თბილისი. ომბუდსმენი ხორავას ქუჩაზე არასრულწლოვანთა მკვლელობის სრულყოფილ გამოძიებას მოითხოვს. „მაღალი საზოგადოებრივი ინტერესიდან გამომდინარე, სახალხო დამცველი მოუწოდებს პროკურატურას, გააცნოს ამ დროისთვის არსებული ყველა მიმდინარე გამოძიების მასალები ამ ფაქტთან დაკავშირებით. ასევე, მოუწოდებს პროკურატურას, დაუყოვნებლივ დაიწყოს სხვა პირთა მიერ მკვლელობის გამოძიება და გამოძიების მასალები გააცნოს სახალხო დამცველს", ნათქვამია განცხადებაში. სრულად... წყარო: ombudsman.ge

თბილისი. კოალიცია ,,დამოუკიდებელი და გამჭვირვალე მართლმსაჯულებისთვის" ეხმაურება ანა სუბელიანისა და თამაზ ახობაძის სამსახურში აღდგენის შესახებ სასამართლო გადაწყვეტილების აღუსრულებლობას, რამაც ადმინისტრაციული ორგანოების მიერ სამართლიანი სასამართლოს უფლების პატივისცემა კითხვის ნიშნის ქვეშ დააყენა. სუბელიანი და ახობაძე სსიპ - დანაშაულის პრევენციის ცენტრიდან 2014 წლის იანვარში გათავისუფლდნენ. ისინი თავიდანვე მიუთითებდნენ, რომ გათავისუფლება იუსტიციის მინისტრის, თეა წულუკიანის ჩარევით, უკანონოდ და დაუსაბუთებლად განხორციელდა, ხოლო გათავისუფლების ოფიციალურ მიზეზად რეორგანიზაცია დასახელდა. თითქმის ოთხი წლის განმავლობაში სამივე ინსტანციის სასამართლოში მიმდინარე დავა, საბოლოო 2017 წლის 15 სექტემბერს ანა სუბელიანისა და თამაზ ახობაძის სასარგებლოდ დასრულდა და ცენტრს დაევალა მათი კონკრეტულ პოზიციებზე აღდგენა და გათავისუფლებიდან აღდგენამდე პერიოდისთვის იძულებითი განაცდურის სრულად ანაზღაურება. სრულად წყარო: coalition.ge

თბილისი. 21 მაისს, PHR-ის მიმართვის საფუძველზე, პერსონალურ მონაცემთა დაცვის ინსპექტორმა საქართველოს მთავარი პროკურატურის მიმართ რეკომენდაცია გამოსცა. რეკომენდაციაში, პერსონალურ მონაცემთა დაცვის ინსპექტორი მოუწოდებს საქართველოს მთავარ პროკურატურას, საქმის ინდივიდუალური გარემოებებისა და არასრუწლოვნის საუკეთესო ინტერესების გათვალისწინებით შეაფასოს სუბიექტისათვის დასკვნის ნაწილობრივ გადაცემის ან სხვა ფორმით განმცხადებლის ინფორმირების შესაძლებლობა და, კანონით განსაზღვრული შეზღუდვის საფუძვლის არარსებობის შემთხვევაში, უზრუნველყოს მონაცემთა სუბიექტის მოთხოვნის დაკმაყოფილება. სრულად  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტოტინგის ცენტრი" (EMC) ავრცელებს ვიდეორგოლს, რომელიც საგამოძიებო სისტემაში აუცილებელ რეფორმას მიმოიხილავს. „როგორაა გადანაწილებული გამომძიებლის და პროკურორის უფლებები გამოძიების პროცესში? რა რეფორმებია საჭირო ობიექტური და ყოველმხრივი გამოძიების უზრუნველსაყოფად? რატომაა მნიშვნელოვანი, რომ გამომძიებელი აღიჭურვოს იმ საპროცესო ბერკეტებით, რაც საჭიროა გამოძიების დამოუკიდებლად, სრულყოფილად და ობიექტურად ჩატარებისთვის?" - ეს ის შეკითხვებია, რომელსაც ვიდეორგოლი პასუხებს სცემს. სრულად წყარო: ორგანიზაციის ვებგვერდი

მცხეთა-მთიანეთი. 28 მაისს, „საერთაშორისო გამჭვირვალობა-საქართველოს" აღმასრულებელი დირექტორი და ორგანიზაციის იურისტები ბარისახოს მაცხოვრებლებს შეხვდნენ და იურიდიული კონსულტაცია გაუწიეს. „მობილური იურიდიული კლინიკის ფარგლებში, ჩვენმა იურისტებმა ადგილობრივებს უძრავი ქონების საკუთრებაში დარეგისტრირების წესები განუმარტეს, ასევე ინდივიდუალურად განიხილეს მათი პრობლემები და მოგვარების კონკრეტული სამართლებრივი გზები", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

იმერეთი. 25 მაისს, ბაღდათის მუნიციპალიტეტში ორგანიზაციის „პარტნიორობა ადამიანის უფლებებისთვის" იურისტმა, ანა თავხელიძემ ადგილობრივი სკოლების მასწავლებლებთან ტრენინგი თემაზე – „მასწავლებლის როლი ძალადობაგამოვლილი ბავშვისა და მშობლის მხარდაჭერის პროცესში" ჩაატარა. ტრენინგს ასევე ესწრებოდნენ ადგილობრივი სოციალური მუშაკი და მედიის წარმომადგენლები. „მასწავლებლებთან შეხვედრა დისკუსიის რეჟიმში მიმდინარეობდა. მათ მიერ დასმული კითხვები შეეხებოდა ძალადობის ფორმებსა და საზოგადოებაში არსებულ სტერეოტიპულ დამოკიდებულებებს, რაც მასწავლებლების თქმით, განსაკუთრებულ ხელისშემშლელ ფაქტორს წარმოადგენს ძალადობაგამოვლილი ქალების მხარდაჭერის პროცესში", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. 2018 წლის 23 მაისს საქართველოს სახალხო დამცველმა სასამართლოს მეგობრის მოსაზრებით მიმართა თბილისის სააპელაციო სასამართლოს შ.პ.ს. „აიისას" საქმესთან დაკავშირებით. დოკუმენტში საუბარია გამოხატვის თავისუფლებით დაცულ სფეროსა და მისი მართლზომიერი შეზღუდვის სტანდარტებზე, რაც სასამართლოს განსახილველი საკითხის სათანადოდ შეფასებაში დაეხმარება. სრულად  წყარო: სახალხო დამცველის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი" (EMC) აქვეყნებს ანგარიშს - „დისკრიმინაციისგან დაცვის უფლების განხორციელება სხვადასხვა ჯგუფისთვის საქართველოში". ანგარიში, რომელიც ფონდ „ღია საზოგადოება - საქართველოს" ხელშწყობით მოზადდა, აანალიზებს 2017 წელს, საქართველოში ცალკეულ ჯგუფთა თანასწორობის უფლების რეალიზებას და ასახავს დისკრიმინაციასთან ბრძოლის კუთხით არსებულს მდგომარეობას, ძირითად გამოწვევებს, სახელმწიფოს პოლიტიკას, კანონმდებლობასა და პრაქტიკას. დოკუმენტი, "კოალიცია თანასწორობისთვის" მიერ მომზადებული რიგით მეორე ანგარიშია, რომელიც მიზნად ისახავს ქვეყანაში ეფექტური ანტიდისკრიმინაციული პოლიტიკის გატარების ხელშეწყობას და თანასწორობის უზრუნველყოფას. სრულად  წყარო: ორგანიზაციის ვებგვერდი

თბილისი. 27 მაისს, საქართველოს ჟურნალისტური ეთიკის ქარტიის საბჭომ ორგანიზაციის „პარტნიორობა ადამიანის უფლებებისთვის" განცხადება განიხილა. PHR-ი უთითებდა, რომ ტელეკომპანია „ობიექტივის" ჟურნალისტმა მომზადებულ სიუჟეტში პროფესიული ეთიკის მე-8 პრინციპი დაარღვია. „სადავო მასალა ეხებოდა მანუჩარ მელიქიძის ცხოვრებისეული ტრაგედიის შედეგებს და აღწერდა მის ჯანმრთელობის მძიმე მდგომარეობას. PHR-ი მიიჩნევდა, რომ ტრაგედიის სიმძაფრის გადმოცემისას მნიშვნელოვანი ადგილი დაეთმო მისი შვილების ემოციურ განცდებს, რა დროსაც ჟურნალისტმა გაავრცელა ბავშვებისთვის საზიანო ინფორმაცია". ქარტიის საბჭომ ორგანიზაციის მოსაზრებები გაიზიარა და მერვე პრინციპის დარღვევა დაადგინა. სრულად... წყარო: phrgeorgia.wordpress.com

თბილისი. ადამიანის უფლებების სწავლებისა და მონიტორინგის ცენტრი (EMC), მაჩალიკაშვილის საქმის საიდუმლო მასალებზე წვდომის პრობლემაზე მიუთითებს. „თ. მაჩალიკაშვილის სიცოცხლის ხელყოფის საქმეზე პროკურატურაში მიმდინარე გამოძიების ფარგლებში თემირლან მაჩალიკაშვილის ოჯახის ადვოკატებსა და დამოუკიდებელ ექსპერტებს ამ დრომდე არ აქვთ დაშვება საქმისთვის არსებითი მნიშვნელოვანის მქონე მტკიცებულებებზე, რომელიც საიდუმლო ინფორმაციად არის მიჩნეული... სისხლის სამართლის საქმეში სახელმწიფო საიდუმლოების მასალებზე წვდომის შეზღუდვის გამო პრობლემურია თბილისის პროკურატურის საგამოძიებო ნაწილის მიერ საქმეზე კომპლექსური ექსპერტიზის დანიშვნის საკითხიც", ნათქვამია ორგანიზაციის ვებგვერდზე. ორგანიზაცია მოუწოდებს სუს-ს, უზრუნველყოს საიდუმლო მასალებზე წვდომის შესაძლებლობა. სრულად...  წყარო: emc.org.ge

თბილისი. საქართველოს სახალხო დამცველი საქართველოს პარლამენტის წევრების ავტორობით მომზადებულ კანონპროექტს „შეკრებებისა და მანიფესტაციების შესახებ" საქართველოს კანონში ცვლილებების შეტანის თაობაზე და თანმდევ ცვლილებებს ეხმიანება. „კანონის პროექტის განმარტებითი ბარათის მიხედვით, ცვლილებები კონსტიტუციის ახალ რედაქციასთან კანონმდებლობის ჰარმონიზებას ისახავს მიზნად. საქართველოს სახალხო დამცველი მიესალმება ამ პროცესს, თუმცა მიიჩნევს, რომ წარმოდგენილი ცვლილებებით ადგილი აქვს პირთა ფართო წრის მიმართ მშვიდობიანი შეკრების უფლების აბსოლუტურ აკრძალვას, რაც აუარესებს უფლების დაცვის კონსტიტუციურ სტანდარტს და ეწინააღმდეგება ადამიანის უფლებათა დაცვის საყოველთაოდ აღიარებულ საერთაშორისო პრინციპებს", - მიიჩნევს სახალხო დამცველი. სრულად  წყარო: სახალხო დამცველის ვებგვერდი

გურია. 24 მაისს, „ახალგაზრდა პედაგოგთა კავშირთან” არსებული ბავშვთა, თეატრალურმა სტუდიამ, ჩოხატაურის კინოს სახლში გამართა ინტერაქტიული სპექტაკლის „ამიტომ არ მჯერა თქვენი” ჩვენება. „სპექტაკლი მოგვითხრობს ოჯახში ძალადობის მსხვერპლი ბავშვის ისტორიას, რომელიც სახელმწიფო ზრუნვაშია გადაყვანილი. იმ დამოკიდებულებების შესახებ, რასაც საზოგადოება, სკოლა თუ ჩვენს ირგვლივ მყოფი სხვა აქტორები გამოავლენენ მსგავსი პრობლემების მქონე მოზარდების მიმართ. სპექტაკლის დასრულების შემდგომ საინტერესო დისკუსია გაიმართა”, ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. "კოალიციამ თანასწორობისათვის" საქართველოს პარლამენტში დისკრიმინაციის დაცვის უფლების განხორციელების ანგარიშის წარდგენა. ანგარიში სხვადასხვა ჯგუფებისათვის დისკრიმინაციისაგან დაცვის უფლების განხორციელების საკითხს მიმოიხილავს. შეხვედრა საქართველოს პარლამენტის თავმჯდომარის პირველი მოადგილის თამარ ჩუგოშვილის პატრონაჟით გაიმართა და მასში მონაწილეობა საკანონმდებლო და აღმასრულებელი ხელისუფლების წარმომადგენლებმა მიიღეს. "კოალიციამ თანასწორობისათვის" 2014 წელს ფონდ „ღია საზოგადოება - საქართველოს" მხარდაჭერით ჩამოყალიბდა და დღეისათვის რვა არასამთავრობო ორგანიზაციას აერთიანებს. სრულად  წყარო: http://www.osgf.ge

თბილისი. საქართველოს ჟურნალისტური ეთიკის ქარტია აქვეყნებს განცხადებას საპატრიარქოს მიერ „რუსთავი 2-ისთვის გამოცხადებულ ბოიკოტზე. „საქართველოში, როგორც დემოკრატიულ ქვეყანაში, ერთ-ერთი უმაღლესი ღირებულება სიტყვისა და გამოხატვის თავისუფლებაა. რაც არ უნდა კრიტიკულ და სხვა ჯგუფებისთვის მტკივნეულ თემაზე ამზადებდეს ჟურნალისტი გადაცემას, მისი გამოხატვის თავისუფლება დაცული უნდა იყოს. საპატრიარქოს მიერ მოწოდებული ბოიკოტი სწორედ ამ უფლების განხორციელებას უშლის ხელს, აგრესიის სამიზნედ აქცევს კონკრეტულ ჟურნალისტსა და ზოგადად მთელ მედიას. საქართველოს ჟურნალისტური ეთიკის ქარტია მიმართავს ხელისუფლებას, რომელიც უნდა იყოს ქვეყანაში სიტყვისა და გამოხატვის თავისუფლების გარანტი, დაიცვას ჟურნალისტების უსაფრთხოება, ამასთან დააფიქსიროს საკუთარი პოზიცია და მაგალითი მისცეს საზოგადოების სხვა ჯგუფებს ამ ტელეკომპანიასთან თანამშრომლობის გაგრძელებით", ნათქვამია განცხადებაში. სრულად... წყარო: qartia.ge

თბილისი. საქართველოს ახალგაზრდა იურისტთა ასოციაცია აცხადებს, რომ ნიკა გორგილაძეს, რომელიც 17 მაისს საქართველოს მთავრობის ადმინისტრაციის შენობასთან მიმდინარე ანტიჰომოფობიურ აქციაზე დაზარალდა, რეალური საფრთხე ემუქრება. „ნიკა გორგილაძე მუდმივად იღებს მუქარის შემცველ გზავნილებს სოციალური ქსელის მეშვეობით, ასევე, ნიკას განცხადებით, იგი ყოველდღიურად ხდება აგრესიისა და შეურაცხყოფის მსხვერპლი ქუჩასა თუ საზოგადოებრივ ტრანსპორტში", - ნათქვამია საია-ს მიერ გავრცელებულ განცხადებაში, - „ნიკა გორგილაძის მიმართ განხორციელებულ ძალადობასთან დაკავშირებით საიამ როგორც საქართველოს შინაგან საქმეთა სამინისტროს, ასევე საქართველოს მთავარ პროკურატურას მიმართა და ითხოვა ზემოაღნიშნულ ფაქტებზე რეაგირების განხორციელება, ხოლო ნიკას მიმართ დაცვის სპეციალური ღონისძიების გამოყენება". სრულად  წყარო: ორგანიზაციის ვებგვერდი

თბილისი. საქართველოს ახალგაზრდა იურისტთა ასოციაცია მიიჩნევს, რომ სასამართლომ მეტროპოლიტენის მემანქანეებს გაფიცვის უფლება უკანონოდ შეუზღუდა. ამასთან დაკავშირებით, ორგანიზაცია სპეციალურ განცხადებას ავრცელებს. „მეტროს მემანქანეების გაფიცვის მიზანი ღირსეული შრომის პირობებისა და ანაზღაურების მოთხოვნა იყო. სასამართლომ აღნიშნული განჩინება მიიღო კომპანიის შუამდგომლობის საფუძველზე, რომლითაც კომპანია (სარჩელის წინასწარი უზრუნველყოფის მიზნით) ითხოვდა მემანქანეთა გაფიცვის გადადებას/შეჩერებას მანამდე, სანამ სასამართლო გაფიცვის უკანონოდ ცნობასთან დაკავშირებით საქმის განხილვას დაასრულებდა. მიგვაჩნია, რომ სასამართლოს განჩინება არის დაუსაბუთებელი და ეწინააღმდეგება საქართველოს კონსტიტუციასა და ადამიანის უფლებათა საერთაშორისო სტანდარტებსა და ინსტრუმენტს, რომლის მონაწილეა საქართველო. განჩინება ასევე შეიცავს მთელ რიგ სამართლებრივ ხარვეზებს, რის გამოც გაუმართლებლად იზღუდება მეტროპოლიტენის ელ-მატარებლების მემანქანეთა გაფიცვის კონსტიტუციური უფლება", - ვკითხულობთ განცხადებაში. სრულად  წყარო: ორგანიზაციის ვებგვერდი

თბილისი. სახალხო დამცველი ანტიკონსტიტუციურად მიიჩნევს შემოქმედების თავისუფლებასთან დაკავშირებულ კანონპროექტს და პარლამენტს შესაბამის რეკომენდაციებს სთავაზობს. „კანონპროექტი, ძირითადად, იმეორებს კანონში უკვე არსებულ, ე.წ. „მკვდარი ნორმის" მოძველებულ და გამოხატვის თავისუფლებასთან შეუსაბამო რედაქციას. აღსანიშნავია, რომ დღეის მდგომარეობით არც ერთი უწყება არაა უფლებამოსილი ხსენებულ ნორმაზე დაყრდნობით შეზღუდოს შემოქმედების თავისუფლება. კანონპროექტის მთავარი სიახლე კი, შეზღუდვის ახალი კანონის სახით გაფორმება და აღსრულების მექანიზმზე მითითებაა, რაც უკვე ხელშესახებად და პრაქტიკაში გამოყენებადად აქცევს მას", - აცხადებს სახალხო დამცველი. სრულად  წყარო: სახალხო დამცველის ვებგვერდი

თბილისი. საქართველოს სახალხო დამცველმა გაეროს ადამიანის უფლებათა უმაღლესი კომისრის ოფისს, ადამიანის უფლებათა საბჭოს რეზოლუციის „საქართველოსთან თანამშრომლობის" ფარგლებში, საქართველოს ოკუპირებულ ტერიტორიებზე ადამიანის უფლებების მდგომარეობის შესახებ ინფორმაცია მიაწოდა. ინფორმაცია მოიცავს აფხაზეთსა და ცხინვალის რეგიონში უკანასკნელ პერიოდში დაფიქსირებულ ადამიანის უფლებათა დარღვევებს, მათ შორის, გადაადგილების თავისუფლებისა და გამყოფ ხაზებზე უკანონო დაკავებების, განათლების, საკუთრების უფლების დარღვევისა და გამოხატვის თავისუფლების შეზღუდვის ფაქტებს, არჩილ ტატუნაშვილის საქმესა და სამოქალაქო აქტივისტის თამარ მეარაყიშვილის მიმართ განხორციელებულ ზეწოლას. ადამიანის უფლებათა უმაღლესი კომისარი ზეპირ მოხსენებას, მათ შორის - საქართველოს შესახებ, ადამიანის უფლებათა საბჭოს 38-ე, ხოლო წერილობით ანგარიშს საბჭოს 39-ე სესიაზე წარადგენს. სრულად  წყარო: სახალხო დამცველის ვებგვერდი

თბილისი. „მწვანე ბაფთის" კამპანიის ფარგლებში, გაიმართა საგაზაფხულო სკოლა (21-24 მაისი) MH2R - პლატფორმის წევრთა გასაძლიერებლად. „ფსიქიკური ჯანმრთელობა და ადამიანის უფლებები" - MH2R (Mental Health and Human Rights) პლატფორმის ამოცანაა ფსიქიკური პრობლემების მქონე პირთა უფლებების და მათი კეთილდღეობის თანმიმდევრული ლობირება და ამ საკითხების პოლიტიკურ დღის წესრიგში დაყენება-შენარჩუნება. „პლატფორმა აერთიანებს თბილისსა და რეგიონებში ფსიქიკური ჯანმრთელობის საკითხებსა და ადამიანის უფლებებზე მომუშავე საზოგადოებრივ ორგანიზაციებსა და მათ გაერთიანებებს ქუთაისიდან, ზუგდიდიდან, ბათუმიდან, სიღნაღიდან, თელავიდან და გორიდან. პლატფორმის წევრები შეეცდებიან ერთობლივად გადაწყვიტონ საქართველოს ფსიქიკური ჯანმრთელობის სფეროსთვის სტრატეგიული საკითხები". სრულად...  წყარო: ორგანიზაციის ვებგვერდი სოციალურ ქსელში

თბილისი. „თბილისის საქალაქო სასამართლოს გადაწყვეტილება, რომლითაც მეტროს მემანქანეებს (ააიპ ერთობა 2013) გაფიცვის უფლება შეეზღუდათ, შრომითი უფლებებისათვის საზიანო და საშიში პრეცედენტია", - აცხადებს სქართველოს სახალხო დამცველი. განცხადებაში, რომელიც სახალხო დამცველმა მეტროპოლიტენის მემანქანეებისთვის გაფიცვის უფლების შეზღუდვის გამო გააკეთა, ამ ფაქტთან დაკავშირებული ვითარება და სასამართლოს მიერ მიღებული გადაწყვეტილებებია მიმოხილული. სრულად  წყარო: სახალხო დამცველის ვებგვერდი

ორგანიზაცია Human Rights Watch მოუწოდებს მსოფლიოს ლიდერებს მომავალ თვეში ბოიკოტი გამოუცხადონ ფეხბურთში მსოფლიო ჩემპიონატის გახსნის ცერემონიას რუსეთში, თუ რუსეთის პრეზიდენტი, ვლადიმირ პუტინი ნაბიჯებს არ გადადგამს სირიელი სამოქალაქო პირების დასაცავად. სრულად... წყარო: www.radiotavisupleba.ge

ENNHRI-ს სამოქმედო გეგმაში, დევნილთა უფლებების დაცვის მიმართულებით, საქართველოს სახალხო დამცველის საქმიანობა აისახა. 2018 წლის 22-27 აპრილს კიევში ადამიანის უფლებათა ეროვნული ინსტიტუტების ევროპული ქსელის (ENNHRI) მიერ გამართულ სამუშაო შეხვედრაზე მომზადდა ადამიანის უფლებათა ეროვნული ინსტიტუტების, დევნილთა უფლებების დაცვის მიმართულებით, მანდატის გაძლიერების სამოქმედო გეგმა. აღნიშნულ დოკუმენტში, სახალხო დამცველის საქმიანობა გამოყენებული იყო, როგორც ერთ-ერთი საუკეთესო პრაქტიკა. სრულად  წყარო: ორგანიზაციის ვებგვერდი