თბილისი. „ადამიანის უფლებების სწავლებისა და მონიტორინგის ცენტრი“ (EMC), რომელიც მალხაზ მაჩალიკაშვილის ძმისშვილის, 26 ივლისს დაკავებული მორის მაჩალიკაშვილის ინტერესებს იცავს, განცხადებას ავრცელებს.  „ამ ეტაპზე საგამოძიებო ორგანოს მიერ წარმოდგენილი საქმის მასალები ვერ ქმნის დასაბუთებულ ვარაუდს იმის თაობაზე, რომ მორის მაჩალიკაშვილმა განახორციელა ჯგუფურ ძალადობაში მონაწილეობა, მით უფრო ადგილზე მყოფ პოლიციის თანამშრომლებზე თავდასხმა ან რაიმე სხვა ძალადობრივი ქმედება. 20-21 ივნისს პარლამენტის წინ გამართული აქციის დროს მიმდინარე მოვლენები პროკურატურის მხრიდან დეტალურ ფაქტობრივ და სამართლებრივ შეფასებას მოითხოვს. პროკურატურამ მკაფიოდ უნდა გამიჯნოს აქციის მონაწილეების ნაწილის მიერ განხორციელებული ძალადობრივი ქცევა, შეკრების იმ მონაწილეების ქცევისგან, რომლებიც პოლიციასა და აგრესიულ აქციის მონაწილეების ნაწილს შორის მომხდარ დაძაბულობასა და ჭყლეტაში მოჰყვა და სპონტანური ქცევა და თვითგადარჩენის მდგომარეობაში ყოფნა უწევდა. ამ მოცემულობას, მათ შორის, ქმნიდა პოლიციის მიერ მასების მართვისთვის გამოყენებული არასათანადო სტრატეგია, რომელიც აქციის მონაწილეებს საკუთარი ქცევის სათანადო კონტროლის შესაძლებლობას უკარგავდა“, - ვკითხულობთ განცხადებაში.  სრულად...   წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) მალხაზ მაჩალიკაშვილისთვის პარლამენტის წინ კარვის განთავსების აკრძალვას ეხმაურება. „EMC მიიჩნევს, რომ მალხაზ მაჩალიკაშვილისთვის პარლამენტის წინ კარვის დადგმის უალტერნატივო აკრძალვა შეკრების თავისუფლების ხელყოფას წარმოადგენს და საქართველოს კანონმდებლობას ეწინააღმდეგება“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) გთავაზობთ, 2019 წლის მაისის ფორუმის „სოციალური სამართლიანობა კრიზისის დროს” ფარგლებში წაკითხული მოხსენებების ვიდეოჩანაწერს. „ლუკა ნახუცრიშვილმა, თამთა ხალვაშმა, გიორგი მაისურაძემ და შოთა პაპავამ ისაუბრებს სვანების ფიცის სიმტკიცეზე, სეკულარიზმის ზღუდეებზე, სამხრეთის თვითხატზე საქართველოში და ევროცენტრიზმსა და პროგრესულ რასიზმზე”, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, ზურაბ ვაზაგაშვილის სიცოცხლის უფლების დარღვევაზე სტრასბურგის სასამართლომ საქართველოს პასუხისმგებლობა დააკისრა. „წინამდებარე საქმეზე ევროპულმა სასამართლომ ევროპული კონვენციის მე-2 მუხლის (სიცოცხლის უფლება) არსებითი ნაწილის დარღვევა დაადგინა და განმარტა, რომ ეროვნულ დონეზე მიმდინარე პროცესების დროს სასამართლოებმა ცხადად აღნიშნეს, რომ სპეცოპერაციის დროს პოლიციელები ოფიციალური სტატუსით მოქმედებდნენ, შესაბამისად, ზურაბ ვაზაგაშვილის მკვლელობა სახელმწიფოს შეერაცხებოდა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საზოგადოებრივი ორგანიზაციების ნაწილი, ეხმაურება „რუსთავი 2“-თან“ დაკავშირებულ ვითარებას. „არსებული რეალობის გათვალისწინებით, მნიშვნელოვანია, რომ ტელეკომპანია „რუსთავი 2“-ის ახალი მფლობელისა და მენეჯმენტის მიერ უზრუნველყოფილი იყოს ჟურნალისტების სარედაქციო დამოუკიდებლობა და მათთვის  საკუთარი სინდისის შესაბამისად სარედაქციო გადაწყვეტილების მიღების შესაძლებლობა. ასევე, გარანტირებული უნდა იყოს მაუწყებლის თანამშრომლების შრომითი უფლებების დაცვა შესაბამისი ეფექტური მექანიზმების შემოღებით“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. „ადამიანის უფლებების სწავლებისა და მონიტორინგის ცენტრი“ (EMC) და „პარტნიორობა ადამიანის უფლებებისთვის“ (PHR) ეხმიანებიან კიდევ ერთ უმძიმეს ტრაგედიას, რომლის შედეგადაც, მშენებლობაზე სამუშაოს შესრულებისას 16 წლის მოზარდი გარდაიცვალა და უსამძიმრებენ ოჯახს. „EMC-ს და PHR-ის შეფასებით, ქვეყანაში შრომის უსაფრთხოების კუთხით მდგომარეობა საგანგაშოა, ხოლო არსებული გამოწვევის საპასუხოდ, სახელმწიფოს მხრიდან გაწეული ძალისხმევა - არაადეკვატურია“, ნათქვამია განცხადებაში. სრულად... წყარო: emc.org.ge

თბილისი. სახალხო დამცველი საკონსულტაციო საბჭოს წევრებს 20-21 ივნისს შინაგან საქმეთა სამინისტროს თანამშრომლების მიერ სამსახურებრივი უფლებამოსილების სავარაუდო გადამეტების ფაქტზე მიმდინარე სისხლის სამართლის საქმის შესახებ პირველადი ინფორმაცია მიაწოდა.  „სახალხო დამცველისა და საბჭოს ერთობლივი რეკომენდაციაა – გამოძიებამ მთავარი ყურადღება ერთიანი სურათის შესწავლაზე გაამახვილოს; თუ როგორ, რა ვითარებაში გამოიყენა ძალა პოლიციამ, რამდენად შეესაბამებოდა ეს ძალა არსებულ ინსტრუქციებსა და საქართველოში მოქმედ საკანონმდებლო რეგულაციებს; როგორ დაიგეგმა ოპერაცია, ვინ იღებდა ბრძანებებს, რა ბრძანებები იყო გაცემული და ვინ იყო მათ შესრულებაზე პასუხისმგებელი პირი. ეს არის მთავარი საკითხი და მხლოდ ამის შემდეგ უნდა მოხდეს კონკრეტულად ინდივიდუალური პოლიციელების მხრიდან უფლებამოსილების გადამეტების ფაქტების შესწავლაზე კონცენტრირება“, – განუცხადა სახალხო დამცველმა ჟურნალისტებს.  სრულად... წყარო: ორგანიზაციის ვებგვერდი

თბილისი. 2019 წლის 16 ივლისს, მშენებლობაზე დასაქმებული არასრულწლოვანის გარდაცვალებასთან დაკავშირებით, სახალხო დამცველმა განცხადება გაავრცელა.  „ქვეყანაში შრომის უსაფრთხოების კუთხით არსებული მდგომარეობა კვლავ უმთავრეს გამოწვევად რჩება. არსებული შემაშფოთებელი ვითარების გაუმჯობესებას მნიშვნელოვნად აფერხებს, ერთი მხრივ, შრომის ინსპექტორების სამუშაო ადგილებზე დაშვებისთვის გათვალისწინებული შეზღუდვები, რომლებიც მხოლოდ 2019 წლის სექტემბრიდან მოიხსნება, ხოლო, მეორე მხრივ - შრომის პირობების ინსპექტირების დეპარტამენტის ხელთ არსებული არასაკმარისი ადამიანური თუ მატერიალური რესურსები. აღნიშნული ფაქტორების გამო, დასაქმების ადგილებზე ინსპექტირება ვერ ხორციელდება იმდენად ხშირად და სრულყოფილად, რამდენადაც ეს აუცილებელია შრომის უსაფრთხოების ნორმების ეფექტური აღსრულების უზრუნველსაყოფად. შედეგად, უკანასკნელი შემთხვევის მსგავსად, მონიტორინგის გარეშე რჩება არაერთი დასაქმების ადგილი, სადაც სამუშაო პროცესი საქართველოს კანონმდებლობით გათვალისწინებული მოთხოვნების მნიშვნელოვანი დარღვევებით მიმდინარეობს“, - აღნიშნულია განცხადებაში.  სრულად...  წყარო: ორგანიზაციის ვებგვერდი

თბილისი. საკონსტიტუციო სასამართლოს გადაწყვეტილების სრულყოფილად აღსრულების მიზნით საია პარლამენტს საკანონმდებლო წინადადებით მიმართავს. საიას მიაჩნია, რომ ცვლილება უნდა შევიდეს საქართველოს ადმინისტრაციულ სამართალდარღვევათა კოდექსის 1502 მუხლში საქართველოს საკონსტიტუციო სასამართლოს 2019 წლის 4 ივლისის N1/5/1271 გადაწყვეტილებაში ასახული პრინციპების შესაბამისად და განისაზღვროს, რომ ამ მუხლის პირველი ნაწილის მოქმედება არ ვრცელდება მესაკუთრის მიერ ან მესაკუთრის თანხმობით პლაკატების, ლოზუნგების, ბანერების სპონტანური საპროტესტო აქციის ფარგლებში ხანმოკლე ვადით, დროებით განთავსებაზე. სრულად  წყარო: ორგანიზაციის ვებგვერდი

თბილისი. ორგანიზაციის „პარტნიორობა ადამიანის უფლებებისთვის“ (PHR) იურისტები პერიოდულად ახორციელებენ ვიზიტებს ხანდაზმულთა პანსიონატებში. „ერთ-ერთ პანსიონატში ვიზიტისას დაწესებულების ინფრასტრუქტურულ მდგომარეობასთან დაკავშირებული პრობლემები გამოიკვეთა. დაწესებულებამდე მისასვლელი გზა არ იყო მოპირკეთებული, შესაბამისად, ხანდაზმულთა გადაადგილებას სახიფათოს ხდიდა”. ორგანიზაციამ მიმართა გლდანი-ნაძალადევის გამგეობას და გაირკვა, რომ პანსიონატამდე მისასვლელი გზა მოპირკეთდა გრანულატის ნარევით და ქვიშახრეშოვანი მასალით. PHR თვლის, რომ ხანდაზმულების უსაფრთხოებისთვის მნიშვნელოვანია გზა მყარი საფარით მოპირკეთდეს. ორგანიზაციამ უკვე მიმართა გამგეობას წერილით, რომ შემდეგი წლის ბიუჯეტში გზისთვის საჭირო თანხები გაითვალისწინონ. სრულად...  წყარო: phrgeorgia.wordpress.com

თბილისი. „ადამიანის უფლებების სწავლებისა და მონიტორინგის ცენბტრი“ (EMC) აქვეყნებს ლუკა ნახუცრიშვილის თვალსაზრისს - „ფიცის სიმტკიცე და მოხეტიალე კონსტიტუცია-ხაიშელები სახელმწიფოს პირისპირ”, რომელიც ხუდონ-ჰესის მშენებლობის ირგვლივ მიმდინარე მოვლენებს ეხება.  „სოფელ ხაიშის მკვიდრი სვანები, 1980-იანი წლების წარმატებული პროტესტის შემდეგ, კვლავ დარაზმულან ხუდონ-ჰესის მშენებლობის წინააღმდეგ, რომლის პროექტმაც აქტუალურობა “ნაციონალური მოძრაობის“ მმართველობის დროს დაიბრუნა“, - ვკითხულობთ, თვალსაზრისში, - „სვანები არ ჯერდებიან მოქალაქეობის იმ სუსტ, გამოფიტულ ფორმას, რომელსაც მათ სახელმწიფო სთავაზობს, და თავად იღებენ ინიციატივას საერთო ინტერესზე, რომლის თანაგანსაზღვრის უფლებაც მათ სახელწმიფომ ე.წ. ეროვნული ინტერესის სახელით ჩამოართვა. მათი საჯარო გამოსვლები კანონის, უფლებებისა და ეროვნული ინტერესის ენაზე მეტყველებს; ისინი ითხოვენ, “მიეცეს საქართველოს მოსახლეობას უფლება, ძირითადი და მტკივნეული საკითხები გადაიჭრას მისი უშუალო ჩარევით ანუ საერთო სახალხო რეფერენდუმისა და პლებისციტის გზით“. ამავდროულად, წმ. გიორგის ხატზე ფიცი იდება; 2018 წელს კი, პირველად 1948 წლის შემდეგ, ეწყობა სრულიად სასვანეთო ლალხორი, სვანეთის თემთა წარმომადგენლების შეკრება, რომლის გადაწყვეტილებებიც ტრადიციულად ასევე ხატზე ფიცის დადებით მტკიცდებოდა“. სრულად...  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი“ (EMC) de facto ცხინვალის დაქვემდებარებში მყოფი ახალგორის რაიონულმა სასამართლოს მიერ ახალგორელი აქტივისტის, თამარ მეარაყიშვილსთვის ყველა ბრალდების მოხსნას ეხმიანება.  „მიუხედავად ორი წლის განმავლობაში ფიზიკური და ეკონომიკური იზოლაციისა, შევიწროვებისა, გადაადგილების თავისუფლების შეზღუდვის და სხვა ფუნდამენტური უფლებების სისტემური დარღვევისა, თამარმა მეორედ შეძლო დაემტკიცებინა პროკურატურის ბრალდებების უსაფუძვლობა. ცხადია, de facto პროკურატურას რჩება ახალგორის სასამართლოს მიერ მიღებული გადაწყვეტილების ზემდგომ სასამართლო ინსტანციებში გასაჩივრების შესაძლებლობა. ამ მექანიზმს პროკურატურა გამოიყენებს თუ არა, ამ დრომდე უცნობია“, - აღნიშნულია გამოხმაურებაში, - „მნიშვნელოვანია, რომ ადგილობრივმა de facto ხელისუფლებამ შეწყვიტოს თამარის დევნის პრაქტიკა. არსებითია, თამარს დაუბრუნდეს პირადობის დამადასტურებელი დოკუმენტები და შეძლოს გადაადგილების თავისუფლებით სარგებლობა“.  სრულად...  წყარო: ორგანიზაციის ვებგვერდი

თბილისი. “კონსტიტუციის 42-ე მუხლმა” 2019 წლის 7 ივნისს საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტს ადამიანის უფლებათა ევროპული სასამართლოს მიერ საქართველოს წინააღმდეგ გამოტანილი გადაწყვეტილებების აღსრულების შესახებ ალტერნატიული ანგარიში წარუდგინა.  ანგარიში მოიცავს ეროვნული კანონმდებლობისა და პრაქტიკის ანალიზს სამ თემატურ საკითხზე. ყველა მათგანთან დაკავშირებით რეფორმების გატარება საქართველოს წინააღმდეგ ევროპული სასამართლოს მიერ გამოტანილი გადაწყვეტილებებიდან გამომდინარეობს, რომელთა აღსრულებას ევროპის საბჭოს მინისტრთა კომიტეტი ზედამხედველობს.  სრულად...  წყარო: ორგანიზაციის ვებგვერდი

თბილისი. საქართველოს სახალხო დამცველი რუსთაველის გამზირზე მიმდინარე და მის პარალელურად დაგეგმილ აქციებს ეხმიანება. „საქართველოს სახალხო დამცველი აქტიურად ადევნებს თვალს მთელი დღის განმავლობაში რუსთაველის გამზირზე მიმდინარე მოვლენებს. „თბილისი პრაიდის“ მოწინააღმდეგე ჯგუფები პარლამენტის შენობის წინ დღეს დილიდან მას შემდეგ შეიკრიბნენ, რაც „თბილისი პრაიდის“ ორგანიზატორების მიერ დაანონსებული ღირსების მარში გაუქმდა. შეკრებილი პირები ანტიდისკრიმინაციული კანონის გაუქმებას და „თბილისი პრაიდის“ აკრძალვას ითხოვენ. გარდა ამისა, მანიფესტანტები აცხადებენ, რომ სამოქალაქო აქტივისტებს არ მისცემენ ანტისაოკუპაციო აქციების გაგრძელების შესაძლებლობას“, - აღნიშნულია განცხადებაში, - „სახალხო დამცველი მოუწოდებს პარლამენტის შენობასთან მიმდინარე და მის პარალელურად დაგეგმილი აქციის მონაწილეებს, გამოყონ ორგანიზატორი პირები, რომელთა შორის კონსტრუქციული მოლაპარაკებების გამართვა შესაძლებელს გახდის ორივე აქციის შეუფერხებელ და მშვიდ გარემოში ჩატარებას. საქართველოს სახალხო დამცველი მოუწოდებს საქართველოს შინაგან საქმეთა სამინისტროს, მაქსიმალურად შეუწყოს ხელი მოქალაქეთა მშვიდობიანი ფორმით გამოხატვას და უზრუნველყონ რუსთაველის გამზირზე შეკრებილი ყველა პირის მიერ შეკრების უფლების სრულფასოვანი რეალიზება“. სრულად...  წყარო: ორგანიზაციის ვებგვერდი

თბილისი. პარტნიორობა ადამიანის უფლებებისთვის (PHR) პროექტის ფარგლებში „მოქალაქეთა ჩართულობის გაზრდა სკოლებში ბავშვთა მიმართ ძალადობისა და ბულინგის წინააღმდეგ ბრძოლაში“ ათ ისტორიას აქვეყნებს. „ამ ისტორიების საშუალებით მშობლები და ბავშვები გვიყვებიან თუ როგორ და რა ფორმით შეეხო მათ სასკოლო ბულინგი და რა კვალი დატოვა სკოლის სივრცეში განცდილმა ძალადობამ მათ ცხოვრებაზე. არასრულწლოვანთა იდენტიფიცირების ასარიდებლად და მშობლების თხოვნით, ბავშვების სახელები შეცვლილია“, ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

აჭარა. ნორმა, რომელიც კერძო საკუთრებაში არსებულ შენობაზე მესაკუთრის თანხმობით საპროტესტო ბანერის დროებით გამოფენას კრძალავდა, საკონსტიტუციო სასამართლომ არაკონსტიტუციურად სცნო. ინფორმაციას ამის შესახებ „საქართველოს ახალგაზრდა იურისტთა ასოციაცია“ ავრცელებს.  „საკონსტიტუციო სასამართლომ 2019 წლის 4 ივლისის გადაწყვეტილებით არაკონსტიტუციურად სცნო გასაჩივრებული ნორმის ის ნორმატიული შინაარსი, რაც მესაკუთრეს ართმევს უფლებას, საკუთარი სახლის ფასადზე განათავსოს ბანერი დროებით, მერიის თანხმობის გარეშე. საკონსტიტუციო სასამართლომ ასევე არაკონსტიტუციურად მიიჩნია იმ პირის დასჯა საპროტესტო ბანერის დროებით შენობაზე დროებითი განთავსებისათვის, რომელიც ამას შენობის მესაკუთრის თანხმობით აკეთებს. საკონსტიტუციო სასამართლომ ამ საქმეში გამოხატვის თავისუფლების დარღვევა დაადგინა“, - ვკითხულობთ საია-ს მიერ გავრცელებულ ინფორმაციაში.  სრულად  წყარო: https://gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს 20 ივნისის მოვლენების: აქციის დაშლისა და ადამიანის უფლებების დარღვევის პირველად სამართლებრივი შეფასებას. „ჩვენს ხელთ არსებული საჯარო მასალებისა და ანალიზის შეზღუდული მეთოდოლოგიური ინსტრუმენტების გათვალისწინებით, EMC-ს მიაჩნია, რომ 20 ივნისს რუსთაველზე გამართული საპროტესტო აქციის მონაწილეების გარკვეული ჯგუფის ქცევამ უკონტროლო ძალადობრივი ხასიათი შეიძინა და პოლიციას შეკრების თავისუფლებაში ჩარევის და აქციის შეწყვეტის სამართლებრივი საფუძველი მისცა. თუმცა, აქციის შეწყვეტის დროს პოლიციამ უგულებელყო აქციის დაშლისთვის კანონით დადგენილი მოთხოვნები, მათ შორის, სათანადოდ არ გამოიყენა მოლაპარაკებების რესურსი“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სტატიების კრებულს: „დედობა, სექსუალობა და რეპროდუქციული სამართლიანობა“. „წინამდებარე კრებულის მიზანია ხელი შეუწყოს რეპროდუქციისა და სექსუალობის, ისევე როგორც, მასთან მომიჯნავე საკითხების ხელახალ გააზრებას, წინააღმდეგობისა და ემანსიპაციის ახალი გზების ძიებას. აღნიშნული კი პირველ რიგში გულისხმობს SRHR-ის ჩარჩო კონცეფციასთან არსებული მიდგომების ანალიზს კრიტიკული აკადემიური/თეორიული პერსპექტივებით“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. 2019 წლის 2 ივლისიდან სახალხო დამცველის აპარატმა 2019 წლის 20-21 ივნისს შს სამინისტროს თანამშრომლების მიერ სამსახურებრივი უფლებამოსილების სავარაუდო გადამეტების ფაქტზე მიმდინარე სისხლის სამართლის საქმის (#074220619801) შესწავლა დაიწყო.  „სახალხო დამცველის აპარატი გამოძიების პროცესს ეფექტიანი გამოძიების საერთაშორისო სტანდარტების გათვალისწინებით შეაფასებს. შეფასების კრიტერიუმები გამოძიების დამოუკიდებლობის, დროულობის, ზედმიწევნითობის, კომპეტენტურობისა და დაზარალებულის მონაწილეობის ელემენტები იქნება. სახალხო დამცველის აპარატი განსაკუთრებულ ყურადღებას მიაქცევს იმას, ჩატარდა თუ არა ყველა აუცილებელი საგამოძიებო/საპროცესო მოქმედება, ეს მოქმედებები ჩატარდა თუ არა დროულად და ხომ არ არის სახეზე გამოძიების პროცესის არაგონივრული გაჭიანურება, ჩატარებული საგამოძიებო მოქმედებები ტარდებოდა თუ არა ჯეროვანი გულისხმიერებით და ამომწურავად“, - ხაზგასმულია სახალხო დამცველის აპარატის მიერ გავრცელებულ ინფორმაციაში. სრულად წყარო: ორგანიზაციის ვებგვერდი

თბილისი. საქართველოს სახალხო დამცველმა „პრევენციის ეროვნული მექანიზმის 2018 წლის ანგარიში“ წარმოადგინა.  „ანგარიშში ასახულია ქვეყანაში თავისუფლების აღკვეთისა და შეზღუდვის ადგილებში წამებისა და არასათანადო მოპყრობასთან დაკავშირებით არსებული მდგომარეობა. პენიტენციური სისტემის მიმართულებით შემუშავდა პენიტენციური სისტემის განვითარების 2019-2020 გეგმა.მიუხედავად ამისა, სახალხო დამცველის 2017 წლის რეკომენდაციების მნიშვნელოვანი ნაწილი, რომელიც წამებისა და არასათანადო მოპყრობისაგან დაცვის პროცედურული და ინსტიტუციური გარანტიების გაძლიერებისკენ იყო მიმართული, კვლავ შეუსრულებელია. მნიშვნელოვანი გამოწვევა და სერიოზული საფრთხის შემცველია კრიმინალური სუბკულტურა. ანგარიშში მიმოხილულია დეესკალაციის ოთახში ხანგრძლივად მოთავსების პრაქტიკა, უსაფრთხოების ზომების შესაბამისი დასაბუთების გარეშე ჩატარება, რეაბილიტაციის ღონისძიებების სიმცირე, დაწესებულებებში არსებული გადატვირთულობა და ფიზიკური გარემოს კუთხით არსებული პრობლემები“, - ვკითხულობთ თანდართულ ინფორმაციაში. სრულად  წყარო: ორგანიზაციის ვებგვერდი

თბილისი. საქართველოს სახალხო დამცველმა წარმოადგინა ანგარიში „არასათანადო მოპყრობის სისხლის სამართლის საქმეთა გამოძიების ეფექტიანობა“. „წინამდებარე ანგარიშში საზოგადოება გაეცნობა 38 კონკრეტული სისხლის სამართლის საქმის ანალიზს. ყველა საქმეზე გამოძიება ისე წარიმართა და დასრულდა, რომ შედეგი არ დამდგარა, კონკრეტული პირი პასუხისგებაში არ მიცემულა, გამოძიება ისე შეწყდა, რომ სავარაუდო მსხვერპლი არც ერთ შემთხვევაში არ სცნო გამოძიებამ დაზარალებულად. გამოძიებას სერიოზული პრობლემები ხშირ შემთხვევაში ჰქონდა ინსტიტუციური დამოუკიდებლობის თვალსაზრისით. მიუხედავად ვალდებულებისა, გამოძიება დაეწყო და ეწარმოებინა პროკურატურას, ეს მოთხოვნა მრავალ საქმეში არ შესრულდა. გამოძიებაში აქტიურად იყვნენ ჩართულნი ის უწყებები, რომელთა თანამშრომლების მიმართაც არასათანადო მოპყრობის ჩადენის ეჭვები არსებობდა“, - ვკითხულობთ თანდართულ ინფორმაციაში. სრულად  წყარო: ორგანიზაციის ვებგვერდი

თბილისი. 25 ივნისს USAID/PROLoG-ის მხარდაჭერით გაიმართა ტრენინგი, არასამთავრობო ორგანიზაციების წარმომადგენლებისთვის, გამოხატვის თავისუფლების, სიძულვილის ენის და დისკრიმინაციის წახალისების შესახებ, რომელშიც სხვა არასამთავრობო ორგანიზაციებთან ერთად, PHR-ის წარმომადგენლებიც მონაწილეობდნენ. ტრენინგს საერთაშორისო ექსპერტი ივანა როანა უძღვებოდა. ტრენინგები გამოხატვის თავისუფლების შესახებ სამი დღის განმავლობაში გაგრძელდება. სრულად... წყარო: phrgeorgia.wordpress.com