თბილისი. კოალიცია „დამოუკიდებელი და გამჭვირვალე მართლმსაჯულებისათვის“ მოსამართლეთა მიმართ დისციპლინური სამართალწარმოების პროცესში არსებულ მნიშვნელოვან ხარვეზებს ეხმიანება. „მიუხედავად ბოლო წლებში გატარებული რეფორმის ოთხი ტალღისა, მოსამართლეთა დისციპლინური პასუხისმგებლობის არსებული სისტემა ვერ უზრუნველყოფს ამ პროცესის სამართლიანობას, ობიექტურობასა და ეფექტიანობას, რასაც გავლენიანი ჯგუფის ხელში კონცენტრირებული ძალაუფლება და კანონმდებლობის ხარვეზები განაპირობებს”, - ნათქვამია კოალიციის მიერ გავრცელებულ განცხადებაში. სრულად...  წყარო: http://coalition.ge

საია პერიოდულად მიმოიხილავს ადამიანის უფლებათა ევროპული სასამართლოს გადაწყვეტილებებს, რომელიც საქართველოს უკავშირდება.  2020 წლის 27 თებერვალს ადამიანის უფლებათა ევროპულმა სასამართლომ საქართველოს წინააღმდეგ კიდევ ერთი გადაწყვეტილება გამოიტანა. სასამართლომ დაადგინა, რომ საქმეზე ლობჟანიძე და ფერაძე საქართველოს წინააღმდეგ. ევროპულმა სასამართლომ 27 თებერვლის გადაწყვეტილებით დაადგინა, რომ კონვენციის მე-6 (1) და (3) (გ) მუხლის მოთხოვნების საწინააღმდეგოდ, ლობჟანიძეს არ მიეცა საშუალება, დაეცვა ინტერესები მის მიერ არჩეული დამცველის მეშვეობით და ამასთან, ეროვნულმა სასამართლოებმა საკმარისად არ დაასაბუთეს, რატომ არ მოხდა მისი სააპელაციო საჩივრის განხილვა. სასამართლომ საქართველოს 3’600 ევროს გადახდა დააკისრა ლობჟანიძის მიერ განცდილი მორალური ზიანის ასანაზღაურებლად.  სრულად...  წყარო: https://gyla.ge

თბილისი. GIZ-ის სამართლის პროგრამა აქვეყნებს შედარებითი სამართლის ქართულ-გერმანული ჟურნალის 2020 წლის გამოცემას. ელ. ვერსია ... წყარო: პროგრამის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) ინფორმაციით, პარლამენტმა შვებულების მიცემაზე თანამშრომელს უარი დაუსაბუთებლად უთხრა და სამსახურიდან გაათავისუფლა. "26 თებერვალს ქუთაისის სააპელაციო სასამართლომ დაადგინა, რომ საქართველოს პარლამენტმა 2018 წლის მაისში თანამშრომელს დაუსაბუთებლად უთხრა უარი შვებულების გამოყენებაზე და სამსახურიდან გაათავისუფლა. შვებულებით უფლებით სარგებლობაზე უარის თქმის და სამსახურიდან გათავისუფლების შესახებ მიღებული გადაწყვეტილება მოსარჩელემ საიას დახმარებით ქუთაისის საქალაქო სასამართლოში გაასაჩივრა, რომელმაც სარჩელი არ დააკმაყოფილა. პირველი ინსტანციის სასამართლოს გადაწყვეტილება ქუთაისის სააპელაციო სასამართლომ შეცვალა და მიიჩნია, რომ პარლამენტის არგუმენტები არ იყო დამაჯერებელი. აღნიშნული გადაწყვეტილება ამ დროისათვის კანონიერ ძალაში არ არის შესული და საქართველოს პარლამენტს რჩება უზენაეს სასამართლოში დავის გაგრძელების შესაძლებლობა“, ნათქვამია ორგანიზაციის ვებგვერდზე. სრულად... წყარო: gyla.ge

GIZ სამართლის პროგრამა აქვეყნებს სახელმძღვანელოს: „უსაფუძვლო გამდიდრების სამართლის სარეფორმო წინადადება“. გამოცემის ელექტრონული ვერსიის ჩამოტვირთვა შესაძლებელია შემდეგი ბმულიდან... წყარო: ორგანიზაციის გვერდი სოციალურ ქსელში

თბილისი. 24-25 თებერვალს, წამების მსხვერპლთა ფსიქოსოციალური და სამედიცინო რეაბილიტაციის საქართველოს ცენტრის (GCRT) ორგანიზებით, თბილისში სტამბოლის პროტოკოლის იმპლემენტაციის თემაზე ტრენინგი ჩატარდა. „ორდღიანი ტრენინგი თბილისის ადამიანის უფლებათა სახლში გაიმართა და მას GCRT-ის გორის ოფისის და ახალგაზრდა იურისტთა ასოციაციის თანამშრომლები ესწრებოდნენ. ექსპერტებმა მონაწილეებთან ერთად განიხილეს წამებისა და არასათანადო მოპყრობის შემთხვევების გამოძიება/დოკუმენტირების საკითხები, ასევე სამედიცინო ეთიკა და გაიდლაინები მტკიცებულებებისა და დაკუმენტაციების მოპოვების შესახებ”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

ევროკავშირისა და გერმანიის ეკონომიკური თანამშრომლობისა და განვითარების ფედერალური სამინისტროს (BMZ) თანადაფინანსებული პროექტი „საქართველოს კომერციული სამართლის და პრაქტიკის გაუმჯობესება“ აღსრულების ეროვნულ ბიუროსთან თანამშრომლობით აგრძელებს სახელმწიფო აღმასრულებელთა მომზადება-გადამზადებას კერძო აღმასრულებლის საქმიანობაში. პროექტის მხარდაჭერით შემუშავდა სასწავლო მოდული, მომზადდა და სერტიფიცირება გაიარა 9 ადგილობრივმა ტრენერმა და დამუშავდა შესაბამისი სახელმძღვანელო. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ანას ბაღის საქმის სამართლებრივ შეფასებას აქვეყნებს. „ანას ბაღი, რომელიც განთავსებულია ქ. თბილისში, ვარკეთილის II მ/რ, კორპ. 22 მიმდებარედ და სახელი 9 წლის ტრაგიკულად დაღუპული ბავშვის საპატივცემულოდ დაერქვა, ადგილობრივი მცხოვრებლებისთვის უმნიშვნელოვანეს სარეკრეაციო და სოციალიზაციის სივრცეს წარმოადგენს. რამდენიმე წელია, ადგილობრივი მოსახლეობა ბაღის შესანარჩუნებლად სამშენებლო კომპანიას უპირისპირდება, რომელიც სკვერის მომიჯნავედ 10-სართულიანი კორპუსის აშენებას გეგმავს და ბაღს ფუნქციის დაკარგვით ემუქრება. EMC მიიჩნევს, რომ აღნიშნულ კომპანიაზე გაცემული სამშენებლო ნებართვა ვერ აკმაყოფილებს ეროვნული და საერთაშორისო კანონმდებლობის მოთხოვნებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „კონსტიტუციის 42-ე მუხლმა“ უმასპინძლა შეხვედრას, რომელზეც სისხლის სამართლის საერთაშორისო სასამართლოს (ICC) საქართველოს ოფისის წარმომადგენლებმა საზოგადოებრივ ორგანიზაციებს სასამართლოს საქმიანობა გააცნეს.  ICC ოთხ წელზე მეტია იძიებს 2008 წელს ცხინვალის რეგიონში კაცობრიობის წინააღმდეგ ჩადენილ და სამხედრო დანაშაულებს. საქართველო, როგორც რომის სტატუტის ხელმომწერი ქვეყანა, რომლის ფარგლებშიც ICC ჩამოყალიბდა, ვალდებულია, რომ სრულად ითანამშრომლოს სასამართლოსთან. იგივე ვალდებულება არ ვრცელდება რუსეთზე, ვინაიდან ის რომის სტატუტის ხელმომწერი არ არის.  სრულად...  წყარო: https://article42.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ბლოგპოსტს: აქციის მონაწილეთა და ჟურნალისტთა დარღვეული უფლებები კვლავ არ აღდგენილა. „პოლიციელებმა აქციის რამდენიმე მონაწილე დააკავეს ადმინისტრაციული სამართალდარღვევის კოდექსის 166-ე და 173-ე მუხლების საფუძველზე საზოგადოებრივი წესრიგის დარღვევის და პოლიციელების მოთხოვნისადმი დაუმორჩილებლობის გამო. დაკავებულებს არ მიეცათ საკმარისი დრო და საშუალება, სათანადოდ დაეცვათ საკუთარი თავი სასამართლოზე. სასამართლომ მათ 30 დღიანი პატიმრობა შეუფარდა. დღემდე აქციის მონაწილეების და ჟურნალისტების მიმართ პოლიციელთა მხრიდან ჩადენილი ქმედებები გამოუძიებელია და არ მომხდარა დამნაშავე პირთა გამოვლენა და დასჯა. საბჭოთა კავშირის დროს მიღებული ადმინისტრაციულ სამართალდარღვევათა კოდექსი, რომლითაც აქციის მონაწილეებს პატიმრობა შეეფარდა, ვერ აკმაყოფილებს სამართლიანი პროცესის მოთხოვნებს, არ შეიცავს საკმარის პროცედურულ გარანტიებს და ვერ უზრუნველყოფს საქმის მიუკერძოებლად და სამართლიანად განხილვის შესაძლებლობას“, ნათქვამია საიას ვებგვერდზე. სრულად... წყარო: gyla.ge

აჭარა. როდის უჩნდება თანაგრძნობა საზოგადოებას სექსუალური შევიწროების მსხვერპლის მიმართ? რა არის სექსუალური შევიწროება? სექსუალური შევიწროებისგან დაცვის რა მექანიზმები არსებობს საქართველოში?  ამ და სხვა საკითხების ირგვლივ, PHR-ის იურისტი ბათუმის შოთა რუსთაველის სახელმწიფო უნივერსიტეტის სტუდენტებს ესაუბრა.  სრულად...  წყარო: https://phrgeorgia.wordpress.com

თბილისი. საქართველოს ახალგაზრდა იურისტთა ასოციაცია (საია) აქვეყნებს ბლოგპოსტს: ბავშვთა ინტერესების სათანადო წარმომადგენლობა კვლავ არ არის უზრუნველყოფილი. „მომჩივანი ეროვნულ დონეზე ითხოვდა, რომ სასამართლოს გაეთვალისწინებინა მისი არასრულწლოვანი დისშვილების სურვილი და მათ საცხოვრებელ ადგილად დეიდის საცხოვრებელი განესაზღვრა. სასამართლო ეტაპზე სოციალური მუშაკები ბავშვების წარმომადგენლად ჩაერთნენ. საბოლოო გადაწყვეტილებით ეროვნულმა სასამართლოებმა ბავშვები მამას მიაკუთვნეს. თუმცა, სასამართლოებმა და სოციალურმა მუშაკებმა გადაწყვეტილება ისე მიიღეს, რომ არ გაითვალისწინეს ბავშვების საუკეთესო ინტერესები და მათი სურვილი ეცხოვრათ დეიდასთან“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. 12-14 თებერვალს ევროკავშირისა და გერმანიის ეკონომიკური თანამშრომლობისა და განვითარების ფედერალური სამინისტროს (BMZ) თანადაფინანსებული პროექტის „საქართველოს კომერციული სამართლის და პრაქტიკის გაუმჯობესება“ მხარდაჭერითა და ორგანიზებით აღსრულების სისტემის ტრენერებმა წარმატებით გაიარეს ზრდასრულთა სწავლების მეთოდოლოგიის გაღრმავების კურსი. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა (IDFI) სახალხო დამცველის კონსტიტუციურ სარჩელთან დაკავშირებით სასამართლოს მეგობრის მოსაზრება წარადგინა. „სახალხო დამცველის 2019 წლის 11 ნოემბრის N1459 კონსტიტუციური სარჩელი სადავოდ ხდის „საერთო სასამართლოების შესახებ“ ორგანული კანონის ნორმებს, რომლებიც იუსტიციის უმაღლესი საბჭოს მიერ უზენაესი სასამართლოს მოსამართლის თანამდებობაზე ასარჩევად პარლამენტისათვის წარსადგენი კანდიდატების შერჩევას არეგულირებს. სახალხო დამცველი მიიჩნევს, რომ მოქმედი წესი ეწინააღმდეგება კონსტიტუციით გარანტირებულ საჯარო თანამდებობის დაკავების უფლებასა და სამართლიანი სასამართლოს უფლებას“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს ბლოგპოსტს: როგორ ასრულებს საქართველო ევროპული სასამართლოს გადაწყვეტილებებს. „დღემდე ევროპული სასამართლოს მიერ საქართველოს წინააღმდეგ 129 საქმეზე გამოტანილი გადაწყვეტილება და განჩინება გადაეგზავნა მინისტრთა კომიტეტს ზედამხედველობის განსახორციელებლად. ბოლო 14 წლის განმავლობაში მინისტრთა კომიტეტმა 129 საქმიდან 81 საქმეზე დახურა ზედამხედველობა, რადგან აღსრულებულად ჩათვალა. ხოლო 48 საქმეზე მინისტრთა კომიტეტში აღსრულების პროცესი გრძელდება. შესაბამისად, საქართველოს მიერ დღემდე აღსასრულებელია სასამართლოს მიერ 48 საქმეზე მიღებული გადაწყვეტილება/განჩინება“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს დემოკრატიული ინიციატივის ინფორმაციით, 6 თებერვალს, საქართველოს სახალხო დამცველმა, საქართველოს სასაზღვრო პოლიციის უფროსს, მანუჩარ მუმლაძის საქმეზე რეკომენდაციით მიმართა. „სახალხო დამცველი მიიჩნევს, რომ მანუჩარ მუმლაძის როტაციის შესახებ გადაწყვეტილება არღვევს ადმინისტრაციულ კანონმდებლობას, არ არის არგუმენტირებული და მოკლებულია გონივრულ დასაბუთებას. შესაბამისად, სახალხო დამცველი სასაზღვრო პოლიციის უფროსს, თემურ კეკელიძეს, ურჩევს, ბათილად ცნოს მ. მუმლაძის როტაციის შესახებ ბრძანება და ის აღადგინოს როტაციამდელ სამუშაო ადგილზე. სახალხო დამცველი რეკომენდაციაში მიუთითებს სასაზღვრო პოლიციის მხრიდან ადმინისტრაციული კანონმდებლობის დარღვევაზე, მ. მუმლაძის როტაციის საფუძვლების არ არსებობასა და სადავო ბრძანების გაუქმების აუცილებლობაზე. მ. მუმლაძის ინტერესებს სასამართლოში GDI იცავს. საქმეზე არსებითი განხილვის პირველი სხდომა გაიმართება 2020 წლის 05 მარტს თბილისის საქალაქო სასამართლოში”, ნათქვამია ორგანიზაციის ვებგვერდზე. სრულად... წყარო: gdi.ge

თბილისი. საქართველოს ახალგაზრდა იურისტთა ასოციაცია (საია) ეხმაურება რუსთავის საქალაქო სასამართლოს მიერ 2020 წლის 12 თებერვალს მიღებულ განაჩენს, რომლითაც ღირსების შემლახავ მოპყრობაში მხილებული მარნეულის ყოფილი მერი, თეიმურაზ აბაზოვი გამართლდა. ორგანიზაციის შეფასებით, „პროცესის მიმდინარეობის ბოლო ეტაპზე, თეიმურაზ აბაზოვს პროკურატურამ დაუსაბუთებლად და საეჭვოდ შეუმცირა წარდგენილი ბრალდება. ამასთან, საქმეში არსებული საკმარისი მტკიცებულებების მიუხედავად, სასამართლომ გამამართლებელი განაჩენი გამოიტანა, რითაც წაახალისა დამამცირებელი მოპყრობის საშიში პრაქტიკა. რუსთავის საქალაქო სასამართლომ ასევე გაამართლა ამ საქმეში ბრალდებული კიდევ 3 პირი, რომელთაც ბრალად დაზარალებულის ფიზიკური შეურაცხყოფა ედებოდათ“. სრულად... წყარო: gyla.ge

თბილისი. საქართველოს დემოკრატიული ინიციატივის ინფორმაციით, პოლიციის კანონიერი მოთხოვნის დაუმორჩილებლობისთვის ადმინისტრაციული წესით დაკავებული მარნეულელი სამოქალაქო აქტივისტი, რაშან ზიადალიევი, სასამართლომ სრულად გაამართლა. „ბოლნისის რაიონული სასამართლოს მიერ მიღებული გადაწყვეტილება მნიშვნელოვანია არა მხოლოდ სამართლებრივი, არამედ უფრო ფართო თვალსაზრისით. სხვაგვარ გადაწყვეტილებას, შესაძლოა მნიშვნელოვანი ზიანი მიეყენებინა მარნეულში კრიტიკულად განწყობილი მოქალაქეების აზრის გამოხატვის თავისუფლებისათვის. რაშან ზიადალიევის ინტერესებს სასამართლოში GDI წარმოადგენდა. აღნიშნულ საქმეზე ჩვენ გავაგრძელებთ აქტიურ სამართალწარმოებას, მათ შორის, მივმართავთ საქართველოს შსს-ს გენერალურ ინსპექციას, შეისწავლოს პოლიციელთა მხრიდან რაშან ზიადალიევის მიმართ განხორციელებული საპოლიციო ღონისძიებების კანონიერების საკითხი“, ნათქვამია ორგანიზაციის ვებგვერდზე. სრულად... წყარო: gdi.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, თბილისის სააპელაციო სასამართლოს 2020 წლის 16 იანვრის გადაწყვეტილებით „საქართველოს ეროვნულ არქივს“ (ეროვნული არქივი) კიდევ ერთხელ დაევალა იმ საჯარო ინფორმაციის გაცემა, რომელსაც „ინფორმაციის თავისუფლების განვითარების ინსტიტუტი“ (IDFI) 2018 წლის 29 ივნისიდან ითხოვს. "კერძოდ, IDFI-ის მიზანს წარმოადგენს ინფორმაციის მიღება იმის შესახებ, თუ რამდენ განმცხადებელს ეთქვა უარი ეროვნული საარქივო ფონდის დოკუმენტებთან დაშვებაზე და რა საფუძვლით. თავდაპირველად ინფორმაციის გაცემის ვალდებულება ეროვნულ არქივს თბილისის საქალაქო სასამართლომ დააკისრა. ეროვნულმა არქივმა არ გაიზიარა პირველი ინსტანციის სასამართლოს მსჯელობა და ის თბილისის სააპელაციო სასამართლოში გაასაჩივრა, თუმცა წარუმატებლად“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საქართველოს ახალაგაზრდა იურისტთა ასოციაციის (საია) ინფორმაციით, დღეს თბილისის სააპელაციო სასამართლომ მნიშვნელოვანი გადაწყვეტილება მიიღო ქალთა მიმართ ძალადობასთან ბრძოლის მიმართულებით. „სასამართლომ დაადგინა, რომ საქართველოს შინაგან საქმეთა სამინისტროს და გენერალურ პროკურატურას ეკისრებოდათ სათანადო ზომების მიღების ვალდებულება ოჯახში ძალადობის მსხვერპლის დასაცავად, რომელმაც სიცოცხლე თვითმკვლელობით დაასრულა. ქალს გარდაცვალებამდე სათანადო ორგანოებისთვის 16-ჯერ ჰქონდა დახმარებისთვის მიმართული და სახელმწიფოს უნდა სცოდნოდა, რომ მის სიცოცხლესა და ჯანმრთელობას ემუქრებოდა საფრთხე. სახელმწიფო ორგანოებს გარდაცვლილის დედის სასარგებლოდ ზიანის ანაზღაურება დაეკისრათ“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. 10 თებერვალს საქართველოს სახალხო დამცველმა საქართველოს საკონსტიტუციო სასამართლოს ნიკანორ მელიას საკონსტიტუციო სარჩელზე სასამართლოს მეგობრის მოსაზრებით მიმართა.  "სარჩელით მოთხოვნილია პარლამენტის იმ დადგენილების არაკონსტიტუციურად ცნობა, რომლითაც მას უფლებამოსილება ვადამდე შეუწყდა. თბილისის საქალაქო სასამართლოს 2019 წლის 2 დეკემბრის განაჩენით, ნიკანორ მელიას სასჯელის სახედ და ზომად განესაზღვრა ჯარიმა და თანამდებობის დაკავების უფლების ჩამორთმევა. აღნიშნული განაჩენის საფუძველზე 12 დეკემბერს მას შეუწყდა საპარლამენტო უფლებამოსილება“, ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. საზოგადოებრივი ორგანიზაციების ნაწილი ეხმაურება 2020 წლის 10 თებერვალს საქართველოს უზენაესი სასამართლოს მიერ გიგი უგულავას წინააღმდეგ გამოტანილ განაჩენს, რომლის თანახმადაც ოპოზიციური პარტიის ლიდერს საბოლოო სასჯელის სახედ სამი წლით, ორი თვითა და რვა დღით თავისუფლების აღკვეთა შეეფარდა. „მიგვაჩნია, რომ მიღებული გადაწყვეტილება არის ხელისუფლების მიერ ოპონენტების წინააღმდეგ პოლიტიკური დევნის გაგრძელება და იგი რამდენიმე თვალსაზრისით არის პრობლემური: გიგი უგულავას წინააღმდეგ წარმართული საქმე მნიშვნელოვანი დარღვევების ფონზე მიმდინარეობდა; დასავლელი პარტნიორების განცხადებების იგნორირება; ხელისუფლებამ ამ ნაბიჯით უარი თქვა ოპოზიციასთან მოლაპარაკებებზე. მოვუწოდებთ საქართველოს ხელისუფლებას, მმართველ პარტიასა და ქვეყნის არაფორმალურ მმართველს - ბიძინა ივანიშვილს, შეწყვიტონ ოპონენტებისა და განსხვავებული აზრის მქონე ადამიანების მიმართ შერჩევითი მართლმსაჯულების განხორციელება, ხელი შეუწყონ პოლიტიკური კრიზისის კონსტრუქციულ რეჟიმში გადაწყვეტასა და პარტიული ინტერესების ნაცვლად, პრიორიტეტად მოსახლეობის და ქვეყნის განვითარების ინტერესები დაისახონ“. სრულად... წყარო: transparency.ge