამენტმა ამნისტიის შესახებ დეკემბერში ინიცირებული კანონპროექტი 2021 წლის 11 იანვარს მესამე მოსმენით მიიღო. კანონის საფუძველზე, სისხლისსამართლებრივი პასუხისმგებლობისა და სასჯელისაგან თავისუფლდებიან საქართველოს სისხლის სამართლის კოდექსით გათვალისწინებული ცალკეული დანაშაულისათვის ბრალდებული და მსჯავრდებული პირები, უმცირდებათ დანიშნული სასჯელი ან ეცვლებათ უფრო მსუბუქი სასჯელით. კანონი ძალაში შედის გამოქვეყნებისთანავე“, - ვკითხულობთ განმარტებაში.  სრულად...  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციის (საია) ინფორმაციით, 26 დეკემბერს, საქართველოს საკონსტიტუციო სასამართლომ არსებითად განსახილველად არ მიიღო ორგანიზაციის საქმე „ვასილ ჟიჟიაშვილი და გიორგი გოცირიძე საქართველოს პარლამენტის წინააღმდეგ“, თუმცა, სასამართლომ განჩინებაში მნიშვნელოვანი განმარტება გააკეთა. „საკონსტიტუციო სასამართლოს განმარტებით, სათანადო დასაბუთების გარეშე ადმინისტრაციული წესით დაკავების მაქსიმალური ვადის გამოყენება უკანონოა. შესაბამისად, დაკავების საფუძვლის ამოწურვისთანავე, დაკავებული პირი დაუყოვნებლივ უნდა გათავისუფლდეს, მიუხედავად იმისა, ამოწურულია თუ არა დაკავების მაქსიმალური ვადა“. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრის (EMC) ინფორმაციით, 25 დეკემბერს მიღებული გადაწყვეტილებით, საკონსტიტუციო სასამართლომ საქმეზე „გიორგი ქებურია საქართველოს პარლამენტის წინააღმდეგ“, უმეტეს ნაწილში გაითვალისწინა მოსარჩელის პოზიციები და არაკონსტიტუციურად ცნო სისხლის სამართლის საპროცესო კოდექსის ის ნორმები, რომლებიც მხოლოდ ოპერატიული ინფორმაციის საფუძველზე მოპოვებულ მტკიცებულებაზე დაყრდნობით იძლევა გამამტყუნებელი განაჩენის გამოტანის შესაძლებლობას. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება „ამნისტიის შესახებ“ კანონპროექტის ინიცირებას. ორგანიზაცია მოუწოდებს პარლამენტს, რეპრესიული ნარკოპოლიტიკის და ქვეყანაში არსებული მძიმე სოციალური და პანდემიური მდგომარეობის გათვალისწინებით, გააფართოვოს პროექტის ფარგლები ნარკოტიკულ დანაშაულებზე, კანონის შემუშავების პროცესი წარმართოს მაქსიმალურად ღიად და უზრუნვლყოს პროცესში დაინტერესებული მხარეების მონაწილეობა. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციამ (საია) საქართველოს პარლამენტის წევრი - მიხეილ სარჯველაძის მიერ ინიცირებულ „ამნისტიის შესახებ“, კანონის პროექტზე ადამიანის უფლებათა დაცვისა და იურიდიულ საკითხთა კომიტეტებს მოსაზრებები წარუდგინა. „წლების მანძილზე მკაცრი ნარკოპოლიტიკის პირობებში, ამნისტიის აქტი დადებითად აისახება ნარკოტიკული დანაშაულისთვის მსჯავრდებულ პირთა რეაბილიტაცია/რესოციალიზაციაზე. თუმცა, მნიშვნელოვანია, რომ პარლამენტმა დროულად დაიწყოს მუშაობა ნარკოპოლიტიკის მიმართულებით სისტემურ ცვლილებაზე, ასევე მოაწესრიგოს სისხლის სამართლის კოდექსის ნარკოტიკული დანაშაულის თავით გათვალისწინებული ნორმები“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაიცა (საია) აქვეყნებს კვლევის ანგარიშს: იძულებითი ქორწინება - კანონმდებლობა და პრაქტიკა. “კვლევის შედეგად გამოვლინდა, რომ ქორწინების იძულების მსხვერპლები საქართველოში ქალები არიან. პრობლემა განსაკუთრებით მწვავედ იგრძნობა ქვემო ქართლის რეგიონში. ყველაზე ხშირად სწორედ აქ იწყება გამოძიება იძულებითი ქორწინების საკითხთან დაკავშირებით. სისხლის სამართლის კოდექსში ქორწინების იძულების სპეციალური ნორმის შემოტანით და კრიმინალიზებით შესრულდა სტამბოლის კონვენციის მოთხოვნა. თუმცა, პრობლემად რჩება ამ საკითხთან დაკავშირებით პრევენციული საქმიანობა, ცნობიერების ამაღლების მიმართულებით საზოგადოებაში ეფექტიანი სამუშაოების ჩატარება და უკვე მომხდარ ფაქტებზე შედეგიანი რეაგირება”, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საერთასორისო გამჭვირვალობა - საქართველო აქვეყნებს კვლევის ანგარიშს: ვიწრო სპეციალიზაციების ფორმა საერთო სასამართლოების სისტემაში. „თბილისის საქალაქო და თბილისის სააპელაციო სასამართლოებში დავის ყველა სფერო ვიწროდ სპეციალიზებულია. ოფიციალური განმარტებით, ვიწრო სპეციალიზაციები მოსამართლეებს დროის მენეჯმენტსა და საქმეთა ადმინისტრირებაში ეხმარება. თუმცა, სამწუხაროდ, ხშირ შემთხვევაში სპეციალიზაცია დაუსაბუთებლად იქმნება. ამასთან, სპეციალიზაციის შექმნით, სხვა პრობლემებთან ერთად, იზრდება საქმეთა განაწილებაზე მანიპულირების რისკები“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. 22 დეკემბერს, საქართველოს ახალგაზრდა იურისტთა ასოციაციამ (საია) და ადამიანის უფლებათა დაცვის ევროპულმა ცენტრმა (EHRAC) გაეროს ქალთა დისკრიმინაციის აღმოფხვრის კომიტეტს (CEDAW) ინდივიდუალური კომუნიკაციით მიმართეს. საიას განმარტებით საჩივარი 2015 წელს შეზღუდული შესაძლებლობის მქონე 12 წლის ბავშვის გაუპატიურებას ეხება, რომელზეც დამნაშავე პასუხისგებაში არ მიცემულა. „საქმე პირველია, რომელსაც საერთაშორისო ორგანო საქართველოსთან მიმართებით განიხილავს სექსუალური ძალადობის საკითზე და ასევე იმსჯელებს ბავშვთან და შშმ პირთან მიმართებით სახელმძღვანელო სტანდარტებზე“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ევროპის საბჭოს მინისტრთა კომიტეტმა 2020 წლის 1-3 დეკემბრის სხდომაზე ე.წ. „ცინცაბაძის ჯგუფის“ საქმეების აღსრულების საკითხი შეაფასა და საიას რეკომენდაციებზე დაყრდნობით, ინდივიდუალური და ზოგადი ღონისძიებების ფარგლებში, საქართველოს ხელისუფლებას კონკრეტული ზომების მიღება დაავალა. სრულად... წყარო: gyla.ge