სამცხე–ჯავახეთი. 6 ივნისს, მშვიდობის კორპუსმა, ახალციხის დემოკრატიული ჩართულოში ცენტრში,  „არასამთავრობო ორგანიზაციების განვითარების" ტრენინგ–სესიის მორიგი სესია გამართა, რომლის თემა იყო –  „რატომ გვჭირდება მოხალისეთა პროგრამა". მსმენელები გაერკვნენ მოხალისეთა და ბენეფიციართა შორის არსებულ განსხვავებასა და მსგავსებაში, შეიძინეს ორგანიზაციებში მათი აყვანის, ტრენინგის, დასაქმების ანაზღაურებისა და შენარჩუნების გამოცდილება და მოხალისეთა საქმიანობის აღწერის უნარ–ჩვევები. განიხილეს საქართველოში მოხალისეობის კულტურის საკითხები.

თბილისი. რა არეგულირებს ან უნდა არეგულირებდეს საზოგადოებრივი ორგანიზაციების საქმიანობას საქართველოში. კანონის გარდა, არანაკლებ ეფექტური მექანიზმი ეთიკის კოდექსია, რომელიც განასაზღვრავს ორგანიზაციების მოქმედების ძირითად პრინციპებს, შიდა და გარე ურთიერთობებს, ადგენს ღირებულებებსა და აღსრულების მექანიზმებს. სწორედ საზოგადოებრივი ორგანიზაციების სტანდარტებსა და თვითრეგულაციებზე გაიმართა 5 ივნისს დისკუსია „კონსულტაციის და ტრენინგის ცენტრში".  დისკუსიის მომხსენებელმა, „სამოქალაქო საზოგადოების ინსტიტუტის" ხელმძღვანელმა ვაჟა სალამაძემ აღნიშნა, რომ უკვე არსებული ეთიკის კოდექსის უფრო ეფექტურად მუშაობისთვის შესაძლოა შეიცვალოს ამოცანა, მიზანი და შესაბამისად ეთიკის კოდექსიც. დისკუსიაზე იმსჯელეს ეთიკის კოდექსის აღსრულების მექნიზმებზე, დისკუსიაში მონაწილეთა ნაწილი ფიქრობდა, რომ საჭიროა მეტი სითამამე და სიმკაცრე საზოგადოებრივი ორგანიზაციების მიერ ეთიკის ნორმების დარღვევის შემთხევაში და უპრიანია მათი მხილება, ნაწილი კიდევ ფიქრობდა, რომ ეთიკის კოდექსს უფრო მეტად წამახალისებელი ფუნქცია უნდა ჰქონდეს, ვიდრე სადამსჯელო. შეხვედრაზე ასევე განიხილეს თვითრეგულირების საერთაშორისო პრაქტიკა და დისკუსიის მონაწილეებს გადასცეს სიემ რიპის კონსენსუსი განვითარების სფეროში საზოგადოებრივი ორგანიზაციების ეფექტიანობის საერთაშორისო სტანდარტების შესახებ, რომელიც „სამოქალაქო საზოგადოების ინსტიტუტის" ძალისხმევით ითარგმნა.  საბოლოოდ დისკუსიის შედეგად რამდენიმე საკვანძო საკითხი გამოიკვეთა, რომლებზეც მუშაობას სამუშაო ჯგუფები გააგრძელებენ: • მსგავსი დოკუმენტის არსებობა მნიშვნელოვანია და უნდა მოხდეს მისი პრაქტიკაში რეალიზება; • დისკუსიის და კამათის საგანია აღსრულების მექანიზმები; • ეთიკის კოდექსზე მუშაობა უნდა იყოს მონაწილეობითი; • უფრო მეტად აქცენტი უნდა გაკეთდეს მოტივაციურ ნაწილზე.     დისკუსიები ხორციელდება პროექტის – „დიალოგი სამოქალაქო სექტორის განვითარებისათვის” - ფარგლებში, რომელიც აღმოსავლეთ-დასავლეთის მართვის ინსტიტუტის (EWMI) პროგრამის - „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC) – ეგიდით მიმდინარეობს.   შეგახსენებთ, რომ აღნიშნული პროექტის ფარგლებში უკვე სამი დისკუსია გაიმართა „კონსულტაციის და ტრენინგის ცენტრში". ყოველი დისკუსიის შემდეგ, მასში მონაწილე საზოგადოებრივი ორგანიზაციებისაგან შექმნილი სამუშაო ჯგუფები (სულ ოთხი თემატური ჯგუფი) მუშაობენ პრობლემების ანალიზსა და რეკომენდაციებზე. სულ პროექტის მანძილზე კეთდება ოთხი თემატური დოკუმენტი, რომელიც მოიცავს რეკომენდაციების ნაწილს. პროექტის ბოლოს, ამ ოთხ დოკუმენტზე დაყრდნობით, შემუშავდება ერთიანი ანგარიში, რომელიც განსახილველად წარედგინება საზოგადოებრივ ორგანიზაციებს, სახელმწიფო სტრუქტურის წარმომადგენლებს, პრესას და სხვა დაინტერესებულ პირებს.    საქართველოს საზოგადოებრივ ორგანიზაციათა ეთიკის კოდექსი სიემ რიპის კონსენსუსი განვითარების სფეროში საზოგადოებრივი ორგანიზაციების ეფექტიანობის საერთაშორისო სტანდარტების შესახებ   თვითრეგულირების შესახებ მეტი ინფორმაცია შეგიძლიათ იხილოთ ამ ბმულზე 

აჭარა. 5 ივნისს „დამოუკიდებელ ექსპერტთა კლუბმა" გამართა წიგნის, „საქართველოს დემოკრატიზაციის გზამკვლევი" პრეზენტაცია. წიგნში საუბარია  სახელმწიფო უსაფრთხოების შიდა ასპექტებზე, გლობალურ გამოწვევებზე, ასევე ადამიანის უფლებათა დაცვის მიმართულებით არსებულ და პოტენციურ საფრთხეებზე. დამოუკიდებელ ექსპერტთა კლუბი მსგავს შეხვედრებს საქართველოს სხვადასხვა ქალაქში გეგმავს. პროექტი დაფინანსებულია საერთაშორისო საქველმოქმედო ფონდ „ქართუს" ფინანსური მხარდაჭერით. კლუბის წევრებმა აღნიშნული შეხვედრა ბათუმის დემოკრატიული ჩართულობის ცენტრში გამართეს.

იმერეთი. დღეს, ქუთაისის დემოკრატიული ჩართულობის ცენტრში საქართველოს საავტორო უფლებათა დაცვის ასოციაციამ შეხვედრა გამართა, რეგიონებში მოქმედი რადიოკომპანიების, თეატრების, გამომცემლობების, სავაჭრო დაწესებულებების, რესტორნების, კაფეების, სასტუმროების ხელმძღვანელებსა და სხვა საავტორო უფლებით მოსარგებლეებთან. შეხვედრაზე  საქართველოს საავტორო უფლებათა დაცვის ასოციაციამ დაინტერესებულ პირებს საავტორო უფლებათა შესახებ ინფორმაცია მიაწოდა და მონაწილეთა აზრიც მოისმინა.

თბილისი. კამპანია „ეს შენ გეხებას" მონაწილე საზოგადოებრივმა ორგანიზაციებმა 1 ივნისს „თბილისი მარიოტში" პრესკონფერენცია გამართეს და ამერიკის შეერთებული შტატების მდივანს, ჰილარი კლინტონს მიმართეს. კამპანიის მონაწილე საზოგადოებრივი ორგანიზაციების წარმომადგენლებმა კლინტონს მათ მიერ პარლამენტში წარდგენილი საკანონმდებლო ინიციატივასთან დაკავშირებით ქვეყნის ხელისუფლებასთან მოლაპარაკებებისას აშშ-ს სახელმწიფო დეპარტამენტის პოზიციის გამოხატვა სთხოვეს. კერძოდ, საქმე ეხება მედიის საქმიანობის მარეგულირებელ კანონმდებლობაში Must-carry-ს და Must-offer–ის პრინციპების დანერგვას, რომელიც კამპანიის მონაწილეების აზრით გამოიწვევს მოსახლეობის უზრუნველყოფას პლურალისტური მედია გარემოთი. მიმართვა სრულად

სამცხე–ჯავახეთი. სამოქალაქო განათლებისა და პედაგოგთა გადამზადების პროგრამის ფარგლებში, 31 მაისს, 15 საათზე, ახალციხის ახალგაზრდული ცენტრის დარბაზში გაიმართა სამეცნიერო კონფერენცია თემაზე - ,,1919-21 წლები და სამცხე-ჯავახეთი” . კონფერენციაზე წარმოდგენილი იქნა სამცხე-ჯავახეთის სამოქალაქო კლუბის წევრების მოხსენებები. საკონფერენციო მასალები მონაწილეებმა როგორც წიგნებიდან, ასევე ცოცხალი წყაროებიდან მოიძიეს. კონფერენციაზე წარმოდგენილი 14 მოხსენების პრეზენტაციის შემდეგ  კომპეტენტურმა ჟიურიმ სამი გამარჯვებული გამოავლინა. გამარჯვებულებს პრიზები, ხოლო კონფერენციის ყველა მონაწილეს სერთიფიკატები გადაეცათ.

თბილისი. საზოგადოებრივი ორგანიზაციების წინაშე მდგარ სამართლებრივ პრობლემებზე ისაუბრეს 31 მაისს „სამოქალაქო საზოგადოების ინსტიტუტში". ორგანიზაციის ექსპერტებმა  და მოწვეულმა სტუმრებმა შეხვედრაზე მიმოიხილეს კანონმდებლობასთან დაკავშირებული ის საკითხები, რომლებიც ხელს უშლის საზოგადოებრივი ორგანიზაციების ეფექტურ მუშაობას: მოხალესეობის მარეგულირებელი საკანონმდებლო ბაზის არარსებობა (არ არის  განსაზღვრული  ტერმინ „მოხალისეობის" დეფინიცია, მოხალისის, მასპინძელი ორგანიზაციისა და მესამე პირების უფლება–მოვალეობები და ა.შ), რის გამოც ქვეყანაში მოხალისეობის ინსტიტუტი არ არის განვითარებული და მესამე  სექტორიც თითქმის არ იყენებს მოხალისეთა შრომას. სახელწმიფოს გრანტებთან დაკავშირებული პრობლემები  –  2011 წლის ოქტომბრიდან, საქართველოს სამინისტროები უფლებამოსილნი არიან  გასცენ გრანტი საზოგადოებრივი ორგანიზაციებისათვის, თუმცა არ არის ნათელი და მკაფიო თუ რა კრიტერიმით რეგულირდება სახელმწიფო გრანტის გაცემის პროცედურა, როგორ ტარდება საგრანტო კონკურსი, როგორ ხდება გამარჯვებულთა გამოვლენა და ა.შ, სახელმწიფოს მიერ გრანტის გაცემის წესები ჩამოყალიბებას საჭიროებს. კიდევ ერთი გარემოება – მიუხედავად საკანონმდებლო ცვლილებებისა, თვითმმართველობის ორგანოებს სამინისტროებისგან განსხვავებით არ აქვთ უფლება, გასცენ გრანტი „ეს დაბრკოლებებს უქმნის, როგორც თვითმმართველობებს, ასევე იმ საზოგადოებრივ ორგანიზაციებს, რომლებიც ადგილობრივი პრობლემების გადაწყვეტაზე მუშაობენ" – ნათქვამია პოლიტიკის ნარკვევში, რომელიც „სამოქალაქო საზოგადოების ინსტიტუტმა" შეხვდრაზე წარადგინა. შეხვედრაზე ასევე ყურადღება გაამახვილეს ტერმინ ,,შემოწირულობის’’ განმარტებასთან დაკავშირებულ სამართლებრივ პრობლემებზე. თუმცა ტერმინების განმარტებასთან დაკავშირებული პრობლემები ამით არ ამოწურულა.  კერძოდ,  შეხვედრისას აღინიშნა, რომ მნიშვნელობა ტერმინებისა „დამხმარე სამეწარმეო საქმიანობა" და „სამეწარმეო საქმიანობაზე გადასვლა" ასევე ბუნდოვანია და ექვემდებარება დისკრეციას.  უფრო ვრცლად საზოგადოებრივი ორგანიზაციების წინაშე მდგარ სამართლებრივ პრობლემებს შეგიძლიათ გაეცნოთ პოლიტიკის ნარკვევში, რომელიც „სამოქალაქო საზოგადოების ინსტიტუტმა" მოამზადა.    პოლიტიკის ნარკვევი  

თბილისი. საქართველოს ახალგაზრდა იურისტთა ასოციაცია გამოცდების ეროვნულ ცენტრში მიმდინარე მოვლენებს გამოეხმაურნენ და შესაბამისი განცხადება  გამოაქვეყნეს. წყარო: საქართველოს ახალგაზრდა იურისტთა ასოციაციის ვებგვერდი:www.gyla.ge განცხადება სრულად

გურია. საქართველოს დემოკრატიული განვითარების კავშირმა დაასრულა მუშაობა ორ ძირითად დოკუმენტზე, რომელიც ეხება ოზურგეთისა და ჩოხატაურის მუნიციპალიტეტების 2011 წლის ბიუჯეტის შესრულების ანგარიშის განხილვასა და შეფასებას. აღნიშნული ნამუშევრები უახლეს მომავალში განთავსდება საქართველოს სტრატეგიული კვლევებისა და განვითარების ცენტრის ოფიციალურ ვებ-გვერდზე.

თბილისი. ევროკავშირის სამეზობლო პოლიტიკა, სოციალური ტრანსფორმაცია რეგიონში და გაკვეთილები  კავკასიისთვის – ამ საკითხებზე მსჯელობდნენ 30 მაისს „ევროპის სახლში". დისკუსიას მოდერაციას უწევდა პოლიტიკის მკვლევარი და პროგრამის ხელმძღვანელი  ევროპის პოლიტიკის ცენტრიდან, ამანდა პოლი. „ევროკავშირი სოციალური ტრანსფორმაციის მხოლოდ ნაწილია და იგი საზოგადოების მხრიდან უნდა მოდიოდეს" –აღნიშნა პოლიტიკის მვკლევარმა იანა კობზოვამ, თავის მხრივ, საქართველოს საგარეო საქმეთა მინისტრის მოადგილემ, თორნიკე გორდაძემ ხაზი გაუსვა იმას, რომ საქართველოს ხელისუფლების მიზანი სწორედ საზოგადოების ძირეული სოციალური ტრანსფორმაციაა და არა მხოლოდ ევროპაში ინსტიტუციურად ინტეგრაცია. დისკუსიაზე ასევე საუბარი იყო დეცენტრალიზაციის მნიშვნელობაზე ქვეყნის გაძლიერების საქმეში, რასაც მოჰყვა  პარლამენტის ქუთაისში გადატანის ხაზგასმა. დისკუსია ევროპის კვირეულის ფარგლებში გაიმართა, რომლის ორგანიზატორი საზოგადოებრივი ორგანიზაცია „ევროპის სახლია". ევროპის კვირეულის ფარგლებში მსგავსი დისკუსიები და შეხვედრები 4 ივნისამდე გასტანს.

შიდა ქართლი. 30 მაისს გორის დემოკრატიული ჩართულობის ცენტრში გაიმართა ორგანიზაციის – ნიდერლანდების ინსტიტუტი მრავალპარტიული დემოკრატიისთვის – საქართველოს» პროგრამის პრეზენტაცია. შეხვედრას ესწრებოდნენ საზოგადოებრივი ორგანიზაციების, მედიის და პოლიტიკური პარტიების წარმომადგენლები. ორგანიზატორებმა დამსწრეებს მიაწოდეს ინფორმაცია მათი ორგანიზაციის, გაწეული სამუშაოებისა და დაგეგმილი საქმიანობის შესახებ. განსაკუთრებით გამახვილდა ყურადღება დემოკრატიის სკოლებზე: დემოკრატიის სკოლები წარმოადგენს 5-თვიან საგანმანათლებლო  პროგრამას, რომლის ფარგლებშიც მონაწილეები გადიან სიღრმისეულ სწავლებას სამოქალაქო მონაწილეობისთვის აუცილებელ ცოდნასა და უნარებში. სასწავლო კურსი მოიცავს თანამედროვე უნარებს, დემოკრატიული საზოგადოების, დემოკრატიული მმართველობის და ლიდერობის ძირეულ საკითხებს. დემოკრატიის სკოლებში ტრენინგებს ატარებენ მაღალი კვალიფიკაციის მკვლევარები, პრაქტიკოსები, ექსპერტები და აკადემიური სფეროს წარმომადგენლები. მონაწილეები ასევე სარგებლობენ ელექტრონული სასწავლო გარემოთი და მცირე გრანტების კონკურსში მონაწილეობის შესაძლებლობით. დემოკრატიის სკოლაში მონაწილეობა შეუძლიათ დაინტერესებულ მოქალაქეებს, დევნილებს, საზოგადოებრივი ორგანიზაციის, ადგილობრივი თვითმმართველობის, მედია ორგანიზაციების და პოლიტიკური პარტიების წარმომადგენლებს.   მონაწილეთა ასაკი უნდა აღემატებოდეს 18 წელს. გორის დემოკრატიის სკოლა გაიხსნება 1 ოქტომბერს. სასწავლო პროგრამა გრძელდება 5 თვე.  ტრენინგები ტარდება კვირაში ორჯერ. ერთი სატრენინგო დღის ხანგრძლივობაა 6 საათი. შეხვედრის დასასრულს, მსურველებს ჰქონდათ შესაძლებლობა, ადგილზევე შეევსოთ სათანადო აპლიკაცია, რათა ჩართულიყვნენ დემოკრატიის სკოლის მუშაობაში, რითაც დამსწრეთაგან ნაწილმა დაუყოვნებლივ ისარგებლა.

აჭარა.  30 მაისს, თვითმმართველი ქალაქი ბათუმის საკრებულოსთან არსებული სამოქალაქო მრჩეველთა კომიტეტმა და ქალაქ ბათუმის მერიამ გამართა საჯარო შეხევდრა თემაზე: თვითმმართველი ქალაქი ბათუმი _ ახალგაზრდული და კულტურული პროგრამები. შეხვედრის მიზანი იყო ქალაქ ბათუმის 2012 წლის ბიუჯეტის გამჭირვალობა და მის განხორციელებაში მოქალაქეთა ჩართულობის უზრუნველყოფა. შეხევდრაზე ბათუმის მერის მოადგილემ და მერიის წარმომადგენლებმა წარმოადგინეს ბათუმის 2012 წლის ბიუჯეტის ახალგაზრდული და კულტურული პროგრამები. აღნიშნულ საკითხზე გაიმართება დისკუსია    საზოგადოებრივი ორგანიზაციების,  კულტურის სფეროს, სტუდენტების და სხვა დაინტერესებული მხარეების  წარმომადგენლების მონაწილეობით.   პრეზენტაციის შემდეგ გაიმართა დისკუსია სხვადასხვა პრობლემატურ საკითხებზე, კერძოდ: სტუდენტებმა ყურადღება გაამახვილეს ახალგაზრდული პროგრამების გამჭირვალობაზე, მათი აზრით, დაგეგმარების და განხორციელების პროცესში აქტიურად უნდა ხდებოდეს სტუდენტების ჩართვა. კულტურის სფეროს წარმოამდგენლება დააყენეს ბათუმის კულტურული განვითარების კონცეფციის აქტუალობის საკითხი. მათი აზრით, სპეციალისტების მონაწილეობით უნდა შემუშავდეს ქალაქ ბათუმის კულტურული განვითარების გეგმა, რაზეც უნდა აიგოს შემდგომ ყოველი წლის ბიუჯეტი. ხოლო საზოგადოებრივი ორგანიზაციის წარმომადგენლები დაინტერესდნენ აღნიშნული პროგრამების ფინანსური გამჭირვალობის საკითხით და იგეგმება თუ არა რაიმე სახის ცვლილება წინასაარჩევნო პერიოდში. შეხვედრის ბოლოდ მონაწილეებს შორის მოხდა  სამომავლო ურთიერთობის ფორმების განსაზღვრა.

თბილისი. მშვიდობის, დემოკრატიის და განვითარების კავკასიურ ინსტიტუტში (CIPDD) შექმნილია რეგიონალური განვითარების და ადგილობრივი თვითმმართველობის რესურს ცენტრი. რესურს ცენტრი შეიქმნა და ფუნქციონირებს ნიდერლანდების საგარეო საქმეთა სამინისტროს სოციალური გარდაქმნის პროგრამის (მატრა) ფარგლებში. რეგიონალური განვითარების და ადგილობრივი თვითმმართველობის რესურს ცენტრში შეგიძლიათ მოიძიოთ 800-მდე წიგნი, ჟურნალი და  სტატია სხვადასხვა საკითხებზე,  მათ შორის პოლიტიკურ და ფინანსურ ასპექტებზე, მოქალაქეების ჩართულობაზე, აღმოსავლეთ ევროპის, აზიის, ლათინური ამერიკის და აფრიკის ქვეყნების გამოციდლებაზე. რესურს ცენტრი ღიაა ყველა დაინტერესებული პირისთვის. დამატებითი ინფორმაციისთვის ეწვიეთ საიტს www.participate.ge ან ეწვიეთ ოფისში, წერეთლის 72.

კახეთი. გურჯაანის მუნიციპალიტეტის საკრებულოსთან „საზოგადოებრივი დარბაზი"  უახლოეს მომავალში დაიწყებს ფუნქციონირებას. ამ ეტაპზე დარბაზის წევრების შერჩევა მიმდინარეობს. აღნიშნულ საკითხზე ურთიერთშეთანხმების მემორანდუმი ჯერ კიდევ თებერვალში. გურჯაანის მუნიციპალიტეტის საკრებულომ და საქართველოს სამოქალაქო განვითარების ასოციაციამ გააფორმეს. მემორანდუმი ევროკავშირის მიერ დაფინანსებული პროექტის – „თვითმმართველობის განვითარების ხელშეწყობა საქართველოში" – გაფორმა. პროექტს ახორციელებდა სამოქალაქო საზოგადოების ინსტიტუტი რეგიონულ პარტნიორებთან ერთად. „საზოგადოებრივი დარბაზი" გააერთიანებს საზოგადოების აქტიურ წარმომადგენლებს, სხვადასხვა დარგის სპეციალისტებსა და ექსპერტებს, მუნიციპალიტეტის ტერიტორიაზე მოქმედ არასამეწარმეო და სამეწარმეო იურიდიულ პირებს.

თბილისი. 28 მაისს, „კონსულტაციის და ტრენინგის ცენტრში" საზოგადოებრივი ორგანიზაციების წარმომადგენლებისგან შემდგარი ჯგუფის სამუშაო შეხვედრა გაიმართა. სხვადასხვა საზოგადოებრივი ორგანიზაციის წარმომადგენლებმა იმსჯელეს  იმ პრობლემებსა და გამოწვევებზე, რომელიც მესამე სექტორისა და სახელმწიფოს ურთიერთობებში არსებობს, ასევე მათი გადაწყვეტის გზებზე. რეკომენდაციები ოთხი ძირითადი მიმართულებით მუშავდება, საზოგადობრივი ორგანიზაციების სამართლებრივი გარემოს, ფინანსური მდგრადობის, სახელმწიფო გრანტებისა და სახელმწიფოსთან დიალოგის კუთხით. რეკომენდაციები მზადდება საზოგადოებრივი ორგანიზაციებისთვის. სამუშაო ჯგუფის შეხვედრა „კონსულტაციისა და ტრენინგის ცენტრის" (CTC) პროექტის – „დიალოგი სამოქალაქო სექტორის განვითარებისათვის" – ფარგლებში ჩატარდა. პროექტის მიზანია სამოქალაქო საზოგადოებრივი ორგანიზაციების ძლიერი და სუსტი მხარეების შესახებ საჯარო დისკუსიის წარმართვა და არსებული პრობლემების გადალახვის გზების ძიება. სულ დაგეგმილია 4 დოკუმენტის შექმნა სახვადასხვა საკითხზე, ესენია: 1. „საზოგადოების დამოკიდებულება სამოქალაქო საზოგადოების ორგანიზაციების მიმართ”. G-PAC- ის მიერ ჩატარებული სოციოლგიური კვლევის მთავარი საკითხები და პრობლემები; 2. სამოქალაქო საზოგადოების ორგანიზაციებისა და სახელმწიფოს ურთიერთობები; 3.სამოქალაქო საზოგადოების ორგანიზაციებისა და დონორების/საერთაშორისო საზოგადოების ურთიერთობები; 4. სამოქალაქო საზოგადოების ორგანიზაციების სტანდარტები და თვითრეგულაციები. ყოველი დისკუსიის შემდეგ, მასში მონაწილე საზოგადოებრივი ორგანიზაციებისაგან შექმნილი სამუშაო ჯგუფები (სულ ოთხი თემატური ჯგუფი) მუშაობენ პრობლემების ანალიზსა და რეკომენდაციებზე. სულ პროექტის მანძილზე კეთდება ოთხი თემატური დოკუმენტი, რომელიც მოიცავს რეკომენდაციების ნაწილს. პროექტის ბოლოს, ამ ოთხ დოკუმენტზე დაყრდნობით, შემუშავდება ერთიანი ანგარიში, რომელიც განსახილველად წარედგინება საზოგადოებრივ ორგანიზაციებს, სახელმწიფო სტრუქტურის წარმომადგენლებს, პრესას და სხვა დაინტერესებულ პირებს. აღნიშნული პროექტი მხოლოდ დოკუმენტების შექმნას ითვალისწინებს, მისი დანერგვა და იმპელმენტაცია კი ამ კონკრეტულ პროექტში გათვალისწინებული ჯერ არ არის. „ეს პროექტი ითვალისწინებდა, მხოლოდ ასეთი ტიპის დოკუმენტების შექმნას. აქ მთავარი იყო პროცესი, რომ ეს დოკუმენტი დაეწერა არა ერთ, ან ორ ორგანიზაციას, ან დაქირავებულ ექსპერტს, არამედ ყოფილიყო ჩართულობის ფორმატი" – ამბობს პროექტის მენეჯერი, ანა მარგველაშვილი. დისკუსიები ხორციელდება პროექტის – „დიალოგი სამოქალაქო სექტორის განვითარებისათვის” - ფარგლებში, რომელიც აღმოსავლეთ-დასავლეთის მართვის ინსტიტუტის (EWMI) პროგრამის - „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC) – ეგიდით მიმდინარეობს.

აჭარა. 29 მაისს, ეროვნულ–დემოკრატიული ინსტიტუტის (NDI) ორგანიზებით,ბათუმის დემოკრატიული ჩართულობის ცენტრში, გაიმართა პირველი საჯარო განხილვა საკონსტიტუციო ცვლილების პროექტის, რომლის მიზანია საქართველოს კონსტიტუციაში აისახოს ქალაქ ლაზიკას სტატუსის ამსახველი დებულება. საჯარო განხილვას ესწრებოდნენ რიგითი მოქალაქეები, საზოგადოებრივი ორგანიზაციების, ბათუმის საკრებულოს, საპარლამენტო უმრავლესობისა და უმცირესობის წარმომადგენლები. საქართველოს პარლამენტის წევრებმა დამსწრე საზოგადოებას ლაზიკას განვითარების გეგმა გააცნეს. კონკრეტულად, როგორი იქნება ქალაქის სამართლებრივი სტატუსი, მისი ეკონომიკური და ინფრასტრუქტურის განვითარების სტრატეგია. უმცირესობისა და უმრავლესობის წევრებს შორის აზრთა სხვადასხვაობა გამოიწვია ქალაქის მშენებლობის აუცილებლობამ. ცვლილებების პროექტის საყოველთაო–სახალხო განხილვის პროცესი ეროვნულ-დემოკრატიული ინსტიტუტის (NDI) ორგანიზებით ხორციელდება. საჯარო განხილვები გაიმართება ასევე ოზურგეთში, ზუგდიდში, ფოთში, ქუთაისსა და თელავში.

ბათუმი. 25 მაისს, ბათუმის დემოკრატიული ჩართულობის ცენტრში, „სამართლიანი არჩევნებისა და დემოკრატიის საერთაშორისო საზოგადოებამ" (ISFED), ,,საქართველოს ახალგაზრდა იურისტთა ასოციაციასა" და ,,საერთაშორისო გამჭვირვალობა - საქართველოსთან" პარტნიორობით,  გამართა  მრგვალი მაგიდა პარლამენტში შეტანილ ახალ საკანონმდებლო ინიციატივებზე. მომხსენებლებმა საარჩევნო ადმინისტრაციის, პოლიტიკური პარტიების, საზოგადოებრივი  ორგანიზაციებისა და მედიის წარმომადგენლებს ის საარჩევნო საკანონმდებლო წინადადებები წარუდგინეს, რომლითაც პარლამენტს მიმართეს. აღნიშნული წინადადებები კამპანიის –  „ეს შენ გეხება"–  ფარგლებში მოამზადეს საზოგადოებრივმა ორგანიზაციებმა.

სამცხე–ჯავახეთი. ბაკურიანში 23 მაისს დაიწყო და 28 მაისამდე ახალგაზრდები დებატების ხელოვნებას გაეცნობიან. დებატების ბანაკში, ისინი შეიძენენ დებატებში მონაწილეობისა და მისი გამართვის უნარ–ჩვევებს. აღნიშნული ღონისძიება საზოგადოებრივი ორგანიზაციის ტრენინგებისა და კონსულტაციების ცენტრის მიერ არის ორგანიზებული.

თბილისი. დღეს, ფონდ „ღია საზოგადოება– საქართველოს" ოფისში იურიდიული დახმარების მონაცემთა ბაზის პრეზენტაცია გაიმართა. პრეზენტაციას სხვადასხვა საზოგადოებრივი ორგანიზაციების წარმომადგენლები ესწრებოდნენ. იურიდიული დახმარების მონაცემთა ბაზა  ქსელური პროგრამაა, რომელიც იურიდიული დახმარების საკითხებში მომუშავე ორგანიზაციებს დაეხმარება მონაცემების დამუშავებასა და ორგანიზებაში. ბაზა მანამდე იურიდიული დახმარების სამსახურისთვის მუშაობდა, ახლა კი სხვადასხვა  ორგანიზაციებსაც შეეძლებათ მისი დანერგვა, სურვილის შემთხვევაში. ბაზაში უკვე არსებულ მოდულებს დაემატა სამოქალაქო, ადმინისტრიციული სამართლის მოდულები.  იურიდიული მონაცემთა ბაზის სისტემის დასრულება და ტექნიკურად გამართვა ფონდი „ღია საზოგადოება საქართველოს" ინიციატივთ განხორციელდა. აღმოსავლეთ–დასავლეთის მართვის ინსტიტუტი კი ყველა იმ ორგანიზაციას დაეხმარება, რომელიც სისტემის დანერგვას გადაწყვეტს, დახმარება გულისხმობს სპეციალურ ტრენინგებს.

კახეთი. 22 მაისს, ,,დემოკრატიის სკოლამ" თელავის სახელმწიფო უნივერსიტეტში კონფერენცია გამართა. შეხვედრას ესწრებოდნენ სტუდენტები, საზოგადოებრივი ორგანიზაციებისა და მედიის წარმომადგენლები. სტუდენტებმა შეხვედრაზე 3 თემა განიხილეს: შიდა პარტიული განვითარება გენდერულ პესპექტივაში, ახალგაზრდები და პოლიტიკა და მოქალაქეთა ჩართულობის გაზრდა ადგილობრივი თვითმმართველობის ბიუჯეტირების პროცესში. დამსწრე საზოგადოება აქტიურად ჩაერთო დისკუსიაში და განიხილავდნენ პრობლემების გადაჭრის გზებს. თელავში ,,დემოკრატიის სკოლა" ,,ნიდერლანდების ინსტიტუტმა მრავალპარტიული დემოკრატიისათვის" ერთი წლის გახსნა.

თბილისი. სამოქალაქო განვითარების სააგენტოს (CIDA) ორგანიზებით, სასტუმრო „ქორთიარდ მარიოტში" გაიმართა კონფერენცია – „სახელმწიფო იურიდიული დახმარება: რეალობა და გამოწვევები". კონფერენციის ფარგლებში იურიდიული დახმარების სამსახურსა და საზოგადოებრივ ორგანიზაციებს შორის თანამშრომლობის მემორანდუმს მოეწერა ხელი. მემორანდუმზე ხელმოწერით მხარეები შეთანმხდნენ თანამშრომლობაზე იურიდიული დახმარების საკითხებში.   სსიპ „იურიდიული დახმარების სამსახური" უზრუნველყოფს საჯარო და იურიდიული დახმარების ამსახველი ინფორმაციის მიწოდებას საზოგადოებრივი ორგანიზაციებისთვის. იგი ასევე გაითვალისწინებს საზოგადოებრივი ორგანიზაციების მიერ მიწოდებულ რეკომენდაციებს. საზოგადოებრივი ორგანიზაციები თავის მხრივ, ხელს შეუწყობენ საზოგადოების ინფორმირებას, მიაწვდიან სამსახურს რეკომენდაციებს და ა.შ.მემორანდუმი ასევე ითვალისწინებს იმას, რომ არასამთავრობო ორგანიზაციები "ხელს შეუწყობენ სსიპ "იურიდიული დახმარების სამსახურს" სოციალურად დაუცველი მოსახლეობის იმ ნაწილისთვის იურიდიული დახმარების მიწოდებაში, რომელსაც ესაჭიროება წარმომადგენლობა სამოქალაქო და ადმინასტრაციული სამართლის საკითხებზე".   კონფერენციაზე, ასევე, გამოყენებითი კვლევების კომპანიის (ARC) მიერ ჩატარებული კვლევის პრეზენტაცია შედგა, რომელმაც გამოიკვლია იურიდიული დახმარების სამსახურის შესაძლებლობები და საჭიროებები. კვლევის მიხედვით, გამოკითხულთა 73,6 % სრულიად კმაყოფილია მათი მომსახურებით. მიუხედავად ნდობის („სრულიად ვენდობი" – 73,7 %) და კმაყოფილების მაღალი ხარისხისა, ბენეფიციარების თითქმის მესამედი თვლის, რომ მოსახლეობას მეტი ინფორმაცია უნდა ჰქონდეს სამსახურის საქმიანობის შესახებ. მომსახურების სარგებლობამდე ბენეფიციართა 43,1 %–მა არ იცოდა ამ ორგანიზაციის არსებობის შესახებ. მათ შორის ვისაც ჰქონდა ინფორმაცია, უმეტესობა აღნიშნავს, რომ ინფორმაციის წყაროს ის ნაცნობები წარმოადგენენ, რომელთაც უკვე მიიღეს მომსახურება იურიდიული დახმარების სამსახურისგან. მხოლოდ 15 %–ს აქვს მიღებული ინფორმაცია სატელევიზო გადაცემიდან ან რეკლამიდან.   პრეზენტაციის შემდგომ გაიმართა დისკუსია, სადაც კონფერენციის მონაწილეებმა სახელმწიფო იურიდიული დახმარების საქმიანობის, მონიტორინგის და ევალუაციის ეფექტურობის გაზრდის შესახებ იმსჯელეს.

თბილისი. 18 მაისს, სასტუმრო „თბილისი მარიოტში" გაიმართა საზოგადოებრივი ორგანიზაციების ვებპორტალის www.csogeorgia.org პრეზენტაცია. მრავალმხრივი ინფორმაცია, მარტივი ნავიგაცია და თანამედროვე დიზაინი – ეს ის ასპექტებია, რომლებიც ნებისმიერ დაინტერესებულ პირს საშუალებას აძლევს გაეცნოს ინფორმაციას საქართველოში მოქმედ საზოგადოებრივი ორგანიზაციებისა და მათი საქმიანობების შესახებ, სფეროს სიახლეებს, საერთაშორისო ორგანიზაციების წარმომადგენლობებისა და პროგრამების შესახებ, სურვილი შემთხვევაში მიიღოს იურიდიული კონსულტაცია არასამეწარმეო სამართალში და ა.შ. საზოგადოებრივი ორგანიზაციების პორტალი შეიქმნა სამოქალაქო საზოგადოების ინსტიტუტისა და ფონდ „ღია საზოგადოება – საქართველოს" პარტნიორობით, ასევე ფონდ EED–ის და ევროკავშირის (EU) მხარდაჭერით.