თბილისი. საქართველოს საზოგადოებრივი ორგანიზაციები, 7 ოქტომბერს, საქართველოს გენერალური პროკურატურის მიერ დელიმიტაციისა და დემარკაციის სამთავრობო კომისიის ყოფილი წევრების ივერი მელაშვილი და ნატალია ილიჩოვას დაკავების ფაქტს ეხმაურებიან. „მიგვაჩნია, რომ გამოძიების დაწყების დრო, წინასაარჩევნო კონტექსტი, გამოძიების პროცესში შერჩევითი მიდგომის ნიშნები და მმართველი პარტიის ლიდერების უდანაშაულობის პრეზუმფციის დარღვევით გაკეთებული პოპულისტური განცხადებები აჩენს ეჭვს, რომ გამოძიება პოლიტიკურ მოტივაციებს ემსახურება და მიმართულია საქართველოს მოქალაქეებისთვის მცდარი წარმოდგენების შექმნისა და პოლიტიკური ოპონენტების დისკრედიტაციისაკენ“. სრულად... წყარო: transparency.ge

შიდა ქართლი. საქართველოს ახალგაზრდა იურისტთა ასოციაციის გორის ოფისი იცავდა 2017 წელს ადგილობრივი თვითმმართველობის თემისა და ქალაქის გაერთიანების შედეგად ახალციხის მუნიციპალიტეტის საკრებულოდან უკანონოდ განთავისუფლებულ 2 პირს. „ორივე მათგანი თვითმმართველობის რეორგანიზაციამდე წლების განმავლობაში მუშაობდა ახალციხის მუნიციპალიტეტის საკრებულოში. ისინი სამსახურიდან ისე გაათავისუფლეს, რომ მათი შტატები რეორგანიზაციის შედეგად არ იყო შემცირებული. საქართველოს უზენაესი სასამართლოს გადაწყვეტილებით, გაბათილდა სამსახურიდან გათავისუფლების შესახებ მიღებული ბრძანებები, ხოლო მოპასუხეს გათავისუფლებული თანამშრომლების ტოლფას თანამდებობაზე აღდგენა და განაცდური ხელფასის ანაზღაურება დაეკისრა“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია აქვეყნებს ორგანიზაციის საკონსტიტუციო სამართალწარმოების იურისტის ვასილ ჟიჟიაშვილის ბლოგპოსტს: უკვე მეორედ 4>4. მასალა აანალიზებს საქართველოს საკონსტიტუციო სასამართლოს გადაწყვეტილება ნიკანორ მელიას საქმეზე. ასევე, საქართველოს საკონსტიტუციო სასამართლოს 4 მოსამართლის - თეიმურაზ ტუღუშის, ირინე იმერლიშვილის, გიორგი კვერენჩხილაძის და თამაზ ცაბუტაშვილის განსხვავებული აზრი აღნიშნულ გადაწყვეტილებასთან დაკავშირებით. „სამწუხარო რეალობაა, პოლიტიკური მნიშვნელობის საქმეებზე საკონსტიტუციო სასამართლოს მოსამართლეთა აზრის იმგვარად იყოფა, როცა სამართლებრივი დასაბუთებისა და სიმყარის თვალსაზრისით სარჩელის დაკმაყოფილების მოწინააღმდეგე ოთხი მოსამართლის აზრი ნაკლებია სარჩელის დაკმაყოფილებაზე ოთხი მოსამართლის აზრზე, რა დროსაც საბოლოოდ სარჩელის დაკმაყოფილების მოწინააღმდეგე მოსამართლეთა გამარჯვებით სრულდება, რადგან სარჩელის დაკმაყოფილებას ხმათა უმრავლესობა სჭირდება“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, დღეს გამართულ პრესკონფერენციაზე მარიანა ჩოლოიანის ადვოკატმა, გაგი მოსიაშვილმა საქმესთან დაკავშირებით კიდევ ერთხელ გაავრცელა არასწორი ფაქტები, რითაც საზოგადოების განზრახ შეცდომაში შეყვანას შეეცადა. „ადვოკატი ცდილობს საზოგადოება დაარწმუნოს, რომ ლუკა სირაძის თვითმკვლელობა ნარკოტიკული ნივთიერების ზემოქმედებამ გამოიწვია, რაც სიმართლეს არ შეესაბამება. აშკარაა, რომ მცდარი ფაქტების გავრცელებით, ადვოკატი გაგი მოსიაშვილი საზოგადოებაში ლუკა სირაძის და მისი ოჯახის მიმართ ნეგატიური განწყობის ფორმირებას და ამ გზით საკუთარი კლიენტის ინტერესების დაცვას ცდილობს. საია მიიჩნევს, რომ ადვოკატის მოქმედება ეწინააღმდეგება ადვოკატი ეთიკის ნორმებს. კლიენტის ინტერესების დასაცავად ადვოკატის მოქმედებები უნდა შეესაბამებოდეს კანონმდებლობას და ადვოკატთა პროფესიული ეთიკის კოდექსს“, ნათქვამია ორგანიზაციის ვებგვერდზე. სრულად... წყარო: gyla.ge

იმერეთი. საქართველოს ახალგაზრდა იურისტთა ასოციაციის ქუთაისის ფილიალის დახმარებით, სამსახურებრივი მოვალეობების შესრულებისას დაზარალებულ პირს მიყენებული ზიანი აუნაზღაურდება. „„საქართველოს რკინიგზაში“ დასაქმებულმა პირმა საწარმოო ტრავმა 2014 წელს მიიღო. მიღებულმა ტრავმამ მარცხენა წვივის მესამედ დონეზე ამპუტაცია გამოიწვია. მიუხედავად ამისა, დამსაქმებელი ნებაყოფლობით არ თანხმდებოდა ზიანის ანაზღაურებას. დაზარალებული იძულებული გახდა საიას დახმარებით სასამართლოსათვის მიემართა“. სრულად... წყარო: gyla.ge

თბილისი. ქალთა საინფორმაციო ცენტრი აქვეყნებს იურისტ თამარ დეკანოსიძის ანალიტიკურ სტატიას: „გაუპატიურება, როგორც გენდერული ძალადობის ფორმა და მართლმსაჯულების დაბრკოლებები საქართველოსა და ყოფილი საბჭოთა კავშირის ქვეყნებში“. „ძირეულად მნიშვნელოვნია გაუპატიურების დეფინიციის შეცვლა თანხმობის ელემენტზე დაყრდნობით, ex officio სისხლისსამართლებრივი დევნის უზრუნველყოფა (სადაც რელევანტურია) და არსებული ზედმეტად ხისტი მტკიცებულებითი სტანდარტების შეცვლა. ამასთანავე, გაუპატიურებისთვის პასუხისმგებლობის უზრუნველყოფა მიუხედავად მსხვერპლისა და მოძალადის ურთიერთობის სტატუსისა. სექსუალური ძალადობისგან დაცვის ეფექტიანი მექანიზმების შექმნა მნიშვნელოვანი ნაბიჯია არსებითი და ტრანსფორმაციური თანასწორობის უზრუნველსაყოფად“. სრულად... წყარო: ქალთა საინფორმაციო ცენტრის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციია განმარტებით, სამოქალაქო/ადმინისტრაციული სამართლის მიმართულებით გამოცდის მაქსიმალური შეფასება შეადგენდა 16 ქულას. გასაუბრების ეტაპზე გადავიდნენ ის კონკურსანტები, რომლებმაც წერით ეტაპზე მიიღეს მინიმუმ 11 ქულა. სისხლის სამართლის მიმართულებით წერითი გამოცდის მაქსიმალური შეფასება შეადგენდა 12 ქულას. გასაუბრების ეტაპზე გადავიდნენ ის კონკურსანტები, რომლებმაც მიიღეს მინიმუმ 8.5 ქულა. მეორე ეტაპზე გადასული კონკურსანტების სია და გასაუბრების დრო იხილეთ მიმაგრებულ ფაილში. გასაუბრება გაიმართება დისტანციურ რეჟიმში პროგრამა Zoom-ის მეშვეობით სისხლის სამართლის მიმართულებით 8 ოქტომბერს, ხოლო სამოქალაქო/ადმინისტრაციული სამართლის მიმართულებით - 12 და 13 ოქტომბერს. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმაურება რუსეთის ფედერაციაში საქართველოდან ექსპტრადირებული იაროსლავ სუმბაევის მიმართ შესაძლო არასათანადო მოპყრობისა და წამების შესახებ მედიაში გავრცელებულ ინფორმაციას. „წერილში, რომელიც მედიამ გაავრცელა, სუმბაევი დეტალურად აღწერს იმ მძიმე და არაადამიანურ პირობებს, რომელშიც ყოფნა რუსეთის სასჯელაღსრულების დაწესებულებაში უწევს. EMC მიიჩნევს, რომ წერილში მითითებული გარემოებები, მართლაც ქმნის დასაბუთებულ ვარაუდს, რომ მის მიმართ საერთაშორისო სამართლით გარანტირებული არაერთი უფლება ირღვევა. უნდა აღინიშნოს, რომ ბოლო წლების განმავლობაში EMC-მ რუსეთში ექსტრადირებული არაერთი პირის საქმე შეისწავლა. ამ საქმეებში როგორც წესი, ბუნდოვანია ექსტრადირების საფუძვლები, რაც ქმნის ეჭვს, რომ საქართველოს ხელისუფლება, ამ საკითხში, ლოიალურია რუსეთის ფედერაციის მიმართ და არღვევს საერთაშორისო სტანდარტებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „საერთაშორისო გამჭვირვალობა - საქართველო“ მორიგი წარმატებული საქმის შესახებ ინფორმაციას გვიზიარებს. „საქართველოს ფოსტამ“ ქეთევან ჯიქია აპრილში გაათავისუფლა. ორგანიზაციის იურისტებმა თბილისის საქალაქო სასამართლოს სარჩელით მიმართეს, თუმცა საქმის განხილვამდე, „საქართველოს ფოსტამ“ ქეთევან ჯიქია აღადგინა თანამდებობაზე და 1 თვს განაცდური, 600 ლარიც აუნაზღაურა. სრულად... წყარო: ორგანიზაციის გვერდი სოციალურ ქსელში

თბილისი. საზოგადოებრივი ორგანიზაციები საქართველოს საგამოძიებო და უსაფრთხოების უწყებებს, ასევე, აუდიტის სამსახურს, „პატრიოტთა ალიანსის“ შესახებ „დოსიეს“ მიერ გასაჯაროვებულ ინფორმაციაზე ადეკვატური რეაგირებისკენ მოუწოდებენ. „საგამოძიებო ჟურნალისტურმა პლატფორმამ, „დოსიე“, რომლის მიზანიც კრემლის კრიმინალური ჯგუფების მხილებაა, 24 და 31 აგვისტოს ორი ანგარიში გამოაქვეყნა. ანგარიშებში „საქართველოს პატრიოტთა ალიანსის“ კრემლთან კავშირებსა და ფინანსურ ურთიერთობებზეა საუბარი. „დოსიეს“ მტკიცებით, ანგარიშები, რუსეთის პრეზიდენტის ადმინისტრაციის უცხოეთის ქვეყნებთან რეგიონთაშორისი და კულტურული კავშირების სამმართველოს უფროსის, ვლადიმირ ჩერნოვის სამდივნოდან მოპოვებულ დოკუმენტებს ეფუძნება და მათში კრემლთან დაახლოებული ის ქსელია გამოაშკარავებული, რომელიც „პატრიოტთა ალიანსთან“ ურთიერთობებს კურირებს“, ნათქვამია განცხადებაში. სრულად... წყარო: gyla.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) გმობს ჟურნალისტებზე განხორციელებულ ფიზიკურ ძალადობას და მოუწოდებს სამართალდამცავ ორგანოებს უმოკლეს ვადებში გამოიძიონ მარნეულში მომხდარი ძალადობის ფაქტები. სრულად... წყარო: isfed.ge

თბილისი. „მრავალეროვანი საქართველო“ 28 და 29 სექტემბერს, მარნეულსა და სადახლოში მომხდარ ინციდენტებთან და ძალადობის ფაქტებთან დაკავშირებით ღრმა შეშფოთებას გამოხატავს.  ორგანიზაციას დაუშვებლად მიაჩნია ჟურნალისტური საქმიანობისათვის ხელის შეშლა და მოუწოდებს შესაბამის სტრუქტურებს, დროულად, ობიექტურად და სრულყოფილად გამოიძიონ ძალადობრივი ინციდენტები, ასევე, სათანადო რეაგირება იქონიონ მათში მონაწილე, დამნაშავე პირების გამოსავლენად და კანონმდებლობის შესაბამისად პასუხისგებაში მისაცემად. სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) ინფორმაციით, 14 წლის ლუკა ფსიქიატრიული საავამდყოფოს სასამართლოს დღევანდელი გადაწყვეტილების შემდეგ დატოვებს, ვინაიდან ამ გადაწყვეტილებით სასამართლომ ლუკას სიცოცხლის და უსაფრთხოების დაცვა მთავრობისთვის პრიორიტეტად აქცია. „ლუკა, 14 წლის ბავშვი, ფსიქიატრიულ საავადმყოფოში 2020 წლის 28 აგვისტოდან იმყოფება. ლუკას გამოკეტვის ერთადერთი მიზეზი საავადმყოფოს გარეთ, თემში, ადეკვატური სერვისის არქონა გახდა. ამ სარეაბილიტაციო სერვისის გარეშე ლუკას ოჯახი ვერ იცავდა ბავშვის უსაფრთხოებას და სიცოცხლეს, შესაბამისად, იძულებული გახდა, სასწრაფო დახმარება გამოეძახა მის გადასარჩენად, რომელმაც იგი ფსიქიატრიულ საავადმყოფოში გადაიყვანა, ვინაიდან არ მოიძებნა მისთვის სხვა ალტერნატიული სერვისი მთელ საქართველოში“. სრულად... წყარო: phr.ge

თბილისი. კოალიცია „მედიის ადვოკატირებისთვის“ მთავრობას ჟურნალისტების დაცვისკენ მოუწოდებს გუსინ, 2020 წლის 29 სექტემბერს მარნეულში მომხდარი დაპირისპირებისას ფიზიკურად გაუსწორდნენ შემთხვევის გადასაღებად მისულ გადამღებ ჯგუფებსაც. თანამშრომლების დაზიანების შესახებ ინფორმაცია „მთავარმა არხმა“ და საზოგადოებრივმა მაუწყებელმა გაავრცელეს. მედიის ადვოკატირებისთვის მთავრობას ჟურნალისტების დაცვისკენ მოუწოდებს. „მიგვაჩნია რომ მომხდარზე დროული და ეფექტიანი გამოძიება მნიშვნელოვნად შეამცირებს წინასაარჩევნო პერიოდში მედიისათვის გაზრდილ საფრთხეებს“. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველო“ გმობს მარნეულში წუხელ მომხდარი თავდასხმის ინციდენტებს მთავარი არხი • Mtavari Arkhi-ს და პირველი არხის ჟურნალისტებზე, აგრეთვე პოლიტიკურ აქტივისტებზე. „არჩევნების მშვიდ და სამართლიან გარემოში ჩატარება საქართველოს მოქალაქეების უმთავრეს ინტერესს წარმოადგენს და ამის უზრუნველყოფის უმთავრესი ვალდებულება მოქმედ ხელისუფლებას ეკისრება. მოვუწოდებთ სამართალდამცავ უწყებებს უზრუნველყონ ინციდენტების სწრაფად, სრულყოფილად და მიუკერძოებლად გამოძიება“, ნათქვამია ორგანიზაციის განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. საზოგადოებრივი ორგანიზაციები ეხმაურებიან პროკურატურის მიერ მტკიცებულებათა ფალსიფიციცირების ფაქტზე დაწყებული გამოძიების ფარგლებში, თამარ ბაჩალიაშვილის ოჯახის ადვოკატების მაგისტრ მოსამართლესთან დაკითხვის, ასევე მიხეილ რამიშვილის პირადი მობილური ტელეფონის ამოღების ფაქტს. სსო-ები მიიჩნევენ, რომ შესაძლებელია, ეს ქმედებები ჩაითვალოს მიზანმიმართულ მცდელობად, მართლმსაჯულება გამოიყენონ სხვა მიზნებით, კერძოდ - ბაჩალიაშვილის ოჯახისა და მისი უფლებადამცველების პოზიციაზე გავლენის მოსახდენად. "მოვუწოდებთ საქართველოს პროკურატურას დარჩეს სამართლებრივ სივრცეში, დაუყოვნებლივ შეწყვიტოს ადვოკატთა საქმიანობაში ნებისმიერი სახის ჩარევა და პატივი სცეს მათ პროფესიულ დამოუკიდებლობას", ნათქვამია ერთობლივ განცხადებაში. სრულად... წყარო: gdi.ge

თბილისი. „საფარმა“, ოჯახში სისტემატური ძალადობის მსხვერპლ ნანა გოგალაძის საქმეში, რომელიც, მოძალადე ქმრის დაჭრის გამო, პასუხისგებაში იყო მიცემული, წარმატებას მიაღწია. ორგანიზაციის ძალისხმევით, საქმეში გამოიკვეთა აუცილებელი მოგერიების ფარგლების მართლზომიერების პირობები, გამოიკითხა არაერთი მოწმე, ჩატარდა რიგი საგამოძიებო მოქმედებებისა. შედეგად, თბილისის საქალაქო სასამართლომ შემთხვევას აუცილებელი მოგერიების კვალიფიკაცია მისცა და ნანა გოგალაძის მიმართ გამამართლებელი განაჩენი გამოიტანა. ეს განაჩენი ბრალდების მხარემ გაასაჩივრა და ნანა გოგალაძის მიმართ გამამტყუნებელი განაჩენი და სისხლის სამართლის კოდექსის 117 მუხლით დასჯა მოითხოვა. თბილისის სააპელაციო სასამართლომ არ დააკმაყოფილა ვაკე-საბურთალოს რაიონული პროკურატურის პროკურორის საჩივარი და ძალაში პირველი ინსტანციის გამამართლებელი განაჩენი დატოვა. სრულად...  წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველო (TI) მიგვაჩნია, რომ თბილისი მერიის მხრიდან პარტია „გიორგი ვაშაძე - სტრატეგია აღმაშენებელის” მიმართ გატარებული სანქციებით შეკრებებისა და მანიფესტაციების უფლება ირღვევა, რაც ხელს უშლის პარტიას აწარმოოს წინასაარჩევნო კამპანია.  „მიმდინარე წლის ივნისის ბოლოდან პარტიამ „გიორგი ვაშაძე - სტრატეგია აღმაშენებელი” ხელმოწერების შეგროვება დაიწყო საბანკო სესხებზე პროცენტის განახევრების მოთხოვნით. ამ მიზნით თბილისის მეტროსადგურებთან განათავსა მცირე ზომის კარვები, რის გამოც, ივნისის შემდეგ თბილისის მერიამ ჯამში 70 000 ლარზე მეტი თანხით დააჯარიმა“, - ნათქვამია TI-ის მიერ გავრცელებულ განცხახებაში, - „მოვუწოდებთ თბილისის მერიას დაიცვას „შეკრებებისა და მანიფესტაციების შესახებ“ კანონი და შეწყვიტოს პარტია „გიორგი ვაშაძე - სტრატეგია აღმაშენებლის“ დაჯარიმება, აგრეთვე, გააუქმოს უკვე შედგენილი ადმინისტრაციულ სამართალდარღვევათა ოქმები“.  სრულად...   წყარო: ორგანიზაციის ვებგვერდი

თბილისი. 27 სექტემბერს EMC მარნეულის მუნიციპალიტეტის სოფელ ალგეთში ადგილობრივი მოსახლეობისთვის უფასო სამართლებრივი და სამედიცინო დახმარების შეხვედრებს გამართავს. სამართლებრივი და სამედიცინო კონსულტაციებისთვის საჭიროა წინასწარი ჩაწერა. დარეკეთ ნომერზე - 591620212 სრულად...  წყარო: გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) განცხადებას ავრცელებს.  „ა(ა)იპ „ინფორმაციის თავისუფლების განვითარების ინსტიტუტისა“ და ა(ა)იპ „მედიის განვითარების ფონდის“ სარჩელების საფუძველზე, საქართველოს საკონსტიტუციო სასამართლომ 2019 წლის 7 ივნისის გადაწყვეტილებით არაკონსტიტუციურად ცნო „პერსონალურ მონაცემთა დაცვის შესახებ“ დღეს მოქმედი კანონის მე-5 მუხლისა და მე-6 მუხლის პირველი და მე-3 პუნქტების ის ნორმატიული შინაარსი, რომელიც გამორიცხავს ღია სასამართლო სხდომის შედეგად მიღებული სასამართლო აქტების სრული ტექსტის საჯარო ინფორმაციის სახით გაცემას. საკონსტიტუციო სასამართლოს თანახმად, მართლმსაჯულების განხორციელების პროცესში მიღებული ნებისმიერი გადაწყვეტილება უნდა იყოს ღია, თუ არ არის მისი ხელმისაწვდომობის შეზღუდვის დასაბუთებული საჭიროება. სასამართლომ სადავო ნორმები ძალადაკარგულად ცნო 2020 წლის პირველი მაისიდან და პარლამენტს მისცა ვადა საკითხის კონსტიტუციის მოთხოვნათა შესაბამისად მოსაწესრიგებლად, თუმცა პარლამენტს დადგენილ ვადაში საკანონმდებლო ცვლილება არ მიუღია“, - აღნიშნულია განცხადებაში, - „IDFI მოუწოდებს საერთო სასამართლოებს უზრუნველყონ გადაწყვეტილებების სრული ტექსტის საჯაროობა საკონსტიტუციო სასამართლოს მიერ დადგენილი სტანდარტის შესაბამისად, ასევე მოუწოდებს საქართველოს პარლამენტს დროულად უზრუნველყოს საკონსტიტუციო სასამართლოს გადაწყვეტილების შესაბამისი საკანონმდებლო ცვლილების ინიცირება“.  სრულად...  წყარო: idfi.ge

თბილისი. ევროკავშირის სამართლის მხარდაჭერის პროგრამა წარმოგიდგენთ ახალ პუბლიკაციას ევროპის კავშირის სამართლის შერჩეულ საკითხებზე - „შესავალი ევროკავშირის სამართალში“.   სრულად...  წყარო: გვერდი სოციალურ ქსელში

თბილისი. USAID/PROLoG-ის მხარდაჭერით, დაიწყო ახალ სახელმძღვანელოზე მუშაობა სტუდენტებისთვის ქალთა მიმართ და ოჯახში ძალადობის სამართლებრივ საკითხებზე. „სახელმძღვანელოს შექმნის მიზანია ქალთა მიმართ და ოჯახში ძალადობის სფეროში არსებული კანონებისა და მათი განმარტებების თავმოყრა, რაც დაეხმარება სამართლის, სოციალური და ჰუმანიტარული მეცნიერების ფაკულტეტის სტუდენტებს ოჯახში ძალადობასთან დაკავშირებული საგნების შესწავლაში“. სრულად... წყარო: ორგანიზაციის გვერდი სოციალურ ქსელში