თბილისი. საერთაშორისო გამჭვირვალობა - საქართველო მიიჩნევს, რომ საპარლამენტო არჩევნების უსაფრთხოდ ჩატარების საკითხზე მსჯელობა უნდა დაიწყოს. „მიუხედავად იმისა, რომ ეპიდემიოლოგების პროგნოზებით, ოქტომბერში პანდემიის მასშტაბები და მისგან მომავალი საფრთხე მნიშვნელოვნად უნდა იყოს შემცირებული, დიდი ალბათობით გარკვეული შეზღუდვები კვლავაც შეიძლება დარჩეს. საქართველოს კონტექსტიდან გამომდინარე, ხმის მიცემის ბევრი ალტერნატიული მეთოდი ვერ იმუშავებს, ვინაიდან მას არ ექნება პოლიტიკური პარტიებისა და საზოგადოების ნდობა. აქედან გამომდინარე, აუცილებელია: ეპიდემიოლოგების, საარჩევნო ადმინისტრაციის, პოლიტიკური პარტიებისა და საზოგადოებრივი ორგანიზაციების ჩართულობით დაიწყოს მუშაობა ყველა შესაძლო სცენარზე იმისთვის, რომ განისაზღვროს შესაბამისი ზომები არჩევნების ჯანმრთელობისთვის უსაფრთხო გარემოში ჩასატარებლად...“ სრულად... წყარო: transparency.ge

თბილისი. პორტალი ადამიანის უფლებების შესახებ აქვეყნებს ლანა გიორგიძის სტატიას: საქართველოს ამომრჩეველთა ბაზის გაჟონვის სავარაუდო მიზანი. სტატიაში საუბარია 30 მარტს საინფორმაციო პორტალ Zdnet-ის მიერ საქართველოს ამომრჩეველთა ბაზის ჰაკერულად გავრცელების შესახებ გამოქვეყნებულ ინფორმაციაზე. „28 მარტს, 4,9 მილიონზე მეტი საქართველოს მოქალაქის (გარდაცვლილების ჩათვლით) მონაცემები აიტვირთა ჰაკერულ ფორუმზე (1.04 GB MDB ფაილი), რომელიც შეიცავდა ისეთ პერსონალურ მონაცემებს, როგორიცაა: სახელი, გვარი, დაბადების ადგილი, პირადი ნომერი და ტელეფონის ნომერი“. რესპონდენტები საუბრობენ ინფორმაციის გაჟონვის სავარაუდო მიზნებზე. საგულისხმოა, რომ სიაში გარდაცვლილი ადამიანების მონაცემებიცაა დაფიქსირებული, მაგალითად, 1880 წელს დაბადებული პიროვნებების. მოკვლევის თანახმად, სია შექმნილია 2011 წელს, თუმცა 2020 წლამდე არსად გამოქვეყნებულა. სრულად... წყარო: humanrights.ge

თბილისი. სამართლიანი არჩევნებისა და დემოკრატიის საერთაშორისო საზოგადოების ინფორმაციით, 30 მარტს გამოცემა ZDnet-ის მიერ გავრცელებული ინფორმაცია საქართველოს ამომრჩეველთა სიის გამოქვეყნების შესახებ არაერთ კითხვის ნიშანს აჩენს. „2020 საპარლამენტო არჩევნებამდე 7 თვით ადრე ამომრჩეველთა პერსონალური მონაცემების მასობრივი გამჟღავნების შესახებ ინფორმაცია, შესაძლოა, მიმართული იყოს ამომრჩეველთა სიისა და საარჩევნო პროცესისადმი სანდოობის შერყევისაკენ.  ამდენად, მნიშვნელოვანია საქართველოს მოქალაქეთა პერსონალური მონაცემების მასშტაბურად გავრცელების შესაძლო ფაქტზე დროული და სრულყოფილი გამოძიება, რათა დადგინდეს ნამდვილად ჰქონდა თუ არა მსგავს ფაქტს ადგილი, შეიცავს თუ არა გასაჯაროვებული ინფორმაცია საქართველოს მოქალაქეთა რეალურ მონაცემებს, რომელი მონაცემთა ბაზები გასაჯაროვდა, რა გზით მოხდა მათზე წვდომის მოპოვება და ვის მიერ“, ნათქვამია ორგანიზაციის ვებგვერდზე. სრულად... წყარო: isfed.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს პოსტერს 1991 წლის 31 მარტის რეფერენდუმის შესახებ. „1991 წლის 31 მარტს, საქართველოს მთელ ტერიტორიაზე, მათ შორის აფხაზეთში, ჩატარებულ რეფერენდუმში მონაწილეობა ამომრჩეველთა 90.3%-მა მიიღო. კითხვაზე „თანახმა ხართ თუ არა აღდგეს საქართველოს სახელმწიფოებრივი დამოუკიდებლობა 1918 წლის 26 მაისის დამოუკიდებლობის აქტის საფუძველზე?“ - 3 302 572-მა ადამიანმა უპასუხა. მონაწილეთა 98,9 %-მა საქართველოს დამოუკიდებლობის აღდგენას მხარი დაუჭირა“. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი აქვეყნებს ქამრან მამედლის თარგმანს მალკომ იქსის 1964 წლის 12 აპრილის გამოსვლაზე ქალაქ დეტროიტში.  „მეგობრებო, სანამ, ჩვენ პოლიტიკურად მოვმწიფდებით, ყოვეთვის მოგვატყუებენ, დაგვაბნევენ, ან დაგვარწმუნებენ, რომ მხარი დავუჭიროთ ისეთ ვინმეს, რომელსაც ჩვენი თემის კეთილდღეობა არ აქვს განზრახული. შესაბამისად, შავკანიანთა ნაციონალიზმის პოლიტიკური ფილოსოფია ნიშნავს იმას, რომ ჩვენ უნდა გავატაროთ პოლიტიკური პროგრამა, რომელიც ჩვენს ხალხს ხელახლა გაანათლებს და თვალს აუხელს, რომელიც პოლიტიკურად ცნობიერს გაგვხდის, პოლიტიკურად მომწიფებულს. მხოლოდ ამის შემდეგ ვიქნებით მზად ბიულეტენისთვის და საარჩევნო ურნისთვის. მხოლოდ ამის შემდეგ, შევძლებთ ავირჩიოთ ადამიანი, რომელსაც ჩვენი თემის კეთილდღეობა აქვს განზრახული“. სრულად... წყარო: emc.org.ge

თბილისი. ამერიკის საელჩო საქართველოში აქვეყნებს ერთობლივ განცხადებას საქართველოს აფხაზეთის რეგიონში გამართული ე.წ. „საპრეზიდენტო არჩევნების” შესახებ. „ბულგარეთი, ჩეხეთის რესპუბლიკა, კანადა, ესტონეთი, ფინეთი, ირლანდია, ლატვია, ლიეტუვა, ნორვეგია, პოლონეთი, რუმინეთი, შვედეთი, უკრაინა, გაერთიანებული სამეფო და ამერიკის შეერთებული შტატები არ აღიარებენ ე.წ. „საპრეზიდენტო არჩევნების” ლეგიტიმურობას, რომელიც გაიმართა საქართველოს აფხაზეთის რეგიონში 2020 წლის 22 მარტს. ჩვენ კვლავ ვადასტურებთ სრულ მხარდაჭერას საქართველოს ტერიტორიული მთლიანობისა და სუვერენიტეტის მიმართ მის საერთაშორისოდ აღიარებულ საზღვრებში და კვლავ ღრმად ვართ შეშფოთებული საქართველოს ტერიტორიის განგრძობადი ოკუპაციით“. სრულად... წყარო: ge.usembassy.gov

თბილისი. საქართველოს ახალგაზრდა იურისტთა ასოციაციამ (საია) საკონსტიტუციო სასამართლოს კონსტიტუციური სარჩელით მიმართა, სადაც მოსარჩელე მხარეს თავად საია წარმოადგენს. „საიას არაკონსტიტუციურად მიაჩნია ,,საარჩევნო კოდექსის“ 77-ე მუხლის პირველი ნაწილი, ასევე „საარჩევნო ადმინისტრაციაში განცხადება/საჩივრის შეტანისა და განხილვის ინსტრუქციის დამტკიცების შესახებ“ ცესკოს N8/2012 დადგენილების მე-7 მუხლის მე-2 და მე-3 ნაწილები საქართველოს კონსტიტუციის 31-ე მუხლის პირველ პუნქტთან (სამართლიანი სასამართლოს უფლება) მიმართებით“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საარჩევნო საკითხებთან დაკავშირებით მიღწეული შეთანხმების თაობაზე, საზოგადოებრივი ორგანიზაციები განცხადებს ავრცელებენ.  „მიუხედავად იმისა, რომ აღნიშნული მოდელი არ წარმოადგენს სრულად პროპორციულ სისტემას, რაც სამოქალაქო საზოგადოების ხანგრძლივ მოთხოვნას წარმოადგენდა, მიღწეული შეთანხმება ცალსახად მისასალმებელია, ვინაიდან იგი უზრუნველყოფს უფრო მეტად პროპორციული შედეგის დადგომას, ვიდრე დღეს არსებული საარჩევნო სისტემა“, - აცხადებენ ხელმომწერი ორგანიზაციები, - „იმედს გამოვთქვამთ, რომ საარჩევნო სისტემაზე საკანონმდებლო ცვლილებების ინიცირების შემდეგ, ხელისუფლება უმოკლეს ვადებში განაახლებს საარჩევნო კოდექსში ცვლილებებზე მუშაობას საარჩევნო რეფორმის სამუშაო ჯგუფის ფორმატში, რაც საარჩევნო სისტემაზე მიმდინარე მოლაპარაკებების გამო შეჩერებული იყო. არჩევნებზე დარღვევების პრევენციისა და სამართლიანი საარჩევნო გარემოს უზრუნველსაყოფად აუცილებელია გაგრძელდეს ეუთოსა და ადგილობრივი სადამკვირვებლო ორგანიზაციების რეკომენდაციებზე მსჯელობა და განხორციელდეს შესაბამისი ცვლილებები საარჩევნო გარემოს გაუმჯობესებისათვის“.  სრულად...  წყარო: https://www.gdi.ge

თბილისი. ხელისუფლებასა და ოპოზიციას შორის არჩევნებთან დაკავშირებით მიღწეულ შეთანხმებას საია განცხადებით ეხმაურება.  „მივესალმებით 8 მარტს ხელისუფლებასა და ოპოზიციას შორის საერთაშორისო პარტნიორების ფასილიტაციით მიღწეულ შეთანხმებას და მას დემოკრატიულ წინსვლად ვაფასებთ. იმავდროულად, ვწუხვართ, რომ, დოკუმენტის მიხედვით, რიგგარეშე არჩევნების შემთხვევაში სრულად პროპორციულ სისტემაზე გადასვლა 2024 წლის იქით გადაიწევს. მიუხედავად ამისა, მხარს ვუჭერთ შემოთავაზებულ ვერსიას, რომელიც მნიშვნელოვნად ამცირებს მაჟორიტარული და პროპორციული მოდელების შერევით წარმოქმნილ სისტემურ ხარვეზებს და იძლევა შესაძლებლობას, არჩევნები ჩართული მხარეების მიერ აღიარებული თამაშის წესებით ჩატარდეს“ - ნათქვამია განცხადებაში.  სრულად...  წყარო: https://gyla.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ანა კვინტრაძის ანალიტიკურ სტატიას: სოციალური დახმარებები VS არჩევნები. „სტატია დაიწერა კონკურსისთვის „ჟურნალისტები დემოკრატიული მმართველობისთვის“. კონკურსი ჩატარდა IDFI-ის მიერ ვიშეგრადის საერთაშორისო ფონდისა და ნიდერლანდების სამეფოს საგარეო საქმეთა სამინისტროს ფინანსური მხარდაჭერით. როგორც მონაცემებიდან ჩანს რაოდენობრივად ყველაზე მეტი პირი საარსებო შემწეობას თბილისში იღებს, თუმცა ყველაზე ღარიბ რეგიონად შეგვიძლია რაჭა ლეჩხუმი დავასახელოთ, სადაც მოსახლეობის 30%-ზე მეტი ცხოვრობს საარსებო შემწეობაზე და ეს მონაცემი სამჯერ აღემატება ქვეყნის საშუალო მაჩვენებელს და ასევე თითოეული რეგიონის მაჩვენებელსაც. გამოდის, რომ რაჭა ლეჩხუმსა და ქვემო სვანეთში ყოველი მესამე ადამიანი საარსებო შემწეობის მიმღები პირია“, ნათქვამია სტატიაში. სრულად... წყარო: idfi.ge

თბილისი. საერთაშორისო გამჭვირვალობა - საქართველოს აქვეყნებს ბლოგპოსტს: ინტერნეტ მფლობელობა საქართველოში. „ინტერნეტის მნიშვნელობა, როგორც ყოველდღიური კომუნიკაციის, ასევე ინფორმაციის მიღების კუთხით, დღითიდღე იზრდება. მზარდია ინტერნეტ მომხმარებლების რაოდენობა და შესაბამისად, ინტერნეტ ინდუსტრიაც. ინტერნეტით მიღებული ინფორმაცია განსაკუთრებულ მნიშვნელობას წინასაარჩევნო პერიოდში იძენს და შესაძლოა, გადამწყვეტ როლსაც თამაშობდეს დეზინფორმაციის გაზრდილი საფრთხისა და მედიაწიგნიერების დაბალი კულტურის ფონზე. მაღალი საჯარო ინტერესის გათვალისწინებით, „საერთაშორისო გამჭვირვალობა-საქართველომ“ შეისწავლა 2018 წელს ფიქსირებული და მობილური ინტერნეტის ბაზარზე არსებული მსხვილი ოპერატორების მფლობელობა და მათი ბიზნესკავშირები. კვლევაში, ასევე, მიმოხილულია მოსახლეობაში ინტერნეტის გავრცელების და მოხმარების საკითხები“, ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: გამოხატვის თავისუფლების დარღვევა წინასაარჩევნო კამპანიის კონტექსტში - ევროპული სასამართლოს 2019 წლის 25 ივლისის გადაწყვეტილება. „25 ივლისს ადამიანის უფლებათა ევროპულმა სასამართლომ მიიღო მნიშვნელოვანი გადაწყვეტილება საქმეზე ბრზეზინსკი პოლონეთის წინააღმდეგ (Brzeziński v. Poland). საქმე შეეხებოდა პოლონეთის საარჩევნო კანონმდებლობას, რომელიც სასამართლოს უფლებას აძლევს 24 საათის განმავლობაში შეამოწმოს ინფორმაციის უტყუარობა და შეზღუდოს მისი გავრცელება. სასამართლომ ერთხმად დაადგინა, რომ ამ ნორმის საფუძველზე ბრზეზინსკის მიმართ მიღებული ზომები არღვევდა ადამიანის უფლებათა ევროპული კონვენციის მე-10 მუხლით დაცულ გამოხატვის თავისუფლებას. გადაწყვეტილება მნიშვნელოვანია ზოგადად გამოხატვის თავისუფლების და განსაკუთრებით პოლიტიკური გამოხატვის მაღალი სტანდარტის დაცვის თვალსაზრისით. ამ გადაწყვეტილებით სასამართლომ კიდევ ერთხელ გაუსვა ხაზი გამოხატვის თავისუფლების მნიშვნელობას დემოკრატიული სახელმწიფოს განვითარებისთვის“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს თორნიკე გერლიანის სტატიას „საარჩევნო სისტემის რეფორმა: ოპოზიციის კანონპროექტი და კონსტიტუციასთან მისი შესაბამისობის საკითხი“. სტატია ეხება საქართველოს სახალხო დამცველის მიმართვის პასუხად, ეუთო/ODIHR-ის მიერ გამოქვეყნებულ დასკვნას ოპოზიციის მიერ შემოთავაზებული საარჩევნო რეფორმის (ე.წ. გერმანული მოდელი) შესახებ. „ODIHR-ის დასკვნაში დასაწყისშივე აღნიშნულია, რომ „კანონის კონსტიტუციასთან შესაბამისობაზე საბოლოო გადაწყვეტილება ადგილობრივმა სასამართლოებმა უნდა მიიღონ. ეს მოსაზრება მიმოიხილავს შემოთავაზებულ ცვლილებებს და აანალიზებს მათ რელევანტურ საერთაშორისო ვალდებულებებსა და სტანდარტებთან მიმართებაში…“ ამასთან, როგორც ოდირი მიუთითებს, „ყველა შემოთავაზებული ცვლილება ფრთხილად უნდა იყოს განხილული და პოლიტიკურ პარტიებს შორის ფართო კონსენსუსის საფუძველზე მიღებული.“ დასკვნაში მიმოხილულია კანონპროექტის შესაბამისობა საერთაშორისოდ აღიარებულ, დემოკრატიულ მიდგომებთან და პრინციპებთან. ამ ნაწილში ოდირი მიუთითებს, რომ „შემოთავაზებული პაკეტი არ გვთავაზობს ისეთ ცვლილებებს საარჩევნო წესში, რომელიც გავლენას მოახდენდა უნივერსალური, თავისუფალი, საიდუმლო და პირდაპირი ხმის უფლების პრინციპებთან შესაბამისობის საკითხზე.“ ამდენად, დასკვნა არ ეხება შემოთავაზებული პროექტის კონსტიტუციურობის საკითხს, თუმცა მიუთითებს მის შესაბამისობაზე საერთაშორისოდ აღიარებულ პრინციპებთან“, - ვკითხულობთ სტატიაში, - „მიუხედავად იმისა, რომ ODIHR-ის დასკვნაში არ არის შეფასებული კანონპროექტის კონსტიტუციურობის საკითხი, მნიშვნელოვანია ამ საკითხის თეორიული შეფასება, რათა არ მოხდეს მარგინალიზება იმ იდეის, რომლის მეშვეობითაც, შესაძლოა, 2020 წლის საპარლამენტო არჩევნები სამართლიანი და საზოგადოების ფართო კონსენსუსზე დაფუძნებული საარჩევნო სისტემის ფარგლებში ჩატარდეს”. სრულად...  წყარო: ორგანიზაციის ვებგვერდი

თბილისი. საზოგადოებრივი ორგანიზაციები ხელისუფლებას მიმართავენ დაუბრუნდეს საარჩევნო სისტემის ცვლილების განხილვას. „დაპირებული პროპორციული საარჩევნო რეფორმის ჩაგდება, უზენაესი სასამართლოს დაკომპლექტების პროცესი, შექმნილი პოლიტიკური კრიზისი და საქართველოს მთავრობის პოლიტიკა ქვეყნის პარტნიორების მხრიდან მწვავე კრიტიკის საგანი გახდა. ამის დასტურია ევროპარლამენტის ტრიბუნიდან გაკეთებული კრიტიკული განცხადებები და საქართველოს პრემიერ მინისტრის სახელზე ამერიკის შეერთებული შტატების წარმომადგენელთა პალატისა და სენატის წევრების მიერ გამოგზავნილი რამდენიმე მწვავე წერილი. ამ სიტუაციაში გამოსავალი საზოგადოებისთვის მიცემული პირობის შესრულება და პროპორციულ სააარჩევნო სისტემაზე გადასვლა იქნება. ეს ნაბიჯი ქართული და საერთაშორისო საზოგადოების მხრიდან აღიქმება, როგორც მმართველი პარტიის მზაობა უზრუნველყოს ქვეყნის დემოკრატიული განვითარება“, ნათქვამია ერთობლივ განცხადებაში.  სრულად... წყარო: www.transparency.ge

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) მიიჩნევს, რომ საარჩევნო კოდექსში დაგეგმილი ცვლილებები საფრთხეს უქმნის არჩევნების გამჭვირვალობას. „სამართლიანი არჩევნებისა და დემოკრატიის საერთაშორისო საზოგადოება მკვეთრად უარყოფითად აფასებს ცესკოსა და პარლამენტის იურიდიულ საკითხთა კომიტეტის ავტორობით საქართველოს პარლამენტში საარჩევნო რეფორმის სამუშაო ჯგუფის გვერდის ავლით ინიცირებულ კანონპროექტს საქართველოს ორგანულ კანონში “საქართველოს საარჩევნო კოდექსში” შესატან ცვლილებებთან დაკავშირებით. ორგანიზაცია მიიჩნევს, რომ ინიცირებული ცვლილებების ნაწილი აზრს უკარგავს არჩევნების შედეგების დროულად გამოცხადებისთვის საარჩევნო კანონმდებლობით აქამდე დადგენილ გამჭვირვალობისა და გაყალბების თავიდან აცილების მექანიზმებს და საფრთხის შემცველია დემოკრატიული, თავისუფალი და გამჭვირვალე არჩევნებისთვის“, ნათქვამია განცხადებაში. სრულად... წყარო: isfed.ge

თბილისი. მმართველი პარტიის მიერ წარმოდგენილ საარჩევნო სისტემის ცვლილებებთან დაკავშირებით, საზოგადოებრივი ორგანიზაციები განცხადებას ავრცელებენ. „20 დეკემბერს, მმართველ და ოპოზიციურ პარტიებს შორის საარჩევნო სისტემაზე გამართულ რიგით მეოთხე შეხვედრისას პარლამენტის თავმჯდომარემ გააჟღერა მმართველი გუნდის შემოთავაზება საარჩევნო სისტემის ცვლილების შესახებ, ისე რომ 150 საპარლამენტო მანდატიდან 50 მაჟორიტარული და 100 პროპორციული წესით განაწილდეს. „ქართული ოცნება“ აღნიშნულ შემოთავაზებას პროპორციულ სისტემაზე 2020 წლისთვის გადასვლის ინიციატივის ჩავარდნის შემდეგ „ოპტიმალურ კომპრომისულ გადაწყვეტილებას“ უწოდებს. სინამდვილეში, დღეს გაჟღერებული შემოთავაზებით მმართველი გუნდი კიდევ უფრო შორს წავიდა და დაადატურა სურვილი, რომ 2024 წლის არჩევნებისთვის სრულად პროპორციულ სისტემაზე გადასვლაც გააუქმოს“, - ვკითხულობთ განცხადებაში. სრულად...  წყარო: https://isfed.ge

თბილისი. საქართველოს ახალგაზრდა იურისტთა ასოციაცია (საია) აქვეყნებს კვლევას: „სავალდებულო გენდერული კვოტა საპარლამენტო არჩევნებისას ევროკავშირის წევრ ქვეყნებში“. „სავალდებულო გენდერული კვოტირება ეფექტიანი მექანიზმია გენდერული უთანასწორობის სწრაფად აღმოსაფხვრელად. მისი არსებობის პირობებში იცვლება მხოლოდ კაცების მიერ გადაწყვეტილების მიღების პრაქტიკა, იზრდება შესაბამის პოზიციებზე კვალიფიციური ქალების დასახელების შესაძლებლობა და შესაბამისად, ქალების პოლიტიკური წარმომადგენლობა. ჩვენ შევისწავლეთ ევროკავშირის წევრი სახელმწიფოების კანონმდებლობა და პრაქტიკა, რათა გვენახა, თუ როგორ შეძლეს მათ საკანონმდებლო ორგანოში ქალთა წარმომადგენლობის ზრდა და რა რეფორმები განახორციელეს ამისთვის. ასევე, გვენახა, თუ რომელი საარჩევნო სისტემების პირობებში არის შესაძლებელი უკეთესი გენდერული ბალანსის მიღწევა. კვლევამ აჩვენა, რომ ევროკავშირის 28 ქვეყნიდან სავალდებულო გენდერული კვოტირება საპარლამენტო არჩევნებისას 10 ქვეყანაში გამოიყენება. აქედან პირველი 6 ასევე იყენებს ერთიან პროპორციულ საარჩევნო სისტემას (List PR)“, ნათქვამია ორგანიზაციის ვებგვერდზე.  სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტის (IDFI) ინფოგრაფიკის თანახმად, პროპორციული საარჩევნო სისტემის კანონპროექტის მიღების საწინააღმდეგოდ ხმა მისცა: მცხეთის, ლაგოდეხის და ყვარლის, ქუთაისის, რაჭა-ლეჩხუმის, ქვემო სვანეთის მაჟორიტარმა დეპუტატებმა. ბლოგპოსტი ხაზს უსვამს იმ ფაქტს, რომ კანონპროექტის საყოველთაო განხილვისას, მათ მიერ გაკეთებული განცხადებები აბსოლუტურად ეწინააღმდეგება იმ შედეგს, რომელიც მათი არჩევანის შედეგად დადგა. სრულად... წყარო: idfi.ge

თბილისი. სამოქალაქო საზოგადოების ორგანიზაციები აცხადებენ, რომ საარჩევნო სისტემის გერმანული მოდელი საქართველოს კონსტიტუციას არ ეწინააღმდეგება.  „საქართველოს პარლამენტში 2020 წლისთვის სრულად პროპორციულ არჩევნებზე გადასასვლელად ინიცირებული კონსტიტუციური კანონპროექტის ჩავარდნის შემდეგ, საპროტესტო აქციების მოთხოვნად გამოიკვეთა საქართველოში დღეს მოქმედი შერეული საარჩევნო სისტემის ე.წ. „გერმანული მოდელის“ მიხედვით მოდიფიცირება. აღნიშნული ინიციატივის საპასუხოდ, მმართველი პარტიიდან აცხადებენ, რომ თითქოს ეს ვარიანტი არ არის თანხვედრაში საქართველოს კონსტიტუციასთან. გვსურს, ხაზგასმით განვმარტოთ, რომ „გერმანული მოდელის“ მოდიფიცირებული ვარიანტი საქართველოს კონსტიტუციას არ ეწინააღმდეგება“, - ვკითხულობთ სსო-ების მიერ გავრცელებულ განცხადებაში.  სრულად...  წყარო: isfed.ge

თბილისი. საქართველოს პარლამენტის მიერ, საარჩევნო სისტემის ცვლილებების პაკეტის ჩაგდებას, საზოგადოებრივი ორგანიზაციები ქვეყნის დემოკრატიული განვითარებისთვის საბედისწეროდ მიიჩნევენ.  „პროპორციულ საარჩევნო სისტემაზე გადასვლა არ იყო მხოლოდ რომელიმე პოლიტიკოსის დაპირება ან საზოგადოების მცირე ჯგუფის ახირება. ის მთელი საზოგადოების მოთხოვნა იყო, რომელსაც მხარს უჭერს ფაქტობრივად ყველა პოლიტიკური პარტია და საზოგადოებრივი ჯგუფი ვინც ხედავს არსებული მმართველობის სისტემის სრულ დისკრედიტაციას“, - ნათქვამია სსო-ების მიერ გავრცელებულ განცხადებაში, - „მოვუწოდებთ ბიძინა ივანიშვილს და „ქართულ ოცნებას”, გაიაზრონ ის მძიმე პოლიტიკური კრიზისი, რომელშიც ქვეყანა შევიდა და მიიღოს ყველა პოლიტიკური ზომა მის დასაძლევად, რომლის ერთადერთ და უალტერნატივო გზად პარლამენტის მიერ სრულად პროპორციული საარჩევნო სისტემის დაუყოვნებლივ მიღება წარმოადგენს“.  სრულად...  წყარო: http://www.mdfgeorgia.ge

თბილისი. ადამიანის უფლებების სწავლებისა და მონიტორნიგის ცენტრი (EMC) პარლამენტის მიერ პროპორციულ საარჩევნო სისტემაზე მიმდინარე საპარლამენტო განხილვებთან დაკავშირებით, განცხადებას ავრცელებს. „ადამიანის უფლებების სწავლებისა და მონიტორინგის ცენტრი (EMC) ეხმიანება საქართველოს 2020 წელს საპარლამენტო არჩევნების სრულად პროპორციული წესით, ე.წ. ნულოვანი ბარიერის პირობებში ჩატარების შესახებ კონსტიტუციური ცვლილებების განხილვის პროცესს და პარლამენტს მოუწოდებს დაყოვნების გარეშე დაუჭიროს მხარი ამ ინიციატივას“, - ვკითხულობთ განცხადებაში, - „EMC მოუწოდებს მმართველ გუნდს, ოპოზიციურ პარტიებსა და დამოუკიდებელ დეპუტატებს, გააცნობიერონ ის სოციალური და პოლიტიკური კონტექსტი, რამაც არსებული კონსტიტუციური ცვლილებების საკითხი დღის წესრიგში დააყენა და მოუწოდებს პარლამენტს მხარი დაუჭიროს წარმოდგენილ კონსტიტუციურ ცვლილებებს“. სრულად... წყარო: https://emc.org.ge

თბილისი. საქართველოს ახალგაზრდა იურისტთა ასოციაცია მოუწოდებს საქართველოს პარლამენტს, მხარი დაუჭიროს პროპორციულ საარჩევნო სისტემაზე 2020 წლისთვის გადასვლას. „საერთო სახალხო განხილვებისა და ფართო დისკუსიის შემდეგ, გუშინ საკანონმდებლო ორგანომ დაიწყო და ამ დრომდე აგრძელებს კონსტიტუციური ცვლილებების პლენარულ სესიაზე განხილვას. ამ დრომდე არსებული ინფორმაციით ცვლილებებს მხარს უჭერდა ყველა პოლიტიკური ჯგუფი. თუმცა პროცესმა აჩვენა, რომ მმართველ გუნდში არსებობს კრიტიკული მასა დეპუტატებისა, რომელიც ემხრობიან მაჟორიტარულ კომპონენტს და მზად არიან საფრთხე შეუქმნან რეფორმას“, - ნათქვამია საიას მიერ გავრცელებულ განცხადებაში, - „საია მოუწოდებს საქართველოს პარლამენტის წევრებს შეასრულონ საზოგადოებისთვის მიცემული პირობა და მხარი დაუჭირონ კონსტიტუციური კანონის პროექტს“. სრულად...  წყარო: https://gyla.ge