თბილისი. პარტნიორობა ადამიანის უფლებებისთვის (PHR) სამართლებრივ დახმარებას უწევს ქალთა საფეხბურთო კლუბის ექვს ფეხბურთელს, მათ შორის, ორ არასრულწლოვანს. ორგანიზაციის ინფორმაციით, საქმე ეხება ქალების მიმართ, მწვრთნელის მხრიდან, განხორციელებულ სექსუალურ შევიწროვებას და ეთნიკური ნიშნით დისკრიმინაციას. სრულად... წყარო: phr.ge

თბილისი. „უფლებები საქართველომ“ პანდემიისაგან დაზარალებულ პირთათვის სამართლებრივი დახმარების გასაწევად ახალი პროექტი დაიწყო. „პროექტის ფარგლებში, ბენეფიციარები უფასო სამართლებრივი კონსულტაციით ისარგებლებენ. საჭიროების შემთხვევაში კი, „უფლებები საქართველოს“ ადვოკატი მათ ინტერესებს სასამართლოსა და ადმინისტრაციულ ორგანოებში დაიცავს.  ორგანიზაცია ფოკუსირდება სოციალურად დაუცველი პირების, ხანდაზმულების, დისკრიმინაციისა და ძალადობის მსხვერპლების დაცვაზე, მათ შორის, ჯანდაცვის და სოციალურ სერვისებზე ხელმისაწვდომობის უზრუნველყოფის კუთხით. განსაკუთრებული ყურადღება დაეთმობა იმ პირების უფლებების დაცვას, რომლებიც, COVID -19-ის გავრცელების შემდეგ, გენდერული ნიშნით დისკრიმინაციის გამო, გაათავისუფლეს სამსახურიდან, შეუმცირეს ანაზღაურება, ან აიძულებენ, იმუშავონ ჯანმრთელობისათვის არაუსაფრთხო გარემოში“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს შეფასებას: მართლმსაჯულების საკითხები პარტიების წინასაარჩევნო პროგრამებში - 2020. „დოკუმენტში განხილულია პარტიების ხედვები და სტრატეგიები სასამართლო სისტემაში გასატარებელ რეფორმებზე, სამართალდამცავ ორგანოებში არსებული პრობლემების მოგვარებაზე, სახელმწიფო უსაფრთხოების სამსახურის რეფორმირებასა და ნარკოპოლიტიკის საკითხზე. ზოგად გამოწვევას წარმოადგენს ჩამოთვლილ საკითხებზე არგუმენტირებული, რეალისტური და კონკრეტული გეგმებით გამყარებული იდეების დეფიციტი“, ნათქვამია შეფასებაში. სრულად... წყარო: emc.org.ge

თბილისი. 23 ოქტომბერს, სამართლიანი არჩევნებისა და დემოკრატიის საერთაშორისო საზოგადოებამ (ISFED), საქართველოს დემოკრატიული ინიციატივამ (GDI) და ადამიანის უფლებათა ცენტრმა (HRC) გამართა კვლევის, „დემოკრატია და ადამიანის უფლებები პანდემიისა და საგანგებო მდგომარეობის პირობებში“ პრეზენტაცია. „GDI-სა და ISFED-ის მიერ მოწვეული მკვლევართა ჯგუფი ოთხი თვის განმავლობაში იკვლევდა, როგორც სამართლებრივ ბაზას და საერთაშორისო სტანდარტებს, ასევე საქართველოს მთავრობის მიერ ახალ კორონავირუსთან (COVID-19) დაკავშირებით გატარებულ ღონისძიებებს. HRC სამართლებრივი დახმარებას უწევს საქართველოს მთავრობის მიერ მიღებული ღონისძიებებით დაზარალებულ პირებს. პროექტი ხორციელდება ფონდი ღია საზოგადოება- საქართველოს ფინანსური მხარდაჭერით. კვლევის მიზანი იყო, ერთი მხრივ საკანონმდებლო ბაზის კრიტიკული გაანალიზება და შესაბამისი რეკომენდაციების შემუშავება არსებულ ხარვეზებთან დაკავშირებით, ხოლო მეორე მხრივ საქართველოს მთავრობის მიერ 2020 წლის განმავლობაში მიღებული რეგულაციების კონსტიტუციურობის შეფასება“, ნათქვამია განცხადებაში. სრულად... წყარო: gdi.ge

თბილისი. საერთაშორისო გამჭვირვალობა - საქართველო აქვეყნებს ანგარიშს: სასამართლო სისტემის მდგომარეობა 2016-2020 წლები. „წინამდებარე ანგარიში მიმოიხილავს უკანასკნელი ოთხი წლის განმავლობაში სასამართლო სისტემაში განხორციელებულ მნიშვნელოვან მოვლენებსა და საკანონმდებლო ცვლილებებს, რაც მათი სისტემურად გაანალიზებისა და სასამართლოში არსებული მდგომარეობის შეფასების შესაძლებლობას იძლევა. შეიძლება ითქვას, რომ განხორციელებულმა რეფორმებმა არ მოიცვა ის ფუნდამენტური საკითხები, რაც საბოლოოდ, უზრუნველყოფდა დამოუკიდებელი სასამართლო სისტემის ჩამოყალიბებას. ხელისუფლებამ ვერ გამოავლინა სასამართლო სისტემის სრულყოფილად და საფუძვლიანად რეფორმირების პოლიტიკური ნება. შესაბამისად, სასამართლო სისტემა კვლავ არ არის გათავისუფლებული არაჯანსაღი გავლენებისგან“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. პარტნიორობა ადამიანის უფლებებისთვის ინფორმაციით, 21 ოქტომბერს დასრულდა ორდღიანი წინასასამართლო სხდომა ბრალდებულ ნიკოლოზ ბასილაშვილის მხრიდან ყოფილი მეუღლის, ნელი დოროყაშვილის მიმართ, არასრულწლოვანის თანდასწრებით, ოჯახში ჩადენილი ფიზიკური და ფსიქოლოგიური ძალადობის შესახებ. „მოსამართლემ განმარტა, რომ პროკურატურის მიერ წარდგენილი მტკიცებულებები იძლევა ალბათობის მაღალი ხარისხით ვარაუდის საფუძველს, რომ ხუთივე ეპიზოდზე, ნიკოლოზ ბასილაშვილის მიმართ გამოტანილი იქნება გამამტყუნებელი განაჩენი. აღნიშნულ საქმეზე მაღალი საჯარო ინტერესიდან გამომდინარე, საზოგადოებას ვაწვდით ინფორმაციას მიმდინარე პროცესების შესახებ“, ნათქვამია ორგანიზაციის ვებგვერდზე. სრულად... წყარო: phr.ge

თბილისი. პარტნიორობა ადამიანის უფლებების ინფორმაციით, სასამართლომ ბავშვების მიერ შეტანილი სარჩელი არ მიიღო. „საუბარია იმაზე, რომ 7, 11 და 17 წლის მოზარდებმა, 2020 წლის 6 ოქტომბერს, დამოუკიდებლად მიმართეს სასამართლოს საკუთარი უფლებების დაცვის მოთხოვნით. სარჩელი ერთ-ერთი სახელმწიფო უწყების მხრიდან ბავშვების უფლებების დარღვევას ეხებოდა. თუმცა, თბილისის საქალაქო სასამართლომ ბავშვებს მიუთითა, რომ მათი სასარჩელო მოთხოვნა ბუნდოვანია და საჭიროა მიმართონ სასამართლოს სხვა კოლეგიას. „პარტნიორობა ადამიანის უფლებებისთვის“ მიიჩნევს, რომ სასამართლოს მხრიდან მსგავსი პრაქტიკის დანერგვა, შეიცავს შემდეგ საფრთხეებს: ბავშვებს შეეზღუდოთ სასამართლოზე ხელმისაწვდომობა და დაეკარგოთ სასამართლოს მიმართ ნდობა“, ნათქვამია ორგანიზაციის ვებგვერდზე. სრულად... წყარო: phr.ge

თბილისი. საქართველოს ახალგაზრდა იურისტთა ასოციაციამ (საია) 19 და 20 ოქტომბერს ევროპის საბჭოს მინისტრთა კომიტეტს წერილობითი მოსაზრებები წარუდგინა, რომელშიც ადამიანის უფლებათა ევროპული სასამართლოს მიერ საქართველოს წინააღმდეგ მიღებული რამდენიმე გადაწყვეტილების და განჩინების აღსრულების მდგომარეობაა შეფასებული. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციამ, განცხადებით მიმართა საქართველოს პროკურატურას და მსოფლიო კულტურული მემკვიდრეობის ნუსხაში მყოფი გელათის სამონასტრო კომპლექსის დაზიანების ფაქტზე, გამოძიების დაწყება მოითხოვა. „პროკურატურის სახელზე წარდგენილ განცხადებში, საია გამოძიების დაწყებას საქართველოს სისხლის სამართლის კოდექსის ორი მუხლით ითხოვს. საუბარია სსკ-ის 2592 მუხლსა (კულტურული მემკვიდრეობის დაზიანება ან განადგურება) და ამავე კოდექსის 342-ე მუხლზე (სამსახურებრივი გულგრილობა)“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოში მოქმედი საზოგადოებრივი ორგანიზაციები საქართველოს მთავრობასა და მის რელევანტურ უწყებებს, ასევე საერთაშორისო ორგანიზაციებსა და დიპლომატიურ კორპუსს თხოვნით მიმართავენ და მოუწოდებენ, რომ მათი მანდატის ქვეშ, მიიღონ ყველა სათანადო ზომა ოკუპირებულ აფხაზეთში დაკავებული ირაკლი ბებუას სიცოცხლის, უსაფრთხოებისა და უფლებების დაცვის მიზნით და ხელი შეუწყონ საქართველოს კონტროლირებად ტერიტორიაზე მისი გადმოყვანის პროცესს. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაცია და ადამიანის უფლებების სწავლებისა და მონიტორინგის ცენტრი მიიჩნევენ, რომ სასამართლო სისტემის რეფორმის დამკვიდრებული ხედვა შესაცვლელია. „8 ოქტომბერს, ვენეციის კომისიამ უზენაესი სასამართლოს დაკომპლექტების შესახებ უახლეს საკანონმდებლო ცვლილებებზე მოსაზრებები გამოაქვეყნა. მიუხედავად იმისა, რომ პარლამენტმა თავად ითხოვა პროექტის შეფასება, იგი დასკვნას არ დაელოდა და პროექტი 30 სექტემბერს დაამტკიცა. როგორც მოსალოდნელი იყო, საკანონმდებლო ორგანოს ეს ნაჩქარევი ნაბიჯი უაყოფითად შეაფასეს როგორც თავად ვენეციის კომისიამ ასევე, ევროკავშირმა და საქართველოს მონიტორინგის საკითხებში ევროპის საბჭოს საპარლამენტო ასამბლეის (PACE) თანამომხსენებლებმა. ჩვენთვის ცხადია, რომ უმრავლესობის პრინციპზე (მაჟორტარიზმზე) დამყარებული მართვის სისტემის ეფექტიანობა მხოლოდ უსამართლობის გამრავლებას და არსებული ძალაუფლების ცენტრების გაძლიერებას ემსახურება. ამიტომ, გამოსავალს გადაწყვეტილების მიღების ინკლუზიურ, კონსენსუსზე ორიენტირებულ მექანიზმებზე გადაწყობაში ვხედავთ“, ნათქვამია განცხადებაში. სრულად... წყარო: emc.org.ge

თბილისი. სამოქალაქო საზოგადოების ინსტიტუტმა გამოსცა გზამკვლევი სოციალური საწარმოებისა და არასამეწარმეო იურიდიული პირებისათვის. საქართველოს საკანონმდებლო აქტები არ იცნობს სოციალური საწარმოსა და სოციალური მეწარმეობის ცნებებს, თუმცა საქართველოში ფუნქციონირებენ სუბიექტები, რომლებიც ახორციელებენ სოციალურ მეწარმეობას. დაინტერესებულ პირებს შესაძლებლობა აქვთ, კერძო სამართლის იურიდიული პირის დაფუძნებისა და დამკვიდრებული საერთაშორისო გამოცდილების გათვალისწინებით განახორციელონ სოციალური მეწარმეობა. სოციალურ საწარმოში იგულისხმებიან ის კერძო სამართლის იურიდიული პირები, რომლებიც ფუნქციურად მოიაზრებიან სოციალურ საწარმოებად და რომელთა ეკონომიკური საქმიანობაც უპირატესად სოციალური მიზნების მიღწევას გულისხმობს. საქართველოს კანონმდებლობის შესაბამისად, საზოგადოებრივ ორგანიზაციებს, რომლებშიც იგულისხმებიან არასამეწარმეო (არაკომერციული) იურიდიული პირები, ძირითად საქმიანობასთან ერთად უფლება აქვთ, განახორციელონ კანონით აუკრძალავი ნებისმიერი საქმიანობა, მათ შორის, დამხმარე ხასიათის სამეწარმეო საქმიანობა. ამასთან, დამხმარე ხასიათის სამეწარმეო საქმიანობა შეიძლება ატარებდეს ან არ ატარებდეს სოციალური მეწარმეობის ხასიათს. ეს გზამკვლევი განკუთვნილია როგორც სოციალური მეწარმეობის განმახორციელებელი სუბიექტების, ისე არასამეწარმეო (არაკომერციული) იურიდიული პირებისათვის. გზამკვლევი მოიცავს კერძო სამართლის იურიდიული პირების სამართლებრივი მართვის, ფინანსური აღრიცხვა-ანგარიშგებისა და საგადასახადო ადმინისტრირების საკითხებს.  გზამკვლევი შექმნილი სამოქალაქო საზოგადოების ინსტიტუტის მიერ (ავტორები: ინსტიტუტის მთავარი იურისტი ლევან ფანიაშვილი, ინსტიტუტის ფინანსური მენეჯერი დავით ტივიშვილი) სოციალურ საწარმოთა ალიანსთან თანამშრომლობით და არასამეწარმეო სამართლის საერთაშორისი ცენტრის (ICNL) მხარდაჭერით.  გზამკვლევი ...

თბილისი. 9 ოქტომბერს, არასამთავრობო ორგანიზაციების ინიციატივით გაიმართა სასამართლო სისიტემის რეფორმირების 10 პუნქტიანი კონცეფციის პრეზენტაცია და ხელმოწერის ცერემონია. „კონცეფცია შემუშავდა არასამთავრობო სექტორის მრავალწლიანი დაკვირვებისა და კვლევების გათვალისწინებით. იგი მიზნად ისახავს სასამართლო სისტემის ფუქნციურ და სისტემურ გაუმჯობესებას, მოსამართლეთა დამოუკიდებლობის გაძლიერებას და შიდა მმართველობის დემოკრატიული მექანიზმების შემოღებას. დოკუმენტს ხელი 8 პოლიტიკურმა სუბიექტმა მოაწერა, რითაც აიღო ვალდებულება 2020 წლის საპარლამენტო არჩევნების შემდეგ ახალი პარლამენტის შეკრებისთანავე განახორციელებენ კონცეფციაში მოცემულ რეფორმებს. ამასთანავე აღსანიშნავია, რომ კონცეფცია არ მოითხოვს საკონსტიტუტციო ცვლილებებს“. სრულად... წყარო: transparency.ge

ბუდაპეშტში ცენტრალური ევროპის უნივერსიტეტის დახურვა ევროპის სასამართლომ უკანონოდ სცნო. სასამართლომ დაადგინა, რომ 2017 წელს უნგრეთის უმაღლესი განათლების კანონმდებლობაში მიღებული ცვლილებები შესაბამისობაში არ არის ევროკავშირის ძირითად უფლებათა ქარტიის აკადემიურ თავისუფლებასთან დაკავშირებულ დებულებებთან. ეს გადაწყვეტილება კი ნიშნავს, რომ ცენტრალური ევროპის უნივერსიტეტს უფლება აქვს გააგრძელოს აკადემიური საქმიანობა უნგრეთის ტერიტორიაზე.  სრულად... წყარო: www.ceu.edu

თბილისი. საქართველოს საზოგადოებრივი ორგანიზაციები, 7 ოქტომბერს, საქართველოს გენერალური პროკურატურის მიერ დელიმიტაციისა და დემარკაციის სამთავრობო კომისიის ყოფილი წევრების ივერი მელაშვილი და ნატალია ილიჩოვას დაკავების ფაქტს ეხმაურებიან. „მიგვაჩნია, რომ გამოძიების დაწყების დრო, წინასაარჩევნო კონტექსტი, გამოძიების პროცესში შერჩევითი მიდგომის ნიშნები და მმართველი პარტიის ლიდერების უდანაშაულობის პრეზუმფციის დარღვევით გაკეთებული პოპულისტური განცხადებები აჩენს ეჭვს, რომ გამოძიება პოლიტიკურ მოტივაციებს ემსახურება და მიმართულია საქართველოს მოქალაქეებისთვის მცდარი წარმოდგენების შექმნისა და პოლიტიკური ოპონენტების დისკრედიტაციისაკენ“. სრულად... წყარო: transparency.ge

შიდა ქართლი. საქართველოს ახალგაზრდა იურისტთა ასოციაციის გორის ოფისი იცავდა 2017 წელს ადგილობრივი თვითმმართველობის თემისა და ქალაქის გაერთიანების შედეგად ახალციხის მუნიციპალიტეტის საკრებულოდან უკანონოდ განთავისუფლებულ 2 პირს. „ორივე მათგანი თვითმმართველობის რეორგანიზაციამდე წლების განმავლობაში მუშაობდა ახალციხის მუნიციპალიტეტის საკრებულოში. ისინი სამსახურიდან ისე გაათავისუფლეს, რომ მათი შტატები რეორგანიზაციის შედეგად არ იყო შემცირებული. საქართველოს უზენაესი სასამართლოს გადაწყვეტილებით, გაბათილდა სამსახურიდან გათავისუფლების შესახებ მიღებული ბრძანებები, ხოლო მოპასუხეს გათავისუფლებული თანამშრომლების ტოლფას თანამდებობაზე აღდგენა და განაცდური ხელფასის ანაზღაურება დაეკისრა“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია აქვეყნებს ორგანიზაციის საკონსტიტუციო სამართალწარმოების იურისტის ვასილ ჟიჟიაშვილის ბლოგპოსტს: უკვე მეორედ 4>4. მასალა აანალიზებს საქართველოს საკონსტიტუციო სასამართლოს გადაწყვეტილება ნიკანორ მელიას საქმეზე. ასევე, საქართველოს საკონსტიტუციო სასამართლოს 4 მოსამართლის - თეიმურაზ ტუღუშის, ირინე იმერლიშვილის, გიორგი კვერენჩხილაძის და თამაზ ცაბუტაშვილის განსხვავებული აზრი აღნიშნულ გადაწყვეტილებასთან დაკავშირებით. „სამწუხარო რეალობაა, პოლიტიკური მნიშვნელობის საქმეებზე საკონსტიტუციო სასამართლოს მოსამართლეთა აზრის იმგვარად იყოფა, როცა სამართლებრივი დასაბუთებისა და სიმყარის თვალსაზრისით სარჩელის დაკმაყოფილების მოწინააღმდეგე ოთხი მოსამართლის აზრი ნაკლებია სარჩელის დაკმაყოფილებაზე ოთხი მოსამართლის აზრზე, რა დროსაც საბოლოოდ სარჩელის დაკმაყოფილების მოწინააღმდეგე მოსამართლეთა გამარჯვებით სრულდება, რადგან სარჩელის დაკმაყოფილებას ხმათა უმრავლესობა სჭირდება“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, დღეს გამართულ პრესკონფერენციაზე მარიანა ჩოლოიანის ადვოკატმა, გაგი მოსიაშვილმა საქმესთან დაკავშირებით კიდევ ერთხელ გაავრცელა არასწორი ფაქტები, რითაც საზოგადოების განზრახ შეცდომაში შეყვანას შეეცადა. „ადვოკატი ცდილობს საზოგადოება დაარწმუნოს, რომ ლუკა სირაძის თვითმკვლელობა ნარკოტიკული ნივთიერების ზემოქმედებამ გამოიწვია, რაც სიმართლეს არ შეესაბამება. აშკარაა, რომ მცდარი ფაქტების გავრცელებით, ადვოკატი გაგი მოსიაშვილი საზოგადოებაში ლუკა სირაძის და მისი ოჯახის მიმართ ნეგატიური განწყობის ფორმირებას და ამ გზით საკუთარი კლიენტის ინტერესების დაცვას ცდილობს. საია მიიჩნევს, რომ ადვოკატის მოქმედება ეწინააღმდეგება ადვოკატი ეთიკის ნორმებს. კლიენტის ინტერესების დასაცავად ადვოკატის მოქმედებები უნდა შეესაბამებოდეს კანონმდებლობას და ადვოკატთა პროფესიული ეთიკის კოდექსს“, ნათქვამია ორგანიზაციის ვებგვერდზე. სრულად... წყარო: gyla.ge

იმერეთი. საქართველოს ახალგაზრდა იურისტთა ასოციაციის ქუთაისის ფილიალის დახმარებით, სამსახურებრივი მოვალეობების შესრულებისას დაზარალებულ პირს მიყენებული ზიანი აუნაზღაურდება. „„საქართველოს რკინიგზაში“ დასაქმებულმა პირმა საწარმოო ტრავმა 2014 წელს მიიღო. მიღებულმა ტრავმამ მარცხენა წვივის მესამედ დონეზე ამპუტაცია გამოიწვია. მიუხედავად ამისა, დამსაქმებელი ნებაყოფლობით არ თანხმდებოდა ზიანის ანაზღაურებას. დაზარალებული იძულებული გახდა საიას დახმარებით სასამართლოსათვის მიემართა“. სრულად... წყარო: gyla.ge

თბილისი. ქალთა საინფორმაციო ცენტრი აქვეყნებს იურისტ თამარ დეკანოსიძის ანალიტიკურ სტატიას: „გაუპატიურება, როგორც გენდერული ძალადობის ფორმა და მართლმსაჯულების დაბრკოლებები საქართველოსა და ყოფილი საბჭოთა კავშირის ქვეყნებში“. „ძირეულად მნიშვნელოვნია გაუპატიურების დეფინიციის შეცვლა თანხმობის ელემენტზე დაყრდნობით, ex officio სისხლისსამართლებრივი დევნის უზრუნველყოფა (სადაც რელევანტურია) და არსებული ზედმეტად ხისტი მტკიცებულებითი სტანდარტების შეცვლა. ამასთანავე, გაუპატიურებისთვის პასუხისმგებლობის უზრუნველყოფა მიუხედავად მსხვერპლისა და მოძალადის ურთიერთობის სტატუსისა. სექსუალური ძალადობისგან დაცვის ეფექტიანი მექანიზმების შექმნა მნიშვნელოვანი ნაბიჯია არსებითი და ტრანსფორმაციური თანასწორობის უზრუნველსაყოფად“. სრულად... წყარო: ქალთა საინფორმაციო ცენტრის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციია განმარტებით, სამოქალაქო/ადმინისტრაციული სამართლის მიმართულებით გამოცდის მაქსიმალური შეფასება შეადგენდა 16 ქულას. გასაუბრების ეტაპზე გადავიდნენ ის კონკურსანტები, რომლებმაც წერით ეტაპზე მიიღეს მინიმუმ 11 ქულა. სისხლის სამართლის მიმართულებით წერითი გამოცდის მაქსიმალური შეფასება შეადგენდა 12 ქულას. გასაუბრების ეტაპზე გადავიდნენ ის კონკურსანტები, რომლებმაც მიიღეს მინიმუმ 8.5 ქულა. მეორე ეტაპზე გადასული კონკურსანტების სია და გასაუბრების დრო იხილეთ მიმაგრებულ ფაილში. გასაუბრება გაიმართება დისტანციურ რეჟიმში პროგრამა Zoom-ის მეშვეობით სისხლის სამართლის მიმართულებით 8 ოქტომბერს, ხოლო სამოქალაქო/ადმინისტრაციული სამართლის მიმართულებით - 12 და 13 ოქტომბერს. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება რუსეთის ფედერაციაში საქართველოდან ექსპტრადირებული იაროსლავ სუმბაევის მიმართ შესაძლო არასათანადო მოპყრობისა და წამების შესახებ მედიაში გავრცელებულ ინფორმაციას. „წერილში, რომელიც მედიამ გაავრცელა, სუმბაევი დეტალურად აღწერს იმ მძიმე და არაადამიანურ პირობებს, რომელშიც ყოფნა რუსეთის სასჯელაღსრულების დაწესებულებაში უწევს. EMC მიიჩნევს, რომ წერილში მითითებული გარემოებები, მართლაც ქმნის დასაბუთებულ ვარაუდს, რომ მის მიმართ საერთაშორისო სამართლით გარანტირებული არაერთი უფლება ირღვევა. უნდა აღინიშნოს, რომ ბოლო წლების განმავლობაში EMC-მ რუსეთში ექსტრადირებული არაერთი პირის საქმე შეისწავლა. ამ საქმეებში როგორც წესი, ბუნდოვანია ექსტრადირების საფუძვლები, რაც ქმნის ეჭვს, რომ საქართველოს ხელისუფლება, ამ საკითხში, ლოიალურია რუსეთის ფედერაციის მიმართ და არღვევს საერთაშორისო სტანდარტებს“, ნათქვამია ორგანიზაციის ვებგვერდზე. სრულად... წყარო: emc.org.ge