აჭარა. 19 დეკემბერს, „დოროთეა პარკელის" საქველმოქმედო ფონდისა და სტუდენტთა საინიციატივო ჯგუფის ორგანიზებით, საქველმოქმედო აქცია გაიმართა. აჭარის მთავრობის სახლის წინ უსახლკარო და სოციალურად დაუცველი ოჯახებისთვის თბილი ტანსაცმელი შეგროვდა. აქციის მონაწილეებს ფულადი დახმარების გაწევის შესაძლებობაც ჰონდათ. ორგანიზატორების განცხადებით, ბათუმში 150-მდე უსახლკაროა, ისინი ქუჩაში ან სხვადასხვა თავშესაფარში ათევენ ღამეს. ახალგაზრდული ინიციატივის მხარდამჭერები სხვადასხვა საზოგადოებრივი ორგანიზაციები და სამთავრობო უწყებების წარმომადგენლები არიან.

კახეთი. თელავის დემოკრატიული ჩართულობის ჩართულობის ცენტრში „საქართველოს საზოგადოებრივი ინტერესების დაცვის ასოციაციამ" გამართა პროექტის - „არცერთი ბავშვი სკოლის გარეთ" – პრეზენტაცია. საგანმანათლებლო სისტემის მიღმა დარჩენილი ამ სისტემაში ფორმალურად ჩართული, სმენისა და მხედველობის პრობლემების მქონე, 5-12 წლის ასაკის სპეციალური საგანმანათლებლო საჭიროების მქონე ბავშვების კითხვისა და განათლების დონის გაუმჯობესების მიზნით, ნოემბრიდან „საქართველოს საზოგადოებრივი ინტერესების დაცვის ასოციაცია" ახორციელებს პარტნიორულ პროექტს - „არცერთი ბავშვი სკოლის გარეთ". პროექტის ასისტენტის თინა ხანჯალიაშვილის თქმით: ,,ჩვენი მიზანია 5-12 წლამდე შეზღუდული შესაძლებლობების მქონე ბავშვები და განსაკუთრებით ეთნიკური უმცირესობების წარმომადგენლების აქტიურად ჩაბმა სასწავლო პროცესში, რათა ხელი შევუწყოთ ამ ბავშვებს შორის კითხვის დონის გაუმჯობესებას". პროექტი საქართველოს 7 ქალაქში მიმდინარეობს, რომელიც  USAID-ის მხარდაჭერით ხორციელდება.

სამცხე-ჯავახეთი. საქართველოს კარიტასის სამედიცინო მობილურმა ჯგუფმა   სოფელ ნაოხრებში ადგილობრივ მოსახლეობას სამედიცინო მომსახურება გაუწია.  აქციის ფარგლებში 61 პაციენტს ჩაუტარდა სამედიცინო გამოკვლევა; 29 პაციენტს – ულტრაბგერითი გამოკვლევა, 32-ს - კი ელექტროკარდიოგრამა. პაციენტებს დაენიშნათ მკურნალობა და დაურიგდათ მკურნალობისთვის საჭირო მედიკამენტები. წყარო:ორგანიზაციის გვერდი სოციალურ ქსელში

მცხეთა-მთიანეთი. 18 დეკემბერს, საქართველოს წითელი ჯვრის საზოგადოების, დუშეთის ფილიალის მოხალისეების დახმარებით, დუშეთში საქველმოქმედო კონცერტი გაიმართა. ღონისძიებიდან შესული თანხა სრულად გადაეცა გიორგი თანდილაშვილს, რომელსაც საზღვარგრეთ მკურნალობა ესაჭიროება. კონცერტი დუშეთის კულტურის სახლში ჩატარდა. წყარო:ორგანიზაციის გვერდი სოციალურ ქსელში

თბილისი. ადამიანის უფლებათა სწავლებისა და მონიტორინგის ცენტრმა (EMC) ნოემბერში გაავრცელა განცხადება, რითაც მოუწოდა მუნიციპალური განვითარების ფონდს ქვეყნის მასშტაბით 81 ამბულატორიის მშენებლობის პროექტში გაეთვალისწინებინა შშმ პირთა უფლებები. ფონდმა ორგანიზაციას მიაწოდა ამბულატორიების მშენებლობის საპროექტო გეგმა. „ქვეყნის მასშტაბით პირველადი ჯანდაცვის ობიექტების მშენებლობის ახალი პროექტი უკვე უზრუნველყოფს ამბულატორიების სანიტარული კვანძების მისაწვდომობასა და სარგებლობას შეზღუდული შესაძლებლობის მქონე პირებისთვის", ნათქვამია ორგანიზაციის ვებ–გვერდზე. გამოქვეყნებულ ინფორმაციაში, ადამიანის უფლებათა სწავლებისა და მონიტორინგის ცენტრი მადლობას უხდის მუნიციპალურ ფონდს და აცხადებს, რომ პროექტში სერვისებით სარგებლობის ხელმისაწვდომობა არა მხოლოდ ეტლით მოსარგებლეთათვის უნდა იყოს გათვალისწინებული, არამედ სხვადასხვა შეზღუდული შესაძლებლობის მქონე ადამიანებისთვის. სრულად წყარო: emc.org.ge

იმერეთი. საქართველოს ახალგაზრდა იურისტთა ასოციაციის ქუთაისის ფილიალმა და პირველი ნაბიჯი საქართველოს ქუთაისის ფილიალმა ერთობლივი პროექტი „ინტეგრაციის ხელშეწყობა: სოციალიზაციისათვის საჭირო განწყობებისა და ქცევების ფორმირება" - დაიწყეს. პროექტი მიზნად ისახავს შეზღუდული შესაძლებლობის მქონე ახალგაზრდების საზოგადოებაში ინტეგრირებას, სამოქალაქო ცნობიერების ამაღლებისა და შესაბამისი განწყობის ფორმირების ხელშეწყობას; ასევე შშმ სტატუსის მქონე ახალგაზრდებისა და დანარჩენი საზოგადოების ნაწილის ორმხრივი თანამშრომლობისა და კონტრიბუციის შეთავაზებას. პროექტი სამი ძირითადი ღონისძიებისაგან შედგება. სრულად წყარო:ორგანიზაციის გვერდი სოციალურ ქსელში

შიდა ქართლი. 16 დეკემბერს, ცენტრმა „აფხაზეთმა" შიდა ქართლის პრობაციის ბიუროში ჯანსაღი ცხოვრების წესის შესახებ ტრენინგი ჩაატარა. ღონისძიებას პრობაციის თანამშრომლები და 12 პირობით მსჯავრდებული დაესწრო. ტრენინგი შეეხო თემებს: ნარკომანია, ალკოჰოლიზმი, ლუდომანია და თამბაქოს მოხმარება. ღონისძიება ჩატარდა „პირობით მსჯავრდებულთა საზოგადოებაში ინტეგრაციისა და დანაშაულის პრევენციის მხარდამჭერი პროგრამის" ფარგლებში, რომელიც პრობაციის ეროვნული სააგენტოს ფინანსური მხარდაჭერით ხორციელდება. წყარო:ორგანიზაციის გვერდი სოციალურ ქსელში

აჭარა. 17 დეკემბერს, ბათუმის დემოკრატიული ჩართულობის ცენტრში, ორგანიზაციამ ,,შეზღუდული შესაძლებლობების მქონე პირების უფლებებისათვის” ჩატარებული კვლევის შედეგაების პრეზენტაცია გაიმართა. რომლის საფუძველზეც გამოვლინდა, რომ რეგიონში შშმ პირებისთვის გადაცემული ეტლები ხშირ შემთხვევაში უხარისხო იყო. თამაზ მჟავანაძის განცხადებით, ორგანიზაციამ ვაუჩერიზაციის პროგრამა შეიმუშავა და სპეციალური სარეკომენდაციო წერილი აჭარის ჯანდაცვის სამინისტროს გადაუგზავნა. არასამთავრობო ორგანიზაციის რეკომენდაციები ჯანდაცვის სამინისტრომ გაითვალისწინა. პირველი იანვრიდან უწყება 300-ლარიან ვაუჩერს გასცემს. პირი კი მისთვის სასურველ ეტლს თავად შეარჩევს. საზოგადოებრივი ორგანიზაციის მონაცემებით, რეგიონში შეზღუდული შესაძლებლობების მქონე 100-მდე პირია რეგისტრირებული.

თბილისი.17 დეკემბერს, თბილისის თოჯინების თეატრისა და „იდენტობას" ერთობლივი აქციის ფარგლებში, უსახლკაროთა კარვებში მცხოვრები ბავშვებისათვის თოჯინური წარმოდგენა გაიმართება. გიორგი მიქელაძის სახელობის თოჯინების თეატრი უსახლკაროთა დროებით თავშესაფარს 19 საათზე ეწვევა. მათთან ერთად იქნებიან „იდენტობას" თანამშრომლები, რომელებიც მოქალაქეების მხრიდან ბოლო დღეებში მოწოდებულ ნივთებს კარვების კოორდინატორებს გადასცემენ. წყარო:identoba.com

იმერეთი. პირველი ნაბიჯი საქართველოს ქუთაისის ფილიალი და საქართველოს ახალგაზრდა იურისტთა ასოციაციის ქუთაისის ფილიალი, 17 დეკემბერს მართავენ ერთობლივ ფოტო გამოფენას. ღონისძიების მიზანია წვლილი შეიტანოს შეზღუდული შესაძლებლობის პირების საზოგადოებაში ინტეგრირების პროცესში. გამოფენა გაიმართება 17 დეკემბერს 16:00 საათზე ქუთაისში, წერეთლის ქუჩა 2, თიბისი ბანკის გალერეაში. სრულად წყარო: საიას ქუთაისი ფილიალის გვერდი სოციალურ ქსელში

თბილისი. ორგანიზაცია „იდენტობამ" მოსკოვის გამზირზე უსახლკაროთათვის მოწყობილი კარვების შესახებ ინფორმაცია გამოაქვეყნა. „ორი ძირითადი პრობლემა, რომელიც უსახლკაროთა დროებით თავშესაფარს ჰქონდა, წყლის მიწოდება და საკვებით მომარაგება იყო. წყლის პრობლემა ამ ეტაპზე მოგვარებულია, საკვებით კარავს „კათარზისი” ამარაგებს, მაგრამ იქ მცხოვრები ადამიანებისა და თავშესაფრის ადმინისტრაციის წარმომადგენელთა თქმით, კვების პრობლემა ბოლომდე მოხსნილი მაინც არ არის", ნათქვამია ორგანიზაციის ვებ-გვერდზე. სრულად წყარო: identoba.com

თბილისი. „საქართველოს ახალგაზრდა კონსტიტუციონალისტთა ასოციაციამ" დევნილთა პრობლემების შესახებ ჩატარებულ კვლევაზე პრესკონფერენცია გამართა. ორგანიზაციის წარმომადგენლებს სოციალური აქციის დროს დაუკავშირდნენ იძულებით გადაადგილებული პირები, რომელთაც სთხოვეს მათი ქონებრივი უფლებების სამართლებრივი ასპექტებით დაინტერესება. ასოციაციის წარმომადგენლებმა აღნიშნულ საკითხზე დაიწყეს კვლევის განხორციელება, რომლის ფარგლებშიც შეხვედრები გაიმართა, როგორც წეროვანის დასახლებაში მცხოვრებ დევნილებთან, ისე იძულებით გადაადგილებულ პირთა, განსახლებისა და ლტოლვილთა სამინისტროსთან. კვლევის მიმდინარეობისას გამოიკვეთა რამდენიმე მნიშვნელოვანი პრობლემა. ასოციაციის წარმომადგენლებმა კვლევის ფარგლებში შეხვედრა გამართეს საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროსთან და მიაწოდეს ინფორმაცია ყველა იმ პრობლემაზე, რომელიც დევნილებთან გამართულ შეხვედრებზე გამოიკვეთა. სრულად წყარო:ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტმრა მოსკოვის გამზირზე გაშლილი კარვების შესახებ ვიდეო გაავრცელა. „სამთავრობო უწყებების ინიციატივით, უსახლკარო მოქალაქებისთვის მოსკოვის გამზირზე კარვები გაშალეს. აქ ზამთრის ყინვებს, ბოლო მონაცემებით, 100-ზე მეტი ადამიანი აფარებს თავს. EMC-ის მიერ მომზადებული ვიდეო, ამ ადამიანთა საარსებო პირობებს ასახავს", ნათქვამია ორგანიზაციის გვერდზე. ვიდეო   წყარო:emc.org.ge

თბილისი. სათემო განვითარების ცენტრის (CDC) ორგანიზებით, ნუკრიანის და ნაფარეულის სახელოსნოების – სოციალური საწარმოების საშობაო გამოფენა-გაყიდვა გაიმართა. გამოფენაზე წარმოდგენილი იყო ნუკრიანისა და ნაფარეულის სოციალური საწარმოების მიერ საშობაო და საახალწლო თემაზე დამზადებული ხელნაკეთი სუვენირები ნაძვის ხის სათამაშოები, მინანქრის სამკაულები, ქვილთისა და თექის აქსესუარები, კერამიკის ნივთები, საახალწლო ნობათი და ჩურჩხელები, საოჯახო მურაბები და ჯემები, სხვადასხვა მცენარეებისა და ბალახეული ჩაი. გამოფენა სათემო განვითარების ცენტრის, გერმანული ორგანიზაცია BfdW (პური მსოფლიოს) და შვეიცარიის განვითარებისა და თანამშრომლობის სააგენტო (SDC) მხარდაჭერით გაიმართა. სათემო განვითარების ცენტრის მიზანია ხელი შეუწყოს სახელოსნოების, როგორც სოციალური საწარმოების გაძლიერებასა და განვითარებას, რაც ქალთა თემის გააქტიურებისა და სოფლის განვითარებაში უფრო აქტიური მონაწილეობის წინაპირობაა.

კახეთი. კახეთის ვეტერინართა რეგიონულ ასოციაციასა და ახმეტის ადგილობრივ ხელისუფლებას შორის საინფორმაციო-საკოორდინაციო შეხვედრა გაიმართა. შეხვედრას ესწრებოდნენ კახეთის ვეტერინართა რეგიონული ასოციაციის წევრები, არასამთავრობო სექტორის წარმომადგენლები და ახმეტის საინფორმაციო-საკონსულტაციო სამსახურის თანამშრომლები. შეხვედრაზე კახეთის ვეტერინართა რეგიონული ასოციაციის წევრებმა დამსწრეებს თავიანთი საქმიანობა გააცნეს. აკაკი ელანიძე, კახეთის ვეტერინართა რეგიონული ასოციაციის თავმჯდომარე:,,ვისაუბრეთ ჩვენი საქმიანობის მიმართულებებსა და გეგმებზე. ჩვენი საქმიანობის პრიორიტეტს წარმოადგენს ვეტერინარის სერვისის როლისა და მნიშვნელობის გაზრდის ხელშეწყობა. დახმარება ვთხოვეთ ახმეტის საინფორმაციო – საკონსულტაციო სამსახურს ვეტერინართა მონაცემების შეგროვებასა და მათთან კომუნიკაციის დამყარებაში. პროექტის ფარგლებში, კახეთის ვეტერინართა რეგიონული ასოციაცია ვეტერინარებს გადაამზადებს."

აჭარა. ასოციაცია „ღირსეულმა სიბერემ" დაიწყო მზადება საახალწლო საქველმოქმედო აქციისთვის „კეთილი ახალი წელი". ორგანიზაცია მოუწოდებს ყველა მსურველს, შეუერთდნენ ღონისძიებას. აქცია ტარდება მარტოხელა, უმწეო მოხუცების და შეზღუდული შესაძლებლობების მქონე ადამიანების დასახმარებლად. სრულად აქციის შესახებ წყარო:ორგანიზაციის გვერდი სოციალურ ქსელში

თბილისი. „ახალაზრდა ადვოკატებმა" განცხადება გაავრცელა. ორგანიზაცია მიესალმება საქართველოს მთავრობის გადაწყვეტილებას, უწყებათაშორისი კომისიის შექმნის თაობაზე, რომელიც უბინაო ადამიანებისთვის დროებითი თავშესაფარის მოწყობას უზრუნველყოფს. „ახალაგაზრდა ადვოკატები" მიმართავს თვითმმართველობებს და საქართველოს რეგიონული განვითარებისა და ინფრასტრუქტურის სამინისტროს, რათა დროულად მოხდეს მოსახლეობის საჯარო ინფორმირება ასეთი ბანაკების ადგილმდებარეობის შესახებ, რათა საზოგადოებამ კეთილი ნების გამოხატვისა და დახმარების სურვილის შემთხვევაში, შეძლოს დროებით თავშესაფარში მყოფი ადამიანებისთვის პირველადი მოხმარებისა თუ სხვა ნივთების გადაცემა. სრულად წყარო: barristers.ge

ქვემო ქართლი. 10 დეკემბერს, არასამთავრობო ორგანიზაცია სიდას ინიციატივითა და კანონთან კონფლიქტში მყოფი არასრულწლოვნები და სიდას ინიციატივის – „უფროსი მეგობრის" მონაწილეები, რუსთავის მუნიციპალურ თეატრში კონცერტს დაესწრნენ. ღონისძიება განხორციელდა არასაპატიმრო სასჯელაღსრულებისა და პრობაციის ეროვნული სააგენტოს ქვემო ქართლის პრობაციის ბიუროს მხარდაჭერით.  წყარო:cida.ge

თბილისი. უსინათლოებისა და მცირე მხედველებისთვის სპეციალური ვებგვერდის www.bu.org.ge პრეზენტაცია გაიმართა 6 დეკემბერს, თბილისის სახელმწიფო უნივერსიტეტის (თსუ) ეროვნულ სამეცნიერო ბიბლიოთეკაში. პრეზენტაციაზე ითქვა, რომ ვებ-გვერდი ხელს შეუწყობს მხედველობის პრობლემის მქონე პირთა საზოგადოებაში ინტეგრაციას. პროექტი ხორციელდება ასოციაცია „უსინათლოები საზღვრებს გარეშეს" ძალისხმევითა და ფონდ „ღია საზოგადოება საქართველოს" ფინანსური მხარდაჭერით. ასოციაცია „უსინათლოები საზღვრებს გარეშეს" დამფუძნებლის, ბესარიონ სოლოღაშვილის, თქმით, პროექტის მიზანია მხედველობის პრობლემის მქონე ადამიანებს ხელი შეუწყოს კომპიუტერის ათვისებაში. ის აღნიშნავს, რომ დღეს საქართველოში 7000- მდე ტოტალური უსინათლოა და მასზე დაახლოებით 2-3 ჯერ ნაკლები- მხედველობადაქვეითებული. უსინათლოებს შესაძლებლობა ეძლევათ დამოუკიდებლად და სრულიად უფასოდ გადმოიწერონ ვებ-გვერდზე განთავსებული ხმოვანი პროგრამების - „ბუ-2-სა" და „NVDA-ს" საინსტალაციო ვერსიები. გარდა ამისა, აქვე მოცემულია აღნიშნული ხმოვანი პროგრამების შესწავლის პრაქტიკული სახელმძღვანელოების ტექსტური და აუდიოვერსიები, რომლებიც დაყოფილია გაკვეთილებად. სახელმძღვანელოში არის საკონტროლო კითხვები, პასუხები და სავარჯიშოები. ვებგვერდზე განთავსებულია ბიბლიოთეკა 3600-ზე მეტი ეგზემპლარით. იმისთვის, რომ მხედველობადაქვეითებულებს ეკრანმა თვალი არ მოსჭრას ვებ-გვერდზე აქვს ინსტრუმენტები, რომელიც ცვლის ეკრანის ფონს, ასევე, შრიფტის ზომას და ფერს. წყარო: www.media.ge

გურია. გურიის ახალგაზრდული რესურსცენტრმა ყოფილი პატიმრებისა და პირობითმსჯავრდებულების რესოციალიზაციის საკითხებზე კლიპი გამოაქვეყნა.  კლიპი  წყარო:ორგანიზაციის გვერდი სოციალურ ქსელში

ქვემო ქართლი. დმანისის ახალგაზრდულ ცენტრში ჩატარდა ფილმის - „ბავშვობა" - ჩვენება. კინოჩვენების შემდეგ გაიმართა დისკუსია - „როგორ უნდა მოხდეს შეზღუდული შესაძლებლობების მქონე ადამიანების ინტეგრაცია საზოგადოებასთან?". ღონისძიება ჩატარდა პროექტის - „ეროვნული ინტეგრაციის გაძლიერება საქართველოშის" - ფარგლებში,რომელსაც ახორციელებს საქართველოს გაეროს ასოციაცია(UNAG) აშშ-ს საერთაშორისო განვითარების სააგენტოს(USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

თბილისი. ივანე ჯავახიშვილის სახელობის თბილისის სახელმწიფო უნივერსიტეტის ბიბლიოთეკაში უსინათლო სტუდენტებისთვის განკუთვნილი სამკითხველო-სამუშაო კუთხის პრეზენტაცია გაიმართა. ეს არის პირველი შემთხვევა საქართველოში, როდესაც უსინათლოებს კომპიუტერისა და პრინტერის გამოყენება დამოუკიდებლად შეეძლებათ. ამ პროექტის ინიციატორები თსუ-ს სოციალურ-პოლიტიკურ მეცნიერებათა ფაკულტეტის სტუდენტები არიან. პროექტი ფონდ „ღია საზოგადოება - საქართველოს" დაფინანსებით განხორციელდა. პროექტის მიზანია, მაქსიმალურად ხელი შეუწყოს შეზღუდული შესაძლებლობის მქონე პირთა ინტეგრაციას საუნივერსიტეტო სივრცეში. წყარო: freea.ge