თბილისის ადამიანის უფლებათა სახლმა და თბილისის ადამიანის უფლებათა სახლების ფონდმა ერთობლივად წარადგინეს ანგარიში გაეროს ადამიანის უფლებათა საბჭოს უნივერსალური პერიოდული მიმოხილვის (UPR) მესამე ციკლის ფარგლებში... დოკუმენტში შეფასებულია ბოლო საანგარიშო პერიოდში (2015-2020 წწ.) საქართველოში უფლებადამცველების და აქტივისტების უფლებრივი მდგომარეობა და სხვადასხვა პრობლემური ასპექტები, რომლებიც საქართველოში მათ თავისუფალ საქმიანობას აბრკოლებს. განხილულია უფლებადამცველთა დისკრიმინაციის და გამოხატვის თავისუფლების შეზღუდვის შემთხვევები, შეკრების თავისუფლებასთან დაკავშირებული პრობლემები, ცილისმწამებლური და დისკრედიტაციისკენ მიმართული კამპანიები და სხვა.  სრულად...   წყარო: hrht.ge

თბილისი. ადამიანის უფლებათა ცენტრმა პანდემიის შემდგომ ადამიანის უფლებათა მონიტორინგისა და ადვოკატირების მიზნით აამუშავა ცხელი ხაზი. ცხელი ხაზი მუშაობს ქვემო ქართლის, კახეთის, შიდა ქართლის, იმერეთისა და სამეგრელოს რეგიონებში, ასევე თბილისში.  ადამიანის უფლებათა ცენტრი ახორციელებს პროექტს „უფასო იურიდიული ადვოკატირება და ადამიანის უფლებების მონიტორინგი კორონავირუსის პანდემიის შემდეგ“. პროექტის მიზანია კორონავირუსის გავრცელების პრევენციის მიზნით გამოცხადებული საგანგებო მდგომარეობის და პანდემიის შემდგომ პერიოდში სავარაუდო ადამიანის უფლებების დარღვევის ფაქტების იდენტიფიცირება და მათზე ცნობიერების ამაღლება თბილისსა და საქართველოს ხუთ რეგიონში - შიდა ქართლი, კახეთი, ქვემო ქართლი, იმერეთი და სამეგრელო.  ცხელი ხაზის ნომრებია... წყარო: ადამიანის უფლებეათა ცენტრი

პანდემიის პირობებში გენდერული საკითხების გათვალისწინების მნიშვნელობიდან გამომდინარე, საქართველოს სახალხო დამცველმა, გაეროს ქალთა ორგანიზაციის მხარდაჭერით, თარგმნა გაეროს მიერ მომზადებული პოლიტიკის კვლევის დოკუმენტი - „COVID-19-ის გავლენა ქალებზე“. ახალი კორონა ვირუსით გამოწვეული (COVID-19) პანდემია ნეგატიურ გავლენას ახდენს გენდერულ თანასწორობაზე. საერთაშორისო პრაქტიკა ცხადყოფს, რომ მომატებულია გენდერული ნიშნით ძალადობის რისკები, გართულდა მისაწვდომობა ქალთა ჯანმრთელობის სერვისებზე, შემოსავლებზე და საარსებო წყაროზე, განათლებაზე, სუფთა წყალსა და საკვებზე. გაეროს პოლიტიკის კვლევისდოკუმენტი განიხილავს პანდემიის გავლენას ეკონომიკის, ჯანმრთელობის, აუნაზღაურებელი შრომის, გენდერული ძალადობისა და ჰუმანიტარული მისიების თვალსაზრისით. სრულად...  წყარო: ombudsman.ge

თბილისი. ორგანიზაციამ „პარტნიორობა დამიანის უფლებებისთვის“ (PHR), პანდემიის პერიოდში, სამსახურიდან გათავისუფლების გამო, სასამართლოში სარჩელი შეიტანა. ე.ა. „უნივერსალური სამედიცინო ცენტრიდან“ (ყოფილი ონკოლოგიური საავადმყოფო), დირექტორის ბრძანებით გათავისუფლდა.  „2020 წლის აპრილში, ე.ა.-ს, ფორსმაჟორულ სიტუაციაში, მისი მეუღლის ჯანმრთელობის მდგომარეობის მკვეთრი გაუარესების გამო სამსახურის დროებით დატოვება მოუწია. იმ დღის ჩატარებული ანალიზებით ცხადი იყო, რომ ე. ა.-ს მეუღლეს შესაძლოა სიცოცხლის რამდენიმე საათი ან დღე ჰქონოდა დარჩენილი. ე.ა., როგორც მეუღლის ერთადერთი მომვლელი, ვალდებული იყო, მკურნალი ექიმის მოთხოვნით, ქმრის ჰოსპიტალიზაცია რამდენიმე საათში განეხორციელებინა. სამწუხაროდ, ჰოსპიტალიზაციიდან 3 კვირაში ე.ა.-ს მეუღლე გარდაიცვალა“, - ვკითხულობთ PHR-ის მიერ გავრცელებულ ინფორმაციაში, - „ონკოლოგიურმა საავადმყოფომ ე.ა.-ს საავადმყოფოს დატოვების გამო სასტიკი საყვედური გამოუცხადა. მეუღლის გარდაცვალებიდან რამდენიმე დღეში კი, სამსახურიდან გაათავისუფლა „არასაპატიო მიზეზით“ სამსახურის გაცდენისა და შემცვლელის მოსვლამდე მორიგეობის დატოვების გამო“.  სრულად...  წყარო: ორგანიზაციის ვებგვერდი

გურია. ორგანიზაცია „მეგობრობის ხიდი „ქართლოსი“ იწყებს ახალ პროექტს - „ლანჩხუთის მუნიციპალიტეტში საპილოტე სატრენინგო პროგრამა პედაგოგებისთვის მოსწავლეებისა და მშობლების განათლება ოჯახში ძალადობის პრევენციასთან დაკავშირებით“. პროექტი თანადაფინანსებულია პოლონურ–ამერიკული თავისუფლების ფონდის მიერ „RITA-რეგიონი გარდამავალ პერიოდში“ პროგრამის ფარგლებში, რომელსაც ახორციელებს ფონდი „განათლება დემოკრატიისთვის“. სრულად...  წყარო: გვერდი სოციალურ ქსელში

თბილისი. 2020 წლის 28 ივლისს საქართველოს გენერალურმა პროკურატურამ ირაკლი ხოფერიას წამების საქმეზე სამ პოლიციელს ბრალი წარუდგინა. 29 ივლისს თბილისის საქალაქო სასამართლომ სამივე მათგანს აღკვეთის ღონისძიების სახით პატიმრობა შეუფარდა. საქმის წინასასამართლო სხდომა 2020 წლის 24 სექტემბერს ჩატარდება. ირაკლი ხოფერიას საქმე ამჟამად ადამიანის უფლებათა ევროპულ სასამართლოშიც განიხილება. წარდგენილ საჩივარში საია ითხოვს, ევროპულმა სასამართლომ დაადგინოს საქართველოს მხრიდან კონვენციის მე-3 მუხლის (წამების აკრძალვა) დარღვევა ირაკლი ხოფერიას მიმართ განხორციელებული არასათანადო მოპყრობისა და ამ ფაქტზე დაწყებული გამოძიების არაეფექტიანობის საფუძვლით. სრულად  წყარო: ორგანიზაციის ვებგვერდი

თბილისი. საზოგადოებრივი ორგანიზაციები ეხმიანებიან ოკუპირებული ცხინვალის რეგიონის/სამხრეთ ოსეთის მიმდებარე სოფლებში უსაფრთხოების სამსახურების მიერ მედიის, სამოქალაქო საზოგადოებისა და პოლიტიკური პარტიების წარმომადგენლების დაშვების ზოგად და ბლანკეტურ შეზღუდვას და მოუწოდებენ მთავრობას ადამიანის უფლებების საწინააღმდეგო გადაადგილების რეჟიმი შეცვალოს. „თითქმის ერთი წელია, 2019 წლის 30 აგვისტოდან, ოკუპირებული ცხინვალის რეგიონის/სამხრეთ ოსეთის მიმდებარე სოფლებში აკრძალულია სამოქალაქო საზოგადოების წარმომადგენლების, მედიის, ასევე პოლიტიკური პარტიების გადაადგილება და მუშაობა. დაშვებასთან დაკავშირებული შეზღუდვები ვრცელდება უშუალოდ იმ სოფლებზეც, სადაც სრულად ჩვენი სახელმწიფოს კონტროლი ვრცელდება“, - ვკითხულობთ გავრცელებულ განცხადებაში, - „მოვუწოდებთ საქართველოს მთავრობას, გააუქმოს საოკუპაციო ხაზთან და მის მიმდებარე სოფლებში მედიის, სამოქალაქო საზოგადოებისა და პოლიტიკოსების დაშვების ბლანკეტური აკრძალვა; შეიმუშავოს ობიექტურ კრიტერიუმებზე დაფუძნებული მიდგომები, რომელიც არ გასცდება გადაადგილებისა და გამოხატვის თავისუფლების შეზღუდვის ლეგიტიმურ ჩარჩოებს“. სრულად  წყარო: https://www.gyla.ge

ადამიანის უფლებების სწავლებისა და მონიტორინგის ცენტრი (EMC) აქვეყნებს თარგმანს კრეგ კალჰოუნის, მარკ იუგენსმაიერისა და იონათან ვან ანტვერპენის შესავალისა კრებულისთვის - „სეკულარიზმის ხელახალი წაკითხვა“. „ბოლო ხანებამდე, მიიჩნეოდა, რომ საჯარო ცხოვრება არსებითად სეკულარულია. ერთი მხრივ, მკვლევარებს შეეძლოთ, თავდაჯერებით განეხილათ პოლიტიკა, ეკონომიკა და სოციალური ქცევა ისე, თითქოს რელიგია საერთოდაც არ არსებობდა. მეორე მხრივ, სეკულარიზმის საკუთრივი იდეოლოგიური მნიშვნელობა, ერთი შეხედვით, მხოლოდ რელიგიის თავისთავად ცხადად მიჩნეულ გაქრობაზე ან დრომოჭმულობაზე მითითებით შემოიფარგლებოდა. თუმცა, უკანასკნელ წლებში, მსოფლიო არეალზე გამოჩნდნენ პოლიტიკურ აქტივისტები - ზოგნი გაცხადებულად რელიგიური მიზნებით, ზოგნიც მტკიცედ ანტირელიგიური პროგრამებით - რომლებიც უპირისპირდებოდნენ დამკვიდრებულ წარმოდგენებს საჯარო ცხოვრებაში ცნებების „სეკულარიზმი“ და „რელიგია“ ფუნქციონირებაზე და კითხვის ნიშნის ქვეშ აყენებდნენ რელიგიურისა და სეკულარულის თითქოსდა მკვეთრ გამიჯვნას“, - ვკითხულობთ თარგმანში.  სრულად   წყარო: ორგანიზაციის ვებგვერდი

თბილისი. „უფლებები საქართველომ“, მიგრაციის საერთაშორისო ორგანიზაციის (IOM) მხარდაჭერით, დაიწყო ახალი პროექტი, რომელიც საქართველოში მცხოვრები უცხოელი მიგრანტების სამართლებრივ დაცვასა და გაძლიერებას ემსახურება.  პროექტის ფარგლებში, „უფლებები საქართველო“ შეისწავლის უცხოელი მიგრანტების უფლებებთან დაკავშირებულ კანონმდებლობასა და სერვისებში არსებულ ხარვეზებს და მოამზადებს რეკომენდაციებს მათ აღმოსაფხვრელად; მიგრანტებს გაუწევს უფასო სამართელებრივ კონსულტაციას და სასამართლოში წარმომადგენლობას, ასევე, იზრუნებს მათი სამართლებრივი ცნობიერების ამაღლებაზე.  სრულად  წყარო: ორგანიზაციის ვებგვერდი

ადამიანის უფლებათა ევროპულმა სასამართლომ მიიღო და საქმის ნომერი მიანიჭა ადამიანის უფლებათა ცენტრის მიერ მომზადებულ სარჩელს. ადამიანის უფლებათა ცენტრმა ადამიანის უფლებათა ევროპულ სასამართლოს კონვენციის მე-6 მუხლის მესამე ნაწილისა და კონვენციის მე-13 მუხლის დარღვევის თაობაზე მიმართა. განმცხადებლის მიმართ დაირღვა პრინციპი, რომლის თანახმადაც, პირისთვის, მისი უსაფრთხოების მიზნით, წინასწარ უნდა იყოს ცნობილი, რა მოტივით და სტატუსით იბარებენ მას საგამოძიებო ორგანოში, რათა მან შეძლოს, განჭვრიტოს გამოუცხადებლობის სამართლებრივი შედეგები.  სრულად   წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ეკატერინე სხილაძის თვალსაზრისს „მამა და დედა ჩხუბობენ ხანჯლებით: პანდემიის გავლენა ქალთა მიმართ და ოჯახში ძალადობაზე“. „საქართველოში, ახალი კორონავირუსის პანდემიის პირობებში, კიდევ უფრო დამძიმდა ქალთა მიმართ და ოჯახში ძალადობის პრევენციის, მსხვერპლთა დაცვისა და დახმარების მიმართულებით არსებული სისტემური ხასიათის გამოწვევები. გართულებული ეკონომიკური მდგომარეობა, სამუშაო ადგილების დაკარგვა, ბავშვზე ზრუნვის დაწესებულებების ფუნქციონირების შეჩერება, მიმოსვლის შეზღუდვა, ყველაზე მძიმედ ქალებზე აისახა. გაიზარდა ქალების ზრუნვის ტვირთი ოჯახებში, გართულდა მათი ეკონომიკური მდგომარეობა და მოძალადეებთან ხანგრძლივი დროით ყოფნის პირობებში გაიზარდა ოჯახში ძალადობის რისკები“, - ვკითხულობთ პუბლიკაციაში. სრულად  წყარო: ორგანიზაციის ვებგვერდი

თბილისი. სახალხო დამცველი გამოეხმაურა იძულებით გადაადგილებულ პირთა უფლებრივ მდგომარეობას და ქვეყანაში ახალი კორონავირუსის მასშტაბური გავრცელების თავიდან აცილების მიზნით დაწესებული შეზღუდვებით გამოწვეული დევნილთა დარღვეული უფლებების აღდგენის თაობაზე სსიპ დევნილთა, ეკომიგრანტთა და საარსებო წყაროებით უზრუნველყოფის სააგენტოს წინადადებით მიმართა. დოკუმენტში საუბარია დევნილთა ყოფილი კომპაქტური განსახლების ობიექტებში ინფრასტრუქტურის გაუმართაობასა და დევნილთა სოციალურ-ეკონომიკურ პრობლემებზე, რაც პანდემიამ კიდევ უფრო მწვავედ წარმოაჩინა. სრულად  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება უსახლკარობასთან ბრძოლის საკითხებზე პარლამენტის თემატური მოკვლევის დასკვნას და მოუწოდებს მთავრობას, შემჭიდროვებულ ვადებში, შეასრულოს დოკუმენტით გაცემული რეკომენდაციები. „უსახლკარობის სფეროში ქვეყანაში არსებული მძიმე მდგომარეობის გათვალისწინებით, მივმართავთ საქართველოს მთავრობასა და მუნიციპალიტეტებს: უმოკლეს ვადაში შეასრულონ თემატური მოკვლევის ფარგლებში გაცემული რეკომენდაციები და უზრუნველყონ საერთაშორისო სტანდარტებთან შესაბამისი საცხოვრისის პოლიტიკის დაგეგმვა და განხორციელება; ზემოაღნიშნული რეკომენდაციების შესრულების პარალელურად, გადადგან ნაბიჯები იმ ძირეული პრობლემების აღმოსაფხვრელად, რომელიც არსებითია საცხოვრებლის უფლების გარანტირების მიმართულებით. მათ შორისაა, გამოსახლების ყველა ეტაპის მარეგულირებელი კანონმდებლობისა და პრაქტიკის სრულყოფა და საერთაშორისო სტანდარტებთან შესაბამისობა. ასევე, საცხოვრისის პოლიტიკაში სხვადასხვა მოწყვლადი ჯგუფის ინტერესებისა და გამოწვევების ეფექტიანი ასახვა. საქართველოს პარლამენტს: განახორციელოს ეფექტიანი ზედამხედველობა აღმასრულებელი ხელისუფლების მიერ თემატური მოკვლევის ჯგუფის რეკომენდაციების შესრულებაზე“, - ვკითხულობთ EMC-ის მიერ გავრცელებულ განცხადებაში. სრულად  წყარო: ორგანიზაციის ვებგვერდი

თბილისი. ადამიანის უფლებათა ცენტრმა, საქართველოში ნიდერლანდების საელჩოს მხარდაჭერით, 1 ივლისს დაიწყო პროექტი „უფასო იურიდიული ადვოკატირება და ადამიანის უფლებების მონიტორინგი კორონავირუსის პანდემიის შემდეგ“, რომელიც 2021 წლის 30 ივნისამდე გაგრძელდება.  პროექტის მიზანია კორონავირუსის გავრცელების პრევენციის მიზნით გამოცხადებული საგანგებო მდგომარეობის და პანდემიის შემდგომ პერიოდში სავარაუდო ადამიანის უფლებების დარღვევის ფაქტების იდენტიფიცირება და ცნობიერების ამაღლება მათზე თბილისსა და საქართველოს ხუთ რეგიონში - შიდა ქართლი, კახეთი, ქვემო ქართლი, იმერეთი და სამეგრელო.  სრულად  წყარო: ორგანიზაციის ვებგვერდი

თბილისი. 2020 წლის 22 ივლისს საია-მ, ე.წ „იდენტობის ჯგუფის საქმეებზე“ საქართველოს ხელისუფლების მიერ ზოგადი ღონისძიებების სახით აღებული ვალდებულებების შესრულებასთან დაკავშირებით, ევროპის საბჭოს მინისტრთა კომიტეტს წერილობითი მოსაზრებები წარუდგინა.  წარდგენილ დოკუმენტში საიამ მინისტრთა კომიტეტს წარუდგინა ამ კუთხით არსებული პრობლემების დეტალური ანალიზი, შესაბამის რეკომენდაციებთან ერთად. როგორც საია-ს მიერ გამოქვეყნებულ ინფორმაციაში აღნიშნული, სახელმწიფოს მიერ ამ რეკომენდაციების გატარება მნიშვნელოვანია იდენტობის ჯგუფის საქმეების ჯეროვნად და ეფექტიანად აღსასრულებლად, რადგან უზრუნველყოფს, როგორც უშუალოდ დაზარალებულების დარღვეული უფლებებისა და სამართლიანობის აღდგენას, ასევე - ზოგადად, საქართველოში მცხოვრები ლგბტ+ თემისა და იეჰოვას მოწმეების უფლებრივი მდგომარეობის გაუმჯობესებას.  სრულად  წყარო: ორგანიზაციის ვებგვერდი

თბილისი. COVID19-ის პანდემიის შედეგად შექმნილ ახალ რეალობასთან დაკავშირებით, საქართველოს სტრატეგიული კვლევებისა და განვითარების ცენტრი და ფონდი აურესი ერობლივ განცხადებას ავრცელებენ.  „COVID19-ის პანდემიამ საქართველო და ზოგადად მსოფლიო ახალი გამოწვევებისა წინაშე დააყენა. გარდა თვითონ COVID19 ინფექციისა და მასთან დაკავშირებული რისკებისა, დღის წესრიგში დადგა მისი პრევენციისთვის მიღებული ზომებით, კერძოდ პირბადეების და სხვა დამცავი (ხელთათმანი, ხალათი და სხვა) საშუალებებით და ფიზიკური დისტანცირებით გამოწვეული ნეგატიური შედეგი, ისევე როგორც ამ ნეგატიური შედეგების შემცირების საკითხი“, - აღნიშნულია განცხადებაში.  სრულად  წყარო: ორგანიზაციის ვებგვერდი

თბილისი. სისხლის სამართლის საერთაშორისო სასამართლოსთვის საქართველოს კოალიცია ეხმიანება რუსეთის მიერ საქართველოს მოქალაქეების, მათ შორის, ზაზა გახელაძის და ხვიჩა მღებრიშვილის უკანონო დაკავებისა და ბრალდების საქმეებს და ამ ქმედებებს რუსეთის მხრიდან ადამიანის ფუნდამენტური უფლებების მნიშვნელოვან დარღვევად აფასებს.  „ზაზა გახელაძის და ხვიჩა მღებრიშვილის დაკავების და ბრალდების საქმეები სხვა ინციდენტებთან ერთად ნათლად მიუთითებს რუსეთის და აფხაზეთისა და სამხრეთ ოსეთის/ცხინვალის რეგიონის დე-ფაქტო ხელისუფლებათა მხრიდან ადამიანის ფუნდამენტური უფლებების სისტემური ხელყოფის ფაქტებზე. არსებულ მძიმე უფლებრივ მდგომარეობაზე პასუხისმგებლობა სწორედ რუსეთის ფედერაციას ეკისრება როგორც ცხინვალის რეგიონის/სამხრეთ ოსეთის და აფხაზეთის ტერიტორიებზე ეფექტიანი კონტროლის განმახორციელებელ სახელმწიფოს. ოკუპირებული ტერიტორიები, ისევე, როგორც დე-ფაქტო ხელისუფლების წარმომადგენელთა ქმედებები უკონტროლო და თვითნებურია, რაც შესაბამისი აქტორების მხრიდან დროულ და სათანადო რეაგირებას საჭიროებს“, - ნათქვამია განცხადებაში.  სრულად   წყარო: https://www.gyla.ge/ge

თბილისი. ინფორმაციის თავისუფლების განვითარების ისტიტუტი (IDFI) შინაური ბინადარი ცხოველების მოვლა-პატრონობასთან დაკავშირებით, განცხადებას ავრცელებს.  „ბოლო დროს განვითარებულმა მოვლენებმა კიდევ ერთხელ მიაქცია საზოგადოების ყურადღება საქართველოში შინაურ ბინადარ ცხოველთა მოვლა-პატრონობის საკითხისადმი. ცხადად წარმოჩინდა საზოგადოების ცნობიერებაში, კანონმდებლობასა და პრატიკაში არსებული კომპლექსური პრობლემები, რომლებიც საჭიროებენ დაუყოვნებლივ რეაგირებას სისტემურ დონეზე“, - ვკითხულობთ განცხადებაში, - „საჭიროა, შინაურ ბინადარ ცხოველთა კეთილდღეობისა და მოვლა-პატრონობის მიმართულებით არსებული პრობლემები სრულად იქნეს გააზრებული მაღალ პოლიტიკურ დონეზე. ამის შემდეგ კი უნდა გადაიდგეს ქმედითი ნაბიჯები საზოგადოებრივი ცნობიერების ამაღლებისა და სრულყოფილი საკანონმდებლო ბაზის შექმნის მიზნით“.  სრულად  წყარო: ორგანიზაციის ვებგვერდი

თბილისი. საქართველოში ბიზნესისა და ადამიანის უფლებების მიმართულებით არსებული მდგომარეობის, ადამიანის უფლებებისა და ტრანსნაციონალური კორპორაციების, სხვა ბიზნეს საწარმოების საკითხების შესახებ გაეროს სამუშაო ჯგუფის მიერ საქართველოს შესახებ მომზადებული ანგარიშის გათვალისწინებით, სახალხო დამცველმა საქართველოს პრემიერ-მინისტრს წერილობით მიმართა.  სახალხო დამცველი წერილში წუხილს გამოთქვამს ადამიანის უფლებათა სამოქმედო გეგმით აღებული ვალდებულებების შესრულების დაბალ მაჩვენებელთან დაკავშირებით. წერილის მიხედვით, მიუხედავად განხორციელებული რიგი ღონისძიებებისა, სხვადასხვა უწყებისგან მიღებული ინფორმაციის თანახმად, ამ დროისთვის ბიზნესისა და ადამიანის უფლებების შესახებ სამოქმედო გეგმით განსაზღვრული არაერთი უმნიშვნელოვანესი ამოცანის შესასრულებლად ქმედითი ღონისძიებები არ გატარებულა.  სრულად   წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენრი (EMC) დღეს საზოგადოებას წარუდგენს კვლევას - „ეთნიკური უმცირესობების საჭიროებები, საზოგადოებრივი მაუწყებელი და პანდემია“. „2020 წლის 23 მარტს, ეთნიკური უმცირესობებით კომპაქტურად დასახლებული ორი რაიონი, მარნეული და ბოლნისი, ახალი კორონავირუსის შიდა გავრცელების შემთხვევის გამო ჩაიკეტა (რადიო თავისუფლება, 2020). მსუბუქი პანიკა, რომელიც ქვეყანაში ვირუსის უკონტროლო გავრცელების საფრთხეს მოჰყვა, მალევე ქსენოფობიისა და ნაციონალიზმის მორიგ ტალღაში გადაიზარდა, რაც ყველაზე ნათლად სოციალურ ქსელ Facebook-ზე მომხმარებლების კომენტარებში გამოვლინდა (ქევანიშვილი, 2020). „წითელ ზონებად“ გამოცხადებულ რაიონებში ჩაკეტილ მოსახლეობას მომდევნო დღეების განმავლობაში ერთდროულად უწევდა კორონავირუსთან, ეკონომიკური სიდუხჭირის შიშსა და ეთნო-ნაციონალიზმთან ბრძოლა. იმის მაგივრად, რომ ადგილობრივი აქტივისტების ენერგია კორონავირუსის შესახებ ინფორმაციის გავრცელებაზე, ვირუსის პრევენციასა და ეკონომიკური სირთულეების თავიდან არიდებაზე დახარჯულიყო, მათ მოუხდათ ინტერნეტ კამპანიის წამოწყება, რომლის მთავარი მესიჯიც იყო - „მე ვარ საქართველოს მოქალაქე“, - ვკითხულობთ კვლევის შესავალში. სრულად  წყარო: ორგანიზაციის ვებგვერდი

თბილისი. საქართველოს პარლამენტმა 2020 წლის 14 ივლისს მთავრობისთვის დელეგირებული უფლებამოსილების ვადა 2021 წლის 1 იანვრამდე გაახანგრძლივა.  საია კვლავ მიიჩნევს, რომ საქართველოს პარლამენტის მიერ მთავრობაზე შრომისა და გადაადგილების თავისუფლებების შეზღუდვის უფლებამოსილების დელეგირება ეწინააღმდეგება საქართველოს კონსტიტუციის მე-14 და 26-ე მუხლებს და საკონსტიტუციო სასამართლოში ახალი სარჩელი წარადგინა.  სრულად   წყარო: ორანიზაციის ვებგვერდი

შიდა ქართლი. 15-16 და 17 ივლისს, გორის სამოქალაქო აქტივიზმის ცენტრის, პროგრამა PITA-ში ჩართული მოხალისეებისათვის გაიმართა 3-დღიანი ტრენინგი „მრავალფეროვნების მართვა, ტოლერანტობა და სოციალური ინოვაციები“. აქტივობა დაიგეგმა პროგრამა PITA-ს ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს განვითარების სააგენტოს (USAID) ფინანსური მხარდაჭერით.  სრულად  წყარო: გვერდი სოციალლურ ქსელში