გურია. ოზურგეთის კულტურისა და დასვენების პარკში სამოქალაქო საზოგადოების რეგიონული ფორუმი გაიმართა. ფორუმის მიზანი რეგიონულ დონეზე სამოქალაქო საზოგადოების საქმიანობის წარმოჩენა და მოხალისეობის კულტურის პოპულარიზაციაა. ფორუმში ათამდე ადგილობრივმა ორგანიზაციამ და სოციალური პასუხისმგებლობით გამორჩეულმა მცირე ბიზნესის წარმომადგენელი მიიღო მონაწილეობა. ღონისძიება ბავშვთა ანსამბლის „ბინული“ კონცერტით გაიხსნა. სტუმრებს ორგანიზატორები მიესალმნენ და სამოქალაქო საზოგადოების ფორუმების მნიშვნელობის შესახებ ისაუბრეს. ღონისძიებაზე ასევე დაჯილდოვდა მოხალისეობის პლათფორმა „დროის ბანკის“ ყველაზე აქტიური მოხალისე გურიაში „ევრო კლუბი“. ღონისძიების ფარგლებში წარმოდგენილი იყო თექაზე მუშაობის პრაქტიკა, გურული ჩაის დამზადების წესი. მონაწილეების სხვა გასართობ და შემეცნებით აქტივობებთან ერთად, ბამბუკის ნივთების დამზადების მაგალითებსაც აჩვენებდნენ. სტუმრებს შეეძლოთ წარმოდგენილი ორგანიზაციების საქმიანობედან მათთვის სასურველი აერჩიათ და მოხალისეობრივად მიეღოთ მონაწილეობა ადგილობრივი ორგანიზაციების მუშაობაში. ფორუმის მონაწილეები ორმხრივი მოხალისეობის პლატფორმას „დროის ბანკი“ გაეცნენ და მოხალისედ დარეგისტრირდნენ. „დროის ბანკის“ ვიქტორინის ფარგლებში არაერთი პრიზი გათამაშდა. ვიქტორინის შეკითხვები საქართველოში მოხალისეობის კულტურას უკავშირდებოდა. სამოქალაქო საზოგადოების რეგიონული ფორუმი ორგანიზებულია ინოვაციებისა და სამოქალაქო განვითარების ცენტრი - პროგრესის სახლის მიერ, პროექტის „სამოქალაქო საზოგადოების განვითარების ინიციატივა” ფარგლებში. „სამოქალაქო საზოგადოების განვითარების ინიციატივა“ ხორციელდება კონრად ადენაუერის ფონდის (KAS) მიერ სამოქალაქო საზოგადოების ინსიტუტთან (CSI), კონსულტაციის და ტრენინგის ცენტრთან (CTC), საქართველოს სტრატეგიული კვლევებისა და განვითარების ცენტრთან (CSRDG) და განათლების განვითარების და დასაქმების ცენტრთან (EDEC) თანამშრომლობით. პროექტს აფინანსებს ევროკავშირი, ხოლო თანადამფინანსებელია კონრად ადენაუერის ფონდი.

აჭარა. 13-14 ივნისს ბათუმის მუნიციპალიტეტის მერიის ახალგაზრდულ ცენტრში, სამოქალაქო საზოგადოების ინსტიტუტის მიერ გამოცხადებული კონკურსის „გახდი პასუხისმგებლიანი მოქალაქის" ფარგლებში შერჩეული კონკურსანტებისთვის ტრენინგ–სემინარი გაიმართა.  მას უძღვებოდნენ, მინდია სალუქვაძე, „ინოვაცებისა და სამოქალაქო განვითარების ცენტრის - პროგრესის სახლის" ხელმძღვანელი და სამოქალაქო საზოგადოების ინსტიტუტის ბათუმის ფილიალის ხელმძღვანელი, ნათია აფხაზავა. სემინარი ჩატარდა პროექტის „ადგილობრივი განვითარების აქტორების მდგრადი კავშირის შექმნა საქართველოში", რომელიც ხორციელდება ფონდი „პური სამყაროს” (Bread for the World) მხარდაჭერით.

თბილისი. შეზღუდული შესაძლებლობების მქონე პირთა დაცვის დღესთან დაკავშირებით, საზოგადოებრივი ორგანიზაციები განცხადებას აქვეყნებენ. „2003 წლიდან საქართველოში შეზღუდული შესაძლებლობის მქონე პირთა უფლებების დაცვის დღე 14 ივნისს აღინიშნება. ეს დღე არის სახელმწიფოს ვალდებულებების კიდევ ერთი სიმბოლური გამოხატულება, ეფექტიანად დაიცვას შშმ პირთა უფლებები, გააუმჯობესოს ამ თემის წევრთა სოციალური დაცვის სტანდარტები და ეფექტიანად უზრუნველყოს საზოგადოებიდან მათი გარიყვისა და მარგინალიზაციის პრევენცია", - აღნიშნულია განცხადებაში, - „სახელმწიფოს მიერ ფორმალურ დონეზე გაცხადებული ნება, ცალკეული მიმართულებებით გადადგმული ფრაგმენტული ნაბიჯების გარდა, ძირითადად მხოლოდ ფურცელზე რჩება და შშმ პირთა უფლებრივი მდგომარეობა რეალურად არ იცვლება - ისინი კვლავ დგანან დისკრიმინაციისა და მარგინალიზაციის პრობლემის პირისპირ".   სრულად წყარო: https://emc.org.ge

თბილისი. „ინფორმაციის თავისუფლების განვითარების ინსტიტუტმა" (IDFI), საჯარო ინფორმაციის პროაქტიულად გამოქვეყნების თვალსაზრისით, საქართველოს საჯარო უწყებებში არსებული ვითარება შეისწავლა. „წინამდებარე ანგარიშში წარმოდგენილია საქართველოში საჯარო ინფორმაციის პროაქტიული ხელმისაწვდომობის შეფასება 2019 წლის მაისის მდგომარეობით და მოცემულია ინფორმაციის პროაქტიული ხელმისაწვდომობის ტენდეციები 2014 წელთან შედარებით. ანგარიში მოიცავს ასევე საჯარო დაწესებულებათა პროაქტიული გამჭვირვალობის რეიტინგებს", - ვკითხულობთ IDFI-ის მიერ გავრცელებულ ინფორმაციაში, - „IDFI-მ შეისწავლა საჯარო ინფორმაციის პროაქტიული გამოქვეყნების პრაქტიკა 100 საჯარო დაწესებულებაში და ამ მიზნით განახორციელა შემდეგ უწყებათა ვებ-გვერდების დეტალური მონიტორინგი: საქართველოს პარლამენტი, საქართველოს პრეზიდენტის ადმინისტრაცია, საქართველოს მთავრობის ადმინისტრაცია, 11 - სამინისტრო/სახელმწიფო მინისტრის აპარატი, 86 - სამინისტროს დაქვემდებარებული სსიპ და საქვეუწყებო დაწესებულება".  სრულად წყარო: ორგანიზაციის ვებგვერდი

სამეგრელო. კამპანიის ძალაევროპაშია ფარგლებში, 13 ივნისს, „საერთაშორისო გამჭვირვალობა - საქართველო", სოფელ რუხსა და ანაკლიას ეწვია. „მოსახლეობის აქტიური ჩართულობით ძალიან გულახდილად ვისაუბრეთ იმ საფრთხეებზე, რაც რუსული რბილი ძალის მოქმედებას უკავშირდება და მიმართულია ჩვენი ქვეყნის ევროპული და ევროატლანტიკური მისწრაფებების წინააღმდეგ”, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი...

თბილისი. „ადამიანის უფლებების სწავლებისა და მონიტორინგის ცენტრი" (EMC) აქვეყნებს ცოტნე ცხვედიანის თვალსაზრისს - „მეორე ხარისხის მენეჯერები მოქალაქეების წინააღმდეგ". „ქვეყნებში, სადაც პოლიტიკურ სცენაზე არ არსებობენ ტრადიციული პარტიები, ხალხი უფრო ხშირად იძულებულია პოლიტიკურ სკანდალებს მიჰყვეს კუდში. ამგვარი რეალობა დამახასიათებელია ყოფილი საბჭოთა და პოსტ-სოციალისტური ქვეყნებისთვის. აქ პარტიების ადგილი დაიკავეს ახალმა პოლიტიკოსებმა, რომლებიც თავიანთ კამპანიებს აგებდნენ პოლიტიკის მენეჯერიზაციის მეშვეობით. პოლიტიკური თეორიების, მეცნიერული ცოდნის ადგილს იკავებს პოლიტოკოსთა იმიჯები, მათი პერსონები. ამგვარი მიდგომით პოლიტიკა გაგებულია, როგორც ბიზნესი და, შესაბამისად, ქვეყანა იმართება, როგორც კერძო ფირმა. პარალელურად, იწყება პოლიტიკის მორალიზაცია", - აღნიშნულია თვალსაზრისში. სრულად  წყარო: ორგანიზაციის ვებგვერდი

თბილისი. „ტოლერანტობისა და მრავალფეროვნების ინსტიტუტი" (TDI) პედაგოგებისთვის "წილხვდომილობის” შესახებ ლექციების ჩატარებას ეხმაურება. „8 ივნისს მედიისა და სოციალური ქსელების მეშვეობით ცნობილი გახდა, რომ სხვადასხვა რეგიონში საჯარო სკოლების ასეულობით მასწავლებელს ღვთისმშობლის წილხვდომილობის დღესასწაულის შესახებ თეოლოგიური ლექციები ჩაუტარეს. გავრცელებული ინფორმაციით, პედაგოგების ნაწილს ლექციაზე დასწრება დაავალეს და განსახილველი თემის შესახებ წინასწარ არ შეატყობინეს. პედაგოგებმა აღნიშნეს, რომ ლექციები დაეთმო ქრისტიანობისა და სახარების არსზე საუბარს და არ ყოფილა ინტერაქტიული. ამასთან, საყურადღებოა, რომ წალკის რაიონიდან რუსთავში ლექციაზე დასასწრებად ჩასული პედაგოგების უმრავლესობა მუსლიმი იყო", - ვკითხულობთ განცხადებაში. სრულად  წყარო: ორგანიზაციის ვებგვერდი

თბილისი. საია-მ საქართველოს პარლამენტს წარუდგინა კრიტიკული შენიშვნები საქართველოს შინაგან საქმეთა სამინისტროს მიერ მომზადებულ და საქართველოს მთავრობის მიერ ინიცირებულ საკანონმდებლო პაკეტთან დაკავშირებით. საია-ს მიაჩნია, რომ „პოლიციის შესახებ" კანონში ინიცირებული ნორმები არ შეესაბამება საქართველოს კონსტიტუციის მეორე თავით გარანტირებულ ძირითად უფლებებს, საქართველოს საერთაშორისო შეთანხმებებით ნაკისრ ვალდებულებებს და, აგრეთვე, პერსონალურ მონაცემთა დაცვის შესახებ საქართველოს მოქმედი კანონმდებლობით განმტკიცებულ ძირითად სამართლებრივ პრინციპებს. სრულად  წყარო: ორგანიზაციის ვებგვერდი

თბილისი. სახალხო დამცველთან არსებულმა ეროვნულ უმცირესობათა საბჭომ, დღეს, გამართა მრგვალი მაგიდა თემაზე – „ეროვნული უმცირესობების მონაწილეობა/ჩართულობა გადაწყვეტილების მიღების პროცესში". ღონისძიება, რომელშიც ხელისუფლების, საერთაშორისო და საზოგადოებრივი ორგანიზაციების წარმომადგენლები მონაწილეობდნენ, აშშ–ს საერთაშორისო განვითარების სააგენტოს (USAID) მიერ დაფინანსებული, საქართველოს გაეროს ასოციაციის (UNAG) „ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის (PITA) ორგანიზებით გაიმართა. სრულად  წყარო: სახალხო დამცველის ვებგვერდი

თბილისი. საზოგადოებრივი ორგანიზაციები მოუწოდებენ საქართველოს პარლამენტს, დროულად იმსჯელოს იუსტიციის უმაღლესი საბჭოს წევრის, ზაზა ხარებავასთვის უფლებამოსილების შეწყვეტის თაობაზე. „საქართველოს იუსტიციის უმაღლესი საბჭო იწყებს უზენაესი სასამართლოს მოსამართლეთა შერჩევის პროცესს. დღეს, 7 ივნისს, გაიმართება კონკურსში მონაწილე პირთა კანდიდატად რეგისტრაციის სხდომა, რომელსაც რამდენიმე ეტაპად მოყვება ფარული კენჭისყრები საბჭოში. ამ ვითარებაში, კრიტიკულად მნიშვნელოვანია, საქართველოს პარლამენტმა უმოკლეს ვადებში იმსჯელოს იუსტიციის უმაღლესი საბჭოს არამოსამართლე წევრის - ზაზა ხარებავას - საბჭოში არჩევის კანონიერების საკითხსა და მისთვის უფლებამოსილების შეწყვეტაზე. 2019 წლის 14 მაისს კოალიციამ „დამოუკიდებელი და გამჭვირვალე მართლმსაჯულებისთვის" საქართველოს პარლამენტს მიმართა მოთხოვნით, შეისწავლოს იუსტიციის უმაღლესი საბჭოს არამოსამართლე წევრის - ზაზა ხარებავას არჩევის კანონიერების საკითხი. კოალიციის განცხადებით, ზაზა ხარებავას არჩევის პროცესში დარღვეულია კანონის მოთხოვნები, რამდენადაც მისი კანდიდატურა პარლამენტს არაუფლებამოსილმა სუბიექტმა წარუდგინა", - ვკითხულობთ განცხადებაში. სრულად  წყარო: https://emc.org.ge

თბილისი. საქართველოს სახალხო დამცველის მიმართვის საფუძველზე, ეუთოს დემოკრატიული ინსტიტუტებისა და ადამიანის უფლებების ორგანიზაცია (OSCE/ODIHR) საქართველოს უზენაესი სასამართლოს მოსამართლეთა შერჩევის მიმდინარე პროცესს დააკვირდება. „უზენაესი სასამართლოს მოსამართლეთა შერჩევის პროცესის მაღალი მნიშვნელობის გამო, საქართველოს სახალხო დამცველმა მიმდინარე წლის 27 მაისს მიმართა ეუთოს დემოკრატიული ინსტიტუტებისა და ადამიანის უფლებების ორგანიზაციას და სთხოვა აღნიშნული პროცესის მონიტორინგი. გასათვალისწინებელია, რომ უზენაესი სასამართლოს მოსამართლეების შერჩევის საკითხზე, ასევე სახალხო დამცველის თხოვნით, ამავე ორგანიზაციამ მიმდინარე წლის 17 აპრილს გამოაქვეყნა სამართლებრივი მოსაზრება და რეკომენდაციები პარლამენტში ინიცირებულ კანონპროექტთან დაკავშირებით. მოსამართლეთა შერჩევის პროცესის მონიტორინგი ამ პროცესის ლოგიკური გაგრძელება იქნება. მიმდინარე წლის 30 მაისის წერილით, ეუთოს დემოკრატიული ინსტიტუტებისა და ადამიანის უფლებების ორგანიზაციამ დაადასტურა საკუთარი მზაობა, დააკვირდეს შერჩევის პროცესს და მის შესაბამისობას როგორც ეროვნულ კანონმდებლობასთან, ასევე, საერთაშორისო სტანდარტებსა და კარგ პრაქტიკასთან", - ვკითხულობთ სახალხო დამცველის აპარატის მიერ გავრცელებულ ინფორმაციაში. სრულად  წყარო: სახალხო დამცველის აპარატის ვებგვერდი

თბილისი. „ქალთა ფონდი საქართველოში" გთავაზობთ ფონდის აღმასრულებელი დირექტორის, ბლოგს „აქტივიზმი ყოველთვის საფრთხეშია". „ აქტივიზმი საქართველოში საფრთხეშია - ალბათ, არა მარტო საქართველოში, მაგრამ ჩემთვის ესაა უპირველესად საგანგაშო და ამიტომ მოგმართავთ - საქართველოში აქტივიზმი საფრთხეშია!", - მიიჩნევს ნანა ფანცულაია, - „არა და ჩვენ იმ ეპოქაში ვცხოვრობთ, როცა ყველაზე ხელშესახები პოზიტიური ცვლილებები ქვეყნის ცხოვრებაში სწორედ აქტივიზმს შეუძლია მოიტანოს, სოციალურ მოძრაობებს შეუძლიათ გამოიწვიონ. ეს არაა თეორიული განაცხადი, ამის არა ერთი მაგალითი ჩვენც გვაქვს, და არა ერთ სფეროში. აქტივისტები და აქტივისტური კამპანიები არის ის ძალა, რომელიც მოქალაქეებს ზრდის, სამოქალაქო საზოგადოებას ავითარებს და სამართლიანობის შეგნებას უყალიბებს. კიდევ ბევრი რამის თქმა შეიძლება, რისთვის გვჭირდება აქტივიზმი, მაგრამ მგონი არაა საჭირო, რადგან ეს, ვფიქრობ, უკვე ვიცით. ახლა უნდა ვთქვათ, რა სჭირდება თვითონ აქტივიზმს". სრულად  წყარო: ორგანიზაციის ვებგვერდი

თბილისი. საქართველოს სტრატეგიული კვლევებისა და განვითარების ცენტრისა და პრო ბონო ქსელის ორგანიზებით, 20 მაისს, თბილისის მედიათეკაში, გაიმართა „პრო ბონო მარათონი 2019“. მარათონის ფარგლებში მონაწილე კომპანიებმა, საზოგადოების სასიკეთოდ მომუშავე სოციალური საწარმოებისა და სათემო ორგანიზაციების, საკომუნიკაციო ყველაზე მნიშვნელოვანი სოციალური მედიის გვერდის (Facebook) განახლება უზრუნველყვეს. მარათონი გაიმართა პროექტის „სამოქალაქო საზოგადოების განვითარების ინიციატივის“ ფარგლებში, რომლის მხარდამჭერია ევროკავშირი და კონრად ადენაუერის ფონდი.

თბილისი. კონსულტაციის და ტრენინგის ცენტრმა (СTC) გამოსცა ოქსფორდის სამოქალაქო საზოგადოების სახელმძღვანელოს ქართული თარგმანი. „ოქსფორდის სამოქალაქო საზოგადოების სახელმძღვანელო მკითხველს საშუალებას აძლევს გაეცნოს სამოქალაქო საზოგადოების წვლილს, ისტორიას და თეორიებს მსოფლიოს მასშტაბით, განსხვავებულ კულტურულ კონტექსტში. სახელმძღვანელოს გამოცემა და კურსის დანერგვა შესაძლებელი გახდა ევროკავშირისა და კონრად ადენაუერის ფონდის (KAS) მხარდაჭერით, პროექტის „სამოქალაქო საზოგადოების განვითარების ინიციატივა" ფარგლებში", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

აჭარა. 3-4 ივნისს, ხელვაჩაურის მუნიციპალიტეტის ახალგაზრდულ ცენტრში, სამოქალაქო საზოგადოების ინსტიტუტის მიერ გამოცხადებული კონკურსის „გახდი პასუხისმგებლიანი მოქალაქის" ფარგლებში შერჩეული კონკურსანტებისთვის გაიმართა ტრენინგ–სემინარი. მას უძღვებოდა, მინდია სალუქვაძე, „ინოვაცებისა და სამოქალაქო განვითარების ცენტრის - პროგრესის სახლის" ხელმძღვანელი. სემინარი ჩატარდა პროექტის „ადგილობრივი განვითარების აქტორების მდგრადი კავშირის შექმნა საქართველოში", რომელიც ხორციელდება ფონდი „პური სამყაროს” (Bread for the World) მხარდაჭერით.

თბილისი. საქართველოს სტრატეგიული კვლევებისა და განვითარების ცენტრის (CSRDG) ორგანიზებით, დაიწყო ტრენინგი „ევროკავშირ-საქართველოს ასოცირების შეთანხმების თაობაზე". „ტრენინგი ეხმარება არასამთავრობო ორგანიზაციების წარმომადგენლებს ასოცირების შეთანხმებით გათვალისწინებული ვალდებულებათა შესრულების მონიტორინგის განხორციელებაში. გაითვალისწინეთ, ტრენინგების ციკლის დასრულების შემდგომ, გამოცხადდება მცირე გრანტების კონკურსი ქართული რეგიონული არასამთავრობო ორგანიზაციებისათვის, ასოცირების შეთანხმებით გათვალისწინებულ ვალდებულებათა შესრულების მონიტორინგისათვის", ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. კონსულტაციის და ტრენინგის ცენტრმა გამოსცა ოქსფორდის სამოქალაქო საზოგადოების სახელმძღვანელოს ქართული თარგმანი. გამოცემა განკუთვნილია სამოქალაქო საზოგადოების შესწავლით დაინტერესებული ნებისმიერი პირისთვის და წარმოადგენს ამ თემაზე ყოვლისმომცველ საბაზისო ნაშრომს. წიგნი მკითხველს საშუალებას აძლევს გაეცნოს სამოქალაქო საზოგადოების წვლილვს, ისტორიას და თეორიებს მსოფლიოს მასშტაბით, განსხვავებულ კულტურულ კონტექსტში. სახელმძღვანელო გამოიცა ევროკავშირისა და კონრად ადენუერის ფონდის მხარდაჭერით, პროექტის "სამოქალაქო საზოგადოების განვითარების ინიციატივის" ფარგლებში.

თბილისი. საქართველოს სტრატეგიული კვლევებისა და განვითარების ცენტრის ორგანიზებით გაიმართა ტრენინგი ევროკავშირსა და საქართველოს ასოცირების შეთანხების შესახებ. ტრენინგი ხელს უწყობს არასამთავრობო ორგანიზაციების წარმომადგენლებს ასოცირების შეთანხმებით გათვალისწინებული ვალდებულებათა შესრულების მონიტორინგის განხორციელებაში. ტრენინგის ციკლის დასრულების შემდგომ გამოცხადდება საგრანტო კონკურსი საზოგადოებრივი ორგანიზაციებისთვის ასოცირების შეთანხმებით გათვალისწინებული ვალდებულებების შესრულების მონიტორინგისთვის. ტრენინგი გაიმართა პროექტის „სამოქალაქო საზოგადოების განვითარების ინიციატივის“ ფარგლებში, რომლის მხარდამჭერია ევროკავშირი და კონრად ადენაუერის ფონდი.

2019 წლის 20-24 მაისს, ჰააგაში, სისხლის სამართლის საერთაშორისო სასამართლოსა და საზოგადოებრივ ორგანიზაციებს შორის, ყოველწლიური სტრატეგიული მრგვალი მაგიდის შეხვედრების მორიგი სერია გაიმართა. შეხვედრები შეეხებოდა მესამე სექტორსა და სასამართლოს შორის თანამშრომლობის საკითხებსა და იმ გამოწვევებს, რომელთა წინაშე სასამართლოს ორგანოები დგას. მრგვალი მაგიდის შეხვედრებში მონაწილეობდნენ სისხლის სამართლის საერთაშორისო სასამართლოს მოსამართლეები და პროკურორი, ასევე პროკურორის ოფისის, რეგისტრატურისა და სასამართლოს სხვა სექციების წარმომადგენლები, მესამე სექტორის მხრიდან კი - ადგილობრივი საზოგადოებრივი ორგანიზაციებისა და საერთაშორისო უფლებადამცველი ორგანიზაციების წარმომადგენლები. საქართველოდან, შეხვედრებს ესწრებოდნენ: „ადამიანის უფლებათა ცენტრის", „კონსტიტუციის 42-ე მუხლის", „საერთაშორისო სამართლიანობის", „საქართველოს ახალგაზრდა იურისტთა ასოციაციისა" და „წამების მსხვერპლთა ფსიქო-სოციალური და სამედიცინო რეაბილიტაციის ცენტრის" წარმომადგენლები. სრულად  წყარო: gyla.ge

თბილისი. საქართველოს სახალხო დამცველი საქართველოს შინაგან საქმეთა სამინისტროს მიერ „თბილისი პრაიდის" ორგანიზატორებთან შეხვედრის თაობაზე, 2019 წლის 31 მაისს გავრცელებულ განცხადებას ეხმიანება. სამინისტროს განმარტებით, დაგეგმილ ადგილებზე და დაგეგმილი ფორმატით ღონისძიებების ჩატარება, ჩართული პირების უსაფრთხოებასთან დაკავშირებული რისკების გათვალისწინებით, შეუძლებელია. ორგანიზატორთა ცნობით, საქართველოს შინაგან საქმეთა სამინისტრომ მათ „თბილისი პრაიდის" ფარგლებში დაგეგმილი „ღირსების მარშის" დახურულ სივრცეში გადატანა შესთავაზა. საქართველოს სახალხო დამცველი ხაზგასმით აღნიშნავს, რომ კანონმდებლობის მოთხოვნათა დაცვით მშვიდობიანი შეკრებისა და მანიფესტაციის ჩატარება კონსტიტუციით გარანტირებული უფლებაა. სახელმწიფო ვალდებულია, უზრუნველყოს მშვიდობიანი დემონსტრანტების მიერ ამ უფლების სრულფასოვანი რეალიზება და შესაბამისი რესურსის მობილიზებით, მოახდინოს კერძო პირებისგან მათი სათანადო დაცვა. სრულად  წყარო: სახალხო დამცველის აპარატის ვებგვერდი

თბილისი. საქართველოს სახალხო დამცველმა საქართველოში ადამიანის უფლებათა და თავისუფლებათა დაცვის მდგომარეობის შესახებ 2018 წლის ანგარიშში ხაზი გაუსვა, რომ საქართველოში ადრეულ ასაკში ქორწინება კვლავ ერთ-ერთ გამოწვევად რჩება. მიუხედავად იმისა, რომ ადრეულ ასაკში ქორწინების რეგისტრაცია საქართველოს კანონმდებლობით აკრძალულია, როგორც ანგარიშშია ხაზგასმული, „როდესაც საქმე ეთნიკურ უმცირესობას ეხება, ამ კონკრეტულ დანაშაულთან მიმართებით მკაცრი პოლიტიკა არ ტარდება". შესაბამისად, დღემდე პრობლემურია არასრულწოვანი გოგოების მოტაცება მათი დაქორწინების მიზნით, ძირითადად კი ეთნიკურ უმცირესობებით დასახლებულ რეგიონებში. „თბილისის ადამიანის უფლებათა სახლი" წარმოადგენს ეთნიკურად აზერბაიჯანელ ნარგიზა ემანოვას, რომელიც ამ მანკიერ პრაქტიკას - აზერბაიჯანულ თემში ადრეულ და ბავშვობის ასაკში ქორწინებას ებრძვის. სრულად  წყარო: https://hrht.ge