თბილისი. ინფორმაცის თავისუფლების განვითარების ინსტიტუტი (IDFI) აქვეყნებს საბა ბუაძის და მარიამ თუთბერიძის ბლოგპოსტს: „ქონებრივი დეკლარაციების მონიტორინგის ახალი სისტემა – IDFI-ის შეფასება". „IDFI კიდევ ერთხელ მიესალმება საქართველოს მთავრობისა და საჯარო სამსახურის ბიუროს ძალისხმევას, აღმოფხვრან თანამდებობის პირთა ქონებრივი დეკლარაციების სისტემაში არსებული ხარვეზები. ქონებრივი მდგომარეობის დეკლარაციის მონიტორინგის ინსტრუქცია შესაძლებლობას იძლევა, თანამდებობის პირთა დეკლარაციები აღარ ატარებდეს მხოლოდ ფორმალურ ხასიათს და რეალურად მოწმდებოდეს დეკლარაციებში მოცემული მონაცემთა სისწორე. IDFI საქართველოს მთავრობას ასევე მიმართავს რეკომენდაციით, განიხილოს დამტკიცებულ ინსტრუქციაში ჩვენ მიერ გამოვლენილი ხარვეზები და მოახდინოს მათი ასახვა დადგენილების სრულად ამოქმედებამდე", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია პარლამენტს საკანონმდებლო წინადადებით მიმართავს, რომლის მიზანია სისხლის სამართლის საპროცესო კოდექსში დაზარალებულის უფლებებისა და ინტერესების დაცვის გარანტიების გაზრდა. „საკანონმდებლო წინადადებით, დაზარალებულს ენიჭება უფლება სასამართლოში გაასაჩივროს ზემდგომი პროკურორის მიერ მიღებული შემდეგი გადაწყვეტილებები: დაზარალებულად ცნობაზე უარის თქმის, დაზარალებულად ცნობის შესახებ დადგენილების გაუქმების, გამოძიების ან სისხლის სამართლის დევნის შეწყვეტის თაობაზე, ყველა ტიპის დანაშაულის შემთხვევაში. არსებული რეგულირებით, დაზარალებულს სასამართლოსადმი მიმართვის უფლება მხოლოდ განსაკუთრებით მძიმე დანაშაულის არსებობისას გააჩნია. საია მიიჩნევს, რომ პროკურორის მიერ მიღებული გადაწყვეტილებები ნაკლებად მძიმე და მძიმე დანაშაულის შემთხვევაში არ უნდა დარჩეს სასამართლო კონტროლის მიღმა და დაზარალებულს უნდა მიენიჭოს სასამართლოსთვის მიმართვის უფლება", ნათქვამია ორგანიზაციის ვებ-გვერდი. სრულად... წყარო: gyla.ge

თბილისი. პარტნიორობა ადამიანის უფლებებისთვის - PHR გრემის სათემო სახლის მომსახურების მიმღებ პირებს სამართლებრივ დახმარებას გაუწევენ. „შეხვედრაზე PHR-ის იურისტები გრემის სათემო სახლის მომსახურების მიმღებ 23 პირს ინდივიდუალურად გაესაუბრნენ, რათა მათთან შეთანხმებითა და მათი საჭიროებების გათვალისწინებით მომხდარიყო მხარდაჭერის სფეროების განსაზღვრა. ასევე, შეხვედრის ფარგლებში, იურისტებმა სათემო სახლში მცხოვრებ ადამიანებს თავიანთი უფლებების შესახებ მიაწოდეს ინფორმაცია", ნათქვამია ორგანიზაციის ვებ-გვერდზე. სრულად... წყარო: phrgeorgia.wordpress.com

თბილისი. 24 ნოემბერს, საქართველოს ახალგაზრდა იურისტთა ასოციაციამ საჩივრით მიმართა ადამიანის უფლებათა ევროპულ სასამართლოს, 2011 წლის 26 მაისის საპროტესტო აქციის მონაწილე ოთხი პირის სახელით. 2017 წლის 7 მარტს ევროპულმა სასამართლომ ამ საქმეზე განჩინება გამოიტანა. „2016 წლის 5 მაისს საქართველოს მთავრობამ, ევროპული კონვენციის 39-ე მუხლის საფუძველზე, მომჩივნებს საქმის მეგობრული მოგვარებით დასრულება შესთავაზა. საქართველოს მთავრობამ მომჩივნების მიმართ განხორციელებული არასათანადო მოპყრობის და შეკრების უფლების დარღვევის გამო კონვენციის მე-3 და მე-11 მუხლების დარღვევა აღიარა და მომჩივნებისთვის კომპენსაციის გადახდის ვალდებულება აიღო. ...საიას დახმარებით, შინაგან საქმეთა სამინისტრომ ნაწილობრივ აღიარა 2011 წლის 26 მაისს ჟურნალისტებისათვის ზიანის მიყენების ფაქტები და ზიანის ანაზღაურების ვალდებულება აიღო", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. არასამთავრობო ორგანიზაციები ეხმაურებიან სამართალდამცავების მხრიდან შესაძლო ცემისა და არაადამიანური მოპყრობის ფაქტებს. „ბოლო ორი კვირის განმავლობაში, მედიასაშუალებებით საზოგადოებისთვის ცნობილი გახდა ორი შემთხვევის შესახებ, სადაც დაკავებული პირები, ან მათი წარმომადგენლები, პირდაპირ მიუთითებენ სამართალდამცავი ორგანოების წარმომადგენლების მხრიდან ძალის გადამეტების ფაქტებზე. 2017 წლის 30 მარტს, საზოგადოებისათვის ცნობილი გახდა კიდევ ერთი ფაქტის შესახებ. კერძოდ, შოთა პაკელიანის ადვოკატებისა და ოჯახის წევრების განცხადებით, იგი პოლიციის თანამშრომლების მხრიდან არაადამიანური მოპყრობის მსხვერპლია", ნათქვამია ერთობლივ განცხადებაში. არასამთავრობო ორგანიზაციები მოუწოდებენ პროკურატურას ეფექტურად გამოიძიოს იდენტიფიცირებული ფაქტები, შინაგან საქმეთა სამინისტროს სტრატეგიის დოკუმენტის შემუშავებას სთხოვენ, პარლამენტს კი საკანონმდებლო ცვლილებების ინიცირებას. სრულად... წყარო: www.osgf.ge

თბილისი. ომბუდსმენი მიიჩნევს, რომ მიღებული საკანონმდებლო ცვლილებების თანახმად, ე.წ. ფარული მიყურადების ტექნიკური შესაძლებლობა კვლავ რჩება სახელმწიფო უსაფრთხოების სამსახურის ხელში. აღნიშნული კი ეწინააღმდეგება საქართველოს საკონსტიტუციო სასამართლოს მიერ 2016 წლის 14 აპრილს მიღებულ გადაწყვეტილებას. „სახალხო დამცველი უახლოეს დღეებში შესაბამისი კონსტიტუციური სარჩელით მიმართავს საქართველოს საკონსტიტუციო სასამართლოს და მოითხოვს ე.წ. მოსმენების მომწესრიგებელი ახალი კანონმდებლობის გამარტივებული წესით არაკონსტიტუციურად ცნობას", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. „ახალგაზრდა ადვოკატებმა" მიგრანტთა უფასო იურიდიული დახმარების პროექტი დაასრულეს. „ახალგაზრდა ადვოკატებმა" „სამშობლოში დაბრუნებულ მიგრანტთა უფასო იურიდიული დახმარების" პროექტის ფარგლებში, მოქალაქეებს არალეგალური მიგრაციის (ტრეფიკინგის) წინააღმდეგ არსებული სინამდვილე, გამოწვევები, პრევენცია და სხვა ქვეყნის მაგალითები გააცნეს. ამ მიმართულებით, ორგანიზაციამ მოამზადა შესაბამისი კვლევა და საქართველოს 6 რეგიონში ჩაატარა ცნობიერების ამაღლების საინფორმაციო კამპანია", ნათქვამია ორგანიზაციის ვებ-გვერდზე. სრულად... წყარო: barristers.ge

თბილისი. კონსტიტუციის 42-3 მუხლი აქვეყნებს ავტოსაგზაო შემთხვევების სასამართლო პრაქტიკის მიმოხილვას. „თუ სტატისტიკურ მონაცემებს გადავხედავთ, მხოლოდ იმ საქმეების რაოდენობა რომლებზედაც სისხლის სამართლებრივი დევნა დაიწყო, 2014-16 წლებში, რვაასიდან ათასამდე მერყეობს. უფრო შთამბეჭდავად გამოიყურება საქართველოს შინაგან საქმეთა სამინისტროს სტატისტიკური მონაცემები, რომლებით სამინისტროს ოფიციალურ ვებგვერდზეა განთავსებული, იგივე პერიოდში ამ დანაშაულისათვის დაწყებული გამოძიებათა რიცხვი სამი ათასს აჭარბებს თითოეული წლისათვის. რეგისტრირებული შემთხვევების დაახლოვებით ათ პროცენტი წარმოადენს ისეთ ავტოსაგზაო შემთხვევებს რომლებიც მსხვერპლით დასრულდა", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. კოალიცია ეხმიანება მოსამართლეთა შესარჩევ კონკურსს, რომელიც იუსტიციის უმაღლესმა საბჭომ, 84 ვაკანტურ თანამდებობაზე, მიმდინარე წლის 17 თებერვალს გამოაცხადა. „მიუხედავად არსებული ბუნდოვანი და არაპროგნოზირებადი საკანონმდებლო გარემოსი, საბჭო აგრძელებს მოსამართლეთა შერჩევის პროცესს და ცდილობს სასამართლო სისტემაში არსებული ვაკანსიების შევსება არსებული ხარვეზიანი წესით მოახდინოს, იქამდე, სანამ კანონში შევა ცვლილებები... კოალიცია აღწერს იმ გარემოებებს, რომლებიც მიუთითებენ მიმდინარე კონკურსის მნიშვნელოვან დარღვევებზე: კონკურსი დაჩქარებულად და ხარვეზებით მიმდინარეობს, მიმდინარე კონკურსი აჩენს ეჭვებს შესაძლო არაფორმალურ გარიგებებზე, კონკურსის პირობები წინასწარ განსაზღვრული არაა და კანდიდატებისთვის უცნობია რა ვადით და რა პროცედურით მოხდება მათი თანამდებობაზე დანიშვნა”, ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. კამპანია „ეს შენ გეხება" განცხადებას ავრცელებს. „ფარულ მოსმენა-მიყურადებასთან დაკავშირებული საკანონმდებლო პაკეტი საკონსტიტუციო სასამართლომ ერთხელ უკვე სცნო არაკონსტიტუციურად. თუმცა, საქართველოს პარლამენტმა არ გაითვალისწინა სასამართლოს შენიშვნები. შედეგად, ფარული მიყურადების ახალი კანონმდებლობა კვლავ ვერ უზრუნველყოფს პირადი ცხოვრების ხელშეუხებლობას და საქართველოს კონსტიტუცია ისევ ირღვევა. ახალი კანონმდებლობით კიდევ უფრო მატულობს პერსონალურ მონაცემთა ხელშეუხებლობის დარღვევის რისკები. ელექტრონული სარჩელის ეს ფორმა საქართველოს ყველა მოქალაქეს აძლევს შანსს - გამოიყენოს მის ხელთ არსებული სამართლებრივი მექანიზმი და გაასაჩივროს აღნიშნული კანონმდებლობა. გთხოვთ, შევსებული სარჩელი ამობეჭდოთ, ხელი მოაწეროთ და მოგვაწოდოთ 6 აპრილს, 12:00 სთ-დან 17:00 სთ-მდე, შემდეგ მისამართზე: ქ. თბილისი, ჭოველიძის 10, ფონდი „ღია საზოგადოება საქართველოს" ოფისი. ასევე, შეგიძლიათ უშუალოდ მობრძანდეთ დასახელებულ მისამართზე და ჩვენი წარმომადგენელი დაგეხმარებათ ადგილზე შეავსოთ სარჩელი. გთხოვთ, თან იქონიოთ პირადობის დამადასტურებელი მოწმობა ან პასპორტი", ნათქვამია ორგანიზაციის ვებ-გვერდზე. სრულად... წყარო: www.esshengexeba.ge

თბილისი. „საერთაშორისო გამჭვირვალობა-საქართველო” ეხმაურება 2017 წლის 10 თებერვალს თბილისის საქალაქო სასამართლოს გადაწყვეტილებას, რომლის თანახმად კომპანია „ფილიპ მორისს” სს „თბილისის თამბაქოს” სასარგებლოდ 93 მილიონ ლარამდე ანაზღაურება დაეკისრა. ორგანიზაცია მიიჩნევს, რომ „სასამართლოს გადაწყვეტილება... კითხვებს ბადებს". სრულად... წყარო: transparency.ge

23 მარტს, ხელვაჩაურის რაიონულმა სასამართლომ ზურაბ შარაბიძის სარჩელი სრულად დააკმაყოფილა. „ჩვენი ბათუმის ოფისის იურისტების ანა ბერძენიშვილის და ნინო სიორიძის დახმარებით, ზურაბ შარაბიძე ხელვაჩაურის მუნიციპალიტეტის გამგეობაში ინფრასტრუქტურის, არქიტექტურისა და ზედამხედველობის სამსახურის, მშენებლობისა და ინფრასტრუქტურის განვითარების განყოფილების მთავარი სპეციალისტის თანამდებობაზე აღდგება. ასევე, იძულებით განაცდურის სახით სამუშაო თვეების შრომით ანაზღაურებასაც 4480 ლარს (მათ შორის პრემიას) მიიღებს", ნათქვამია ორგანიზაციის ვებ-გვერდზე. თუ თვლით, რომ საჯარო სამსახურში კონკურსებისას დაირღვა თქვენი უფლებები ან უკანონოდ გაგათავისუფლეს, მოგვმართეთ ორგანიზაციას უფასო იურიდიული დახმარებისთვის. სრულად... წყარო: ორგანიზაციის ვებ-გვერდი სოციალურ ქსელში

თბილისი. 27 მარტს, საქართველოს ახალგაზრდა იურისტთა ასოციაციამ თბილისის, ქუთაისის, ბათუმის, გორისა და თელავის სასამართლოების სისხლის სამართლის საქმეების მონიტორინგის შედეგების პრეზენტაცია გამართა: „ოჯახში ძალადობა, ოჯახური დანაშაული და ქალთა მიმართ ძალადობა." „ანგარიშში, კონკრეტულ მაგალითებზე დაყრდნობით, საუბარია მამაკაცის მიერ ქალის ცემის, ფეხმძიმე ცოლის მიმართ განხორციელებული ძალადობის, ბენზინის გამოყენებით ქალის დაწვის, სერიოზული ფსიქოლოგიური ძალადობის, მოკვლის მუქარისა და ოჯახის ფარგლებში ძალადობის განხორციელების სხვა შემთხვევებზე", ნათქვამია ორგანიზაციის ვებ-გვერდზე. იხილეთ კვლევის მიგნებები... წყარო: www.gyla.ge

თბილისი. კონფერენციას თემაზე „აღმოსავლეთ პარტნიორობის განხორციელება და ასოცირების ვალდებულებები ანტიდისკრიმინაციული პოლიტიკის, მართლმსაჯულებისა და კორუფციასთან ბრძოლის სფეროში" კავშირი „საფარი" დაესწრო. მისმა ხელმძღვანელმა ბაია პატარაიამ ისაუბრა საქართველოში დისკრიმინაციასთან დაკავშირებულ საკითხებზე. „მან მიმოიხილა საქართველოში დისკრიმინაციასთან ბრძოლის საკანონმდებლო მექანიზმები და კანონის აღსრულებასთან დაკავშირებული პრობლემები. კერძოდ, პრეზენტაციაში ხაზგასმული იყო ანტი-დისკრიმინაციულ კანონში სექსუალური შევიწროვების არარსებობა, სასამართლოსადმი მიმართვის ვადის გაზრდის აუცილებლობა, სახალხო დამცველის რეკომენდაციების აღსრულების არასავალდებულოობა და სხვა პრობლემები. მათ შორის, კონკრეტულ გამოწვევებში მოხსენიებული იყო სიძულვილის ენა, სიძულვილის დანაშაულები და ლგბტ ადამიანებისათვის შეკრების თავისუფლების უზრუნველყოფასთან დაკავშირებული გამოწვევები", ნათქვამია ორგანიზაციის ვებ-გვერდზე. სრულად... წყარო: sapari.ge

თბილისი. საქართველოს ახალგაზრდა იურისტთა ასოციაციამ (საია) მოიპოვა დოკუმენტები, რომელზე დაყრდნობითაც, 2017 წლის 20 თებერვალს, თბილისის საკრებულოს უმრავლესობის წარმომადგენელი, საიას კვლევაში მოყვანილი ფაქტების უსამართლობაზე საუბრობდა. „მოპოვებული დოკუმენტიდან, ერთი სოფიო ქათამაძესა და შპს „ფროფერთი მენეჯენტს" შორის 2015 წლის 3 ივნისს გაფორმებული მემორანდუმია, მეორე „ფროფერთი მენეჯმენტის" 2015 წლის 29 ივნისის წერილი, ხოლო მესამე საქართველოს ბანკის მიერ 2015 წლის 21 ოქტომბერს საჯარო რეესტრისათვის გაგზავნილი წერილი. ... ზემოთ მოყვანილი ფაქტები მოწმობს, რომ საიას მიერ მომზადებული კვლევაში ასახული ინფორმაცია და დასკვნები არათუ უსამართლოა, არამედ კიდევ უფრო გამყარებულია ჩვენს მიერ მოპოვებული დოკუმენტებით. შესაბამისად, ეს დოკუმენტები ხაზს უსვამს საქმეზე გამოძიების წარმოების საჭიროებას. საია მოუწოდებს თბილისის საკრებულოს და მერიას, რომ პროაქტიულად თავად გამოაქვეყნონ ყველა ის დოკუმენტი, რომელიც ზვიად ნაზღაიძის საქმესთან არის დაკავშირებული და საზოგადებისათვის ამ დრომდე უცნობი რჩება", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციამ (საია) 2011 და 2012 წლებში მოამზადა და გამოაქვეყნა კვლევა „სავარაუდო პოლიტიკური მოტივაციის მქონე სისხლის სამართლის და ადმინისტრაციულ სამართალდარღვევათა საქმეები". „კვლევაში განხილულმა საქმეების სამართლებრივმა ანალიზმა გამოავლინა სერიოზული ხარვეზები სისხლის სამართლის მართლმსაჯულების განხორციელებისას ზემოაღნიშნულ პირთა მიმართ, რომლებიც ხელისუფლების შესაძლო ოპონენტებად შეიძლება ჩაითვალონ. წინამდებარე საქმეებში: ტლაშაძე და კაკაშვილი საქართველოს წინააღმდეგ, კალანდია საქართველოს წინააღმდეგ და შუბითიძე საქართველოს წინააღმდეგ გამოვლენილი დარღვევები იდენტურია 2011 და 2012 წლების საიას კვლევაში გაანალიზებული საქმეებისა. ევროპულმა სასამართლომ ზემოაღნიშნული არგუმენტაცია საქართველოს მთავრობას გადაუგზავნა და საიას პოზიციაზე დამატებითი მოსაზრებების წარსადგენად ვადა 2017 წლის 7 აპრილამდე განუსაზღვრა. აღნიშნული პერიოდის შემდგომ ევროპული სასამართლო მიიღებს გადაწყვეტილებას საიას საჩივრებზე", ნათქვამია საიას ვებ-გვერდზე. სრულად... წყარო: gyla.ge

თბილისი. 17 მარტს, საერთაშორისო სამართლის სტუდენტთა ასოციაცია საქართველოს (ილსა-საქართველო) პირველი სტუდენტური სამეცნიერო კონფერენცია თემაზე „თანამედროვე გამოწვევები საერთაშორისო სისხლისა და ადამიანის უფლებათა საერთაშორისო სამართალში". „კონფერენცია გაიმართა ილსა-საქართველოს (ILSA Georgia) ორგანიზებითა და თბილისის სახელმწიფო უნივერსიტეტის საერთაშორისო სამართლის ინსტიტუტთან, საქართველოს იუსტიციის სამინისტროსთან და საქართველოს საგარეო საქმეთა სამინისტროსთან თანამშრომლობით. გამარჯვებულებს და მონაწილეებს, ილსა-საქართველოს (ILSA Georgia) სახელით, გადაეცათ შესაბამისი ინგლისურენოვანი სერთიფიკატები და წამახალისებელი პრიზები. გარდა ამისა, საქართველოს საგარეო საქმეთა სამინისტროს საერთაშორისო სამართლებრივი დეპარტამენტის დირექტორმა და თსუ საერთაშორისო სამართლის პროფესორმა, ქალბატონმა ირინე ბართაიამ, საგარეო საქმეთა სამინისტროს სახელით, კონფერენციის გამარჯვებულები დააჯილდოვა საგარეო საქმეთა სამინისტროში პრაქტიკის გავლით, ხოლო ომარ მთივლიშვილი, ანა თაბაგარი და თამარ ონიანი - სსიპ ლევან მიქელაძის სახელობის დიპლომატიური სასწავლო ცენტრის უფასო კურსებით. ასევე, იუსტიციის სამინისტრომ კონფერენციის „საუკეთესო სპიკერის" ნომინაციაში გამარჯვებულად დაასახელა ბუბა ბაღდავაძე”, ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

თბილისი. დღეს, საქართველოს ახალგაზრდა იურისტთა ასოციაციამ, კვლევის - „28-ჯერ უფრო ძვირად ჩამორთმეული ქონება" პრეზენტაცია გამართა. „კვლევა, თბილისის მუნიციპალიტეტის მიერ - ზვიად ნაზღაიძისათვის გადაუდებელი საზოგადოებრივი საჭიროების სახელით ჩამორთმეული და პირდაპირი მიყიდვის ფორმით, სიმბოლურ ფასად გადაცემული ქონების სამართლებრივ მხარეს ეხება. საიას მნიშვნელოვნად მიაჩნია, რომ სამართალდამცავი ორგანოები, ზვიად ნაზღაიძისათვის ქონების ჩამორთმევისა და პირდაპირი მიყიდვის ფორმით, სიმბოლურ ფასად გადაცემული ქონების კანონთან შესაბამისობის საკითხით დაინტერესდნენ, რადგანაც, შესაძლოა ეს ფაქტი, მუნიციპალიტეტის შესაბამისი საჯარო მოხელეების მხრიდან, დანაშაულის ნიშნებს შეიცავდეს", ნათქვამია ორგანიზაციის ვებ-გვერდზე. სრულად... წყარო: gyla.ge

აჭარა. „საერთაშორისო გამჭვირვალობა - საქართველოს" ბათუმის ოფისის წარმომადგენლები, ქედის მუნიციპალიტეტის სოფელ ზვარეში მცხოვრებ ფერმერებს შეხვდნენ. „15 ფერმერი, წლებია, თევზის რეწვას ეწევა, პროცესში დასაქმებულები არიან სოფლის სხვა მკვიდრებიც, თუმცა ამ დრომდე ვერ ახერხებენ იმ ტერიტორიების საკუთრებაში დარეგისტრირებას, სადაც საკალმახე მეურნეობები აქვთ გაშენებული. შესაბამისად, შეზღუდულები არიან, მოიზიდონ ინვესტიციები, გააფართოვონ წარმოება და დაასაქმონ მეტი ადამიანი... „საერთაშორისო გამჭვირვალობა - საქართველოს" უფასო სამართლებრივი დახმარების ცენტრის იურისტები გაეცნენ მოქალაქეებსა და სახელმწიფო უწყებებს შორის წარმოებულ კორესპონდენციას - ორგანიზაცია აქტიურად დაიწყებს ადვოკატირებას მიწის რეგისტრაციასთან დაკავშირებული პრობლემების მოქალაქეთა საკეთილდღეოდ გადასაწყვეტად", ნათქვამია ორგანიზაიცის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. საქართველოს პარლამენტი სტამბულის კონვენციის რატიფიცირებას აპირებს. საია მიესალმება სახელმწიფოს მზაობას დახვეწოს შიდა კანონმდებლობა და ამ გზით გააუმჯობესოს ქალთა უფლებრივი მდგომარეობა საქართველოში. „შემუშავებული ცვლილებები, ნამდვილად წარმოადგენს წინ გადადგმულ ნაბიჯს, თუმცა სრულად არ მოიცავს კონვენციით გათვალისწინებულ მთელ რიგ მნიშვნელოვან საკითხებს. საია განსაკუთრებული გულისხმიერებით ეკიდება ნებისმიერ წამოწყებას ქალთა უფლებრივი მდგომარეობის გაუმჯობესების კუთხით. სწორედ ამიტომ, რატიფიცირების პროცესის წარმატებისთვის საია-მ საკუთარი მოსაზრებები საქართველოს პარლამენტს წარუდგინა", ნათქვამია ორგანიზაციის ვებ-გვერდზე. სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტი 2016 წლის ივლისიდან ახორციელებს პროექტს - სასამართლო გადაწყვეტილებათა ხელმისაწვდომობის გაზრდა საქართველოში. „პროექტის განხორციელების პროცესში აქტიურად არის ჩართული საერთაშორისო ექსპერტი, სამართლისა და დემოკრატიის ცენტრის (კანადა) აღმასრულებელი დირექტორი ტობი მენდელი. მიმდინარე წლის 24 იანვარს IDFI-ის მიერ ორგანიზებულ საჯარო განხილვაზე მან საზოგადოებას წარუდგინა საკუთარი რეკომენდაციები საქართველოში სასამართლო გადაწყვეტილებთა ხელმისაწვდომობის გაუმჯობესების მიზნით. ამჯერად გთავაზობთ, ბატონი მენდელის აკადემიურ ნაშრომს, რომელიც მიმოიხილავს ინფორმაციის თავისუფლებასა და პირადი ცხოვრების ხელშეუხებლობას შორის ბალანსის დაცვის მექანიზმებს. ნაშრომს, საფუძვლად უდევს სასამართლო გადაწყვტილებათა ხელმისაწვდომობის მხრივ საქართველოში არსებული გამოწვევები, რაც IDFI-ის საქმიანობის შედეგად აქტიური საერთაშორისო განხილვების საგანი გახდა. არსებული გამოწვევების საპასუხოდ კვლევა გვთავაზობს ადამიანის უფლებათა ევროპული სასამართლოს გამოცდილების სიღრმისეულ მიმოხილვას", ნათქვამია ორგანიზაციის ვებ-გვერდზე. სრულად... წყარო: idfi.ge

თბილისი. გიორგი პაპუაშვილთან მოქალაქე როლანდ ბლადაძის ჩამორთმეულ, სადავო ქონებაზე მხარის სააპელაციო საჩივარი არ დაკმაყოფილდა. „თბილისის სააპელაციო სასამართლოს მიერ მიღებული განჩინება საქართველოს უზენაესს სასამართლოში გასაჩივრდება. ამასთან, როლანდ ბლადაძის წარმომადგენელმა უკვე გააკეთა განცხადება საქმის ევროსასამართლოში გაგზავნის თაობაზეც", ნათქვამია ორგანიზაციის ვებ-გვერდზე. სრულად... წყარო: barristers.ge