CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი...

თბილისი. „კოალიცია დამოუკიდებელი და გამჭვირვალე მართლმსაჯულებისათვის“ ეხმიანება საქართველოს პარლამენტის მიერ სახელმწიფო ინსპექტორის სამსახურის საგამოძიებო უფლებამოსილების ამოქმედების კიდევ ერთხელ გადავადებას, ამჯერად - 2019 წლის 1 ნოემბრამდე. „კოალიცია საგანგაშოდ აფასებს, საქართველოს მთავრობის მიერ კანონმდებლობის მოთხოვნებისა და საერთაშორისო ვალდებულებების შეუსრულებლობას, რაც გახდა დამოუკიდებელი საგამოძიებო მექანიზმის ამოქმედების მეოთხედ გადავადების საფუძველი. ამასთანავე, დროულად ამოქმედების მოთხოვნასთან ერთად, საზოგადოებას, საქართველოს აღმასრულებელ და საკანონმდებლო ხელისუფლებას კიდევ ერთხელ ვახსენებთ იმ ხარვეზებს, რომელიც არსებობს სახელმწიფო ინსპექტორის კანონმდებლობით გათვალისწინებულ მოდელში“, - ვკითხულობთ დღეს გავრცელებულ განცხადებაში. სრულად  წყარო: https://www.gdi.ge

თბილისი. „კონსტიტუციის 42-ე მუხლი“ საქართველოს უზენაესი სასამართლოს მოსამართლეთა ვაკანსიაზე მიმდინარე კონკურსს ეხმიანება და მიაჩნია, რომ კონკურსის მიმდინარეობისას გამოვლენილი ხარვეზები, მთელი პროცესის ლეგიტიმურობას კითხვის ნიშნის ქვეშ აყენებს.  შესაბამისად, - „კონსტიტუციის 42-ე მუხლი მოუწოდებს: საქართველოს პარლამენტს - ინიცირება გაუკეთოს და განიხილოს სასამართლოში კლანური მმართველობის შესახებ რეზოლუციის პროექტი, რომელიც პარლამენტში შეტანილი იქნა 2019 წლის 4 ივნისს; უმოკლეს ვადებში განიხილოს და გადაწყვიტოს იუსტიციის უმაღლესი საბჭოს წევრის ზაზა ხარებავას უფლებამოსილების შეწყვეტის საკითხი; იურიდიულ საკითხთა კომიტეტის სამუშაო ჯგუფში უზრუნველყოს „კოალიცია დამოუკიდებელი და გამჭვირვალე მართლმსაჯულებისათვის“ წარმომადგენელთა მონაწილეობა; საქართველოს იუსტიციის უმაღლეს საბჭოს - დროულად განიხილოს და გადაწყვიტოს კონკურსის მიმდინარეობისას იუსტიციის უმაღლესი საბჭოს წევრის თამარ ონიანის აცილების საკითხი; - უზრუნველყოს კანდიდატთა მონაცემების საჯაროობა“.  სრულად  წყარო: ორგანიზაციის ვებგვერდი

თბილისი. „სამართლიანი არჩევნებისა და დემოკრატიის საერთაშორისო საზოგადოება“ (ISFED) აქვეყნებს შოთა ნარსიას ბლოგს, რომელიც, რუსთაველის გამზირზე მიმდინარე აქციების წინააღმდეგ, facbook-ზე წარმართულ კამპანიას მიმოიხილავს. „20-21 ივნისის ღამის მოვლენების შემდეგ აგორებული საპროტესტო აქციების წინააღმდეგ „ფეისბუქზე“ დისკრედიტაციის დასპონსორებული კამპანია აქტიურად მიმდინარეობს. აღნიშნულ კამპანიაში ის გვერდები ჩაერთვნენ, რომლებიც 2018 წლის საპრეზიდენტო არჩევნებისთვის ოპოზიციური კანდიდატებისა და პარტიების წინააღმდეგ მოქმედებდნენ. აგრეთვე, მოცემული გვერდები აქტიურად ეწეოდნენ მიმდინარე წლის ივნისში მთაწმინდის შუალედური არჩევნების მეორე ტურის წინ ოპოზიციური კანდიდატის, შალვა შავგულიძის, დისკრედიტაციას. დისკრედიტაციის კამპანიისათვის გამოიყენება ახალშექმნილი გვერდებიც. მადისკრედიტირებელი კამპანია წარიმართა ცრუ მედიის გვერდებზეც. აღსანიშნავია, რომ კიდევ ერთხელ გამოჩნდა მოჩვენებითად მხარდამჭერი, ყალბი გვერდების შექმნისა და ცრუ მხარდამჭერი პოსტების დასპონსორების ტაქტიკის გამოყენების შემთხვევაც. ამასთან, აქციების საწინააღმდეგო კამპანია აქტიურად წარიმართება დეზინფორმაციულ და პროპაგანდისტულ, ულტრამემარჯვენე ნარატივის გვერდებზე“, - ვკითხულობთ ბლოგში.  სრულად  წყარო: ორგანიზაციის ვებგვერდი

სამეგრელო. კამპანიის #ძალაევროპაშია ფარგლებში, 26 ივნისს, „საერთაშორისო გამჭვირვალობა-საქართველოს“ ორგანიზებით, ფოთის ცენტრალურ ბიბლიოთეკაში მოეწყო გამოფენა „ფოთი - ევროპული კარიბჭე“. „გამოფენაზე წარმოდგენილი იყო საბჭოთა პერიოდში სამეგრელოში მოღვაწე ცნობილ პირთა საინტერესო ფოტო მასალა, მათი ბიოგრაფიული მონაცემები“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. „ადამიანის უფლებების სწავლებისა და მონიტორინგის ცენტრი“ (EMC) აქვეყნებს სოფო ვერძეულის თვალსზრისს 20 ივნისს განვითარებულ მოვლენებთან დაკავშირებით.  „პოლიტიკური პასუხისმგებლობის საფუძველი, რა თქმა უნდა, არის სისტემური ხასიათის ჩავარდნა და არა ინდივიდუალური გადაცდომა, რომელიც თავისი ხარისხით და ბუნებით პრობლემის სისტემურობას ვერ აჩვენებს”, - ამბობს სოფო, - „როდესაც სისტემური ხასიათის ჩავარდნა (შეცდომა, გადაცდომა, დანაშაული) ხდება, ეს ლეგიტიმაციას უკარგავს არა ერთეულ თანამშრომლებს, არამედ მთელ უწყებას. ლოგიკურია, რომ პოლიტიკური პასუხისმგებლობის საკითხი დგება მაშინ, როცა მხოლოდ ერთეულების სამართლებრივი პასუხისმგებლობა, როგორი მძიმეც არ უნდა იყოს ის, საკმარისი აღარ არის ინსტიტუტისთვის ლეგიტიმაციის დასაბრუნებლად“.  სრულად წყარო: ორგანიზაციის ვებგვერდი

თბილისი. საქართველოს სტრატეგიული კვლევებისა და განვითარების ცენტრის ორგანიზებით გაიმართა ფორუმი "საჯარო პოლიტიკა კორპორაციული სოციალური პასუხისმგებლობის მხარდასაჭერად". ფორუმში მონაწილეობა მიიღეს ქართული ბიზნესის, სახელმწიფოს, დონორი და სამოქალაქო ორგანიზაციების წარმომადგენლებმა. ფორუმის სპიკერებმა დამსწრე საზოგადოებას გაუზიარეს დასავლეთ ქვეყნების გამოცდილება და ესაუბრნენ იმ საჯარო პოლიტიკის ინსტრუმენტებზე, რომელიც ხელს შეუწყობს CSR-ის განვითარებას. ფორუმი გაიმართა პროექტის „სამოქალაქო საზოგადოების განვითარების ინიციატივა“ ფარგლებში, რომელიც დაფინანსებულია ევროკავშირის მიერ, ხოლო თანადამფინანსებელია კონრად ადენაუერის ფონდი.

თბილისი. სახალხო დამცველი უზენაესი სასამართლოს მოსამართლეების შერჩევის მიმდინარე პროცესს ეხმიანება და განცხადებას ავრცელებს.  „როგორც საზოგადოებისათვის არის ცნობილი, საერთაშორისო და ადგილობრივ არასამთავრობო ორგანიზაციებთან ერთად, სახალხო დამცველი დამოუკიდებლად აკვირდება უზენაესი სასამართლოს მოსამართლეების შერჩევის პროცესს“, - აღნიშნავს სახალხო დამცველი, - „იუსტიციის უმაღლეს საბჭოში გამართული პირველი ფარული კენჭისყრა და მასზე დაკვირვების შედეგები ავლენს იმ პრობლემებსა და ხარვეზებს, რაც აღნიშნულ პროცესს ახლავს თან და საფრთხეს უქმნის მის მაღალი სტანდარტებით წარმართვას“.  სრულად  წყარო: ორგანიზაციის ვებგვერდი

სამეგრელო. ხაბუმეს თემის ქალთა საინიციატივო ჯგუფმა „ერთობა”, სოფელში კულტურულ-საგანმანათლებლო სივრცე მოაწყო. პროექტის მთლიანი ბიუჯეტი იყო 16 457 ლარი, საიდანაც ჩვენს მიერ გაცემული საგრანტო თანხა შეადგენდა 7 757 ლარს. აღნიშნული პროექტი დაფინანსდა, საქართველოს სტრატეგიული კვლევების და განვითარების ცენტრის (СSRDG) თემის განვითარების პროგრამის ფარგლებში. სრულად... წყარო: ორგანიზაციის გვერდი სოციალურ ქსელში

თბილისი. ამ წუთებში, სასტუმრო „ჰოლიდეი ინნში“ მიმდინარეობს ფორუმი - „სამოქალაქო მონაწილეობა“, რომელსაც ესწრება საზოგადოებრივი ორგანიზაციების, სტუდენტების, თვითმმართველობების, სამოქალაქო აქტივისტების 80-მდე წარმომადგენელი, საქართველოს სხვადასხვა რეგიონიდან.  ფორუმის ძირითად მიზანს წარმოადგენს დაინტერესებული პირებისთვის სამოქალაქო მონაწილეობის კუთხით არსებული ცოდნისა და გამოცდილების გაზიარება, თანამედროვე მიდგომებისა და ტენდენციების გაცნობა, დიალოგისა და დისკუსიის სივრცის შექმნა, რაც მათი შესაძლებლობების გაძლიერებასა და ურთიერთთანამშრომლობას შეუწყობს ხელს. ფორუმი - „სამოქალაქო მონაწილეობა“ იმართება „სამოქალაქო საზოგადოების ინსტიტუტის“ (CSI) ორგანიზებით, ევროკავშირის მიერ დაფინანსებული პროექტის - „საზოგადოებრივი ორგანიზაციების გაძლიერება საჯარო სექტორის მონიტორინგისა და პოლიტიკის დიალოგში გასააქტიურებლად“ - ფარგლებში.

„თავისუფალ ჟურნალისტთა სახლის“ ოფისში გაიმართა დისკუსია თემაზე: პროტესტი და გამოხატვის თავისუფლება. „შეხვედრას უძღვებოდა მალხაზ ჭკადუა - „საერთაშორისო გამჭირვალობა საქართველოს“ რეგიონალური ოფისების მენეჯერი. შეხვედრაზე მონაწილეებმა მიიღეს ინფორმაცია პროტესტის, როგორც რაიმე მოვლენის მიმართ უარყოფითი დამოკიდებულების გამოხატვის ფორმაზე. როგორ შეიძლება წარმოიშვას ის საზოგადოებაში და რატომ არის მნიშვნელოვანი გამოხატვის თავისუფლება“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

საზოგადოებრივი ორგანიზაციები ევროპის საბჭოს საპარლამენტო ასამბლეას და მინისტრთა კომიტეტს მოუწოდებენ გამოიჩინონ ერთსულოვნება და დაიცვან ის ღირებულებები, რომლებსაც საბჭო დაფუძნების დღიდან ეყრდნობა. სსო-ები საბჭოს მოუწოდებენ, არ გაუუქმოს რუსეთს სანქციები, მანამ სანამ იმ პირობებს არ დააკმაყოფილებს, რის გამოც შეზღუდვები დაუწესდა. სრულად... წყარო: emc.org.ge

საქართველოს სტრატეგიული კვლევებისა და განვითარების ცენტრის ორგანიზებით, 17-22 ივნისს, პოლონეთსა და გერმანიაში გაიმართა სემინარი, რომელშიც მონაწილეობა საქართველოს პარლამენტის, ფინანსთა და ეკონომიკის სამინისტროს, კერძო და სამოქალაქო სექტორის წარმომადგენლებმა მიიღეს.  სემინარი მიზნად ისახავდა დივერსიფიცირებული დაფინანსების მეშვეობით საზოგადოებრივი ორგანიზაციების ფინანსური მდგრადობის გაზრდას და ამ ქვეყნებში ფილანტროპული და საქველმოქმედო საქმიანობის გაცნობას.  სემინარი ჩატარდა პროექტის „სამოქალაქო საზოგადოების განვითარების ინიციატივა" – ფარგლებში, რომელიც დაფინანსებულია ევროკავშირის მიერ, ხოლო თანადამფინანსებელია კონრად ადენაუერის ფონდი (KAS).

თბილისი. 24 ივნისს გაიმართა ელექტრონული რესურსის „სამოქალაქო განათლება ყველასთვის“ (www.civiceducation.ge) 2018-2019 სასწავლო წლის ონლაინ ოლიმპიადის გამარჯვებული მოსწავლეების დაჯილდოება. „ონლაინ ოლიმპიადის გამარჯვებული გახდა  ხარაგაულის მუნიციპალიტეტის სოფელ ვახანის საჯარო სკოლის XII კლასის მოსწავლე ნინო მაღრაძე, მეორე ადგილზე გავიდა ჟიული შარტავას სახელობის რუსთავის #4 საჯარო სკოლის XII კლასის მოსწავლე მარიამ ქემაშვილი, მესამე ადგილზე კი  ოზურგეთის მუნიციპალიტეტის დაბა ლაითურის საჯარო სკოლის XII კლასის მოსწავლე ანი თუთისანი. გამარჯვებული სამეული საქართველოში ნიდერლანდების სამეფოს საელჩოს წარმომადგენელმა დააჯილდოვა და მათ სიგელებთან ერთად პერსონალური კომპიუტერები გადასცა”, ნათქვამია ორგანიზაციის ვებგვერდზე. სრულად... წყარო: gdi.ge

თბილისი. საზოგადოებრივი ორგანიზაციების მმართველი პარტიის ინიციატივას ეხმაურებიან და დარჩენილი მოთხოვნების შესრულებისკენ მოუწოდებენ. „მნიშვნელოვნად ვაფასებთ პარლამენტის თავმჯდომარის გადადგომას, რომლის  ქმედებებმა/უმოქმედებამ დიდწილად გამოიწვია საზოგადოების პროტესტი. ამასთანავე, გავრცელდა ინფორმაცია ირაკლი კობახიძის საკონსტიტუციო სასამართლოში შესაძლო ნომინირების შესახებ, რაც დადასტურების შემთხვევაში, საზოგადოების სამართლიანი პროტესტის უგულვებელყოფა იქნება.    ასევე, მივესალმებით მმართველი გუნდის გადაწყვეტილებას მომდევნო საპარლამენტო არჩევნები ჩატარდეს სრულად პროპორციულ საარჩევნო სისტემით. პროპორციული სისტემა ე.წ. ბუნებრივი ბარიერით (0.67%) ყველაზე უკეთ უზრუნველყოფს ამომრჩეველთა ნების საპარლამენტო მანდატებში გარდასახვას და პოლიტიკურ მრავალფეროვნებას. თუმცა, აქვე უნდა აღინიშნოს, რომ ასეთი დაბალი ბარიერი, როგორც წესი, ართულებს საპარლამენტო უმრავლესობისა და მთავრობის ფორმირებას და ზრდის პოლიტიკური პარტიების ფრაგმენტაციის რისკს. საზოგადოებას აქვე შევახსენებთ ვენეციის კომისიის რეკომენდაციას, რომ პროპორციულ სისტემებში სასურველია შემოღებულ იქნეს 3-5%-იანი ბარიერი“, ნათქვამია ერთობლივ განცხადებაში. სრულად... წყარო: www.transparency.ge

თბილისი. საქართველოში ევროკავშირის ელჩმა, კარლ ჰარცელმა, ევროკავშირის ქვეყნების ელჩების შეხვედრის შემდეგ, ქვეყანაში მიმდინარე მოვლენებთან დაკავშირებით, მედიისთვის კომენტარი გააკეთა. „ბოლო დღეების მოვლენებმა დაგვანახა, რომ დიალოგი, კონსულტაცია და კომპრომისი აუცილებელია საქართველოს საზოგადოების წინაშე არსებული გამოწვევების მოსაგვარებლად“, - განაცხადა ელჩმა, - „ამ კონტექსტის გათვალისწინებით, მივესალმებით ქართული ოცნების ხელმძღვანელობის დღევანდელ განცხადებას საკონსტიტუციო ცვლილებების ინიცირების შესახებ, რომლებიც 2020 წლის არჩევნების სრულად პროპორციული სისტემით ჩატარებას ითვალისწინებს. ეს შესაძლებლობას მისცემს ყველა დაინტერესებულ მხარეს, შეიკრიბოს და შეთანხმდეს ისეთ სამომავლო ნაბიჯებზე, რომლებიც საქართველოში საპარლამენტო დემოკრატიას და პლურალიზმს განამტკიცებს. ველით, რომ დაიწყება ფართომასშტაბიანი საკონსულტაციო პროცესი და ყველა მხარეს მასში ჩართვისკენ მოვუწოდებთ“.  სრულად  წყარო: eeas.europa.eu

თბილისი. 27 ივნისს, სამოქალაქო საზოგადოების ინსტიტუტი (CSI) გიწვევთ სამოქალაქო მონაწილეობის ფორუმზე, რომელიც სასტუმრო ჰოლიდეი ინნ-ში გაიმართება. ფორუმის ძირითადი მიზანია სამოქალაქო მონაწილეობის კუთხით არსებული ცოდნის და გამოცდილების გაზიარება, სფეროში არსებული თანამედროვე მიდგომების და ტენდენციების გაცნობა, ასევე დიალოგის და დისკუსიის სივრცის შექმნა, რაც ხელს შეუწყობს სამოქალაქო მონაწილეობის საკითხით დაინტერესებული აქტორების შესაძლებლობების გაძლიერებას და მათ შორის თანამშრომლობის სტიმულირებას. არაერთი კვლევით დასტურდება, რომ საქართველოს მოსახლეობას დემოკრატიული პროცესების განვითარებისთვის სამოქალაქო მონაწილეობა მნიშვნელოვნად მიაჩნია. თუმცა საინტერესოა, როგორია სამოქალაქო მონაწილეობის პრაქტიკა საქართველოში? როგორ და რა ხარისხით არიან ჩართულები საქართველოს მოქალაქეები გადაწყვეტილების მიღების პროცესში? რა წარმატებული მაგალითები არსებობს ამ კუთხით და რა არის ის გამოწვევები, რომელიც მონაწილეობით პროცესებს ახლავს თან? სამოქალაქო მონაწილეობის ფორუმი ქმნის სივრცეს ყველა დაინტერესებული პირისთვის უკეთ გააცნობიეროს მოქალაქეთა მონაწილეობის მნიშვნელობა პოლიტიკის დაგეგმვის, განხორციელების და შეფასების პროცესში, და ასევე თავად წარუდგინოს აუდიტორიას მონაწილეობითი პროცესის წარმატებული მაგალითები და ხელი შეუწყოს ადგილობრივი კონტექსტის კრიტიკულ გააზრებას.

“ტოლერანტობისა და მრავალფეროვბების ისნტიტუტი“ (TDI) აქვეყნებს ინფორმაციას აშშ-ის სახელმწიფო დეპარტამენტის 2018 წლის რელიგიის თავისუფლების ანგარიშის შესახებ.  „21 ივნისს გამოქვეყნდა ანგარიშში ყურადღება გამახვილებულია შემდეგ საკითხებზე: საქართველოს მართლმადიდებელი ეკლესიის პრივილეგირებული მდგომარეობა, კანონმდებლობაში არსებული დისკრიმინაცია არადომიმანტი რელიგიური გაერთიანებების მიმართ და საკონსტიტუციო სასამართლოს 2018 წლის გადაწყვეტილებები. რელიგიის თავისუფლების შეზღუდვასთან დაკავშირებული საკონსტიტუციო ცვლილებები; სახელმწიფოს რელიგიური პოლიტიკა და რელიგიის საკითხთა სახელმწიფო სააგენტოს პრობლემური როლი; რელიგიური შეუწყნარებლობით ჩადენილი დანაშაულები და მათზე სახელმწიფოს რეაგირება; ცენტრალური და ადგილობრივი ხელისუფლების მხირდან შექმნილი წინააღმდეგობები რელიგიური დანიშნულების ნაგებობების მშენებლობის პროცესში; საბჭოთა პერიოდში ჩამორთმეული საკულტო ნაგებობების დაბრუნების პრობლემა; რელიგიური გაერთიანებების სახელმწიფო დაფინასება; საჯარო სკოლებში არსებული დისკრიმინაციული გარემო; საზოგადოებრივი განწყობები; რუსეთის მიერ საქართველოს ოკუპირებულ ტერიტორიებზე რელიგიის თავისუფლების კუთხით არსებულ მდგომარეობა“, - ვკითხულობთ ინფორმაციაში.  სრულად  წყარო: http://tdi.ge

თბილისი. კოალიცია „დამოუკიდებელი და გამჭვირვალე მართლმსაჯულებისთვის“ მოუწოდებს იუსტიციის უმაღლესი საბჭოს მოსამართლეთა კანდიდატების შერჩევის შემდგომ ეტაპებს ჩამოაცილოს მისი ორი წევრი - თამარ ონიანი და ზაზა ხარებავა.  „უზენაესი სასამართლოს მოსამართლეების შერჩევის პროცესი არაერთი ეტაპისაგან შედგება, სადაც იუსტიციის უმაღლესი საბჭოს წევრების თითოეულ ხმას განსაკუთრებული მნიშვნელობა ენიჭება. გადაწყვეტილების მიღებაში საბჭოს იმ წევრების მონაწილეობა, რომელთა ჩართულობის კანონიერების მიმართ საზოგადოებას ლეგიტიმური კითხვები უჩნდება, კიდევ უფრო ართულებს უზენაესი სასამართლოს მოსამართლეთა შერჩევის ობიექტურად, კეთილსინდისიერად და მიუკერძოებლად წარმართვის შესაძლებლობას და ამცირებს საზოგადოების ნდობას ამ პროცესის მიმართ“, - ნათქვამია განცხადებაში.  სრულად  წყარო: https://www.gdi.ge

სამცხე–ჯავახეთი. ახალციხეში, სამცხე–ჯავახეთის სახელმწიფო უნივერსიტეტში სამოქალაქო საზოგადოების რეგიონული ფორუმი გაიმართა. ფორუმის მიზანი ადგილობრივ დონეზე სამოქალაქო საზოგადოების გაძლიერება და მოხალისეობის კულტურის პოპულარიზაციაა. სტუმრებს ლიკა კილაძე, განათლების განვითარების და დასაქმების ცენტრის გამგეობის თავმჯდომარე, თემურ ჯალიაშვილი, პროექტის „სამოქალაქო საზოგადოების განვითარების ინიციატივა“ წარმომადგენელი და მაკა ბერიძე, სამცხე–ჯავახეთის სახელმწიფო უნივერსიტეტის რექტორი მიესალმნენ. ფორუმის ფარგლებში წარმოდგენილი იყო ოცი ადგილობრივი ორგანიზაცია, რომლებიც ეროვნული უმცირესობების დაცვის საკითხებზე, ფორმალური და არაფორმალური განათლების მხარდაჭერაზე, შეზღუდული შესაძლებლობის მქონე პირების და მათი ოჯახის წევრების გაძლიერებაზე, გენდერულ საკითხებსა და მცირე და საშუალო ბიზნესის ხელშეწყობისთვის მუშაობენ. ღონისძიების მიმდინარეობისას სტუმრებს შეეძლოთ ადგილზე გაცნობოდნენ მათ საქმიანობებს და მიეღოთ დამატებითი ინფორმაცია. ფორუმის მიმდინარეობისას მონაწილეები ასევე გაეცნენ ორმხრივი მოხალისეობის პლატფორმას „დროის ბანკი“ და შეეძლოთ, მათი ინტერესების და უნარების გათვალისწინებით, ადგილზე შეერჩიათ აქტივობა, რომელშიც მოხალისოებრივად ჩაერთვებიან. მოხალისეობის მნიშვნელობის შესახებ ისაუბრეს სამოქალაქო საზოგადოების რეგიონული ფორუმის მოწვეულმა მომხსენებლებმა – მასწავლებლის ეროვნული ჯილდოს მფლობელმა ლადო აფხაზავამ და ახალგაზრდა მწერალმა თათული ღვინიანიძემ.  სამოქალაქო საზოგადოების რეგიონული ფორუმი ორგანიზებულია დემოკრატ მესხთა კავშირის მიერ, პროექტის „სამოქალაქო საზოგადოების განვითარების ინიციატივა“ ფარგლებში. „სამოქალაქო საზოგადოების განვითარების ინიციატივა“ ხორციელდება კონრად ადენაუერის ფონდის (KAS) მიერ სამოქალაქო საზოგადოების ინსიტუტთან (CSI), კონსულტაციის და ტრენინგის ცენტრთან (CTC), საქართველოს სტრატეგიული კვლევებისა და განვითარების ცენტრთან (CSRDG) და განათლების განვითარების და დასაქმების ცენტრთან (EDEC) თანამშრომლობით. პროექტს აფინანსებს ევროკავშირი, ხოლო თანადამფინანსებელია კონრად ადენაუერის ფონდი.

თბილისი. 500-ზე მეტი დელეგატი 15-ზე მეტი ქვეყნიდან მონაწილეობდა თბილისში გამართულ ყოველწლიურ საერთაშორისო საინვესტიციო ფორუმში – „განვითარებადი ბაზრების ეკონომიკა: პერსპექტივები და გამოწვევები“.  ფორუმმა 50-მდე გამომსვლელს უმასპინძლა, მათ შორის, ცნობილ საინვესტიციო ექსპერტს, რიჩარდ ვილსონს, რომელიც აშშ-ში ცნობილია როგორც შეძლებული და ულტრა შეძლებული ოჯახების მიერ დაგროვილი ინვესტიციების მმართველი.  IDFI საერთაშორისო ეკონომიკურ ფორუმზე საკუთარი პანელით წარსდა. პანელი ეხებოდა კარგი მმართველობის რეფორმის როლს ეკონომიკურ განვითარებასა და ინვესტიციების მოზიდვაში.  სრულად  წყარო: ორგანიზაციის ვებგვერდი

„თბილისი პრაიდთან“ დაკავშირებით, ადამიანის უფლებათა სახლების წევრი და პარტნიორი ორგანიზაციები საქართველოს პრემიერ-მინისტრსა და შინაგან საქმეთა მინისტრს სპეციალურ მიმართვას უგზავნიან.  „საქართველოს ხელისუფლებამ უნდა უზრუნველყოს ლგბტ თემისა და მათი უფლებების დამცველების შეკრებისა და გამოხატვის თავისუფლების დაცვა“, - ხაზგასმულია მიმართვაში, - „ჩვენ, ქვემოთ ხელმომწერი ადამიანის უფლებათა სახლების 37 წევრი და პარტნიორი ორგანიზაცია, შეშფოთებას გამოვთქვამთ ლგბტ თემისა და მათი უფლებების დამცველებისთვის საჯარო სივრცეზე წვდომის შეზღუდვის, მათი მშვიდობიანი შეკრებისა და გამოხატვის თავისუფლების უხეში დარღვევების გამო. ჩვენ მოვუწოდებთ საქართველოს ხელისუფლებას, პატივი სცეს დემოკრატიულ ღირებულებებს და ადამიანის უფლებებს და უზრუნველყოს ,,თბილისი პრაიდის” კვირეულისა და მის ფარგლებში დაგეგმილი ,,ღირსების მარშის” ყველა მონაწილის დაცვა და მათი უსაფრთხოება“. სრულად  წყარო: https://hrht.ge