საზოგადოებრივი ორგანიზაციების ვებპორტალი ლაშა ბაქრაძეს ესაუბრა სამოქალაქო საზოგადოებისა და საზოგადოებრივი, ანუ არასამთავრობო ორგანიზაციების შესახებ. ესაუბრა ლალი შალვაშვილი ბატონო ლაშა, მთელ მსოფლიოში მიმდინარეობს მუდმივი დისკუსია ტერმინის „სამოქალაქო საზოგადოების" – შესახებ. საქართველოში ზოგი ამ ტერმინის ქვეშ მოიაზრებს არასამთავრობო ორგანიზაციებს, თუმცა ზოგ შემთხვევებში უფრო ფართო გაგებას უძებნიან, თქვენ როგორ განმარტავთ? ლაშა ბაქრაძე – ვფიქრობ, რომ ქართულმა საზოგადოებამ, ნაწილობრივ დასავლური იდეების გავლენით, დიდი შეცდომა დაუშვა, როცა სამოქალაქო საზოგადოება გაიგო, როგორც არასამთავრობო ორგანიზაციები. ეს ძალიან დიდი შეცდომა იყო, რადგან, ჩემი ღრმა რწმენით, სამოქალაქო საზოგადოებას ქმნიან ინდივიდები, რომლებიც თავისუფლად აზროვნებენ, რომლებიც გარკვეულ გავლენას ახდენენ საზოგადოებაზე და ფორმალურად, შეიძლება არც იყვნენ გაერთიანებული გარკვეულ ორგანიზაციებში. როდესაც ორგანიზაციებზე ვსაუბრობთ, მხოლოდ და მხოლოდ არასამთავრობო ორგანიზაციები არ უნდა წარმოვიდგინოთ, ეს შეიძლება იყო კონკრეტული გაერთიანება, რომელიც კონკრეტული საკითხის ირგვლივ იქმნება და კონკრეტული საკითხის გადაწყვეტისთვის იბრძვის. მაგალითად შეგვიძლია მოვიყვანოთ საყდრისის საკითხი, ან მწვანე ნარგავების მოჭრის საწინააღმდეგო კამპანიის ფარგლებში გაერთიანებები. ვფიქრობ, ასეთი საზოგადოებრივი ჯგუფები უფრო დიდ გავლენას ახდენენ, ვიდრე არასამთავრობოები. განსაკუთრებით უნდა აღინიშნოს, რომ არასამთავრობოები, რომლებიც საქართველოში ჩამოყალიბდნენ, საკუთარი წევრების დაფინანსებით არ არის შექმნილი, ანუ ბაზისურად კი არ არის შექმნილი, არამედ ვიღაც ქმნის და მერე აჰყავს თანამშრომლები. ისინი ძირითადად დამოკიდებულნი არიან საზღვარგარეთულ გრანტებზე, ამ საკითხზე მათ ძალიან ხშირად ვაკრიტიკებ, რადგან ისინი ძირითადად ფიქრობენ თუ ვინ, რა საგრანოტო კონკურსს გამოაცხადებს და რისთვის შეიძლება მიიღონ დაფინანსება, და არა იმაზე, ქვეყანაში რა საჭიროებაა. რასაკვირველია, ეს ვერ შექმნის ნამდვილ სამოქალაქო საზოგადოებას. სამოქალაქო საზოგადოებისთვის უმნიშვნელოვანესია ინდივიდუალური თავისუფლება, შეკრების თავისუფლება და სხვა. თუ ეს არ არის გარანტირებული სახელმწიფოს მიერ, შეუძლებელია სამოქალაქო საზოგადოება შეიქმნას. საბჭოთა კავშირში სამოქალაქო საზოგადოება ვერ შეიქმნებოდა, რადგან ხელისუფლება ამას ებრძოდა. სწორედ ამიტომ სამოქალაქო საზოგადოების შენება პოსტკომუნისტურ ქვეყნებში გაჭირდა – ამის გამოცდილება დიდი ხნის განმავლობაში არ გვქონდა და სამწუხაროდ, ნაწილობრივ არასწორი მიმართულებით წავიდა, რადგან დასავლეთი თვლიდა, რომ არასამთავრობოები სამოქალაქო საზოგადოების საფუძველი იყო. თუმცა ძნელია იმის თქმა, რომ ეს არ იყო მთლად სწორი, რადგან სხვა საყრდენი სამოქალაქო საზოგადოების შესაქმნელად არ იყო. გრძელვადიან პერსპექტივაში თუ გვინდა ასეთი პრობლემები არ ჰქონდეს სამოქალაქო საზოგადოებას, მნიშვნელოვანია დავინახოთ, რომ არა მხოლოდ არასამთავრობოები, არა მხოლოდ ის ორგანიზაციები, რომლებიც ფინანსდება საიდანღაც, არამედ ინდივიდები, ადამიანები ქმნიან სამოქალაქო საზოგადოებას. სამოქალაქო საზოგადოების კლასიკური განმატებაა – სახელმწიფოს, ეკონომიკური სექტორის, ოჯახის, და საქართველოში დავამატებდი ეკლესიის გარეთ, არსებული საზოგადოება, რომელიც არის აქტიური და კონკრეტული პრობლემის გარშემო ერთიანდება, შეუძლია თავისი აზრი გამოხატოს, შეუძლია ამ პრობლემის მოსაგვარებლად იბრძოლოს. ასე რომ, სამოქალაქო საზოგადოება უფრო ფართო ცნებაა, ვიდრე არასამთავრობოების კავშირი, ერთობა. თქვენ ახსენეთ საყდრისის, გამწვანების საკითხების ირგვლივ გაერთიანებული საზოგადოება, ისინი გამოთქვამენ აზრს, აქტიურობენ ამ საკითხების ირგვლივ, ანუ არიან აქტიური ჯგუფები... მთლიანობაში როგორ შეაფასებთ საქართველოში სამოქალაქო საზოგადოებას? ლაშა ბაქრაძე – საკმაოდ სუსტია, ამას ყოველდღიურად ვხედავთ, სამოქალაქო საზოგადოება ჩანასახობრივად არსებობს საქართველოში. მან ვერ შეძლო შეემუშავებინა რაიმე ინსტრუმენტი, რომლითაც გავლენას მოახდენდა, ან ახლა მოახდენს ხელისუფლებაზე და იმ პოლიტიკაზე, რომელიც ამა თუ იმ ხელისუფლებას ჰქონდა და აქვს. საკმაოდ რთულია ასეთი ინსტრუმენტების პოვნა, მაგრამ არსებობს ასეთი გამოცდილება და ის უნდა მოირგოს საზოგადოებამ. თქვენ გულისხმობთ დასავლურ სამოქალაქო საზოგადოებას და მათ გამოცდილებას... ლაშა ბაქრაძე – დიახ, თუმცა, ხშირად როცა „დასავლეთს" ვამბობთ, ვგულისხმობთ ყველა სამართლებრივ, ცივილიზებულ სახელმწიფოს. მათ შორის იაპონია არ არის დასავლეთი, მაგრამ ძალიან საინტერესო გამოცდილება აქვს და მისგანაც ბევრის სწავლა შეგვიძლია, რადგან იქ ერთი მხრივ ძალიან ტრადიციული საზოგადოებაა და ამავე დროს - თანამედროვე. სამოქალაქო საზოგადოებამ აფრიკის ბევრ ქვეყანაშიც მიაღწია წარმატებას, რაც ასევე ძალიან კარგი მაგალითია საქართველოსთვის, სადაც ძალიან დიდი დაპირისპირებაა საზოგადოებაში. უარესი დაპისრიპირება არსებობდა სამხრეთ აფრიკაში, მაგრამ მათ შეძლეს ცივილური თანაცხოვრებისკენ გადაედგათ ნაბიჯები – მჩაგვრელებმა მოინანიეს, ხოლო ვისაც წლების წინ ჩაგრავდნენ, მათ შეძლეს ნაწილობრივ მაინც ეპატიებინათ მჩაგვრელთათვის. ასევე შეგვიძლია მოვიყვანოთ უგანდის მაგალითი, სადაც ორმა დაპირისპირებულმა ეთნიკურმა ჯგუფმა ერთმანეთს მუსრი გაავლო, მაგრამ არის მცდელობები, რომ ერთად იცხოვრონ. ასე რომ ბევრი რამის სწავლა არამხოლოდ ცივილიზებული, დასავლური სამყაროსგან შეიძლება, არამედ, ერთი შეხედვით, შედარებით განუვითარებელი საზოგადოებისგანაც. შეიძლება მათგან უფრო მეტიც ვისწავლოთ თუ ცხვირს არ ავიბზუებთ, რაც ხშირია ჩვენს ქვეყანაში. თქვენ ისაუბრეთ, რომ საქართველოში სამოქალაქო საზოგადოება გავლენას ვერ ახდენს ხელისუფლების პოლიტიკაზე, მეორე მხრივ, ვერ ვიყენებთ მსოფლიოს სხვადასხვა სამოქალაქო საზოგადოებაში დაგროვილ ცოდნას და გამოცდილებას... თქვენი აზრით, რა არის მიზეზი? ხომ არ სჭირდება ამ ყოველივეს უფრო მეტი დრო? ლაშა ბაქრაძე – მგონი საკმარისი დრო გვქონდა, მაგრამ ვერ ვიპოვეთ ინსტრუმენტები, რომლითაც ხელისუფლებას ვაიძულებთ გადაჭრას ესა თუ ის საკითხი. მაგალითად ავიღოთ გუდიაშვილის მოედნის ირგვლივ განვითარებული აქტივობები, რომელმაც სერიოზული გავლენა ვერ იქონია მოვლენების განვითარებაზე. სხვა ბევრი მაგალითის მოყვანა შეიძლება, რომელიც აჩვენებს, რომ საზოგადოებას არ ჰყოფნის ენერგია და მოთმინება. ვერ აცნობიერებს, რომ ყველაფერი ერთი აქციით, ერთი პეტიციით არ წყდება, რომ გრძელვადიან პერსპექტივაში საზოგადოება იდგეს ერთად. ამ აქციებზე იყვნენ ადამიანები, ვინც ერთმანეთის მიმართ დიდი სიმპათიით ან სიყვარულით არ არიან განწყობილნი, რაც აჩვენებს, რომ არის საკითხები, რომელებიც საზოგადოებას აწუხებს, მაგრამ არ ჰყოფნის ძალა, რომ გაერთიანდეს და ერთად დადგეს და პროტესტის გრძელვადიან მეთოდებს მიმართოს, თუკი, რა თქმა უნდა, საჭიროდ ჩათვლის მიზნის მისაღწევად. ეს ჯერჯერობით ვერ ხერხდება. პოსტსაბჭოთა ქვეყნებთან თუ გავავლებთ პარალელს, იქ როგორ მოხერხდა სამოქალაქო საზოგადოების ჩამოყალიბება? ლაშა ბაქრაძე – ბალტიის ქვეყნებს რომ დავანებოთ თავი და პოსტსოციალისტურ ქვეყნებზე ვისაუბროთ, შეიძლება ითქვას, რომ პოლონეთში, ჩეხეთში, აღმოსავლეთ გერმანიაში ბევრ წარმატებას მიაღწიეს ამ მიმართულებით. როგორც ბალტიის ქვეყნებიდან, ასევე ამ ქვეყნებიდან ბევრის გადმოღება, ნახვა და სწავლა შეიძლება. ერთ–ერთი მნიშვნელოვანი ფაქტორი, ჩემი აზრით არის ის, რომ ყველა განვითარებულ საზოგადოებაში არსებობს დაპირისპირება, აზრთა სხვადასხვაობა, მაგრამ არის საკითხები, რომლის შესახებაც შეუძლიათ გაერთიანება. ამ ქვეყნებს ამის გარკვეული ტრადიცია ჰქონდათ, მაგრამ მხოლოდ ტრადიციის არქონა არ არის მიზეზი – კავკასიის ქვეყნებისთვის დამახასიათებელია ევროპულისგან განსხვავებული ტრადიციები, რომელიც გარკვეულწილად უშლის ხელს სამოქალაქო საზოგადოების ჩამოყალიბებას. საკმაოდ კრიტიკული მიდგომები გაქვთ, დამოუკიდებლობიდან დღემდე რაიმე პოზიტიური მაგალითის მოყვანა შეგიძლიათ? ლაშა ბაქრაძე – რამდენიმე მაგალითი უკვე მოვიყვანე – პარტიზანული მებაღეობა, გუდიაშვილის მოედანთან, საყდრისის საკითხთან დაკავშირებული პროტესტი, თუნდაც იგივე 17 მაისთან დაკავშირებული ხელმოწერების შეგროვება. სამოქალაქო საზოგადოება ჩანასახობრივ მდგომარეობაშია. ასეთივე მდგომარეობა იყო თუნდაც, მაგალითად ათი წლის წინათ? ლაშა ბაქრაძე – ახლა უფრო აქტიურია, რაც ოპტიმიზმს ბადებს, რომ უკეთესობისკენ მივდივართ და ადამიანები ნელ–ნელა სწავლობენ ამა თუ იმ საკითხის გაპროტესტებას. ძალიან საინტერესოა ასეთ პროტესტში ხელოვანი ადამიანების ჩართვა, ასევე მნიშვნელოვანია პროტესტის ფორმა, გავიხსენოთ 17 მაისი, პუშკინის სკვერში საზოგადოების პატარა ჯგუფმა ფეხსაცმელების საშუალებით აქცია მოაწყო – ეს არის კარგი და საინტერესო პროტესტის ფორმა, მან დიდი გავლენა ვერ მოახდინა, მაგრამ ადამიანების გონებაში დარჩა. გავაგრძელებ არასამთავრობოების მიმართ ჩემს კრიტიკას – რამდენიმე წლის წინათ, ამერიკულმა ერთ–ერთმა ორგანიზაციამ დააფინანსა მულტიკულტურული, მულტიეთნიკური საქართველოს პროექტი. თავისთავად არ იყო ცუდი იდეა, რამდენიმე არასამთავრობომ გაიმარჯვა და დაფინანსება მიიღო, მათ ეთნიკურ ტანსაცმელში ჩაცმული ადამიანების უზარმაზარი პლაკატები გააკეთეს. ეს არის ტიპიური მაგალითი უსაქმური არასამთავრობოების, რომლებსაც არ ჰქონდათ იდეა და გაიმეორეს ის, რასაც 70 წლის განმავლობაში საბჭოთა კავშირში აკეთებდნენ – 15 რესპუბლიკის ეროვნულ ტანსაცმელში ჩაცმული ადამიანების ფოტოები რომ იყო გამოფენილი. ზუსტად ისეთივე იყო შედეგი. ეს არის ტიპიური მაგალითი გრანტიჭამიობის და ეს არის ნათელი მაგალითი როგორ გაკეთდა ფული ყოველგვარი შედეგის მიღწევის სურვილის გარეშე. სხვათა შორის, არასამთავრობოების კრიტიკას ხშირად ვხვდები სხვაგანაც. ერთი ძალიან კარგი, ინდოელი მწერალი ქალია არუნდათა როი, მისი სტატია წავიკითხე ინდოეთში ბოლო ათწლეულების განმავლობაში არასამთავრობოების მუშაობის შესახებ, სიტუაცია ძალიან ჰგავს ქართულ რეალობას. ჩემი კრიტიკა არ არის კონსერვატიულ–რეაქციული ჯგუფების კრიტიკის მსგავსი, რომლებიც ამბობენ, რომ არასამთავრობოები არიან საზოგადოების გამხრწნელები, ან არიან დასავლეთის ფულებით ნაკვები. ჩემი კრიტიკის საგანია ის, რომ არასამთავრობოები ხშირად იმაზე კი არ ფიქრობენ, რა არის ამ ქვეყნისთვის საჭირო, არამედ იმაზე თუ რისთვის შეიძლება ფულის მიღება, თუმცა უნდა ვთქვა, რომ არასამთავრობოები ძალიან განსხვავდებიან ერთმანეთისგან. ზუსტად ეს უნდა მეკითხა – ორგანიზაციები მართლაც განსხვავდებიან ორგანიზაციული სტრუქტურით, მუშაობის სტილით, მუშაობისადმი დამოკიდებულებით და ა.შ. თქვენ ერთ–ერთი არასამთავრობოს პროექტი ახსენეთ, შეიძლება ამ მაგალითის განზოგადება მთელ სექტორზე? ლაშა ბაქრაძე – განზოგადება არ შეიძლება, ისინი ერთმანეთისგან ძალიან განსხვავდებიან. მაგალითები მომყავს იმისათვის, რომ ნათელი იყოს, რას ვაკრიტებ და რა არ მომწონს, ან რა მომწონს. უხვად შემიძლია მოვიყვანო როგორც დადებითი, ისე უარყოფითი მაგალითები. თავისთავად არასამთავრობო ძალიან კარგი რამ არის, ამაზე არც ვსაუბრობ. არც ის არის ცუდი, რომ არასამთავრობოების საქმიანობის დაფინანსების წყაროები არსებობს, ამაზეც არ ვსაუბრობ, მაგრამ არ შეიძლება ისინი არსებობდნენ მხოლოდ იმიტომ, რომ ვიღაცა რაღაცას დაუფინანსებს. ხშირად, როცა გარკვეულ საკითხზე არის საუბარი, ვაწყდები ასეთ პასუხს – კარგია, მაგრამ ამას არავინ დააფინანსებს, ან ჯერ დაფინანსება უნდა მოვიპოვოთ და ასე შემდეგ. თუკი საზოგადოება არის ჯანმრთელი, არ მგონია, რომ მხოლოდ და მხოლოდ იმაზე ფიქრობდეს რა საკითხები შეიძლება დაფინანსდეს. რასაკვირველია, ფინანსების გარეშე ბევრი რამის გაკეთება უბრალოდ შეუძლებელია და ძალიან მნიშვნელოვანია, რომ დაფინანსების შესაძლებლობა არსებობს, თუმცა არის საკითხები, რომლებიც ადვილად გადასაწყვეტია და შორეულ მომავალში არ უნდა გადავდოთ. ანუ საზოგადოება მიეჩვია 20–25 წლის განმავლობაში იმას, რომ აქტივობის გამოჩენა ღირს თუ ამისთვის ფინანსები იქნება. ეს ძალიან სამწუხაროა, არ მომწონს და არ მგონია ვინმეს მოსწონდეს. ერთ მაგალითს მოვიყვან, კვირაობით იუსტიციის სახლთან არის პატარა ბაზრობა – მე ვიტყოდი, რომ სწორედ ეს არის სამოქალაქო საზოგადოების ჩანასახი, ის არ არის ხელისუფლების მიერ ორგანიზებული, ადამიანები თავად მიდიან, უხარიათ რასაც აკეთებენ და ეს გახდა რაღაც შეკრების, გაცნობის, საუბრის ადგილი. ცოტა სხვანაირად რომ შევხედოთ – ამ ადამიანებს უხარიათ თუ შემოსავლის გამო რაღაცას ყიდიან? ლაშა ბაქრაძე – ადამიანები მარტო იმიტომ არ დადიან იქ, რომ რაღაცას ყიდიან, არამედ იმიტომ რომ ეს არის გარკვეული კომუნიკაციის საშუალება და ბაზრობა თვითორგანიზებულია, არ არის დაგეგმილი ზემოდან – ქვემოდან მოდის ინიციატივა. თითქოს ამ ბაზრობას არ აქვს კავშირი რაიმე პრობლემატიკასთან, მაგრამ ყოველგვარი ჩარევის გარეშე ვხედავთ ინდივიდების თვითორგანიზებას – ეს არის სამოქალაქო საზოგადოება. ეს არ არის ისეთი, როგორიც თბილისობა, რომელსაც ხელისუფლება გეგმავს და იგი ნათელი მაგალითია ზემოდან მოგონილი ღონისძიებისა, რომელიც შემდგომ ყველა ხელისუფლებამ გაიმეორა. ეს არის სრულიად არაბუნებრივი, არასახალხო დღესასწაული, მსგავსი სხვა ქვეყნებშიც შეიძლება შეგვხვდეს და მის მოწყობას ხელისუფლება უწყობდეს ხელს, მაგრამ ეს იმას არ ნიშნავს, რომ უცხოეთში თავიდან ბოლომდე ყველაფერს ხელისუფლება გეგმავს. ვიტყოდი, რომ თბილისობა არის ანტისამოქალაქო საზოგადოების ნათელი მაგალითი. მაგრამ საზოგადოება იღებს მონაწილეობას თბილისობაში... ლაშა ბაქრაძე – გასაგებია რომ ბევრი ადამიანი მიდის, მაგრამ ჩვენ ვსაუბრობთ სამოქალაქო საზოგადოებაზე და სამოქალაქო საზოგადოების აქტივობის თვალსაზრისით ნულოვანი და ანტიშედეგის მომტანია ასეთი ღონისძიებები, რადგან ყველაფერი იმართება ზემოდან. ჩვენ გვჭირდება ბაზისური დემოკრატია. მაგალითად ავიღოთ სოფლის არხი, რომელმაც შეიძლება დატბოროს სოფელი, რას აკეთებს სოფლის მოსახლეობა – იკრიბება და ითხოვს, რომ ხელისუფლებამ მიაქციოს ყურადღება და არის მუდმივი მოთხოვნა. ანუ დაიკარგა ის, რომ სოფელს თავადაც შეუძლია მცირე სამუშაოს ჩატარება. სოფელში არ იყო ბულდოზერი, არ ჰქონდათ არაფერი და ყოველთვის ვიღაცაზე იყვნენ დამოკიდებულნი, მათ განცხადება უნდა დაეწერათ კოლმეურნეობაში, ან რაიკომში და დღემდე ასე გრძელდება – ეს არის კომუნიზმის ნარჩენი. არ უნდათ, რაღაცა გააკეთონ, გარდა იმისა, რომ ქუჩა გადაკეტონ და მოითხოვონ – ამის იქით ვერ მიდიან. აი ეს არის მაგალითი იმისა, რომ სამოაქალაქო საზოგადოება ვერ შედგა. სამოქალაქო საზოგადოებაზე ძალიან საინტერესო კონტექსტში საუბრობს ანტონიო გრამში. კონტექსტი არის ის, რომ მარქსისტებმა თავის თავს დაუსვეს კითხვა – რატომ მოხდა რუსეთში რევოლუცია და არ მოხდა იქ, სადაც მარქსი ამბობდა – განვითარებულ კაპიტალისტურ ქვეყნებში. ამაზე ძალიან საინტერესო და სწორი პასუხი აქვს გრამშს – მისი თქმით, როდესაც რევოლუციური მასების ტალღები დაეჯახა ბურჟუაზიის ციხესიმაგრეს, აღმოჩნდა, რომ ამ ციხესიმაგრეს წინ ჰქონდა ფორპოსტები და ეს ფორპოსტები იყო სამოქალაქო საზოგადოება. ანუ პრინციპში გრამში ამბობს, რომ რევოლუციისთვის ნეგატიური მოვლენაა სამოქალაქო საზოგადოება, თუმცა მისივე თქმით, სამოქალაქო საზოგადოება მემარცხენეებსაც შეუძლიათ თავისი პოლიტიკური ბრძოლისა და მიზნებისთვის გამოიყენონ და სწორედ ამიტომ არის მნიშვნელოვანი იგი. რუსეთში, სადაც არ იყო სამოქალაქო საზოგადოება, ძალიან ადვილად მოინგრა ციხესიმაგრე, რომელზეც ადამიანები ფიქრობდნენ რომ დაუნგრეველი იყო. სამოქალაქო საზოგადოების გრამშისეული აღწერა იმიტომ მოვიყვანე, რომ არის ერთი გარემოება, რომელიც წლების განმავლობაში ჩვენთან არ მომხდარა – არც ერთმა ხელისუფლებამ არ მოინდომა რომ მეტი დაეთმო სამოქალაქო საზოგადოებისთვის. ანუ გულისხმობთ, რომ ის პრობლემები, რომელსაც თუნდაც პატარა ჯგუფები წარმოაჩენენ, ხელისუფლებას უნდა გაეთვალისწინებინა? ლაშა ბაქრაძე – დიახ. შეიძლება ვინმემ თქვას, რომ ეს ხელისუფლების ფუნქცია არ არის, ჩამოყალიბებულ ქვეყნებში არც არის აქტუალური, ვსაუბრობ ქვეყნებზე, სადაც არ არის გაცნობიერებული, რომ ქვეყნის სტაბილურობისთვის ძალიან მნიშვნელოვანია ჯანმრთელი სამოქალაქო საზოგადოების არსებობა, სწორედ იმ სამოქალაქო საზოგადოების, რომელიც მათ აკრიტიკებს. სამოქალაქო საზოგადოებამ იმიტომ ვერ იპოვა ინსტრუმენტები, რომლითაც აიძულებს ხელისუფლებას გაითვალისწინოს მათი მოსაზრებები, რომ დიდი ხნის განმავლობაში ხდებოდა მათი მოთხოვნების, აზრის იგნორირება. როდესაც საზოგადოებრივი აზრის, საზოგადოების მოთხოვნების იგნორირებაზე საუბრობთ, გულისხმობთ საბჭოთა წარსულს? ლაშა ბაქრაძე – არა, აგერ ნაციონალური მოძრაობის წარსულ მმრათველობის პერიოდზე ვსაუბრობ, როცა საზოგადოების აზრის იგნორირება ხდებოდა, არ იყო კომუნიკაცია საზოგადოებასა და ხელისუფლებას შორის. პროპაგანდა არ წარმოადგენს კომუნიკაციის საშუალებას დემოკრატიულ ქვეყნებში, იგი ავტორიტარულ ქვეყნებში გამოიყენება. ჯანმრთელი სამოქალაქო საზოგადოება არის ქვეყნის და ერის სტაბილურობის ძალიან მნიშვნელოვანი ფაქტორი, რაც ვერ დაინახა ხელისუფლებამ აქამდე და იმედია მომავალში დაინახავს. თქვენ საუბრობდით გუდიაშვილის, საყდრისის პრობლემებზე გაერთიანებულ სამოქალაქო ჯგუფებზე და მათ პროტესტზე, ამ საკითხების ირგვლივ თავიანთ დამოკიდებულებებს გამოხატავდნენ არასამთავრობო სექტორის წარმომადგენლები, ზოგი მათგანი, ბუნებრივია იღებდა აქციებშიც მონაწილეობას ... თქვენი აზრით, სამოქალაქო საზოგადოებაში არასამთავრობოების როლი როგორია? ლაშა ბაქრაძე – ჩვენთან არასამთავრობოების როლი დიდია, რადგან საზოგადოების ყველაზე აქტიური ნაწილია, ისევე როგორც გარკვეული ინდივიდების როლი მაღალია. 2004 წელს სამოქალაქო სექტორიდან ბევრი ადამიანი გადავიდა ხელისუფლებაში და იყო დიდი გლოვა. ესეც არის იმის მაჩვენებელი, რომ ჩვენ არ გვესმის რა არის სამოქალაქო საზოგადოება – თავისთავად ადამიანი, ინდივიდი ერთ დღეს შეიძლება იყოს რომელიმე ორგანიზაციაში, მეორე დღეს ხელისუფლებაში, ამაში ტრაგიკული არაფერია. ჟურნალისტი, მწერალი, მხატვარი სამოქალაქო საზოგადოების წარმომადგენლები არიან და სულაც არ არის აუცილებელი რომ რომელიმე არასამთავრობოში იყოს. ბუნებრივია, ეს მათი უფლებაა, დავაზუსტებ როგორია სექტორის როლი სამოქალაქო საზოგადოებაში და თქვენი აზრით, როგორი უნდა იყოს? ლაშა ბაქრაძე – რაც უფრო მეტი არასამთავრობო ორგანიზაცია შეიქმნება, რომლის ფინანსური საყრდენი იქნება ორგანიზაციის წევრთა შენატანები, უფრო ჯანმრთელი და გამძლე იქნება ასეთი ორგანიზაცია. რა თქმა უნდა, დამატებითი სახსრები შეუძლია სხვაგან მოიძიოს, მაგრამ საკუთარი წევრების მიერ დაფინანსებას დიდი მნიშვნელობა აქვს – მათ შეეძლებათ გარკვეული საკითხები თავად გადაჭრან. მაგრამ ეს არის პრობლემატური ჩვენ საზოგადოებაში, რადგან საზოგადოების ფინანსური მდგომარეობა არასახარბიელოა. ... და მივადექით, ასე ვთქვათ, შეკრულ წრეს – საზოგადოების ფინანსური მდგომარეობა არასახარბიელოა, სავარაუდოდ, მისი გარკვეული ნაწილი წევრობისთვის აუცილებელ შენატანს ვერ გადაიხდის და ასე შემდეგ, თქვენი აზრით, რა არის გამოსავალი? ლაშა ბაქრაძე – დიახ ნაწილობრივ შეკრული წრეა და მიუხედავად ამისა, ვფიქრობ, ნაბიჯების გადადგმა შესაძლებელია... დასავლეთის მხარდაჭერა რომ არა, თქვენი აზრით, როგორ განვითარდებოდა არასამთავრობო სექტორი? ლაშა ბაქრაძე – ვერც წარმომიდგენია, რადგან 90–იან წლებში, ეკონომიკური ტოტალური კატასტროფის პირობებში საერთოდ არაფერი იფუნქციონირებდა. კრიტიკის პარალელურად შემიძლია აღვნიშნო, რომ სექტორი ბევრ რამეს აკეთებს – სწავლობს სხვადასხვა სახელმწიფო ორგანოების მონაცემებს და ა.შ. რასაკვირველია, ძალიან ძნელი იქნება დაფინანსების გარეშე ამის კეთება, მაგრამ ვხედავთ, რომ დაფინანსების წყარო ნელ–ნელა კლებულობს, ხომ უნდა დავინახოთ შემდგომი განვითარების გზები და ამის გამო ხომ არ უნდა შეწყდეს აქტივობა. ეს რომ მომხდარიყო 90–იან წლებში, მაშინ აქტივობა საერთოდ შეწყდებოდა... რასაკვირველია სექტორის როლი მნიშვნელოვანია, არ შეიძლება ადამიანები ვიყოთ ხელისუფლების იმედად, რომელიც კონტროლის გარეშე იქნება. ამისთვის საჭიროა ორგანიზაციები და ორგანიზებული ჯგუფები, რომლებიც ხანგრძლივად მუშაობენ ამა თუ იმ საკითხებზე და აქვთ გამოცდილება. თავისთავად ცხადია, რომ ასეთი ორგანიზაციები საჭირო და აუცილებელია. ჩვენ ვისაუბრეთ, რომ არასამთავრობო სექტორის გარკვეული ნაწილი ჯერჯერობით ვერ გადადის წევრობაზე დაფუძნებულ მოდელზე, თქვენი აზრით, საზოგადოების აქტიური წევრები რატომ ვერ აყალიბებენ წევრობაზე დაფუძნებულ ორგანიზაციებს? ლაშა ბაქრაძე – ძალიან რთული კითხვაა. ერთი მხრივ არ გვაქვს გამოცდილება, მეორე მხრივ, საქართველოში არის ქართული ინდივიდუალიზმი, რომელსაც ძნელია უწოდო ინდივიდუალიზმი, რომლის გამოც იდეის გარშემო გაერთიანება რთულია. ამას ჩვენ პოლიტიკაშიც ნათლად ვხედავთ – ფაქტობრივად ჩვენთან იდეის გარშემო გაერთიანებული პარტიები არ არსებობს, არიან ჯგუფები, რომლებიც ინდივიდუალური ლიდერის გარშემო არიან გაერთიანებული. უნდა ითქვას, რომ დიდი პარტიების დრო დასავლეთშიც იწურება, ანუ ძალიან ბევრი რამე იცვლება არამხოლოდ ჩვენთან, არამედ ჩვენ გარეთაც, ვცდილობთ ცივილიზებულ სამყაროს ფეხი ავუწყოთ და მწყობრში ჩავდგეთ. მეტნაკლებად სწორი მიმართულებით მივდივართ, მაგრამ ტემპი არადამაკმაყოფილებელია და სასურველია უფრო ჩქარი ტემპით სიარული. თქვენი აზრით, აქვს თუ არა გავლენა არასამთავრობო სექტორს ხელისუფლებასა და მოსახლეობაზე? ლაშა ბაქრაძე – აქვს და შეიძლება უფრო მეტიც ჰქონდეს. საქართველოში ბევრი რამ დამოკიდებულია თუ რა დამოკიდებულება აქვს ამა თუ იმ არასამთავრობოს წარმომადგენელსა და ხელისუფლებას, არა მხოლოდ ინსტიტუციონალურ, არამედ პიროვნულ დონეზე. საზოგადოებაზე გავლენაც დამოკიდებულია იმაზე, ცნობილია თუ არა რომელიმე ორგანიზაცია. შეიძლება ბევრი კარგი არასამთავრობო იყოს, რომელსაც საზოგადოება არ იცნობს. მედიასაც აქვს უაღრესად შევიწროებული ხედვა და ვხედავთ ადამიანების პატარა ჯგუფს მხოლოდ, არადა, ბევრად უფრო მეტი რამ კეთდება და მისი გაცნობა საზოგადოებისთვის ძალიან მნიშვნელოვანი იქნება. სამწუხაროდ, მედია ან არ, ან ვერ ახერხებს ამას. ასეთივე დამოკიდებულება აქვს ხელისუფლებას, როცა მისი წარმომადგენლები ხედავენ საჭიროებას, ისინი იყენებენ ამა თუ იმ არასამთავრობოს საქმიანობას, მაგრამ როცა მათ ინტერესში არ შედის, იგნორირებას უკეთებენ. დასავლეთშიც, დაახლოებით, მსგავსი მდგომარეობაა, ოღონდ იქ საზოგადოება ბევრად უფრო აქტიურია და ხელისუფლებამ იცის, რომ სწორედ მათი ხმა განაპირობებს არჩევნებში ამა თუ იმ პარტიის გამარჯვებას. საქართველოში ხელისუფლება ხშირად ამას ვერ ხედავს და ურჩევნია უფრო გავლენიან ორგანიზაციასთან ჰქონდეს კავშირი, მაგალითად ისეთთან, როგორიცაა ეკლესია. დაგვისახელეთ სამი ღირებულება, რომელსაც უნდა ეფუძნებოდეს სამოქალაქო საზოგადოება... ლაშა ბაქრაძე – სამართლის უზენაესობა, დემოკრატიული განვითარება, საერთო საკაცობრიო ფასეულობების აღიარება.

საზოგადოებრივი ორგანიზაციების ვებპორტალი ესაუბრა ფონდ „ღია საზოგადოება – საქართველოს" ადგილობრივი დემოკრატიის განვითარების პროგრამის მენეჯერს თინიკო ბოლქვაძეს. ესაუბრა ლალი შალვაშვილი როგორ შეაფასებდით იმ გარემოს, რომელშიც უწევთ მუშაობა არასამთავრობო ანუ საზოგადოებრივ ორგანიზაციებს? რა მსგავსებას ან განსხვავებას ხედავთ ხუთი, ან რვა წლის წინანდელ ვითარებასა და ახლანდელს შორის? თინიკო ბოლქვაძე – ისევე როგორც წინა ხელისუფლების მოსვლის დროს, ახლაც არასამთავრობო სექტორს დიდი იმედები გაუჩნდა. 2003 წლის საპარლამენტო არჩევნების შემდგომ დაახლოებით ერთი წელი, ხელისუფლება ღია იყო არასამთავრობოებთან თანამშრომლობისთვის. შემდეგ ეს გზები, ასე ვთქვათ, ჩაიკეტა და მხოლოდ ერთეულ შემთხვევებში იყო არასამთავრობოებსა და სახელმწიფო სექტორს შორის წარმატებული თანამშრომლობის მაგალითები. როცა თანამშრომლობის გზები გადაიკეტა, არასამთავრობო სექტორის წარმომადგენლები იძულებულნი იყვნენ, ძირითადად, „ვოჩდოგური" საქმიანობა გაეწიათ. დღეს, არსებულ ვითარებაზე, შემიძლია ვთქვა, რომ ახალი ხელისუფლება არ არის ისეთივე ღია, როგორიც იყოს 2012 წლის საპარლამენტო არჩევნების შემდეგ. პირველ თვეებში თანამშრომლობა გაცილებით ინტენსიური და წარმატებული იყო და ნელ–ნელა იკვეთება ტენდენცია – თანამშრომლობის მზაობის შემცირებისა. ჩემი აზრით, ეს არ ეხება ყველა სამინისტროსა და სახელმწიფო უწყებას. არის თანამშრომლობის წარმატებული მაგალითები და ეს პროცესი დღესაც გრძელდება. ჩვენ მაგალითზე შემიძლია გამოვყო იუსტიციის, ინფრასტრუქტურის სამინისტროები, რომლებთანაც მუშაობა ინტენსიურად მიმდინარეობს. თუმცა, იგივეს ვერ ვიტყვი ზოგიერთ სხვა სამინისტროზე, მაგალითად ჯანმრთელობის დაცვის სამინისტროზე. იქ გაცილებით მეტი ბარიერია არასამთავრობო სექტორისთვის. მაგრამ მთლიანობაში თუ შევადარებთ და შევაფასებთ წინა და ახლანდელი ხელისუფლების პირობებში არასამთავრობოების სამუშაო გარემოს, ალბათ, მაინც უკეთესი პირობებია. თქვენ აღნიშნეთ, რომ 2012 წლის არჩევნების შემდეგ მოსული ხელისუფლება დასაწყისში უფრო ღია და გახსნილი იყო თანამშრომლობისთვის, თქვენი აზრით, რა მოხდა? რატომ კლებულობს თანამშრომლობის სურვილი? თინიკო ბოლქვაძე – ამ საკითხზე ერთმნიშვნელოვანი პასუხი არ მაქვს. შესაძლოა, ზოგიერთ შემთხვევაში ეს არასამთავრობო ორგანიზაციების ბრალიც იყოს, შესაძლოა, ზოგიერთი მათგანი არ იყოს კონსტრუქციული, ან არ ჰყოფნიდეს კვალიფიკაცია, რომ აკეთოს ისეთი რამ, რომლითაც დაეხმარება სახელმწიფო სტრუქტურებს. თუმცა სხვა მიზეზებიც არის. ახალი ხელისუფლების მოსვლის შემდეგ სამინისტროებთან შეიქმნა გარკვეული საბჭოები, სხვადასხვა საკონსულტაციო ორგანოები და შესაძლოა, ზოგიერთმა მათგანმა ამოწურა ფუნქცია. მაგალითად შემიძლია მოვიყვანო ინფრასტრუქტურის სამინისტროსთან შექმნილი მრჩეველთა საბჭო, რომელიც მუშაობდა თვითმმართველობის კანონპროექტზე, დღეს კოდექსი მიღებულია და შესაძლოა, აღარ არის საჭიროება, რომ საბჭომ ისეთივე ინტენსივობით იმუშაოს, როგორც მანამდე. ხელისუფლებასა და არასამთავრობოებს შორის თანამშრომლობის კლების ერთ–ერთ სავარაუდო მიზეზად დაასახელეთ ზოგიერთი არასამთავრობო ორგანიზაციის კვალიფიკაცია. შეიძლება ეს სურათი განზოგადდეს მთლიანად ხელისუფლებასა და არასამთავრობო სექტორის თანამშრომლობაზე? თინიკო ბოლქვაძე – არა, რა თქმა უნდა. თუ არასამთავრობოს სათანადო კვალიფიკაცია აქვს და და მათი ინტერესი ემთხვევა, რომ ერთად აკეთონ საქმე და კონკრეტულ შედეგს მიაღწიონ – თანამშრომლობა წარმატებულია. უკვე წლებია, რაც არასამთავრობო სექტორში მუშაობთ და თვალყურს ადევნებთ მათ საქმიანობას, თქვენი აზრით, რას მიაღწია და რას ვერ მიაღწია სექტორმა? თინიკო ბოლქვაძე – 2003 წლის არჩევნების შემდგომ, ყველას კარგად გვახსოვს, რომ სექტორიდან დაიწყო კადრების სახელმწიფო სტრუქტურებში გადასვლა. ამას ინტენსიური ხასიათი ჰქონდა. 2012 წლის არჩევნების შემდეგაც სექტორიდან გადავიდნენ სახელმწიფო სტრუქტურებში, თუმცა, ეს არ იყო ისეთი დანაკლისი, როგორც 2003–2004 წლებში. ვფიქრობ, რომ ბოლო რამდენიმე წლის განმავლობაში არასამთავრობო სექტორი მეტნაკლებად მოძლიერდა, დაიწყო განახლება, რამდენიმე ახალი არასამთავრობო ორგანიზაცია ჩამოყალიბდა, რომლებიც წარმატებულად მუშაობენ. მაგალითად ინფორმაციის თავისუფლების განვითარების ინსტიტუტი, რომელიც სულ რამდენიმე წლის წინათ შეიქმნა და ეხლა ერთ–ერთი წარმატებული ორგანიზაციაა. მთლიანობაში თუ შევაფასებთ, ჩემი აზრით, არასამთავრობო სექტორი ნელ–ნელა ძლიერდება. და კიდევ ერთი მნიშვნელოვანი ტენდენცია გამოიკვეთა – არასამთავრობო სექტორმა დაინახა კოალიციური მუშაობის მნიშვნელობა და ის, რომ უფრო მეტის მიღწევა შეუძლიათ ერთად, ვიდრე ცალ–ცალკე. მსგავსი თანამშრომლობა დაიწყო 2011 წლის ბოლოდან, შეგვიძლია გავიხსენოთ კამპანია „ეს შენ გეხება", მედიაკოალიცია. მათ გაცილებით მეტი მოახერხეს, ვიდრე ცალკეულმა ორგანიზაციებმა, თან იმასაც თუ გავითვალისწინებთ, რომ მათ ძალიან მძიმე პირობებში უხდებოდათ ადვოკატირების კამპანიების წარმოება. რას იტყვით მოსახლეობისა და არასამთავრობოების ურთიერთობაზე? ექსპერტები საუბრობენ, რომ სექტორმა ვერ მოახერხა მყარი ურთიერთობის ჩამოყალიბება მოსახლეობასთან... და ეს სექტორის მინუსად აღიქმება... თინიკო ბოლქვაძე – სამწუხაროა, მაგრამ ფაქტია, რომ მოსახლეობასთან მუშაობა არასაკმარისი ინტენსივობით მიმდინარეობს, ხშირ შემთხვევებში ამას დიდი ორგანიზაციები უფრო ახარხებენ. ბოლო ერთი წლის განმავლობაში ფონდ „ღია საზოგადოება – საქართველოს" ხელშეწყობით მინიმუმ 150 შეხვედრა ჩატარდა ადგილობრივ მოსახლეობასთან მხოლოდ და მხოლოდ ერთი კანონპროექტის – თვითმმართველობის კოდექსის განხილვის მიზნით. თუმცა ურთიერთობის დეფიციტი მაინც შეინიშნება და თუ არასამთავრობო სექტორს ამაზე საყვედურობენ, ნამდვილად ეკუთვნით საყვედური. ალბათ, მეტი მუშაობაა ადგილობრივ დონეზე საჭირო. მეორე მხრივ, ხშირად დიდი დონორები წამყვან ორგანიზაციებს აფინანსებენ, რომ ხელშესახები შედეგები დაინახონ. შესაბამისად, ყურადღების მიღმა რჩებიან ადგილობრივი, რეგიონული ორგანიზაციები, რომლებსაც ადგილებზე გაცილებით მეტის გაკეთება შეუძლიათ, ვიდრე თბილისში მომუშავე ორგანიზაციებს. თქვენ ახსენეთ კოალიციური მუშაობის პლუსები, რატომ ვერ ხერხდება მოსახლეობის პრობლემების წარმოსაჩენად სწორედ კოალიციური საქმიანობა? თინიკო ბოლქვაძე – დავიწყეთ მუშაობა, ბევრ არასამთავრობო ორგანიზაციასთან ერთად, ახალ საკანონმდებლო ინიციატივაზე, რომელიც თვითმმართველობის საქმიანობაში მოქალაქეთა მონაწილეობას ეხება. მან, ვფიქრობ, ბევრი პრობლემა უნდა მოაგვაროს, ოღონდ იმ შემთხვევაში თუ მას პარლამენტი მიიღებს და ჩვენს იდეებს გაიზიარებს. ამ შემთხვევაში თბილისში მდებარე თუ რეგიონში მომუშავე ორგანიზაციებს ადგილობრივ მოსახლეობასთან კონტაქტის მეტი საშუალება გვექნება. ჩვენ უნდა გავიგოთ მათი აზრი ადგილობრივ ხელისუფლებაზე და ადგილობრივ დონეზე მათი ჩართულობის შესახებ, ანუ ჩვენ უნდა მივიღოთ მათგან რჩევები, შესაბამისად უახლოესი ერთი წლის განმავლობაში ამ მიმართულებით წარიმართება მუშაობა და შევეცდებით ბევრი ხარვეზი გამოვასწოროთ, როგორც არასამთავრობოების მოსახლეობასთან ურთიერთობის მიმართულებით, ასევე კანონმდებლობის მოგვარების გზით. შეგიძლიათ უფრო კონკრეტულად გვითხრათ რა მექანიზმებს მოიცავს ინიციატივა? თინიკო ბოლქვაძე – საკანონმდებლო ინიციატივა ჯერ არ არის ჩამოყალიბებული, უფრო სწორად პარლამენტის შესაბამისმა კომიტეტმა მოამზადა ერთი კანონის პროექტი, რომელიც მოგვიანებით კომიტეტმა გამოიწვია. შემდეგ მოსახლეობის მონაწილეობის მექანიზმები გაერთიანდა თვითმმართველობის კოდექსის პროექტში, თუმცა განხილვების პროცესში პარლამენტმა უარი თქვა ამ ნაწილზე. მიზეზად დასახელდა ის, რომ არ იყო კარგად ჩამოყალიბებული კოდექსის ეს მუხლები. ის ითვალისწინებდა საბჭოების ჩამოყალიბებას სოფლების, თბილისში უბნების დონეზე. ჩვენ ვფიქრობთ, რომ ის რაც იდო კანონპროექტში არ იყო საკმარისი, რომ ნამდვილ მონაწილეობაზე გვესაუბრა. აქედან გამომდინარე, ვფიქრობთ ალტერნატიულ მექანიზმებზე, ან რა შეიძლება დაემატოს კანონპროექტის ამ ნაწილს და როგორ გახდეს სრულყოფილი, როგორ შეიძლება მოქალაქეებმა მონაწილეობა მიიღონ ადგილობრივი თვითმმართველობის საქმიანობაში საბჭოების შექმნის გარეშე. თქვენ ახსენეთ, რომ „ინიციატივას თუ გაიზიარებს პარლამენტიო"... შეიძლება ცალსახად არ გაიზიაროს საკითხი, რომელიც თვითმმართველობის საქმიანობაში მოქალაქეთა მონაწილეობის მექანიზმებს ეხება? თინიკო ბოლქვაძე – არ ვიცი პარლამენტი როგორ გადაწყვეტილებას მიიღებს. უახლოეს მომავალში პარლამენტის წევრებთან, არასამთავრობო ორგანიზაციებთან, აღმასრულებელი ხელისუფლების წარმომადგენლებთან გვექნება შეხვედრა, სადაც იდეების დონეზე მომზადებულ შეთავაზებებს წარვადგენთ. გვაინტერესებს რა შეიძლება იყოს მისაღები პარლამენტისთვის, რომელმაც უნდა განიხილოს იგი და ასევე მთავრობისთვის, რომელმაც კანონის პროექტის ინიცირება უნდა მოახდინოს. ამიტომ შევეცდებით გავიზიაროთ როგორც საკანონმდებლო, ასევე აღმასრულებელი ხელისუფლების პოზიციები, თუმცა მაინც ყველაზე მნიშვნელოვანი იქნება მოსახლეობის პოზიცია და, მოსაზრებები. ბოლო დროს ისმის არასამთავრობოების მიმართ კრიტიკა, თქვენი აზრით, რა არის ამის მიზეზი? რამდენად სწორია იგი და როგორ აღიქვამს სექტორი მას? თინიკო ბოლქვაძე – გააჩნია კრიტიკას. არასამთავრობოები სრულიად ნორმალურად აღიქვამდნენ კრიტიკას თუ მაგალითად პრემიერი არ გამოიყენებდა ისეთ სიტყვებს როგორიცაა: „ძირგამომთხრელი საქმიანობა", „სახელმწიფოს წინააღმდეგ მიმართული საქმიანობა", ეს პრინციპში ბრალდება იყო არასამთავრობო სექტორის მიმართ. ბუნებრივია, ყოველივე არასამთავრობოებმა მტკივნეულად აღიქვეს. სხვა შემთხვევებში, მათ მიმართ გამოთქმული კრიტიკა, ასე მტკივნეულად არ ყოფილა აღქმული. ანუ არ გამოვრიცხავ, რომ ზოგიერთ შემთხვევებში კრიტიკა დამსახურებულიც იყოს, მაგრამ კარგი იქნება შეფასებამდე, კარგად ავწონ–დავწონოთ და შევაფასოთ ამ ორგანიზაციების საქმიანობა. ამას წინათ წავიკითხე ახალგაზრდა იურისტთა ასოციაციის მისამართით გამოთქმული კრიტიკა 26 მაისის მოვლენების შესახებ. საიას მოუხდა თავისმართლება, რომ ის ნამდვილად მუშაობდა ამ საკითხზე, მათ გაცილებით მეტი გააკეთეს, ვიდრე ერთი ანგარიში – ხვდებოდნენ არასამთავრობოებს, საერთაშორისო ორგანიზაციებს, დიპლომატიური კორპუსის წარმომადგენლებს. ვთხოვ ხელისუფლების წარმომადგენლებს გადახედონ რას აკეთებენ არასამთავრობოები არა მარტო დღეს, არამედ რას აკეთებდნენ წინა წლებში და მხოლოდ ამის შემდეგ გააჟღერონ მძიმე ბრალდებები. ერთ–ერთი ტელევიზიის პოლიტიკურ თოქშოუში პრემიერმა განმარტა თავისი კომენტარი არასამთავრობოების მიმართ და გარკვეული შერბილება სცადა... თინიკო ბოლქვაძე – ნამდვილად მისასალმებელი იყო მისი ეს ნაბიჯი და კამპანიამ „ეს შენ გეხება" აღნიშნა არაერთხელ. თუმცა აქ არის სხვა გარემოება, როცა პრემიერის მხრიდან ისმის ასეთი ბრალდებები, მერე ხელისუფლების სხვა წარმომადგენლები და დეპუტატები იგივეს იმეორებენ, ანუ პრემიერის გამოსვლა მისაბაძი ხდება ზოგიერთი პოლიტიკოსისთვის, რაც ძალიან სამწუხაროა. არადა, ბევრმა მათგანმა კარგად იცის რას აკეთებდნენ ეს ორგანიზაციები წლების განმავლობაში. კიდევ ერთი ფრაზა უნდა გავიხსენო: „სად იყვნენ ისინი წინა წლებში, რატომ არ ამოუღიათ ხმა ამაზე?" – ალბათ, საჭიროა არასამთავრობო ორგანიზაციებმა ხშირად შეახსენონ რა გააკეთეს ბოლო წლების განმავლობაში და როგორ რეაგირებდნენ ნაციონალური მოძრაობის ხელისუფლების პირობებში. კიდევ ერთხელ გავუსვამ ხაზს, რომ ეს იყო ურთულესი პერიოდი, როცა დავიწყეთ კამპანია „ეს შენ გეხება". ყველას ახსოვს როგორი მძიმე საარჩევნო გარემო, როგორი წინააღმდეგობა იყო ხელისუფლების მხრიდან. გავიხსენოთ კონტროლის პალატის მიერ დაბარებული ხალხი, ასე ვთქვათ ტერორი და ასე შემდეგ. თუ გადახედავთ ჩვენს საქმიანობას 2012 წლის არჩევნების წინ, მგონი ნაკლები სასაყვედურო უნდა ჰქონდეს ხელისუფლებაში მყოფ პოლიტიკოსებს. რადგან კამპანიის „ეს შენ გეხებას" შესახებ ვსაუბრობთ, როგორც გამოჩნდა პოლიტიკოსების ნაწილის კრიტიკა მოჰყვა ფრაზას „ისევ გვისმენენ", რადგან იგი აღქმული იყო მტკიცებით ფორმად... თინიკო ბოლქვაძე – ზოგი ამას მტკიცებით ფორმად აღიქვამს, ზოგი არა. პოლიტიკოსებს შორისაც არის აზრთა სხვადასხვაობა ამაზე. ჩვენ ვამბობთ, რომ ხელისუფლებას აქვს შესაძლებლობა მოუსმინოს დაახლოებით 20 ათას აბონენტს, ჩვენ არ ვამბობთ, რომ რომელიმე სახელმწიფო სტრუქტურის წარმომადგენლები სხედან და უსმენენ 20 ათას აბონენტს. ვთვლით, რომ ხელისუფლების ეს შესაძლებლობა უნდა შეიზღუდოს სწორი კანონმდებლობის მიღებით და ევროპული სტანდარტების დამკვიდრებით – ეს არის მიზანი. ამაზე ბევრჯერ ვისაუბრეთ, თუმცა შემდეგ ხდება ამ სიტყვების სხვანაირი ინტერპრეტაცია. აღნიშნული ინიციატივა მიიღო პარლამენტმა და თანამშრომლობა შედგა, რასაც წინ უსწრებდა „ხმაური" ამ საკითხის შესახებ, შესაბამისად, ცოტა არ იყოს დამაბნეველია... თქვენი აზრით, რა იყო ამ კრიტიკის მიზეზი? თინიკო ბოლქვაძე – ვინც ხმა მისცა ამ კანონპროექტის მიღებას თანხმდება იმაზე, რომ აღნიშნული პრაქტიკა უნდა შეიცვალოს. ზოგი ამას საჯაროდ აფიქსირებდა, ზოგიც კულუარებში. მიზეზად სახელდებოდა ქვეყნის უსაფრთხოება. ჩვენ ვამბობთ, რომ უნდა არსებობდეს ბალანსი ქვეყნის უსარფხოებასა და ადამიანის უფლებების სტანდარტებს შორის. ეს სტანდარტები სახიფათო არ უნდა იყოს ქვეყნისთვის. დეპუტატთა ნაწილი, ვინც კრიტიკით გამოდიოდა, ვფიქრობ, აყვნენ პრემიერის განცხადებას, ნაწილმა ბოლომდე ვერ გააცნობიერა რა პრობლემასთან გვქონდა საქმე. მოდით რუსთავი–2–ის საკითხზე ნუ ვისაუბრებთ, თუმცა, ვფიქრობ, რომ ძალიან ბევრმა დაინახა ის შესაძლებლობა, რომ ვიღაცამ შეიძლება მოუსმინოს დღეს ან მომავალში. მოდით დავუბრუნდეთ ზოგადად სექტორს, თქვენ დასაწყისში ახსენეთ რომ არასამთავრობოების რიცხვი იზრდება, ამის პარალელურად ხომ არ ქრებიან უფრო ძველი ორგანიზაციები... თინიკო ბოლქვაძე – 2012 წლის საპარლამენტო არჩევნების შემდეგ აქტიურად გამოჩნდნენ ახალი არასამთავრობო ორგანიზაციები. ამ ორი წლის განმავლობაში დაარსებულ ორგანიზაციებს შორის ჭარბობს ის ორგანიზაციები, რომელთა ძირითადი ნაწილი ყოფილი ხელისუფლების წარმომადგენლები არიან, ყოფილი საჯარო მოხელეები გადმოვიდნენ არასამთავრობო სექტორში, თუმცა გამონაკლისებიც არის. 2003 წლის შემდეგ დონორმა საერთაშორისო ორგანიზაციებმა შეცვალეს პოლიტიკა და ფინანსების დიდი ნაწილი სახელმწიფოს მიმართულებით წავიდა, თქვენი დაკვირვებით ახლა როგორია მათი პოლიტიკა? თინიკო ბოლქვაძე – დასაწყისში ვისაუბრეთ არასამთავრობო სექტორის შესუსტების მიზეზებზე, ერთ–ერთი მთავარი მიზეზი, 2003 წლის არჩევნების შემდეგ სექტორის შესუსტებისა, სწორედ დაფინანსების მკვეთრი შემცირება იყო. ახლა გარკვეული პოლიტიკა შეიცვალა, თუმცა ვერ ვიტყვი რომ მკვეთრად და სექტორი დაფინანსების გარეშე დარჩა. დღეს მათ მეტი შესაძლებლობა აქვთ, ვიდრე 2004, 2005 წლებში. დაფინანსების პრიორიტეტები ყოველთვის იცვლება, ის დამოკიდებულია საითკენ მიდის ქვეყანა, ზოგ შემთხვევაში რისკების გათვლა ხდება და პრევენციისთვის იცვლება პრიორიტეტი. ამ საკითხზე ყველა დონორს აქვს თავისი მიდგომა. დაგვისახელეთ სამი ძირითადი ღირებულება, რომელზეც უნდა იყოს აგებული არასამთავრობოების მუშაობა... თინიკო ბოლქვაძე – იდეისა და საქმისადმი ერთგულება, პროფესიონალიზმი და კეთილსინდისიერება.

საზოგადოებრივი ორგანიზაციების ვებპორტალი საიას თავმჯდომარეს კახა კოჟორიძეს ესაუბრა საზოგადოებრივი ორგანიზაციების სამუშაო გარემოსა და მათ წინაშე არსებულ გამოწვევებზე. ესაუბრა ლალი შალვაშვილი საუბარი დავიწყოთ იმ გარემოზე, რომელშიც არასამთავრობო ორგანიზაციებს უწევთ მუშაობა. როგორია იგი და არსებობს რაიმე ხელისშემშლელი ფაქტორი? კახა კოჟორიძე – ვფიქრობ, რომ არასამთავრობო ორგანიზაციების საქმიანობისთვის ცუდი გარემო არ არის, განსაკუთრებით – საპარლამენტო არჩევნების შემდეგ. უშუალოდ არჩევნების შემდეგ ახალი ხელისუფლება ძალიან იყო დაინტერესებული არასამთავრობო სექტორის გამოცდილებით. მას სურდა მესამე სექტორის ხედვები, მიდგომები, კონკრეტულ ინიციატივებად, კანონპროექტებად, გარკვეული პრობლემების გადაჭრის გზებად ექცია. ჩვენ ორგანიზაციას ჰქონდა ასეთი გამოცდილება. მაგალითად საერთო სასამართლოების შესახებ კანონში შესული ცვლილებების დიდი ნაწილი, რაც სასამართლო რეფორმების პირველ ეტაპს დაედო საფუძვლად ჩვენ მოსაზრებებს და იდეებს ეფუძნებოდა. ეს იყო პირველ ეტაპზე, როცა დიდი მზაობა იყო შენიშვნების, მოსაზრებების მიღება–გაზიარებისა, თუმცა, ვფიქრობ, რომ ცუდი სამუშაო გარემო არც ახლაა. ყოველ შემთხვევაში რომელიმე არასამთავრობოს ან მის თანამშრომელს პოზიციის გამო საფრთხე არ ექმნება. რა თქმა უნდა, ეს თავმოწონების საფუძველი არ არის, რადგან ყოველთვის ასე უნდა იყოს. ამ კუთხით ვიღაცას რომ ვჯობივართ ეს სულაც არ ნიშნავს, რომ იდეალური გარემოა. ამ კუთხით არის ერთი–ორი ცუდი მაგალითი, ორგანიზაცია „მრავალეროვანი საქართველოს" წარმომადგენლებმა აღნიშნეს, რომ შსს–ს თანამშრომლის მხრიდან იყო მათ თანამშრომელზე რაღაც ზეწოლის მცდელობა. აღნიშნულ სამუშაო გარემოში ორგანიზაციის წარმატება, დიდწილად, მის აქტიურობაზე, სამუშაოს სწორად დაგეგმვასა და პროფესიონალიზმზეა დამოკიდებული. თქვენ ახსენეთ, რომ უშუალოდ საპარლამენტო არჩევნების შემდეგ თანამშრომლობის მზაობა იყო. ეს ხომ არ ნიშნავს, რომ შემდეგ რაღაც შეიცვალა? რა მდგომარეობაა ახლა? კახა კოჟორიძე – თანამშრომლობის მზაობა უფრო მყარი იყო საპარლამენტო არჩევნების შემდგომ პირველ ეტაპზე. ეხლა მაქვს შეგრძნება, რომ მზაობამ იკლო, თუმცა სულ არ არსებობს–თქო ვერ ვიტყვი. კონკრეტული მაგალითები შემიძლია მოვიყვანო. ჩვენ – ახალგაზრდა იურისტებმა, საერთაშორისო გამჭვირვალობამ და სამართლიანმა არჩევნებმა დავტოვეთ ინტერფრაქციული ჯგუფი, ამის მიზეზი ის კი არ იყო, რომ არ გაიზიარეს ჩვენი რეკომენდაციები, შეთავაზებები, არამედ ის, რომ ჩვენი წინადადებები სათანადოდ არ განიხილეს. ისიც გასაგებია ჩვენთვის, რომ რაღაცას გაითვალისწინებენ, რაღაცას არა, მაგრამ როცა გათვალისწინება არ ხდება გვინდა ვიცოდეთ არგუმენტირებული პასუხი. როცა დავინახეთ, რომ ინტერფრაქციულ ჯგუფში არ მოხდა ჩვენი წინადადებების განხილვა, არ მოხდა არგუმენტების ჭიდილი და პოლიტიკური გადაწყვეტილების მიღების სურვილი იყო, ჩვენი ადგილი იქ ვერ დავინახეთ და დავტოვეთ იგი. მსგავსი სიტუაციაა მოწმეთა დაკითხვის წესის გადავადებაზე. პარლამენტმა თავისი გადაწყვეტილება რამდენჯერმე შეცვალა. ისიც სამწუხარო იყო, როცა ჩვენი წარმომადგენლების პლაკატები ჩამოხსნეს პარლამენტში. ჩვენ არანაირი წესი, რეგლამენტი, კანონი არ დაგვირღვევია, პლაკატების ჩამოხსნას არანაირი სამართლებრივი საფუძველი არ ჰქონდა. ასეთი მაგალითებიც ცუდ შთაბეჭდილებას და გარემოს ქმნის. ყოველივეს მიუხედავად ისევ გავიმეორებ, რომ ზოგადად მთლიანობაში თუ შევაფასებთ გარემოს, ამ სიტუაციაში თუ ორგანიზაციას პროფესიული და ობიექტური აქტივობები აქვს იგი წარმატებას მიაღწევს. აღნიშნეთ, რომ გარემო საპარლამენტო არჩევნების შემდეგ შეიცვალა, როგორი იყო იგი, შეგვიძლია პარალელზე ან განსხვავებაზე ვისაუბროთ... კახა კოჟორიძე – ვფიქრობ, რომ მთლიანობაში უკეთესი გარემოა. თუმცა რაღაც კუთხით გამონაკლისები ეხლაც არის, თუმცა შეიძლება ორგანიზაციებს ის პრობლემები ჰქონდეთ, რაც წინა წლებში არ იყო. მაგალითად ორგანიზაცია „იდენტობის" მიმართ, მისი იდეების მიმართ დამოკიდებულება ამის თქმის საფუძველს მაძლევს. დამოკიდებულებაში საზოგადოების დამოკიდებულებას გულისხმობთ თუ – ხელისუფლების დამოკიდებულებას? კახა კოჟორიძე – ორივეს, მათ შორის – ხელისუფლების წარმომადგენელთა დამოკიდებულებაც არის. სხვა მხრივ, ის პრობლემები რაც ადრე იყო, რომ რომელიმე ადამიანის აქტიურობის გამო მის ახლობლებს პრობლემები ჰქონდა სამსახურში ან – რაღაც მსგავსი, ახლა აღარ არის. ასეთი პრობლემა ჩემი ოჯახის წევრს ჰქონდა და პირადი გამოცდილება მაქვს, ეხლა მსგავსი რამ აღარ მსმენია, რომ რომელიმე არასამთავრობო ორგანიზაციის წარმომადგენელის აქტიურობის გამო მის ახლობელს პრობლემები შეექმნას. თქვენი აზრით, რეგიონებშიც მსგავსი გარემო აქვთ არასამთავრობო ორგანიზაციებს? კახა კოჟორიძე – მასშტაბურად ეს საკითხი არ შემისწავლია, მაგრამ როგორც მოქალაქეს, რომელსაც შეხება აქვს არასამთავრობო ორგანიზაციების საქმიანობასთან, შემიძლია ვთქვა, რომ იგივე სიტუაციაა. თუმცა კვლავ დავძენ, რომ ჩვენს ორგანიზაციას ამ მიმართულებით კვლევა არ ჩაუტარებია, მაგრამ მაქვს ინფორმაცია, რომელსაც ჩვენი რეგიონული ოფისებიდან ვიღებ, ასეთი 7 რეგიონში გვაქვს. ისინი თანამშრომლობენ ადგილობრივ ხელისუფლებასთან, მაგრამ პრობლემების შემთხვევაში ღიად საუბრობენ ამაზე. როგორ შეაფასებდით მთლიანად სექტორის საქმიანობას, რას მიაღწია და რას ვერ მიაღწია? კახა კოჟორიძე – სისტემურ სურათზე საუბარი ცოტა რთულია. ძალიან ბევრი ორგანიზაციაა, ყველას თავისი სამოქმედო გეგმა აქვს და შესაძლოა ბევრი მათგანის გეგმები, მიზნები ერთმანეთს არ ემთხვეოდეს და არც ჰქონდეთ ერთობლივი მოქმედების სურვილი. თუმცა არის რაღაც საკითხები, რომელიც აჩვენებს წინასვლას. მაგალითად საია ახლა თავმჯდომარეობს არასამთავრობო ორგანიზაციების კოალიციას დამოუკიდებელი და გამჭვირვალე მართლმსაჯულებისთვის და მასში გაერთიანებული 30–ზე მეტი ორგანიზაცია სასამართლო თემატიკაზე მუშაობს. ეს არის აქტიური კოალიცია, რომელსაც პროფესიული თვალსაზრისით სიტყვა ეთქმის სასამართლო რეფორმების პროცესში. აღნიშნული კოალიციის ინიციატივები ნაწილობრივ არის გაზიარებული და ასახული კანონმდებლობაში. მიღწევაა, როცა ხელისუფლების ცვლილებებთან ერთად არ ცვლი ღირებულებებს და მიდგომებს, ადრეც და ახლაც პრობლემებს რომ ხედავდი და ხედავ, ამბობდი და ამბობ – ეს თანმიმდევრული და განგრძობითი პროცესია და სწორედ ამიტომ საზოგადოებისგან მეტ პატივისცემას დაიმსახურებ და ხელისუფლებაც სხვა თვალით შემოგხედავს. არის ორგანიზაციები, რომლებიც ასოცირდებიან პოლიტიკურ ჯგუფებთან, ჩემი აზრით, ეს არ არის პრობლემა – მათ შეიძლება გაცხადებული ხედვა ჰქონდეთ. არიან ორგანიზაციები და კოალიციები, რომელთა მუშაობას, განცხადებას გამოხმაურება მოჰყვება და დადებითი გავლენა შეუძლია მოახდინონ პროცესებზე. ხანდახან შეიძლება ისეც მოხდეს, რომ რამდენიმე ორგანიზაცია ერთსადაიმავე საკითხზე მუშაობდნენ, მაგრამ მხოლოდ ერთი მათგანის საქმიანობას მოჰყვეს გამოხმაურება. რამ შეიძლება ეს გამოიწვიოს? საქმე გვაქვს ორგანიზაციის მუშაობის ხარისხზე თუ ამას სხვა მიზეზი განაპირობებს? კახა კოჟორიძე – ჩემი აზრით, საზოგადოებისა და ხელისუფლების გამოხმაურება უფრო დამოკიდებულია, ორგანიზაციის საქმიანობის ხანგრძლივობაზე, ამასთან დრომ უნდა აჩვენოს, რომ პოლიტიკურ სექტორში ცვლილებები ამ ორგანიზაციის ღირებულებებზე, ობიექტურობაზე გავლენას ვერ ახდენს. წელს საია 20 წლის ხდება და მისი არსებობის მანძილზე ჩვენ მრავალი კვლევა, კანონპროექტი შეგვიქმნია, მაგრამ ჩემი აზრით, ორგანიზაციის მთავარი მიღწევაა ის ღირებულებები, რომლებიც დროის განმავლობაში არ შეცვლილა. ახლაც ვაკეთებთ იმას და ისე, როგორც – 20 წლის წინათ. თქვენი აზრით, რას ვერ მიაღწია სექტორმა? ექსპერტები ამბობენ და კვლევებშიც ჩანს, რომ საზოგადოებასა და არასამთავრობო სექტორს შორის ურთიერთობა მყიფეა და ხშირად იგი მხოლოდ პროექტის ჩარჩოებს არ სცდება...  კახა კოჟორიძე – ზოგადად ორგანიზაციის საქმიანობა პროექტით არის შემოსაზღვრული და ეს ჩვეულებრივი ამბავია. ზოგიერთ ორგანიზაციას შეიძლება უნდოდეს მეტის გაკეთება, მაგრამ ამას მეტი რესურსი უნდა და შეიძლება რესურსი არ ეყოს. მაგრამ ამ შემთხვევაშიც საიაზე ვისაუბრებ – ჩვენ პროექტებით ნამდვილად არ ვიზღუდავთ თავს. საიას იურიდიული დახმარების ცენტრები არის თბილისში და 7 რეგიონში – ჩვენ არასოდეს გვითქვამს, რომ კონსულტაციას ვუწევთ კონკრეტული კატეგორიის ადამიანებს. ჩვენთან სამართლებრივი კონსულტაციის მიღება შეუძლია ნებისმიერ ადამიანს, ნებისმიერ სამართლებრივ საკითხზე. ამიტომ ჩვენ არ გვაქვს მოსახლეობასთან ურთიერთობის პრობლემა და ალბათ, ის რომ მოსახლეობასთან ნაკლები კონტაქტი აქვს არასამთავრობოებს, ჩვენზე ნაკლებად ითქმის, რადგან ბოლო წლებში გაწეული კონსულტაციების რაოდენობამ ასი ათასს გადააჭარბა. კონტაქტები ყოველი ორგანიზაციის ცნობადობას უწყობს ხელს და საზოგადოების დამოკიდებულებასაც განსაზღვრავს. საზოგადოებაზე არასამთავრობოების გავლენა როგორია? კახა კოჟორიძე – ეს საკითხზეა დამოკიდებული. არის საკითხები, რომლებზეც საზოგადოების მყარ მხარდაჭერას გრძნობ. მაგრამ, ზოგჯერ, ისეც ხდება, რომ ამა თუ იმ საკითხის წამოწევისას იწყება საუბარი, რომ ამა თუ პოლიტიკური პარტიის დანამატი ხარ. მაგრამ მეორე, მესამე დღეს სულ სხვა საკითხს წამოწევ და მერე იბნევიან ხოლმე – ვერ გაუგიათ ოპოზიცია ხარ თუ – სხვა ვინმე. ზოგჯერ ასეთ სურათს ვიღებთ, თუმცა მთლიანობაში ვთვლი, რომ საქართველოში არსებობენ ძლიერი არასამთავრობო ორგანიზაციები, რომელთა პოზიციასაც აქვს გავლენა გარკვეულ პროცესებზე. როცა სამართლებრივი შეფასებაა საჭირო ჟურნალისტები ინტერესდებიან ჩვენი შეფასებით, რაც თავისთავად გარკვეულ გავლენას ახდენს. თქვენი აზრით, რატომ მიდიან არასამთავრობო სექტორში ხელისუფლების ყოფილი წარმომადგენლები? კახა კოჟორიძე – მინისტრის მოადგილეებს, დეპარტამენტის უფროსებს უთხრეს რომ მათთან დამთავრდა შრომითი ურთიერთობა და მათ მოუწიათ თანამდებობიდან გადადგომა. ეს ადამიანები წლების განმავლობაში მუშაობდნენ გარკვეულ სფეროში და ჰქონდათ გამოცდილება, კვალიფიკაცია და სახლში ვერ დაჯდებიან, მათ სჭირდებათ ასპარეზი, სადაც თავის გამოცდილებას მოახმარენ საქმეს და შესაბამისად, გასაკვირი არაა, რომ ასეთმა ადამიანებმა შექმნან ორგანიზაციები და თავისი ხედვები დააფიქსირონ. მე ამ პროცესს უარყოფითად არ აღვიქვამ, სხვა საკითხია ამ ტიპის ორგანიზაციებისადმი რა დამოკიდებულება გაჩნდება და რამდენად შეიძლება ასეთი ორგანიზაციები ნეიტრალურები და ობიექტურები იყვნენ მათი დამფუძნებლების წარსული საქმიანობიდან გამომდინარე. შეიძლება ზოგ შემთხვევაში ასეთი ორგანიზაციების მიმართ დადებითი დამოკიდებულება იყოს, ზოგ შემთხვევაში კი – უარყოფითი. ამას დრო სჭირდება, ერთი წელი არ არის საკმარისი, რომ განსაზღვრო ამა თუ იმ ორგანიზაციას რა არჩევენი აქვს და რამდენად მდგრადია მისი ხედვები. მოდით ვისაუბროთ საერთაშორისო და ადგილობრივ დონორ ორგანიზაციებსა და არასამთავრობოების ურთიერთობაზე, ხშირად ამბობენ, რომ არასამთავრობო ორგანიზაციებს გამოცხადებულ საგრანტო კონკურსებზე უწევთ მორგება და თავად არ სთავაზობენ დონორებს იმ საკითხებს, რომელიც აქტუალურია საზოგადოებაში... აქვს თუ არა ამ კუთხით სამუშაო არასამთავრობო ორგანიზაციებს? კახა კოჟორიძე – ბევრი პროექტი ჩვენი ინიციატივით გაგვიკეთებია და ხშირად ვთავაზობთ საპროექტო წინადადებას დონორ ორგანიზაციებს. ეს კარგიც არის, რადგან ადგილობრივ ორგანიზაციებს ბევრად უკეთ შეუძლიათ პრობლემების დანახვა. აქაც დავძენ რომ სიღრმისეული კვლევა არ ჩაგვიტარებია, მაგრამ იმ ურთიერთობებიდან გამომდინარე, რაც მე პირადად მიწევს დონორებთან თუ არასამთავრობო ორგანიზაციებთან, ჩანს რომ არის კარგი იდეების, ინოვაციური ხედვების ნაკლებობა... აქტიურობა არის საჭირო. საზოგადოებრივი ორგანიზაციების შემოსავლის წყარო არის საგრანტო კონკურსები, რატომ ვერ აეწყო ბიზნესთან ურთიერთობა, რომ გარკვეული ალტერნატიული შემოსავლის წყარო შეიქმნას? კახა კოჟორიძე – ამ პროცესს ნამდვილად სჭირდება დახმარება. კარგი იქნება თუ რაღაც კუთხით დამკვიდრდება ის კულტურა, რომ მოქალაქეები თუ ბიზნესის წარმომადგენლები, მათთვის მისაღები ორგანიზაციის შემომწირველები გახდნენ. ეს მიღებული პრაქტიკაა ამერიკაში, ევროპაში. ზოგ შემთხვევებში კანონმდებლობით არის განსაზღვრული რომ საშემოსავლო გადასახადის რაღაც ოდენობა გადაერიცხოს სასურველ ორგანიზაციას. ასეთ შემთხვევებში რაოდენობაზე არ არის საუბარი, პრინციპზეა საუბარი. მსგავს იდეაზე ჩვენთანაც მიდის მუშაობა. ჩვენ ამ იდეას ვუჭერთ მხარს. რაც შეეხება ბიზნესთან ურთიერთობას თუ რატომ ვერ აეწყო თანამშრომლობითი ურთიერთობა ძნელი სათქმელია, ალბათ ამ კუთხით ნაკლები გამოცდილების ბრალია. ჩვენ გვქონდა ერთი შემთხვევა – საადვოკატო დახმარებას ვუწევდით ერთ–ერთ ორგანიზაციას, მართალია საქმე ვერ მოვიგეთ, მაგრამ იმდენად მოიხიბლა კლიენტი ჩვენი მიდგომებით, პროფესიონალიზმით და დარწმუნდა, რომ ჩვენი ბრალი არ იყო წაგება – სასამართლომ არ მიიღო კანონიერი გადაწყვეტილება, რომ თავის წესდებაში ცვლილება შეიტანა, რომ მოგების 7 პროცენტი ჩვენს ორგანიზაციას ჩაერიცხოს. ჯერ არ მიგვიღია თანხა და არც ვიცით რაზე შეიძლება იყოს საუბარი, ამ შემთხვევაში ოდენობას არ აქვს მნიშვნელობა, ზოგადად ასეთი ინიციატივებია საჭირო, რათა გრძელვადიან პერსპექტივაში ეს ორგანიზაციები განვითარდნენ და ასეთ შემთხვევებში უფრო ნაკლებად წამოაძახებენ არასამთავრობოებს, რომ უცხოურ გრანტებზე მუშაობს და მათ ინტერესებს იცავს. აუცილებლად უნდა ვთქვა, რომ არცერთ დონორ ორგანიზაციას, ვისთანაც გვაქვს ურთიერთობა, არასოდეს ჩვენთვის არც პირდაპირ და არც ირიბად არ უთქვამს, რომ ამა თუ იმ საკითხზე ესა და ეს პოზიცია გქონდეთო. ჩვენი პოზიცია, რომელსაც სხვადასხვა საკითხებზე წარვუდგენთ საზოგადოებას, არის ყოველთვის ჩვენს მიერ მოფიქრებული და არცერთი დონორი ამ საქმეში არ ერევა. ამას ვამბობ იმ განწყობების საპასუხოდ, ვინც ორგანიზაციის პოზიციას დონორს მიაწერს ხოლმე. კიდევ ერთხელ ვიმეორებ, მე არ ვიცი სხვა ორგანიზაციებში რა ხდება, მაგრამ ჩვენთან არც ერთ დონორს მსგავსი არაფერი უთქვამს. ორგანიზაციებისთვის შემოწირვის მექანიზმი ახსენეთ, რომელიც თქვენი აზრით პრინციპულია, საქართველოში საკმაოდ ბევრი არასამთავრობოა და შესაძლოა ამ მექანიზმმა „გვერდი აუაროს" იმ ორგანიზაციას, რომელიც ბევრს მუშაობს და კარგ საქმეს აკეთებს იმ მარტივი მიზეზით, რომ საზოგადოებისთვის მისი საქმიანობა არ არის ცნობილი... და თუნდაც სიმბოლური შემოწირულობა, რამდენიმე არასამთავრობოსკენ მიემართოს... კახა კოჟორიძე – ამ იდეას კარგი დამუშავება სჭირდება. შესაძლოა შემოწირულობის რაღაც ნაწილი გადასახადის გადამხდელის არჩევანის მიხედვით განაწილდეს, ნაწილი კი, შესაძლოა შეიქმნას არასამთავრობოების განვითარების ფონდი და იქ წავიდეს და ა.შ. ამ იდეას ნამდვილად ჭირდება დაფიქრება და დამუშავება თქვენი აზრით, რა არის იმის მიზეზი, რომ პერიოდულად იწყება არასამთავრობო ორგანიზაციების მიმართ განწყობების გამოხატვა? კამპანიური ხასიათი აქვს მას თუ მოსახლეობის ნაწილისთვის ჯერ კიდევ არ არის ხელმისაწვდომი თუ რას წარმოადგენს სექტორი, რას საქმიანობს და მხოლოდ ფრაგმენტული წარმოდგენა აქვთ? კახა კოჟორიძე – ერთ–ერთ მიზეზი შეიძლება იყოს ამა თუ იმ საკითხზე ორგანიზაციის პოზიციის საპასუხო კონტრარგუმენტების არქონა, სწორედ ასეთ დროს ამბობენ „ეს ხომ გრანტიჭამიაა, როგორ შეიძლება დავუჯეროთ" და ასე შემდეგ. ვფიქრობ, დისკუსიისას არგუმენტების თავის არიდებისთვის გამოიყენებენ, არადა როცა დისკუსია კონკრეტულ საკითხს ეხება გაქვს მოლოდინი რომ მოისმენ კრიტიკას. არგუმენტირებული კრიტიკა კარგია და ნამდვილად არ ვთვლით, რომ არასამთავრობოების კრიტიკა არ შეიძლება და მხოლოდ ხელისუფლება უნდა გააკრიტიკო. მზად ვართ ობიექტური კრიტიკა მივიღოთ და გავაანალიზოთ. ასეთი რამ თუ იქნება იგი დაგვეხმარება კიდეც. მთლიანობაში ვთვლი, რომ არასამთავრობოების მიმართ გარკვეული განწყობები უფრო სპონტანურია – იფეთქებს ხოლმე და გადაივლის. იყო თუ არა თავისუფალი არასამთავრობო სექტორი წინა ხელისუფლების დროს, აკრიტიკებდნენ თუ არა წინა ხელისუფლებას, რა რეაქციები ჰქონდათ სოლიდურ ორგანიზაციებს 26 მაისის აქციის შემდგომ... ეს ის საკითხებია, რომელიც ექსპრემიერმა ბიძინა ივანიშვილმა ერთ–ერთ ინტერვიუში არასამთავრობოების მიმართ იკითხა... ერთ–ერთი სოლიდური ორგანიზაციის ხელმძღვანელი ხართ, რას ფიქრობთ ამ საკითხებზე? კახა კოჟორიძე – 26 მაისის აქციის შემდგომ საიას პოზიციამ საზოგადოების ნაწილის უკმაყოფილება გამოიწვია. ის რაც მაშინ საიას თავმჯდომარემ თქვა, ახსნა და დაასაბუთა კიდეც. სრული პასუხისმგებლობით შემიძლია განვაცხადო, რომ თუკი ვინმემ რამე თქვა 26 მაისზე ეს თქვა საიამ და ამის დამადასტურებელია ის კვლევა, რომელიც საიას მაშინდელი თავმჯდომარის პირადი მონაწილეობით და ჩვენი თანამშრომლების მონაწილეობით დაიწერა. მსგავსი კვლევა – კრიტიკული და დეტალურად გაანალიზებული არცერთ ორგანიზაციას არ ჰქონია. მაშინდელ პროცესებზე თუ ვისაუბრებ გეტყვით, რომ იურიდიული დახმარების ცენტრის კოორდინატორი ვიყავი და იურისტებთან, ჩემს კოლეგებთან ერთად 26 მაისის ღამე გავატარეთ სასამართლო დარბაზებში და ვიცავდით იმ ადამიანებს, ვინც მაშინ დააკავეს რაც შეგვეძლო ყველაფერს ვაკეთებდით, სხვა საქმეა სასამართლო იზიარებდა თუ არა ჩვენს დასაბუთებას. არამგონია სასამართლო გადაწყვეტილების გამო ეთქვა ბიძინა ივანიშვილს ყოველივე. კიდევ ერთი, ორგანიზაციის პოზიციის გარკვევა ძალიან ადვილია, არსებობს ჩანაწერები, ინტერნეტშიც შეიძლება მათი მოძიება, ამას პირადად ბიძინა ივანიშვილის პასუხად არ ვამბობ, უბრალოდ, ეს საკითხი ეხლა არ დამდგარა, ზოგადად ვამბობ, ვისაც აინტერესებს. მოძიება ადვილია. დაგვისახელეთ სამი ღირებულება, რომელსაც უნდა ეფუძნებოდეს არასამთავრობო ორგანიზაციის საქმიანობა... კახა კოჟორიძე – ობიექტურობა, პრინციპულობა და პროფესიონალიზმი.

12 დეკემბერს, საქართველოს პარლამენტში საზოგადოებრივ ორგანიზაციებსა და პარლამენტს შორის თანამშრომლობის მემორანდუმი გაფორმდა. მემორანდუმს ხელი საქართველოს პარლამენტის თავმჯდომარემ მოაწერა და მას 150–მდე საზოგადოებრივი ორგანიზაციის წარმომადგენელი შეუერთდა. დოკუმენტის შექმნის პროცესსა და მის მნიშვნელობაზე სამოქალაქო საზოგადოების ინსტიტუტის დირექტორს, ვაჟა სალამაძეს ვესაუბრეთ. ესაუბრა მარიამ პატატიშვილი რას ითვალისწინებს მემორანდუმი, რატომ არის მნიშვნელოვანი? ვაჟა სალამაძე - საქართველოს პარლამენტში ხელმოწერილი დოკუმენტი 10 პუნქტისგან შედგება, მათ შორის გამოვყოფ რამდენიმეს. ერთ-ერთი მნიშვნელოვანი ასპექტი არის პოლიტიკური - ამ თვალსაზრისით მემორანდუმი მნიშვნელოვანია იმდენად, რამდენადაც პირველად საქართველოს ისტორიაში საქართველოს პარლამენტი ფორმალურად საზოგადოებრივ ორგანიზაციებს აღიარებს დამოუკიდებელ აქტორებად და თანასწორუფლებიან პარტნიორებად. ეს არის ძალიან მნიშვნელოვანი პოლიტიკური ნაბიჯი პარლამენტის მხრიდან. მეორე ასპექტი რომელზეც მინდა ყურადღება გავამახვილო არის სექტორის განვითარების სახელმწიფო ხელშეწყობა. მემორანდუმის პირველივე პარაგრაფი ითვალისწინებს საქართველოში საზოგადოებრივი ორგანიზაციების განვითარების ხელშეწყობის სახელმწიფო კონცეფციის შემუშავებას პარლამეტის მიერ ჩვენთან ერთად, რომელიც შემდეგ უკვე პარლამენტის კონცეფციის სახით იქნება მიღებული. თუ დავუმატებთ ამას იმასაც, რომ მემორანდუმის მეორე მუხლში ჩვენ ვთანხმდებით, რომ პარლამენტი ხელს შეუწყობს საზოგადოებრივი ორგანიზაციების საარსებო საკანონმდებლო გარემოს გაუმჯობესებას, ეს ერთიან კონტექსტში უკვე ქმნის იმ პოლიტიკურ და საკანონმდებლო გარემოს, რომელშიც ჩვენ შეგვიძლია თავისუფლად ოპერირება და ვიქნებით მაქსიმალურად ეფექტურები.  მნიშვნელოვანი ასპექტია კანონშემოქმედებით პროცესში ჩართვის საკითხი. მემორანდუმის რამოდენიმე პუნქტი ეძღვნება კონკრეტულად პარლამენტის საქმიანობაში ჩართულობას, მათ შორის არის ინფორმაციის დროული ხელმისაწვდომობის უზრუნველყოფა, ეფექტური კომუნიკაციის უზრუნველყოფა და კანონშემოქმედებით და საზედამხედველო პროცესებში ჩართულობის პოლიტიკური ინსტრუმენტები.   და ბოლო, რაც მინდა ავღნიშნო, არის პარლამენტის მიერ ჩვენთან დიალოგის ბაზისად საზოგადოებრივი ორგანიზაციების განვითარების ეფექტურობის სტამბოლის პრინციპების აღიარება. საქართველო მესამე ქვეყანაა რომელმა ინდივიადულაურად აღიარა სტამბოლის პრინციპები სამხრეთ კორეისა და ამერიკის შეერთებული შტატების შემდეგ. ბატონო ვაჟა, გვიამბეთ მემორანდუმის შექმნის პროცესზე ვაჟა სალამაძე - რაც შეეხება მემორანდუმის შექმნის პროცესს, გასულ წელს პარლამენტთან შეხვედრაზე მე დავაყენე საკითხი და ვთხოვე პარლამენტის თავმჯდომარეს გაფორმებულიყო დოკუმენტი და შექმნილიყო სამუშაო ჯგუფი.  პარლამენტის თავმჯდომარე ძალიან აქტიურად გამოეხმაურა ამ საკითხს და იყო თხოვნა, რომ ჩვენ შეგვექმნა ეს დოკუმენტი  და დაგვეწყო კონსულტაციები პარლამენტთან. CSI - ს ინიციატივით შეიქმნა დოკუმენტის პირველი დრაფტი, პირველი პროექტი. შემდგომში შეიქმნა სამუშაო ჯგუფი და დოკუმენტმა გადაინაცვლა ეროვნული პლატფორმის საზოგადოებრივი ორგანიზაციების განვითარების  ეფექტურობის ჯგუფთაშორის ქვეჯგუფში. გაზაფხულზე მიღებული დოკუმენტი გაეგზავნა პლატფორმის წევრ და არაწევრ ორგანიზაციებს, მიღებული შენიშვნებისა და პარლამენტთან კონსულტაციების საფუძველზე დოკუმენტმა საბოლოო სახე მიიღო. პროცესი, ჩემი აზრით, იყო ღია, გახსნილი და გამჭვირვალე. 12 დეკემბერს საფუძველი ჩაეყარა ახალ ტრადიციასაც... ვაჟა სალამაძე - საქართველოს პარლამენტში გარდა მემორანდუმზე ხელმოწერის ცერემონიისა, საზოგადოებრივი ორგანიზაციების წარმომადგენლების პარლამენტის თავმჯდომარესა და დეპუტატებთან შეხვედრაც გაიმართა. სამოქალაქო სექტორის 22 წარმომადგენელი გამოვიდა სიტყვით და კონკრეტული საკითხი წამოწია, დაგვანახა პრობლემა და ასევე პრობლემის გადაჭრის ის გზები, რომლებსაც ესა თუ ის ორგანიზაცია გვათავაზობს.  მემორანდუმით ოფიაციალურად დაწესდა საზოგადოებრივი ორგანიზაციების დღე საქართველოს პარლამენტში. 12 დეკემბრის მსგავსად, ჩვენ ყოველ წელს შევხვდებით პარლამენტს და გავუზიარებთ იმ წუხილებს და ხედვებს, რომლებიც ჩვენ გვაქვს ქვეყანაში მიმდინარე პროცესებთან დაკავშირებით. ცერემონიაზე პარლამენტის თავმჯდომარემ აღნიშნა, რომ დოკუმენტით საზოგადოებრივი ორგანიზაციები საქართველოს პარლამენტის პარტნიორები გახდნენ. როგორ გააგრძელებს პარტნიორობას სამოქალაქო სექტორი საქართველოს პარლამენტთან? ვაჟა სალამაძე - მე ცოტა გამიჭირდება ვილაპარაკო სამოქალაქო საზოგადოების სახელით, მე შემიძლია ვილაპარაკო ჩვენი ორგანიზაციის სახელით. CSI-ს გარკვეულწილად ჰქონდა ლიდერის ფუნქცია ამ პროცესში და ჩვენ ალბათ უნდა გავაგრძელოთ მუშაობა ჩვენს კოლეგებთან, პარტნიორებთან იმისათვის რომ ზოგადად ჩამოყალიბდეს ურთიერთობა პარლამენტსა და ორგანიზაციებს შორის. ერთის მხრივ, პარლამენტის თავმჯდომარემ აღნიშნა რომ კარები ღიაა, მაგრამ ამ ღია კარში საჭიროა შესვლა. შესვლა ნიშნავს იმას, რომ მეორე მხარეს, ჩვენ უნდა გვქონდეს საკმარისი კომპეტენცია, პროფესიონალიზმი იმისათვის რომ დავინახოთ პრობლემები, ჩამოვაყალიბოთ ამ პრობლემის გადაწყვეტის გზები, ანუ შევქმნათ საჯარო პოლიტიკის ალტერნატივები, გარდავსახოთ ეს დოკუმენტები თუ საჭიროა პროგრამებში, თუ საჭიროა საკანონმდებლო დოკუმენტებში, წარვუდგინოთ პარლამენტს და გვქონდეს უნარები იმისა რომ დავიწყოთ ადვოკატირება და ლობირება პრობლემის გადასაწყვეტად, აი ეს არის მომავლის ამოცანა. მე ასე მესმის ეს თანამშრომლობა და ასეც იყო გაგებული პარლამენტის თავმჯდომარის სიტყვა.  და ბოლოს, არის თუ არა დოკუმენტი ღია, არსებობს თუ არა რაიმე კრიტერიუმი და შესაძლებელია თუ არა დღეს, რომ ორგანიზაცია მემორანდუმს მიუერთდეს? ვაჟა სალამაძე - მემორანდუმი არ არის დახურული დოკუმენტი, მასთან მიერთება შეუძლია ნებისმიერ საზოგადოებრივ ორგანიზაციას, ნებისმიერ დროს. მემორანდუმის სრული ტექსტი განთავსებულია სამოქალაქო საზოგადოების ინსტიტუტის ვებ-გვერზდე - civilin.org, აქვე, ნებისმიერ ორგანიზაციას შეუძლია დოკუმენტზე ონლაინ მიერთება. გასვლა შეუძლია ორივე მხარეს, როგორც პარლამენტს ისე საზოგადოებრივ ორგანიზაციას. თუმცა დოკუმენტი უვადოდ არის დადებული და მისი შეწყვეტა შესაძლებელია მხოლოდ მხარეთა ნებით.

საზოგადოებრივი ორგანიზაციების ვებპორტალი ვისკონსინის შტატის სენატორ ლინა ტეილორს ესაუბრა ესაუბრა მარიამ პატატიშვილი საქართველოში დღეისათვის 16000 არასამთავრობო ორგანიზაციაა რეგისტრირებული. რეალურად კი მხოლოდ 2000 მათგანი ფუნქციონირებს. რას გვეტყვით ვისკონსინის შტატში ამ კუთხით არსებული სიტუაციის შესახებ? ლინა ტეილორი - ზუსტად ვერ გეტყვით, რამდენი არასამთავრობო ორგანიზაცია მუშაობს ჩვენთან, მაგრამ არასამთავრობო სექტორი არის ჩვენი საზოგადოების მნიშვნელოვანი კომპონენტი. ისინი ეხმარებიან სახელმწიფოს გააკეთოს ის, რისი გაკეთებაც ზოგჯერ მთავრობას არ შეუძლია: შესთავაზოს სხვადასხვა სახის მომსახურება, აწარმოოს საგანმანათლებლო საქმიანობა და ა.შ. როგორ თანამშრომლობს არასამთავრობო სექტორი სახელმწიფოსთან?  ლინა ტეილორი - არასამთავრობო ორგანიზაციები მონაწილეობას იღებენ ხელისუფლების მიერ გამოცხადებულ საგრანტო კონკურსებში და ხდებიან სახელმწიფოს კონტრაქტორები. მაგალითად, ჩვენთან ფუნქციონირებს სოციალური განვითარების კომისია, არასამთავრობო ორგანიზაცია, რომელსაც გაფორმებული აქვს ხელშეკრულება ტრენინგების ჩატარების შესახებ,აწვდიან მოქალაქეებს ინფორმაციას, თუ რა სახის სერვისები ეკუთვნით, მუშაობენ ბავშვთა მოვლის სფეროში.ჩვენ ვუხდით არასამთავარობო ორგანიზაციებს ამ სერვისების მიწოდებისთვის. არასამთავრობოები, თავისი შესაძლებლობებიდან გამომდინარე, იღებენ ასეულობით, ათასეულობით და ზოგჯერ მილიონობით დოლარიან გრანტებს.  რამდენად ახლოსაა არასამთავრობო სექტორი საზოგადოებასთან? აქტიურად არიან თუ არა რიგითი ადამიანები ჩართული მის საქმიანობაში? ლინა ტეილორი - დიახ.არასამთავრობოები მჭიდრო კონტაქტში არიან საზოგადოებასთან,ხშირად უფრო მეტადაც ვიდრემთავრობა; აქვთ ყოველდღიური ურთიერთობა ხალხთან, რათა დარწმუნდნენ, რომ პრობლემები, რაც ხალხს აწუხებს, არ რჩება რეაგირების გარეშე.   თქვენ შეხვედრა გქონდათ არასამთავრობო ორგანიზაციებთან, მიიღეთ ინფორმაცია სექტორის საქმიანობის შესახებ. რა რჩევებს მისცემდით მათ და რა გამოცდილება შეიძლება გაიზიაროთ მათგან? ლინა ტეილორი – მე ვურჩევდი მათ ყოფილიყვნენ უფრო მეტად ჩართულები პარლამენტის საქმიანობაში, იყვნენ უფრო მეტად სასარგებლო. აჩვენონ, რომ შეუძლიათ კარგი სერვისების შეთავაზება, რაც დაეხმარება პარლამენტს ხალხთან ურთიერთობაში. და რაც მთავარია, არასამთავრობოებმა ერთმანეთთან უნდა ითანამშრომლონ, რადგანაც ერთი ორგანიზაცია ვერასოდეს იქნება ისე ძლიერი, როგორც ჯგუფი ორგანიზაციებისა.  ძალიან საინტერესო იყო ახალგაზრდულ პარლამენტთან შეხვედრა. ვისკონსინში არ გვაქვს ახალგაზრდული პარლამენტი. ძალიან სასიამოვნო იყო ამ ახალგაზრდებთან შეხვედრა, ამდენი ახალგაზრდა ქალის ნახვა მათ რიგებში. აღვფრთოვანდი მათი მუშაობით, იმ შედეგებით, რასაც მიაღწიეს. ვურჩევდი მათ ემუშავათ პარლამენტში მოხალისეობრივ საწყისებზე. ამით ისინი გახდებიან მაკავშირებელი რგოლი ხალხსა და ხელისუფლებას შორის, უფრო გამჭვირვალე და ღია გახდება მთავრობის საქმიანობა. ადამიანებს ექნებათ მეტი საშუალება მიაწვდინონ ხმა თავისი პრობლემების შესახებ და მიიღონ პასუხიც. ვურჩევდი, ჩემს მსგავსად ქართველი პარლამენტარებიც მოეწვიათ და ესაუბრათ მათთან.  გაგვიზიარეთ თქვენი გამოცდილება, როგორ თანამშრომლობს თქვენი ოფისი არასამთავრობო სექტორთან? რამდენად მაღალია ნდობის ხარისხი? ლინა ტეილორი  - ჩვენ უკვე დიდი ხანია ვთანამშრომლობთ და შესაბამისად ნდობის ხარისხი ძალიან მაღალია. მაგრამ ზოგიერთი არასამთავრობოს მიმართ ის ნაკლებია, რადგან საზოგადოებას არ სთავაზობენ სათანადო სერვისებს ან არ აქვთ ამის დამადასტურებელი დოკუმენტაცია. აქედან გამომდინარე, ჩნდება ეჭვი მათი არაკეთილსინდისიერების შესახებ. საქართველოში არასამთავრობო ორგანიზაციებს სწორედ ამის შესახებ ვესაუბრე: იმისათვის, რომ მოიპოვონ ნდობა, ძალიან მნიშვნელოვანია, კარგად შეასრულონ თავისი სამუშაო და აჩვენონ, რა შედეგი მიიღეს.  როგორ იყენებთ ელექტრონულ მედიას საზოგადოებასთან, ამომრჩევლებთან ურთიერთობისთვის?  ლინა ტეილორი – ელექტრონულ მედიას აქვს განუზომლად დიდი როლი ჩემს საქმიანობაში: ელ–ფოსტა, ფეისბუქი, ტვიტერი.. მე ვერ შევძლებდი ჩემი საქმიანობის წარმართვას, რომ არა ტექნოლოგიები. მე მყავს 116000 ამომრჩეველი. მათთან ინდივიდუალური შეხვედრა რომ მიწევდეს, რასაკვირველია, ეს წაიღებდა ძალიან დიდ დროს და მაინც ვერ შევხვდებოდი ყველა მათგანს. მაგრამ ტვიტერის, ფეისბუქის ან ელ–ფოსტის საშუალებით მე შემიძლია დავუკავშირდე ბევრ ადამიანს და მივაწოდო ინფორმაცია სხვადასხვა საკითხებზე. მოვუწოდებ თქვენი პარლამენტის წევრებს იმოქმედონ იგივენაირად. შესაძლებელია მოკლე ტექსტური შეტყობინებების გაგზავნაც. ყოველთვის იქნებიან ადამიანები, რომლებთანაც უშუალო კონტაქტი დაგჭირდებათ, მაგრამ გაცილებით მეტს დაუკავშირდებით ტექნოლოგიების გამოყენებით.

საზოგადოებრივი ორგანიზაციების ვებპორტალი ესაუბრა გაზეთ „ბათუმელების" რედაქტორს ეთერ თურაძეს. ესაუბრა ლალი შალვაშვილი როგორ შეაფასებდით საზოგადოებრივი ორგანიზაციების საქმიანობას? მედიას გარკვეული სიახლოვე აქვს სექტორთან, ამიტომ განსაკუთრებით საინტერესოა მედიის წარმომადგენლის შეფასება.... როგორ მოჩანს სექტორი გარედან? ეთერ თურაძე – კონკრეტული მაგალითით ვიმჯელებ, თუ როგორ ხედავს კონკრეტული მედია ორგანიზაცია და მე, როგორც ერთი ჟურნალისტი, ამ სექტორის როლს და როგორია ჩვენი დამოკიდებულება. ვფიქრობ, ჩვენთვის – ჟურნალისტებისთვის მნიშვნელოვანი დასაყრდენია არასამთავრობო სექტორი, განსაკუთრებით ჩვენი საქმიანობის იმ ნაწილში, როდესაც გვჭირდება კომპეტენტური ადამიანების მოსაზრებები. ისინი არიან მიუკერძოებლები სხვა ექსპერტებისგან განსხვავებით, ეს ადამიანები ინფორმირებულნი არიან და მათთან არ არის საჭირო იმის განმარტება, თუ რა მნიშვნელობა აქვს ამა თუ იმ საკითხის შეფასებას, კომენტარს. რაც შეეხება კონკრეტულ ჩვენ მედია საშუალებას, უფრო ღრმა მხარდაჭერაც გვაქვს, მაგალითად საქართველოს ახალგაზრდა იურისტთა ასოციაცია წლების განმავლობაში გვიწევდა სამართლებრივ დახმარებას, კონსულტაციას, წარმოგვადგენდა სასამართლოებში, მაშინ როცა მოსაკრებლის თანხაც არ გვქონდა და არ გვქონდა შესაძლებლობა რომ ადვოკატი დაგვექირავებინა. თანამშრომლობა დღესაც გრძელდება. აქედან გამომდინარე ჩემთვის, როგორც მედიის წარმომადგენლისთვის, ჟურნალისტისთვის ეს სექტორი მნიშვნელოვანია. რა თქმა უნდა, სხვა მხრიდანაც ვხედავ მის მნიშვნელობას საზოგადოების განვითარების მიმართულებით, ამ კუთხით სექტორი ძალიან მნიშვნელოვანია, რომელსაც, ჩემი აზრით, ასევე სჭირდება განვითარება. თქვენ ახსენეთ, რომ სექტორსაც სჭირდება განვითარება, რას გულისხმობთ? თქვენ ისაუბრეთ კონკრეტულ მედიასაშუალებასა და სექტორს შორის არსებულ დამოკიდებულებაზე, ძირითადად დადებით კონტექსტში, მოდით ვისაუბროთ რა პრობლემებს ხედავთ სექტორის საქმიანობაში და როგორ უნდა განვითარდეს... ეთერ თურაძე –ერთ–ერთი გამოწვევა, რომელიც საზოგადოებრივი სექტორის წინაშე დადგება ესაა საზოგადოების მხრიდან გარკვეული ტენდენციაა, მე ვხედავ, რომ სექტორის მიმართულებით უფრო მეტი კრიტიკა წამოვიდა ბოლო პერიოდში, ვიდრე მანამდე იყო. უფრო სწორი იქნება რომ ვთქვათ იგი პერიოდულად აქტიურდება. თუ ისევ რეგიონის მაგალითზე ვიმსჯელებთ ამის მაგალითი სულ ახლახანს გვქონდა ბათუმში – დიდი ტალღა იყო არასამთავრობო სექტორის კრიტიკის. ამ საკითხზე მედია აქტიურად მუშაობდა. მოხდა ჯგუფის გამოცხადება მოღალტეებად. ამაზე ლექსიც გამოქვეყნდა, სათაურით „გოგოებო და ბიჭებო არასამთავრობო სექტორიდან", რომელშიც უწოდებდნენ უცხო, ფულზე გაყიდულ ადამიანებს, რომლებიც ებრძვიან ეროვნულ ინტერესებს, ტრადიციებს და ასე შემდეგ. ჩემი აზრით, პრობლემაა ის, რომ სექტორმა ვერ მოახერხა თავისი ნამდვილი მიზნების და დანიშნულების არსის მიტანა საზოგადოებამდე, ის არ არის ბოლომდე ღია და გარკვეული ჩაკეტილი წრე არსებობს, ვინც იცის სექტორის შესახებ, მე ასე ვხედავ. ანუ კავშირი არასამთავრობო სექტორსა და საზოგადოებას შორის არ არის ძლიერი, სუსტია. ამ რეგიონში არის შემთხვევები, როცა გამოკითხვისას შესაძლოა რომელიმე პოლიტიკოსზე თქვან, რომ იგი არასამთავრობო სექტორის წარმომადგენელია. არიან სექტორიდან ადამიანები, ვისაც საზოგადოება იცნობს, მაგრამ ნაკლებად არის ცნობილი ის ორგანიზაციები, რომელშიც ისინი მუშაობენ ან ხელმძღვანელობენ. მე მგონია რომ ეს სექტორის პრობლემაა და უფრო მეტი ძალისხმევა დასჭირდებათ, რომ უფრო მეტმა ადამიანმა გაიგოს მათი მიზნები. თქვენი აზრის რა არის მიზეზი, რომლის გამოც სექტორი ვერ ახარხებს თავისი მიზნის ხალხამდე მიტანას? ეთერ თურაძე – ამის მიზეზი ბევრი რამ შეიძლება იყოს, მაგალითად ადამიანური რესურსების ნაკლებობა. ისევ რეგიონის მაგალითით თუ ვისაუბრებთ, დიდი ორგანიზაციებისგან განსხვავებით რეგიონის ორგანიზაციებში რესურსების თვალსაზრისით სხვა მდგომარეობაა, აქ მცირეკონტიგენტიანი ორგანიზაციები. თქვენ აჭარაში მომუშავე ორგანიზაციები გაქვთ მხედველობაში, თუ ბათუმის ორგანიზაციებს გულისხმობთ? ეთერ თურაძე – ბათუმის იქით საკმაოდ მწირია არასამთავრობო სექტორი, აჭარას ვგულისხმობ როცა მწირ რესურსზე ვსაუბრობ. ალბათ მათ არ ჰყოფნით რესურსები – არც ფინანსური და არც ადამიანური, და ალბათ, მათ მიერ კონკრეტულ აქტივობებთან დაკავშირებული ვალდებულებები იმდენად მასშტაბურია და ძნელია, რომ ისინი ვეღარ ახერხებენ, რომ საზოგადოებას მიზნები გააცნონ. ჰყავთ კონკრეტული სამუშაო ჯგუფი, ვისთანაც მუშაობენ და სხვა ადამიანებთან, ჯგუფებთან მუშაობას ვერ ახერხებენ. ვიცი რომ ძალიან ბევრს მუშაობენ და დატვირთული სამუშაო გრაფიკი აქვთ, მაგრამ მიუხედავად ამისა ნაკლებად არიან ცნობილნი საზოგადოებაში. მეორე მხრივ, მიზეზი შეიძლება იყოს ის, რომ პოსტსაბჭოთა ქვეყანა ვართ და არასამთავრობო სექტორის არსი საზოგადოებისთვის ახალია. 20 წელი, ალბათ, არ არის საკმარისი, რომ ადამიანებმა გაიგონ კარგად ამა თუ იმ სექტორს რა მნიშვნელობა შეიძლება ჰქონდეს, შესაძლოა ზოგადი განათლების პრობლემაც არის. ანუ თვლით, რომ ეს ორმხრივი პრობლემა შეიძლება იყოს: საზოგადოებისაც და სექტორისაც? ეთერ თურაძე – მე ესე ვხედავ, თუმცა მგონია, რომ პირველი ნაბიჯი არასამთავრობო სექტორმა უნდა გადადგას იმ ბარიერის მოსაშლელად, რომელიც საზოგადოებასა და სექტორს ჰყოფს. რეგიონის მაგალითზე თუ ვისაუბრებთ, თქვენი დაკვირვებით როგორია ტენდენცია – იკლო თუ იმატა არასამთავრობო ორგანიზაციებმა, გააქტიურდნენ თუ პირიქით... ეთერ თურაძე – სტატისტიკურად ბევრი არასამთავრობო ორგანიზაციაა, მაგრამ რეგიონში აქტიური, პროცესებში ჩართული 7–8 ორგანიზაციაა. ახლა რამდენიმე ორგანიზაცია გაჩნდა, რომელიც აქტიურობს, ერთი–ორი ახალგაზრდული ორგანიზაციაც შეიქმნა, მაგრამ მათი აქტივობა მხოლოდ ორგანიზაციის შექმნის განაცხადით შემოიფარგლა ჯერჯერობით. ის ორგანიზაციები, რომლებიც წლების წინ მუშაობდნენ, ისევ აგრძელებენ მუშაობას, ვერც იმას ვიტყვი, რომ მათი მუშაობის ხარისხი გაიზარდა ან შემცირდა, იგივე დონეზე არიან, როგორც წინა ხელისუფლების პირობებში. მაგრამ თუ გავიხსენებთ ასლან აბაშიძის პერიოდს, მასთან შედარებით მნიშვნელოვნად გაუმჯობესდა ამ სექტორის წარმომადგენლობა რეგიონში. თქვენ ახსენებთ, რომ 20 წელი საკმარისი არ არის, რომ მოსახლეობას კარგად გაეგო სექტორის არსი და სექტორი პროექტების ფარგლებში კონკრეტულ ჯგუფებთან მუშაობს, ვისთანაც მუშაობენ იმ ადამიანებს ხომ აქვთ ინფორმაცია სექტორის შესახებ, ისინი რატომ არ ქმნიან თავად არასამთავრობო ორგანიზაციებს... ეს ხომ არის ერთგვარი გზა, საშუალება რომ დაიწყო ადვოკატირების ან მონიტორინგის კამპანია და თანაც უფრო უკეთ გააკეთო, ვიდრე ერთმა ადამიანმა... ეთერ თურაძე –ადამიანს, რომელმაც ისარგებლა იმ სიკეთით, რასაც არასამთავრობო სექტორი ჰქვია, შეიძლება გაუჩნდეს სურვილი დაეხმაროს სხვა ადამიანებს, მაგრამ ამას სჭირდება სათანადო ცოდნა, გამოცდილება, იგივე ფინანსების მოძიების უნარები. სხვათა შორის, როცა ახლახანს არასამთავრობო სექტორის წინააღმდეგ ტალღა წამოვიდა, გვინდოდა რომ მიგვეწოდებინა მკითხველისთვის სექტორის შესახებ ინფორმაცია და ჩავწერეთ არასამთავრობო სექტორის ერთ–ერთი პირველი წარმომადგენელი დავით ზურაბიშვილი, რომელმაც აღნიშნა, რომ ადამიანს უნდა ჰქონდეს გარკვეული უნარ–ჩვევები რომ მიიღოს არასამთავრობო სექტორის საქმიანობაში მონაწილეობა. ეს შეიძლება ისწავლო. მარტო სურვილი არ კმარა, ანუ ამას სჭირდება გარკვეული უნარ ჩვევები. ამას ან სწავლობ გარკვეულ ორგანიზაციებში რიგითი მოხალისის სტატუსით და იწყებ ჩამოყალიბება–განვითარებას, ან ძალიან ნიჭიერი ხარ და დამოუკიდებლად ახარხებ ყოველივეს. ადამიანები, ვინც სექტორის სერვისით სარგებლობენ, რეგიონის მაგალითზე თუ ვიმსჯელებთ, გარკვეულწილად სხვადასხვა მიმართულებით დათრგუნული ადამიანები არიან. ავიღოთ მაგალითად დემოკრატიის ინსტიტუტი, რომელიც არასრულწლოვანი პატიმრების უფლებებზე მუშაობს, ძალიან ძნელი იქნება, ალბათ, რომ ეს ბენეფიციარები ისე გათავისუფლდნენ თავისი პრობლემებით, რომ მერე შეძლონ სხვების დახმარებაზე ფიქრი ან დაეხმარონ სხვებს. საიას შემთხვევაშიც ასეა – როცა მიდიხარ სულ რიგი დგას ადამიამნების, მათ ფინანსები რომ ჰქონდეს კერძო ადვოკატს მიაკითხავდნენ. აქედან გამომდინარე, როცა ადამიანი პრობლემებით არის დატვირთული, მეორე ადამიანზე ფიქრის დაწყება უჭირს. თუმცა საზოგადოებრივი აქტივობის საკითხი შეიძლება ჩვენი ქვეყნის კულტურის ნაწილიც იყოს, ანუ გვაქვს თუ არა საზოგადოებრივი აქტივობის კულტურა, ჩემი აზრით, ამის დეფიციტი გვაქვს. გარდა ამისა, გადავხედოთ შემოწირულობებს, არასამთავრობო სექტორი ძირითდად ფინანსდება უცხოური დონორი ორგანიზაციებისგან. არ მახსენდება არცერთი შემთხვევა, როცა ვინმემ შესწირა არასამთავრობო ორგანიზაციას თანხა, ან გარკვეული აქტივობებისას გვერდით დაუდგა, ეს ალბათ, კულტურის მაჩვენებელია, რომელიც ასევე საჭიროებს დახვეწას. თქვენი აზრით, ახდენს გავლენას საზოგადოებაზე არასამთავრობო სექტორი? საზოგადოებასა და სექტორს შორის ურთიერთობა არც ისე მყარია, მეორე მხრივ, მედიის გავლით სექტორის მოსაზრებები, შეხედულებები მიდის საზოგადოებამდე, როგორ შეიძლება ყოველივე შეფასდეს? ეთერ თურაძე – მგონია, რომ მაინც აქვს გავლენა საზოგადოებაზე, რადგან ამ სექტორში დასაქმებული ადამიანები მაინც ახერხებენ შექმნან საზოგადოებრივი აზრი. საზოგადოებრივ აზრს ჩვენ და სხვა ქვეყნებშიც, ალბათ კონკრეტული ადამიანები ქმნიან, მით უმეტეს, ჩვენი ტიპის ქვეყნებში, სადაც დემოკრატია განვითარებადია. ამიტომაც მგონია, რომ სექტორში მომუშავე ადამიანები საზოგადოებრივ აზრს ქმნიან, მათ მეტნაკლებად ანგარიშს უწევს ხელისუფლება, რომელიც, ჩემი აზრით, საზოგადოებრივი აზრის ძირითადი გენერატორია, მაგრამ მას არ შეუძლიად სრულად იგნორირება გაუწიოს ამ სექტორის მოსაზრებებს. მაგალითად ბიძინა ივანიშვილს ჰქონდა რეაქციები არასამთავრობო სექტორის კრიტიკულ მოსაზრებებზე. მეორე საკითხია ითვალისწინებენ თუ არა პოლიტიკოსები ან იზიარებენ მათ საქმიანობაში სექტორის მოსაზრებებს. მე მგონია, რომ სექტორის წარმომადგენლები ქმნიან საზოგადოებრივ აზრს, ისინი ხშირად ჩანან მედიაში. ყველამ ვიცით, რომ მედია დიდწილად განაპირობებს საზოგადოებრივი აზრის ფორმირებას, მედიაში ხშირად გამოჩენა განაპირობებს პოპულარობას და ამდენად მათი აზრი მიდის საზოგადოებამდე, თუმცა მოსაზრებები შეიძლება გაიზიარონ ან არა. ჩვენი საზოგადოება არ არის ის საზოგადოება, რომელიც აკონტროლებს ხელისუფლებას, რომელიც ქმნის საზოგადოებრივ აზრს, ის ძირითადად იმართება გარკვეული ჯგუფების მიერ შექმნილი საზოგადოებრივი აზრისგან ან იზიარებს მას. მგონია რომ ასეთი ერთ–ერთი სეგმენტი არასამთავრობო სექტორიც არის. ახლა ახსენეთ ხელისუფლებასა და არასამთავრობო სექტორს შორის ურთიერთობა, თქვენი აზრით, რაიმე ცვლილებას ხედავთ ურთიერთობებში? ეთერ თურაძე – კონკრეტული მაგალითებით შეიძლება განვიხილოთ ეს საკითხი. გვახსოვს სახალხო დამცველის არჩევნები, როცა არასამთავრობო სექტორს უთხრეს, რომ შეეძლოთ წამოეყენებინათ კანდიდატურა და ეს იყო პირველი ტესტი გაიზიარებდა ხელისუფლება სექტორის შეთავაზებას თუ არა, ეს შეთავაზება ჩავარდა. ამავე დროს გვახსოვს, რომ ცესკოს თავმჯდომარე სექტორიდან იქნა წარდგენილი და ის დამტკიცდა თანამდებობაზე. ასევე ორგანიზაცია „იდენტობას" ინციატივას თუ გავიხსენებთ თავშესაფრის შესახებ, როცა გარკვეული პრობლემები შეიქმნა, შემდეგ სექტორი გამოვიდა ინიციატივით და თბილისის მერიამ გამოთქვა მზადყოფნა ამ მიმართულებით დაუჭიროს მხარი. თითქმის არ მახსენდება წინა ხელისუფლების დროს რაიმე ისეთი მნიშვნელოვანი შემთხვევა, როცა სექტორი ანგარიშგასაწევი ძალა იყო, მახსოვს კრიტიკულად გამოდიოდნენ მათ მიმართ. მგონია რომ ცვლილება არის პოზიტიური ამ მიმართულებით, თუმცა არ ვფიქრობ, რომ სექტორი ამაზე უნდა შეჩერდეს. თქვენი აზრით, რატომ მიდიან თანამდებობის პირები ხელისუფლებიდან სამოქალაქო სექტორში? ეთერ თურაძე – წინა ხელისუფლების წარმომადგენლებს ძალიან დიდი გამოცდილება აქვთ არასამთავრობო სექტორში მუშაობის, მათ ძალიან კარგად იციან ამ სექტორის ეფექტურობა, გავლენა, შესაძლებლობა, მგონია რომ სწორედ ამიტომ წავიდნენ ამ სექტორში, თან მათ აღარ სჭირდებათ ახალი უნარ–ჩვევების შეძენა. ყოფილი თუ ახლანდელი ხელისუფლების წარმომადგენლები იმიტომ დაბრუნდნენ ბიზნესში თუ არასამთავრობო სექტორში, რომ, ალბათ, ჩემი აზრით, მათ კარგად იციან ეს არის მოკლე გზა, ხელისუფლებაში დასაბრუნებლად. რაც შეეხება ბიძინა ივანიშვილის განცხადებას, მის არსს ვერ ვხდები და მას, ალბათ მომავალი აჩვენებს.

სამოქალაქო სექტორში არსებულ გარემოებებზე საზოგადოებრივი ორგანიზაციების ვებპორტალი ესაუბრა იურისტ თამარ გურჩიანს. ესაუბრა ლალი შალვაშვილი ქალბატონო თამარ თქვენ მუშაობდით როგორც არასამთავრობო სექტორში, ასევე საერთაშორისო და დონორ ორგანიზაციებში, ანუ თქვენ გქონდათ საშუალება გარედანაც დაგენახათ სექტორის პლუსები და მინუსები და შიგნიდაც...  თამარ გურჩიანი – ვფიქრობ, რომ დიდი გამოცდილების მიუხედავად, არასამთავრობო სექტორი სუსტია საქართველოში. „სისუსტეში" არ ვგულისხმობ არც ორგანიზაციულ განვითარებს, არც ხელისუფლებაზე გავლენას, მასში მოვიაზრებ საზოგადოებაზე სექტორის გავლენას. საზოგადოებასთან ურთიერთობა და გავლენა ერთის მხრივ, სექტორის მთავარ სისუსტესაც წარმოადგენს, მეორე მხრივ, მათთან კავშირი მთავარი უპირატესობაა. რაც შეეხება ხელისუფლებას, სექტორს მეტ–ნაკლები ზემოქმედება შეუძლია. თქვენ ახსენეთ ხელისუფლებაზე სექტორის მეტ–ნაკლები ზემოქმედება, რომელ წლებს გულისხმობთ? სექტორის მოღვაწეობა პირობითად სამ ეტაპად შეიძლება დაიყოს... თამარ გურჩიანი – უფრო სტატუსკვოს შეფასება შემიძლია, ისტორია ჩემი კვლევის საგანი არასდროს ყოფილა. ხელისუფლებაზე ზეგავლენა შეგვიძლია მარტივად შევაფასოთ იმის მიხედვით, თუ რომელ ხელისუფლებაზე ვსაუბრობთ. ეს უფრო ხელისუფლებაზეა დამოკიდებული, ვიდრე არასამთავრობო სექტორზე – ხელისუფლება თუ ღიაა არასამთავრობო ორგანიზაციებს მეტი ზეგავლენა აქვთ და პირიქით, როცა ხელისუფლება ძლიერი და ბიუროკრატიულია, ნაკლები ზეგავლენა. სამწუხაროა, რომ ყოველივე ხელისუფლებაზე იყო დამოკიდებული და არა სექტორზე. პირველ კითხვას დავუბრუნდები, არასამთავრობოების ნაკლია, რომ მათ საზოგადოებასთან კავშირი გაწყვიტეს. ჰქონდათ კი კავშირი? თამარ გურჩიანი – ლეგიტიმური კითხვაა და ალბათ, იგი მთავარი ღერძია ჩვენი საუბრის, კავშირი არ ჰქონიათ. როგორც უკვე აღვნიშნე, ეს მთავარი ნაკლია არასამთავრობო სექტორის. კამპანია „ეს შენ გეხებას" მაგალითზე ვისაუბრებ, არასამთავრობოების ძალა მაშინ გამოჩნდა, როცა კამპანიის ორგანიზატორებმა ხალხს მიმართეს და უთხრეს რომ ეს მათ ეხებოდათ, ამას დაერთო ისეთი ინსტრუმენტები, როგორიც არის სოციალური მედია, ტრადიციული მედია, რომელმაც კარი გაუღო და ესეც დაეხმარათ კამპანიის წარმართვაში. მაგრამ რეალური ძალა არასამთავრობო სექტორმა მაშინ აჩვენა, როცა მათ აღმოაჩინეს ხალხი, როგორც მის უკან მდგომი სუბიექტი. მართლა პარადოქსულია, რომ ხალხთან ურთიერთობა მათი სისუსტეც არის და სიძლიერეც, სწორედ ამას უკავშირდება სექტორის ლეგიტიმაციის, ცნობადობის და სხვა საკითხები. კამპანიის ფარგლებში მოსახლეობასთან ურთიერთობის საკითხებზე ისაუბრეთ, თქვენი აზრით, რატომ ვერ ხერხდებოდა და ხერხდება ყოველთვის ასეთი ურთიერთობა?   თამარ გურჩიანი – სანამ ამ საკითხზე ვისაუბრებდეთ უნდა აღვნიშნო, რომ პლუსია ის, რომ ნორმალური ლიბერალური არასამეწარმეო კანონმდებლობა გვაქვს და არა ისეთი სამართლებრივი გარემო როგორიც მაგალითად რუსეთშია. ასევე პლუსი არის ის, რომ მრავალფეროვნებაა, რაც იმას უნდა მოასწავლებდეს, რომ სხვადასხვა სოციალური ფენა უნდა იყოს წარმოდგენილი არასამთავრობო სექტორში. არასამთავრობო ორგანიზაციების დაფუძნება ადვილია და რეგისტრირებულ ორგანიზაციათა რაოდენობაც ამაზე მიუთითებს. მაგრამ საოცარია ის, რომ სინამდვილეში მრავალფეროვანი ჯგუფების რეპრეზენტაცია რეალურად არ ხდება, ფორმალურად კი, მაგრამ ფაქტობრივად არა. ამის მიზეზი შესაძლოა იყოს სექტორის დაფინანსების წყარო, იგი არ მოდის ხალხისგან, მათი კონსტრიბუციის წილი იქ არ არის. ის მოდის საერთაშორისო დონორებისგან, არასამთავრობო სექტორმა დახმარებაზე დამოკიდებულება გამოიმუშავა, შესაბამისად, ვინც გვაფინანსებს, ის გვინდგენს დღის წესრიგს და პასუხისმგებლობას მათ მიმართ ვგრძნობთ. ხოლო, სადაც ანგარიშვალდებულების გრძნობა არ არის, იქ ელემენტარული კავშირიც ქრება. დღეს ერთადერთი კავშირი არასამთავრობო ორგანიზაციასა და ხალხს შორის მაშინ მყარდება, როცა არასამთავრობო სექტორი კონკრეტულ სერვისს სთავაზობს. მაგალითად იურისტთა ასოციაციას აქვს უფასო იურიდიული სერვისი, ასეთ შემთხვევებში ხალხი კი არ არის წარმოდგენილი და მონაწილე პროექტისა, არამედ სერვისს იღებს. მოკლედ რომ ვთქვათ, თქვენ გულისხმობთ მხოლოდ პროექტულ აქტივობებში მოსახლეობის რაღაც ნაწილის ჩართვას? თამარ გურჩიანი – ვგულისხმობ ისეთ მდგომარეობას, როცა ერთადერთი კავშირი, რომელიც ზევით ვახსენე, ამ ხალხის რეპრეზენტაციას კი არ მოიაზრებს, არამედ ხალხი წარმოდგენილია როგორც ბენეფიციარი და ხალხი ამ პროექტების მონაწილე არ არის, არადა მონაწილე უნდა იყოს. სწორედ ხალხის მონაწილეობით განსხვავდება არასამთავრობო სექტორი ბიუროკრატიისგან, ან ბიზნესისგან. მისი ინტერესი არ არის მოგება, მართვა, მისი ინტერესია კონკრეტული საზოგადოებისგან წამოსული და საზოგადოების საჭიროებებზე დაფუძნელი საქმიანობა. რა არის მიზეზი? რატომ ვერ ახერხებს სექტორი დონორების დონაციის ალტერნატიული ფინანსების მოძიებას? საზოგადოების დამოკიდებულებაც ხომ არ არის გადამწვეტი? ხშირად ისმის რომ არასამთავრობო სექტორი ერთგვარად ჩაკეტილი წრეა და ა.შ. თამარ გურჩიანი – ჩვენი საზოგადოება არ არის ქსენოფობიური, რომ ყველანაირი დახმარება გრანტის ჭამად მონათლოს და მოსთხოვოს ხელისუფლებას მისი აკრძალვა. თუმცა საერთაშორისო დონაცია არის ერთი ფაქტორი, რომელიც ხელს უწყობს ამ გაუცხოებას. ეს, რა თქმა უნდა, არ უნდა დავაბრალებთ საერთაშორისო ორგანიზაციებს, ჩვენ მათი მადლიერი უნდა ვიყოთ, რომ მხარს გვიჭერენ. ეს არის არასამთავრობოების პრობლემა და მათი დანაშაული – ვგულისხმობ იმას, რომ ხალხისგან გაუცხოებას ახერხებენ. გაუცხოება სერიოზული რისკი, საფრთხეა, რომლის წინაშეც ვდგავართ. ამ გაუცხოებას შეიძლება მიყვეს ის ღირებულებები, რომლებსაც ვდარაჯობთ და რომლის უზრუნველყოფასაც საერთაშორისო ორგანიზაციები აკეთებენ. ამიტომ ყველა ფრთხილად უნდა ვიყოთ. ის, რომ დახმარება არის უცხოური, შესაძლოა, მოსახლეობას აფიქრებინებდეს, რომ მათი მხარდაჭერილი ინიციატივები თავსმოხვეულია და ეროვნულ დონეზე ლეგიტიმური არ არის. იმისთვის რომ ყოველივემ ეროვნულ დონეზე შეიძინოს ლეგიტიმურობა, არასამთავრობოებმა მაქსიმალურად უნდა მოახერხონ და ამ ადამიანებს საკუთრების გრძნობა გაუჩინონ და აუხსნან, რომ თავს მოხვეული არაფერია. თქვენ ფიქრობთ, რომ ასეთი საშიშროება და ასეთი განწყობები არის მოსახლეობაში? თამარ გურჩიანი – არის, ამას კვლევებიც ადასტურებს. არასამთავრობოების პასუხისმგებლობაა, რომ ადგილობრივსა და გლობალურს შორის მცირე ზღვარი ხალხს დაანახონ, რათა საერთაშორისო დახმარების მიმართ ხალხს სკეპტიციზმი გაუქრეს. სკეპტიციზმი არის მოსახლეობაში. საჯარო პოლიტიკის, ადვოკატირებისა და სამოქალაქო საზოგადოების განვითარების პროგრამის ფარგლებში ჩატარებულმა კვლევებმაც აჩვენა, რომ ცნობადობა დაბალია, სექტორის გავლენაზე მას მერე უნდა ვისაუბროთ, როცა შევთანხმდებით, რომ ხალხმა იცის ბოლოს და ბოლოს რა არის არასამთავრობო სექტორი. თუკი ხალხი ფიქრობს, რომ ლეიბორისტული პარტია არასამთავრობო სექტორია, აღნიშნულმა კვლევამ ეს აჩვენა, მაშინ სიღრმისეულ დისკუსიაზე პრეტენზიაც აღარ უნდა გვქონდეს. ყველაფერი მთლიან კონტექსტში უნდა განვიხილოთ – ბოლო კვლევებმა აჩვენა, რომ საქართველოს მოსახლეობის 80 პროცენტი ევროკავშირის მიმართ დადებითად არის განწყობილი. ყველაფერი მეტყველებს იმაზე, რომ ჩვენი საზოგადოება საკმაოდ ღიაა, საგანგაშო არაფერია, მაგრამ ეს არ ნიშნავს, რომ დღეს თუ არ არის საგანგაშო, ხვალაც ასე იქნება. საქართველოში სიტყვის თავისუფლებაა და ძალიან ბევრი პოლიტიკური ჯგუფი, საეჭვო განათლებისა და რეპუტაციის მქონე ადამიანები კარგად ახარხებენ მოსახლეობის მანიპულირებას და ქსენოფობიური გრძნობების გაღრმავებას. ამიტომ ყველა ფრთხილად უნდა ვიყოთ, საერთაშორისო დახმარებები კი არ უნდა ჩავაცვლოთ მთლიანად, რაღაცნაირად მათ მხარდაჭერას უნდა შევუერთოთ მოსახლეობის ფინანსური მხარდაჭერაც. არასამთავრობო ორგანიზაციებმა აუცილებლად უნდა დაიწყონ ფინანსების მოძიების სტრატეგიის შემუშავება, რომელიც დაეფუძნება კონკრეტული ადამიანის შემოწირულობას. შესაძლოა ყოველი ადამიანისგან შემოწირული 2 ან 5 ლარი არასამთავრობოების ბიუჯეტს არც დაეტყოს, მაგრამ თუ ერთი ორგანიზაცია 1000 ადამიანს შეკრებს და მათგან შემოწირულობას მიიღებს კონკრეტული აქტივობისთვის – ეს მას ლეგიტიმაციას და თავდაჯერებულობას შესძენს. თუ ამაზე არ გადავიდა არასამთავრობო სექტორი, დახმარებაზე დამოკიდებულების მენტალობა უფრო გაღრმავდება და ასე ვთქვათ, ინერტული და უმოქმედო გახდება, შესაბამისად, მისი ეფექტიც ნაკლები იქნება. ბოლოსდაბოლოს, საერთაშორისო დახმარებაც არ არის ამოუწურავი რესურსი, დროთა განმავლობაში ისიც ისე შეწყდება, როგორც ბევრ სხვა ქვეყანაში მოხდა. თქვენი აზრით, მზად არის არასამთავრობო სექტორი იმისათვის, რომ საერთაშორისო, დონორ ორგანიზაციებს  ის საკითხები შესთავაზოს , რომელიც ხალხს აწუხებს და აინტერესებს... ამას იმიტომ გეკითხებით, რომ ხანდახან საუბრობენ, რომ ორგანიზაციები ვერ ახერხებენ თანაბარ საუბარს საერთაშორისო ორგანიზაციებთან და პროექტების საგრანტო განაცხადებზე მორგება უწევთ.... თამარ გურჩიანი – დონორები საჭიროებების კვლევის საფუძველზე აცხადებენ პრიორიტეტებს და ისინი აგებენ პასუხს რომ რელევანტური იყოს იგი. არასამთავრობოები არ არიან პროაქტიულები, რომ გამოიკვლიონ რეალური საჭირობები და რიგ შემთხვევაში ურჩევნიათ მოერგონ საკონკურსო განაცხადს. მეორე საკითხია,  თვითონ მოსახლეობამ იცის რა საჭირობები აქვს? ან არასამთავრობო სექტორმა იცის რა სჭირდება მოსახლეობას? სწორედ აქ გვჭირდება სექტორის პროაქტიულობა, პრიორიტეტიზაციის უნარი. საწუხაროდ, ისეთ ეპოქაში ვცხოვრობთ რომ ხშირ შემთხვევაში განსაზღვრავს მედია თუ რა გვინდა, ამიტომ არის შესაძლებელი, რომ ქვეყნის პრეზიდენტს შეუძლია ტაივანში ან სხვაგან დახარჯოს ფული, მაშინ როცა გაეროს ბავშვთა ფონდის მონაცემებით ყოველი მეოთხე ბავშვი სიღატაკეში ცხოვრობს. მაგალითად, სახელმწიფო სახსრების გადანაწილება, განკარგვა სახელმწიფოს პრეროგატივაა, ჩვენ გვაქვს მონაწილეობის მიღების უფლება, მაგრამ მონაწილეობს ხალხი ამ საქმეში, ან მათი ინტერესი არის ასახული? მოსახლეობა თვითონ გაურკვევლობაშია. გაურკვევლობაში რას გულისხმობთ? თამარ გურჩიანი –  მაგალითად ყველამ იცოდა როგორ იხარჯებოდა პრეზიდენტის სარეზერვო ფონდიდან თანხები. რეალურად ხალხს არ ჰქონია პროტესტი, რა გააკეთა არასამთავარობო ორგანიზაციებმა ინფორმაციის მიწოდების გარდა, დაარწმუნა თუ არა მოსახლეობა რომ ეს არ იყო სწორი? რადგან ორგანიზაციებსა და ხალხს შორის  იტერაქცია არ არის ღრმა, თან ბევრი ადამიანი ისეთი ეპოქიდან მოდის, სადაც ინდივიდს არაფერს ეკითხებოდნენ, ამიტომ პრიორიტეტებისა და საჭირობების გადამუშავებაც არასამთავრობოების პასუხისმგებლობაა, რეალური სამუშაო ეს არის. რა საკითხიც წამოჭერით, ეს უფრო ფართო პრობლემაა და მხოლოდ ერთი სექტორის, ასე ვთქვათ „საზღვრებს" სცილდება...  თამარ გურჩიანი – რა თქმა უნდა, არასამთავრობო სექტორიც მოსახლეობის ნაწილს წარმოადგენს. მას აქვს პრიორიტეტების პრობლემა, ხალხს აქვს იდენტიფიცირების პრობლემა. რასაც მე ვამბობ შეიძლება არ იყოს ჭეშმარიტება, ვიღაცას შეიძლება ჰქონდეს მოსაზრება, რომ თავდაცვის სეფროს დაფინანსება უფრო პრიორიტეტულია, მე მიმაჩნია, რომ  უფრო მნიშვნელოვანია ბავშვთა განათლება, მათი სოციალური დაცვა და ასე შემდეგ. ვიღაცა ხომ უნდა დაფიქრდეს ამ საკითხებზე,? ჩვენ ძირითადი საჭიროებების ეტაპზე ვართ. თქვენ ისაუბრეთ არასამთავრობო სექტორზე, რომელსაც ნაკლები იტერაქცია აქვს საზოგადოებასთან, თვითონ ხალხი რატომ არ იყენებს საშუალებას და არ ქმნის ორგანიზაციებს, რომლის მეშვეობითაც თავის საჭირობებს, მოსაზრებებს გააცნობს თუნდაც ხელისუფლებას. სექტორი ხომ, ასე ვთქვათ, გარკვეული გზაა, საშუალებაა თუნდაც ამისთვის, რატომ ვერ ხერხდება ეს? თამარ გურჩიანი – ხალხი არასამთავრობო ორგანიზაცია აღიქვამს მხოლოდ როგორც სერვისის მიმწოდებელს და ელის რომ კონკრეტულ რაღაცას გაუკეთებს. ეს თავშივე მცდარი აღქმაა. მენეჯმენტში არის ასეთი თეზა, რომ ლიდერი ქმნის ლიდერებს. კარგი მენეჯერი ის არის, ვინც დაქვემდებარებული ადამიანისგან ლიდერს ქმნის და არა სულითმორჩილ ადამინებს. ასევე არის არასამთავრობო ორგანიზაციებშიც, კარგი არასამთავრობო ორგანიზაცია ის არის, რომელიც სხვა ძლიერ მოთამაშეებს ქმნის სექტორში, რომელიც ასწავლის როგორ მოაგვარონ პრობლემები. რა თქმა უნდა, ხალხმაც უნდა შეიცვალოს ეს პოზიცია, უნდა  გააქტიურდეს და თავდაჯერებული გახდეს. ქალბატონო თამარ, თქვენ ერთ–ერთ ინტერვიუში აღნიშნეთ, რომ ძლიერი საზოგადოება და სამოქალაქო სექტორი არც ერთ ხელისუფლებას არ სჭირდება. რას გულისხმობდით? თამარ გურჩიანი – ხშირად მოგვისმენია სხვადასხვა თანამდებობის პირების რიტორიკა, რომ სამოქალაქო საზოგადოების განვითარებას უნდა შევუწყოთ ხელიო, უნდა დავაფინანსოთო და ა.შ. არასამთავრობოების საქმეებში ჩაურევლობა და ხელის არშეშლა – ეს არის ერთადერთი ხელშეწყობა, რაც შეიძლება სახელმწიფომ გააკეთოს. ხელის არშეშლაში ვგულისხმობ კანონმდებლობას, რაც შეეხება არასამთავრობოების განვითარებას, ეს სახელმწიფოს მოვალეობა არ არის. რეალურად თუ ვიმსჯელებთ და ხელისუფლების ინტერესებიდან გამოვალთ, მას არ აწყობს აქტიური მოქალაქე. სახელმწიფოს კი პირიქით, ძლიერი ინდივიდი სჭირდება, არცერთ ხელისუფალს არ აწყობს რომ მოქალაქეებმა კარგად იცოდნენ უფლებები, ინტერესების დაკმაყოფილებას მოითხოვდნენ და მუდმივად მათი  კონტროლქვეშ იყოს. თქვენი აზრით ეს ყველა ქვეყანაში ასეა, თუ – მხოლოდ განვითარებად ქვეყნებშია, სადაც დემოკრატია საკმაოდ მყიფეა? თამარ გურჩიანი – რაც უნდა კარგი ხელისუფლება იყოს თავისი ნებით არ დაუშვებს ალტერნატიული კონტროლის მექანიზმებს. კარგი ხელისუფალი რუსეთის მსგავსად რეპრესიულ მექანიზმებს არ შემოიღებს, მაგრამ არც იმით იქნება კმაყოფილი, რომ ყოველდღე საზოგადოების წნეხის ქვეშ იყოს. დავუბრუნდები  წინა კითხვას და იმას თუ რას გულისხმობდი ხელის არშეშლაში  – ­­ბევრი ისეთი საკითხია, რომელიც დაუყოვნებლივ გადაჭრას საჭიროებს. მათ შორის ქველმოქმედებასთან დაკავშირებული რეგულაციები დახვეწას საჭიროებს და შეღავათები რომ შემოვიდეს ქველმოქმედების კულტურასაც შექმნიდა და განავითარებდა. მაგალითად კიდევ ერთი საკითხი არასამთავრობო ორგანიზაციას დამხმარე სამეწარმეო საქმიანობის განხორციელების უფლება აქვს, მაგრამ მიუხედავად იმისა რომ დამხარე საქმიანობაა და მოგებას არ ღებულობენ, მაინც ჩვეულებრივი რეჟიმით იბეგრებიან. ესეც გადასახედია. ბევრი ისეთი რუტინული საგადასახადო საკითხია მოსაგვარებელი, რასაც ყურადღებას არ ვაქცევთ, მაგრამ, ვფიქრობ, რომ მუშაობა უნდა დავიწყოთ. სწორედ ამ საკითხებში ვხედავ სახელმწიფოს როლს, რასაც განვიხილავ როგორც ხელის არშეშლას. არჩევნების შემდეგ შეიცვალა პოლიტიკური რეალობა, სავარაუდოდ საერთაშორისო ორგანიზაციებიც შეცვლიან თავიანთ მიმართულებებს, თქვენი აზრით როგორი იქნება ეს ცვლილება? თამარ გურჩიანი – უშუალოდ რაიმე ინფორმაციას არ ვფლობ, მაგრამ ლოგიკურია რომ ეს ასე მოხდეს. მაგალითად საარჩევნო ინფრასტრუქტურა ჩვენთან მეტნაკლებად გამართულია, ამ დროს პაკისტანში, სადაც სულ ახლახანს ჩატარდა არჩევნები და 40 პოლიტიკური სუბიექტი მოკლეს და არჩევნებში გადამწყვეტი ფაქტორი ძალადობაა, უფრო მეტი პრობლემები და ბუნებრივია, რომ ისინი უფრო მეტ დახმარებას საჭიროებენ. სწორედ საჭიროების მიხედვით განსაზღვრავენ საერთაშორისო ორგანიზაციები პრიორიტეტებს – სადაც უფრო სჭირდებათ მათი დახმარება – იქ მიდიან. თუკი ჩვენ ქვეყანაში საარჩევნო მონიტორინგის წარმათვა უპრობლემოდ მოხდება, საერთაშორისო დახმარება წავა სხვა ქვეყანაში, სადაც ამ მიმართულებით უფრო მეტი დახმარებაა საჭირო. თუმცა არ ვფიქრობ, რომ საერთაშორისო ორგანიზაციები სულ დატოვებენ ქვეყანას, მაგრამ დაფინანსება აუცილებლად დაიკლებს. ჩვენ ამ დაფინანსების კლებას უნდა შევხვდეთ ფონდების მოძიების რაღაც მექანიზმით. ორგანიზაციებს მოუწევთ მიმართონ მოსახლეობას და აუხსნან თუ რა მნიშვნელობა აქვს არასამთავრობოების დაფინანსებას, თუნდაც აუხსნან, რომ სექტორი აქტიურად იმუშავებს, რათა მაგალითად პარლამენტმა უფრო კარგი კანონები და გადაწყვეტილებები მიიღოს და ასე შემდეგ. დაფინანსების კიდევ ერთი რესურსი – ბიზნესი, თქვენი აზრით, რატომ არ აეწყო ბიზნესის და არასამთავრობოების თანამშრომლობა? თამარ გურჩიანი –  იმის თქმა რომ რაღაც ურთიერთობა არ არსებობს სწორი არ იქნება, ბიზნესი ჩართულია ქველმოქმედებაში, გააზრებული აქვს სოციალური პასუხისმგებლობა. აქ დგას რამდენიმე საკითხი – თავისუფალია ბიზნესი? ან წესები, რომელიც ბიზნესისთვის არის დადგენილი არის საზოგადოებაზე ორიენტირებული? – მე არ ვამბობ, რომ ეს წესები მთლიანად უგულებელყოფს საზოგადოების ინტერესებს, მაგრამ ბიზნესსაც თავისი განვითარების ეტაპები აქვს და საკითხავია არის თუ არა იგი იმ საფეხურზე, რომელიც სოციალური პასუხისმგებლობის მაღალ სტანდარტს გულისხმობს,  მეორე – ბიზნესი სახელმწიფოს წნეხისგან თუ არ გათავისუფლდა , ის ვერ მიიღებს თავისუფალ გადაწყვეტილებას. თქვენ როგორ თვლით, არის წნეხის ქვეშ ბიზნესი? თამარ გურჩიანი – რასაც ვხედავ იმაზე დაყრდნობით  ისეთი შთაბეჭდილება მექმნება, რომ ბიზნესი ახალ მფარველს ეძებს. ვიცი რომ ეს მკაცრი შეფასებაა.  ხელისუფლებლებასა და არასამთავრობოებს შორის თანამშრომლობამზე ვისაუბროთ, წინა ხელისუფლებამაც მოღვაწეობის დასაწყისში და ახალმა ხელისუფლებამაც გარკვეულ საბჭოებში მიიწვია სექტორის წარმომადგენლები, წინა ხელისუფლების დროს გარკვეული ორგანიზაციების აფილირება მოხდა ხელისუფლებასთან, ახლა ხედავთ ასეთ საშიშროებას? თამარ გურჩიანი – ჩემდა გასაკვირად ბევრი არასამთავრობო ორგანიზაცია ამ საკითხის მიმართ არ არის მგორძნობიარე. თუ რაღაც გადაწყვეტილების მიღებაში მონაწილეობ, ბუნებრივია იმ საკითხის მიუკერძოებელი დამკვირვებელი ვეღარ იქნები. თუმცა ჩვენი არასამთავრობო ორგანიზაციები კარგად ახერხებენ ბალანსის დაცვას – ერთის მხრივ, ისინი ინფორმაციას იღებენ და ჩართულნი არიან მუშაობაში, მეორეს მხრივ, ისინი არ იღებენ მონაწილეობისთვის დაფინანსებას. ამიტომაც ინარჩუნებენ მიუკერძოებლობას. დაგვისახელეთ სამი ღირებულება, რომელსაც უნდა ეყრდნობოდეს არასამთავრობო სექტორი... თამარ გურჩიანი – კანონის უზენაესობა, სამართლიანობა, კეთილსინდისიერება – ეთიკური სტანდარტების დაცვა. 

უნგრული არასამთავრობო ორგანიზაციების გამოცდილების შესახებ სამოქალაქო საზოგადოების ორგანიზაციების განვითარებისა და ფანდრაიზინგის კონსულტანტ ბალაშ სატორს ვესაუბრეთ. ესაუბრა მარიამ პატატიშვილი უნგრეთის მაგალითზე, როგორ მიაღწიეს უნგრულმა არასამთავრობო ორგანიზაციებმა ფინანსურ მდგრადობას? როგორ მოიძიეს დაფინანსების წყაროები?  ბალაშ სატორი – პასუხი კომპლექსურია: ტრადიციულად, არსებობს დაფინანსების მოპოვების მრავალი გზა. უნგრეთში მოქმედებდა საგადასახადო კოდექსი, რომელიც არასამთავრობოებს საშუალებას აძლევდა დაფინანსება მიეღოთ კომპანიებისა და კერძო პირების გადასახადებიდან გარკვეული პროცენტის სახით. ასე ხდებოდა 20 წლის განმავლობაში. ეკონომიკური კრიზისის შემდეგ, ეს ბენეფიტი გაუქმდა. მეორეს მხრივ, უნგრულ არასამთავრობო ორგანიზაციებს აქვთ სხვა გზებიც დაფინანსება მიიღონ სახელმწიფოსგან: ისინი სხვადასხვა მომსახურებას სთავაზობენ სახელმწიფოს, ეს საკმაოდ კონკურენტუნარიანი გარემოა. ცხადია, არსებობს პრობლემები და შეცდომებიც. კრიზისმა აჩვენა, რომ არასამთავრობოები ვერ იქნებიან მდგრადი, რადგანაც დამოკიდებული არიან, მაგალითად, ევროკავშირის, აშშ-ს დაფინანსებაზე და არ გააჩნიათ დაფინანსების ალტერნატიული წყაროები. შეკითხვაზე, თუ როგორ ახერხებენ უნგრული არასამთავრობოები იყვნენ სტაბილურები, გიპასუხებთ: ისინი ამას ვერ ახერხებენ. უნგრული არასამთავრობო ორგანიზაციების უმრავლესობას აქვს ფინანსური პრობლემები, იბრძვიან არსებობისთვის. შეგვიძლია ასე დავსვათ შეკითხვა: რამდენად განსხვავდება ან გავს უნგრული გარემო ქართული რეალობისგან? ჩემის აზრით, ძირითადი განსხვავება არის ის, რომ უნგრეთში მოქმედებს გარკვეული მექანიზმები, სამართლებრივი ჩარჩოები, არსებობს წარსული გამოცდილება. როგორც ვხედავ, საქართველო ახლა აყალიბებს ამ მექანიზმებს. დრო არის საჭირო იმისთვის, რომ არასამთავრობოები მიხვდნენ, რომელ სფეროში შეძლებენ პროგრესირებას, დაფინანსების მოძიებას და სტაბილურობის მიღწევას. ვფიქრობ, ეს დიდი განსხვავებაა ჩვენს შორის. მაგრამ ბოლო ხუთი-ექვსი წელია უნგრეთში სიტუაცია უარესდება ამ კუთხით. ხოლო საქართველოში უმჯობესდება. წარმატებებს გისურვებთ თქვენს საქმიანობაში! დიდ ქვეყნებს აქვთ დიდი ბაზარი და მეტი შესაძლებლოებიც. საინტერესო იქნებოდა პატარა ქვეყნების გამოცდილებაზე გვესაუბრა. რომელი ქვეყნების გამოცდილება შეუძლიათ გაიზიარონ საქართველოში არსებულმა სამოქალაქო საზოგადოების ორგანიზიებმა?  ბალაშ სატორი – ვფიქრობ, საინტერესოა როგორც დასავლეთის, ასევე აღმოსავლეთის ქვეყნების გამოცდილება. თქვენ აპირებთ მოწინავე სისტემის დანერგვას, როცა არასამთავრობო ორგანიზაციები არიან სახელმწიფოს კონტრაქტორები. სხვადასხვა ქვეყნებში ფუნქციონირებს სხვადასხვა მოდელი. მაგალითად, უნგრეთში ამ მოდელს ნორმატიული მხარდაჭერა აქვს: თუ თქვენ გსურთ რაიმე სახის მომსახურება შესთავაზოთ (ის, რაც სახელმწიფომ უნდა შესთავაზოს მოქალაქეებს), თქვენ უნდა შეესაბამებოდეთ სახელმწიფოს მიერ დაწესებულ სტანდარტებს. თითოეულ ადამიანზე, რომელსაც მოემსახურებთ, თქვენ მიიღებთ ფიქსირებულ თანხას. ეს საინტერესო მოდელია. სხვა მოდელი მოქმედებს ჩეხეთში. აქ ამჟამად ცდიან ვაუჩერულ სისტემას. მაგალითად, თუ თქვენ ხართ სპეციალური საჭიროების მქონე ადამიანი და გეკუთვნით სახელმწიფოსგან გარკვეული მომსახურების მიღება, თქვენ იღებთ ვაუჩერს და ამ ვაუჩერით უხდით სოციალური სერვისების პროვაიდერს. ეს საინტერესო კონცეფციაა. არ ვიცით, როგორ იმუშავებს იგი, მაგრამ არის ძალიან სასარგებლო - მას ბაზრის ელემენტები შემოაქვს სერვისის მიწოდებაში. სახელმწიფოსთან კონტრაქტორობის კუთხით, საინტერესოა ეტონეთის, ხორვატის და უნგრეთის მაგალითიც. აქ მოქმედებს სახელმწიფო ფონდი არასამთავრობო ორგანიზაციების დასახმარებლად. სამივე ქვეყანაში ფონდი აფინანსებს არასამთავრობოების ფუნქციონირების ხარჯებს. ზოგადად, ადვილია დაფინანსების მიღება პროგრამებითვის, მაგრამ რთულია - ორგანიზაციის ფუნქციონირების ხარჯებისთვის თანხების მოზიდვა. ამ სამ ქვეყანას დაფინანსების ერთნაირი ფორმულა აქვთ. უკრაინაში ჯერ არ მიუღიათ ეს კანონი, მაგრამ ემზადებიან ამისთვის. იმედია, ორიოდ წელიწადში, თქვენთანაც იქნება სახელმწიფო ფონდი, რომელიც დაეხმარება არასამთავრობო სექტორს განვითარებაში. არა რომელიმე მიმართულებას, არამედ, ზოგადად, სექტორს. დაფინანსების წყარო სხვადასხვა შეიძლება იყოს - გარკვეული პროცენტი ლატარიიდან, ან გადასახადებიდან, რომელსაც სახელმწიფო იღებს. დონორებს სერიოზული როლი აკისრიათ, მაგრამ მათგან მიღებული დაფინანსება არ შეიძლება იყოს მუდმივი. საპარლამენტო, საპრეზიდენტო არჩევნების ფონზე, როდესაც ქვეყანაში არ არის სტაბილური გარემო, არ არის სტაბილური ეკონომიკა, დონორები ღელავენ. ამ პირობებში, როგორ უნდა მიაღწიონ სტაბილურობას არასამთავრობო ორგანიზაციებმა?  ბალაშ სატორი – იმ ორგანიზაციებისთვის, რომელთაც უკვე აქვთ კარგი იმიჯი, არიან ცნობილი და უკავიათ მნიშვნელოვანი ადგილი საზოგადოებაში, უფრო ადვილია დაფინანსების მოზიდვა. საზოგადოება გრძნობს, რომ ასეთი ორგანიზაციების არსებობა საჭიროა და უჩნდებათ მოტივაცია დაეხმარონ ასეთ ორგანიზაციებს. პატარა ორგანიზაციებისთვის რთულია კონკურენცია გაუწიონ დიდ ორგანიზაციებს. როდესაც ხართ დიდი ორგანიზაცია, თქვენ გაქვთ კარგი დაფინანსება, გყავთ ადამიანური რესურსები, რომლებიც ზრუნავენ კონტრაქტებზე, თქვენს პოპულარიზაციაზე, ურთიერთობენ დონორებთან. პატარა არასამთავრობოებს არ აქვთ ამისი რესურსი. სამაგიეროდ, პატარა ორგანიზაციებს აქვთ უფრო მჭიდრო და უშუალო ურთიერთობა ადამიანებთან, რომელთაც ეხმარებიან. ვფირობ, კომპანიების და კერძო პირების მხრიდან დაფინანსების მოზიდვა საქართველოში უნდა განვითარდეს კიდევ უფრო მეტად. თქვენ შეგიძლიათ თქვათ, რომ არასამთავრობოებს არ აქვთ კავშირი მდიდარ ხალხთან, მაგრამ ისიც ნათელია, რომ არ ცდილობთ დაუკავშირდეთ მდიდარ ან ნაკლებად მდიდარ ადამიანებს. არასამთავრობო ორგანიზაციებმა უნდა დაიწყონ თავისი აუდიტორიის შექმნა ადამიანებსგან, რომელთაც მოსწონთ და აინტერესებთ არასამთავრობოების საქმიანობა, ამის შემდგომ, მათ შეუძლიათ ამ ადამიანებს სთხოვონ ერთჯერადი არ რეგულარული დონაცია. ეს მეთოდი მუშაობს ბევრ სხვა პატარა ქვეყანაში და საქართველოშიც უნდა გაამართლოს. საქართველო ახდენს ღვინისა და წყლის ექსპორტს დიდი მოცულობით. რატომ არ შეიძლება მიიღოთ ძალიან მცირე პროცენტი ნაბეღლავის ან ბორჯომის ყველა გაყიდული ბოთლიდან? ერთი პროცენტიც კი უკვე უზარმაზარ შემოსავალს უდრის. ვფიქრობ, თქვენ გაქვთ ისეთი რამ, რაც დაგეხმარებოდათ დაფინანსების მოზიდვაში: თქვენი კულტურული მემკვიდრეობა და ეროვნული სიამაყე. თუ თქვენ შეძლებთ იპოვოთ დონორები, რომლებსაც აქვთ ამ სახის ღირებულებები და შეძლებთ დაარწმუნოთ ისინი, რომ შეგიძლიათ მნიშვნელოვანი როლი შეასრულოთ კულტურული და ისტორიული მემკვიდრეობის დაცვის სფეროში, თქვენ შეძლებთ მოიპოვოთ დაფინანსება. ნახევარი მილიონი ადამიანი არ არის ცოტა დაფინანსების მოსაძიებლად. ერთი მილიონი ქართველიც, რომელიც საზღვარგარეთ ცხოვრობს, არ არის ცოტა. ისინი ცხოვრობენ ქვეყნებში, სადაც არსებობს მაღალი სოფისტიკური ფილანტროპიის კულტურა. იქ ყველამ იცის არასამთავრობო ორგანიზაციების შესახებ. და კვლავ, მთავარია როგორ მოვიძიიოთ ეს ხალხი, როგორ შევთავაზოთ გაუწიონ დახმარება არასამთავრობო ორგანიზაციებს.

რა ხდება სამოქალაქო სექტორში, რა შეიცვალა არჩევნებიდან დღემდე და რის მოლოდინშია სექტორი? ამ საკითხებზე ვესაუბრეთ „საერთაშორისო გამჭვირვალობა – საქართველოს" აღმასრულებელ დირექტორს ეკა გიგაურს. ესაუბრა ლალი შალვაშვილი თქვენი აზრით, რას მიაღწია და რა აქვს მისაღწევი საზოგადოებრივ ორგანიზაციებს, საუბარი დავიწყოთ იმ მინუსებით და პლუსებით, რაც სექტორს აქვს...  ეკა გიგაური – ეს საკმაოდ რთული კითხვაა. ყოველთვის  ვსაუბრობთ  მინუსებზე და პლუსებზე, მე მიმაჩნია, რომ საზოგადოებრივი ორგანიზაციებისთვის  ერთ–ერთი  დიდი პრობლემაა, რომ ისინი  გრანტებზე არიან დამოკიდებული.  ერთი მხრივ,  კარგია  რომ გაქვს გრანტი  და  პროექტი,  ან იკვლევ  რაიმეს, მაგრამ მეორე მხრივ, როცა რაღაც აქტუალურ საკითხზე რეაგირებაა საჭირო, შესაძლოა პრობლემის წინაშე აღმოჩნდე, რადგან გრანტის ფარგლებში განსახორციელებელი აქტივობა იმ მომენტში, შესაძლოა, სულაც  არ იყოს პრიორიტეტული და  სულ სხვა საკითხი შეიძლება იყოს აქტუალური, ეს ყოველივე  კი, დამატებით დროის  და ადამიანური რესურსების ხარჯვასთან არის დაკავშირებული. თქვენ ამბობთ, რომ რომელიმე კონკრეტული პროექტის პრიორიტეტი  შეიძლება არ პასუხობდეს დროის მოთხოვნებს?   ეკა გიგაური – რა თქმა უნდა. მაგალითად ჩვენ გვაქვს სამწლიანი პროექტი და სამი წლის წინ დაგეგმილი ღონისძიებები, შეიძლება, სულაც არ იყოს რელევანტური, თუნდაც ერთი წლის შემდეგ. მით უმეტეს საქართველოში, სადაც სიტუაცია ძალიან ხშირად იცვლება და შესაბამისად, ძალიან რთულია გათვალო,  რა შეიძლება იყოს მნიშვნელოვანი. რამდენიმე წლით ადრე ეფექტური ადვოკარიტების კამპანიის გათვლაც არაა მარტივი ამოცანა.  თუმცა, ჩვენი ორგანიზაციისთვის  ეს არ არის პრობლემატური დაფინანსების  სტრუქტურისა და ადამიანური რესურსებიდან გამომდინარე. პროექტული აქტივობების გარდა, სხვა საქმეც შეგვიძლია გავაკეთოთ. ჩვენი საქმიანობის ზუსტად ნახევარი დაკავშირებულია ისეთ სამოქალაქო აქტივობებთან, რომელიც შეიძლება  არ იყოს  გათვალისწინებული არცერთ პროექტში.  ბევრ ახალ და  საინტერესო ინიციატივას მოხალისეობრივი საწყისებით ვახორციელებთ. შედარებით პატარა ორგანიზაციებისთვის პროექტებს მიღმა საქმიანობა სირთულეებთანაა დაკავშირებული.   რა გამოსავალს ხედავთ? ყველამ ვიცით, რომ არასამთავრობო სექტორის დაფინანსების თითქმის ერთადერთი წყარო საერთაშორისო, დონორი ორგანიზაციები არიან...   ეკა გიგაური – გამოსავალი,  ჩემი აზრით, ის არის რომ ყველამ, თითოეულმა ადამიანმა გაითავისოს,  რომ ამ ქვეყნის მოქალაქეები ვართ და სამოქალაქო საქმიანობაში მივიღოთ მონაწილეობა. ყველას – მეც, თქვენც, სხვებს, ბიზნესის წარმომადგენლებს, საკუთარი საქმიანობის გარდა, უნდა გვაინტერესებდეს სხვადასხვა პრობლემების მოგვარება, მაგალითად, როგორიცაა გამწვანების, დასუფთავების თუ სხვა პრობლემები. ქართულმა საზოგადოებამ უნდა იზრუნოს, ასეთი აქტივისტების ჯგუფების  გაძლიერებაზე.  ამას იმიტომ ვამბობ, რომ ძალიან იშვიათია ბიზნესის ან მოქალაქის მიერ არასამთავრობოებისთვის დონაცია ან შემოწირულობა.  არასამთავრობოების საქმიანობის ერთ–ერთ მინუსად სწორედ ბიზნესთან აუწყობელ თანამშრომლობას ასახელებენ, თუმცა დასძენენ, რომ ეს ორმხრივი პრობლემაა...  ეკა გიგაური – ბიზნესმაც  ვერ ააწყო ასეთი ურთიერთობა სექტორთან. აქამდე ამას პოლიტიკური გარემოც განაპირობებდა, მაგალითად  ჩვენ კრიტიკული  არასამთავრობო ორგანიზაცია  ვართ  და შესაბამისად, არ მოისურვებდნენ ჩვენთან ურთიერთობას. ამის შესახებ  ვიღაცეებმა პირდაპირ  გვითხრეს კიდეც. ამას გარდა,  ვფიქრობ, რომ  მათ არ აქვთ გაცნობიერებული,  რომ  შეუძლიათ რაიმე გაუკეთონ იმ რაიონს და თემს, სადაც ისინი ცხოვრებენ . იქნება ეს გარემოს დაცვა, თუ სხვა რამ, შესაძლოა  ეს მათი ინტერესი სულაც არ იყოს, მაგრამ ეს საკითხები გავლენას ახდენს საზოგადოების ცხოვრებაზე. მგონია, რომ გამოსავალი არის საინფორმაციო კამპანია, რომლითაც ყველას მივაწვდით ინფორმაციას, რომ ერთად უნდა ვიზრუნოთ ლოკალურ პრობლემებზე.   ჩვენ გვქონდა ბიზნესის წარმომადგენლებთან შეხვედრა, შევხვდით ასოციაციების წარმომადგენლებსაც და გვინდოდა გარკვეული თანამშრომლობა, იგივე ბიზნესის ანგარიშვალდებულების საკითხები წამოგვეწია, თუმცა მათ არანაირი ინტერესი არ გამოუხატავთ.   საერთაშორისო  ორგანიზაციებსა და დაფინანსების წყაროებზე ვისაუბრეთ, მზად არის არასამთავრობო სექტორი, რომ თავად შესთავაზოს საერთაშორისო ორგანიზაციებს წინადადებები, თემატიკა, რათა პროექტულმა აქტივობებმა არ დაკარგოს აქტუალობა?   ეკა გიგაური – ჩვენი დაფინანსება გვაძლევს, ასე ვთქვათ, „მოქნილობას", რადგან მენეჯმენტის და ფინანსური სტრუქტურა აწყობილი გვაქვს საერთაშორისო სტანდარტების შესაბამისად, მაგრამ ასე არ არის ყველა ორგანიზაციაში. შესაბამისად, მგონია, რომ დონორებმა  თავიანთ სტრატეგიას უნდა გადახედონ. თუ მათ უნდათ, რომ ძლიერი ორგანიზაციები კიდევ უფრო გაძლიერდნენ, კარგია, მაგრამ თუ უნდათ, რომ პატარა ორგანიზაციები, რომლებიც ადგილობრივი თემის პრობლემებზე მუშაობენ, გაძლიერდნენ, უნდა იფიქრონ  პოლიტიკის გადახედვაზე. შეიძლება ეს, მათი მხრიდან მეტ რისკთან არის დაკავშირებული, მაგრამ გარკვეული შეკრული წრეა – იმისთვის რომ ბიზნესმა და მოქალაქეებმა შემოწირულობები გაიღონ, არასამთავრობოებმა უნდა აჩვენონ, რომ მიზანს მიაღწიეს და ისეთ საკითხებზე საუბრობენ, რომელთანაც ყოველდღიური შეხება აქვს მოსახლეობას. შეიძლება ეს იყოს წყალგაყვანილობის,  გზის მოწესრიგების, ან ნაგვის გატანის საკითხები. ძალიან მნიშვნელოვანია რომ ადგილებზე იყვნენ ჯგუფები, რომლებიც ლოკალურ პრობლემებზე იმუშავებენ. ამისთვის მათ დაფინანსება სჭირდებათ. როცა ბიზნესი, ან მოქალაქე დაინახავს, რომ  მათ  რაღაც  საკითხი  მოაგვარეს,  მხარს დაუჭერენ და ხელს შეუწყობენ. ამიტომ ვფიქრობ, რომ ამ მიმართულებით დონორები შეცვლიან სტრატეგიას.   ვფიქრობ, რომ რეგიონში მომუშავე ორგანიზაციებმა უკეთ იციან ადგილობრივი პრობლემები, ვიდრე მაგალითად მე. ეს მათი უპირატესობაა. შეიძლება მათ საგრანტო განაცხადი მოთხოვნების შესაბამისად ვერ დაწერონ და ამ მიმართულებით სამუშაო და ტრენინგებია ჩასატარებელი, მაგრამ მათ ლოკალური პრობლემები რომ უკეთ იციან ეს ფაქტია.   თქვენი აზრით, რა გავლენას ახდენს სამოქალაქო სექტორი საზოგადოებაზე? ბოლო წლებში გამოქვეყნებული კვლევების თანახმად სექტორის ცნობადობა მოკრძალებულია...   ეკა გიგაური – თუკი  ვინმე  იტყვის, რომ წინასაარჩევნოდ  სამოქალაქო სექტორი სუსტი იყო, მას ნამდვილად არ დავეთანხმები, რადგან წინასაარჩევნოდ ძალიან ბევრ რაღაცას მივაღწიეთ.   მთელ სექტორზე საუბრობთ? ეკა გიგაური – ჩვენ, შეგვიძლია ვთქვათ, რომ ვგრძნობდით რომ ვახდენდით გარკვეულ გადაწყვეტილებებზე და მიმდინარე პროცესებზე გავლენას, ამას ვხედავდით  ყველა,  ვისთანაც ერთად  ვთანამშრომლობდით. სექტორი გარკვეულწილად სუსტია, თუმცა მზაობა არის რომ ჩართონ ყველაფერში სამოქალაქო სექტორი.   თუმცა სექტორის ჩართვის მცდელობები 2003 წლის შემდეგ, ახალი ხელისუფლების მოსვლი პირველ ეტაპზეც იყო...   ეკა გიგაური – ეს ნამდვილად იყო. ახლა არ ვიცი და ვერ ვიტყვი, რომ სულ ასე იქნება, თუმცა გარკვეულ პროცესებზე გავლენას ახდენს ჩვენი საქმიანობა. რაც შეეხება ნდობას, ჩვენი ორგანიზაციის სამუშაოს დღის წესრიგსაც რომ შევხედოთ, არის საკითხები, რომელიც მოსახლეობისთვის  ყოველდღიურ  პრობლემას არ წარმოადგენს. ვცდილობთ ყოველთვის ისეთი  საქმე  ვაკეთოთ,  რაც  მოსახლეობას აწუხებს. თუ ავიღებთ საარჩევნო კანონმდებლობას ეს მნიშვნელოვანია,  მაგრამ მოსახლეობისთვის უფრო მნიშვნელოვანი სადაზღვევო პოლიტიკაა, ამიტომ  გვაქვს  უფასო საკონსულტაციო ცენტრები და სადაზვევო საკითხებზეც ვმუშაობთ.  ჩემი აზრით,  სამოქალაქო სექტორის  მიმართ  ნდობა  ყოველ ჯერზე  მაშინ იზრდება, როცა ნდობა პოლიტიკური მხარეების მიმართ კლებულობს. ანუ, როდესაც მოსახლეობამ არ იცის ვის მოუსმინოს და სურს ექსპერტული მოსაზრება გაიგოს,.. საერთოდ ნდობაც სუბიექტურია.  სამოქალაქო სექტორი საზოგადოების ყოველი წევრისთვის გარკვეული საშუალებაა, რომ თავისი ხმა, მოსაზრება მიიტანოს თუნდაც ხელისუფლებამდე. იყენებს ამ მექანიზმს მოსახლეობა და თუ არ იყენებს ხომ არ არის ამის მიზეზი ინფორმაციის ნაკლებობა?  ეკა გიგაური – მოსახლეობა ამ  საშუალებას არ იყენებს , რადგან მათ ჰგონიათ რომ ეს არ არის ის გზა, რომლითაც  რაღაც შედეგამდე  მივლენ. საეროდ,  ჩვენი მოქალაქეები პასიურები არიან. შესაძლოა იმიტომ, რომ მათ სხვა საფიქრალი აქვთ – სოციალურს ფონს ვგულისხმობ.  მოქალაქეს რომ ჰკითხო  რა  შეიძლება  გააკეთოს  რომ დასაქმების დონემ  აიწიოს, გეტყვიან რომ ვერაფერს უშველიან.  ზოგადად  განწყობაა საზოგადოებაში,  რომ გარკვეული პოლიტიკური  ძალა მოვა და ის მოაგვარებს ყველაფერს. ასეთი მოლოდინი არ არის ჯანსაღი, მოქალაქეები აქტიურად უნდა ჩაერთონ ყველაფერში, არ შეიძლება ერთმა ადამიანმა შეცვალოს რამე.   ამ ჭრილში როგორ ხედავთ არასამთავრობოების როლს?   ეკა გიგაური –  ჩვენ წლების მანძილზე  ვცდილობთ აქტივისტების ჯგუფების ჩამოყალიბებას, რომლებიც ლოკალურ პრობლემებზე მოხალისეობრივ საწყისებზე იმუშავებენ. ვეხმარებით ინფორმაციის გავრცელებისა  და მათი ხელისუფლებასთან მიტანის კუთხით, მაგრამ ვერ მოვახერხეთ ამ ხალხის მობილიზება, რადგან უსასყიდლოდ რაღაცის გაკეთება მაინც პრობლემაა. ისინი ფიქრობენ, რომ ლოკალური პრობლემების მოგვარებაში საფასური უნდა მიიღონ. დასავლეთის ქვეყნების გამოცდილებას თუ გადავხედავთ, არასამთავრობო სექტორს დონორები არ აფინანსებენ, ეს არის თვითორგანიზებადი ჯგუფები, რომლებიც რაღაცა მიზნისთვის იბრძვიან, რაც ძალიან კარგია.   მართალია არჩევნებიდან ცოტა დრო გავიდა, სრულყოფილი ანალიზისთვის დრო საკმარისი არ არის, მაგრამ თქვენი აზრით, ერთი შეხედვით, სექტორში რა შეიცვალა?   ეკა გიგაური – ბევრი რამ შეიცვალა. არჩევნებამდე იყო მიზანი, რომ დემოკრატიული არჩევნები ჩატარებულიყო, ადამიანებს ჰქონოდათ თავისუფალი არჩევანის უფლება. ადამიანის უფლებების კუთხითაც  რთული ვითარება იყო. არასამთავრობო სექტორში იყო განწყობა, რომ მათ აზრს არ იზიარებენ , მთავრობა დახურული იყო და ასე შემდეგ. ამის გამო მობილიზებული ვიყავით, რომ დემოკრატიული არჩევნები ჩატარებულიყო. ბუნებრივია, არჩევნების შემდეგ შეიცვალა სიტუაცია და ახლა ყველა სხვადასხვანაირად მოქმედებს და ფიქრობს. ზოგის აზრით, მეტი დრო უნდა მისცე მთავრობას, რომ რაღაც გააკეთოს და ასეთები თვლიან, რომ მიზანშეწონილი არ არის კრიტიკა. ნაწილი ფიქრობს, რომ სჯობს თავიდანვე იყოს ჯანსაღი კრიტიკა, რათა იგივე შეცდომები არ განმეორდეს. ასეთი დივერსიფიკაცია მოხდა სექტორში. თანაც სექტორიდან ნაწილი მთავრობაში გადავიდა სამუშაოდ. ვფიქრობ, რომ ნელ–ნელა დალაგდება სექტორი, რათა თავისი როლი ნახოს. ახლა ცოტა არეული სიტუაციაა. თქვენ აღნიშნეთ, რომ სექტორმა თავისი როლი უნდა  იპოვოს, რას გულისხმობთ? რადგან აზრთა სხვადასხვაობაზე ისაუბრეთ, რას ფიქრობთ, სჯობს არ ვაკრიტიკოთ ხელისუფლება დღესვე თუ პირიქით, ჯანსაღი კრიტიკა უკეთესია?   ეკა გიგაური –  ვფიქრობ, რომ კრიტიკა უმჯობესია და ეს ჩვენი საქმიანობიდანაც ჩანს. ზუსტად ახლა სჭირდებათ მათ კონსტრუქციული კრიტიკა. გვესმის, რომ ცოტა დრო გავიდა, რაც ხელისუფლებაში ახალი გუნდი მოვიდა, მაგრამ ისეთი შეცდომები არ უნდა დავუშვათ, რომლის გამოსწორებაც მომავალში ძნელი იქნება. შესაბამისად,  ჩვენ ვფიქრობთ,  რომ არჩევნების შემდეგ ისევე უნდა გავაგრძელოთ საქმიანობა, როგორც არჩევნებამდე. რაც შეეხება როლს, სწორედ მონიტორინგს, პრობლემებზე მითითებას, კონსტრუქციულ კრიტიკას ვგულისხმობდი. აღმოჩნდა კიდევ ერთი დამატებითი საკითხი – მას შემდეგ რაც მთავრობამ გამოთქვა სამოქალაქო სექტორის ჩართვის სურვილი, აუცილებელია სამოქალაქო სექტორი დაჯდეს და გაიაზროს პასუხისმგებლობა იმ საკითხებზე, რომლის შესახებაც რეკომენდაციებს ვაძლევდით მთავრობას და უნდა ჩამოაყალიბოს მისი განხორციელების გზებიც. ზოგ შემთხვევაში სექტორი პრობლემის წინაშე შეიძლება აღმოჩნდეს.    რატომ?   ეკა გიგაური – იმიტომ, რომ როდესაც რეკომენდაციები კანონპროექტად უნდა ჩამოყალიბდეს, შეიძლება აღმოჩნდეს, რომ მართალი არ იყავი და შეიძლება არც იმუშაოს. აქ უფრო მეტი ექსპერტიზა გჭირდება კონკრეტულ საკითხებზე, პოლიტიკაზე, გეგმაზე უნდა იმუშაო, რომელიც ხელისუფლებამ უნდა განახორციელოს.   თუნდაც რეკომენდაციები ავიღოთ, მასზე ხომ ყოველთვის  პასუხისმგებელი იყო არასამთავრობო სექტორი?  ეკა გიგაური – რა თქმა უნდა, ჩვენ ორგანიზაციას თავის დროზეც და ახლაც ამის პრობლემა არ აქვს, არც ექსპერტიზა გვაკლია და ნამდვილად ვცდილობდით და ვცდილობთ კონკრეტულ საკითხებზე გვესაუბრა და ვისაუბროთ.   2003 წლის შემდეგ, მაშინდელმა ხელისუფლება შესთავაზა არასამთავრობო სექტორს თანამშრომლობა და სხვადასხვა საბჭოებშიც მიიწვია. რა განსხვავებას ან მსგავსებას ხედავთ?  ეკა გიგაური –  სხვებზე ვერ ვისაუბრებ და ჩვენი ორგანიზაციის მაგალითზე ვიტყვი. ყოველთვის – მაშინაც და ახლაც ვიყავით და ვართ ანტიკორუფციულ საბჭოში. ადრე ჩვენი ყოფნა ნომინალური იყო, ეტყობა, იმისთვის რომ ვიღაცისთვის ეთქვათ, რომ საბჭოში ვიყავით – არ გვქონდა საშუალება პოზიცია გაგვეტანა, არც იმის საშუალება იყო, რომ სტრატეგიის ჩამოყალიბებაში ჩავრთულიყავით. შეხვედრამდე რამდენიმე დღით ადრე გვიგზავნიდნენ სტრატეგიის დოკუმენტს, რომლის განხილვას კი არა, წაკითხვასაც ვერ ვასწრებდით. ფაქტია რომ ეს ნომინალური ჩართვაა. ეხლა სხვა სიტუაციია – თავიდან ბოლომდე ჩართულნი ვართ პროცესში და თანამონაწილეები ვართ. არ ვიცი მომავალში როგორ გაგრძელდება თანამშრომლობა, მაგრამ განსხვავება ის არის, რომ ახლა ფორმალური ხასიათი არ აქვს თანამშრომლობას.   წინა ხელისუფლებასთან გარკვეული არასამთავრობოების აფილირება მოხდა, ეხლა ამის საშიშროებას ხედავთ თუ არა?   ეკა გიგაური – ასეთი საშიშროება ყოველთვის არის.  დასაწყისში რომ  ვახსენე – სექტორი უნდა გაერკვეს თავის  თავში–თქო, სწორედ ამას ვგულისხმობდი. ამ გამოწვევის წინაშე დგას სამოქალაქო სექტორი – შეიძლება გუშინდელი თანამებრძოლი მაღალ თანამდებობაზე აღმოჩნდეს. უკვე  ვახსენე, ნაწილი მიიჩნევს, რომ დღეს კრიტიკის დრო არ არის – ყველას თავისი არჩევანი აქვს.   ის არასამთავრობოები, რომლებიც მოცდას ამჯობინებენ, ძლიერი ორგანიზაციები არიან? დიდია მათი გავლენა საზოგადოებაზე?   ეკა გიგაური – ჩვენთან  უფრო მეტად ორგანიზაციები კი არა, ორგანიზაციების თანამშრომლები არიან პიროვნულად ცნობილი. როცა ლოიალობაზე ვსაუბრობდი, ვგულისხმობდი პიროვნებებს, ვინც სექტორიდან ახლა  გადავიდნენ  მთავრობაში. არამგონია ცნობილ ორგანიზაციებს ასეთი საკითხი დაუდგეთ.    პოლიტიკური მოვლენები გარკვეულ ზეგავლენას ახდენს საერთაშორისო ორგანიზაციების საქმიანობაზე, თქვენი აზრით,  რა მიმართულებით შეიძლება შეცვალონ ან გადახედონ მათ არასამთავრობოების მიმართ პოლიტიკა?   ეკა გიგაური – შეიძლება გადახედონ  მიმართულებებს. ერთი ტენდენცია, რაც არჩევნების შემდეგ გამოიკვეთა ის არის, რომ ყოფილმა სახელმწიფო მოხელეებმა, მინისტრის მოადგილეებმა, თუ სხვა თანამდებობის პირებმა არასამთავრობო ორგანიზაციები ჩამოაყალიბეს და ნელ–ნელა გარკვეულ ნიშას იკავებენ. მართალი გითხრათ, მათ შორის ბევრი პატივსაცემი პიროვნებაა, რომლებიც  კანონდარღვევებში არ იყვნენ გარეულნი და ქვეყნისთვის კარგ საქმეს აკათებდნენ, თუმცა არიან ისეთი უწყებების ყოფილი თანამშრომლები, რომელთა მიმართაც ბევრი კითხვა არსებობს. ერთი მხრივ, ზოგადად, მათი გამოცდილება და ცოდნა კარგია –  თუნდაც რეფორმები ავიღოთ, ჩვენ იმდენი ინფორმაცია არ გაგვაჩნია, რაც მათ აქვთ. მეორე მხრივ, საუბარია ღირებულებებზე, ყველაზე ბუნებრივია არ ვსაუბრობ, მხედველობაში მყავს ის ადამიანები, ვისაც შეხება ჰქონდა ადამიანის უფლებების საკითხებთან, მათ შეეძლოთ გავლენა მოეხდინათ გარკვეულ საკითხებზე და არ აკეთებდნრენ ამას, ახლა კი არასამთავრობო სექტორიდან გეგმავენ ამის გაკეთებას, ამის გაგება ძნელია. შეიძლება კარგადაც გამოუვიდეთ, მაგრამ ვფიქრობ, გაუძნელდებათ ამის კეთება.   როცა ასეთი კითხვები ჩნდება, შეძლებთ მათთან, თუნდაც კონკრეტულ საკითხზე თანამშროლობას? ეკა გიგაური – როგორ არა. თუ შემოუერთდებიან ჩვენს განცხადებას, რომელიც მაგალითად სამსახურიდან უკანონოდ ვინმეს გათავისუფლებას, ან სხვა უფლებების დარღვევას ეხება, რატომაც არა. ადრეც ვამბოდით და ახლაც ვამბობთ, რომ ჩვენს ინიციატივებსა თუ განცხადებებს რაც უფრო ბევრი შემოუერთდება,  მით უკეეთესი იქნება.   დავუბრუნდეთ საერთაშორისო ორგანიზაციებს, რა მიმართულებით შეიძლება შეიცვალოს მათი პროგრამები?   ეკა გიგაური – ჩემი აზრით, სოციალურ პრობლემატიკაზე უფრო მეტს იმუშავებენ. ვფიქრობ, რომ ამ მიმართულებაზე მეტი აქცენტები უნდა გაკეთდეს. არ ვამბობ, რომ მაგალითად მართლმსაჯულების რეფორმა არ არის მნიშვნელოვანი – ამ მიმართულებით წინ სწრაფად მივდივართ – ეს დიდწილად დონორების დამსახურებაა და ასეთი საკითხებიც მნიშვნელოვანია, თუმცა ფაქტია, რომ სოციალური ფონი უნდა შეიცვალოს.   ათბალიანი შკალით რა ნიშნით შეაფასებდით არასამთავრობოების საქმიანობას?   ეკა გიგაური  – ჯამურად ხუთბალს დავუწერდი, დიდ ქალაქებში უფრო ძლიერი ორგანიზაციები არიან და მათ ცალკე 7 ბალს მივანიჭებდი, დაბებში და სოფლებში ალბათ 2–3 ბალს.   შეგიძლიათ დაგვისახელოთ სამი ღირებულება, რომელსაც უნდა ეყრდნობოდეს სამოქალაქო სექტორი...  ეკა გიგაური – მიუკერძოებლობა, სამოქალაქო აქტიურობა, ანუ მოხალისეობრივი სულისკვეთება და სახელმწიფოებრივი აზროვნება და ეროვნული ინტერესების დაცვა.   სახელმწიფოებრივ აზროვნებაში, ზოგ შემთხვევაში, გარკვეული ინფორმაციის გაუხმაურებლობასაც გულისხმობენ, თქვენ რას მოაზრებთ მასში?   ეკა გიგაური – სახელმწიფოებრივი ინტერესი არის დემოკრატია, გამჭვირვალობა, ანგარიშვალდებულება და ასე შემდეგ. სიმართლე და დემოკრატიული პრინციპები ეს სწორედ სახელმწიფოებრივი ინტერესია.

სამოქალაქო საზოგადოების წინაშე არსებული გამოწვევები, მისი წარსული, აწმყო და მომავალი – ეს ის საკითხებია, რომელზეც  ფონდ „ღია საზოგადოება – საქართველოს" აღმასრულებელ დირექტორს, ქეთი ხუციშვილს ვესაუბრეთ. ესაუბრა ლალი შალვაშვილი ქალბატონო ქეთი, „სამოქალაქო საზოგადოების", როგორც ტერმინის შესახებ, სხვადასხვა შეხედულება არსებობს, თქვენ როგორ განმარტავთ? ქეთი ხუციშვილი – ტერმინი „სამოქალაქო საზოგადოება" ჯერ კიდევ ძველ საბერძნეთში გაჩნდა. არისტოტელე პოლისს მოიხსენიებდა „ასოციაციათა ასოციაციად" და შემდგარ ერთეულად თვლიდა, თუ მის ცხოვრებაში ყოველი თავისუფალი მოქალაქე იყო აქტიურად ჩართული. რაც შეეხება ტერმინის თანამედროვე გაგებას – იგი უფრო გვიან ჩამოყალიბდა,  მე–18 საუკუნის ფილოსოფოსების ადამ ფერგუსონის, თომას პეინის ტრაქტატებში და ბოლოს კრისტალიზდა მე–19 საუკუნის ფრანგი მოაზროვნის ალექსის დე ტოკვილის შრომებში. მან ამერიკაში მოგზაურობის შემდგომ დაწერა შრომა, რომელიც დემოკრატიის და სამოქალაქო საზოგადოების განვითარების თემაზე  კლასიკად იქცა. თანამედროვე კონტექტსტში ტოკვილმა  პირველმა დაიწყო საუბარი, თუ რა მნიშვნელოვანია სახელმწიფოსა და ადამიანს შორის არსებობდეს ინტერესების, საჭიროებების, საქმიანობის მიხედვით, თუ სხვა პრინციპით შექმნილი თავისუფალი ასოციაციები, რაც, მისი აზრით, ადამიანს იცავს პოტენციური დიქტატურისგან ან დესპოტიზმისგან, განაპირობებს პიროვნების თავისუფალ განვითარებას საზოგადოებაში და ამავე დროს აკავშირებს მას სახელმწიფოსთან. სამოქალაქო საზოგადოების კონცეფცია მე-20 საუკუნეშიც განაგრძობდა განვითარებას და განსაკუთრებით აქტუალური გახდა მას შემდეგ, რაც დემოკრატიზაციის ახალი ტალღა და საბჭოთა სისტემის რღვევა დაიწყო. 90-იან წლებში, ერთი მხრივ, აღმოსავლეთ ევროპაში შეიქმნა თავისუფალი ქვეყნები და მეორე მხრივ, ყოფილი საბჭოთა კავშირის სივრცეში გაჩნდა პოტენცია თავისუფალი ქვეყნების შექმნისა. სწორედ ამ პერიოდში გამახვილდა ყურადღება სამოქალაქო საზოგადოებზე, როგორც უშუალოდ ამ ქვეყნებში, ასევე დონორ ქვეყნებში, რადგან დონორი ქვეყნებისთვისაც უფრო ადვილი და მისაღები იყო სამოქალაქო საზოგადოების განვითარებისთვის დახმარების გაწევა, ვიდრე პოლიტიკური პარტიების ან სხვა ჯგუფებისთვის. ამავე დროს თავი იჩინა აღმოსავლეთ ევროპაში  ახალმა შეხედულებამ სამოქალაქო საზოგადოების შესახებ, კერძოდ, რომ სამოქალაქო საზოგადოება არ არის მხოლოდ სახელმწიფოსა და პიროვნების დამაკავშირებელი სივრცე, ეს არის ის, რაც იცავს პიროვნებას სახელმწიფოსგან და აძლევს მას საშუალებას უკეთ დაიცვას სხვათა უფლებები. დღეს, როცა სამოქალაქო საზოგადოებაზე ვსაუბრობთ, ძირითადად, მეტ აქცენტს ვაკეთებთ უშუალოდ საზოგადოებრივ ორგანიზაციებზე, თუმცა სამოქალაქო საზოგადოება უფრო მეტია, ვიდრე საზოგადოებრივი ორგანიზაციები. ტერმინის ირგვლივ კვლავ გრძელდება დისკუსია, რომელიც განსაკუთრებით გააქტიურდა ბოლო 2-3 წლის მანძილზე, როცა ახლო აღმოსავლეთში, მაგ. ეგვიპტეში დაიწყო სოციალურ თუ ადამიანის უფლებებზე ორიენტირებული დიდი მოძრაობა, რომელშიც საზოგადოების ფართო ჯგუფები ჩაერთო.  ახალმა დისკუსიამ დააყენა საკითხი – ზედმეტად ხომ არ დავიწროვდა ტერმინი და დონორებმაც ხომ არ მოახდინეს ზედმეტი აქცენტირება საზოგადოებრივი ორგანიზაციების დახმარებისა, მაშინ როცა ნაკლები ყურადღება მიექცა საზოგადოებაში სხვა ტიპის, ბუნებრივად წარმოშობილ მოძრაობებს. რა თქმა უნდა, ეს დისკუსია დღეს და ხვალ ვერ დასრულდება, ამას დიდი დრო სჭირდება. ჩვენთანაც საჭიროა ამ საკითხს ჩაღრმავებული განხილვა. სამოქალაქო საზოგადოებისთვის საზოგადოებრივი ორგანიზაციები გარკვეულ ინსტრუმენტს წარმოადგენს, რათა თავისი პოზიცია, შეხედულება წარმოაჩინოს და დაიცვან, ვისაუბროთ კიდევ რა როლს ასრულებენ საზოგადოებრივი ორგანიზაციები სამოქალაქო საზოგადოების განვითარების საქმეში. ქეთი ხუციშვილი – საზოგადოებრივ ორგანიზაციებს მნიშვნელოვანი როლი ეკისრებათ საზოგადოების განვითარებაში, განსაკუთრებით ჩვენი ტიპის ქვეყნებში, რადგან ორგანიზაციები ორიენტირებულნი არიან კონკრეტულ საკითხებზე, ეს შეიძლება იყოს სოციალური, ადამიანის უფლებების, კანონის უზენაესობის საკითხები, ისინი კონცენტრირებულად ცდილობენ მათ დამუშავებას, შესაბამის სფეროებში პოლიტიკის ნარკვევების შემუშავებას, ასევე ადვოკატირებას. ჩემი აზრით, ეს ყველა ფუნქცია და მიმართულება ძალიან მნიშვნელოვანია. ჩვენი საზოგადოება ვითარდება და განვითარება რომ რაციონალური იყოს, ის მთელი პოტენციალი, რაც დაგროვილია საზოგადოებრივ ორგანიზაციებში გამოყენებულ უნდა იქნას. საზოგადოებრივ ორგანიზაციებს ის როლიც ეკისრებათ, რომ თავის წიაღში ჩამოყალიბებული იდეები, კონცეფციები, პოლიტიკის ნარკვევები მაქსიმალურად მიიტანონ ერთი მხრივ ხელისუფლებასთან, მეორე მხრივ, ფართო საზოგადოებასთან. პოლიტიკის ნაკრვევები, რომლებიც მიმართულია ამა თუ იმ სფეროს რეფორმირებასა და რაციონალურ დალაგებაზე, რა თქმა უნდა, ყოველთვის არა, მაგრამ გარკვეულ შემთხვევებში არის გათვალისწინებული. მაგრამ, როცა საქართველოზე ვსაუბრობთ, ხშირად ორგანიზაციები მეტად ურთიერთობენ ერთმანეთთან, დონორებთან, ხელისუფლებასთან,  რიგ შემთხვევებში კრიტიკულად და პრინციპულადაც, მაგრამ ნაკლები კავშირი აქვთ ფართო საზოგადოებასთან. ხშირად ისინი არ წარმოადგენენ რომელიმე სოციალურ ჯგუფს, ან არ აქვთ პირდაპირი მჭიდრო კავშირი მათთან, ხშირად საზოგადოებრივი ორგანიზაცია შეიძლება ძალიან აქტიური იყოს, ან ძალიან მნიშვნელოვან საქმეს აკეთებდეს, მაგრამ ფართო საზოგადოებამ ნაკლები იცოდეს ამის შესახებ. თქვენი აზრით, რა არის მიზეზი?  ქეთი ხუციშვილი – უპირველესად, საზოგადოების უფრო ფართო ფენები უნდა ჩაერთონ სამოქალაქო საზოგადოების მნიშვნელობისა და საჭიროების შესახებ დისკუსიებში, ისევე, როგორც თავად  საზოგადოებრივი ორგანიზაციების საქმიანობაში. ხშირად სამოქალაქო ორგანიზაციების საქმიანობა და მიზანი სამოქალაქო აქტივობის გაზრდაა და როდესაც აქტივობის გაზრდაზე ვსაუბრობთ, უფრო მეტი ურთიერთქმედება უნდა იყოს საზოგადოების ფართო ფენებთან. რა თქმა უნდა, ამის რეცეფტი არ არსებობს. მაინც ჩაგეკითხებით, რატომ ვერ ხერხდება საზოგადოების უფრო ფართოდ ჩართვა საზოგადოებრივი ორგანიზაციების საქმიანობაში? ქეთი ხუციშვილი –  მიზეზი სხვადასხვაა. ერთი, რომ ყოველ მოცემულ მომენტში ხელისუფლებასაც არ აქვს დიდი ინტერესი, რომ საზოგადოებრივი ორგანიზაცია ადვილად და პირდაპირ მივიდეს საზოგადოების ფართო ფენებთან, მეორე – საზოგადოება უფრო ეკონომიკური, სოციალური საკითხებით ინტერესდება, ვიდრე ვთქვათ ადამიანის უფლებებით, დემოკრატიის განვითარებით, ეკოლოგიით ან სხვა საკითხებით, რომლებზეც მუშაობენ საზოგადოებრივი ორგანიზაციები. რა თქმა უნდა, ეს იმასაც ნიშნავს, რომ მეტად უნდა გავითვალისწინოთ ყოველი პერიოდის საჭიროება, თუ საზოგადოებისთვის წარმმართველი არის სოციალური და ეკონომიკური საკითხები, მეტმა ორგანიზაციამ უნდა იმუშაოს ამ თემებზე. ამ აქტუალურ თემებზე, ერთი მხრივ ორგანიზაციებმა უნდა გაამახვილონ ყურადღება, მეორე მხრივ, დონორებმა, რადგან როცა საქართველოს საზოგადოებრივ ორგანიზაციებზე ვსაუბრობთ, სამწუხაროდ, მათი დახმარება მხოლოდ საერთაშორისო დონორების საშუალებით ხერხდება. იდეალური იქნებოდა, რომ ქვეყანაშიც იყვნენ ადგილობრივი დონორები, რომლებიც დააფინანსებენ საზოგადოებრივი ორგანიზაციების საქმიანობას. სწორედ ასეთ შემთხვევებში გაიზრდება საქველმოქმედო, სოციალურ საკითხებზე ორიენტირებული პროექტების რაოდენობა. ქალბატონო ქეთი, თქვენი დაკვირვებით და შეხედულებით, რას მიაღწია საქართველოში სამოქალაქო საზოგადოებამ? ქეთი ხუციშვილი – სამოქალაქო საზოგადოებამ საქართველოში 90-იანი წლებიდან განვითარების რამდენიმე ეტაპი განვლო. 2003 წლამდე იგი ძალიან განვითარებული ჩანდა, თუმცა ეხლა ვხვდებით რომ ეს ნაწილობრივ ილუზია იყო და ესოდენ ძლიერი იგი სუსტი სახელმწიფო აპარატის ფონზე ჩანდა. ეს იყო გარკვეული ნიშა ინტელექტუალური ადამიანებისთვის და სწორედ აქ მოხდა ნიჭის, ინტელექტისა და აქტიურობის კონცენტრაცია. 2003 წელს სიტუაცია შეიცვალა – სამოქალაქო ლიდერების ნაწილი ხელისუფლებაში წავიდა, ნაწილი ოპოზიციაში, ცოტა მოგვიანებით, აგრეთვე აკადემიურ წრეებში. თავისთავად ეს დრამატული კი არა, ბუნებრივი პროცესია და ასეც უნდა მომხდარიყო. შეიძლება ითქვას, რომ ზედმეტი ენერგია იყო დაგროვილი სამოქალაქო სექტორში და მოხდა მისი გადინება–გადანაწილება. მიუხედავად იმისა, რომ ხელისუფლებაში ბევრი ჩვენი კოლეგა მივიდა, ხელისუფლებასთან ურთიერთობა არცთუ ადვილი აღმოჩნდა. განსაკუთრებით, „რევოლუციის" შემდეგ პირველ წლებში ხელისუფლების მხრიდან მიუღებლობა იყო კრიტიკის, რეკომენდაციების,  იყო დამოკიდებულება – „ჩვენ ყველაფერი ვიცით, თქვენი რჩევები არ გვჭირდება...." შესაბამისად, არ მოხდა სამოქალაქო სექტორში არსებული რესურსის გამოყენება. ბოლო წლებში ეს სიტუაცია გარკვეულად იცვლება, სამოქალაქო საზოგადოებაში მოვიდნენ ახალი ლიდერები ახალი იდეებით და  პრინციპებით. სხვათა შორის, არც ერთი ქვეყნის ხელისუფლება არ არის კრიტიკის მისაღებად მზად, მაგრამ ბოლო წლებში ხელისუფლებას მაინც უწევს სამოქალაქო საზოგადოების რეკომენდაციების გათვალისწინება, ხშირად არა, მაგრამ მაინც უწევს გარკვეული დიალოგი სამოქალაქო საზოგადოებასთან და იმედი მაქვს ეს უფრო ხშირი იქნება. ბოლო წლებში სამოქალაქო ორგანიზაციებმა მოახერხეს, წინ წამოეწიათ ადამიანის უფლებათა დაცვის თემები და დაეცვათ კონკრეტული მოქალაქეების უფლებები, გამოევლინათ საკუთრების უფლების დარღვევები და წვლილი შეეტანათ მათ აღდგენაში, ხელი შეეწყოთ მედიის მესაკუთრეობის მეტი გამჭვირვალობისთვის, და სხვა. თუმცა ამ სფეროებშიც და სხვებშიც კიდევ ბევრია სამუშაო. თქვენს მიერ დასმული საკითხების გარდა, რას ვერ მიაღწია სამოქალაქო საზოგადოებამ? ქეთი ხუციშვილი – ჯერ ვერ მივაღწიეთ ისეთი სტაბილური საზოგადოების შექმნას, რომელიც შეძლებს კონფლიქტებისა და დრამატული ცვლილებების გარეშე  განვითარდეს, ვერ მოვახერხეთ რომ ხელისუფლების ცვლილება ხდებოდეს არჩევნების გზით მშვიდობიანად და დემოკრატიულად, მაშინ როცა არჩევნები და საარჩევნო გარემო ერთ–ერთი მნიშვნელოვანი საქმეა საზოგადოებრივი ორგანიზაციებისთვის. თვითონ სამოქალაქო საზოგადოება სწორედ იმისთვის არის, რომ ქვეყანა ვითარდებოდეს მშვიდობიანი ცვლილებების, კონსტიტუციითა და კანონმდებლობით განსაზღვრული ნორმების გზით. სამოქალაქო საზოგადოების სიძლიერე მაშინ გამოჩნდება, როცა ამდაგვარი ცვლილებების უზრუნველყოფა მოხდება; არა იმ გზით, რომ სამოქალაქო საზოგადოება პოლიტიზირდეს და თავად იკისროს პოლიტიკური პარტიების როლი, არამედ მან უნდა შექმნას სივრცე, სადაც ყოველ ადამიანს ექნება საშუალება ერთი მხრივ, სიმპათია–ანთიპათიის გაცხადებისა, მეორე მხრივ, თავისი არჩევანის გაკეთებისა და რა თქმა უნდა, იმ ინტერესის გატარებისა, რომელიც მას აქვს. რა გავლენას ახდენს დროის ფაქტორი ყოველივეზე? საკმარისი იყო დრო ამისთვის? ქეთი ხუციშვილი – სამოქალაქო საზოგადოების თეორეტიკოსები ამბობენ, რომ თავისთავად ძლიერი სამოქალაქო საზოგადოებაც კი არ არის დემოკრატიის გარანტი, მაგრამ ძლიერ სამოქალაქო საზოგადოებას თავისი წვლილის შეტანა შეუძლია ქვეყნის დემოკრატიულ და მშვიდობიან განვითარებაში. ჩვენი ტიპის ორგანიზაცია ვერ შეძლებს პრინციპულად ბევრი რამის შეცვლას ქვეყანაში, მაგრამ სამოქალაქო საზოგადოების განვითარებაში შეიტანს წვლილს. ჩვენთან არსებულ სიტუაციას თუ შევადარებთ სხვა ქვეყნებს, თუნდაც ჩვენს მეზობელ ქვეყნებს, რომლებსაც დიდ პატივს ვცემთ, ჩვენი სამოქალაქო საზოგადოება უფრო აქტიურია, საზოგადოებრივი ორგანიზაციები უფრო სერიოზულ როლს ასრულებენ – მათ შეუძლიათ წარმოაჩინონ და გამოიტანონ საჯაროდ პრობლემა და გადაწყვეტის გზებიც შესთავაზონ ხელისუფლებას. იმის თქმა, რომ საზოგადოებრივი ორგანიზაციები როლს არ ასრულებენ, არასწორია, შეიძლება მათი საქმიანობის შედეგები ყოველთვის არ არის იდეალური, მაგრამ მათი როლი მნიშვნელოვანია. ქალბატონო ქეთი რა უნდა გაკეთდეს მომავალში სამოქალაქო საზოგადოების განვითარებისთვის? ქეთი ხუციშვილი – ჩემი აზრით, ბევრი რამ. ერთი მხრივ, დონორებსაც თავისი პასუხისმგებლობა აქვთ – მათ თავისი კონცეფციებიდან და თვალთახედვიდან გამომდინარე კი არ შეუწყონ ხელი ამა თუ იმ ტიპის პროექტების განხორციელებას, არამედ კარგად გაერკვნენ ქვეყნის საჭიროებებსა და ადგილობრივ სპეციფიკაში. უნდა ვაღიაროთ, რომ დონორები ხშირად შეიმუშავებენ თავის პრიორიტეტებს და  ძალაუნებურად საზოგადოებრივ ორგანიზაციებსაც უწევთ აღნიშნული პრიორიტეტების მორგება. ყოველი ახალი სტრატეგია თუ კონცეფცია უნდა ითვალისწინებდეს ადგილობრივ საჭიროებას, ამიტომ პროცესი ორმხრივი, ინტერაქტიული უნდა იყოს – ჩართული უნდა იყვნენ საზოგადოებრივი ორგანიზაციები. თავად ორგანიზაციებმა კი მაქსიმალურად ფართოდ უნდა გაშალონ საზოგადოებათან ურთიერთობა, დააინტერესონ მოქალაქეები თავიანთი საქმიანობით და მეტად ჩართონ, მისცენ მოქალაქეებს აქტიურობის შესაძლებლობა. საქართველოში მოხალისეობის საკმაოდ დიდი პოტენციალია, რაც 2008 წლის ომის დროს  კარგად გამოჩნდა. თბილისში არ დარჩენილა ოჯახი, რომ დევნილებისთვის დახმარება არ გაეწია. ამ პოტენციალის გააქტიურება უნდა მოხდეს, თანაც ისე, რომ ადამიანმა თავისი საქმიანობის შედეგი დაინახოს. გარდა ამისა, საზოგადოებრივ ორგანიზაციებს უფრო მეტი ძალისხმევა სჭირდებათ ერთმანეთთან კოორდინირებული, კოალიციური მუშაობისთვის. როცა არის საერთო მიზანი, კოალიციის შექმნას ცალკეული ინტერესები, გრანტის მოპოვების სურვილი არ უნდა უშლიდეს ხელს. გასაგებია, რომ სფეროში დიდი კონკურენციაა, მაგრამ როცა ქვეყნისა და საზოგადოების საჭიროებაა, უნდა მოხერხდეს საკუთარი ინტერესების გვერდზე გადადება. ასევე მნიშვნელოვანია სექტორის დივერსიფიცირება, რაც ისედაც დაწყებულია – ორგანიზაციები მუშაობენ სოციალურ, ადამიანის უფლებებისა და სხვა სფეროების მიმართულებით. ეს პროცესი უნდა გაგრძელდეს. უნდა შეიქმნას ბევრი კვლევითი ორგანიზაცია, რადგან მათი მნივშვნელობა ქვეყნის მომავალი პოლიტიკის შემუშავებაში, სტრატეგიული კვლევების განსაზღვრაში დიდია. რაც მთავარია საზოგადოება უნდა იყოს ღია, გახსნილი, აქტიური და ჩართული ქვეყნის განვითარებაში, ამავე დროს მიმღები და ტოლერანტული უმცირესობისადმი. სამწუხაროდ, ჩვენთან ეს პრობლემაც დგას და ვერ ვიტყვი, რომ ბოლო წლებში უფრო მეტად არის იგი მოგვარებული. ანუ მიმღებლობა განსხვავებული ჯგუფებისადმი – ეს არის ის, რაც საზოგადოებას სჭირდება და საზოგადოებრივი ორგანიზაციები მეტად უნდა ემსახურებოდნენ ამ საკითხებს, რადგან ამის გარეშე, ჩვენ, როგორც სახელმწიფო ვეღარ განვითარდებით. ერთი მხრივ, უნდა მოხდეს უმრავლესობის აქტიურად ჩართვა საზოგადოებრივ ცხოვრებაში, მაგრამ ამავე დროს, თუ არ მოხდა ყველა ტიპის უმცირესობის ინტერესების გათვალისწინება და მათდამი ღიაობა, მომავლის ქვეყნად ვერ ვიქცევით. ამავე დროს, ყოველ მოცემულ მომენტში, საზოგადოება უნდა იყოს ის სივრცე, ინსტრუმენტი, სადაც კონფლიქტები დისკუსიით, მშვიდობიანი გზით მოგვარდება. შეგიძლია გვითხრათ ის სამი მთავარი ღირებულება, რომელსაც სამოქალაქო საზოგადოება უნდა ატარებდეს, ეფუძნებოდეს... ქეთი ხუციშვილი – სამოქალაქო საზოგადოება ლიბერალური ღირებულებების მატარებელი უნდა იყოს: კანონის უზენაესობა, ადამიანის უფლებების და თავისუფალი განვითარების უპირატესობა და ტოლერანტობა.

ამ საკითხებზე საქართველოში ევროკავშირის წარმომადგენელს ოლივერ რაისნერს ვესაუბრე ესაუბრა ლალი შალვაშვილი ბატონო ოლივერ, „სამოქალაქო საზოგადოება", როგორც ტერმინი ხანგრძლივი დისკუსიის საგანია, თქვენ როგორ განმარტავთ? ოლივერ რაისნერი – სამოქალაქო საზოგადოება ეს არის კოლექტიური აქტორი, კოლექტიური მოთამაშე. ქვეყნებისა და საზოგადოებების სპეციფიკიდან გამომდინარე იგი განსხვავებულია სხვადასხვა ქვეყანაში. მთავარი იდეა ის არის, რომ იგი შუამავალი, შუა რგოლია სახელმწიფოსა და მოქალაქეებს შორის საზოგადოებრივი ორგანიზაციების, ასოციაციების, პროფკავშირების სახით. რაც შესაძლებლობას აძლევს მოქალაქეს გამოხატოს თავისი აზრი ან აქტიურად ჩაერთოს სხვადასხვა სფეროში – იქნება ეს რელიგიური გაერთიანება, პროფკავშირები, გარემოს დაცვა თუ სხვა სფერო, რომელსაც მოქალაქე საჭიროების მიხედვით ირჩევს. ანუ, საზოგადოებრივი ორგანიზაცია ეს არის ერთგვარი ინსტრუმენტი, საშუალება, რომ საზოგადოება ჩაერთოს სხვადასხვა სფეროს საქმიანობაში და თავისი მოსაზრება მიიტანოს ხელისუფლებამდე, ან ჩაერთოს დიალოგში? ოლივერ რაისნერი – ხელისუფლებასა და მოქალაქეებს შორის დიალოგისას საჭირო და აუცილებელია, რომ მხოლოდ საზოგადოების ერთი ფენის, ან ელიტების ინტერესები არ იყოს წარმოჩენილი, დიალოგის პროცესში საზოგადოების ყველა ფენა, ჯგუფი უნდა იყოს ჩართული. თქვენ უკვე აღნიშნეთ. რომ  სამოქალაქო საზოგადოება ქვეყნების მიხედვით განსხვავებულია და ამას ბევრი რამ განაპირობებს, თქვენი აზრით, საქართველოში რას მიაღწია სამოქალაქო საზოგადოებამ... ოლივერ რაისნერი – 1994 წელს, როდესაც ჩემი დისერტაციის მასალების მოსაგროვებლად ჩამოვედი საქართველოში, საზოგადოებრივი ორგანიზაციები ცოტა იყო. მაშინ ეს გასაგები იყო, რადგან საბჭოთა წყობა სამოქალაქო საზოგადოებას, როგორც დამოუკიდებელ აქტორს, დამოუკიდებელ მოთამაშეს საერთოდ არ ითვალისწინებდა. 1994 წელს ჯერ კიდევ ძნელი იყო საბჭოთა მემკვიდრეობის გადალახვა. დღეს კი, სხვადასხვა სფეროში მუშაობენ სხვადასხვა შესაძლებლობების საზოგადოებრივი ორგანიზაციები. სფეროებისა და რეგიონების მიხედვით მათი განვითარების და შესაძლებლობის დონე სხვადასხვაა, მაგალითად, გარემოს დაცვის საკითხებში საკმაოდ ძლიერები არიან, სოციალურ სფეროში – ადგილებზე ძლიერები, ხოლო ამ სფეროში პოლიტიკის შემუშავების საკითხებში არც ისე. ყოველივე ეს, ჩემ გამოცდილებას, დაკვირვებას და სხვადასხვა კვლევებიდან მიღებულ ინფორმაციას ეფუძნება. ჩემი აზრით, საფუძვლიანად ჯერ კიდევ არ ვიცით რა დონეზეა საქართველოში სამოქალაქო საზოგადოება, რადგან ჩვენს ხელთ არსებული სხვადასხვა კვლევა განვითარების ცალკეულ მიმართულებებს შეისწავლის. ერთ–ერთმა კვლევამ აჩვენა, რომ დღეს საკმაოდ ძლიერია სახელმწიფო სტრუქტურები, სამოქალაქო საზოგადოება არც ისე ძლიერი, რომ თანაბარი დიალოგის მონაწილე იყოს. ამას სხვადასხვა პრობლემა, თუ მიზეზი განაპირობებს. ჯერ ერთი საზოგადოებრივი ორგანიზაციები არ არიან წევრობაზე დაფუძნებულნი, თავად ორგანიზაციები არ არიან მიჩვეულნი, რომ მოქალაქეები ჩართონ საქმიანობაში, ხოლო ამ უკანასკნელთ არ აქვთ უნარ–ჩვევები ჩაერთონ და გამოხატონ თავიანთი შეხვედულება. არადა, ჩართულობის ხარისხი ძალიან მნიშვნელოვანია, თბილისში უფრო ჩართულია მოსახლეობა, ვიდრე რეგიონებში, სადაც რესურსები შეზღუდულია და მოქალაქისთვის მთავარი საარსებო საშუალებების შოვნაა. შეიმჩნევა რეგიონების მიხედვით საზოგადოებრივი ორგანიზაციების განვითარების სხვაობაც, ამაზე ჩვენს კონკურსებზე შემოსული საპროექტო განაცხადებიც მეტყველებს, ანუ საიდან უფრო მეტი განაცხადი შემოდის. აქტიურია აჭარა, გურია, დანარჩენი რეგიონები ნაკლებად აქტიურნი. თქვენი აზრით,  რა განპირობებს რეგიონების მიხედვით განვითარების სხვადასხვა დონეს? ასევე წევრობაზე დაფუძნებული საზოგადოებრივი ორგანიზაციების სიმცირე ახსენეთ, რატომ ვერ ხერხდება რომ ამ მოდელზე დაფუძნებული ბევრი ორგანიზაცია იყოს? ოლივერ რაისნერი – საჭიროა რომ უფრო მეტი ადამიანი იყოს ჩართული. თუმცა ამას რამდენიმე მიზეზი განაპირობებს. ერთ–ერთი ისიცაა, რომ საქართველოში, ამ კუთხით გამოცდილება არ არსებობს, გავრცელებულია ისეთი სტერეოტიპი, რომ სახელმწიფომ, მთავრობამ უნდა იმოქმედოს და მიხედოს მოქალაქეს, და არა თვითონ მოქალაქემ მიხედოს საკუთარ თავს, თითქოს მოვა „პატრონი" და ჩვენს მაგივრად მოაგვარებს ყველაფერს. ეს დაკავშირებულია სამოქალაქო ცნობიერებასთან. არის კიდევ მთელი რიგი მიზეზები – სოციალურ–ეკონომიკური პრობლემები, როცა ადამიანი მთელი დღე მუშაობს, მას არ რჩება სხვა აქტივობისთვის რესურსი, არიან ისეთებიც, ვისაც სურვილი აქვთ რომ ჩაერთონ, მაგრამ არ იციან სად მივიდნენ, ან თვითორგანიზების უნარი არ აქვთ. ჯერ კიდევ წერა–კითხვის გამავრცელებელი საზოგადოების საქმიანობის დროსაც, 100 წლის წინაც, პრობლემური იყო წევრობის საკითხი, ამის შესახებ ჩემს დისერტაციაშიც დავწერე. მოკლედ, იმის თქმა მინდა, რომ ყოველივეს ერთი კი არა, პრობლემების მთელი პაკეტი განაპირობებს, თუმცა მიმაჩნია, რომ დეტალურად ჯერ შესწავლილი ბოლომდე არ არის თუ როგორია საქართველოში სამოქალაქო საზოგადოება. როგორც უკვე აღვნიშნეთ, არის კვლევები, მაგრამ იგი ცალკეულ მიმართულებებს ასახავს და არ არის ბოლომდე შესწავლილი სამოქალაქო საზოგადოების განწყობები, ღირებულებები. მე–20 საუკუნის დასაწყისში კოოპერაციები იქმნებოდა, ისინი წევრობაზე იყო დაფუძნებული, არა?... თუ არ ვცდები თქვენ დისერტაციაში ამ საკითხსაც შეეხეთ? ოლივერ რაისნერი – მე–20 საუკუნის დასაწყისში, სოფლებში იქმნებოდა კოოპერაციები, რომელიც მიმართული იყო იმ დროის ყველაზე მტკივნეული საკითხის მოსაგვარებლად, ეს იყო საზოგადოების თვითორგანიზების ფორმა. საერთო პრობლემური საკითხის ირგვლივ ფართომასშტაბიანი მოძარობები ჩამოყალიბდა, გავლენა იქონია იმანაც, რომ მაშინდელი ელიტებისა და გლეხების ინტერესი ერთმანეთს დაემთხვა. ფეოდალური საზოგადოების გარემოში უფრო აქტიური იყო სამოქალაქო საზოგადოება, ვიდრე 90–იანი წლების დასაწყისში, როცა გამოხატვის ყველაზე მთავარი ფორმა იყო მიტინგი, ან შიმშილობის აქცია, იმიტომ რომ სხვა ფორმები არ იცოდნენ. პრაქტიკულად ყველაფერი ნულიდან დაიწყო, ახლა უკვე დიფერენცირებული სამოქალაქო სექტორი არსებობს, რომელიც თანდათან იზრდება. ქვეყნისა და საზოგადოების სპეციფიკა ბევრ რამეს განსაზღვრავს, ამის შესახებ ზევით ისაუბრეთ, მაინც ჩაგეკითხებით კიდევ რა უნდა გაკეთდეს? ოლივერ რაისნერი – ერთ–ერთი მთავარი არის ღირებულებათა საკითხი, საზოგადოებრივი ორგანიზაციები სხვადასხვა ღირებულებებს შეიძლება ეფუძნებოდნენ, მათ შორის შეიძლება იყოს ღირებულებათა ჭიდილი, მაგრამ აუცილებელია იმ მექანიზმების დამკვიდრება, რომელიც დიალოგს უზრუნველყოფს. მაგალითად, დღეს ძლიერია სარწმუნოება, ეს რას ნიშნავს პრაქტიკაში და ა.შ. ეს და მსგავსი საკითხები აქტიურად უნდა შუქდებოდეს მედიაში. რა თქმა უნდა, როცა დიალოგზე ვსაუბრობთ სამოქალაქო საზოგადოების ყველა წევრის ჩართვის შესაძლებლობა უნდა არსებობდეს. საზოგადოება გაძლიერდება ღირებულებათა ჭიდილისას კონფლიქტების გადალახვისა და შეთანხმებების მიღწევის გზით. ბატონო ოლივერ, შეგიძლიათ დაგვისახელოთ სამი მთავარი ღირებულება, რომელსაც უნდა ეფუძნებოდეს, თქვენი აზრით, სამოქალაქო საზოგადოება... ოლივერ რაისნერი – სამოქალაქო საზოგადოება უნდა იყოს მომთმენი  და ტოლერანტული, მას მაღალი ხარისხის პასუხისმგებლობა უნდა ჰქონდეს არა მარტო ოჯახისა და ახლობლების წინაშე, არამედ სოფლის, თემის,მუნიციპალიტეტის, ქალაქისა და ქვეყნის წინაშე. ეს მხოლოდ სიტყვით კი არა საქმით უნდა გამოიხატებოდეს. მესამე და ასევე მთავარი მოქალაქეთა ჩართულობაა, რომლის გარეშეც ვერ იარსებებს სამოქალაქო საზოგადოება.

სამოქალაქო საზოგადოების ინსტიტუტი გთავაზობთ დოკუმენტურ ფილმს საქართველოში სამოქალაქო საზოგადოებისა და საზოგადოებრივი ორგანიზაციების შესახებ. ფილმის მიზანია კიდევ ერთხელ შეახსენოს ფართო საზოგადოებას რა როლი და ფუნქცია აქვს სექტორს საზოგადოების ცხოვრებაში, როგორ მოვიდა დღემდე, რა ხდება დღეს და რა პერსპექტივები და გამოწვვებია მესამე სექტორის წინაშე. სამოქალაქო საზოგადოების ინსტიტუტისთვის დიდი პატივია გამოთქვათ მოსაზრებები აღნიშნულ საკითხებზე.