იმერეთი. ყოფილმა მსჯავრდებულებმა და პრობაციონერებმა ქუთაისში ეკონომიკური საქმიანობის განსავითარებლად მატერიალური ფასეულობები მიიღეს. „ევროკავშირის მიერ დაფინანსებული პროექტის „განათლება რეინტეგრაციისთვის - გზა საზოგადოებაში დასაბრუნებლად" ფარგლებში 16 დეკემბერს ქუთაისში გაიმართა ყოფილი მსჯავრდებულებისა და პრობაციონერებისათვის მატერიალური ფასეულობების გადაცემის ცერემონია. პროექტის მიზანია კანონთან კონფლიქტში მყოფი პირების საზოგადოებაში ინტეგრაციის პროცესის ხელშეწყობა სამთავრობო ორგანიზაციებს, ბიზნეს კომპანიებსა და საზოგადოებრივ ორგანიზაციებს შორის თანამშრომლობის გზით). ღონისძიებაზე პროექტის 12 ბენეფიციარს ეკონომიკური საქმიანობის დასაწყებად ან განსავითარებლად სხვადასხვა საშუალებები - მანქანა-დანადგარები, ხელსაწყოები, სამუშაო იარაღები და ინვენტარი, წარმოების საშუალებები და სხვა - გადაეცა", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

აჭარა. დასრულდა ქობულეთის მუნიციპალიტეტის საჯარო სკოლების მონაწილეობით მიმდინარე „ერთი შეშის აქცია", რომელიც ცივ ზამთარში გათბობის გარეშე დარჩენილი უმწეო მოხუცებისთვის შეშის შეგროვებას ითვალისწინებდა. „სამწუხაროდ სოციალურად დაუცველ მოხუცებს არ აქვთ შესაძლებლობა გაზით გათბობის თანხა გადაიხადონ ან შეშა თავად იყიდონ, საქველმოქმედო აქციით შეგროვებული შეშა კი მოხუცების თბილ ზამთარს უზრუნველყოფს. ასოციაცია დიდ მადლობას უხდის თანადგომისთვის ჩაქვის პირველ, ციხისძირის, ზედა აჭყვას, ქაქუთის, ლეღვას პირველ, ალამბრის, ქვედა კვირიკეს, ქვედა სამებას, წყავროკას, ქობულეთის 1 საჯარო და 6 საჯარო სკოლების დირექციას და თითოეულ მოსწავლეს! მათი ძალისხმევით შეგროვებული შეშა 12 მოხუცს ცივ ზამთარს გადაატანინებს", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

გურია. ოზურგეთის დემოკრატიული ჩართულობის ცენტრმა და მასთან არსებულმა „გენდერული თანასწორობის სამოქალაქო კლუბმა" „ჯანმრთელობის დაცვისა და ადამიანის უფლებების კვლევის ცენტრის" პროექტის ფარგლებში „გურიის რეგიონში სამოქალაქო საზოგადოების ადგილობრივი ორგანიზაციებისა და სოციალური მუშაკების როლის გაძლიერება ოჯახების მხარდაჭერის მიზნით" გამოაცხადა ნახატების კონკურსი. კონკურსში მონაწილეობა მიიღო ოზურგეთის, ლანჩხუთის და ჩოხატაურის მუნიციპალიტეტებში მცხოვრებმა 7-დან 18 წლამდე მოზარდებმა. კონკურსის ფარგლებში გაიმართა გამოფენა, სადაც შერჩეული იქნება 12 ნამუშევარი და განთავსდება 2018 წლის სამაგიდო კალენდარზე", ნათქვამია დემოკრატიული ჩართულობის ცენტრის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. სახალხო დამცველმა რეკომენდაციით მიმართა ბათუმის, ფოთის, გორის და ზუგდიდის მუნიციპალიტეტების საკრებულოებს, შეზღუდული შესაძლებლობის მქონე პირთა მიერ სატრანსპორტო საშუალებების პარკირების ადგილებით დაუბრკოლებლად სარგებლობის შესახებ. საკითხის შესწავლის შედეგად გაირკვა, რომ მუნიციპალიტეტებში შშმ პირების მიერ ავტოსატრანსპორტო საშუალებების პარკირების წესები კონკრეტული აქტით მხოლოდ რამდენიმე თვითმმართველ ერთეულში რეგულირდება. თუმცა, მოქმედი რეგულაციები გარკვეულ ხარვეზებს შეიცავს. კერძოდ, შშმ პირის მიერ სპეციალური სადგომით სარგებლისათვის აუცილებელია შესაბამისი საცნობი ნიშნის ქონა, თუმცა დადგენილებებით არ არის განსაზღვრული საცნობი ნიშნის გაცემაზე პასუხისმგებელი უწყება. სრულად  წყარო: ორგანიზაციის ვებგევრდი

თბილისი. 15 დეკემბერს გაიმართა ორგანიზაციის „კავშირი ადამიანებისთვის განსაკუთრებულ ზრუნვას რომ საჭიროებენ" ტრადიციული საშობაო-საახალწლო ბაზრობა. „გვინდა თითოეულ სტუმარს დიდი მადლობა გადავუხადოთ მობრძანებისთვის, რომ გამონახეს დრო და გაგვახარეს. მადლობას ვუხდით ჩვენს ორგანიზაციაში არსებული სემინარის მეორე კურსელებს, რომლებმაც მოაწყვეს კაფე და სტუმრებს გაუმასპინძლდნენ გემრიელი ნუგბარებით. ბაზრობიდან შემოსული თანხა მოხმარდება ჩვენი ორგანიზაციის ბენეფიციარების საჭიროებებს", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

გურია. 15 დეკემბერს, „ახალგაზრდა პედაგოგთა კავშირის" ახალგაზრდული ცენტრის წევრებმა ადვოკატირების პროგრამის ფარგლებში, საკუთარ თემებში არსებული პრობლემების პრეზენტაციები წარუდგინეს ადგილობრივი თვითმმართველობების წარმომადგენლებს. „შეხვედრაში მონაწილეობდნენ, ოზურგეთის მუნიციპალიტეტის დაბა ნარუჯის, ნასაკირალის, ლაითურისა და ლანჩხუთის მუნიციპალიტეტის სოფ. ნიგვზიანის ახალგაზრდები. გასულ თვეში, აღნიშნული სოფლების ახალგაზრდებთან გაიმართა სამუშაო შეხვედრა, სადაც გამოვლინდა სოფლებში არსებული პრობლემები და საჭიროებები. მიღებულ ინფორმაციაზე დაყრდნობით მომზადდა პრეზენტაციები. დაიგეგმა პირველი შეხვედრა ხელისუფლების წარმომადგენლებთან, რათა გადაწყვეტილების მიმღებ პირებთან ერთად ემსჯელათ სოფლების საჭიროებების მოგვარების სტრატეგიებზე. ყურადღება გამახვილდა საბავშვო ბაღების აღსაზრდელთა ტრანსპორტირების, სათამაშო მოწყობილობებისა და საბავშვო ბიბლიოთეკის პრობლემაზე. თემებში ამბულატორიების, აფთიაქების აუცილებლობაზე. ახალგაზრდებისთვის სამეწარმეო საქმიანობისა და კომპიუტერული კურსების შეთავაზების, შეზღუდული შესაძლებლობის მქონე ბავშვების საჭირო მედიკამენტებით უზრუნველყოფის შესახებ", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. „ახალგაზრდა პედაგოგთა კავშირი" ახორციელებს პროექტს: „სახელმწიფო ზრუნვის სისტემაში მყოფი ხანდაზმული და შშმ პირების კეთილდღეობაზე ზრუნვა". პროექტის მიზანია „შშმ და ხანდაზმულ პირთა სადღეღამისო მომსახურებების მიწოდების პროცესში სოციალური მუშაკისა და მომსახურების მიმწოდებელი ორგანიზაციების ფუნქციების გამმიჯვნელი დოკუმენტის" შექმნა. 14 დეკემბერს, ორგანიზაციის თბილისის ოფისში მოეწყო სამუშაო ჯგუფის მესამე, დასკვნითი შეხვედრა და დისკუსიის შედეგად, საბოლოოდ ჩამოყალიბდა დოკუმენტის მუხლები. სრულად... წყარო: ორგანიზაციის ვებგვერდი სოციალურ ქსელში

იმერეთი. 13 დეკემბერს, სამტრედიის შეზღუდული შესაძლებლობის მქონე ბავშვთა დღის ცენტრში შემაჯამებელი ღონისძიება გაიმართა. „ღონისძიებაზე განათლების განვითარების და დასაქმების ცენტრის დირექტორმა ლიკა კილაძემ დღის ცენტრში განხორციელებული 2017 წლის მნიშვნელოვანი აქტივობები შეაჯამა და კიდევ ერთხელ გაუსვა ხაზი იმას, რომ წელსაც დღის ცენტრის აღსაზრდელთათვის სრულფასოვანი მომსახურების გასაწევად დამატებითი რესურსების მოძიება სახელმწიფო დაფინანსებასთან ერთად სხვადასხვა სექტორის, მათ შორის კერძო სექტორისა და ადგილობრივი თვითმმართველობის მხარდაჭერით იქნა მიღწეული", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. კოალიცია ბავშვებისა და ახალგაზრდებისთვის ეხმაურება ქალაქ თბილისში, ხორავას ქუჩაზე და წყალტუბოს მუნიციპალიტეტში არასრულწლოვანთა მკვლელობის ფაქტებს. კოალიცია მიიჩნევს, რომ „ეს ფატალური შემთხვევები ბავშვთა მიმართ და ბავშვთა შორის არსებული ძალადობისადმი ტოლერანტობის კულტურის შემაშფოთებელი გამოძახილია, სადაც მსხვერპლიც და მოძალადეც თავად არასრულწლოვანი ხდება. კოალიცია მოუწოდებს საქართველოს მთავრობის ყველა პასუხისმგებელ უწყებას, განახორციელონ ქმედითი ღონისძიებები ბავშვთა მიმართ და ბავშვთა შორის ძალადობის აღმოსაფხვრელად, რაც გულისხმობს სკოლებში ფსიქოლოგიური მხარდაჭერის სამსახურის გააქტიურებას და სოციალური მუშაობის დანერგვას....", ნათქვამია განცხადებაში. სრულად... წყარო: ccy.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: „შრომითი უფლებები და სოციალური პოლიტიკა ევროკავშირსა და საქართველოს შორის 2017 – 2020 წლების ასოცირების დღის წესრიგში". „განახლებული დღის წესრიგი ადგენს მხარეებს შორის შეთანხმებულ პრიორიტეტებს ასოცირების შეთანხმების, მათ შორის ღრმა და ყოვლისმომცველი თავისუფალი ვაჭრობის სივრცეზე (DCFTA) არსებული თავის შესრულების მიზნით. განახლებული დოკუმენტის მიხედვით, გამოყოფილია მოკლევადიანი და საშუალოვადიანი პრიორიტეტები, რაც გულისხმობს პირველ შემთხვევაში 2018 წლის ბოლოსათვის, ხოლო მეორე შემთხვევაში 2020 წლის ბოლოსათვის მათ მიღწევას ან ამ მიმართულებით მნიშვნელოვან პროგრესს. განახლებული დღის წესრიგი მრავალ საკითხთან ერთად აქცენტს აკეთებს სოციალური და ეკონომიკური უფლებების რეალიზებისათვის მინიმალური გარანტიების უზრუნველყოფაზე და ადგენს ამ კუთხით პრიორიტეტულ მიმართულებებს. წინამდებარე დოკუმენტი მოიცავს იმ პრიორიტეტების ჩამონათვალს, რაც დღის წესრიგის ცალკეულ თავებშია მოცემული და რისი შესრულების ვალდებულებასაც იღებს საქართველო დადგენილი ვადების მიხედვით", ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. პარტნიორობა ადამიანის უფლებებისთვის (PHR) მარიამ ბეგიაშვილის ბლოგპოსტს: „სოციალური მუშაკის ფუნქცია ინტერნეტში ბავშვზე შესაძლო ძალადობის შემთხვევებისას". „მშობლები თუ ბავშვზე მზრუნველი ადამიანები ვერ იაზრებენ თუ რა საფრთხის შემცველია მათი ქმედებები. განსაკუთრებით კი, ჩვენი კულტურული თავისებურებებიდან გამომდინარე, სადაც ბავშვების „პასპორტის ჩვენება" და ახალშობილის შიშველი პოზირება ერთგვარი ტრადიციის ნაწილია. ხოლო დამცირება და თვითშეფასების დაქვეითება, აღზრდის ელემენტად მიიჩნევა. მშობლებს ჯერ კიდევ სწამთ, რომ არ უნდა შეაქონ საკუთარი შვილები, არ წაახალისონ, რადგან მათი ამგვარი დამოკიდებულება ბავშვებს უფრო მეტ მოტივაციას მისცემს და გათამამდებიან”, ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

აჭარა. ორგანიზაცია „ღირსეული სიბერე" აქვეყნებს განცხადებას, რომლის თანახმადაც საახალწლო საქველმოქმედო აქცია „კეთილი ახალი წელი" გაიმართება. შეიძინეთ ორგანიზაციის ბენეფიციარების მიერ დამზადებული საახალწლო სათამაშოები: ბედის ანგელოზები, სიკეთის ბურთები, იღბალის გვირგვინები და ზოდიაქოს ნიშნები. „თითოეული სათამაშოს მორთვაზე ხანდაზმულებმა ბევრი იშრომეს, ბევრი სითბო და იმედი ჩააქსოვეს ნაძვის ხის ლამაზ მოსართავებში. შემოსული თანხა სრულად მოხმარდება მარტოხელა მოხუცთათვის საახალწლო ტკბილეულის შეძენას. 15 ლარის შენაძენი ერთი ბენეფიციარის ტკბილეულის პაკეტის ღირებულებას უზრუნველყოფს. ერთად ვაკეთოთ სიკეთე და გავულამაზოთ მოხუცებს საახალწლო დღეები! ბათუმი - ქობულეთის ფარგლებში სათამაშოების მიტანა უფასოა. აჭარის ფარგლებს გარეთ შენაძენი ფოსტით გამოიგზავნება (ფოსტის ხარჯები საშუალოდ 5 ლარია)", ნათქვამია ორგანიზაციის ვებგვერდზე სოციალურ ქსელში. საკონტაქტო ტელეფონებია: მარიანა: 571 96 80 80; დარინა 577 45-25-09 სრულად... წყარო: ორგანიზაციის ვებგვერდი სოციალურ ქსელში

იმერეთი. შეზღუდული შესაძლებლობის მქონე პირთა საერთაშორისო დღესთან დაკავშირებით, ქუთაისის ახალგაზრდული ცენტრის მიერ კომპანია „მაკდონალდსთან" თანამშრომლობით, შშმ ბავშვებისათვის აქცია გაიმართა. ღონისძიების მიზანი იყო შშმ და სოციალურად დაუცველი ბავშვების სოციალიზაცია და ინტეგრაცია საზოგადოებაში, მხარეთა სოციალური პასუხისმგებლობების განაწილება და ბავშვზე მზრუნველობა. „მაკდონალდსმა ბავშვებს საჩუქრები გადასცა და ტკბილეულით გაუმასპინძლდა. შეზღუდული შესაძლებლობის მქონე პირთა საერთაშორისო დღე 1992 წელს, გაეროს მიერ დაარსდა და მისი მიზანია კიდევ ერთხელ გაამახვილოს ყურადღება იმ დისკრიმინაციასა და უგულვებელყოფაზე, რომელსაც შეზღუდული შესაძლებლობის მქონე პირები განიცდიან", ნათქვამია ორგანიზაციის ვებგვერდი სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

კახეთი. საქართველოს პრეზიდენტის სარეზერვო ფონდისა და ფონდ "ღია საზოგადოება-საქართველოს" მხარდაჭერით, პანკისის ხეობაში დაიწყო ადეკვატური სტანდარტების შესაბამისი დღის ცენტრის მშენებლობა, რომელიც 20 შშმ პირს მოემსახურება. პანკისის ხეობა არის ერთ-ერთი უნიკალური ადგილი, რომელიც კომპაქტურადაა დასახლებული ეთნიკური ქისტებით. დღის ცენტრის მშენებლობა 2018 წლის გაზაფხულზე დასრულდება და ის ხელს შეუწყობს შშმ პირების ინტეგრაციას საზოგადოებრივ ცხოვრებაში და გამოავლენს ამ ადამიანებში არსებულ პოტენციალს. სრულად  წყარო: ორგანიზაციის ვებგვერდი

თბილისი. 30 ნოემბერს, გაიმართა ფორუმი: „კორპორაციული სოციალური პასუხისმგებლობა და შრომითი სტანდარტები". „ფორუმის მსვლელობისას ადგილობრივი და საერთაშორისო ექსპერტები საუბრობდნენ ისეთი მნიშვნელოვანი საკითხების გარშემო, როგორიცაა საქართველოში შრომითი სტანდარტების დაცვა, სამუშაო გარემოს გაუმჯობესება და საერთაშორისო მოთხოვნების დაკმაყოფილება. ჩვენი მიზანი იყო ფორუმის საშუალებით, კორპორაციული სოციალური პასუხისმგებლობის მნიშვნელობის წარმოჩენა შრომითი სტანდარტების დანერგვასა და საერთაშორისო ხელშეკრულებების მოთხოვნათა შესრულებაში; ევროპული ქვეყნების გამოცდილების გაზიარება და საკითხის გარშემო დისკურსის სტიმულირება", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

სამეგრელო. 20-23 ნოემბერს ზუგდიდში, იუსტიციის სახლში, თემაზე „ეფექტური სოციალური და სამუშაოს მოძიების უნარები" 4 დღიანი ტრენინგი ჩატარდა, რომელსაც 25 ყოფილი მსჯავრდებული და პრობაციონერი დაესწრო. „მონაწილეთა ნაწილი შემდგომ ეტაპზე, ხელობის გადამზადების ორთვიან კურსებს გაივლის და შესაძლებლობა ექნება საქმიანობის დასაწყებად 400 ევროს მოცულობის გრანტი მიიღოს, ხოლო ნაწილი ბიზნეს ტრენინგებს დაესწრება და წარმატებული ბიზნეს წინადადებების შემუშავების შემდეგ 1200 და 3000 ევროს მოცულობის გრანტს მიიღებს ბიზნესის განსავითარებლად", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

კახეთი. ადამიანის უფლებების, რეგიონში არსებული პრობლემებისა და გამოწვევების საკითხებთან დაკავშირებით, სახალხო დამცველი საგარეჯოს, ყვარლის, სიღნაღის, დედოფლისწყაროს, ლაგოდეხის მუნიციპალიტეტების სოფლების მცხოვრებლებს შეხვდა. შეხვედრების მიხედვით, საერთო პრობლემები კახეთში ასეთია: საკარმიდამო და სახნავ–სათესი მიწების რეგისტრაციის სირთულე, მუნიციპალური ტრანსპორტის, ასევე, ბევრგან, ამბულატორიის არარსებობა, წყლის გრაფიკით მიეწოდება და დაბალი ხარისხი, სოციალური დახმარებების გაურკვეველი მიზეზებით მოხსნა. სრულად  წყარო: ორგანიზაციის ვებგვერდი

კახეთი. თელავის დემოკრატიული ჩართულობის ცენტრში, გაეროს მოსახლების ფონდის და დემოკრატიული ჩართულობის ცენტრების ერთობლივი პროექტის მცირე საგრანტო პროგრამის ფარგლებში, ასოციაცია „სოციალური ქოლგა" ახორციელებს „პროექტს „სამი თაობა პროგრესული ცვლილებებისთვის". პროექტის ფარგლებში, ტარდება საჯარო ლექცია სკოლის მოსწავლეებთან და პედაგოგებთან ჯანსაღი ცხოვრების და აივ შიდსის შესახებ. სრულად... წყარო: ცენტრის ვებგვერდი სოციალურ ქსელში

აჭარა. ასოციაცია „ღირსეული სიბერე" იწყებს აქციას, რომელიც ზამთარში გათბობის გარეშე დარჩენილი მარტოხელა მოხუცებისთვის შეშის შეგროვებას ითვალისწინებს. „სამწუხაროდ მათ არ აქვთ შესაძლებლობა გაზით გათბობის თანხა გადაიხადონ, საქველმოქმედო აქციით შეგროვებული შეშა კი მოხუცების თბილ ზამთარს უზრუნველყოფს. შეშა შეგროვდება რუსთაველის 36-ში, ორგანიზაციის ოფისის ეზოში. სოფლებში კი საჯარო სკოლების ეზოებში. შეშის ტრანსპორტირებას და დარიგებას ორგანიზაცია „ღირსეული სიბერე" უზრუნველყოფს", ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს სახალხო დამცველის აპარატმა, ფინეთის საგარეო საქმეთა სამინისტროს ფინანსური მხარდაჭერით, ნოემბერში ახალი პროექტი აამუშავა. პროექტი მიზნად ისახავს სასმელ წყალსა და სანიტარიაზე ხელმისაწვდომობის უფლების განხორციელების მონიტორინგს და ამ კუთხით ცნობიერების ამაღლების კამპანიის წარმოებას მთელი ქვეყნის მასშტაბით. განსაკუთრებული ყურადღება დაეთმობა სასმელი წყლისა და სანიტარიის ხელმისაწვდომობის მდგომარეობას რეგიონების საგანმანათლებლო დაწესებულებებში. სრულად  წყარო: ორგანიზაციის ვებგვერდი

იმერეთი. ქუთაისის ახალგაზრდული ცენტრის წევრებმა ფლი მარკეტის ორგანიზებაში მიიღეს მონაწილეობა. მეორე დღეს ისინი ქუთაისის ხანდაზმულთა სახლს ეწვივნენ და მოხუცებს ჰოთ დოგებით გაუმასპინძლდნენ. სრულად... წყარო: ორგანიზაციის ვებგვერდი სოციალურ ქსელში

სამცხე-ჯავახეთი. რეგიონში არსებულ პრობლემებსა და გამოწვევებთან დაკავშირებით სასაუბროდ, საქართველოს სახალხო დამცველი ბორჯომის, დაბა ბაკურიანისა და სოფელ ციხისჯვრის მოსახლეობას შეხვდა. ბუნებრივი აირის არარსებობა, მოუწესრიგებელი საგზაო ინფრასტრუქტურა, საბავშვო ბაღის არქონა, ამბულატორიისა და სკოლის სარემონტო შენობები, შეშის ჭრის გართულებული პროცედურები, მიწების რეგისტრაციის პრობლემა - მთლიანობაში, ეს საკითხები დაასახელეს ამ სოფლების მცხოვრებლებმა. მოსახლეობამ, ასევე, უკმაყოფილება გამოხატა „მაღალმთიანი რეგიონების სოციალურ-ეკონომიკური და კულტურული განვითარების შესახებ" კანონის მოქმედებით, რადგან მიაჩნია, რომ კანონი საზოგადოების გარკვეულ ჯგუფებს შერჩევით ეხება. სახალხო დამცველი ბორჯომის პლატოზე განსახლებულ დევნილებსაც შეხვდა და მათი პრობლემებიც მოისმინა. სრულად წყარო: ორგანიზაციის ვებგვერდი