თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: „დევნილთა სტატუსის ჩამორთმევის და შეწყვეტის სტატისტიკა". 2014-2017 წლებში დევნილის სტატუსი ჯამში 1,232 ადამიანს ჩამოერთვა. ყველაზე მეტს სტატუსი 2015 წელს ჩამოერთვა - 625; 2014-2017 წლებში ჯამში ლტოლვილის სტატუსი 26,752 ადამიანს შეუწყდა. ეს, უმეტესწილად, 2014 წელს სავალდებულო რეგისტრაციის გაუვლელობამ განაპირობა; მომდევნო წლებში 5,567 პირმა აღიდგინა სტატუსი. სრულად... წყარო: idfi.ge

თბილისი. ორგანიზაციამ „პარტნიორობა ადამიანის უფლებებისთვის" (PHR) ქუჩაში მომუშავე და მცხოვრები ბავშვებისთვის ტრენინგი ჩაატარა. PHR-ის იურისტმა ტრენინგზე ისაუბრა, თუ რა სამართლებრივი რეგულაციები და მექანიზმები არსებობს ქუჩაში მცხოვრები და მომუშავე ბავშვებისთვის. ყურადღება გაამახვილა ისეთ მწვავე პრობლემაზე, როგორიცაა ტრეფიკინგის საფრთხე ბავშვებში, იძულებითი შრობა და მათი სხვა ანტისაზოგადოებრივ საქმიანობაში ჩაბმა. ასევე, ისაუბრა იმ ხარვეზებზე, რომლებსაც არსებული რეგულაციების აღსრულების პროცესში აწყდება სახელმწიფო. ტრენინგის დასკვნით ნაწილში, იურისტმა აუდიტორიის კითხვებს უპასუხა. სრულად... წყარო: phrgeorgia.wordpress.com

არასამთავრობო ორგანიზაცია „მწვანე კავკასია" აქვეყნებს სიუჟეტს უცხოელი სტუდენტებზე, რომლებიც თბილისის სახელმწიფო სამედიცინო უნივერსიტეტში სწავლობენ. უცხოელი სტუდენტები საუბრობენ მათ გამოცდილებაზე, მოსახლეობის დამოკიდებულებებზე. სიუჟეტში აღნიშნულია, რომ ჯამში 10300 უცხოელი სტუდენტი სწავლობს მსოფლიოს 59 ქვეყნიდან და მათი წლიური დანახარჯი 195 მილიონი ლარია. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) სასამართლოში ყოფილი თავმჯდომარის, ანა დოლიძის უფლებებს დაიცავს. „იუსტიციის საბჭოს წევრის, ანა დოლიძის სახელით, თბილისის საქალაქო სასამართლოში სარჩელით მოთხოვნილია დიმიტრი გვრიტიშვილის მიერ ანა დოლიძესთან დაკავშირებით ტელეკომპანია „პირველის" ეთერში 2018 წლის 16 თებერვალს გაკეთებული პატივის, ღირსებისა და საქმიანი რეპუტაციის შემლახავი ცნობების უარყოფა მასობრივი ინფორმაციის საშუალებით. საია მიიჩნევს, რომ დიმიტრი გვრიტიშვილის განცხადება 2008 წლის აგვისტოს ომის შემდგომ ანა დოლიძის რუსეთის ფედერაციაში ვიზიტთან და რუსულ ორგანიზაციასთან თანამშრომლობასთან დაკავშირებით, წარმოადგენს სიცრუეს და მიზნად ისახავს ანა დოლიძის, როგორც იუსტიციის უმაღლესი საბჭოს წევრის პატივის, ღირსებისა და საქმიანი რეპუტაციის შელახვას", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. უფლებადამცველმა ორგანიზაციებმა, "იდენტობის" საქმეზე ევროსასამართლოს გადაწყვეტილების აღსრულების თაობაზე, ევროპის საბჭოს მინისტრთა კომიტეტთან კომუნიკაცია წარადგინეს. კომუნიკაციის ავტორები მიმართავენ მინისტრთა კომიტეტს, არ დაუშვას საქმეზე ზედამხედველობის პროცესის შეწყვეტა და მოუწოდებენ სახელმწიფოს, მოახდინოს საქმეზე - „იდენტობა და სხვები საქართველოს წინააღმდეგ" - ადამიანის უფლებათა ევროპული სასამართლოს გადაწყვეტილების ეფექტიანი და სრულყოფლი აღსრულება და ლგბტ ჯგუფის მიმართ დისკრიმინაციასა და ჩაგვრას ფუნდამენტური, ფართო და კომპლექსური პოლიტიკით დაუპირისპირდეს. სრულად  წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) მიმართავს პარლამენტის კომიტეტებს საცხოვრებლის უფლების გაუთვალისწინებლობის საკითხზე საჯარო მოსმენის გამართვასთან დაკავშირებით. „საქართველოში უსახლკარობა და სათანადო საცხოვრისის არქონა მნიშვნელოვან გამოწვევას წარმოადგენს. თუმცა, უსახლკარობის პრობლემის სიმწვავის მიუხედავად, არსებული  სისტემა არ აღიარებს ამ საკითხის მნიშვნელობას, რაც საცხოვრებლის არმქონე ან მისი დაკარგვის რისკის წინაშე მდგომი შინამეურნეობების საჭიროებების უგულვებელყოფასა და უსახლკარობის პრობლემის საზოგადოებრივი დღის წესრიგიდან გარიყვაში გამოიხატება. ...უსახლკარობის პრობლემის სიმწვავის და საქართველოს მთავრობის მხრიდან მისი სრულად იგნორირების პირობებში ერთადერთ ბერკეტად რჩება საქართველოს საკანონმდებლო ორგანოს საზედამხედველო უფლებამოსილების ეფექტიანად გამოყენება მთავრობის მხრიდან შესაბამისი პოლიტიკის არარსებობის პრობლემაზე, რაც საცხოვრებლის უფლების საკითხის სამთავრობო სამოქმედო გეგმაში გაუთვალისწინებლობაში გამოიხატება", ნათქვამია ორგანიზაციის განცხადებაში. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) საქართველოში ოჯახში ძალადობის სტატისტიკას აქვეყნებს.  ოჯახში მომხდარი ძალადობის ფაქტების ყველაზე მეტი შემთხვევა თბილისში, იმერეთი-რაჭა-ლეჩხუმსა და კახეთში დაფიქსირდა; 2015 წლიდან ყოველწლიურად 50%-ით იზრდებოდა შემთხვევების რაოდენობა;  2016 წელს წინა წელთან შედარებით მკვეთრად იკლო შემთხვევის გახნის მაჩვენებელმა. სრულად... წყარო: ორგანიზაციის ვებგვერდი სოციალურ ქსელში

თბილისი. „ადამიანის უფლებების სწავლებისა და მონიტორინგი ცენტრი" (EMC), „სოლიდარობის ქსელი - მშრომელთა ცენტრი" და „აუდიტორია 115" 22 მაისს მეტროს თანამშრომელთა სოლიდარობის აქციას მართავენ. „აქციის ორგანიზატორები ვუერთდებით მეტროს თანამშრომელთა ანაზღაურების გაზრდის მოთხოვნას, რამდენადაც მათი მოთხოვნები არის სამართლიანი და მნიშვნელოვანი არა მხოლოდ მათთვის, არამედ ყველა მშრომელისთვის", - ნათქვამია ამ საკითხთან დაკავშირებით გავრცელებულო განცხადებაში, - „ჩვენ მივიჩნევთ, რომ მეტროს თანამშრომელთა გაფიცვა სრულად კანონიერია. ისინი, წლების განმავლობაში, მოლაპარაკებების გზით უშედეგოდ ცდილობდნენ მიეღოთ სამართლიანი ანაზღაურება. დღეს მათ სრული უფლება აქვთ გაფიცვის გზით იბრძოლონ საკუთარი შრომითი უფლებების დასაცავად". სრულად  წყარო: ორგანიზაციის ვებგვერდი

თბილისი. სამოქალაქო პლატფორმაში „არა-ფობიას!" შემავალი ორგანიზაციები საქართველოს პარლამენტის წევრის, კობა ლურსმანაშვილის განცხადებას ეხმაურებიან. „უაღრესად შემაშფოთებელია საქართველოს პარლამენტის წევრის, პარტია ქართული ოცნების წარმომადგენლის, კობა ლურსმანაშვილის მიერ ჰოფომობიური განცხადების გაკეთება, რომელიც უფრო მეტად ამწვავებს ბოლო დროს გაძლიერებულ აგრესიასა და აღვივებს სიძულვილს საზოგადოების სხვადასხვა ჯგუფების მიმართ”, - ვკითხულობთ განცხადებაში, - „მოვუწოდებთ საქართველოს პარლამენტის წევრებს, პასუხისმგებლობით მოეკიდონ საკუთარ მანდატს და სტატუსს, თავი შეიკავონ საჯარო სივრცეში სიძულვილის ენის შემცველი გამონათქვამებისგან და ნაცვლად საზოგადოების სხვადასხვა ჯგუფებს შორის სიძულვილისა და შუღლის გაღვივებისა, ქვეყანაში კანონმდებლობის დახვეწაზე, მთავრობის საქმიანობის კონტროლსა და მათზე დაკისრებულ სხვა ფუნქციების განხორციელებაზე, მათ შორის უმცირესობათა უფლებების დაცვაზე იზრუნონ". სრულად  წყარო: http://www.gdi.ge

თბილისი. „ადამიანის უფლებების სწავლებისა და მონიტორინგის ცენტრი" (EMC) და საქართველოს ახალგაზრდა იურისტთა ასოციაცია 12 მაისის მოვლენების სამართლებრივ შეფასებას მოამზადებენ. „ამ დრომდე, შინაგან საქმეთა სამინისტროს მხრიდან გაკეთებული განმარტებების მიუხედავად, საზოგადოებაში რჩება კითხვები სპეცრაზმისა და საპოლიციო ძალის გამოყენების დასაბუთებულობასა და თანაზომიერებაზე, კლუბ "ბასიანის” მიმდებარე ტერიტორიაზე სპონტანური აქციის მონაწილეთა მიმართ პოლიციის მიერ გამოყენებული ძალის და ათეულობით პირის ადმინისტრაციული წესით დაკავების კანონიერებაზე. 12 მაისის ღამის მოვლენები, საპოლიციო ღონისძიების მასშტაბების, მასობრივი დაკავებებისა და პოლიციის მხრიდან ძალის გამოყენების ფაქტების გათვალისწინებით, სათანადო დოკუმენტირებას და შეფასებას მოითხოვს. ამ მიზნით, „ადამიანის უფლებების სწავლებისა და მონიტორინტის ცენტრი (EMC)” და საქართველოს ახალგაზრდა იურისტთა ასოციაცია დეტალურად შეისწავლიან 12 მაისის ღამეს და მასთან კავშირში განვითარებულ მოვლენებს", - ვკითხულობთ გავრცელებულ განცხადებაში. სრულად  წყარო: emc.org.ge  

თბილისი. „კოალიცია ბავშვებისა და ახალგაზრდებისთვის" მთავრობას მოუწოდებს გადადგას ქმედითი ნაბიჯები ბავშვთა ჰომოფობიური ბულინგისა და ძალადობისაგან დასაცავად. „კოალიცია ბავშვებისა და ახალგაზრდებისთვის", როგორც ბავშვთა კეთილდღეობის საკითხებზე მომუშავე 41 ორგანიზაციის ქსელი, გმობს მოზარდის სტიგმატიზაციას გენდერული იდენტობის, ფიზიკური და ინტელექტუალური შესაძლებლობების, ეთნიკური და რელიგიური წარმოშობისა და მიკუთვნებულობის მიუხედავად! ყველა ბავშვს აქვს უფლება, იყოს დაცული და ჰქონდეს განვითარების შესაძლებლობა. ჩვენ მოვუწოდებთ საქართველოს მთავრობის ყველა პასუხისმგებელ უწყებას, განახორციელონ შესაბამისი ქმედითი ღონისძიებები", - ვკითხულობთ კოალიციის მიერ გავრცელებულ განცხადებაში. სრულად  წყარო: phrgeorgia.wordpress.com

თბილისი. საქართველოს სახალხო დამცველის მოადგილე და აპარატის თანამშრომლები ევროკავშირის სპეციალურ წარმომადგენელს ადამიანის უფლებათა დაცვის საკითხებში სტავროს ლამბრინიდისს შეხვდნენ. შეხვედრაზე განსაკუთრებული ყურადღება გამახვილდა სამართალდამცავთა მხრიდან არასათანადო მოპყრობის ფაქტებსა და მათი გამოძიების ხარვეზების, პენიტენციურ დაწესებულებებში არსებული ვითარების, ბავშვთა მიმართ ძალადობისა და ოჯახში ძალადობის პრობლემების თაობაზე, რომელთა გადასაჭრელად ხელისუფლების ძალისხმევა ჯერ კიდევ არასაკმარისია. სრულად  წყარო: ორგანიზაციის ვებგვერდი

თბილისი. ჰომოფობიასა და ტრანსფობიასთან ბრძოლის საერთაშორისო დღესთან დაკავშირებით, საქართველოს სახალხო დამცველი განცხადებას ავრცელებს. „17 მაისი ჰომოფობიასა და ტრანსფობიასთან ბრძოლის საერთაშორისო დღეა, რომლის აღნიშვნა მსოფლიო ჯანდაცვის ორგანიზაციის მიერ ჰომოსექსუალობის დაავადებათა ნუსხიდან ამოღების თარიღს უკავშირდება", - ვკითხულობთ განცხადებაში, - „საქართველოში ჰომოფობიური და ტრანსფობიური განწყობები მჭიდრო კავშირშია ლგბტ+ ადამიანების მიმართ ძალადობის და დისკრიმინაციის მაჩვენებელთან. სახალხო დამცველის პრაქტიკა ცხადყოფს, რომ თანასწორობის უფლების რეალიზაციის მიმართულებით ერთ-ერთ ყველაზე დაუცველ ჯგუფს სწორედ ლგბტ+ ადამიანები წარმოადგენენ. საზოგადოებაში არსებული სტერეოტიპები და წინასწარგანწყობები ყოველდღიური რისკის ქვეშ აყენებენ მათ მიერ ისეთი მნიშვნელოვანი უფლებების გამოყენებას, როგორიცაა განათლების, დასაქმების, ჯანმრთელობის დაცვის, სხვადასხვა სფეროში მომსახურების მიღებისა და მშვიდობიანი შეკრების უფლება". სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ადამიანის უფლებათა სამართლის მაგისტრის, მარიამ ბეგაძის სტატიას: „17 მაისი: კოლექტიური მეხსიერების პოლიტიკური პოტენციალი". „სტატიაში, პირველ რიგში, მოკლედ იქნება მიმოხილული საქართველოში აიდაჰო დღეს ლგბტ თემის შეკრების ისტორია და ის კოლექტიური მეხსიერება, რომელიც აქტივისტებს დღესაც აერთიანებთ 17 მაისის გარშემო. როდესაც უსაფრთხოების დაცვის გარანტიების მოპოვებისთვის თემის წევრებს, საზოგადოების სხვა ჯგუფებისგან განსხვავებით, არაერთ კომპრომისებზე უწევთ წასვლა, ხდება საჯარო სივრცისთვის ბრძოლის ჩაგვრის საერთო გამოცდილებად ფორმირება. სტატიაში წარმოდგენილი პოლონეთის გამოცდილებაც წარმოაჩენს კოლექტიურობის მნიშვნელობას მოვლენებზე ემოციების, მეხსიერების ფორმირებისას, ასევე მის საზოგადოებრივ მეხსიერებასთან დაკავშირებისას", ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „საერთაშორისო გამჭვირვალობა - საქართველო" (TI) მიიჩნევს, რომ ეკა ბესელიასა და ლევან გოგიჩაიშვილის მიერ დარეგისტრირებული საკანონმდებლო ინიციატივა საფრთხეს უქმნის გამოხატვის თავისუფლებას. ამასთან დაკავშირებით, ორგანიზაციამ სპეციალური განცხადება გაავრცელა. სრულად  წყარო: ორგანიზაციის ვებგვერდი

თბილისი. სახალხო დამცველი ეხმიანება 2018 წლის 13 მაისს „თეთრი ხმაურის მოძრაობის" მიერ ორგანიზებული აქციის „ჩვენი თავისუფლებისთვის" პარალელურად მიმდინარე „ქართული მარშისა" და სხვა ნეონაცისტური დაჯგუფებების მიერ ორგანიზებულ აქციის მონაწილეთა მხრიდან ძალადობრივ ქმედებებს და მოუწოდებს სამართალდამცავ ორგანოებს შესაბამისი რეაგირებისკენ. „სახალხო დამცველი მოუწოდებს საქართველოს შინაგან საქმეთა სამინისტროს, დროულად გამოავლინოს 13 მაისის კონტრაქციის დროს შესაძლო ყველა დანაშაულებრივი ქმედება და წარმართოს ეფექტიანი გამოძიება დამნაშავე პირთა გამოვლენისა და მათთვის შესაბამისი პასუხისმგებლობის დაკისრების მიზნით. ასევე, გამოძიების მიმდინარეობის თაობაზე პერიოდულად მოახდინოს საზოგადოების ინფორმირება. ამავდროულად აუცილებელია რომ მომავალში, ნეონაცისტური ჯგუფების შეკრების დროს დროულად შეაფასოს შესაძლო რისკები და მიიღოს შესაბამისი ზომები დანაშაულებრივი და ძალადობრივი ქმედებების პრევენციისთვის", - ნათქვამია სახალხო დამცველის განცხადებაში. სრულად  წყარო: ორგანიზაციის ვებგვერდი

თბილისი. 2018 წლის 11 მაისს საქართველოს სახალხო თბილისის სააპელაციო სასამართლოს მიმართა დამცველმა სასამართლოს მეგობრის მოსაზრებით, რომელშიც პოლიციის მიერ ნარკოტიკების უკანონო შეძენისა და შენახვის ბრალდებით დაკავებული და პასუხისგებაში მიცემული გ.შ.–ს სისხლის სამართლის საქმესთან დაკავშირებით ნეიტრალური მტკიცებულებების მნიშვნელობაზე იმსჯელა. სახალხო დამცველის მოსაზრებაში შეჯამებულია ადამიანის ევროპული სასამართლოსა და შიდა სასამართლოს ცალკეული გადაწყვეტილებებით შექმნილი პრაქტიკა ნეიტრალური მტკიცებულების მნიშვნელობა, იმ ფონზე, როდესაც 1. ბრალდების მხარის მიერ წარმოდგენილი მტკიცებულებები მხოლოდ პოლიციელთა ჩვენებებს და მათ მიერ შედგენილ საპროცესო დოკუმენტაციას ეყრდნობოდა; 2. ამ მტკიცებულებათა სანდოობის ეჭვი წარმოშვა დაცვის მხარის საწინააღმდეგო მტკიცებულებებმა 3. შესაძლებლობის მიუხედავად არ არის წარმოდგენილი ნეიტრალური მტკიცებულება, რომელიც გამორიცხავს ან დაადასტურებს მხარეთა ვერსიებს. სრულად  წყარო: ორგანიზაციის ვებგვერდი

თბილისი. პარტნიორობა ადამიანის უფლებებისთვის (PHR) აქვეყნებს განცხადებას სურამის ფსიქიატრიული საავადმყოფოში პაციენტებისათვის იურიდიული დახმარების მიღების შეზღუდვასთან დაკავშირებით. „შეგახსენებთ, რომ 2018 წლის 11 მარტს ტელეკომპანია იმედის ეთერში, გადაცემა „იმედის კვირაში" გავიდა სიუჟეტი, სადაც ვახტანგ ამირანაშვილი მიუთითებდა, რომ მას არაერთხელ მიუღია მონაწილეობა ფსიქიატრიულ დაწესებულებაში მოთავსებული ქალი ბენეფიციარების ბანაობისა და გაპარსვის პროცესში. სიუჟეტში ასევე ნაჩვენები იყო თუ რა დამამცირებელ და ღირსების შემლახავ პირობებში უწევთ ცხოვრება დაწესებულებაში მოთავსებულ ადამიანებს. სწორედ, სიუჟეტში ნაჩვენებმა დარღვევებმა წარმოშვა საკითხზე ოპერატიულად რეაგირებისა და დირექტორის დაწესებულებიდან სწრაფი წესით ჩამოშორების საჭიროება, რათა თავიდან ყოფილიყო აცილებული არასათანადო და ღირსების შემლახავი მოპყრობის,  გენდერული დისკრიმინაციისა და შესაძლო ძალადობის შემთხვევების რისკები", ნათქვამია ორგანიზაციის ვებგვერდზე. ორგანიზაციის განცხადებით, სამინისტრომ საზოგადოებრივი მღელვარების ჩახშობის მიზნით მხოლოდ ფორმალურად დანიშნა დროებითი მმართველი, რაც გაუმართლებელი და მიუღებელია. PHR მოუწოდებს ჯანდაცვის სამინისტროს უზრუნველყოს ბენეფიციარების უფლებადამცველებთან შეხვედრა. სრულად... წყარო: phrgeorgia.wordpress.com

თბილისი. 2018 წლის 14 მაისს საქართველოს სახალხო დამცველი, მოძრაობა „თეთრი ხმაურისა" და სხვა არასამთავრობო ორგანიზაციების წარმომადგენლებთან ერთად, შინაგან საქმეთა მინისტრს შეხვდა. შეხვედრაზე 12 მაისს პოლიციის მიერ ღამის კლუბებში ჩატარებული სპეცოპერაციის ირგვლივ არსებული საკითხები განიხილეს. შეხვედრის დასრულების შემდეგ, სახალხო დამცველმა განაცხადა, რომ მინისტრის დაპირებისამებრ, შინაგან საქმეთა სამინისტრო ომბუდსმენის აპარატს სპეცოპერაციის ამსახველ ვიდეო მასალას გადასცემს, რაც სახალხო დამცველის აპარატს ძალის გადამეტების თითოეული შემთხვევის შესწავლის საშუალებას მისცემს. სრულად  წყარო: ორგანიზაციის ვებგვერდი

კახეთი. 11 მაისს, კახეთის რეგიონის (თელავის, ახმეტის, გურჯაანის, ლაგოდეხის, ყვარლის და საგარეჯოს) სოციალური მომსახურების სააგენტოს სოციალურ მუშაკებთან და ფსიქოლოგებთან საინფორმაციო შეხვედრა გაიმართა. შეხვედრაზე განიხილეს სოციალური მუშაკების როლი ოჯახში ძალადობის, ნაადრევი ქორწინებისა და ბულინგის შემთხვევებთან დაკავშირებით. სრულად... წყარო: www.ombudsman.ge

7-11 მაისს, საინფორმაციო შეხვედრები თემაზე „ბავშვთა შრომა ქუჩაში" გაიმართა ბათუმში, ქობულეთსა და ოზურგეთში. შეხვედრები შედგა დაინტერესებულ მხარეებთან, სამოქალაქო განათლების პედაგოგებთან და სკოლის მოსწავლეებთან.  „საინფორმაციო შეხვედრების მიზანია: მონაწილეებს გააცნოს ქუჩაში მცხოვრებ და/ან მომუშავე ბავშვთა საჭიროებების კვლევის შედეგები; მიაწოდოს ინფორმაცია მათ ქუჩაში ფულადი სახით მოწყალების გაღების საზიანო პრაქტიკის შესახებ; ხელი შეუწყოს დისკუსიას რეგიონებში ბავშვთა შრომის კუთხით არსებული მდოგმარეობის შესახებ", ნათქვამია ორგანიზაციის ვებგვერდი სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ადამიანის უფლებებზე მომუშავე ორგანიზაციები 12 მაისს ღამით ჩატარებული მასშტაბური სპეცოპერაციისა და პოლიციის მიერ ადამიანის უფლებების მძიმე დარღვევის ფაქტებს ეხმიანებიან. „ცხადია, ხელმომწერი ორგანიზაციები ვიაზრებთ ნარკორეალიზაციასთან ბრძოლის მნიშვნელობას და ამ კუთხით სახელმწიფოს ვალდებულებებს. ეს პროცესი გავლენიანი დანაშაულებრივი ქსელების გამოვლენითა და მათ მიმართ მკაცრი რეაგირებით უნდა დაიწყოს. ამავე დროს, აუცილებელია წამალდამოკიდებული პირების მიმართ სახელმწიფო პოლიტიკის არსებითი ცვლილება და არაჰუმანური და დასჯაზე ორიენტირებული პოლიტიკის ნაცვლად, ზრუნვაზე და სოციალურ რეაბილიტაციაზე ორიენტირებული მიდგომების ამოქმედება. სამწუხაროდ, ამ მიმართულებით დაანონსებული რეფორმა მმართველმა პოლიტიკურმა გუნდმა შეაჩერა და ის მხოლოდ საპოლიციო რეპრესიის და კრიმინალის სფეროში დატოვა", ნათქვამია განცხადებაში. ორგანიზაციები თანამდებობის პირების სამართლებრივი და პოლიტიკური პასუხისმგებლობის საკითხის დაყენებას მოითხოვენ. სრულად... წყარო: www.transparency.ge