გურია. „საქართველოს გაერთიანებული წყალმომარაგების კომპანია" ქალაქ ოზურგეთში მრავალსართულიანი კორპუსების ბინებში მცხოვრებ აბონენტთა გამრიცხველიანების პროცესის დაწყებას გეგმავს. ამის შესახებ „საქართველოს დემოკრატიული განვითარების კავშირს" მრავალბიანიან სახლებში მცხოვრებლებმა აცნობეს, რომელმაც თავის მხრივ აღნიშნული ინფორმაცია ასევე „საქართველოს გაერთიანებული წაყალმომარაგების კომპანიისგან" შეიტყო. აღნიშნულ საკითხზე არასამთავრობო ორგანიზაცია „დემოკრატიული განვითარების კავშირი" განცხადებას ავრცელებს და ასევე იურიდიულ დახმარების მსურველებს კონსულტაციას პირდება. „საქართველოს ენერგეტიკისა და წყალმომარაგების მარეგულირებელი ეროვნული კომისიის" 2008 წლის 26 ნოემბრის #32 დადგენილების 27-ე მუხლის მე-8 პუნქტიდან გამომდინარე, კანონმდებელი სასმელი წყლის მიმწოდებელ საწარმოებს უფლებას აძლევს 2015 წლის 1 იანვრამდე მოაწესრიგოს ინდივიდუალური საცხოვრებელი სახლის მქონე მომხმარებლების აღრიცხვიანობა და მოახდინოს მათი გამრიცხველიანება (ცალსახად და უპირობოდ), აგრეთვე უზრუნველყოს საყოფაცხოვრებო კატეგორიის სხვა მომხმარებლების გამრიცხველიანება, ოღონდ იმ პირობით, თუკი ეს უკანასკნელნი უზრუნველყოფილნი არიან უწყვეტი 24-საათიანი წყალმომარაგებით. შესაბამისად, წყალმომარაგების კომპანიას მრავალსართულიანი კორპუსების ბინებში მცხოვრებ აბონენტთა გამრიცხველიანების საკითხის დღის წესრიგში დაყენების უფლება მხოლოდ იმ შემთხვევაში წარმოეშობა, თუ ეს აბონენტები უწყვეტი, 24-საათიანი წყალმომარაგებით ჰყავს უზრუნველყოფილნი; სხვა შემთხვევაში მას ამის უფლება არ გააჩნია. როგორც წესი, საკითხს სიმწვავეს სძენს და საზოგადოების უკმაყოფილებას იწვევს ის ფაქტი, რომ კანონმდებელი მიმწოდებელს უფლებას აძლევს, უშუალოდ მომხმარებელს დაარიცხოს აღრიცხვის კვანძის (მათ შორის მრიცხველის) მოწყობის საფასური, ხოლო, მოთხოვნის შემთხვევაში კი, არანაკლებ 24 თვეზე გადაუნაწილოს მას ეს საფასური და განწილვადებული თანხის დარიცხვა განახორციელოს აღრიცხვის კვანძის მოწყობიდან ექვსითვის შემდეგ. ანუ მიმწოდებელი, მომხმარებლების ხარჯზე, ძალიან კომფორტულ, პრაქტიკულად „სასათბურე" პირობებშია ჩაყენებული. ყოველივე ზემოაღნიშნულის გათვალისწინებით, „საქართველოს დემოკრატიული განვითარების კავშირი" ურჩევს ქ. ოზურგეთში მრავალბინიან სახლებში მცხოვრებ მომხმარებლებს, გამოიყენონ თავიანთი უფლება და, თავიანთი ინტერესების და შესაბამისად, გაერთიანებული წყალმომარაგების კომპანიას მხოლოდ იმ შემთხვევაში დაეთანხმონ გამრიცხველიანებაზე, თუკი კომპანიის მიერ ისინი უზრუნველყოფილნი არიან უწყვეტი 24-საათიანი წყალმომარაგებით", განმარტავს ორგანიზაცია. პრობლემების წარმოშობის შემთხვევაში, სამართლებრივი დახმარების მიღების მიზნით, შეგიძლიათ მიმართოთ „საქართველოს დემოკრატიული განვითარების კავშირის" ოფისში შემდეგ მისამართზე: ქ. ოზურგეთი, გაბრიელ ეპისკოპოსისქ. #25, ბ. 14, ტელეფონი: 27 45 47.

აჭარა. 5 ნოემბერს, ბათუმის დემოკრატიული ჩართულობის ცენტრში, შეზღუდული შესაძლებლობების მქონე პირთა უფლებების დამცველმა ორგანიზაციამ კვლევის შედეგები გამოქვეყნა, რომლის მიხედვით, აჭარაში ეტლით მოსარგებლე პირების უმრავლესობა უკმაყოფილებას გამოთქვამს ტენდერით შესყიდული ეტლების გამო. კვლევის ავტორები ჯანდაცვის სამინისტროს უფრო მაღალხარისხიანი და შედარებით ძვირადღირებული ეტლების შესაძენად თანაგადახდის ან განვადების პრინციპს სთავაზობენ. ჯანდაცვის სამინისტროში აცხადებენ, რომ ძვირადღირებული ეტლების შეძენის საშულებას სამინისტროს შესყიდვის არსებული წესი არ იძლეოდა. მისი შეცვლა სამინისტროში 2014 წლამდე იგეგმება, რის შემდეგაც შეზღუდული შესაძლებლობის მქონე პირებისთვის სასურველი ეტლების შესაძენად ვაუჩერები გაიცემა. აღნიშულ შეხვედრას ადგილობრივი სამოქალაქო საზოგადოების წევრები, შშმ პირები და მედია საშუალებების წარმომადგენლები ესწრებოდნენ.

აჭარა. 5 ნოემბერს, ბათუმის დემოკრატიული ჩართულობის ცენტრში, დახმარების ეროვნულმა ფონდმა „ხანდაზმულთათვის სერვისების ხელმისაწვდომობის შესახებ" პროექტის პრეზენტაცია გამართა. აღნიშნული  პროექტის მიზანია ხელი შეუწყოს ხანდაზმულთა ჩართულობას საზოგადოებრივ საქმიანობაში, რათა მათ უკეთ შეძლონ საკუთარი შესაძლებლობების რეალიზება. ფონდი ამჟამად მოლაპარაკებას აწარმოებს ქალაქის მერიასთან, რათა ბათუმში მცხოვრები 188 სოციალურად დაუცველი მარტოხელა ხანდაზმული მუნიციპალური ტრანსპორტით მგზავრობის საფასურის გადასახადისგან გათავისუფლდნენ. შეხვედრას პროექტის ბენეფიციარები,  საზოგადოებრივი ორგანიზაციებისა და მედია საშუალებების წარმომადგენლები ესწრებოდნენ.

თბილისი. 10 ნოემბერს, 15:00 საათზე, თბილისის თოჯინების თეატრი საქველმოქმედო სპექტაკლს გამართავს. ნაჩვენები იქნება „ბიჭუნა და სახურავის ბინადარი კარლსონი”. ეს იქნება პირველი ღონისძიება უსახლკაროთა თავშესაფრის კეთილმოწყობის კამპანიაში, რომელსაც „იდენტობას” პარტნიორი ორგანიზაციები და ცალკეული მოხალისეები უერთდებიან. ქველმოქედებას უერთდება მერაბ ბერძენიშვილის სახელობის კულტურის ცენტრი „მუზა”, რომელიც სპექტაკლის გასამართად თეატრს უსასყიდლოდ დაუთმობს სივრცეს. თბილისის თოჯინების თეატრი გაყიდული ბილეთებიდან შემოსულ თანხას მთლიანად გადარიცხავს თავშესაფრის კეთილმოწყობისათვის შექმნილ სპეციალურ ანგარიშზე. დამატებითი ინფორმაციისთვის დარეკეთ: 555 32 20 12; 599 72 43 98; წყარო: ginsc.net

თბილისი. „კოალიცია დამოუკიდებელი ცხოვრებისათვის" აცხადებს მოხალისეთა მიღებას. კოალიცია შეზღუდული შესაძებლობის მქონე პირთა სფეროში მომუშავე 27 არასამთავრობო ორგანიზაციის გაერთიანებაა, რომლის მიზანია შშმ პირთა უფლებების დაცვა, სოციალურ, პოლიტიკურ, ეკონომიკურ და კულტურულ ცხოვრებაში მათი აქტიური ჩართულობის ხელშეწყობა. სრულად წყარო:ორგანიზაციის გვერდი სოციალურ ქსელში

იმერეთი. საერთაშორისო განათლების და განვითარების აკადემიამ დაიწყო შეხვედრები ფოკუს ჯგუფებთან. 1 ნოემბერს გაიმართა პირველი შეხვედრა სტუდენტების ჯგუფთან. შეხვედრაზე ისაუბრეს თავიანთ საჭიროებებზე და გზებზე, რა გზებითაც ცდილობენ სტუდენტები სამსახურის ძიებას. შეხვედრას ხელმძღვანელობდა საერთაშორისო განათლების და განვითარების აკადეემის დამფუძნებელი. წყარო:ორგანიზაციის გვერდი სოციალურ ქსელში

თბილისი. ორგანიზაცია „იდენტობამ" სულხან-საბა ორბელიანის სასწავლო უნივერსიტეტში საჯარო ლექცია გამართა. ორგანიზაციის ორგანიზებით ილიას სახელმწიფო უნივერსიტეტის ასოცირებული პროფესორმა, ფილოსოფოსმა თამარ ცხადაძემ სტუდენტებთან ისაუბრა თემაზე – „არის, თუ არა ჰომოფობია უცხოს შიში? რატომ არ ნიშნავს ბანალურობა ბუნებრივობას". ლექციების მიზანს, რომელიც სერიული ხასიათის იქნება, ქართველ სტუდენტებში ლგბტ საკითხებისადმი მგრძნობელობის ამაღლება წარმოადგენს. წყარო:identoba.com

იმერეთი. საერთაშორისო განათლების და განვითარების აკადემიამ 1 ნოემბერს სამუშაო შეხვედრა გამართა. შეხვედრაში მონაწილეობა მიიღეს ბინათმესაკუთრეთა ამხანაგობების თავჯდომარეებმა. ღონისძიების მიზანს მათი გაცნობა წარმოადგენდა. შეხვედრას 10 ამხანაგობის წარმომადგენელი ესწრებოდა. წყარო:ორგანიზაციის გვერდი სოციალურ ქსელში

იმერეთი. ქუთაისის განათლების განვითარებისა და დასაქმების ცენტრის ორგანიზებით თამბაქოს წინააღმდეგ კამპანია  – „ჯანმრთელი ფილტვები" – გაიმართა. ღონისძიებაზე სამოქალაქო განათლებისა და პედაგოგთა გადამზადების პროგრამის სამიზნე სკოლების მოსწავლეთა ნახატების გამოფენა, ფლაერების დარიგება, ასევე საზოგადოებრივი თავშეყრის ადგილებში  თამბაქოს მოხმარების აკრძალვის შესახებ,  კანონის აღსრულების მოთხოვნით,  პეტიციაზე ხელმოწერების შეგროვება მოეწყო.  როგორც აკაკი წერეთლის სახელმწიფო უნივერსიტეტის საზოგადოებასთან ურთიერთობის სამსახურის წარმომადგენელი, მაკა ხეცურიანი ამბობს, „უნივერსიტეტი აქტიურად თანამშრომლობს არასამთავრობო სექტორთან და მით უმეტეს ისეთ მნიშვნელოვან ინიციატივას, რომელიც  ცხოვრების ჯანსაღი წესის დანერგვას ეხება ახალგაზრდებში, აქტიურად გამოეხმაურა".

თბილისი. 29 ოქტომბერს, ბავშვთა და ახალგაზრდობის განვითარების ფონდის დირექტორი და დირექტორის მოადგილე ფონდის მიერ დაფინანსებულ სოციალურ საწარმოს ეწვივნენ. საწარმო ახალგაზრდულმა არასამთავრობო ორგანიზაციამ „დავითთიანნი" გახსნა. საწარმოში შეზღუდული შესაძლებლობების მქონე ახალგაზრდები არიან დასაქმებულნი და ხის მასალაზე მუშაობენ. ხელნაკეთი საბავშვო სათამაშოები უახლოეს მომავალში სხვადასხვა სასაჩუქრე მაღაზიაში გაიყიდება. წყარო:ორგანიზაციის გვერდი სოციალურ ქსელში

თბილისი. „იდენტობა" საქართველოში ლგბტ ადამიანების მდგომარეობის შესასწავლად გამოკითხვას ატარებს. კითხვარის შევსება შეუძლია ყველა ლგბტქი ადამიანს, იმის მიუხედავად უსარგებლია თუ არა „იდენტობას" სერვისით. კითხვარი წყარო: identoba.com

თბილისი. გაეროს ქალთა ორგანიზაციამ და სოუიალური კვლევისა და ანალიზის ინსტიტუტმა სასტუმრო „ჰოლიდეიში" ქვემო ქართლში ეროვნული უმცირესობების ქალთა მდგომარეობის კვლევის შედეგები წარადგინეს. კვლევის მიზანს წარმოადგენდაქვემო ქართლში მცხოვრები ეროვნული უმცირესობების ქალების მდგომარეობისა და საჭიროებების შესწავლა გენდერული თანასწორობის, ოჯახში ძალადობის, ჯანმრთელობის, განათლების, სოციალური დაცვის, ეკონომიკისა და სახელმწიფო სერვისების ხელმისაწვდომობის კუთხით. სრულად წყარო: პორტალი GINSC

თბილისი. 25 ოქტომბერი. 15:00 საათზე კოალიციის – "დამოუკიდებელი ცხოვრებისათვის" –  ინიციატივით, გაიმართება აქცია დევიზით - „დამოუკიდებელი პიროვნება - თავისუფალი არჩევნები!", რომელშიც მონაწილეობას შეზღუდული შესაძლებლობების მქონე პირები და მათი მეგობრები მიიღებენ. მიუხედავად იმ პრობლემისა, რასაც გადაადგილების დროს აწყდებიან ეტლით მოსარგებლე პირები, ისინი მაინც საარჩევნო უბანზე მისვლით იღებენ არჩევნებში მონაწილეობას და საზოგადოებასაც მოუწოდებენ იყვნენ მოქალქეობრივად აქტიურები. აქციაზე დარიგდება საინფორმაციო ფლაერები. ამ ღონისძიების პარალელურად, აქცია გაიმართება გორში, ზუგდიდში, თელავში, ბათუმში, ქუთაისსა და ოზურგეთში. კოალიცია დამოუკიდებელი ცხოვრებისათვის წარმოადგენს შეზღუდული შესაძლებლობის საკითხებზე მომუშავე 27 არასამთავრობო ორგანიზაციის კავშირს, რომლის მიზანია ხელი შეუწყოს შშმ პირთა დამოუკიდებლობას და კეთილდღეობას ქართულ საზოგადოებაში. მქონე პირთა სამოქალაქო ინტერესები და უფლებები. სრულად წყარო: ორგანიზაციის გვერდი სოციალურ ქსელში

იმერეთი. ქუთაისში მოქმედი არასამთავრობო ორგანიზაციების წარმომადგენლები და შეზღუდული შესაძლებლობების მქონე პირები პოლონეთიდან დაბრუნდნენ, სადაც ისინი ქალაქ პოზნანში ერთი თვის განმავლობაში იმყოფებოდნენ და ეცნობოდნენ თუ როგორი ვითარებაა შშმ პირებისთვის პოლონეთში. 24 ოქტომბერს ისინი ქუთაისის მერის მოვალეობის შემსრულებელს, კოტე ლომიძეს და ვიცე მერს ნიკო კაჭკაჭიშვილს შეხვდნენ. შეხვედრაზე ერთ–ერთ მთავარ პრობლემად ქუთაისში პანდუსების არქონა დასახელდა, ნიკო კაჭკაჭიშვილის თქმით, ყველა შენობას რომელიც ქალაქში მომავალში აშენდება აუცილებლად ექნება პანდუსი.

თბილისი. 202-ე საჯარო სკოლაში, სადაც უსინათლო და სუსტადმხედველი მოზარდები სწავლობენ, წიგნის კითხვის კლუბი ამოქმედდა. კლუბს პატრონაჟს თანამედროვე მწერლები გაუწევენ. ამ სკოლის მოსწავლეებს, თბილისის სხვა საჯარო სკოლის თანატოლებთან ერთად, საშუალება ექნებათ შეხვდნენ ქართველ მწერლებს და მათთან ერთად განიხილონ ნაწარმოებები, იმსჯელონ მათთვის საინტერესო თემებზე. კლუბის მუშაობისთვის, N#202 საჯარო სკოლის ბიბლიოთეკას ბრაილის შრიფტით დაბეჭდილი ნაწარმოებები გადაეცა ტაქტილური ფორმის ნახატების დართვით. საქმიანობა ხორციელდება საქართველოს განათლებისა და მეცნიერების სამინისტროს ,,მოსწავლე ახალგაზრდობის სამოქალაქო აქტიურობის განვითარების პროგრამის" და კავშირის ,,ვიზრუნოთ ერთმანეთზე" თანამშრომლობით. წყარო: განათლების სამინისტროს გვერდი სოციალურ ქსელში

სამცხე–ჯავახეთი. 18 ოქტომბერს, ახალციხის ციხის საგამოფენო დარბაზში ყოფილი პატიმრების ნამუშევრების გამოფენა გაყიდვა მოეწყო. „გისოსებს გარეთ" - ამ სახელწოდების გამოფენა, სამცხე-ჯავახეთის რეგიონული ასოციაცია „ტოლერანტის" ორგანიზებით, ევროკავშირის მიერ დაფინანსებული პროექტის „ყოფილი პატიმრების საზოგადოებაში ინტეგრაციისა და რეაბილიტაციის ხელშეწყობა სამცხე-ჯავახეთის რეგიონში" ფარგლებში გაიმართა. ნაქარგი ხატები, თექით შესრულებული სხვადასხვა ნამუშევრები, ნახატები, ხის ნაკეთობები, სამკაულები - გამოფენა-გაყიდვაზე 80-ზე მეტი ნამუშევარი იყო წარმოდგენილი, რომლებზეც ავტორები ხუთი თვის განმავლობაში მუშაობდნენ. გამოფენა-გაყიდვას სასჯელაღსრულების, პრობაციისა და იურიდიული დახმარების საკითხთა სამინისტროს, ევროკავშირის, საერთაშორისო ორგანიზაციებისა და იმ არასამთავრობო ორგანიზაციების წარმომადგენლები ესწრებოდნენ, რომლებიც წლების განმავლობაში საპატიმროებში მუშაობენ.

შიდა ქართლი. ასოციაცია „გორის ინვალიდთა კლუბთან" არსებულმა ახალგაზრდულმა ცენტრმა, იაშვილის კლინიკაში არსებული ლეიკემიით დაავადებულ ბავშვთა ცენტრი მოინახულა. ცენტრის ახალგაზრებმა ბავშვებს საკანცელარიო ნივთები და საკვები პროდუქტები გადასცეს. აქტივობის მიზანი იყო სოციალური პასუხისმგებლობის ამაღლება. აქტივობა დაიგეგმა „ეროვნული ინტეგრაციის გაძლიერება საქრთველოში" პროექტის ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო:ორგანიზაციის გვერდი სოციალურ ქსელში

თბილისი. „ფემინისტების დამოუკიდებელმა ჯგუფმა", 18 ოქტომბერს, თბილისის საკრებულოსთან უსახლკაროების მხარდამჭერი აქცია გამართა. ახლოვდება ზამთარი და უსახლკაროდდარჩენილთა პრობლემები მწვავდება, შესაბამისად აქციის მონაწილეები ხელისუფლებას თავშესაფრების მოწყობას და უსახლკაროების დასახმარებლად კონკრეტული ნაბიჯების გადადგმას ითხოვენ .წყარო: პორტალი GINSC

მცხეთა–მთიანეთი. 17 ოქტომბერს „სიდას" ინიციატივით კანონთან კონფლიქტში მყოფი არასრულწლოვნები სხვა რუსთაველ ახალგაზრდებთან ერთად შიომღვიმეს და მცხეთას ესტუმრნენ. ღონისძიების ფარგლებში ახალგაზრდებმა მოინახულეს შიომღვიმის უძველესი მონასტერი და ასევე დაათვალიერეს მცხეთის სამთავროს მონასტერი. აქტივობაში მონაწილეობდნენ კანონთან კონფლიქტში მყოფი არასრულწლოვნები, რუსთავის ახალგაზრდული ცენტრის ახალგაზრდები და ასევე „სიდას" ინიციატივის „უფროსი მეგობრის" მონაწილეები. ღონისძიება განხორციელდა არასაპატიმრო სასჯელაღსრულებისა და პრობაციის ეროვნული სააგენტოს ქვემო ქართლის პრობაციის ბიუროს მხარდაჭერით, ასევე რუსთავის ახალგაზრდული ცენტრის დახმარებით. წყარო:cida.ge

შიდა ქართლი. 17 ოქტომბერს სიღარიბესთან ბრძოლის საერთაშორისო დღე ასოციაცია „გორის ინვალიდთა კლუბთან" არსებულმა ახალგაზრულმა ცენტრმა უკიდურეს საზღვრისპირა სოფლებში: აძვში და კირბალში აღნიშნა. ახალგაზრდები სოფლებში რამდენიმე ოჯახს ესტუმრნენ. აქტივობის მიზანი იყო სოციალური პასუხისმგებლობის ამაღლება. აქტივობა დაიგეგმა „ეროვნული ინტეგრაციის გაძლიერება საქრთველოში" პროექტის ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. გორში პროექტის პარტნიორი ორგანიზაციაა „გორის ინვალიდთა კლუბი". წყარო:ორგანიზაციის გვერდი სოციალურ ქსელში

კახეთი. ,,თელავის განათლების გავითარების და დასქმების ცენტრმა'' ახალგაზრდა მოახლისეების დახმარებით, ხანდაზმულების დასახმარებლად აქცია გამართა. მოხალისეები, საქართველოში, ეროვნული ინტეგრაციის გაძიელერების პროექტის ფარგლებში, ხანდაზმულებს საკუთარი ეზოებისა და სახლის მიმდებარე ტერიტორიის მოწესრიგებაში დაეხმარნენ. ქრისტინე მჭედლიშვილი, თელავის განათლების განვითარების და დასაქმების ცენტრის წარმომადგენელი: „ორგანიზაციაში მოქმედმა ახლგაზრდულმა საბჭომ სიღარიბის დღესთან დაკავშირებით დაგეგმა ღონისძიება, რომელიც მიზნად ისახავდა გაჭირვებული მოხუცებისათვის ეზოსა და სახლის დალაგებაში დახმარებას. გამოითქვა სურვილი, შემდგომშიც განხორციელდეს ანლოგიური აქციები". პროგრამა დაფინანსებულია USAID-ის მიერ და ხორციელდება საქართველოს გაეროს ასოციაციის მეშვეობით.

აჭარა. სიღარიბის დაძლევის მსოფლიო დღე – 17 ოქტომბერი ასოციაციამ „ღირსეულმა სიბერემ" განსაკუთრებით აღნიშნა. ორგანიზაციის თანამშრომლები განსაკუთრებული ზრუნვის საჭიროების მქონე ბენეფიციარებს ოჯახებში ეწვივდნენ და საჭირო პროდუქტები გადასცეს. დღესვე გამოცხადდა „ერთი ნაპობი შეშის აქციის" დაწყება, რომელიც ბენეფიციარებს ცივი ზამთრის დაძლევის აქციაა. წყარო: ორგანიზაციის გვერდი სოციალურ ქსელში