თბილისი. საქართველოს სამოქალაქო საზოგადოების ორგანიზაციები ერთობლივ განცხადებას ავრცელებენ ნიკა მელიას დაკავების შესახებ. „ვგმობთ საქართველოს მთავრობის ამ გადაწყვეტილებას, რომელიც კიდევ უფრო გაამწვავებს ქვეყანაში არსებულ პოლიტიკურ კრიზისს. საქართველოს მთავრობის ამ გადაწყვეტილებამ, საერთაშორისო პარტნიორების მხრიდან გასული დღეების განმავლობაში გამოთქმული გაფრთხილებებისა და მოწოდებების გათვალისწინებით, მნიშვნელოვნად დააზიანა ქვეყნის საერთაშორისო რეპუტაცია. შექმნილ სიტუაციაში მნიშვნელოვანია შევაჩეროთ საზოგადოების კიდევ უფრო მეტი პოლარიზაცია და არ დავუშვათ სამოქალაქო დაპირისპირება. მოვუწოდებთ ჩვენი ქვეყნის მეგობარი სახელმწიფოების წარმომადგენლებს და საერთაშორისო ორგანიზაციებს შესაბამისი რეაგირებისკენ. დღეს როგორც არასოდეს, საქართველოს სჭირდება ჩვენი დასავლელი პარტნიორების მხარდაჭერა, ვინაიდან, სიტუაციის უფრო მეტად ესკალაციის შემთხვევაში, ქვეყანამ შესაძლოა დამოუკიდებლობის პერიოდში მოპოვებული ყველა მიღწევა დაკარგოს“, ნათქვამია ერთობლივ განცხადებაში.  სრულად... წყარო: საერთაშორისო გამჭვირვალობა – საქართველო

თბილისი. 8 მარტს, 17:00 საათზე, ქალთა მოძრაობის და სამოქალაქო აქტივისტების მიერ დაანონსებულ საპროტესტო მსვლელობას „1000 მშობლის მარში“ რეგიონებიც უერთდებიან. საპროტესტო მარში გაიმართება შემდეგ მისამართებზე: გორი - თეატრის მიმდებარე სკვერი. ზუგდიდი - ცენტრალური ბულვარის ტერიტორია. ბათუმი - ვარდების სკვერი. თელავი - ცენტრალური მოედანი, თეატრის წინ. მარნეული - იუსტიციის სახლთან. ქობულეთი - 9 აპირილის სკვერი ქუთაისი - ცენტრალური მოედანი კოლონადებთან. რუსთავი - ზვიად გამსახურდიას სახელობის სკვერი, თეატრის წინ. ახალციხე - ცენტრალური პარკი. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია 2019 წლის 20-21 ივნისის მოვლენების შედეგად 30-მდე დაზარალებულის ინტერესებს იცავს როგორც საგამოძიებო უწყებაში, ისე - სასამართლოში. „დაზარალებულთა შორის არიან ჟურნალისტები და ოპერატორები, ასევე უშუალოდ აქციის მონაწილეები და აქციის მიმდებარე ტერიტორიაზე შემთხვევითი გამვლელები. ამ დროისთვის საიას დახმარებით 2 პირია ცნობილი დაზარალებულად გენერალური პროკურატურის მიერ და 6 ადამიანის სახელით თბილისის საქალაქო სასამართლოში წარდგენილია სარჩელები შინაგან საქმეთა სამინისტროს წინააღმდეგ. სასამართლოში დაზარალებულები სამინისტროსაგან ჯანმრთელობისათვის მიყენებული ზიანის გამო მატერიალური ან/და მორალური ზიანის ანაზღაურებას ითხოვენ“, ნათქვამია ორგანიზაციის ვებგვერდზე სოციალურ ქსელში. სრულად... წყარო: gyla.ge

აჭარა. 8 მარტს, 17:00 საათზე, ქალთა მოძრაობისა და სამოქალაქო აქტივისტების მიერ დაანონსებულ საპროტესტო მსვლელობას - „1000 მშობლის მარში“ აჭარაში მოქმედი საზოგადოებრივი ორგანიზაციები და სამოქალაქო აქტივისტებიც შეუერთდებიან. „#მომისმინე #პროტესტის100დღე არის კამპანია, რომელიც უპირისპირდება სქესობრივ ძალადობას გოგოების და ქალების მიმართ. ჩვენ ვითხოვთ რეფორმებს სისტემური პრობლემების აღმოსაფხვრელად.  შეცვალეთ: სისხლის სამართლის კოდექსში გაუპატიურების მუხლი, რითიც თანხმობის არარსებობა გახდება ცენტრალური ამოსავალი; შექმენით: პროკურატურაში სპეციალიზირებული დეპარტამენტი, რომელიც სექსუალური ძალადობის საქმეებს ეფექტიანად გამოიძიებს; გახადეთ: ფორმალური განათლების ნაწილი, რითიც ბავშები შეძლებენ სქესობრივი ძალადობის ამოცნობასა და მისგან თავის დაცვას; გაზარდეთ: ფსიქოლოგების და სოცმუშაკების რაოდენობა; დადგეს: ნინის საქმის პროკურორის პასუხისმგებლობის საკითხი სამსახურეობრივი გულგრილობის გამო“, ნათქვამია კამპანიის აღწერაში. სრულად... წყარო: ორგანიზაციის გვერდი სოციალურ ქსელში

თბილისი. 8 მარტს, 17:00 საათზე ქალთა მოძრაობისა და სამოქალაქო აქტივისტების ორგანიზებით გაიმართება „1000 მშობლის მარში“.  „#მომისმინე #პროტესტის100დღე არის კამპანია, რომელიც უპირისპირდება სქესობრივ ძალადობას გოგოების და ქალების მიმართ. ჩვენ ვითხოვთ რეფორმებს სისტემური პრობლემების აღმოსაფხვრელად. მოდი თბილისში, ვარდების მოედანზე, რათა კანცელარიის წინ სახელმწიფოს საჯაროდ გავაგებინოთ ჩვენი მოთხოვნები: შეცვალეთ: სისხლის სამართლის კოდექსში გაუპატიურების მუხლი, რითიც თანხმობის არარსებობა გახდება ცენტრალური ამოსავალი; შექმენით: პროკურატურაში სპეციალიზირებული დეპარტამენტი, რომელიც სექსუალური ძალადობის საქმეებს ეფექტიანად გამოიძიებს; გახადეთ: ფორმალური განათლების ნაწილი, რითიც ბავშები შეძლებენ სქესობრივი ძალადობის ამოცნობასა და მისგან თავის დაცვას; გაზარდეთ: ფსიქოლოგების და სოცმუშაკების რაოდენობა; დადგეს: ნინის საქმის პროკურორის პასუხისმგებლობის საკითხი სამსახურეობრივი გულგრილობის გამო“, ნათქვამია კამპანიის აღწერაში. სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველოს ინფორმაციით, ევროკომისიამ 2021 წლის 8 თებერვლიდან ევროკავშირის წევრი ქვეყნების მიერ ქალთა მიმართ გენდერული ძალადობისა და ოჯახში ძალადობის აღმოსაფხვრელად გატარებული ზომების შესახებ ინფორმაციის მიღების მიზნით კონსულტაციები დაიწყო. „ევროკომისია მიზნად ისახავს კონსულტაციების პროცესში მაქსიმალურად ჩართოს გენდერული ძალადობისა და ოჯახში ძალადობის საკითხებით დაინტერესებული ყველა მხარე. შეხვედრების მიზანია, კომისიამ მიიღოს სათანადო ინფორმაცია, რათა შეძლოს გააუმჯობესოს ძალადობის წინააღმდეგ კოორდინირებული პრევენციისა და დაცვის საკითხებზე მუშაობა. კონსულტაციაში მონაწილეობა შეგიძლიათ მიიღოთ რეგისტრაციის გავლის შემდეგ ონლაინ კითხვარის შევსების გზით“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ჰაინრიხ ბიოლის ფონდის სამხრეთ კავკასიის რეგიონალური ბიურო აქვეყნებს ინა ჩარკვიანის სტატიას: „სახლში, საფრთხის პირისპირ“, რომელიც ძალადობის მსხვერპლი ქალების რეალურ ისტორიებს ეფუძნება. „ფემიციდს ვაკვირდებოდი, როგორც საზოგადოებრივ მოვლენას და კვლევაც ამ ინტერესით წამოვიწყე. გამოკითხული რესპონდენტები სახელმწიფო ზრუნვის, ტრეფიკინგის მსხვერპლთა, დაზარალებულთა დახმარების სააგენტოს ბენეფიციარები არიან. ვეცადე, მათი მძიმე გამოცდილების ტრაექტორიას გავყოლოდი. შედეგად, სამი მნიშვნელოვანი საჯარო ინსტიტუტის კართან მივედი – სასამართლო, ჯანდაცვა და ეკლესია. ისინი აღმოჩნდნენ ქალების ძალადობის გამოცდილებასთან ყველაზე ახლოს მდგომი ინსტიტუტები და, ზოგიერთ შემთხვევაში, განსაზღვრეს მათი გადარჩენა“. სრულად... წყარო: feminism-boell.org

თბილისი. საქართველოს ახალგაზრდა იურისტთა ასოციაცია (საია) გიზიარებთ ინფორმაციას თუ როგორ უნდა მოიქცეთ რეგულაციების დარღვევის დროს დაჯარიმებისას. „ჯარიმის გასაჩივრების შემთხვევაში, საჩივრის განხილვის დასრულებამდე უფლება გაქვთ, არ გადაიხადოთ დაკისრებული ჯარიმა“. სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოებრივი ორგანიზაციები მიიჩნევენ, რომ უკიდურესად საგანგაშოა საქართველოს საკონსტიტუციო სასამართლოს პირველი კოლეგიის 2021 წლის 11 თებერვლის გადაწყვეტილება და მისი მოტივაცია, რომელიც მნიშვნელოვნადაა აცდენილი სამართლებრივ ლოგიკას, კონსტიტუციურ სტანდარტებს და ზოგადად ქვეყანაში შექმნილ რეალობას. „მიგვაჩნია, რომ გადაწყვეტილება შეიცავს აღმასრულებელი ხელისუფლების მხრიდან თვითნებური და ერთპიროვნული გადაწვეტილების მიღების მნიშვნელოვან საფრთხეებს. საკონსტიტუციო სასამართლომ 2021 წლის 11 თებერვალს გამოაქვეყნა გადაწყვეტილება, რომლითაც კონსტიტუციურად მიიჩნია პანდემიის დროს ადამიანის ძირითადი უფლებების (შეკრების თავისუფლება, გადაადგილების თავისუფლება, საკუთრების უფლება) შეზღუდვა მთავრობის დადგენილებით და მინისტრის ბრძანებით. ამ გადაწყვეტილებით პარლამენტს შეუძლია ფაქტიურად მოიხსნას უფლებამოსილება ქვეყნისათვის ყველაზე კრიტიკულ სიტუაციაში და უარი თქვას საკანონდებლო ფუნქციის განხორციელებაზე“, ნათქვამია ერთობლივ განცხადებაში. სრულად... წყარო: emc.org.ge

თბილისი. 12 თებერვალს, საქართველოს მთავარი პროკურატურის შენობასთან გამართულ პრესკონფერენციაზე ქალთა მოძრაობამ ასდღიანი კამპანიის „ნინის გამო“ დაწყება დაანონსა. ქალთა მოძრაობა ითხოვს: 1. შეიცვალოს სისხლის სამართლის გაუპატიურების მუხლი და თანხმობის არარსებობა გახდეს ცენტრალური ასპექტი; 2. შეიქმნას პროკურატურაში სპეციალიზირებული დეპარტამენტი, რომელიც გამოიძიებს სექსუალური ძალადობის საქმეებს; 3. ფორმალური განათლების ნაწილი გახდეს ბავშვებისათვის სქესობრივი ძალადობის ამოცნობა და მისგან თავის დაცვა; 4. გაიზარდოს ფსიქოლოგების და სოცმუშაკების რაოდენობა; 5. დადგეს ნინის საქმის პროკურორის პასუხისმგებლობის საკითხი სამსახურეობრივი გულგრილობისთვის. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ალექსანდრ ბანდიუკოვის მიმართვას, მისივე თხოვნით ავრცელებს. ორგანიზაციის ინფორმაციით, ის ამჟამად საავადმყოფოშია და თავის საქმეზე საჯარო პოზიციონირება არ შეუძლია. „ძვირფასო საქართველოს მოქალაქეებო, მე, ალექსანდრე ბანდიუკოვი, რუსეთის ფედერაციის მოქალაქე, პუტინის ბანდიტების დევნას გამოქცეული, 2018 წლის 14 სექტემბერს ოჯახთან ერთად ჩამოვედი საქართველოში საერთაშორისო დაცვის მისაღებად. ამ ხნის განმავლობაში მე შემიყვარდა საქართველო და მისი თბილი, ლამაზი და გულღია ხალხი. მთელი ამ ხნის განმავლობაში უბრალო ადამიანებისგან არც ერთი ცუდი სიტყვა არ მსმენია. გარშემომყოფნი, მეზობლები და მეგობრები, მხოლოდ სითბოს მაგრძნობინებდნენ, თანამიგრძნობდნენ და მეხმარებოდნენ.  მე მივმართე საქართველოს ხელისუფლებას საერთაშორისო დაცვის მისაღებად, თუმცა მხოლოდ ჰუმანიტარული სტატუსი მომენიჭა. ახლა კი მათ ის უკანონოდ, დაუმსახურებლად და ცინიკურად ჩამომართვეს“, ნათქვამია ორგანიზაციის ვებგვერდზე. სრულად... წყარო: ორგანიზაციის გვერდი სოციალურ ქსელში

თბილისი. სამოქალაქო საზოგადოების ორგანიზაციები შეშფოთებას გამოხატავენ ქობულეთის მუნიციპალიტეტში 14 წლის გოგონას თვითმკვლელობის უმძიმეს საქმეზე და სახელმწიფო უწყებებს მოუწოდებენ დროულად გამოიძიონ მომხდარი. „გამოძიების ფარგლებში შესწავლილი უნდა იყოს ყველა შესაძლო ორგანოს/თანამდებობის პირის პასუხისმგებლობა, ვისაც მსხვერპლის მიმართ მხარდაჭერისა და მის მიმართ ჩადენილ დანაშაულზე გამოძიების წარმოების ვალდებულება ჰქონდა. აღნიშნულ საქმეში ჩანს ქალთა მიმართ ძალადობის უმძიმესი სოციალური პრაქტიკები და საპოლიციო და სოციალური ინსტიტუტების დანაშაულებრივი გულგრილობისა და არაეფექტიანობის ნიშნები.  არასრულწლოვანთა თვითმკვლელობის არაერთი ტრაგიკული შემთხვევის მიუხედავად, სახელმწიფოს არსებული პოლიტიკის რადიკალური ცვლილებების ნება არ გამოუვლენია, სახელმწიფოს მხრიდან არასაკმარისი ყურადღება ეთმობა ზოგადად სუიციდის პრევენციის სტრატეგიის შემუშავებასა და იმპლემენტაციას. სისტემა უკიდურესად გულგრილი რჩება მოზარდებზე ზრუნვის პოლიტიკის, სოციალური და ფსიქოლოგიური მხარდაჭერის მექანიზმების შემუშავების კუთხით“, ნათქვამია ერთობლივ განცხადებაში. სრულად... წყარო: gyla.ge

თბილისი. ომბუდსმენი მწუხარებას გამოხატავს 10 თებერვალს ქობულეთში 14 წლის გოგოს მიერ თვითმკვლელობის ტრაგიკულ ფაქტთან დაკავშირებით. „სახალხო დამცველის აპარატი შეისწავლის თითოეული სახელმწიფო უწყების პასუხისმგებლობის საკითხს, შესაძლო დაგვიანებული და არაეფექტური რეაგირების მიმართულებით. მნიშვნელოვანია აღინიშნოს, რომ ეს ტრაგიკული ფაქტი არ არის განყენებული შემთხვევა და წარმოადგენს იმ სისტემური უმოქმედობის, კვალიფიკაციის ნაკლებობისა და ძალადობის მსხვერპლ ბავშვთა სათანადო სარეაბილიტაციო სერვისების არარსებობის შედეგს, რომელზეც სახალხო დამცველის აპარატი წლებია მიუთითებს. მომხდარმა კიდევ ერთხელ წარმოაჩინა, რომ პასუხისმგებელი უწყებები ვერ ახდენენ ბავშვის მიმართ სექსუალური ძალადობის შემთხვევებზე დროულ, ეფექტიან და კოორდინირებულ რეაგირებას, რაც სახელმწიფოს მხრიდან სასწრაფო რეაგირებას და სისტემური ცვლილებების გატარებას საჭიროებს“, ნათქვამია განცხადებაში. სრულად... წყარო: ombudsman.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება შპს „ენკა რინიუებლზის“ განცხადებას, რიონის ხეობაში, ქვემო ნამახვანის ჰიდროელექტროსადგურზე მიმდინარე მოსამზადებელი ტიპისა და მიწის სამუშაოების თაობაზე. „კომპანია ადასტურებს, რომ რიონის ხეობაში მის მიერ ხორციელდება მოსამზადებელი სამუშაოები თუმცა, საკუთარი ქმედებების კანონიერების დასაბუთებისთვის ის უთითებს და აქვეყნებს არა ტექნიკური და სამშენებლო ზედამხედველობის სააგენტოს მიერ გაცემულ სამშენებლო ნებართვას და მის პირობებს, რაც ნებისმიერი მშენებლობის კანონიერების ფარგლების განსაზღვრისთვის ერთადერთი დოკუმენტია, არამედ ის ეყრდნობა სააგენტოსთან ოფიციალურ წერილობით მიმოწერას რაც არ წარმოდგენს სანებართვო დოკუმენტს“. მივიჩნევთ რომ შპს „ენკა რინიუებლზი“ 2020 წლის 21 სექტემბრიდან ქვემო ნამახვანის მშენებლობის მოსამზადებელი ტიპისა და მიწის სამუშაოების განხორციელებით ყოველდღიურად არღვევს სამშენებლო ნებართვის პირობებს. ეს კი სააგენტოს დაუყოვნებლივი რეაგირების საფუძველი უნდა გახდეს, რაც მოსამზადებელი ტიპისა და მიწის სამუშაოების შეჩერებას და მშენებლობის ნებართვის პირობების დარღვევის გამო კომპანიის მიმართ პასუხისმგებლობის დაკისრებას გულისხმობს“, ნათქვამია ორგანიზაციის განცხადებაში. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) შეშფოთებას გამოხატავს საქართველოდან რუსეთში ადამიანების ექსტრადიციის მანკიერი და ადამიანის უფლებების საწინააღმდეგო პრაქტიკის გამო. „მოვუწოდებთ საქართველოს ხელისუფლებას, ექსტრადიციისა და ამდენად, არაადამიანური და სასტიკი მოპყრობის კიდევ ერთი მოსალოდნელი მსხვერპლის, ალექსანდრ ბანდიუკოვის საქმეზე ადამიანის ფუნდამენტური უფლებების დაცვისკენ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის ინფორმაციით, თბილისის საქალაქო სასამართლომ ქ. თბილისის მუნიციპალიტეტის მერიასა და საჯარო რეესტრის ეროვნულ სააგენტოს მოქალაქისთვის 14 000 აშშ დოლარის ოდენობით მატერიალური ზიანის ანაზღაურება დაავალა. „სასამართლომ დაადგინა, რომ ზემოთხსენებული ადმინისტრაციული ორგანოების არამართლზომიერმა მოქმედებებმა დაარღვია მოქალაქის საკუთრების უფლება. კერძოდ, აღნიშნულმა პირმა 2005 წელს მიწის ნაკვეთზე საკუთრების უფლება დაირეგისტრირა. ამის მიუხედავად, სსიპ ქონების მართვის სააგენტომ 2011 წელს მიმართა საჯარო რეესტრის ეროვნულ სააგენტოს ამავე მიწის ნაკვეთის თვითმმართველი ერთეულის საკუთრებაში აღრიცხვის მოთხოვნით, რაც სააგენტომ საკითხის გამოკვლევისა და შესწავლის გარეშე დააკმაყოფილა“. მოქალაქემ სასაამრთლოში დავა 2011 წელს დაიწყო. დღემდე პირის ინტერესებს საია იცავდა. სრულად... წყარო: gyla.ge

იმერეთი. საერთაშორისო გამჭვირვალობა - საქართველოს უფასო იურიდიული დახმარებით, ზესტაფონის მერიას დაევალა ლელა გორგოძის, როგორც საჯარო მოხელის ხელახლა შეფასება. ორგანიზაციის ინფორმაციით, მერიამ საჯარო მოხელის შეფასება მიკერძოებით და კანონდარღვევით განახორციელა, რაც სასამართლომ ბათილად ცნო. TI საქართველომ უფასო იურიდიული დახმარების პროგრამის ფარგლებში 2020 წელს 29 საქმე მოიგო. სრულად... წყარო: ორგანიზაციის გვერდი სოციალურ ქსელში

თბილისი. ღირსეული შრომის პლატფორმა ეხმიანება გონიოში სასტუმროს მშენებლობის პროცესში დასაქმებული თორმეტი პირისთვის კომპანია შპს ,,ლაბაუ გონიოს“ მიერ კუთვნილი შრომითი ანაზღაურების არ გადახდის, ხელფასის მოპარვის ფაქტს.  „Მშრომელები აცხადებენ, რომ სამუშაოების შესრულების მიუხედავად, დამსაქმებელი კომპანია მათ კუთვნილ ხელფასებს დღემდე არ უხდის. დასაქმებულების მიმართ არსებული სახელფასო დავალიანება დღეის მდგომარეობით დაახლოებით 27 000 ლარს შეადგენს. Მოვუწოდებთ შრომის ინსპექციას სისტემური მუშაობა დაიწყოს საქართველოში დამსაქმებლების მიერ მშრომელთა შრომითი ანაზღაურების უკანონოდ მითვისების (მოპარული ხელფასის) პრაქტიკის აღმოსაფხვრელად და ახალი მანდატის ფარგლებში სამუშაო ადგილზე დასაქმებულთა შრომითი უფლებების შემოწმებისას, ერთ-ერთ პრიორიტეტულ მიმართულებად დაისახოს იმ დამსაქმებელთა გამოვლენა და სამართლებრივი პასუხიმგებლობა, რომელთაც ნორმალიზებული აქვთ მოპარული ხელფასის პრაქტიკა სამუშაო ადგილზე“, ნათქვამია ერთობლივ განცხადებაში. სრულად... წყარო: gyla.ge

იმერეთი. საქართველოს ახალგაზრდა იურისტთა ასოციაცია (საია) იცავდა 30 იანვარს, ნამახვან ჰესის მშენებლობის მიმდებარე ტერიტორიაზე აქციის მსვლელობისას დაკავებული პირის ინტერესებს.  „დაკავებული აქციის მონაწილის მიმართ პოლიციამ ადმინისტრაციული სამართალდარღვევის ოქმი 173-ე მუხლის (პოლიციის კანონიერი მოთხოვნისადმი დაუმორჩილებლობა) საფუძვლით შეადინა. დღეს, ქუთაისის საქალაქო სასამართლომ იმსჯელა დაკავებულის სამართალდარღვევის საქმეზე. სასამართლომ აქციის მონაწილე გაათავისუფლა ადმინისტრაციული პასუხიმგებლობიდან, გამოუცხადა სიტყვიერი შენიშვნა და სასამართლო დარბაზიდან გაათავისუფლა“, ნათქვამია ორგანიზაციის ვებგვერდზე. სრულად... წყარო: www.gyla.ge

აჭარა. საზოგადოება „დაიცავი ბათუმის ბულვარი“ აპროტესტებს შპს „ამბასადორი ბათუმი“-ის გეგმას ძველ ბულვარში 16-სართულიანი სასტუმროს მშენებლობასთან დაკავშირებით და ხელმოწერებისთვის აქვეყნებს მანიფესტს: „შეწყდეს ბათუმის ბულვარის განადგურება“. „მიუხედავად იმისა, რომ 16-სართულიანი სასტუმრო სრულიად შეუსაბამოა ბულვარისთვის და პირდაპირ წინააღმდეგობაში მოდის კანონმდებლობასთან, საფრთხეს უქმნის და ამცირებს ბულვარის კულტურულ და ისტორიულ ღირებულებას პროექტი უკვე მოიწონა აჭარის კულტურული მემკვიდრეობის დაცვის საბჭომ და მასზე ნებართვის გაცემა აქვს გადაწყვეტილი აჭარის კულტურული მემკვიდრეობის დაცვის სააგენტოს ხელმძღვანელსაც. ჩვენი მოვალეობაა წინ აღვუდგეთ ამ უკანონობას და დავიცვათ ბათუმის ბულვარი განადგურებისაგან. აღნიშნულიდან გამომდინარე, მოვითხოვთ: 1. დაუყონებლივ შეწყდეს ბათუმის ბულვარის ტერიტორიაზე 16-სართულიანი სასტუმროს მშენებლობა და გაუქმდეს გაცემული ნებართვა. 2. ბათუმის ბულვარის განაშენიანების გეგმის დამტკიცებამდე შეჩერდეს ბულვარის ტერიტორიაზე ნებისმიერ მშენებელობაზე ნებართვის გაცემა“, ნათქვამია მანიფესტის ტექსტში.  ამ ეტაპისთვის აღნიშნულ მანიფესტს ხელს აწერს 3500-მდე ადამიანი.  სრულად... წყარო: manifest.ge

თბილისი. მიმდინარე კვირაში პარლამენტში დარეგისტრირდა „ნარკოტიკული საშუალებების, ფსიქოტროპული ნივთიერებების, პრეკურსორებისა და ნარკოლოგიური დახმარების შესახებ“ კანონპროექტი, რომლის მიზანია ახლებურად განსაზღვროს 8 ნარკოტიკული საშუალების მცირე, სისხლისსამართლებრივი პასუხისმგებლობის საწყისი, დიდი და განსაკუთრებით დიდი ოდენობები.  ამასთან დაკავშირებით, საზოგადოებრივი ოთხი საზოგადოებრივი ორგანზიაცია განცხადებას ავრცელებს და პარლამენტს მოუწოდებს:  სპეციალურ კონტროლს დაქვემდებარებულ ნივთიერებათა ახლებურად განსაზღვრის პროცესში უზრუნველყოფილი იყოს ჯანდაცვის, ადამიანის უფლებებზე მომუშავე ორგანიზაციებისა და ნარკოტიკების მომხმარებელთა თემის წარმომადგენლების ჩართულობა და მათი მოსაზრებების ირგვლივ პროფესიული დისკუსია;  გააფართოვოს იმ ნარკოტიკულ საშუალებათა ჩამონათვალი, რომელთა ოდენობებიც ახლებურად მოწესრიგდება და ამ პროცესში იხელმძღვანელოს სამეცნიერო ლიტერატურასა და პრაქტიკაში მოხმარებასთან დაკავშირებული პრობლემების გადაჭრის ნათელი და განჭვრეტადი მიდგომებით;  ოდენობების განსაზღვრის პარალელურად, დაიწყოს მუშაობა ნარკოპოლიტიკის სისტემურ რეფორმაზე, რომლის მიზანიც იქნება პრევენციაზე, ზრუნვასა და მხარდაჭერაზე ორიენტირებული პოლიტიკის შემუშავება/დანერგვა. სრულად...   წყარო: emc.org.ge

თბილისი. USAID/PROLoG-ის მხარდაჭერით, საქართველოს ადვოკატთა ასოციაციის და იურიდიული დახმარების სამსახურისთვის შემუშავდა დასაქმების ადგილზე სექსუალური შევიწროების პრევენციის და რეაგირების მექანიზმი.  მექანიზმი ხელს შეუწყობს დასაქმების ადგილზე თანაბარ მოპყრობას და დისკრიმინაციისგან თავისუფალი გარემოს შექმნას. PROLoG-მა, ასევე, მხარი დაუჭირა სასწავლო მოდულის „სექსუალური შევიწროების აღმოფხვრა და მართლმსაჯულების გაძლიერება გენდერული თანასწორობის გზით“ შემუშავებას ადვოკატთა ასოციაციის წევრი ადვოკატებისთვის, რაც დაეხმარება მათ საქმეების უფრო ეფექტურად წარმოებაში.  სრულად...   წყარო: ორგანზიაციის ვებგვერდი