აჭარა. IFES-ი და ჟურნალისტთა ქსელი გენდერული თანასწორობისათვის აგრძელებენ „გენდერული საუბრებს", რომლის მიზანია ახალგაზრდების ინფორმირება გენდერული თანასწორობის შესახებ და მათი მოტივირება გახდნენ გენდერული საკითხების ადვოკატები. პროექტის ფარგლებში, ხელვაჩაურის მუნიციპალიტეტის თხინვალის #1 საჯარო სკოლას ბათუმის გენდერის მედია ცენტრის ხელმძღვანელი და ხელვაჩაურის საკრებულოს გენდერული თანასწორობის საბჭოს თავმჯდომარე და მოსწავლეებს სავალდებულო გენდერული კვოტების, ქალთა პოლიტიკური მონაწილეობის და რეგიონში გენდერული თანასწორობის პოლიტიკის გატარების მნიშვნელობის შესახებ ესაუბრნენ. სრულად  წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა - საქართველო" მეცხრე მოწვევის პარლამენტის მიერ ქალთა უფლებრივ გაძლიერებაზე განხილული კანონპროექტების შესახებ ინფორმაციას აქვეყნებს. „პარლამენტში მიმდინარეობს ქალთა უფლებრივი მდგომარეობის შესახებ მნიშვნელოვანი საკანონმდებლო ინიციატივების განხილვა, მათ შორის გენდერული კვოტირების შემოღებისა და სექსუალური შევიწროების აკრძალვის თაობაზე. საკანონმდებლო ცვლილებების ნაწილზე მუშაობა მიმდინარეობს გენდერული თანასწორობის საბჭოს ფორმატში. მნიშვნელოვანია, რომ წარმოდგენილ საკითხებზე მსჯელობა არ გაჭიანურდეს და დროულად მოხდეს შესაბამისი ცვლილებების მიღება. ვიმედოვნებთ, პარლამენტში ფართო მხარდაჭერა ექნება გენდერული თანასწორობის ხელშეწყობის, ქალთა უფლებრივი (მათ შორის პოლიტიკური უფლებების) გაძლიერების მიმართულებით წარდგენილ ინიციატივებს. პარლამენტში ქალთა უფლებრივი მდგომარეობის შესახებ წარდგენილი კანონპროექტების ინიციატორები უმეტესად ქალები არიან, იგივე ტენდენცია იყო მე-8 მოწვევის პარლამენტშიც რაც გასათვალისწინებელი ფაქტორია ქალთა პოლიტიკაში მონაწილეობის აქტუალობაზე მსჯელობისას", ნათქვამია ორგანიზაციის ვებგვერდზე. სრულად... წყარო: www.transparency.ge

თბილისი. პარტნიორობა ადამიანის უფლებებისთვის (PHR) იურისტები განაგრძობენ ქალთა მიმართ ძალადობის შესახებ სამუშაო შეხვედრებს საქართველოს რეგიონებში. 8 თებერვალს, ორგანიზაციის იურისტებმა ჭიათურის მუნიციპალიტეტში მორიგი სემინარი ჩაატარეს თემაზე – „ექიმის როლი ძალადობაგამოვლილი ქალის მხარდაჭერის პროცესში”. სემინარში ადგილობრივ სამედიცინო დაწესებულებებში დასაქმებული ექიმები და ექთნები მონაწილეობდნენ „შეხვედრების ციკლი მიზნად ისახავს სამედიცინო დაწესებულებებში დასაქმებული ექიმებისა და ექთნების ცნობიერების ამაღლებასა და მათ ინფორმირებულობას ადგილობრივ თემში ქალთა მიმართ ძალადობის მიმართულებით სპეციფიკური მახასიათებლების შესახებ", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. საქართველოს სახალხო დამცველმა სკოლის მიერ სტიპენდიის გაცემის წესი სქესის ნიშნით დისკრიმინაციის წამახალისებლად მიიჩნია. 2018 წლის 6 თებერვალს საქართველოს სახალხო დამცველმა ზოგადი წინადადებით მიმართა შპს „იაკობ გოგებაშვილის სახელობის სასწავლებელს", რომ სასტიპენდიო პროგრამის გამოცხადებისას დაიცვას თანასწორობის პრინციპი და შეიმუშაოს სპეციალური დებულება სტიპენდიის მიღების წესისა და მიმღებ პირთა განსაზღვრის კრიტერიუმების შესახებ. კავშირ „საფარის" განცხადების თანახმად, იაკობ გოგებაშვილის სახელობის სასწავლებელმა 2017-2018 წლისთვის დააწესა სტიპენდია მე-8 კლასში გადამსვლელი ბიჭებისათვის. აღნიშნული სტიპენდიის მოპოვების შესაძლებლობა კი არ აქვთ მე-8 კლასში გადამსვლელ გოგონებს. სრულად  წყარო: ორგანიზაციის ვებგვერდი

თბილისი. მწერალთა სახლი და ქალთა ფონდი საქართველოში იწყებს პროექტს „ფემინსტური კითხვა მწერალთა სახლში", რომლის ფარგლებშიც მწერალთა სახლში თანამედროვე ქალი ავტორების ტექსტების საჯარო კითხვა მოეწყობა. პროექტის მთავარი მიზანია თანამედროვე ფემინისტური ლიტერატურის პოპულარიზაცია, მკითხველისათვის ქალი ავტორების გაცნობა და იმ გამოწვევებსა და პრობლემებზე საუბარი, რასაც ჩვენს გარემოში აწყდება ქალი. სრულად... წყარო: ორგანიზაციის ვებგვერდი სოციალურ ქსელში

თბილისი. საქართველოს სახალხო დამცველმა, სექსუალური ორიენტაციის ნიშნით სავარაუდო დისკრიმინაციის ფაქტზე, თბილისის საქალაქო სასამართლოში მეგობრის მოსაზრება წარადგინა. განმცხადებელი, რომლის ინტერესებსაც სასამართლოში ააიპ „ქალთა ინიციატივების მხარდამჭერი ჯგუფი" (WISG) წარმოადგენს, მიუთითებდა, რომ, სექსუალური ორიენტაციის გამო, მას კარაოკე ბარებში შესვლის შესაძლებლობას არ აძლევენ. სრულად  წყარო: ორგანიზაციის ვებგვერდი

თბილისი. „ადამიანის უფლებების სწავლებისა და მონიტორინგის ცენტრი" (EMC) აქვეყნებს ცენტრის მკვლევარის, ადამიანის უფლებათა სამართლის იურისტის, ლიკა ჯალაღანიას სტატიას „დანაშაული და სასჯელი ქვიარ წინააღმდეგობაში". ავტორი მიმოიხილავს საქართველოში არსებულ ვითარებას, ბოლო დროს მსოფლიოში დაფიქსირებული ტენდენციის ფონზე, რომელიც ნეოლიბერალურ ქვიარ პოლიტიკას, მისი სადამსჯელო და საპოლიციო აქტივობებში ჩართულობისა და კარცერული სისტემის გაძლიერების პროცესის ნაწილად ქცევის გამო აკრიტიკებს. სრულად  წყარო: ორგანიზაციის ვებგვერდი

თბილისი. მირანდა ფაღავას მიმართ განხორციელებულ ძალადობასთან დაკავშირებით, „კოალიცია თანასწორობისთვის’’ განცხადებას ავრცელებს და სამართალდამცავ ორგანოებს ოპერატიული და ეფექტიანი რეაგირებისკენ მოუწოდებს. „საზოგადოებაში არსებული ტრანსფობიური წინასწარგანწყობები - ნეგატიური დამოკიდებულება ტრანსგენდერი ადამიანების მიმართ, რომელიც შესაძლოა გამოხატული იყოს ზიზღის, სიძულვილის, აგრესიული ქცევის სახით - განსაკუთრებით მაღალია საქართველოში, რის გამოც ტრანსგენდერი ადამიანები განსაკუთრებით მოწყვლადი არიან ძალადობრივი დანაშაულების მიმართ და აწყდებიან ბარიერებს მართლმსაჯულების მისაწვდომობის კუთხით", - ნათქვამია განცხადებაში. სრულად  წყარო: gyla.ge

თბილისი. ქალთა საინფორმაციო ცენტრი აგრძელებს მუშაობას ადგილობრივი თვითმმართველობის დონეზე გენდერული პოლიტიკის გაძლიერების მიმართულებით. „ამ საქმიანობის ფარგლებში გაიმართა სამუშაო შეხვედრა, რომლის მონაწილეები გახდნენ თბილისის საკრებულოს წევრები და ქალთა საინფორმაციო ცენტრის წარმომადგენლები. შეხვედრა მიეძღვნა გენდერული თანასწორობის პოლიტიკის გაძლიერებისა და ადგილობრივ დონეზე გენდერული ინსტიტუციონალური მექანიზმების ჩამოყალიბების საკითხებს. შეხვედრაზე განხილული იქნა ახალი გენდერული საბჭოს ჩამოყალიბების, ადგილობრივ დონეზე გენდერული პოლიტიკის განხორციელებისათვის შემუშავებული სამოქმედო გეგმის განახლების და მომავალი თანამშრომლობის გეგმები. ასევე გამოითქვა რეკომენდაციები, რომელიც ეხებოდა ახალი გენდერული საბჭოს დაკომპლექტების საკითხს, დაიგეგმა კონკრეტული ერთობლივი ღონისძიებები", ნათქვამია ქალთა საინფორმაციო ცენტრის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. ქალთა ფონდი საქართველოში (Women's Fund in Georgia) ავრცელებს ინფოგრაფიკას, სადაც ასახულია ინფორმაცია ორგანიზაციის მიერ გაცემულ გრანტებზე. • გრანტების გაცემა ორგანიზაციის ერთ-ერთი ძირითადი მიმართულებაა. • გასული წლის განმავლობაში ფონდმა შეძლო ქალთა ორგანიზაციებსა და საინიციატივო ჯგუფებზე გაეცა 63 გრანტი. • დაარსების დღიდან ფონდს სულ 600-მდე გრანტი აქვს გაცემული. სრულად... წყარო: ორგანიზაციის ვებგვერდი სოციალურ ქსელში

თბილისი. 23 იანვარს ადამიანის უფლებათა დაცვის დეპარტამენტის პრეზენტაცია გაიმართა. პრეზენტაციაზე შინაგან საქმეთა მინისტრმა, გიორგი გახარიამ განაცხადა, რომ მიმდინარე რეფორმა სტრუქტურულ ნაწილში პირველ რიგში კრიმინალურ, სასაზღვრო, ასევე საპატრულო პოლიციას შეეხება. „დეპარტამენტის თანამშრომლების მოვალეობა იქნება ქალთა მიმართ ძალადობის, სიძულვილით მოტივირებული დანაშაულის, ტრეფიკინგის, არასრულწლოვანთა მიერ და მათ მიმართ ჩადენილი დანაშაულის ფაქტებზე გამოძიების და ადმინისტრაციული საქმისწარმოების მონიტორინგი", ნათქვამია გენდერული საინფორმაციო პორტალის ვებგვერდზე. სრულად... წყარო: ginsc.net

თბილისი. ადამიანის უფლებათა ცენტრი აქვეყნებს ლანა გიორგაძის სტატიას: „რა პრობლემები იჩენს თავს განქორწინებისა და ალიმენტის დანიშვნის პროცესში". „აუცილებელია აღინიშნოს ერთ-ერთი პრობლემური საკითხი, რომელიც კანონის ხარვეზად შეიძლება, მივიჩნიოთ. კერძოდ, როდესაც სასამართლოს გადაწყვეტილებით არასრულწლოვანს ენიშნება ალიმენტი, ამასთან, ოჯახი რეგისტრირებულია სოციალურად დაუცველთა ერთიან ბაზაში, ასეთ შემთხვევაში ბენეფიციარი/ სოციალური დახმარების მიმღები კარგავს საარსებო შემწეობას. ამ დროს ბენეფიციარები, მათივე სურვილით, უარს აცხადებენ ალიმენტის მიღებაზე, იმ საფუძვლით, რომ სოციალური დახმარების მიმღებს უჩნდება დამატებითი შემოსავლის წყარო, რომელიც იწვევს ყოველთვიური შემწეობის შეწყვეტას", ნათქვამია სტატიაში. სრულად... წყარო: humanrights.ge

შიდა ქართლი. 18 იანვარს „კეთილდღეობის და განვითარების ცენტრთან” არსებულმა სამოქალაქო აქტივიზმის ცენტრმა, კოლეჯ „განთიადის” სტუდენტებისათვის ჩაატარა ტრენინგი „ოჯახური ძალადობა და საფრთხეები". შეხვედრის მიზანი იყო ახალგაზრდებისათვის ზოგადი ინფორმაციის მიწოდება ოჯახური ძალადობის შესახებ. სრულად... წყარო: ორგანიზაციის ვებგვერდი სოციალურ ქსელში

თბილისი. სახალხო დამცველი უარყოფით დამოკიდებულებას გამოხატავს შპს „მარსის" (კრისტალბეთი) სარეკლამო პოსტერის მიმართ. პოსტერზე გაკეთებულია წარწერა – „სლოტები რომელიც იძლევა", გვერდით კი გამოსახულია ქალი. სახალხო დამცველი მიიჩნევს, რომ აღნიშნული რეკლამა სექსისტური შინაარსისაა და საზოგადოებაში ამკვიდრებს მოსაზრებას, რომ ქალი სექსუალურ კავშირზე მარტივად თანხმდება. ომბუდსმენი შპს „მარსს" მოუწოდებს, შეცვალოს სარეკლამო პოსტერი იმგვარად, რომ იგი არ ახალისებდეს ქალთა ან სხვა ჯგუფის მიმართ დისკრიმინაციას და მომავალში სამეწარმეო საქმიანობა თანასწორობის პრინციპის დაცვით წარმართოს. სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაცია საქართველოს პარლამენტს საკანონმდებლო წინადადებით მიმართავს, რომლის მიზანია მეუღლეთა ქონებრივი უფლებების დაცვის სამართლებრივი გარანტიების გაზრდა. ინციატივა გულისხმობს ქორწინებაში მყოფი პირის მიერ ქორწინების განმავლობაში შეძენილ უძრავ ქონებაზე თანასაკუთრების რეგისტრაციის შესაძლებლობას, მეორე მეუღლის თანხმობის გარეშე. როგორც საია-ში განმარტავენ, საკანონმდებლო წინადადება განსაკუთრებით ხელს შეუწყობს ქორწინებაში მყოფ ქალთა ქონებრივი უფლებების დაცვას, რადგან საქართველოში არსებული პრაქტიკის გათვალისწინებით, ქალების სახელზე ძირითადად არ არის დარეგისტრირებული თანასაკუთრებაში არსებული ქონება და მათ, უმეტეს შემთხვევაში, უწევთ სასამართლოს გზით თანასაკუთრებაზე უფლების აღიარება. სრულად  წყარო: ორგანიზაციის ვებგვერდი

თბილისი. „ქალთა ფონდი საქართველოში"-ს მიერ დაფინანსებული პროექტების ფარგლებში: საქართველოში პირველად, ფემინიზმით დაინტერესებული უსინათლო და მცირემხედველი ქალებისთვის შეიქმნება ფემინისტური ლიტერატურის აუდიოვერსია, ხმოვანი წიგნები. აღნიშნული მასალები აიტვირთება ინტერნეტ სივრცეშიც და გავრცელდება ბიბლიოთეკებსა თუ უსინათლოთა ორგანიზაციებში უსასყიდლოდ. სრულად... წყარო: ორგანიზაციის ვებგვერდი სოციალურ ქსელში

თბილისი. პარტნიორობა ადამიანის უფლებებისთვის (PHR) საჩივრის საფუძველზე, არასრულწლოვანზე ძალადობა განმეორებით, გენდერული ასპექტის გათვალისწინებით შეისწავლა და ორგანიზაციის მიერ მითითებული შენიშვნები გაითვალისწინა. „ჩვენი საჩივრის პასუხად, ორგანიზაციას სოციალური მომსახურების სააგენტომ 26 დეკემბერს აცნობა, რომ განმეორებით შეისწავლეს საქმე და სოციალური მუშაკის ჩარევის შედეგად, მოძალადე მშობელმა ნებაყოფლობით გადასცა მინდობილობა მეორე მშობელს. შედეგად კი, არასრულწლოვნის მიმართ აღარ ხორციელდება ძალადობა", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. ორგანიზაცია „განიარაღება და არაძალადობა" (DAN), BST ფინანსური ხელშეწყობით, ქალებს უფასო იურიდიულ დახმარებასა და ბიზნეს-კონსულტაციებს სთავაზობს. ეს შეთავაზება მხარდაჭერილია პროექტის, "Women for Cross-border Cooperation” ფარგლებში და ეხება ქალებს, რომლებსაც აქვთ ბიზნესი ან ბიზნეს-იდეა და ბიზნეს და იურიდიულ კონსულტაციებს საჭიროებენ. ბიზნეს-კონსულტაციები ჩატარდება ყოველ ორშაბათს და ხუთშაბათს 11:00 -17:00 საათზე; ხოლო იურიდიული კონსულტაციები - ყოველ ორშაბათს და სამშაბათს. მისამართი: თბილისი, ხორავას ქ. 7, მე-3 სართული, ოთახი 5. შესაძლებელია ონლაინ-კონსულტაციების გამართვაც, ელ-ფოსტაზე: info@dan.org.ge კონსულტაციებისთვის საჭიროა წინასწარი ჩაწერა ნომრებზე 551 155 593 და 599 700 632, ან ელ-ფოსტით: info@dan.org.ge სრულად  წყარო: ორგანიზაციის გვერდი სოციალურ ქსელში

თბილისი. 9 იანვარს სახალხო დამცველმა ნინო ლომჯარიამ ოჯახში ძალადობის მსხვერპლ დ.გ-ს მიმართ დაცვის ეფექტური ღონისძიებების გატარების მიზნით, შინაგან საქმეთა მინისტრსა და საქართველოს მთავარ პროკურორს მიმართა. „სახალხო დამცველი სამართალდამცავ უწყებებს მოუწოდებს გათვალისწინებულ იქნეს ქალთა მიმართ და ოჯახში ძალადობის კუთხით ქვეყანაში არსებული მძიმე მდგომარეობა, საფუძვლიანად იქნეს გაანალიზებული ის საფრთხეები, რაც შესაძლოა მსხვერპლს და მის ოჯახის წევრებს ემუქრებოდეს და უზრუნველყოფილ იქნეს დაცვის ეფექტიანი ღონისძიებების გატარება", ნათქვამია განცხადებაში. სრულად... წყარო: ombudsman.ge

თბილისი. პარტნიორობა ადამიანის უფლებებისთვის (PHR) სასამართლოში ძალადობაგამოვლილი ქალის ინტერესებს იცავდა. „სასამართლომ გაიზიარა საქმეში წარდგენილი თბილისის სააპელაციო სასამართლოს გადაწყვეტილება მსხვერპლის ფსიქიატრიულ დაწესებულებაში მოთავსების უკანონოდ მიჩნევის შესახებ და დაადგინა, რომ ფსიქიატრიულ დაწესებულებაში მოთავსებით ქალის მუდმივი დაშინება, მესამე პირებისთვის ინფორმაციის მიწოდება მსხვერპლის ჯანმრთელობის მდგომარეობის შესახებ და დამცირება, იწვევს ადამიანის პატივის და ღირსების შელახვას, აღნიშნული კი, წარმოადგენდა ფსიქოლოგიურ ძალადობას", ნათქვამია ორგანიზაციის ვებგვერდზე. სრულად... წყარო: phrgeorgia.wordpress.com

თბილისი. კავშირი „საფარის" ბლოგპოსტის თანახმად, პირველად მსოფლიოში, ისლანდიამ შრომის ანაზღაურებაში გენდერული განსხვავება აკრძალა. „დღესდღეობით, ისლანდიის პარლამენტის 50% ქალებისგან შედგება, ხოლო მსოფლიო ეკონომიკურ ფორუმზე, ბოლო ცხრა წლის მანძილზე, ისლანდიას ზედიზედ ასახელებენ, როგორც გენდერული თანასწორობის სფეროში ყველაზე დიდი მიღწევების მქონე ქვეყანას, ასევე, როგორც ლიდერს ქალთა პოლიტიკური უფლებების გაფართოებაში და მძლავრ გარანტს შრომის ანაზღაურების საკითხში თანასწორობის საქმეში. ისლანდიის მთავრობამ განაცხადა, რომ 2022 წლისთვის იგი ქვეყანაში შრომით ანაზღაურებაში გენდერული განსხვავებების სრულად აღმოფხვრას გეგმავს", ნათქვამია ორგანიზაციის ვებგვერდზე. სრულად... წყარო: sapari.ge

თბილისი. ოჯახში ძალადობის საქმეებზე არაეფექტური რეაგირების გამო, საქართველოს სახალხო დამცველმა შინაგან საქმეთა სამინისტროს რეკომენდაციით მიმართა. სახალხო დამცველი მიიჩნევს, რომ აუცილებელია დამცავი და შემაკავებელი ორდერების აღსრულების მონიტორინგის სისტემის დანერგვა და მათი ეფექტიანი ფუნქციონირების უზრუნველყოფა, ოჯახში ძალადობის შემთხვევების რისკის შეფასების ინსტრუქციის შემუშავება და თითოეულ ოჯახში ძალადობის საქმეზე ინდივიდუალური სამოქმედო გეგმის გაწერა. ასევე, უნდა ჩატარდეს შესაძლო ოჯახში ძალადობის და ოჯახური კონფლიქტის შესახებ სსიპ 112–ის სამსახურში მიღებული შეტყობინებების ანალიზი. სრულად  წყარო: ორგანიზაციის ვებგვერდი