თბილისი. 26 სექტემბერს საქართველოს ჟურნალისტური ეთიკის ქარტიამ 2013 წლის 2-15 სექტემბრის პერიოდში ჩატარებული წინასაარჩევნო მოდიამონიტორნიგის შედეგების პრეზენტაცია გამართა. ფონდ „ღია საზოგადოება - საქართველოს" ფინანსური მხარდაჭერით ქარტია 2 სექტემბრიდან „მემო 98"-თან ერთად აკვირდება ექვს სატელევიზიო არხს, კვლევაში ჩართული მონიტორები მედიის საშუალებების საქმიანობაში - ბალანსს, სიზუსტეს, თემატიკის შერჩევას, სიძულვილის ენასა და სიუჟეტების რიგითობას აკვირდებოდნენ. გარდა ამისა, კვლევაში მოხვდა თითოეული კანდიდატისთვის და ხელისუფლების წარმომადგენლებისთვის დათმობილი დროის ანალიზი. პროექტის ფარგლებში „საქართველოს ჟურნალისტური ეთიკის ქარტია" სულ 3 შუალედურ ანგარშსა და ერთი საბოლოო დასკვნას გამოაქვეყნებს, სადაც შეტანილი იქნება რჩევები და რეკომენდაციები მონიტორნიგში მონაწილე მედიასაშუალებებისათვის. სრულად წყარო: qartia.org.ge

თბილისი. ინფორმაციის თავისუფლების განვითარების ინსტიტუტმა – „პროაქტიული გამოქვეყნების სტანდარტი – თბილისის საკრებულოსთვის" – გამოაქვეყნა. „სამწუხაროდ, მიუხედავად იმ ფაქტისა, რომ დღეს უკვე არსებობს მთავრობის დადგენილებით განსაზღვრული პროაქტიულად გამოსაქვეყნებელი საჯარო ინფორმაციის ნუსხა, რომელიც შემუშავებული იქნა სამოქალაქო საზოგადოების უშუალო ჩართულობითა და მონაწილეობით, ქალაქ თბილისის საკრებულოსთვის სავალდებულო დოკუმენტი მის ძალზედ შეკვეცილ და მნიშვნელოვნად სახეცვლილ ვერსიას წარმოადგენს", ნათქვამია ორგანიზაციის ვებ–გვერდზე. სრულად წყარო: opendatablog.wordpress.com

აჭარა. 26 სექტემბერს, ბათუმის პრეს–კაფეში, სამოქალაქო საზოგადოების ინიციატივით გაიმართა ადგილობრივი საზოგადოებრივი ორგანიზაციებისა და მედიის წარმომადგენლებთან შეხვედრა თემაზე: საზოგადოებრივი ორგანიზაციები და საზოგადოება. შეხვედრის მიზანი საზოგადოებრივი ორგანიზაციებისა და მედიის ურთიერთობის შესახებ დისკუსიის გაგრძელება იყო. მონაწილეებმა იმსჯელეს, ერთის მხრივ, საზოგადოებრივი ორგანიზაციების სწორი საკომუნიკაციო სტრატეგიების საჭიროებასა და, მეორეს მხრივ, მედიის, როგორც სამოქალაქო საზოგადოების აქტორის, როლზე. შეხვედრაზე აჩვენეს სამოქალაქო საზოგადოების ინსტიტუტის მომზადებული საინფორმაციო-სარეკლამო რგოლები, სადაც ასახულია საზოგადოებრივი ორგანიზაციების განვითარების ეფექტურობის ძირითადი პრინციპები, რომლებიც საზოგადოებრივი ორგანიზაციების საერთაშორისო ასამბლეამ დაამტკიცა და რომელთაც „სტამბულის პრინციპები" ეწოდა.

თბილისი. Junior Branch საქართველო პროექტ – Youth in Action–ის ფარგლებში პირველ ოქტომბერს მოხუცთა საერთაშორისო დღეს საერთაშორისო კამპანიას გამართავს. „ერთი ყვავილი – ერთი ღიმილის" – ფარგლებში, ორგანიზაცია მოუწოდებს ყველა მსურველს პირველ ოქტომბერს ნებისმიერ მოხუცს მისცეს ერთი ყვავილი, გადაიღოს ფოტო და გაუგზავნოს ორგანიზაციას. მიღებული ფოტოები ერთად განთავსდება მსოფლიო რუკაზე რომელიც კამპანიის შედეგად შედგება. კამპანია

აჭარა. ახალგაზრდული ორგანიზაცია არტვეი აჭარის განათლების, კულტურისა და სპორტის სამინისტროს მხარდაჭერით იწყებს ახალი პროექტის – „უხმო ფილმების ხმა" – განხორციელებას. პროექტის მიზანია ქართული უხმო ფილმების პოპულარიზება და არასაზაფხულო პერიოდში ქალაქში კულტურული ღონისძიებების გახანგრძლივება. პროექტის ფარგლებში, ბულვარის ტერიტორიაზე, ღია ცის ქვეშ მოეწყობა ქართული უხმო ფილმების ჩვენება ცოცხალი მუსიკის ფონზე. დაგეგმილია ოთხი უხმო ფილმის ჩვენება და მაყურებლისთვის ქართული კინემატოგრაფიის შესახებ სხვადასხვა ინფორმაციის მიწოდება. პროექტის ფარგლებშივე დაიბეჭდება საინფორმაციო ბარათები სამ ენაზე, რომელიც მოსულ სტუმრებს დეტალურად გააცნობს ქართული უხმო კინოს ისტორიას. ფილმის ჩვენებებზე დასწრება თავისუფალია. წყარო:ორგანიზაციის გვერდი სოციალურ ქსელში

შიდა ქართლი. საქველმოქმედო ჰუმანიტარული ცენტრი „აფხაზეთი", პროექტის -„ახალგაზრდების ჩართულობა და განვითარება" ფარგლებში ცდილობს საქმიანი ურთიერთობები დაამყაროს შიდა ქართლის რეგიონში მოქმედ საზოგადოებრივ ორგანიზაციებთან. თანამშრომლობის კარგი მაგალითია 2013 წლის 24 სექტემბერს „მეგობრობის ხიდი - ქართლოსის" ოფისში გამართული ორმხრივი შეხვედრა. აღნიშნულ შეხვედრაზე მოხდა მოსაზრებების და გამოცდილების გაზიარება ცენტრ „აფხაზეთსა" და „ქარლოსს" შორის ახალგაზრდებისა და მოზარდი თაობების პრობლემების ირგვლივ. ასევე საუბარი წარიმართა ახალგაზრდა თაობის როლზე კონფლიქტების მოგვარებასა მშვიდობის მშენებლობაში. შეხვედრის ბოლოს მეგობრობის ხიდი - ქართლოსის წარმომადგენელმა ცენტრ „აფხაზეთს" გადასცა მეთოდოლოგიური მასალა მასწავლებლებისათვის - ბუნებრივად საინტერესო გაკვეთილის როგორც ნაბეჭდი, ასევე ელექტრონული ვერსია კომპაქტ დისკის სახით. აღნიშნული მასალა გადაეცემათ ცენტრ „აფხაზეთის" მიერ გორის მუნიციპალიტეტის რვა სოფლის საჯარო სკოლაში ჩამოყალიბებულ ახალგაზრდულ კლუბებს.

თბილისი. 24 სექტემბერს „საერთაშორისო გამჭვირვალობა – საქართველომ" საქართველოს პრეზიდენტის ადმინისტრაციის წინააღმდეგ თბილისის საქალაქო სასამართლოში სარჩელი შეიტანა. ორგანიზაცია ასაჩივრებს პრეზიდენტის ადმინისტრაციის უარს პრეზიდენტის სარეზერვო ფონდიდან საზღვარგარეთ მაგისტრატურაში სასწავლებლად დაფინანსებული სტუდენტების შესახებ ორგანიზაციის მიერ ინფორმაციის მოთხოვნაზე.  „საერთაშორისო გამჭვირვალობა – საქართველო" იყენებს სამართლებრივ გზებს, სარჩელით მიმართავს თბილისის საქალაქო სასამართლოს პრეზიდენტის ადმინისტრაციის წინააღმდეგ  და მოითხოვს, რომ სასამართლომ დაავალოს პრეზიდენტის ადმინისტრაციას საჯარო ინფორმაციის მოწოდება", ნათქვამია ორგანიზაციის ვებ–გვერდზე. სრულად წყარო: transparency.ge

იმერეთი. ქუთაისის მერიის სპორტისა და ახალგაზრდობის სამსახური საკონკურსო პროგრამების განხორციელებას იწყებს, რომლის პრეზენტაციაც, 25 სექტემბერს,  დემოკრატიული ჩართულობის ცენტრში შედგა. კონკურსში მონაწილეობისთვის გამოყოფილია რამდენიმე პრიორიტეტული მიმართულება: ახალგაზრდების ჩართულობა საზოგადოებრივ ცხოვრებაში, არაფორმალური განათლება (ტრენინგ-სემინარები), ცხოვრების ჯანსაღი წესის პოპულარიზაცია და  სოციალურად დაუცველი და შეზღუდული შესაძლებლობების მქონე ახალგაზრდების დახმარება-ინტეგრაცია. ქუთაისის მერიის ახალგაზრდობის სამსახური  აღნიშნულ ინიციატივას 50 000 ლარს მოახმარს.  როგორც ახალგაზრდობის საქმეთა განყოფილების წარმომადგენლებმა განაცხადეს, პროექტების ფორმა შეზღუდული არ არის, თუმცა აუცილებელია ბიუჯეტის დეტალურად წარდგენა.  პროექტების მიღება 26 სექტემბერს დაიწყება და 9 ოქტომბრამდე გასტანს.

თბილისი. ადამიანის უფლებების სწავლებისა და მონიტორინგის ცენტრმა (EMC) პროკურატურას გაუგზავნა განცხადება, რომელშიც სოფელი ჭელას მეჩეთის მინარეთის დემონტაჟის დროს პოლიციის მიერ „აშკარად არაპროპორციული ძალის გამოყენების ფაქტებზე" გამოძიების დაწყება მოითხოვა. „განცხადების პასუხად, შინაგან საქმეთა სამინისტრომ გამოძიების, ისევე როგორც მისი თანამშრომლების მიმართ დისციპლინური წარმოების დაწყებაზე უარი განაცხადა. შსს-ს შეფასებით, პოლიციის მუშაკების მხრიდან არაპროპორციული ძალის გამოყენების ფაქტები არ დგინდება, რადგან ადგილობრივმა მაცხოვრებლებმა სხეულის დაზიანებები მიიღეს საზოგადოებრივი წესრიგის დაცვისთვის ხელის შეშლის მიზნით, პოლიციის მუშაკის მიმართ ძალადობით და ძალადობის მუქარით წინააღმდეგობის გაწევის დროს".  EMC მიიჩნევს, რომ შსს-ს აღნიშნული გადაწყვეტილება აშკარად დაუსაბუთებელია და პროკურატურას დამოუკიდებელი გამოძიების ჩატარებას სთხოვს. სრულად წყარო:ორგანიზაციის გვერდი სოციალურ ქსელში

შიდა ქართლი. სექტემბრის თვეში საქველმოქმედო ჰუმანიტარულმა ცენტრმა „აფხაზეთმა" არასაპატიმრო სასჯელთა აღსრულებისა და პრობაციის ეროვნული სააგენტოს დაფინანსებით შიდა ქართლის რეგიონში დაიწყო ორი პროექტის განხორციელება. „პირობით მსჯავრდებულთა ფსიქო-სოციალური რეაბილიტაციის" და „პირობით მსჯავრდებულთა საზოგადოებაში ინტეგრაციისა და დანაშაულის პრევენციის მხარდამჭერი პროგრამა". პირველი პროექტის მიზანია შიდა ქართლში მცხოვრები პირობით მსჯავრდებულთა ფსიქო-სოციალური რეაბილიტაცია სპეციალური „აღდგენითი" პროგრამის და ფსიქოლოგთან ინდივიდუალური კონსულტაციების გზით. პროექტი 4 თვიანია და მასში მონაწილეობას მიიღებს 40 ნებეფიციარი, რომლებიც შერჩეულნი იქნებიან პრობაციის ბიუროს სოციალური სამსახურის მიერ.  მეორე პროექტი, რომელის მიზანიც არის დანაშაულის პრევენცია და პირობით მსჯავრდებულთა ინტეგრაცია საზოგადოებაში, მიზნად ისახავს ბენეფიციართა დასაქმებიბს ხელშეწყობას. ოთხთვიანი პროექტის ფარგლებში 40 პრობაციონერი შეიძენს მეორად პროფესიას სახლემწიფო კოლეჯ „განთიადში" ორი თვის განმავლობაში, რის შემდეგაც აიღებენ სერტიფიკატებს. მათგან ყველაზე წარმატებულებს ცენტრი „აფხაზეთი" საჩუქრად გადასცემს სამუშაო იარაღებს. ორივე პროექტის მონაწილეებს პროექტის ფარგლებში ჩაუტარდებათ ჯანსაღი ცხოვრების წესის ტრენინგები, რამდენადაც მავნე ჩვევები აქტუალურია ზოგადად საქართველოში და განსაკუთრებით ამ სამიზნე ჯგუფში. ასევე დამატებით მონაწილეები გაივლიან სამუშაოს მოძიების ტრენინგებს, რაც ხელს შეუწყობს მათი სოციალური კომპეტენციის ამაღლებას და შესაბამისად გაზრდის დამოუკიდებლად სამსახურის მოძიების ალბათობას.

თბილისი. კონსტიტუციის 42-ე მუხლის ორგანიზებით გაიმართა მრგვალი მაგიდა საგადასახადო სამართალში არსებული პრობლემების შესახებ. ღონისძიებაში მონაწილეობა მიიღეს სახელმწიფო უწყებების (სასამართლოები, ფინანსთა სამინისტრო, შემოსავლების სამსახური, დავების განხილვის საბჭო) და არასამთავრობო ორგანიზაციების წარმომადგენლებმა. ორგანიზაციის გვერდზე ნათქვამია, რომ შემოსავლების სამსახურის წარმომადგენლების მიერ გაზიარებულ და მოწონებულ იქნა 42-ე მუხლის იურისტების მიერ შეთავაზებული რამდენიმე რეკომენდაცია. წყარო:ორგანიზაციის გვერდი სოციალურ ქსელში

შიდა ქართლი. საზოგადოება „ბილიკში" სამოქალაქო კლუბების წევრებთან სასაუბროდ იმყოფებოდა გორის მუნიციპალიტეტის გამგეობის წარმომადგენლები. შეხვედრაზე მოსწავლეებმა დააყენეს ყველა ის პრობლემური საკითხი, რომელიც ადვოკაციის ტრეინინგებზე წარმოიშვა. შეხვედრაზე ისაუბრეს როგორც უკვე განხორციელებულ პროექტებზე, ასევე აქტუალურ პრობლემებზე. შეხვედრის დასრულებისას გამგებლის მოადგილემ მზადყოფნა გამოთქვა გაგრძელდეს სამუშაო შეხვედრები პრობლემების მოსაგვარებლად და ინტენსიური ხასიათი მიეცეს კლუბების და ადგილობრივი მუნიციპალიტეტის თანამშრომლობას.

კახეთი. 25 სექტემბერს,  თელავის სახელმწიფო უნივერსიტეტში გაეროს ინიციატივით ჩატარდა სტუდენტური გამოკითხვა სახელწოდებით „ჩემი სამყარო". ახალგაზრდებს შესაძლებლობა მიეცათ, დაეფიქსირებინათ საკუთარი მოსაზრებები და შეთავაზებული პრობლემური თემებიდან გამოეყოთ მათთვის პრიორიტეტული ისეთი საკითხები, როგორებიცაა: დანაშაულისა და ძალადობისგან დაცვა, ხარისხიანი განათლება, ჯანდაცვის გაუმჯობესება, პოლიტიკური თავისუფლებები, თანასწორობა ქალებსა და მამაკაცებს შორის და სხვ. სტუდენტებს დაურიგდათ საინფორმაციო ბუკლეტები, ხმა კიონლაინ რეჟიმში სპეციალურ საიტზე – myworldgeorgia.org-ზე შესვლით მისცეს. 

სამეგრელო. 25 სექტემბერს ასოციაცია „ათინათში" დაჯილდოების ცერემონიალი გაიმართა. ღონისძიებაზე „ორტუსის" 14 წევრი დაჯილდოვდა, რომლებმაც ორთვიანი სტაჟირების კურსი რადიო „ათინათში" წარმატებით დაასრულეს. ყველა მონაწილეს გადაეცა სერთიფიკატები, ასევე გამოვლინდნენ გამარჯვებულები, მათ სერთიფიკატებთან ერთად ფასიანი საჩუქრებიც გადაეცათ.  სტაჟირების კურსი ჩატარდა პროექტ – „ეროვნული ინტეგრაციის გაძლიერება საქართველოშის" – ფარგლებში, რომელსაც ახორციელებს საქართველოს გაეროს ასოციაცია, ამერიკის შეერთებეული შტატების საერთაშორისო განვითარების სააგენტოს ფინანსური მხარდაჭერით. წყარო:ორგანიზაციის გვერდი სოციალურ ქსელში

სამცხე–ჯავახეთი. ახალციხის ახალგაზრდული ცენტრის წევრებს ტრენინგი ლიდერობის თემაზე ჩაუტარდათ. ტრენინგი ჩატარდა პროექტ ეროვნული ინტეგრაციის გაძლიერება საქართველოში ფარგლებში, რომელსაც ახორციელებს, საქართველოს გაეროს ასოციაცია, USAID-ის ფინანსური მხარდაჭერით. წყარო:ორგანიზაციის გვერდი სოციალურ ქსელში 

26 სექტემბერს, 12:00 საათზე ეკონომიკური პოლიტიკის კვლევის ცენტრი მართავს ონლაინ პლატფორმის „სახელმწიფო ფასის" შესახებ შეხვედრას. მისამართი: თბილისი, სასტუმრო „თბილისი მარიოტი"

26 სექტემბერს, 9:00 საათზე, ამერიკის საელჩოს წარმომადგენლობა გამართავს შეხვედრას ადგილობრივ საზოგადოებრივ ორგანიზაციების წარმომადგენლებთან და სტუდენტებთან რელიგიურ საკითხებთან დაკავშირებით. მისამართი: ბათუმი, ფარნავაზ მეფის 62-64, დემოკრატიული ჩართულობის ცენტრი

26 სექტემბერს, 13:00 საათზე, სამოქალაქო საზოგადოების ინსტიტუტი გამართავს შეხვედრას - „ჟურნალისტებისა და საზოგადოებრივი ორგანიზაციების დიალოგი".  მისამართი: ბათუმი, მელაშვილის და საბაჟოს შესახვევი 1/2

26 სექტემბერს, 18:00 საათზე, „იდენტობას" გერმანიაში მოღვაწე ქართველი თეოლოგი მირიან გამრეკელაშვილი ეწვევა. შეხვედრაზე საუბარი იქნება ლგბტ საკითხების და ქრისტიანული თეოლოგიის ურთიერთიმართების თემაზე. მისამართი:თბილისი, იდენტობას ოფისი

26 სექტემბერს, 13:00 საათზე, ორგანიზაცია „სამოქალაქო აქტივობა და ჩართულობა" გამართავს დისკუსიას თემაზე – „ წინა საარჩევნო პოლიტიკური სიტუაციაა აჭარაში". მისამართი: ბათუმი, ფარნავაზ მეფის 62-64, დემოკრატიული ჩართულობის ცენტრი

თბილისი. ადამიანის უფლებების სწავლებისა და მონიტორინგის ცენტრი მოუწოდებს სახელმწიფოს დაუყოვნებლივ მიიღოს შესაბამისი ღონისძიებები შრომის უსაფრთხო პირობების უზრუნველყოფის მიზნით. „საქართველოს შრომის კოდექსში 2013 წელს განხორციელებული მნიშვნელოვანიცვლილებების მიუხედავად, ისინი არ შეხებია შრომის უსაფრთხოების საკანონმდებლო მექანიზმების გარანტირებას, რაც პრობლემას კვლავ დღის წესრიგში ტოვებს და მისი დაუყოვნებლივი მოგვარების საჭიროებას განაპირობებს", ნათქვამია ორგანიზაციის მიერ გავრცელებულ განცხადებაში. „ადამიანის უფლებების სწავლებისა და მონიტორინგის ცენტრს (EMC) სურს ხელისუფლებისა და საზოგადოების ყურადღება მიმართოს შრომის უსაფრთხოებასთან დაკავშირებით არსებული უმძიმესი და სისტემური პრობლემისაკენ, რომელიც ავლენს სახელმწიფოს უსუსურ პოლიტიკას დასაქმებულთა ჯანმრთელობისა და სიცოცხლის უფლების არასათანადო დაცვაზე". სრულად წყარო:ორგანიზაციის გვერდი სოციალურ ქსელში

იუნისეფის, კლერმონტის უნივერსიტეტის და და IOCE-ის ინიციატივით, როკფელერის ფონდის დახმარებითა და გაეროს ქალთა ფონდის (UN Women) პარტნიორობით იწყება დისტანციური, ელექტრონული სწავლების პროგრამა. პროგრამა შედგება შემდეგი კურსებისგან: მიუკერძოებლობასა (სამართლიანობასა) და გენდერზე ფოკუსირებული შეფასებები, შეფასების ეროვნული შესაძლებლობების განვითარება ქვეყნის მონიტორინგისა და შეფასების სისტემებისთვის, ახალი პრაქტიკები განვითარების შეფასებებში. პროგრამას წარუძღვება 30 საერთაშორისო დონის ექსპერტი. სასწავლო პროგრამა უფასოა. კურსი ხელმისაწვდომი იქნება არაბულ, რუსულ და ესპანურ ენებზეც. ვიდეო–წარდგენა რეგისტრაცია წყარო: mymande.org