თბილისი. ადამიანის უფლებების სწავლებისა და მონიტორინგის (EMC) პირველად შეფასებას აკეთებს პროკურატურის მიერ, რამდენიმე საათის წინ გამოქვეყნებულ გადაწყვეტილებაზე, რომლის საფუძველზეც პროკურატურამ დანაშაულის ნიშნების არარსებობის გამო, თემირლან მაჩალიკაშვილის სიცოცხლის ხელყოფის საქმეზე მიმდინარე გამოძიება შეწყვიტა. „პროკურატურის მიერ მიღებულ გადაწყვეტილებასთან დაკავშირებით უნდა ითქვს, რომ გამოძიების დინამიკა და მასზე სახელმწიფო უსაფრთხოების სამსახურის აშკარა გავლენები, ჩვენ იმთავითვე გვიჩენდა ღრმა ეჭვს, რომ გამოძიების პროცესი ფორმალური, მორჩვენებითი და არაეფექტიანი იყო და ყოველგვარი ნდობა პროკურატურის გამოძიების მიმართ მაჩალიკაშვილების ოჯახის წევრებსა და მათ უფლებათა დამცველებს დაკარგული გვქონდა. ამის მიუხედავად, ამ პერიოდში საქმეზე მიღებული ეს გადაწყვეტილება მოულოდნელი იყო, რადგან გამოძიების პროცესში ჩვენ, როგორც მაჩალიკაშვილების ოჯახის დამცველებს, არა ერთი განცხადება გვქონდა დაყენებული სპეცრაზმის წევრებისა და სუს-ის სხვა თანამშრომლების გამოკითხვის შემდეგ იდენტიფიცირებული არაერთი არსებითი შეუსაბამობისა და უზუსტობის გამო“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებათა ცენტრის ინფორმაციით, დღეს ქართველი მფრინავის, სოსო ოსორაულის გაუჩინარებიდან სამი წელი გავიდა. „ამ დროის მანძილზე სახელმწიფომ არ გადადგა ქმედითი ნაბიჯები და არ გაატარა ეფექტური ღონისძიებები სოსო ოსორაულის ტყვეობიდან გამოსახსნელად და სამშობლოში დასაბრუნებლად. ადამიანის უფლებათა ცენტრი მოუწოდებს საგარეო საქმეთა სამინისტროს და გენერალურ პროკურატურას: გაატარონ ქმედითი ნაბიჯები სოსო ოსორაულის სამშობლოში დასაბრულებლად. გენერალურმა პროკურატურამ გამოიტანოს დადგენილება და სოსო ოსორაულის ოჯახი ცნოს დაზარალებულად“, ნათქვამია ორგანიზაციის ვებგვერდზე. სრულად... წყარო: www.humanrights.ge

თბილისი. დამოუკიდებელი პროფკავშირები და უფლებადამცველები „სპარის“ თანამშრომლის დაჭრის ფაქტს ეხმიანებიან. „წლებია, მომსახურების და, განსაკუთრებით, საცალო ვაჭრობის სფეროში დასაქმებულები მიუთითებენ, რომ სიცოცხლისა და ჯანმრთელობისთვის საშიშ გარემოში უწევთ მუშაობა. მათი თქმით, დაცვის თანამშრომელთა არარსებობის გამო, საფრთხეები განსაკუთრებით იზრდება ღამის ცვლაში მუშაობისას. მიუხედავად იმისა, რომ დამსაქმებლებისთვის ეს საფრთხეები ცნობილი და წინასწარგანჭვრეტადია, ისინი უარს ამბობენ საცალო ვაჭრობის ობიექტები დაცვის თანამშრომლების უზრუნველყონ. თავის მხრივ, საქართველოს მთავრობისთვის „სპარის“ თანამშრომლის მათე ჯომიდავას გარდაცვალება არ გახდა ქმედითი ნაბიჯების გადადგმის წინაპირობა და, შესაბამისად, მან ვერ უზრუნველყო განმეორებითი შემთხვევის თავიდან არიდება. მოვუწოდებთ საქართველოს შრომის ინსპექტირების დეპარტამენტს, დაუყოვნებლივ განახორციელოს „სპარისა“ და საცალო ვაჭრობის სხვა ობიექტთა შემოწმება, დარღვევების გამოვლენა და კომპანიის პასუხისმგებლობის დაყენება. ამასთან, მოვუწოდებთ საქართველოს პარლამენტს აღარ გადადოს შრომის კოდექსის ფუნდამენტური რეფორმა და უპასუხოს მომსახურების სფეროში არსებულ მძიმე გამოწვევებს“, ნათქვამია განცხადებაში. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის (საია) ინფორმაციით, სისხლის სამართლის საერთაშორისო სასამართლოს პროკურორის ოფისის მიერ საქართველოს სიტუაციის გამოძიების დაწყებიდან 4 წელი გავიდა. „გამოძიებას წინ უსწრებდა 7-წლიანი წინასწარი მოკვლევის პერიოდი, რომელიც 2008 წლის 15 აგვისტოს დაიწყო. მიუხედავად საკმაოდ დიდი დროის გასვლისა, დღემდე არ მომხდარა 2008 წლის აგვისტოს ომის დროს ჩადენილი დანაშაულების ეფექტიანი გამოძიება და დამნაშავე პირთა დასჯა“, ნათქვამია საიას ვებგვერდზე. სრულად... წყარო: gyla.ge

ქვემო ქართლი. 22 იანვარს, ადამიანის უფლებების სწავლებისა და მონიტორინგის ცენტრმა (EMC) მარნეულის სოფლების ხულდარას, აღმამედლოს, ქვემო სარალისა და კასუმლოს სათემო ცენტრების აქტივისტებთან ერთად, იმსჯელა ამ სოფლებში იდენტიფიცირებული სოციალური, სამართლებრივი და პოლიტიკური გამოწვევების შესახებ. „ბოლო თვეებში დემოკრატიული კვლევის მეთოდების გამოყენებით ადამიანის უფლებების სწავლებისა და მონიტორინგის ცენტრმა (EMC) აღნიშნული სოფლების საჭიროებები და წუხილები შეისწავლა და სოფლის მოსახლეობისა და სათემო აქვისტების მონაწილეობით სოციალური ცვლილებებისთვის მუშაობის ორგანიზებას გეგმავს. საჭიროებების კვლევა აჩვენებს ადგილობრივი თვითმმართველობის პროცესში მოსახლეობის დაბალი პოლიტიკური მონაწილეობის, სასიცოცხლო რესურსებზე (წყალი, მიწა) და საზოგადოებრივ სიკეთეებზე არასათანადო წვდომის, პოლიციის გულგრილობის, ქალთა საჭიროებების პოლიტიკიდან განდევნის და არაღიარების სერიოზულ და სისტემურ გამოწვევებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის (საია) განცხადებით, საქართველოს ჟურნალისტური ეთიკის ქარტიამ გასართობ გადაცემაში პირადი ცხოვრების ხელშეუხებლობის პრინციპის დარღვევა დაადგინა. „25 იანვარს ჟურნალისტური ეთიკის ქარტიამ სამაუწყებლო კომპანია „რუსთავი 2“-ის გადაცემაში „გვიანი SHOW" დისკრიმინაციისა და პირადი ცხოვრების ხელშეუხლებლობის პრინციპების დარღვევა დაადგინა. აღნიშნული საქმე პრეცედენტულია, ვინაიდან ქარტიამ პირველად იმსჯელა გასართობ გადაცემაში ფარული კამერის გამოყენებასა და მე-10 (პირადი ცხოვრების ხელშეუხებლობის) პრინციპის დარღვევაზე. განმცხადებლის ინტერესებს ახალგაზრდა იურისტთა ასოციაცია იცავდა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) საქართველოს იუსტიციის მინისტრის მხრიდან სახალხო დამცველის დისკრედიტაციის მძიმე შემთხვევებს ეხმიანება და საქართველოს მთავრობას მინისტრის პოლიტიკური პასუხისმგებლობის შესწავლასა და სახალხო დამცველისთვის ეფექტიანი და დამოუკიდებელი საქმიანობის გარანტიების შექმნისკენ მოუწოდებს. სრულად... წყარო: emc.org.ge

თბილისი. საქართველოს სახალხო დამცველს სურს გამოეხმაუროს 2020 წლის 23 იანვარს სპეციალური პენიტენციური სამსახურის/იუსტიციის სამინისტროს მიერ სახალხო დამცველის პატიმრებთან შეხვედრის თაობაზე დეტალების უკანონოდ გასაჯაროების ფაქტს. „ის საკითხი თუ ვის შეხვდება სახალხო დამცველი ან მისი წარმომადგენელი არის კონფიდენციალური ინფორმაცია და მისი გამჟღავნება წარმოადგენს სახალხო დამცველის საქმიანობაში ჩარევას, მასზე ზემოქმედებისა და მისი სამსახურეობრივი საქმიანობისთვის ხელშეშლის მიზნით. მოცემული ქმედება წარმოადგენს საქართველოს სისხლის სამართლის კოდექსის 352-ე მუხლით განსაზღვრულ დანაშაულს. გუშინდელი განცხადება წარმოადგენს საქართველოს იუსტიციის მინისტრის მიერ საქართველოს სახალხო დამცველის ინსტიტუტის წინააღმდეგ დაწყებული პოლიტიკური თავდასხმის კამპანიის გაგრძელებას. სახიფათო და დაუშვებელია იუსტიციის მინისტრის მიერ ისეთი უწყების პოლიტიკური მიზნებისთვის გამოყენება, როგორსაც წარმოადგენს სპეციალური პენიტენციური სამსახური, სადაც სასჯელს იხდიან სხვადასხვა პოლიტიკური შეხედულებისა თუ მსოფლმხედველობის პირები“, ნათქვამია ომბუდსმენის განცხადებაში. სრულად... წყარო: ombudsman.ge

ქვემო ქართლი. 23 იანვარს, EMC-ს წარმომადგენლებმა მარნეულის სამოქალაქო ჩართულობის ცენტრში გამართეს შეხვედრა თემაზე: „რა უნდა ვიცოდეთ პოლიციასთან კონტაქტის დროს“. „შეხვედრის ფარგლებში ორგანიზაციის იურისტებმა ისაუბრებს ისეთ საკითხებზე როგორიცაა: ადმინისტრაციული დაკავება, პირის ნარკოლოგიური შემოწმება, მძღოლთა ნარკოტესტირება, პოლიციელის მიერ პირის გამოკითხვა, სპეციალური საპოლიციო კონტროლი და ამ პროცესებში კანონმდებლობით განმტკიცებულ ძირითად უფლებებსა და მოვალეობებზე“, ნათქვამია ორგანიზაციის გვერდზე სოციალურ ქსელში. სრულად... წყარო: emc.org.ge

თბილისი. 20 იანვარს ახალი კვლევა გამოქვეყნდა, რომელიც გამოძიების ეტაპზე დაზარალებული და მოწმე ბავშვების გამოკითხვისას ფსიქოლოგთა ჩართულობას ეხება. კვლევა ორგანიზაციამ „ინიციატივა მოწყვლადი ჯგუფების რეაბილიტაციისათვის“ საქართველოს ღია საზოგადოების ფონდის მხარდაჭერით ჩაატარა. „კვლევის შედეგები მოწმე და დაზარალებული ბავშვებისთვის ფსიქოლოგის მომსახურების გაწევის პრაქტიკის და ადგილობრივი კანონმდებლობის ანალიზს გვთავაზობს, რომელიც საერთაშორისო სტანდარტებსა და პრაქტიკასთან არის შედარებული. კვლევის შედეგად გამოიკვეთა, რომ გადაწყვეტილების მიღების პროცესი ფსიქოლოგების ჩართვის თაობაზე ბუნდოვანია, მათ არ იციან კონკრეტულად რა არის მათი ფუნქცია ამ პროცესში. მიუხედავად საჭიროებისა, ფსიქოლოგის მომსახურება ყველგან ხელმისაწვდომი არ არის და ფსიქოლოგთა კვალიფიკაცია არ პასუხობს არსებულ საჭიროებებს. იშვიათი გამონაკლისის გარდა, გარემო არ არის მორგებული ბავშვზე (ინფრასტრუქტურა, ინვენტარი) და ბავშვების კონფიდენციალობა დაკითხვის პროცესში სისტემატიურად ირღვევა“, ნათქვამია ღია საზოგადოება - საქართველოს ვებგვერდზე. სრულად... წყარო: osgf.ge

თბილისი. ადამიანის უფლებების სწავლებისა და მონიტორინგის ცენტრი (EMC) წარმოგიდგენთ სტატიების სერიას სხვადასხვა არადომინანტური ეთნიკური და რელიგიური თემის წარმომადგენლების ხედვებს მათ მიმართ გაბატონებულ მზერასთან, პოლიტიკასთან და მის სოციალურ და კულტურულ შედეგებთან დაკავშირებით. „საერთო კავკასიური წარმომავლობა და ისტორიული გამოცდილება მნიშვნელოვნად განაპირობებს ქართული საზოგადოების მზერას ქისტი თემის მიმართ და ქისტები აღქმულნი არიან, როგორც ქართველების მოძმე ხალხი. აღნიშნული მზერა ერთის მხრივ ემოციური და სასიამოვნოა ქისტებისთვის, თუმცა მეორეს მხრივ აქცევს მათ „შინაურ უცხოდ“ და აფერხებს სამოქალაქო თანასწორობის მიღწევას. აღნიშნული მზერის ნათელი მაგალითია, როცა 21 აპრილს ჰესების საკითხზე დაპირისპირების შემდგომ პანკისში ჩასულმა, დღეს უკვე პრემიერ მინისტრმა, გიორგი გახარიამ, ადგილზე შეკრებილ პანკისელ საქართველოს მოქალაქეებს უწოდა „ძმებო“ და ამით მოახდინა ხაზგასმა მათ ეთნიკურ კუთვნილებაზე, ვიდრე მოქალაქეობაზე“. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება სუპერმარკეტების ქსელ „სპარში“, 2019 წლის 30 დეკემბერს, სამსახურეობრივი მოვალეობის შესრულებისას დაშავებული კონსულტანტის, მათე ჯომიდავას, გარდაცვალების ფაქტს. ორგანიზაცია სახელმწიფოს მომსახურეობის სექტორში დასაქმებულ პირთა სიცოცხლის, ჯანმრთელობისა და ღირსების დაცვისთვის გარანტიების შექმნისკენ მოუწოდებს. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბროშურას: რა უნდა ვიცოდეთ პოლიციასთან კონტაქტის დროს. „ბროშურა მიზნად ისახავს ძირითადი უფლებებისა და დაცვის გარანტიების შესახებ პირთა ინფორმირებულობის ზრდას. მასში ყურადღება გამახვილებულია ადმინისტრაციული დაკავებისას, ნარკოლოგიური შემოწმებისას, პოლიციის მიერ პრევენციული უფლებამოსილებით სარგებლობისას, მოწმედ დაბარებისას, ქმედებების ადრესატისათვის კანონმდებლობით მინიჭებულ უფლებებზე, რომელთა ცოდნაც განსაკუთრებით მნიშვნელოვანია იმ ვითარებაში, როდესაც შესაბამისი ორგანოს თანამშრომელი არ ასრულებს კანონისმიერ ვალდებულებას და მოქალაქეს უფლებებსა და განსახორციელებელი ღონისძიების საფუძველს არ განუმარტავს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს სოფელ ხიხანში აჭარიდან ჩამოსახლებული ეკომიგრანტებისთვის სასოფლო-სამეურნეო მიწების რეგისტრაციას ითხოვს. „სოფელში გაუსაძლისი სოციალური და ეკონომიკური პირობებია. ადგილობრივი თემის უპირველესი პრობლემა მიწის და წყლის რესურსებზე მიუწვდომლობაა. ადგილობრივ მოსახლეობას საკარმიდამო მიწის რესურსის გარდა, არ აქვთ სასოფლო-სამეურნეო მიწები, რაც მათ ადგილზე მცირე სოფლის მეურნეობის განვითარების შესაძლებლობას უსპობს. ამას ემატება სოფელში სარწყავი სისტემის არარსებობაც. ცხადია, რომ ამ პირობებში ადგილობრივებს თვითკმარი მეურნეობის შექმნისა და მინიმალური სოციალური საჭიროებების დაკმაყოფილების ელემენტრალური რესურსებიც არ ეძლევათ, რაც მათ სოციალურ მოწყვლადობას აღრმავებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს სახალხო დამცველი იუსტიციის მინისტრის ქმედების კანონიერების შესწავლის მიზნით სახელმწიფო ინსპექტორს მიმართავს. „ვიდეო ჩანაწერებიდან ორი - ასახავდა სახალხო დამცველის რწმუნებულების პენიტენციურ დაწესებულებებში პატიმრებთან ვიზიტის კონკრეტულ მონაკვეთებს. ჩანაწერები, იმავე დღეს, გამოქვეყნდა იუსტიციის სამინისტროს Facebook გვერდზეც. საჯაროდ გავრცელებულ ჩანაწერებში სახალხო დამცველის რწმუნებულების სახეები არ არის დაფარული და მათი იდენტიფიცირება მარტივად შესაძლებელია. ნიშანდობლივია, რომ „საქართველოს სახალხო დამცველის შესახებ“ საქართველოს ორგანული კანონი უკრძალავს იუსტიციის სამინისტროს სახალხო დამცველის რწმუნებულისა და პატიმარის შეხვედრის რაიმე სახის მიყურადებას ან თვალთვალს. ამასთან, პენიტენციურ დაწესებულებებში ვიზუალური ან/და ელექტრონული მეთვალყურეობისა და კონტროლის განხორციელების, ჩანაწერების შენახვის, წაშლისა და განადგურების წესს ადგენს საქართველოს სასჯელაღსრულებისა და პრობაციის მინისტრის 2015 წლის 19 მაისის N35 ბრძანება“, ნათქვამია ომბუდსმენის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: შრომით ურთიერთობებში შეზღუდული შესაძლებლობის მქონე პირებთან მიმართებით გონივრული მისადაგება. „საქართველოში მოქმედი კანონმდებლობა და პრაქტიკა, სამწუხაროდ, შეზღუდული შესაძლებლობის მქონე პირების შრომის ბაზარზე სათანადოდ ჩართვის პრობლემას წლების განმავლობაში ვერ აგვარებს. ამ კუთხით არაერთ გამოწვევას შორის, აღსანიშნავია, მაგალითად, სამუშაო სივრცის მისაწვდომობა, სამუშაო რეჟიმის ადაპტირება. თუმცა დისკრიმინაციის საწინააღმდეგო კანონმდებლობის განვითარების მიუხედავად, გონივრული მისადაგებაზე უარი, როგორც დისკრიმინაციის ფორმა, მასში დღემდე არ არის გათვალისწინებული“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის (საია) განცხადებით, სახელმწიფო ინსპექტორმა იუსტიციის მინისტრის მიერ გავრცელებულ ვიდეოებზე დაუყოვნებლივ უნდა დაიწყოს მოკვლევა. „ვიდეოჩანაწერების საჯაროდ ჩვენება საფრთხეს უქმნის სახალხო დამცველის მანდატის სანდოობას და მისი კონსტიტუციური უფლებამოსილების განხორციელებას. აღსანიშნავია ისიც, რომ სავარაუდო კანონდარღვევის ფაქტი ჩადენილია სახელმწიფო-პოლიტიკური თანამდებობის პირის მიერ და გავრცელებული კადრების გადაცემა მოხდა საჯაროდ. აღნიშნულიდან გამომდინარე, ვფიქრობთ, რომ აღნიშნული ფაქტთან დაკავშირებით აუცილებელია სახელმწიფო ინსპექტორმა დაიწყოს მოკვლევა, რის გამოც, მოგმართავთ თხოვნით, გამოიყენოთ კანონმდებლობით გათვალისწინებული შესაძლებლობა და განცხადებაში მითითებულ ფაქტებთან დაკავშირებით მოახდინოთ შესაბამისი რეაგირება“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის (საია) განცხადებით, იუსტიციის სამინისტროს მიერ ომბუდსმენის წარმომადგენლისა და პატიმრის ჩანაწერის გამოქვეყნება პერსონალურ მონაცემთა დაცვის კანონმდებლობას არღვევს. „გავრცელებულ ვიდეოჩანაწერთან დაკავშირებით მინისტრმა აღნიშნა, რომ ვიდეოში ჩანს, თუ როგორ მიირთმევს სახალხო დამცველის წარმომადგენელი პატიმრის მიერ მომზადებულ ყავას, ასევე შოკოლადს, ეწევა მის სიგარეტს და სარგებლობს პატიმრისთვის განკუთვნილი სველი წერტილით. მითითებული ვიდეოს შენახვითა და გასაჯაროებით უხეშად დაირღვა „პერსონალურ მონაცემთა დაცვის შესახებ“ საქართველოს კანონის პრინციპები და დამუშავების საფუძვლები“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. არასამთავრობო ორგანიზაციები ერთობლივ განცხადებას ავრცელებენ. „გვსურს, შეშფოთება გამოვთქვათ საქართველოს იუსტიციის მინისტრის თეა წულუკიანის მიერ საქართველოს სახალხო დამცველის პრევენციის ეროვნული მექანიზმის მონიტორინგის კადრების გასაჯაროების და აღნიშნული მექანიზმის ექსპერტის მიმართ არაკონსტრუქციული კრიტიკის გამო. აღნიშნული ქმედება, ერთი მხრივ, უხეშად არღვევს როგორც საქართველოს კანონმდებლობით დადგენილ პრინციპებს, მეორე მხრივ კი ეწინააღმდეგება საქართველოს მიერ აღებულ საერთაშორისო ვალდებულებებს. მივიჩნევთ, რომ საქართველოს იუსტიციის მინისტრის ეს ქმედება მისი პოლიტიკური პასუხისმგებლობის დაყენების საფუძველი უნდა გახდეს“, ნათქვამია ორგანიზაციის ვებგვერდზე. სრულად... წყარო: transparency.ge

მოძრაობა ხელმისაწვდომი გარემო ყველასათვის (MAEE) მოგმართავთ ახალი ინიციატივით, რომელიც გულისხმობს ევროკავშირისა და გაერო-ს ერთობლივი პროგრამის, COBERM-ის (ნდობის აღდგენისა და ადრეული რეაგირების მექანიზმი) მიერ მხარდაჭერილი პროექტის ფარგლებში ონლაინ-ბიბლიოთეკის პლატფორმის შექმნას შეზღუდული შესაძლებლობის საკითხებზე. ინიციატივის განსახორციელებლად და სათარგმნი მასალების შესარჩევად ორგანიზაცია საკონსულტაციოდ იწვევს და მიმართავს საქართველოში მოქმედ საერთაშორისო და ადგილობრივ არასამთავრობო და სამოქალაქო საზოგადოების ორგანიზაციებს, დარგის პროფესიონალებსა და ექსპერტებს.  ინიციატივის ფარგლებში, იგეგმება ინგლისურიდან ქართულ ენაზე ითარგმნოს სხვადასხვა ხასიათის მასალა შეზღუდული შესაძლებლობების მქონე პირთა საკითხებზე: აკადემიური ხასიათის სტატიები, კვლევები, ანგარიშები, შშმ პირთა აქტივიზმის საუკეთესო მსოფლიო პრაქტიკები, სასამართლოს გახმაურებული მაგალითები, რომელთაც შშმ პირთა ცხოვრება შეცვალეს და სხვა. ონლაინ-ბიბლიოთეკა ხელს შეუწყობს შშმ პირთა მეტ ინფორმირებულობას და ცოდნის ზრდას შშმ პირთა უფლებრივ საკითხებზე. ყოველივემ ხელი უნდა შეუწყოს შშმ პირთა მონაწილეობას და საზოგადოებრივ ცხოვრებაში აქტიური ჩართულობის გაძლიერებას. გარდა ამისა, ორგანიზაცია გეგმავს კვლევის განხორციელებას, რომელმაც ხელი უნდა შეუწყოს ადგილობრივი საკანონმდებლო სისტემის ინკორპორირებას გაეროს შშმ პირთა უფლებების კონვენციასთან. ამისათვის სამოქალაქო სექტორთან კონსულტაციის გათვალისწინებით განისაზღვრება ზემოთხსენებული კვლევის საგანი, თემა და მიმართულება. მოძრაობა ხელმისაწვდომი გარემო ყველასათვის სიამოვნებით მიიღებს შეზღუდული შესაძლებლობის მქონე პირების, სამოქალაქო სექტორის წარმომადგენლების, დარგის ექსპერტებისა და პროფესიონალების რჩევებსა და რეკომენდაციებს, რათა ბიბლიოთეკისა და კვლევის ინიციატივა განხორციელდეს მაქსიმალურად ეფექტურად, ნაყოფიერად და დაინტერესებული პირების ფართე ჩართულობით. უფრო მეტი ინფორმაციისა და თქვენი წინადადებების მისაწოდებლად გთხოვთ დაუკავშირდეთ პროექტის კოორდინატორს, სოფო შუბითიძეს: sopo.shubitidze@gmail.com; +995 599 84 47 87.

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს 20 იანვარს, ანას ბაღთან მომხდარი დაპირისპირების შესახებ. „ძალადობრივი პროცესები, რომელიც ბოლო რამდენიმე კვირის განმავლობაში განვითარდა და 20 იანვრის დაპირისპირებით დაგვირგვინდა, სწორედ ხარვეზიანი სამართლებრივი და დემოკრატიული მექანიზმების, ქალაქდაგეგმარების არადემოკრატიულად, გაუმჭვირვალედ და კერძო ინტერესის სასარგებლოდ წარმართვის შედეგია“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საერთაშორისო გამჭვირვალობა - საქართველო მორიგი წარმატებული საქმის შესახებ ჩანაწერს ავრცელებს. ორგანიზაციის იურისტის ზვიად ცირეკიძის დახმარებით, მოქალაქე ინგა ბაბუნაშვილმა მართლზომიერ სარგებლობაში არსებული ბინა საკუთრების უფლებით დაირეგისტრირა. „ქუთაისის მერიამ მოქალაქეს უარი უთხრა საკუთრების მოწმობის გაცემაზე, რაც ქუთაისის საქალაქო სასამართლომ უკანონოდ მიიჩნია და მერიას ბაბუნაშვილის სასარგებლოდ ბინის საკუთრების მოწმობის გაცემა დაავალა“. სრულად... წყარო: ორგანიზაციის გვერდი სოციალურ ქსელში