თბილისი. „უფლებები საქართველომ“ გამართა ონლაინ შეხვედრა პრაქტიკოს ადვოკატებთან, რომლებიც თავშესაფრის მაძიებლების, საერთაშორისო დაცვის სტატუსის მქონე პირებისა და საქართველოში მცხოვრები მიგრანტების უფლებების დაცვაზე მუშაობენ. შეხვედრას იურიდიული დახმარების სამსახურის და კერძო საადვოკატო ბიუროების წარმომადგენლები დაესწრნენ.  მონაწილეებმა განიხილეს სახელმწიფო უსაფრთხოების საკითხების გავლენა უცხო ქვეყნის მოქალაქეებისა და მოქალაქეობის არმქონე პირებისათვის საერთაშორისო დაცვისა და ბინადრობის ნებართვების მინიჭებაზე, ასევე იმსჯელეს საქართველოს საერთო სასამართლოებში საერთაშორისო დაცვის და ბინადრობის ნებართვების საქმეების განხილვის სპეციფიკაზე.  სრულად...   წყარო: ორგანიზაციის ვებგვერდი

თბილისი. ადამიანის უფლებათა ცენტრს თხოვნით მიმართა ბ.ჭ,-მ, რომელიც პანდემიის დროს, 2020 წლის დეკემბერში, სამსახურიდან გაათავისუფლეს. იგი დასაქმებული იყო სახელმწიფო დაწესებულების მიერ შექმნილ კომპანიაში. ბ.ჭ.-ს განმარტებით, სამსახურიდან პირადი განცხადების საფუძველზე, მაგრამ მისი ნების საწინააღმდეგოდ გაათავისუფლეს, რაც აჩენდა გონივრულ ეჭვს კანონდარღვევის შესახებ.  ადამიანის უფლებათა ცენტრის იურისტმა მოამზადა სარჩელი სასამართლოსთვის. პროცესზე სასამართლოს მიერ შეთავაზებული მორიგების ფარგლებში, მოპასუხე მხარემ გამოთქვა მზადყოფნა, რომ მოქალაქეს კვლავ დაასაქმებდა/აღადგენდა სამსახურში. 30 მარტს დავა მოქალაქის სასარგებლოდ დასრულდა და მოქალაქე ბ.ჭ. დაბრუნდა სამსახურში თავის ძველ თანამდებობაზე.  სრულად...  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციის (საია) ინფორმაციით, ბათუმის საკრებულოსთან მიმდინარე პროტესტის დროს ადმინისტრაციული წესით დაკავებული აქტივისტი სასამართლომ გაათავისუფლა. სამოქალაქო აქტივისტი, ალბერტ არაქელოვი, დრამის ჯოხების ხის დაფაზე დარტყმით გამოხატავდა პროტესტს საკრებულოში დაგეგმილი საკითხის განხილვაზე დასწრების უფლების შეზღუდვის და თავად განსახილველი საკითხის მიუღებლობის გამო. საკრებულო ბათუმის ზღვისპირა პლაჟის მონაკვეთების პირდაპირი განკარგვის წესით იჯარით სარგებლობაში გადაცემის საკითხს განიხილავდა.  პროტესტის გამოხატვის დროს, პოლიციამ აქტივისტი წვრილმანი ხულიგნობის მუხლით დააკავა. „ბათუმის საქალაქო სასამართლომ ალბერტ არაქელოვის საქმე დღესვე განიხილა და დაადგინა, რომ სამართალდარღვევას ადგილი არ ჰქონია. შესაბამისად, სასამართლომ შეწყვიტა საქმის წარმოება და დაკავებული აქტივისტი გაათავისუფლა. მის ინტერესებს სასამართლოში საია იცავდა“. სრულად... წყარო: gyla.ge

თბილისი. 17, 19 და 26 მარტს საქართველოს სახალხო დამცველის აპარატმა, ევროპის საბჭოს საქართველოს ოფისთან თანამშრომლობით, საქართველოს შინაგან საქმეთა სამინისტროს, საქართველოს პროკურატურისა და ადვოკატთა ასოციაციის წარმომადგენლებთან, ქალთა მიმართ სექსუალური ძალადობის დანაშაულებზე მართლმსაჯულების განხორციელების საკითხებზე სამუშაო შეხვედრები გამართა. „შეხვედრებზე პროკურორებს, გამომძიებლებსა და ადვოკატებს ომბუდსმენის მიერ (ევროსაბჭოს მხარდაჭერით) მომზადებული კვლევის „ქალთა მიმართ სექსუალური ძალადობის მართლმსაჯულება საქართველოში“ ძირითადი მიგნებები და რეკომენდაციები გააცნეს. მონაწილეებმა სექსუალური ძალადობის გამოძიების, სისხლისსამართლებრივი დევნისა და საქმის სასამართლო განხილვისას არსებულ გამოწვევებსა და აღნიშნულ საქმეებზე მუშაობის თავიანთ გამოცდილებაზე ისაუბრეს“. სრულად... წყარო: www.ombudsman.ge

თბილისი. საქართველოს ახალგაზრდა იურისტთა ასოციაცია და „მთავარი არხი“ ერთობლივად ასაჩივრებენ „მაუწყებლობის შესახებ“ კანონის იმ ნორმას, რომლიც კომუნიკაციების ეროვნული კომისიის განმარტებით, მას „უხამსი“ პროგრამების ეთერში გაშვებისათვის მაუწყებლის სანქცირების უფლებამოსილებას ანიჭებს. „მოსარჩელეს მიაჩნია, რომ კომუნიკაციების კომისიის უფლებამოსილება, სანქცია დააკისროს მაუწყებელს „უხამსი“ პროგრამის ეთერში გაშვებისათვის, ეწინააღმდეგება კონსტიტუციის მე-17 მუხლის მე-5 პუნქტის მოთხოვნებს, რომლის მიხედვითაც, გამოხატვის თავისუფლება შეიძლება შეიზღუდოს „მხოლოდ კანონით.“ „მაუწყებლობის შესახებ“ კანონი არ ადგენს კომუნიკაციების ეროვნული კომისიის უფლებამოსილებას, ებრძოლოს „უხამს“ პროგრამებს ტელევიზიასა და რადიოში“. სრულად... წყარო: gyla.ge

თბილისი. კოალიცია იურიდიულ საკითხთა კომიტეტის თავმჯდომარის, ანრი ოხანაშვილის მიერ წარმოდგენილ „საერთო სასამართლოების შესახებ“ საქართველოს ორგანულ კანონში განსახორციელებელ ცვლილებებს.  მიიჩნევს ეხმიანება. ორგანიზაცია მიიჩნევს, რომ წარმოდგენილი ფრაგმენტული ცვლილებები სრულად მოწყვეტილია ქვეყანაში შექმნილ რეალობას. „სასამართლო სისტემის რეფორმის ძირითად საკითხებზე შეთანხმება უნდა მოხდეს მიმდინარე მედიაციის პროცესში არსებული პირობების შესაბამისად. კერძოდ, პირველ რიგში, ხელისუფლება და ოპოზიცია იუსტიციის უმაღლესი საბჭოსა და უზენაესი სასამართლოს დაკომპლექტების კონსენსუსზე ორიენტირებულ წესზე უნდა შეთანხმდნენ, რაც ხელს შეუწყობს სისტემაში კლანური მმართველობის აღმოფხვრას და ხელისუფლების არასათანადო გავლენების შესუსტებას“, ნათქვამია ერთობლივ განცხადებაში. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) „ვინ და რა არგუმენტებით ითხოვს სასამართლოს რეფორმას“. „საქართველოში მართლმსაჯულების რეფორმის საკითხი პოლიტიკური დღის წესრიგიდან არ ჩამოდის. ყველა საკვანძო პროცესი, პირდაპირ თუ არაპირდაპირ, სწორედ სასამართლო რეფორმების ჩავარდნის მძიმე პოლიტიკურ და ინსტიტუციურ შედეგებზე მიუთითებს. ევროკავშირის მონაწილეობით მიმდინარე პოლიტიკურმა მოლაპარაკებებმა სასამართლო რეფორმის საკითხი კიდევ ერთხელ გაააქტიურა. ბოლო წლებში მართლმსაჯულების ორგანოების მიმართ გამოხატული მკვეთრად უარყოფითი საზოგადოებრივი განწყობები, სამართლებრივი სისტემების მიმართ ნიჰილიზმი და არაერთ საქმეში სასამართლოს გადაწყვეტილების მიმართ ფუნდამენტური უნდობლობა, აჩვენებს რომ საზოგადოება ხედავს მართლმსაჯულების სისტემის პოლიტიზირების ფუნდამენტურ პრობლემას. დღეს უკვე ნათლად ჩანს, რომ წარსულთან გამკლავების არასაკმარისმა სურვილმა და ძალისხმევამ, ქართულ საზოგადოებას, მათ შორის, სასამართლოს არ მისცა მოჯადოებული წრის გარღვევის საშუალება“. სრულად... წყარო: emc.org.ge

თბილისი. „ადამიანის უფლებების სწავლების და მონიტორინგის ცენტრი“ (EMC) საკონსტიტუციო სასამართლოში ასაჩივრებს საქართველოს ადმინისტრაციულ სამართალდარღვევათა კოდექსისა და სისხლის სამართლის კოდექსის იმ ნორმებს, რომლებიც ითვალისწინებს მკაცრ სანქციებს იზოლაციისა და კარანტინის წესის ან/და საგანგებო მდგომარეობის რეჟიმის დარღვევისათვის.  „გასაჩივრებულია ასევე მითითებული სამართალდარღვევების განხილვის წესი და მათი დარღვევისათვის პირის შესაბამის სივრცეში მოთავსების უფლებამოსილება სასამართლო კონტროლის გარეშე. მოსარჩელე საქართველოს მოქალაქე რუსუდან გოცირიძეა, რომელიც სადაო ნორმის საფუძველზე 2000 ლარით დაჯარიმდა ღამის საათებში გადაადგილების გამო, მხოლოდ იმ მიზეზით, რომ მის სახელზე გაცემულ საშვში მითითებული არ იყო გადაადგილების ტერიტორია“. სრულად... წყარო: emc.org.ge

თბილისი. ადამიანის უფლებათა ევროპულმა სასამართლომ საქმეზე, ტლაშაძე და კაკაშვილი საქართველოს წინააღმდეგ, საია-ს საჩივარი დააკმაყოფილა და ევროპული კონვენციის მე-6 (1) მუხლის (საქმის სამართლიანი განხილვის უფლება) დარღვევა დაადგინა. „მომჩივნები სხვადასხვა ოპოზიციური პარტიის/მოძრაობის წარმომადგენლები იყვნენ და 2009 წელს ოპოზიციური პარტიების მიერ ხელისუფლების წინააღმდეგ გამართულ მასობრივ საპროტესტო აქციებში აქტიურად მონაწილეობდნენ. ევროპულ სასამართლოში წარდგენილ საჩივარში საია ასაბუთებდა, რომ 2009-10 წლებში სამართალდამცავი ორგანოს წარმომადგენლებმა მომჩივნებს, მათი პირადი ჩხრეკის დროს, ცეცხლსასროლი იარაღი და/ან ნარკოტიკული საშუალებები ჩაუდეს. ტლაშაძისა და კაკაშვილის საქმეში ევროპული სასამართლო უმეტესწილად საიას ერთ-ერთ წარმატებულ საქმეს, მეგრელიშვილი საქართველოს წინააღმდეგ, დაეყრდნო, რომელზეც გადაწყვეტილება 2020 წლის ივნისში გამოცხადდა“. სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტის (IDFI) კვლევა „სასამართლო სისტემის გამჭვირვალობა საქართველოში“ ყურადღებას ამახვილებს სასამართლო სისტემის პროაქტიული გამჭვირვალობის კუთხით არსებულ ძირითად ხარვეზებზე. „სერიოზულ გამოწვევად რჩება სასამართლო აქტების ხელმისაწვდომობასთან დაკავშირებით საკონსტიტუციო სასამართლოს გადაწყვეტილების შეუსრულებლობა. პრობლემურია სასამართლოებისა და იუსტიციის უმაღლესი საბჭოს მიერ საჯარო ინფორმაციის არასრულყოფილი სახით გამოქვეყნება. ასევე, აღსანიშნავია საერთო სასამართლოების სისტემაში სტატისტიკის წარმოებასა და გამოქვეყნებასთან დაკავშირებული ხარვეზები. არსებული ხარვეზებისა და გამოწვევების იდენტიფიცირების საფუძველზე, კვლევა მოიცავს კონკრეტულ რეკომენდაციებს, რომელთა გათვალისწინება არსებითად მნიშვნელოვანია სასამართლო სისტემის გამჭვირვალობისა და ღიაობის გასაუმჯობესებლად”, ნათქვამია ორგანიზაციის ვებგვერდზე. სრულად... წყარო: idfi.ge

ქართლი. ადამიანის უფლებების სწავლებისა და მონიტორინგის ცენტრმა (EMC) კიდევ ერთი სოციალური მუშაკის შრომითი დავა მოიგო. „ხაშურის რაიონული სასამართლოს 19 მარტის გადაწყვეტილებით, „სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტომ“ 2019 წელს გათავისუფლებული სოცმუშაკი სამსახურში უნდა აღადგინოს და ასევე, განაცდური უნდა აუნაზღაუროს. გარდა ამისა, სასამართლოს გადაწყვეტილებით, აღდგენისა და ანაზღაურების პროცესი დაუყოვნებლივ უნდა დაიწყოს, რაც განსაკუთრებით მნიშვნელოვანი და იშვიათია შრომით სამართლებრივ დავაში. ეს წარმატებით დასრულებული უკვე მეექვსე სასამართლო დავაა იმ რვა საქმიდან, რომელზეც EMC მუშაობას. რაც შეეხება დარჩენილ ორ დავას, სასამართლო პროცესები კვლავაც მიმდინარეობს და ამ საქმეებთან დაკავშირებული სიახლეების შესახებ საზოგადოებას პროცესების მსვლელობისას შევატყობინებთ“, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველო“ ნიკა გვარამიას ბრალდების სისხლის სამართლის საქმის შეფასებას აქვეყნებს. „ნიკა გვარამიას ბრალდება „სამაუწყებლო კომპანია რუსთავი 2“-ის გენერალური დირექტორობისას მიღებულ გადაწყვეტილებებს უკავშირდება. საქმის მასალების შესწავლის შედეგად, ასევე საქართველოს კანონმდებლობის, სასამართლო პრაქტიკის, იურიდიული დოქტრინისა და საქმეში არსებული ფაქტების მხედველობაში მიღებით, არ დასტურდება ნიკა გვარამიას მიერ ქონებრივი უფლების გაფლანგვის, კომერციული მოსყიდვის, ყალბი ოფიციალური დოკუმენტის დამზადებისა და გამოყენების ფაქტი. გარდა ამისა, ნიკა გვარამიას მიმართ წარდგენილი უკანონო შემოსავლის ლეგალიზაციის ბრალდება ვერ პასუხობს სისხლის სამართლის კოდექსის გათვალისწინებული ფულის გათეთრების დანაშაულის ნიშნებსა და მის კონვენციურ შინაარსს“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ტელეკომპანია „მთავარის“ ეთერში გასულ ინტერვიუს და აღნიშნავს, რომ უკანონო მოსმენების/მიყურადების განგრძობადი პრაქტიკა გამოუსწორებელ ზიანს აყენებს ადამიანის უფლებებსა და დემოკრატიულ წესრიგს. „ამ გზით მოპოვებული ინფორმაციის პოლიტიკური მიზნებით გამოყენება წახალისებულია ხელისუფლების არაეფექტურობითა და პოლიტიკური ნების არქონით, გამოიძიოს პირადი ცხოვრების შელახვის ფაქტები. უკანონო მოსმენების და პირადი ცხოვრების უხეში დარღვევის პრაქტიკა პირდაპირ უკავშირდება ამ მიმართულებით საკანონმდებლო და ინსტიტუციური რეფორმების ჩავარდნას და კონკრეტულ შემთხვევებზე სამართალდამცავი ორგანოების დაგვიანებულ და არაეფექტურ რეაგირებას“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. დღეს სრულიად საქართველოს მუსლიმთა სამმართველოს ყოფილი შეიხი ვაგიფ აქპეროვი და ტოლერანტობისა და მრავალფეროვნების ინსტიტუტი (TDI) კიდევ ერთხელ მიმართავენ პროკურატურას და მოითხოვენ ვაგიფ აქპეროვის დაზარალებულად ცნობასა და მისი თანამდებობიდან იძულებით გადაყენების ფაქტის დაუყოვნებლივ, ყოველმხრივ და ობიექტურ გამოძიებას. „2013 წელს ვაგიფ აქპეროვი დაიბარეს სახელმწიფო უსაფრთხოების სამსახურში და პირადი ცხოვრების შესახებ ინფორმაციის გავრცელების შანტაჟითა და მუქარით აიძულეს შეიხის თანამდებობის დატოვება. 21 მარტს, ტელეკომპანია მთავარში გასულ ინტერვიუში, სუს-ის ყოფილმა თანამშრომელმა განაცხადა, რომ უსაფრთხოების სამსახურმა შეიხის პირად კომპიუტერში ჩაწერა ვირუსი მისი პირადი ცხოვრების უკანონო თვალთვალის მიზნით. ვაგიფ აქპეროვი ამ დრომდე არ არის ცნობილი დაზარალებულად ხოლო გამოძიება 5 წელია უშედეგოდ გრძელდება. ვაგიფ აქპეროვის ინტერესებს TDI იცავს“. სრულად... წყარო: tdi.ge

ქვემო ქართლი. სამოქალაქო საზოგადოების ორგანიზაციები ეხმიანებიან მარნეულში, 21 მარტს განვითარებულ მოვლენებს, სადაც „მოძრაობა საქართველოსთვის“ აქტივისტებმა ადგილობრივ მოსახლეობასთან ერთად 21:00 საათზე დემონსტრაციულად დაარღვიეს გადაადგილების შეზღუდვა. „არაერთხელ აღგვინიშნავს, რომ საზოგადოებრივი ჯანმრთელობის დაცვის საბაბით ხელისუფლება არაკონსტიტუციურად ცდილობს გამოხატვის თავისუფლების შეზღუდვას, ამჯერად კი განსაკუთრებით საგანგაშოა, რომ საქმე გვაქვს მოქალაქეთა ფიზიკური თავისუფლების შეზღუდვის და სისხლისსამართლებრივი პასუხისმგებლობის საფრთხესთან. აღსანიშნავია, რომ აქტივისტებმა აქციის გამართვა მას შემდეგ გადაწყვიტეს, რაც ხელისუფლებამ ეთნიკურად აზერბაიჯანელი მოქალაქეების თხოვნა არ გაითვლისწინა და ნოვრუზ ბაირამისთვის ერთი ღამით გადაადგილების შეზღუდვა არ მოხსნა. მიგვაჩნია, რომ აღნიშნული გადაწყვეტილება არათანმიმდევრული და მეტიც, დისკრიმინაციულია ეთინკური უმცირესობების მიმართ. მთავრობას შეეძლო ამ შემთხვევაში დაეწესებინა გამონაკლისი, მითუმეტეს იმ ფონზე, როდესაც დაგეგმილია რეგულაციათა შემსუბუქება 2021 წლის 28 მარტს საფეხბურთო მატჩთან დაკავშირებით და შეზღუდვები მოხსნილი იყო მაგალითად, 1 იანვრის ღამითაც“, ნათქვამია ერთობლივ განცხადებაში. სრულად... წყარო: www.gdi.ge

თბილისი. ომბუდსმენი ეხმაურება 2021 წლის 21 მარტს ტელეკომპანია „მთავარის“ ეთერით გავრცელებულ სიუჟეტს, სადაც საუბარი იყო პირადი ცხოვრების ამსახველი სავარაუდო ფარული ჩანაწერების არსებობაზე, მათ შორის, პოლიტიკოს ანა დოლიძის მიმართ. „საქართველოში პირადი ცხოვრების ამსახველი უკანონო ფარული ჩანაწერების გამოქვეყნების, თუ გამოქვეყნების მუქარის შემთხვევებს ძირითადად, ქალი პოლიტიკოსების მიმართ აქვს ადგილი და საზოგადოებრივ და პოლიტიკურ პროცესებში ჩართული ქალების წინააღმდეგ პოლიტიკური ბრძოლის, მათი გაჩუმების, ჩაგვრის და ძალადობის სისტემურ იარაღად გამოიყენება. სახალხო დამცველი გმობს სახელმწიფოს მხრიდან პირადი ცხოვრების უკანონო ხელყოფის პრაქტიკას, სოლიდარობას უცხადებს ყველა მსხვერპლს და სახელმწიფოს დამაჯერებელი ნაბიჯების გადადგმისკენ მოუწოდებს“, ნათქვამია განცხადებაში. სრულად... წყარო: ombudsman.ge

თბილისი. „საერთაშორისო გამჭვირვალობა-საქართველოს“ უფასო იურიდიული დახმარების ფარგლებში ორგანიზაციამ 2020 წელს 29 საქმე მოიგო. „თუ გჭირდებათ სამართლებრივი დახმარება, მოგვწერეთ ონლაინ ან ტელეფონის/ელექტრონული ფოსტის მეშვეობით მიმართეთ ჩვენს იურისტებს“. ელ-ფოსტა: alac@transparency.ge სრულად... წყარო: ორგანიზაციის გვერდი სოციალურ ქსელში

თბილისი. 18 ივნისს, თბილისში, პოლიციის თანამშრომლებმა შეაჩერეს ბავშვი და მოსთხოვეს პირადობის დამადასტურებელი დოკუმენტის წარდგენა, რომელიც არასრულწლოვანს არ ჰქონდა. პოლიციის თანამშრომლებმა გადაწყვიტეს მისთვის ფოტოსურათის გადაღება, რასაც არასრულწლოვანის მხრიდან უარი მოყვა, უარის შემდეგ კი პოლიციელებმა არასრულწლოვნის დაკავების გადაწყვეტილება მიიღეს, თუმცა ხალხმა მათ ამის უფლება არ მისცა. დაკავების მცდელობისას ბავშვმა სხეულზე დაზიანებები მიიღო. 2020 წლის 29 ოქტომბერს PHR-მა განცხადებით მიმართა შინაგან საქმეთა სამინისტროს და მოითხოვა არასრულწლოვანთან დაკავშირებული ადმინისტრაციული საქმისწარმოების მასალების ასლების გადმოცემა, თუმცა სამინისტრომ ეს პროცესი დროში გააჭიანურა. ბავშვის ინტერესების დაცვის მიზნით #PHR-მა სახელმწიფო ინსპექტორის სამსახურს მიმართა. სახელმწიფო ინსპექტორმა იმსჯელა და დაადგინა, რომ მასალების გადაცემა არაგონივრულ ვადაში მოხდა. გადაწყვეტილების თანახმად, შინაგან საქმეთა სამინისტრომ მისი საქმიანობა შეასრულა არაჯეროვნად. კერძოდ, არაგონივრულ ვადაში, არასათანადო ფორმით და არასრულად მოახდინა განმცხადებლისათვის დოკუმენტაციის მიწოდება. საქართველოს შინაგან საქმეთა სამინისტრო გამოცხადდა სამართალდამრღვევად და ადმინისტრაციული სახდელის სახით შეეფარდა ჯარიმა 100 ლარის ოდენობით. პარტნიორობა ადამიანის უფლებებისთვის აგრძელებს ბავშვის ინტერესების დაცვას. სრულად... წყარო: phr.ge

თბილისი. ტექნიკური და სამშენებლო ზედამხედველობის სააგენტოს მასალების საფუძველზე ადამიანის უფლებების სწავლებისა და მონიტორინგის ცენტრი (EMC) მიიჩნევს, რომ 2020 წლის ოქტომბერში ნამახვანის ჰიდროელექტროსადგურის მშენებლობის პროცესში შპს „ენკა რინიუებლზი“ არ დაჯარიმებულა მშენებლობის ნებართვის პირობების დარღვევის და მოსამზადებელი სამუშაოების უკანონოდ განხორციელების გამო. ორგანიზაცია მიიჩნევს, რომ „დაუშვებელია, სახელმწიფო საზედამხედველო ორგანოები არ ასრულებდნენ საკუთარ უფლებამოსილებებს, განსაკუთრებით მაშინ, როდესაც ერთი მხრივ, საზოგადოებაში ფართოდაა გავრცელებული წუხილი, რომ პროექტი კანონდარღვევით ხორციელდება, მეორე მხრივ კი, პოლიტიკური თანამდებობის პირები ვერ ასაბუთებენ პროექტის მიზანშეწონილობას“. სრულად... წყარო: emc.org.ge

თბილისი. საქართველოს ეხმიანება ტელეკომპანია „მთავარზე“ გადაცემა „პოსტ ფაქტუმში“ გასულ სიუჟეტს. „რესპონდენტი ივანე გულაშვილი აღნიშნავს, რომ იგი იყო სახელმწიფო უსაფრთოხების თანამშრომელი და მაღალი თანამდებობის პირების დავალებით ფარული მიყურადებისთვის ამონტაჟებდა სათვალთვალო მოწყობილობებს საჯარო პირების საცხოვრებელ სახლებსა თუ სხვადასხვა ტექნიკურ მოწყობილობებზე. საია გმობს პირადი ცხოვრების უკანონო ხელყოფას. მხარდამჭერას უცხადებს ანა დოლიძეს და უკანონოდ ფარული მიყურადების ყველა მსხვერპლს. ამსათანავე აღვნიშნავთ, რომ საქართველოში, უახლოეს წარსულში არსებობს ფარული მიყურადების შედეგად მოპოვებული პირადი ცხოვრების ამსახველი კადრების გამოქვეყნების მძიმე გამოცდილება და შედეგები, აღნიშნული კი მოითხოვს შესაბამისი სახელმწიფო უწყებების მხრიდან დროულ, მიუკერძოებელ და ეფექტიან გამოძიებას“. სრულად... წყარო: gyla.ge

თბილისი. ქალთა მოძრაობა ეხმიანება 21 მარტს ტელეკომპანია მთავარის ეთერში სახელმწიფო უსაფრთხოების სამსახურის ყოფილი თანამშრომლის, ამჟამად პატიმრობაში მყოფი, ივანე გულაშვილის მიერ გავრცელებულ ინფორმაციას. „ივანე გულაშვილმა ჟურნალისტისთვის მიცემულ ინტერვიუში მოგვითხრო ქალი პოლიტიკოსის, ანა დოლიძის, შესაძლო ფარული თვალთვალის შესახებ. სამწუხაროდ, გვახსოვს არაერთი პოლიტიკურად აქტიური ქალის წინააღმდეგ განხორციელებული მორალური ტერორი და საჯარო ცხოვრებიდან განდევნის მცდელობა. აღვნიშნავთ, რომ მსგავსი უკანონო პრაქტიკები ქვეყანაში სისტემურ ძალადობად ჩამოყალიბდა. ქალის პირადი, მათ შორის, სექსუალური ცხოვრებით მანიპულირება, ან მისი გასაჯაროება ქალების პოლიტიკიდან განდევნის, დისკრედიტაციისა და მარგინზალიზაციის ყველაზე სასტიკი მეთოდია. ჩვენ მოვუწოდებთ საგამოძიებო ორგანოს დაიწყოს გამოძიება, გამოკითხოს ყველა პირი, რომელიც შესაძლოა შემხებლობაში იყოს ანა დოლიძის მიმართ უკანონო თვალთვალში და გამოიყენოს მის ხელთ არსებული ყველა რესურსი, რათა აღკვეთოს პირადი ცხოვრების კადრების გავრცელება. ჩვენ სრულ სოლიდარობას ვუცხადებთ ანა დოლიძეს და მოვუწოდებთ საერთაშორისო თანამეგობრობას შესაბამისი რეაგირებისაკენ“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. 2021 წლის 18 მარტს, თბილისის საქალაქო სასამართლომ ბათილად ცნო იუსტიციის მინისტრის ბრძანება, რომლითაც მედეა გვაზავას შეუწყდა ნოტარიუსის უფლებამოსილება. სასამართლომ ასევე ბათილად ცნო საქართველოს ნოტარიუსთა პალატის უარი, გაეწია ნოტარიუსისათვის რეკომენდაცია იუსტიციის მინისტრის წინაშე უფლებამოსილების გაგრძელებასთან დაკავშირებით.  მედეა გვაზავას ინტერესებს სასამართლოში GDI-ს სამოქალაქო და პოლიტიკური უფლებების პროგრამის დირექტორი, მარინე კაპანაძე იცავდა.  სრულად...  წყარო: ორგანიზაციის ვებგვერდი