თბილისი. ადამიანის უფლებათა ცენტრი ავრცელებს განცხადებას საქართველოს პრეზიდენტის მიერ შეწყალებაზე მორატორიუმის გამოცხადებასთან დაკავშირებით. ორგანიზაციას მიაჩნია, რომ „პრეზიდენტის მიერ შეწყალებაზე გამოცხადებული მორატორიუმი არ და ვერ შეძლებს პრობლემის მოგვარებას და საფრთხეს შეუქმნის შეწყალების კონსტიტუციურ-სამართლებრივი დანიშნულების პრაქტიკულ იმპლემენტაციას. კრიტიკულად მნიშვნელოვანია, პრეზიდენტმა აღადგინოს შეწყალების საკითხთა კომისია და დააკომპლექტოს საზოგადოების მაღალი ნდობით აღჭურვილი, კომპეტენტური პირებით“, ნათქვამია განცხადებაში.  სრულად... წყარო: ორგანიზაციის გვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) სამართლებრივი დახმარების შედეგად, თბილისის სააპელაციო სასამართლომ ფსიქიატრიულ დაწესებულებაში პირის არანებაყოფლობით მოთავსება უკანონოდ ცნო.  „სასამართლომ 2019 წლის 13 სექტემბერს, გააუქმა თბილისის საქალაქო სასამართლოს 2019 წლის 31 აგვისტოს ბრძანება პირის არანებაყოფლობით ფსიქიატრიულ დაწესებულებაში მოთავსების შესახებ“. სრულად...  წყარო: phrgeorgia.wordpress.com

თბილისი. პლატფორმაში “არა-ფობიას!” შემავალი ორგანიზაციები, ბათუმის მეჩეთთან დაკავშირებით გაკეთებული გამონათქვამების გამო, განცხადებას ავრცელებენ.  კერძოდ, ორგანიზაციები ეხმაურებიან სამოქალაქო მოძრაობა “ლელოს” დამფუძნებელმა მამუკა ხაზარაძის მიერ აჭარის საზოგადოებრივი მაუწყებლის ეთერში გაკეთებულ და პარლამენტის ვიცე-სპიკერ გიორგი ვოლსკის მიერ ჟურნალისტენებისთვის მიცემულ კომენტარებს. „ხელისუფლების წარმომადგენლებსა და საჯარო პირებს მოვუწოდებთ, თავი შეიკავონ ქსენოფობიური და დისკრიმინაციული შინაარსის განცხადებების გაკეთებისგან და იხელმძღვანელონ კონსტიტუციით გარანტირებული რელიგიის თავისუფლების, კანონის უზენაესობისა და თანასწორუფლებიანობის პრინციპებით“, - ნათქვამია “არა-ფობიას!” წევრი ორგანიზაციების მიერ გავრცელებულ განცხადებაში.  სრულად...  წყარო: http://www.humanrights.ge

თბილისი. საქართველოს სახალხო დამცველი უერთდება საქართველოს პრეზიდენტის მიერ კონკრეტულ პირთა შეწყალებასთან დაკავშირებით საზოგადოებაში გაჩენილ კრიტიკას და მოუწოდებს საქართველოს პრეზიდენტს, შეწყალების უფლებამოსილების გამოყენების პროცესში უზრუნველყოს მაქსიმალური გამჭვირვალობა და საზოგადოებრივი ჩართულობა. „საქართველოს სახალხო დამცველი განმარტავს, რომ შეწყალების დისკრეციული ბუნება არ გულისხმობს ყოველგვარი დასაბუთების გარეშე მისი გამოყენების უფლებას. შეწყალება მიზნად უნდა ისახავდეს კონკრეტული ამოცანის მიღწევას - იქნება ეს სახელმწიფო, პოლიტიკური, მართლმსაჯულების ინტერესიდან თუ განსაკუთრებული ინდივიდუალური გარემოებებიდან გამომდინარე.1 თითოეულ შემთხვევაში, მსგავსი საგამონაკლისო საშუალების გამოყენება საზოგადოებისთვის მაქსიმალურად აღქმადი და გასაგები უნდა იყოს“, - აღნიშნულია სახალხო დამცველის განცხადებაში. სრულად...  წყარო: ორგანიზაციის ვებგვერდი

თბილისი. საერთაშორისო გამჭვირვალობა - საქართველო მიიჩნევს, რომ 20 ივნისის შემდგომ მიმდინარე აქციების პროცესში საქართველოს პარლამენტის შენობაში შესვლის უფლება არაერთხელ შეეზღუდათ საქართველოს მოქალაქეებს, მათ შორის საქართველოს პარლამენტის წევრებს, ჟურნალისტებს და არასაპარლამენტო ოპოზიცის წარმომადგენლებს.  „პარლამენტის ღიაობა და გამჭვირვალობა აუცილებელია ქვეყნის დემოკრატიული განვითარებისათვის. მნიშვნელოვანია საქართველოს პარლამენტმა შეინარჩუნოს ღიაობისა და გამჭვირვალობის ის მიღწევები, რომელიც მაღალი სტანდარტის მაჩვენებელია და საერთაშორისო აღიარება აქვს მოპოვებული“, - აღნიშნულია ორგანიზაციის მიერ გავრცელებულ განცხადებაში, - „მივმართავთ ღია მმართველობის მუდმივმოქმედ საპარლამენტო საბჭოს საპარლამენტო ღიაობისა და პარლამენტში გამჭვირვალე მმართველობის მონიტორინგის ფარგლებში შეისწავლოს და შეაფასოს 20 ივნისის შემდგომ პერიოდში პარლამენტის შენობაში მოქალაქეთა და პარლამენტის წევრთა შესვლის აკრძალვის ფაქტები“.  სრულად   წყარო: ორგანიზაციის ვებგვერდი

თბილისი. საქართველოს სახალხო დამცველმა სადაზღვევო კომპანია „არდის“ წინააღმდეგ ასაკის ნიშნით დისკრიმინაცია დაადგინა, ვინაიდან კომპანიამ 1943 წელს დაბადებულ ს. ხ.-ს და 1937 წელს დაბადებულ ა. გ.-ს სამოგზაურო დაზღვევაზე უარი უთხრა.  რეკომენდაციაში სახალხო დამცველმა აღნიშნა, რომ სადაზღვევო კომპანია „არდის" მიერ განმცხადებლებისთვის წერილობით მიწოდებული განმარტება სამოგზაურო დაზღვევის გაწევაზე უარის თქმის შესახებ, ასაკოვანი ადამიანების მიმართ არსებულ სტერეოტიპებს ეფუძნება. ამასთან, სადაზღვევო კომპანიების მსგავსმა ბლანკეტურმა მიდგომამ, შესაძლოა, მიუწვდომელი გახადოს ხანდაზმული ადამიანებისთვის სამოგზაურო დაზღვევა, რაც, თავის მხრივ, მიმოსვლის თავისუფლების უფლებაში ჩარევასაც გულისხმობს.  სრულად  წყარო: ორგანიზაციის ვებგვერდი

თბილისი. ადამიანის უფლებათა ცენტრი მოუწოდებს საქალაქო სასამართლოს, არ შეუზღუდოს ზაზა სარალიძის ადვოკატს სასამართლო პროცესებზე დასწრება. „12 სექტემბერს გამართულ სასამართლო სხდომაზე, სადაც ზაზა სარალიძე დაკითხვაზე იმყოფებოდა მოწმის სტატუსით, სასამართლომ არ გაითვალისწინა დაზარალებულის თხოვნა და სხდომაზე არ დაუშვა მისი ადვოკატი. შესაბამისად, ადამიანის უფლებათა ცენტრის იურისტს არ მიეცა შესაძლებლობა დასწრებოდა მისი დაცვის ქვეშ მყოფი დაზარალებულის - ზაზა სარალიძის დაკითხვას, რომელიც აღნიშნული სისხლის სამართლის საქმის სამართალწარმოების ყველა ეტაპზე წარმოადგენს მას როგორც სხვადასხვა სახელმწიფო უწყებაში, ასევე სასამართლოში,“ - ვკითხულობთ ორგანიზაციის მიერ გავრცელებულ განცხადებაში, - „ადამიანის უფლებათა ცენტრი მოუწოდებს ქალაქ თბილისის საქალაქო სასამართლოს, უზრუნველყოს დაზარალებულის უფლებების დაცვა, საქართველოს მოქმედი კანონმდებლობისა და საერთაშორისო სტანდარტების შესაბამისად და არ შეუზღუდოს დაზარალებულის ადვოკატს მომდევნო პროცესებზე დასწრების შესაძლებლობა“. სრულად  წყარო: გვერდი სოციალურ ქსელში

გურია. საქართველოს ახალგაზრდა იურისტთა ასოციაციის ინფორმაციით, ოზურგეთის რაიონულმა სასამართლომ ,,გააღვიძე ოლიგარქის“ აქციის მონაწილეები ხმაურის გამო სამართალდამრღვევებად მიიჩნია და სიტყვიერი გაფრთხილება გამოუცხადა, რაც გამოხატვის თავისუფლების საშიშ შეზღუდვას წარმოადგენს.  „ამ გადაწყვეტილებით იქმნება გამოხატვის თავისუფლების შინაარსობრივი შეზღუდვის საშიში პრეცედენტი. ოზურგეთის რაიონული სასამართლო განსაზღვრავს საკითხებს, რომელზე პროტესტის გამოთქმა არ არის შეკრებისა და გამოხატვის თავისუფლებით დაცული. ამით სახელმწიფო ფაქტობრივად ეუბნება მოქალაქეს, თუ რა საკითხებზე ილაპარაკოს და რა იდეებისა და მოსაზრების გამოხატვისაგან შეიკავოს თავი იმისათვის, რათა არ დაეკისროს სამართლებრივი პასუხისმგებლობა, რაც გამოხატვის თავისუფლების შინაარსობრივ რეგულირებას წარმოადგენს“, - ნათქვამია საია-ს მიერ გავრცელებულ განცხადებაში.  სრულად  წყარო: ორგანიზაციის ვებგვერდი

თბილისი. სახალხო დამცველმა „საქართველოს უნივერსიტეტში“ სტუდენტების ჯგუფებში გადანაწილების პრაქტიკა აკადემიური მოსწრების ნიშნით დისკრიმინაციულად მიიჩნია.  „საქართველოს უნივერსიტეტში“ არსებული პრაქტიკის თანახმად, 2-ზე დაბალი GPA-ს მქონე სტუდენტებს საგნების არჩევა-რეგისტრაციის პერიოდში არ ეძლევათ შესაძლებლობა, აირჩიონ ყველა შემოთავაზებული სალექციო ჯგუფი და დრო, ხოლო, 2-ზე მაღალი GPA-ს მქონე სტუდენტებს, მსგავსი შეზღუდვა არ აქვთ. პირველი სემესტრის სტუდენტების შემთხვევაში ამგვარი დაყოფა ერთიანი ეროვნული გამოცდების შედეგების მიხედვით ხდება. მოპასუხის პოზიციის თანახმად, ამგვარი დაყოფის მიზანი სწავლის ხარისხის გაუმჯობესებაა“, - აღნიშნავს სახალხო დამცველი, - „სახალხო დამცველმა „საქართველოს უნივერსიტეტს“ მიმართა, სწავლების ყველა საფეხურსა და ყველა ფაკულტეტზე გაუქმდეს დიფერენცირებული სალექციო ჯგუფები, რაც ითვალისწინებს 2-ზე ნაკლები და 2-ზე მეტი GPA-ს მქონე სტუდენტებისთვის (პირველი სემესტრის სტუდენტების შემთხვევაში ერთიანი ეროვნული გამოცდების შედეგების მიხედვით) სალექციო კურსების არჩევასთან დაკავშირებულ შეზღუდვებს“. სრულად  წყარო: ორგანიზაციის ვებგვერდი

თბილისი. humanrights.ge აქვეყნებს ბუკლეტს „უკანონო დაკავებათა ისტორიები საოკუპაციო ხაზიდან“.  „წინამდებარე ბუკლეტის მიზანია იმ პრობლემებისა და უფლებადარღვევების შესახებ ცნობიერების ამაღლება, რასაც ადგილი აქვს საქართველოს ოკუპირებული ტერიტორიების - აფხაზეთისა და ცხინვალის რეგიონის/სამხრეთ ოსეთის გამყოფ ხაზებზე. ბუკლეტში ასახულია უშუალოდ იმ ადამიანების მიერ მოთხრობილი ისტორიები, რომლებიც ბოლო წლებში გახდნენ უკანონო დაკავებებისა და გატაცების მსხვერპლი რუსეთის ფედერაციის წარმომადგენლების მხრიდან“, - ვკითხულობთ ბუკლეტის წინასიტყვაობაში.  სრულად  წყარო: humanrights.ge

თბილისი. ადამიანის უფლებათა ცენტრი (EMC) აქვეყნებს მაკაუ მუტუას პუბლიკაციის თარგმანს: ველურები, მსხვერპლები და მხსნელები: ადამიანის უფლებათა მეტაფორა. „ეს სტატია არის მცდელობა, ადამიანის უფლებათა მოძრაობის მომხრეებში გამოიწვიოს გარკვეული აღიარებები, რომელთა ნაწილიც მათ სიმშვიდეს საგრძნობლად დაურღვევს. სტატია ითხოვს, რომ ადამიანის უფლებათა დამცველები მეტად თვითკრიტიკულები იყვნენ, რათა დასძლიონ ის პრობლემური რიტორიკა და ისტორია, რომელიც გარკვეულწილად აყალიბებს ადამიანის უფლებათა მოძრაობას. ამასთან ერთად, სტატია არა მხოლოდ ადამიანის უფლებათა საქმიანობის მიკერძოებულ თუ აროგანტულ რიტორიკასა და ისტორიას განიხილავს, არამედ ცდილობს შეეჭიდოს ადამიანის უფლებათა პროექტის იმ წინააღმდეგობებსაც, იმ „დიდგვაროვნებასა და არისტოკრატულობას“, რომელიც ადამიანის უფლებათა პროექტს მართავს და რომელიც მომდინარეობს ურყევი რწმენიდან, რომ ადამიანები და მათ მიერ წარმოებული პოლიტიკური საზოგადოებები შეიძლება აღმატებული მორალურობის მიერ იმართებოდეს“, ნათქვამია ორგანიზაციის ვებგვერდზე.  სრულად... წყარო: emc.org.ge

თბილისი. ადამიანის უფლებათა ცენტრი მოითხოვს ჟურნალისტების, ბესლან კმუზოვისა და მერაბ ცაავას დაზარალებულად ცნობას 2019 წლის 20 ივნისს განვითარებული მოვლენების შედეგად მიყენებული ზიანის გამო.  „20 ივნისის ღამეს დაშავებული ჟურნალისტებიდან ადამიანის უფლებათა ცენტრი 4 ჟურნალისტს უწევს სამართლებრივ დახმარებას, მათ შორის - ბესლან კმუზოვი (Кавказский Узел) და მერაბ ცაავა („გურია ნიუსი“) პროფესიულ მოვალეობას ასრულებდნენ. მათ აქციის დარბევისას მიიღეს სხეულის სხვადასხვა სახის დაზიანებები, რა დროსაც საჭირო გახდა სასწრაფო სამედიცინო დახმარების ჩარევა. ბესლან კმუზოვს 6 ტყვია მოხვდა, აქედან ერთი - თავის არეში, მერაბ ცაავას კი რეზინის ტყვიების შედეგად დაუზიანდა ხელი და საჭირო გახდა ქირურგიული ჩარევა“, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში მასმედია ადამიანის უფლებები

თბილისი. საქართველოს სტრატეგიის და საერთაშორისო ურთიერთობების კვლევის ფონდი აქვეყნებს შოთა უტიაშვილის ბლოგპოსტს: ანტისაოკუპაციო პოლიტიკის ახალი აქცენტები. „ცხადია, მხოლოდ რამდენიმე ოჯახის გამოძევებაზე რომ იყოს საუბარი, ეთნიკურ წმენდად კვალიფიცირება არასერიოზული იქნებოდა, მაგრამ ჩვენ გვაქვს ყველა მტკიცებულება, რომ, როგორც მინიმუმ, 2008 წლიდან რუსეთი და მისი მარიონეტული რეჟიმი „სამხრეთ ოსეთის“ ტერიტორიაზე ატარებს ქართველების ეთნიკური წმენდის მიზანმიმართულ პოლიტიკას, რომლის მსხვერპლიც უკვე გახდა 25 ათასზე მეტი ეთნიკური ქართველი. ქართული სოფლები ჯერ გადაწვეს, მერე დაანგრიეს და ბოლოს გადახნეს. სოფელ ერედვის ტერიტორიაზე, იქ, სადაც ათასზე მეტი ქართული ოჯახი ცხოვრობდა, აწყობენ ნაგავსაყრელს. მტკიცებულება იმდენია, რომ მათ ჩამოთვლას აზრი არა აქვს“, ნათქვამია ბლოგპოსტში.  სრულად... წყარო: www.gfsis.org

თბილისი. ადამიანის უფლებების სწავლებისა და მონიტორინგის ცენტრი (EMC) 10 სექტემბერს, 12 საათიდან 4 საათამდე გამართვას ღია კარის დღეს და ჭიათურის მოსახლეობას უფასო იურიდიულ კონსულტაციას გაუწევს. ღია კარის დღე გაიმართება შემდეგ მისამართზე: ნინოშვილის 6 ბ, ქ. ჭიათურა. “მოგვმართე, თუ ფიქრობ, რომ ირღვევა შენი ან შენი ახლობლების შრომითი უფლებები კერძო/საჯარო დაწესებულებებში, თუ შენს სოფელში და ქალაქში მწვავედ დგას გარემოს დაცვის, წყლის, საცხოვრისის და სხვა სოციალური საკითხები”, ნათქვამია ორგანიზაციის განცხადებაში.  სრულად...  წყარო: ორგანიზაციის გვერდი სოციალურ ქსელში სამართალი ადამიანის უფლებები

თბილისი. „ადამიანის უფლებების სწავლებისა და მონიტორინგის ცენტრი“ (EMC) 2019 წლის 1 სექტემბრიდან „შრომის უსაფრთხოების შესახებ“ საქართველოს ორგანული კანონის რიგი ნორმების ამოქმედებას ეხმაურება. ორგანიზაციის განცხადებით, ცვლილებები წინგადადგმულ ნაბიჯად შეიძლება ჩაითვალოს, თუმცა, არის რიგი საკითხებისა, რომელიც ჯერაც მოგვარებას საჭიროება. კერძოდ, EMC მოუწოდებს: „საქართველოს მთავრობას და საქართველოს პარლამენტს: დროულად შეიმუშავოს და მიიღოს საკანონმდებლო და კანონქვემდებარე აქტები, რომლებიც გაწერილია „შრომის უსაფრთხოების შესახებ“ ორგანული კანონით და აუცილებელია ორგანული კანონის სრულფასოვნად ამოქმედებისა და შრომის უსაფრთხოების სრულფასოვანი სისტემის დანერგვისა და ეფექტურობისათვის; დროულად შეიმუშაოს და მიიღოს საკანონმდებლო და კანონქვემდებარე აქტები და უზრუნველყოს შესაბამისი ფინანსური და ადმინისტრაციული რესურსის მობილიზება შრომის ინსპექციის ინსტიტუციურად გაძლიერებისა და მის დამოუკიდებელ ინსტიტუციად ჩამოყალიბებისთვის; დროულად შეიმუშაოს და მიიღოს საკანონმდებლო და კანონქვემდებარე აქტები შრომის ინსპექციის მანდატის გაფართოების მიზნით, რათა იგი გავრცელდეს ზოგადად შრომის კანონმდებლობის აღსრულების ზედამხედველობაზე; უზრუნველყოს შრომის უსაფრთხოების სწავლების აკრედიტირებული პროგრამების სტანდარტიზება და გამართვა. დამსაქმებლებს: დროულად დანერგონ სამუშაო ადგილზე საერთაშორისო სტანდარტებისა და საქართველოს კანონმდებლობის მოთხოვნების შესაბამისი შრომის უსაფრთხოების სისტემა“.  სრულად   წყარო: ორგანიზაციის ვებგვერდი

თბილისი. ცხინვალის რაიონული სასამართლოს მიერ თამარ მეარაყიშვილის წინააღმდეგ აღძრული საქმის ხელახალ განხილვასთან დაკავშირებით, „ადამიანის უფლებების სწავლებისა და მონიტორინგის ცენტრი“ (EMC) განცხადებას ავრცელებს. „დღეს ცხინვალის რაიონული სასამართლო იწყებს თამარ მეარაყიშვილის წინააღმდეგ აღძრული სისხლის სამართლის საქმის განხილვის მესამე ციკლს. სამხრეთ-ოსეთის დე-ფაქტო სასამართლომ თამარი მეარაყიშვილი მის წინააღმდეგ წარმოებული ყველა ბრალდების ნაწილში ორჯერ გაამართლა, მათ შორის უკანასკნელად 2019 წლის 10 ივლისს, როდესაც ახალგორის რაიონულმა სასამართლომ მას ყველა ბრალი მოუხსნა.[1] თუმცა დე-ფაქტო პროკურატურა კვლავ აგრძელებს სასამართლო პროცესებს. მათ 10 ივლისის გადაწყვეტილება გაასაჩივრეს და შესაბამისად პროცესები განახლდა“, - ვკითხულობთ განცხადებაში, - „იმ პირობებში, როცა ახალგორელი აქტივისტი მარტოა დარჩენილია დაუსაბუთებელი ბრალდებების წინაშე და არსებობს მისი დაპატიმრების რისკები, მნიშვნელოვანია მაქსიმალურად გაძლიერდეს საქართველოს ხელისუფლების და საერთაშორისო საზოგადოების მხარდაჭერა და ზეწოლა დე-ფაქტო ორგანოების მიმართ. მათ შორის, მნიშვნელოვანია რომ თამარის საკითხი დადგეს ჟენევის საერთაშორისო მოლაპარაკებების უახლოეს რაუნდზე, რომელიც სექტემბერში იგეგმება. საერთაშორისო ზეწოლის გაძლიერება გადამწყვეტი იქნება თამარის შესაძლო უსაფუძვლო პატიმრობის თავიდან ასაცილებლად, ვინაიდან ოკუპირებულ ტერიტორიაზე არსებულ რეჟიმზე ზეწოლის სხვა ეფექტური მექანიზმი და შესაძლებლობა პრაქტიკულად არ არსებობს“. სრულად  წყარო: ორგანიზაციის ვებგვერდი

თბილისი. „ინფორმაციის თავისუფლების განვითარების ინსტიტუტმა“ (IDFI) საქართველოს პარლამენტს 2019 წლის 22 მაისს ინიცირებული „პერსონალურ მონაცემთა დაცვის შესახებ“ კანონპროექტის თაობაზე მოსაზრებები წარუდგინა.  IDFI-ს მოსაზრებები ეხება ისეთ მნიშვნელოვან საკითხებს, როგორიც არის: პერსონალური მონაცემების დამუშავების საფუძვლები; განსაკუთრებული კატეგორიის მონაცემების დამუშავების საფუძვლები; მონაცემთა დამუშავების შეწყვეტა, წაშლა და განადგურება; მონაცემთა დაბლოკვა.  სრულად წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაციის (საია) მიხედვით, ეკა მესხიძემ 15 მედია საშუალების წინააღმდეგ ჟურნალისტთა ეთიკის ქარტიას მიმართა.  „იგი მიიჩნევს, რომ თბილისის საქალაქო სასამართლოს 2019 წლის 09 აგვისტოს მიღებულ გადაწყვეტილებასთან დაკავშირებით რიგი მედია საშუალებების მიერ არაზუსტი ინფორმაცია გავრცელდა, რითაც დაირღვა ჟურნალისტური ეთიკის ქარტიის პირველი პრინციპი. მედია საშუალებების მიერ გამოქვეყნებული სადავო მასალის თანახმად, სასამართლომ პაპუნა უგრეხელიძე უდანაშაულოდ სცნო და დაადგინა, რომ მისი საჯარო რეესტრის თავმჯდომარეობის პერიოდში არანაირ ძალადობასა და სექსუალურ შევიწროებას ადგილი არ ჰქონია. ეს ინფორმაცია არ შეესაბამება სინამდვილეს, აღნიშნულ საქმეში სასამართლოს საერთოდ არ უმსჯელია ჰქონდა თუ არა სექსუალურ შევიწროებას ადგილი“, ნათქვამია საიას ვებგვერდზე.  სრულად... წყარო: gyla.ge

თბილისი.ადამიანის უფლებების სწავლებისა და მონიტორინგის ცენტრი (EMC) აქვეყნებს ნივედიტა მენონის პუბლიკაციის: „სხეული“ თარგმანს. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრის (EMC) ინფორმაციით, ორგანიზაციამ მანანა საღლიანის საქმე სააპელაციო სასამართლოშიც მოიგო. „სასამართლომ ბათილად ცნო მესტიის მუნიციპალიტეტის კულტურისა და ხელოვნების ცენტრის დირექტორის ბრძანება, მანანა საღლიანის სამსახურიდან გათავისუფლების შესახებ, მოპასუხეს დაავალა მოსარჩელის სამსახურში აღდგენა იმავე თანამდებობაზე და დააკისრა იძულებითი განაცდურის ანაზღაურება“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. მორის მაჩალიკაშვილის საქმეზე ადამიანის უფლებების სწავლებისა და მონიტორინგის ცენტრი (EMC), დღეს თბილისის სააპელაციო სასამართლოს საჩივრით მიმართავს და მოითხოვს, 2019 წლის 27 ივლისს, თბილისის საქალაქო სასამართლოს მიერ აღკვეთის ღონისძიების სახით გამოყენებული პატიმრობის გაუქმებას.  EMC მიიჩნევს, რომ მორის მაჩალიკაშვილის მიმართ პროკურატურას არ წარმოუდგენია არცერთი მტკიცებულება, რომელიც პირდაპირ ან საქმის სხვა გარემოებებთან ერთობლიობით მიუთითებდა, რომ ბრალდებულის მიმართ ყველაზე მკაცრი აღკვეთის ღონისძიების გამოყენების საჭიროება არსებობდა.  სრულად...  წყარო: ორგანიზაციის ვებგვერდი

თბილისი. პარტნიორობა ადამიანის უფლებებისთვის (PHR) აქვეყნებს ბლოგპოსტს: რეგიონების მიხედვით შემაკავებელი ორდერების გამოცემის დინამიკა შსს-ს მხრიდან დამატებით ანალიზსა და შესაბამისი ღონისძიებების გატარებას საჭიროებს. „შემაკავებელი ორდერების გამოცემის მაჩვენებელი 2014-2018 წლებში ზრდის მიხედვით ხასიათდება თითქმის ყველა რეგიონში, გურიისა და სამცხე-ჯავახეთის გარდა“. სრულად... წყარო: phrgeorgia.wordpress.com